ᠬᠠᠭᠤᠴᠢ ᠬᠦᠥᠷᠨᠢᠭᠰᠡᠨ ᠬᠠᠭᠤᠴᠢᠨ ᠪᠠᠭᠤᠷᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/10/21
     ᠊᠊᠊᠊᠊᠊᠊ ᠴᠤᠬᠤᠷ ᠬᠠᠯᠬ᠎ᠠ ᠬᠤᠰᠢᠭᠤᠨ ᠤ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠸᠠᠩ ᠨᠤᠯᠮᠠᠰᠡᠷᠡᠩ ᠤᠨ ᠰᠠᠭᠤᠵᠦ ᠪᠠᠶᠢᠭᠰᠠᠨ ᠤᠷᠳᠤᠨ ᠤ ᠪᠠᠭᠤᠷᠢ ᠶᠢᠨ ᠲᠤᠬᠠᠢ ᠲᠡᠮᠲᠡᠭᠯᠡᠪᠡ      ᠤᠨ ᠴᠠᠭ ᠤᠨ ᠤᠷᠤᠰᠬᠠᠯ ᠤᠯᠠᠨ ᠶᠠᠭᠤᠮ᠎ᠠ ᠶᠢ ᠠᠪᠴᠦ ᠶᠠᠪᠤᠬᠤ ᠶᠢᠨ ᠬᠠᠵᠠᠭᠤ ᠪᠠᠷ ᠪᠠᠰᠠ ᠵᠠᠷᠢᠮ ᠵᠦᠢᠯᠡᠰ ᠢ ᠦᠯᠡᠳᠡᠭᠡᠵᠦ ᠦᠭᠳᠡᠭ ᠨᠢ ᠰᠠᠶᠢᠬᠠᠨ᠃ ᠡᠷᠲᠡᠨ ᠠᠴᠠ ᠦᠯᠡᠳᠡᠭᠳᠡᠨ ᠢᠷᠡᠭᠰᠡᠨ ᠤᠯᠠᠨ ᠰᠠᠶᠢᠬᠠᠨ ᠵᠤᠬᠢᠶᠠᠯ ᠪᠦᠲᠦᠭᠡᠯ᠂ ᠳᠠᠭᠤᠤ ᠤᠷᠠᠯᠢᠭ ᠵᠡᠷᠭᠡ ᠨᠢ ᠬᠦᠮᠦᠰ ᠲᠤ ᠤᠶᠤᠨ ᠤ ᠬᠦᠷᠲᠡᠭᠡᠯ ᠪᠤᠯᠵᠦ ᠪᠠᠶᠢᠳᠠᠭ ᠪᠤᠯ ᠲᠡᠳᠡ ᠨᠡᠷ ᠤᠨ ᠬᠢᠵᠦ ᠪᠦᠲᠦᠭᠡᠭᠰᠡᠨ ᠬᠡᠷ ᠪᠠᠷᠢᠯᠭ᠎ᠠ᠂ ᠡᠳ᠋ᠯᠡᠵᠦ ᠬᠡᠷᠡᠭᠯᠡᠭᠰᠡᠨ ᠵᠦᠢᠯᠡᠰ ᠨᠢ ᠴᠤ ᠬᠤᠪᠤᠷ ᠨᠠᠨᠳᠢᠨ ᠳᠤᠷᠠᠰᠬᠠᠯᠲᠤ ᠵᠦᠢᠯ᠂ ᠮᠤᠨᠳᠠᠭ ᠶᠡᠭᠡ ᠰᠤᠶᠤᠯ ᠤᠨ ᠦᠪ ᠪᠤᠯᠤᠭᠰᠠᠨ ᠪᠠᠶᠢᠳᠠᠭ᠃ ᠭᠡᠬᠦ ᠳᠤ ᠪᠠᠨ ᠲᠡᠳᠡᠭᠡᠷ ᠨᠢ ᠶᠡᠭᠡ ᠪᠠᠭ᠎ᠠ ᠪᠠᠷ ᠢᠶᠠᠨ᠂ ᠨᠦᠯᠦᠬᠡ ᠲᠤᠰᠬᠠᠯ ᠢᠶᠠᠷ ᠢᠶᠠᠨ᠂ ᠴᠠᠭ ᠤᠨ ᠤᠷᠲᠤ ᠤᠬᠤᠷ ᠢᠶᠠᠷ ᠢᠶᠠᠨ ᠁ ᠭᠡᠳ ᠤᠯᠠᠨ ᠵᠦᠢᠯ ᠠᠴᠠ ᠰᠢᠯᠲᠠᠭᠠᠯᠠᠭᠳᠠᠵᠦ ᠦᠨ᠎ᠡ ᠦᠷᠳᠡᠭ ᠨᠢ ᠴᠤ ᠠᠳᠠᠯᠢ ᠪᠤᠰᠤ ᠪᠤᠯᠳᠠᠭ ᠤᠴᠢᠷᠲᠠᠢ᠃ ᠶᠠᠭ ᠦᠨᠡᠨ ᠳᠤ ᠪᠠᠨ ᠪᠢᠳᠡ ᠬᠦᠨᠳᠦᠳᠭᠡᠵᠦ ᠦᠵᠡᠳᠡᠭ ᠯᠠ ᠶᠤᠮ ᠪᠤᠯ ᠲᠡᠳᠡᠭᠡᠷ ᠤᠨ ᠠᠯᠢ ᠨᠢ ᠴᠤ ᠭᠡᠰᠡᠨ ᠶᠠᠯᠢᠮ ᠦᠬᠡᠢ ᠵᠦᠢᠯ ᠶᠠᠭᠠᠬᠢᠭᠰᠠᠨ ᠴᠤ ᠪᠢᠰᠢ ᠪᠤᠯᠬᠤ ᠨᠢ ᠭᠠᠷᠴᠠᠭ᠎ᠠ ᠦᠬᠡᠢ᠃ ᠡ᠊ᠨᠳᠡ ᠪᠢᠳᠡ ᠰᠤᠷᠪᠤᠯᠵᠢᠯᠠᠭ᠎ᠠ ᠶᠢᠨ ᠳᠤᠮᠳᠠ ᠲᠤᠬᠢᠶᠠᠯᠳᠤᠭᠰᠠᠨ ᠬᠡᠳᠦᠬᠡᠨ ᠲᠠᠰᠤᠯᠭ᠎ᠠ ᠬᠠᠭᠤᠴᠢᠨ ᠪᠠᠭᠤᠷᠢ ᠶᠢᠨ ᠲᠤᠬᠠᠢ ᠬᠠᠭᠤᠴᠢ ᠵᠤᠭᠤᠭ ᠠᠴᠠ ᠨᠢ ᠬᠤᠪᠢᠶᠠᠯᠴᠠᠬᠤ ᠶᠢ ᠰᠠᠨᠠᠯ᠎ᠠ᠃      ᠮᠠᠩᠬᠠᠨ ᠰᠤᠮᠤ ᠶᠢᠨ ᠪᠤᠶᠠᠨᠲᠤ ᠬᠤᠭᠤᠯᠠᠢ ᠠᠶᠢᠯ ᠢᠶᠠᠷ ᠰᠤᠷᠪᠤᠯᠵᠢᠯᠠᠵᠦ ᠶᠠᠪᠤᠬᠤ ᠳᠤ᠂ ᠵᠠᠮ ᠤᠨ ᠬᠠᠵᠠᠭᠤᠳᠡᠬᠢ ᠲᠡᠮᠦᠷ ᠰᠡᠷᠡᠯᠵᠢ ᠶᠢᠨ ᠬᠠᠰᠢᠶᠠᠨ ᠳᠤ ᠨᠢᠬᠡ ᠡᠪᠳᠡᠷᠬᠡᠢ ᠪᠤᠰᠤᠭ᠎ᠠ ᠭᠡᠷ ᠬᠠᠷᠠᠭᠳᠠᠯ᠎ᠠ᠃ ᠸᠠᠭᠠᠷ ᠪᠤᠯᠤᠨ ᠲᠤᠭᠤᠰᠬ᠎ᠠ ᠨᠢ ᠬᠡᠳᠦᠨ ᠦᠡᠭᠭᠡ ᠶᠢᠨ ᠪᠤᠯᠵᠦ ᠠᠯᠠᠭᠯᠠᠨ ᠬᠠᠷᠠᠭᠳᠠᠬᠤ ᠨᠢ ᠰᠡᠬᠦᠯᠡᠷ ᠨᠢ ᠪᠠᠰᠠ ᠡᠬᠦᠨ ᠢ ᠵᠠᠰᠠᠵᠦ ᠰᠡᠯᠪᠢᠵᠦ ᠦᠡᠭᠭᠡᠷᠡᠭᠰᠡᠨ ᠬᠡᠳᠡᠭ ᠨᠢ ᠲᠤᠳᠤᠷᠬᠠᠢ᠃ ᠡᠮᠦᠨ᠎ᠡ ᠬᠤᠶᠢᠨ᠎ᠠ ᠬᠤᠶᠠᠷ ᠰᠠᠷᠠᠪᠴᠢ ᠶᠢ ᠨᠢ ᠳᠠᠭᠠᠭᠠᠳ ᠬᠠᠶᠢᠯᠠᠰᠤᠨ ᠮᠤᠳᠤᠳ ᠪᠠᠭᠴᠠᠷᠠᠨ ᠤᠷᠭᠤᠵᠦ ᠬᠡᠷ ᠠᠴᠠ ᠦᠨᠳᠦᠷ ᠪᠤᠯᠵᠠᠢ᠃      ᠊᠊᠊᠊᠊᠊ ᠡᠨᠡ ᠴᠢᠨᠢ ᠴᠤᠬᠤᠷ ᠬᠠᠯᠬ᠎ᠠ ᠬᠤᠰᠢᠭᠤᠨ ᠤ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠸᠠᠩ ᠨᠤᠯᠮᠠᠰᠡᠷᠡᠩ ᠤᠨ ᠰᠠᠭᠤᠵᠦ ᠪᠠᠶᠢᠭᠰᠠᠨ ᠭᠡᠷ᠃ ᠡᠮᠦᠨ᠎ᠡ ᠬᠡᠳᠦᠨ ᠵᠢᠯ ᠳᠡᠭᠡᠷ᠎ᠡ ᠱᠠᠳᠤᠨ ᠠᠴᠠ ᠲᠤᠰ ᠸᠠᠩ ᠤᠨ ᠤᠷᠳᠤ ᠶᠢ ᠵᠠᠰᠠᠵᠦ ᠰᠢᠨᠡᠳᠭᠡᠵᠦ ᠦᠭᠬᠦ ᠭᠡᠳ ᠪᠠᠰᠠ ᠵᠠᠰᠠᠵᠦ ᠦᠭᠭᠦᠭᠰᠡᠨ ᠦᠬᠡᠢ ᠬᠠᠶᠠᠴᠢᠬᠠᠵᠠᠢ᠃ ᠡᠶᠢᠮᠦ ᠨᠢᠬᠡ ᠴᠢᠯᠠᠭᠤᠨ ᠫᠠᠶᠢᠰᠠ ᠪᠤᠰᠬᠠᠵᠦ ᠦᠭᠭᠦᠭᠡᠳ ᠢᠡᠭᠭᠢᠬᠡᠳ ᠯᠠ ᠲᠠᠯᠪᠢᠵᠦ ᠪᠠᠶᠢᠨ᠎ᠠ ᠭᠡᠵᠦ ᠬᠠᠮᠲᠤ ᠶᠠᠪᠤᠭᠰᠠᠨ ᠲᠤᠰ ᠭᠠᠴᠠᠭᠠᠨ ᠤ ᠭᠠᠴᠠᠭᠠᠨ ᠳᠠᠷᠤᠭ᠎ᠠ ᠰᠤᠳᠥᠪᠢᠯᠢᠭ ᠭᠤᠸᠠᠢ ᠲᠡᠷᠭᠡᠳᠡ ᠪᠠᠨ ᠪᠠᠶᠢᠭ᠎ᠠ ︽ᠬᠠᠯᠬ᠎ᠠ ᠸᠠᠩ ᠤᠨ ᠤᠷᠤᠨ ᠰᠠᠭᠤᠴᠠ ᠶᠢᠨ ᠪᠠᠭᠤᠷᠢ︾ ᠬᠡᠮᠡᠬᠦ ᠬᠢᠲᠠᠳ ᠮᠤᠩᠭᠤᠯ ᠦᠰᠦᠭ ᠬᠠᠪᠰᠤᠷᠭᠠᠭᠰᠠᠨ ᠴᠢᠯᠠᠭᠤᠨ ᠫᠠᠶᠢᠰᠠ ᠶᠢ ᠵᠢᠭᠠᠵᠦ ᠲᠠᠨᠢᠯᠴᠠᠭᠤᠯᠤᠨ᠎ᠠ᠃      ᠪᠢᠳᠡ ᠶᠠᠭ ᠢᠡᠭᠭᠢᠵᠦ ᠸᠠᠩ ᠤᠨ ᠤᠷᠳᠤᠨ ᠤ ᠪᠠᠭᠤᠷᠢ ᠶᠢ ᠰᠤᠨᠢᠷᠬᠠᠵᠦ ᠵᠤᠭᠰᠤᠲᠠᠯ᠎ᠠ ᠵᠠᠮ ᠢᠶᠠᠷ ᠪᠠᠰᠠ ᠨᠢᠬᠡ ᠨᠠᠰᠤᠲᠠᠨ ᠭᠤᠷᠪᠠᠨ ᠬᠦᠷᠳᠦᠳᠦ ᠴᠠᠬᠢᠯᠭᠠᠨ ᠬᠦᠳᠡᠯᠬᠡᠬᠦᠷᠲᠦ ᠲᠡᠷᠭᠡ ᠵᠢᠯᠤᠭᠤᠳᠤᠨ ᠦᠡᠭᠭᠡᠷᠡᠬᠦ ᠬᠠᠷᠠᠭᠳᠠᠪᠠ᠃ ︽ᠡᠨᠡ ᠠᠪᠤ ᠪᠠᠰᠠ ᠡᠨᠡ ᠪᠠᠭᠤᠷᠢ ᠶᠢᠨ ᠲᠤᠬᠠᠢ ᠦᠯᠢᠬᠡᠷ ᠲᠡᠦᠬᠡ ᠶᠢ ᠰᠠᠶᠢᠨ ᠮᠡᠳᠡᠨ᠎ᠡ ᠰᠢᠦ︾ ᠭᠡᠬᠦ ᠭᠠᠴᠠᠭᠠᠨ ᠳᠠᠷᠤᠭ᠎ᠠ ᠶᠢᠨ ᠳᠠᠨᠢᠯᠴᠠᠭᠤᠯᠭ᠎ᠠ ᠪᠠᠷ ᠪᠢᠳᠡ ᠲᠡᠷᠡ ᠨᠠᠰᠤᠲᠠᠨ ᠤ ᠵᠠᠮ ᠢ ᠨᠢ ᠲᠤᠰᠴᠤ ᠰᠤᠷᠪᠤᠯᠵᠢᠯᠠᠪᠠ᠃ ᠨᠠᠰᠤᠲᠠᠨ ᠤ ᠨᠡᠷ᠎ᠡ ᠶᠢ ᠯᠢ ᠳᠡᠮᠡᠷᠢᠨᠴᠤᠭᠯᠠ ᠭᠡᠳᠡᠭ᠂ ᠡᠨᠡ ᠵᠢᠯ ᠵᠢᠷᠠ ᠶᠢᠰᠦ ᠬᠦᠷᠴᠡᠢ᠃      ᠊᠊᠊᠊᠊᠊ ᠤᠤᠯ ᠳᠤ ᠪᠠᠨ ᠮᠠᠨ ᠤ ᠡᠨᠡ ᠨᠤᠲᠤᠭ ᠲᠤ ᠡᠶᠢᠮᠦ ᠤᠯᠠᠨ ᠠᠶᠢᠯ ᠡᠷᠦᠬᠡ ᠪᠠᠶᠢᠭᠰᠠᠨ ᠦᠬᠡᠢ ᠰᠢᠦ᠃ ᠡᠨᠡ ᠸᠠᠩ ᠤᠨ ᠤᠷᠳᠤᠨ ᠤ ᠪᠠᠭᠤᠷᠢ ᠴᠢᠨᠢ ᠡᠷᠲᠡ ᠳᠤ ᠪᠠᠨ ᠪᠤᠯ ᠪᠦᠷ ᠠᠶᠠᠭᠠᠨ ᠬᠢᠷᠢ ᠶᠢᠨ ᠪᠦᠲᠦᠬᠦᠨ ᠴᠠᠭᠠᠨ ᠪᠤᠷᠭᠠᠰᠤ ᠤᠷᠭᠤᠵᠦ ᠪᠠᠶᠢᠭᠰᠠᠨ ᠭᠠᠵᠠᠷ ᠭᠡᠨ᠎ᠡ᠃ ᠡᠨᠡ ᠴᠤᠬᠤᠷ ᠬᠠᠯᠬ᠎ᠠ ᠬᠤᠰᠢᠭᠤᠨ ᠤ ᠨᠤᠯᠮᠠᠰᠡᠷᠡᠩ ᠸᠠᠩ ᠤᠤᠯ ᠳᠤ ᠪᠠᠨ ᠤᠳᠤ ᠶᠢᠨ ᠯᠢᠦ ᠵᠢᠶᠠᠽᠢ ᠤᠷᠴᠢᠮ ᠤᠨ ᠨᠤᠶᠠᠨ ᠬᠤᠷᠤᠭ᠎ᠠ ᠬᠡᠮᠡᠬᠦ ᠭᠠᠵᠠᠷ ᠰᠠᠭᠤᠵᠦ ᠪᠠᠶᠢᠭᠰᠠᠨ ᠭᠡᠳᠡᠭ᠂ ᠮᠠᠨ ᠤ ᠡ᠊ᠨᠳᠡ ᠸᠠᠩ ᠤᠨ ᠰᠠᠩ ᠨᠢ ᠪᠠᠶᠢᠭᠰᠠᠨ ᠪᠦᠬᠡᠳ ᠸᠠᠩ ᠤᠨ ᠳᠡᠬᠦᠦ ᠨᠢ ᠬᠠᠷᠠᠨᠤᠬᠠᠢ ᠬᠡᠳᠡᠭ ᠬᠦᠮᠦᠨ ᠰᠠᠭᠤᠵᠦ ᠪᠠᠶᠢᠭᠰᠠᠨ ᠭᠡᠨ᠎ᠡ᠃ ᠰᠡᠬᠦᠯᠡᠷ ᠨᠢ ᠸᠠᠩ ᠤᠨ ᠤᠷᠳᠤᠨ ᠨᠢ ᠭᠠᠯᠳᠠᠭᠳᠠᠭᠰᠠᠨ ᠠᠴᠠ ᠨᠤᠯᠮᠠᠰᠡᠷᠡᠩ ᠸᠠᠩ ᠡ᠊ᠨᠳᠡ ᠢᠷᠡᠵᠦ ᠰᠠᠭᠤᠭᠰᠠᠨ ᠶᠤᠮ᠃ ᠬᠠᠭᠤᠷᠮᠠᠭ ᠮᠠᠨᠵᠦ ᠶᠢᠨ ᠦᠶ᠎ᠡ ᠳᠤ ᠴᠤᠬᠤᠷ ᠬᠠᠯᠬ᠎ᠠ ᠪᠤᠯᠤᠨ ᠲᠠᠩᠭᠤᠳ ᠬᠠᠯᠬ᠎ᠠ ᠬᠤᠶᠠᠷ ᠬᠤᠰᠢᠭᠤ ᠶᠢ ᠰᠥᠢ ᠳ᠋ᠥ᠋ᠩ ᠰᠢᠶᠠᠨ ᠳᠤ ᠬᠠᠮᠢᠶᠠᠷᠤᠭᠤᠯᠤᠭᠰᠠᠨ ᠢᠶᠠᠷ ᠴᠤᠬᠤᠷ ᠬᠠᠯᠬ᠎ᠠ ᠬᠤᠰᠢᠭᠤ ᠳᠤ ᠵᠦᠪᠬᠡᠨ 960 ᠠᠮᠠᠨ ᠲᠤᠭ᠎ᠠ ᠦᠯᠡᠳᠡᠭᠡᠵᠦ ᠦᠭᠭᠦᠭᠰᠡᠨ ᠭᠡᠨ᠎ᠡ᠃ ᠭᠠᠵᠠᠷ ᠲᠠᠷᠢᠶᠠᠨ ᠤ ᠬᠤᠪᠢᠰᠬᠠᠯ ᠳᠡᠭᠡᠷ᠎ᠡ᠂ ᠨᠤᠯᠮᠠᠰᠡᠷᠡᠩ ᠸᠠᠩ ᠲᠡᠮᠡᠴᠡᠭᠳᠡᠨ ᠨᠠᠰᠤ ᠪᠠᠷᠠᠭᠰᠠᠨ ᠪᠦᠬᠡᠳ ᠨᠠᠰᠤ ᠪᠠᠷᠠᠭᠰᠠᠨ ᠤ ᠬᠢᠨᠢ ᠳᠠᠷᠠᠭ᠎ᠠ ᠮᠠᠨ ᠤ ᠡᠪᠦᠭᠡ ᠪᠤᠯᠤᠨ ᠠᠪᠠᠭ᠎ᠠ ᠨᠠᠷ ᠲᠡᠬᠦᠨ ᠢ ᠴᠠᠭᠠᠨ ᠪᠤᠷᠭᠠᠰᠤ ᠪᠠᠷ ᠬᠦᠷᠦᠭᠰᠡᠨ ᠠᠮᠠᠨ ᠰᠠᠭᠰᠤᠨ ᠳᠤ ᠬᠢᠬᠡᠳ ᠢᠷᠭᠡ ᠶᠢᠨ ᠲᠠᠯ᠎ᠠ ᠶᠢᠨ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠲᠠᠯ᠎ᠠ ᠳᠤ ᠠᠪᠠᠴᠢᠵᠦ ᠤᠷᠤᠰᠢᠭᠤᠯᠵᠠᠢ᠃ ᠤᠳᠤ ᠴᠤ ᠰᠢᠷᠤᠢ ᠶᠢᠨ ᠤᠡᠭᠭᠤᠨ ᠨᠢ ᠪᠠᠶᠢᠭᠰᠠᠭᠠᠷ ᠪᠦᠬᠡᠳ ᠦᠷ᠎ᠡ ᠬᠡᠦᠬᠡᠳ ᠨᠢ ᠰᠢᠷᠤᠢ ᠨᠡᠮᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃ ᠡᠨᠡ ᠭᠡᠷ ᠢ ᠪᠠᠷᠰ ᠵᠢᠯ ᠪᠠᠷᠢᠭᠰᠠᠨ ᠬᠡᠯᠴᠡᠳᠡᠭ᠂ ᠲᠡᠭᠡᠵᠦ ᠪᠤᠳᠤᠪᠠᠯ ᠤᠳᠤ 116 ᠵᠢᠯ ᠪᠤᠯᠴᠢᠬᠠᠵᠠᠢ᠃ ᠸᠠᠩ ᠤᠨ ᠤᠷᠳᠤᠨ ᠤ ᠠᠷᠪᠠᠭᠠᠳ ᠲᠠᠰᠤᠯᠭ᠎ᠠ ᠭᠡᠷ ᠢ ᠬᠤᠪᠢᠰᠬᠠᠯ ᠳᠡᠭᠡᠷ᠎ᠡ ᠰᠤᠳᠤ᠂ ᠨᠠᠮᠳᠤᠷᠵᠢ᠂ ᠮᠠᠵᠤᠭᠵᠠᠪ ᠵᠡᠷᠭᠡ ᠭᠤᠷᠪᠠᠨ ᠬᠦᠮᠦᠨ ᠳᠤ ᠬᠤᠪᠢᠶᠠᠵᠦ ᠦᠭᠭᠦᠭᠰᠡᠨ ᠶᠤᠮ᠃ ᠮᠢᠨᠦ ᠮᠡᠳᠡᠭᠡᠵᠢ ᠪᠠᠷ 1956 ᠤᠨ ᠤ ᠦᠶ᠎ᠡ ᠪᠠᠷ ᠡᠨᠡ ᠭᠡᠷ ᠢ ᠰᠤᠳᠤ᠂ ᠨᠠᠮᠳᠤᠷᠵᠢ ᠨᠠᠷ ᠬᠤᠤᠰᠪᠠᠶᠠᠷ ᠤᠨ ᠠᠪᠤ ᠪᠦᠬᠡᠲᠡᠮᠦᠷ ᠭᠡᠬᠦ ᠬᠦᠮᠦᠨ ᠳᠤ 300 ᠲᠦᠬᠦᠷᠢᠭ ᠢᠶᠠᠷ ᠬᠤᠳᠠᠯᠳᠤᠭᠰᠠᠨ ᠭᠡᠳᠡᠭ᠃ ᠡ᠊ᠨᠳᠡ ᠤᠯᠠᠩᠭᠢ ᠡᠷᠦᠬᠡ ᠰᠠᠭᠤᠭᠠᠳ ᠪᠦᠷ ᠵᠤᠬᠢᠷᠠᠵᠦ ᠦᠭᠬᠦ ᠦᠬᠡᠢ᠂ ᠶᠡᠭᠡ ᠬᠠᠲᠠᠭᠤ ᠨᠤᠲᠤᠭ ᠭᠡᠳᠡᠭ ᠪᠤᠯᠬᠤᠷ ᠤᠳᠤ ᠡ᠊ᠨᠳᠡ ᠬᠦᠮᠦᠨ ᠴᠤ ᠰᠠᠭᠤᠬᠤ ᠪᠠᠨ ᠪᠠᠶᠢᠵᠠᠢ᠃ ᠭᠡᠷ ᠨᠢ ᠴᠤ ᠨᠡᠯᠢᠶᠡᠳ ᠨᠢ ᠤᠨᠠᠵᠦ ᠳᠠᠭᠤᠰᠤᠭᠠᠳ ᠤᠳᠤ ᠡᠨᠡ ᠬᠡᠳᠦᠬᠡᠨ ᠲᠠᠰᠤᠯᠭ᠎ᠠ ᠭᠡᠷ ᠬᠤ᠋ ᠰᠢᠶᠤᠤ ᠭᠡᠳᠡᠭ ᠬᠦᠮᠦᠨ ᠤ ᠬᠠᠰᠢᠶᠠᠨ ᠳᠤ ᠪᠠᠶᠢᠨ᠎ᠠ᠃ ᠤᠳᠤ ᠡᠨᠡ ᠴᠢᠨᠢ ᠮᠠᠨ ᠤ ᠮᠠᠩᠬᠠᠨ ᠰᠤᠮᠤ ᠳᠤ ᠦᠯᠡᠳᠡᠭᠳᠡᠵᠦ ᠪᠠᠶᠢᠭ᠎ᠠ ᠴᠤᠷ ᠤᠨ ᠭᠠᠭᠴᠠ ᠡᠷᠲᠡᠨ ᠤ ᠦᠯᠡᠳᠡᠭᠳᠡᠯ ᠵᠦᠢᠯ ᠪᠤᠯᠴᠢᠬᠠᠵᠠᠢ᠂ ᠪᠤᠰᠤᠳ ᠬᠢᠲᠠᠩ ᠤᠨ ᠰᠦᠮ᠎ᠡ᠂ ᠬᠦᠢᠰᠦ ᠶᠢᠨ ᠰᠦᠮ᠎ᠡ᠂ ᠠᠪᠠᠭ᠎ᠠ ᠶᠢᠨ ᠰᠦᠮ᠎ᠡ ᠵᠡᠷᠭᠡ ᠤᠯᠠᠨ ᠰᠠᠶᠢᠬᠠᠨ ᠡᠷᠲᠡᠨ ᠤ ᠪᠠᠷᠢᠯᠭ᠎ᠠ ᠨᠤᠭᠤᠳ ᠪᠦᠷ ᠡᠪᠳᠡᠭᠳᠡᠭᠡᠳ ᠪᠠᠷᠠᠴᠢᠬᠠᠵᠠᠢ᠃ ᠡᠨᠡ ᠸᠠᠩ ᠤᠨ ᠤᠷᠳᠤᠨ ᠤ ᠪᠠᠭᠤᠷᠢ ᠶᠢ ᠬᠠᠮᠠᠭᠠᠯᠠᠪᠠᠯ ᠵᠤᠬᠢᠨ᠎ᠠ ᠭᠡᠵᠦ ᠲᠡᠮᠡᠷᠢᠨᠴᠤᠭᠯᠠ ᠨᠠᠰᠤᠲᠠᠨ ᠦᠪᠡᠷ ᠤᠨ ᠮᠡᠳᠡᠭᠰᠡᠨ ᠢᠶᠠᠨ ᠬᠡᠯᠡᠬᠦ ᠶᠢᠨ  ᠲᠠᠭᠠᠤ ᠳᠤ ᠪᠠᠰᠠ ᠦᠪᠡᠷ ᠤᠨ ᠦᠵᠡᠯ ᠪᠤᠳᠤᠯ ᠢᠶᠠᠨ ᠢᠯᠡᠳᠭᠡᠵᠦ ᠪᠠᠶᠢᠪᠠ᠃      ᠨᠤᠯᠮᠠᠰᠡᠷᠡᠩ ᠬᠡᠷᠬᠢᠨ ᠸᠠᠩ ᠰᠠᠭᠤᠭᠰᠠᠨ ᠲᠤᠬᠠᠢ ᠮᠠᠩᠬᠠᠨ ᠰᠤᠮᠤ ᠶᠢᠨ ᠴᠤᠬᠤᠭᠴᠢ ᠬᠡᠬᠦᠦ ᠠᠶᠢᠯ ᠤᠨ ᠠᠯᠲᠠᠨᠭᠠᠳᠠᠰᠤ ᠭᠤᠸᠠᠢ ᠪᠢᠳᠡᠨ ᠳᠤ ᠪᠠᠰᠠ ᠨᠢᠬᠡ ᠡᠶᠢᠮᠦ ᠦᠯᠢᠬᠡᠷ ᠶᠠᠷᠢᠵᠦ ᠦᠭᠴᠡᠢ᠃ ᠬᠠᠯᠬ᠎ᠠ ᠵᠡᠬᠦᠨ ᠭᠠᠷ ᠬᠤᠰᠢᠭᠤ ︵ᠪᠠᠰᠠ ᠴᠤᠬᠤᠷ ᠬᠠᠯᠬ᠎ᠠ ᠬᠤᠰᠢᠭᠤ ᠭᠡᠳᠡᠭ︶ ᠶᠢᠨ ᠠᠷᠪᠠᠨ ᠨᠢᠬᠡᠳᠦᠬᠡᠷ ᠵᠠᠰᠠᠭ ᠪᠦᠷᠢᠨᠮᠠᠨᠳᠤᠬᠤ ᠦᠪᠡᠷ ᠤᠨ ᠰᠦᠷ ᠬᠦᠴᠦᠨ ᠳᠤ ᠪᠠᠨ ᠡᠷᠬᠡᠮᠰᠢᠵᠦ ᠬᠦᠨᠳᠡᠯᠡᠨ ᠭᠤᠯᠲᠦ ᠠᠭᠠᠰᠢᠯᠠᠭᠰᠠᠨ ᠢᠶᠠᠷ ᠠᠷᠠᠳ ᠲᠦᠮᠡᠨ ᠤ ᠢᠳᠡᠭᠡᠯ ᠬᠦᠨᠳᠦ ᠶᠢ ᠠᠯᠳᠠᠭᠰᠠᠨ ᠪᠤᠯᠬᠤᠷ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠤᠯᠠᠭᠠᠨ ᠵᠡᠷᠭᠡ ᠲᠠᠢ ᠲᠠᠶᠢᠵᠢ ᠨᠠᠷ ᠵᠠᠷᠭᠤ ᠬᠦᠭᠡᠭᠡᠵᠦ ᠪᠠᠶᠢᠭᠠᠳ ᠲᠡᠬᠦᠨ ᠤ ᠸᠠᠩ ᠤᠨ ᠵᠡᠷᠭᠡ ᠶᠢ ᠪᠠᠭᠤᠷᠠᠭᠤᠯᠵᠠᠢ᠃ ᠪᠦᠷᠢᠨᠮᠠᠨᠳᠤᠬᠤ ᠠᠴᠠ ᠬᠦᠦ ᠦᠬᠡᠢ ᠪᠤᠯᠬᠤᠷ᠂ ᠲᠡᠷᠡ ᠦᠪᠡᠷ ᠤᠨ ᠠᠴᠢ ᠬᠦᠪᠡᠬᠦᠨ ᠸᠠᠩᠭᠤᠷ ᠲᠤ ᠸᠠᠩ ᠤᠨ ᠵᠡᠷᠭᠡ ᠪᠠᠨ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠬᠡᠰᠡᠨ ᠪᠤᠯᠪᠠᠴᠦ ᠤᠯᠠᠭᠠᠨ ᠵᠡᠷᠭᠡ ᠲᠠᠢ ᠲᠠᠶᠢᠵᠢ ᠨᠠᠷ ᠨᠢ ᠵᠠᠷᠭᠤ ᠵᠠᠭᠠᠯᠳᠤᠭᠠᠨ ᠬᠦᠭᠡᠭᠡᠵᠦ ᠪᠠᠶᠢᠭᠠᠳ ᠨᠤᠯᠮᠠᠰᠡᠷᠡᠩ ᠢ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠦᠶ᠎ᠡ ᠶᠢᠨ ᠵᠠᠰᠠᠭ ᠸᠠᠩ ᠪᠤᠯᠭᠠᠭᠰᠠᠨ ᠭᠡᠳᠡᠭ᠃ ᠨᠤᠯᠮᠠᠰᠡᠷᠡᠩ ᠤᠨ ᠸᠠᠩ ᠤᠨ ᠵᠡᠷᠭᠡ ᠵᠠᠯᠭᠠᠮᠵᠢᠯᠠᠭᠰᠠᠨ ᠲᠤᠬᠠᠢ ᠠᠷᠠᠳ ᠤᠨ ᠳᠤᠮᠳᠠ ᠪᠠᠰᠠ ᠡᠶᠢᠮᠦ ᠶᠠᠷᠢᠶ᠎ᠠ ᠳᠠᠮᠵᠢᠭᠳᠠᠵᠦ ᠪᠠᠶᠢᠳᠠᠭ ᠭᠡᠨ᠎ᠡ᠃ ᠲᠡᠷᠡ ᠸᠠᠩ ᠤᠨ ᠰᠠᠭᠤᠷᠢ ᠵᠠᠯᠭᠠᠮᠵᠢᠯᠠᠬᠤ ᠵᠠᠷᠭᠤ ᠶᠢ ᠲᠠᠰᠤᠯᠵᠦ ᠳᠡᠶᠢᠯᠬᠦ ᠦᠬᠡᠢ ᠪᠤᠯᠬᠤ ᠳᠤ᠂ ᠪᠡᠭᠡᠵᠢᠩ ᠤᠨ ᠶᠦᠡᠭ ᠾᠧ ᠬᠦᠡᠭ ᠤᠨ ᠨᠢᠬᠡ ᠯᠠᠮᠠ ᠡᠶᠢᠮᠦ ᠨᠢᠬᠡ ᠠᠷᠭ᠎ᠠ ᠭᠠᠷᠭᠠᠵᠦ ᠦᠭᠭᠦᠭᠰᠡᠨ ᠭᠡᠨ᠎ᠡ᠃ ᠳᠠᠷᠤᠢ ᠸᠠᠩ ᠤᠨ ᠰᠠᠭᠤᠷᠢ ᠵᠠᠯᠭᠠᠮᠵᠢᠯᠠᠬᠤ ᠪᠠᠷ ᠪᠤᠯᠢᠶᠠᠯᠳᠤᠵᠦ ᠪᠠᠶᠢᠭ᠎ᠠ ᠲᠡᠷᠡ ᠬᠤᠶᠠᠷ ᠬᠦᠮᠦᠨ ᠤ ᠨᠡᠷ᠎ᠡ ᠶᠢ ᠨᠢ ᠪᠡᠭᠡ ᠪᠠᠷ ᠮᠤᠤᠳᠦ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠬᠢᠲᠠᠳ ᠮᠤᠩᠭᠤᠯ ᠲᠦᠪᠡᠳ ᠭᠤᠷᠪᠠᠨ ᠬᠡᠯᠡ ᠪᠠᠷ ᠪᠢᠴᠢᠬᠡᠳ ᠵᠢᠩᠯᠡᠵᠦ ᠦᠵᠡᠨ᠎ᠡ᠃ ᠠᠯᠢᠨ ᠤ ᠬᠢᠨᠢ ᠨᠡᠷ᠎ᠡ ᠨᠢ ᠬᠦᠨᠳᠦ ᠪᠤᠯ ᠲᠡᠷᠡ ᠬᠦᠮᠦᠨ ᠤ ᠪᠤᠶᠠᠨ ᠨᠢ ᠶᠡᠭᠡ᠂ ᠸᠠᠩ ᠰᠠᠭᠤᠬᠤ ᠬᠦᠮᠦᠨ ᠭᠡᠵᠡᠢ᠃ ᠲᠡᠭᠡᠭᠡᠳ ᠲᠡᠷᠡ ᠶᠤᠰᠤᠭᠠᠷ ᠨᠢ ᠵᠢᠩᠯᠡᠵᠦ ᠦᠵᠡᠭᠰᠡᠨ ᠳᠤ ᠨᠤᠯᠮᠠᠰᠡᠷᠡᠩ ᠤᠨ ᠨᠡᠷ᠎ᠡ ᠨᠢ ᠬᠦᠨᠳᠦ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠸᠠᠩ ᠰᠠᠭᠤᠭᠰᠠᠨ ᠭᠡᠳᠡᠭ᠃ ᠰᠡᠬᠦᠯᠡᠷ ᠨᠢ 1935 ᠤᠨ ᠤ ᠦᠶ᠎ᠡ ᠪᠠᠷ ᠬᠠᠭᠤᠷᠮᠠᠭ ᠮᠠᠨᠵᠦ ᠠᠴᠠ ᠬᠠᠯᠬ᠎ᠠ ᠬᠤᠰᠢᠭᠤ ᠶᠢ ᠰᠦᠢ ᠳ᠋ᠥ᠋ᠩ ᠰᠢᠶᠠᠨ ᠳᠤ ᠨᠡᠶᠢᠯᠡᠬᠦᠯᠦᠭᠰᠡᠨ ᠪᠤᠯᠪᠠᠴᠦ ᠨᠤᠯᠮᠠᠰᠡᠷᠡᠩ ᠳᠤ ᠰᠠᠷ᠎ᠠ ᠪᠦᠷᠢ 80 ᠮᠦᠡᠭᠭᠦᠨ ᠵᠤᠭᠤᠰ ᠤᠨ ᠲᠡᠳᠬᠦᠮᠵᠢ ᠶᠢᠨ ᠮᠦᠡᠭᠭᠦ ᠤᠯᠭᠤᠵᠦ᠂ ᠪᠤᠶᠠᠨᠲᠤ ᠬᠤᠭᠤᠯᠠᠢ ᠠᠴᠠ ᠡᠮᠦᠨᠡᠰᠢ᠂ ᠲᠠᠮᠤ ᠶᠢᠨ ᠴᠠᠭᠠᠨ ᠠᠴᠠ ᠤᠮᠠᠷᠠᠰᠢᠬᠢ ᠬᠡᠳᠦᠨ ᠠᠶᠢᠯ ᠤᠨ 940 ᠠᠮᠠᠨ ᠲᠤᠭ᠎ᠠ ᠶᠢ ᠵᠠᠬᠢᠷᠤᠭᠤᠯᠤᠭᠰᠠᠨ ᠭᠡᠳᠡᠭ᠃ ᠬᠡᠷᠡᠭ ᠳᠡᠭᠡᠷ᠎ᠡ ᠠᠴᠠ ᠡᠷᠭᠡ ᠶᠢ ᠨᠢ ᠠᠪᠤᠭᠰᠠᠨ ᠴᠤ ᠵᠡᠷᠭᠡ ᠶᠢ ᠨᠢ ᠠᠪᠤᠭᠰᠠᠨ ᠦᠬᠡᠢ ᠶᠠᠪᠤᠳᠠᠯ ᠪᠤᠯᠵᠠᠢ᠃ ᠰᠡᠬᠦᠯᠡᠷ ᠨᠢ ᠭᠠᠵᠠᠷ ᠲᠠᠷᠢᠶᠠᠨ ᠤ ᠬᠤᠪᠢᠰᠬᠠᠯ ᠤᠨ ᠦᠶ᠎ᠡ ᠳᠤ ᠨᠤᠯᠮᠡᠰᠡᠷᠡᠩ ᠪᠤᠶᠠᠨᠲᠤ ᠬᠤᠭᠤᠯᠠᠢ ᠠᠶᠢᠯ ᠳᠤ ᠤᠳᠤ ᠶᠢᠨ ᠦᠯᠡᠳᠡᠭᠳᠡᠵᠦ ᠪᠠᠶᠢᠭ᠎ᠠ ᠡᠨᠡ ᠭᠡᠷ ᠲᠤ ᠪᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠭᠡᠳᠡᠭ᠃ ᠨᠤᠯᠮᠠᠰᠡᠷᠡᠩ ᠪᠤᠯ ᠬᠠᠯᠬ᠎ᠠ ᠵᠡᠬᠦᠨ ᠭᠠᠷ ᠬᠤᠰᠢᠭᠤᠨ ᠤ ᠬᠠᠮᠤᠭ ᠰᠡᠬᠦᠯᠴᠢ ᠶᠢᠨ ᠵᠠᠰᠠᠭ ᠸᠠᠩ ᠪᠦᠬᠡᠳ ᠨᠡᠶᠢᠲᠡ 50 ᠵᠢᠯ ᠸᠠᠩ ᠤᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠵᠦ᠂ ᠬᠠᠯᠬ᠎ᠠ ᠵᠡᠬᠦᠨ ᠭᠠᠷ ᠬᠤᠰᠢᠭᠤᠨ ᠤ 12 ᠸᠠᠩ ᠤᠨ ᠲᠤᠳᠤᠷ᠎ᠠ ᠸᠠᠩ ᠰᠠᠭᠤᠭᠰᠠᠨ ᠴᠠᠭ ᠨᠢ ᠬᠠᠮᠤᠭ ᠤᠷᠲᠤ ᠸᠠᠩ ᠪᠤᠯᠵᠠᠢ᠃      ᠸᠠᠩ ᠤᠨ ᠤᠷᠳᠤᠨ ᠤ ᠲᠡᠳᠡᠭᠡᠷ ᠬᠦᠬᠡ ᠲᠤᠭᠤᠰᠬ᠎ᠠ ᠶᠢ ᠨᠢ ᠪᠦᠷ ᠲᠦᠮᠡᠳ ᠵᠡᠬᠦᠨ ᠬᠤᠰᠢᠭᠤᠨ ᠠᠴᠠ ᠲᠡᠭᠡᠭᠡᠵᠦ ᠠᠪᠴᠢᠷᠠᠭᠰᠠᠨ︔ ᠰᠡᠬᠦᠯᠡᠷ ᠨᠢ ᠪᠠᠰᠠ ᠡᠨᠡ ᠪᠠᠭᠤᠷᠢ ᠠᠴᠠ ᠯᠤᠩᠬᠤ ᠲᠠᠢ ᠡᠳ᠋ ᠡᠷᠳᠡᠨᠢᠰ ᠭᠠᠷᠴᠦ ᠪᠠᠶᠢᠭᠰᠠᠨ︔ ᠡᠨᠡ ᠨᠤᠲᠤᠭ ᠶᠡᠭᠡ ᠬᠠᠲᠠᠭᠤ ᠪᠤᠯᠬᠤᠷ ᠪᠠᠷᠤᠭ ᠤᠨ ᠬᠦᠮᠦᠨ ᠰᠠᠭᠤᠭᠠᠳ ᠵᠤᠬᠢᠷᠠᠵᠦ ᠦᠭᠬᠦ ᠦᠬᠡᠢ᠂ ᠡᠷᠲᠡ ᠳᠤ ᠨᠢᠬᠡ ᠬᠦᠮᠦᠨ ᠰᠠᠭᠤᠭᠠᠳ ᠶᠡᠭᠡ ᠪᠠᠶᠠᠵᠢᠭᠰᠠᠨ ᠨᠢ ᠬᠠᠷᠢᠨ ᠨᠡᠷ᠎ᠡ ᠶᠢᠨ ᠢᠶᠠᠨ ᠰᠠᠶᠢᠨ ᠢᠶᠠᠷ ᠡᠨᠡ ᠨᠤᠲᠤᠭ ᠢ ᠳᠠᠷᠤᠵᠦ ᠰᠠᠭᠤᠵᠦ ᠴᠢᠳᠠᠭᠰᠠᠨ︔ ᠪᠠᠷᠢᠭᠠᠳᠠ ᠶᠢᠨ ᠦᠶ᠎ᠡ ᠳᠤ ᠶᠡᠭᠡ ᠦᠶᠡᠷ ᠪᠤᠯᠵᠦ ᠳᠡᠭᠡᠷ᠎ᠡ ᠰᠢᠭ ᠦᠵᠡᠭᠳᠡᠳᠡᠭ ᠭᠠᠵᠠᠷ ᠤᠳ ᠪᠦᠷ ᠤᠰᠤ ᠲᠤᠭᠲᠠᠵᠦ ᠪᠠᠶᠢᠬᠤ ᠳᠤ᠂ ᠬᠠᠷᠢᠴᠠᠩᠭᠤᠢ ᠳᠤᠤᠷ᠎ᠠ ᠰᠢᠬ ᠬᠠᠷᠠᠭᠳᠠᠵᠦ ᠪᠠᠶᠢᠭᠠᠳ ᠡᠨᠡ ᠭᠡᠷ ᠲᠤ ᠤᠰᠤ ᠤᠷᠤᠬᠤ ᠦᠬᠡᠢ ᠪᠤᠯᠬᠤᠷ ᠪᠠᠷᠢᠭᠠᠳᠠ ᠶᠢᠨ ᠠᠮᠤ ᠪᠤᠳᠠᠭ᠎ᠠ ᠪᠠᠨ ᠪᠦᠷ ᠲᠡᠷᠡ ᠭᠡᠷ ᠲᠤ ᠬᠠᠳᠠᠭᠠᠯᠠᠵᠦ ᠦᠶᠡᠷ ᠠᠴᠠ ᠵᠠᠶᠢᠯᠠᠭᠤᠯᠤᠭᠰᠠᠨ ᠁ ᠭᠡᠬᠦ ᠵᠡᠷᠭᠡ ᠪᠠᠷ ᠸᠠᠩ ᠤᠨ ᠤᠷᠳᠤᠨ ᠤ ᠲᠤᠬᠠᠢ ᠡᠯ᠎ᠡ ᠵᠦᠢᠯ ᠤᠨ ᠬᠠᠴᠢᠨ ᠰᠤᠨᠢᠷᠬᠠᠯᠲᠠᠢ ᠬᠠᠭᠤᠴᠢ ᠰᠤᠨᠤᠰᠬᠠᠯ ᠤᠳ ᠮᠤᠩᠲᠠᠬᠤ ᠦᠬᠡᠢ᠃ ᠶᠠᠭᠤ ᠴᠤ ᠭᠡᠰᠡᠨ ᠸᠠᠩ ᠤᠨ ᠤᠷᠳᠤᠨ ᠬᠡᠮᠡᠭᠳᠡᠭᠰᠡᠨ ᠲᠡᠷᠡ ᠬᠡᠳᠦᠨ ᠲᠠᠰᠤᠯᠭ᠎ᠠ ᠬᠠᠭᠤᠴᠢᠨ ᠭᠡᠷ ᠵᠠᠭᠤ ᠭᠠᠷᠤᠢ ᠵᠢᠯ ᠤᠨ ᠰᠠᠯᠬᠢ ᠪᠤᠷᠤᠭᠠᠨ ᠢ ᠠᠵᠢᠭ ᠦᠬᠡᠢ ᠲᠤᠭᠤᠯᠵᠦ᠂ ᠬᠦᠮᠦᠨ ᠵᠤᠨ ᠳᠤ ᠪᠠᠨ ᠲᠡᠦᠬᠡ ᠤᠴᠢᠷᠯᠠᠵᠦ ᠬᠠᠭᠤᠴᠢ ᠬᠦᠥᠷᠨᠢᠭᠰᠡᠭᠡᠷ ᠲᠦᠡᠭᠭᠦ᠋ᠢᠨ᠎ᠡ᠃
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ