ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠲᠠᠷᠢᠮᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/10/28
   ᠬᠤᠷᠴᠢᠨ ᠠᠶᠢᠮᠠᠬ ᠨᠢ ᠪᠦᠷᠢᠯᠳᠦᠨ ᠲᠣᠬᠳᠠᠨᠢᠬᠰᠠᠨ ᠠᠴᠠ ᠪᠠᠨ ᠠᠪᠣᠭᠠᠳ᠂ ᠪᠣᠰᠣᠳ ᠮᠣᠩᠭᠤᠯ ᠲᠣᠭᠤᠷᠭᠠᠳᠠᠳ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠣᠰᠣᠨ ᠤ ᠲᠣᠩᠭᠠᠯᠠᠬ ᠢ ᠲᠠᠭᠠᠵᠦ ᠂ ᠡᠪᠡᠰᠦᠨ ᠤ ᠰᠣᠷᠭᠤᠬ ᠢ ᠰᠢᠯᠢᠭᠰᠡᠨ ᠨᠡᠭᠦᠳᠡᠯ ᠮᠠᠯ ᠠᠵᠣ ᠠᠬᠤᠢ ᠪᠠᠷ ᠭᠤᠣᠯ ᠪᠣᠯᠭᠠᠨ ᠠᠮᠢᠳᠣᠷᠠᠵᠦ ᠪᠠᠶᠢᠪᠠ᠃ ᠭᠡᠪᠡᠴᠦ ᠲᠡᠦᠬᠡ ᠶᠢᠨ ᠡᠷᠭᠢᠯᠳᠡ ᠵᠢᠴᠢ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯᠳᠡ ᠶᠢ ᠲᠠᠭᠠᠯᠳᠣᠨ ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠨᠢ ᠬᠤᠷᠴᠢᠨ ᠨᠣᠳᠤᠬ ᠲᠤ ᠨᠡᠪᠴᠢᠨ ᠣᠷᠣᠵᠦ ᠢᠷᠡᠭᠡᠳ ᠡᠨᠡ ᠬᠦ ᠨᠣᠳᠤᠬ ᠢ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠬᠠᠭᠠᠰ ᠮᠠᠯᠵᠢᠬᠤ ᠠᠵᠣ ᠠᠬᠤᠢ ᠶᠢᠨ ᠬᠡᠯᠪᠡᠷᠢ ᠲᠠᠢ ᠪᠣᠯᠭᠠᠨ ᠬᠤᠪᠢᠷᠠᠭᠤᠯᠣᠬᠰᠠᠨ ᠶᠣᠮ᠃ ᠡᠭᠦᠨ ᠠᠴᠠ ᠪᠣᠯᠵᠦ ᠬᠤᠷᠴᠢᠨᠴᠣᠳ ᠤᠨ ᠡᠳᠦᠷ ᠲᠣᠳᠣᠮ ᠤᠨ ᠠᠮᠢᠳᠣᠷᠠᠯ ᠤᠨ ᠠᠷᠭ᠎ᠠ ᠠᠪᠴᠠᠯ ᠠᠴᠠ ᠠᠪᠣᠭᠠᠳ ᠬᠤᠭᠤᠯᠠ ᠣᠮᠳᠠ ᠳᠤ ᠬᠦᠷᠳᠡᠯ᠎ᠡ ᠦᠪᠡᠷ ᠤᠨ ᠢᠶᠠᠨ ᠭᠡᠰᠡᠨ ᠣᠨᠴᠠᠯᠢᠬ ᠲᠠᠢ ᠪᠣᠯᠵᠠᠢ᠃     ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠬᠡᠭᠡᠷ᠎ᠡ ᠶᠢᠨ ᠨᠣᠭᠤᠭ᠎ᠠ     ᠮᠠᠯᠵᠢᠬᠤ ᠠᠮᠢᠳᠣᠷᠠᠯ ᠢᠶᠠᠷ ᠠᠵᠣ ᠠᠬᠤᠢ ᠶᠢᠨ ᠰᠠᠭᠤᠷᠢ ᠪᠣᠯᠭᠠᠵᠦ ᠪᠠᠶᠢᠬᠰᠠᠨ ᠬᠤᠷᠴᠢᠨ ᠨᠣᠳᠤᠬ ᠲᠤ ᠣᠣᠯ ᠨᠢ ᠣᠳᠣ ᠶᠢᠨ ᠰᠢᠬ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠭᠡᠵᠦ ᠪᠠᠶᠢᠬᠰᠠᠨ ᠦᠭᠡᠢ ᠶᠣᠮ᠃ ᠪᠠᠶᠠᠨ ᠪᠠᠶᠢᠭᠠᠯᠢ ᠶᠢᠨ ᠢᠶᠠᠨ ᠦᠡᠭᠰᠢᠭ ᠰᠢᠮ᠎ᠡ ᠳᠤ ᠨᠡᠭᠦᠳᠡᠯᠯᠡᠵᠦ ᠪᠠᠭᠤᠵᠦ ᠠᠮᠢᠳᠣᠷᠠᠵᠦ ᠪᠠᠶᠢᠬᠰᠠᠨ ᠬᠤᠷᠴᠢᠨᠴᠣᠳ ᠨᠢ ᠲᠠᠭᠠᠨ᠎ᠠ᠂ ᠬᠦᠮᠡᠯᠢ᠂ ᠮᠠᠩᠬᠢᠷ ᠁ ᠵᠡᠷᠭᠡ ᠬᠡᠭᠡᠷ᠎ᠠ ᠶᠢᠨ ᠵᠡᠷᠯᠢᠭ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠠᠪᠣᠭᠠᠳ ᠲᠠᠪᠣᠰᠣᠯᠠᠬᠤ ᠪᠣᠶᠣ ᠮᠢᠬ᠎ᠠ ᠲᠠᠢ ᠪᠠᠨ ᠬᠤᠯᠢᠬᠤ᠂ ᠰᠢᠶᠠᠨᠰᠠ ᠪᠣᠯᠭᠠᠵᠦ ᠪᠣᠣᠵᠠ ᠪᠣᠯᠭᠠᠬᠤ ᠵᠡᠷᠭᠡ ᠪᠠᠷ ᠢᠳᠡᠰᠢᠨ ᠨᠣᠭᠤᠭ᠎ᠠ ᠪᠣᠯᠭᠠᠳᠠᠬ ᠪᠠᠶᠢᠵᠠᠢ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠬᠠᠯᠠᠭᠠᠢ᠂ ᠵᠤᠭ᠎ᠠ᠂ ᠭᠠᠰᠢᠭᠤᠨ ᠨᠣᠭᠤᠭ᠎ᠠ᠂ ᠮᠠᠨᠵᠢᠤᠬᠠᠢ ᠵᠡᠷᠭᠡ ᠶᠢ ᠴᠦ ᠬᠤᠷᠴᠢᠨᠴᠣᠳ ᠢᠳᠡᠰᠢᠨ ᠳᠤ ᠪᠠᠨ ᠬᠡᠷᠡᠭᠯᠡᠵᠦ ᠪᠠᠶᠢᠪᠠ᠃     ᠬᠠᠯᠠᠭᠠᠢ᠃ ᠬᠤᠷᠴᠢᠨᠴᠣᠳ ᠤᠨ ᠵᠢᠯ ᠪᠦᠷᠢ ᠬᠠᠮᠤᠬ ᠠᠩᠬ᠎ᠠ ᠣᠯᠵᠦ ᠢᠳᠡᠳᠡᠭ ᠬᠡᠭᠡᠷ᠎ᠡ ᠶᠢᠨ ᠨᠣᠭᠤᠭ᠎ᠠ ᠪᠣᠯ ᠬᠠᠯᠠᠭᠠᠢ ᠪᠣᠯᠣᠨ᠎ᠠ᠃ ᠬᠠᠯᠠᠭᠠᠢ ᠭᠡᠳᠡᠭ ᠣᠷᠭᠤᠮᠠᠯ ᠨᠢ ᠶᠠᠭᠠᠬᠢᠭᠠᠳ ᠡᠶᠢᠮᠦ ᠨᠡᠷ᠎ᠡ ᠲᠠᠢ ᠪᠣᠯᠣᠬᠰᠠᠨ ᠲᠣᠬᠠᠢ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠲᠠᠷᠢᠶᠠᠴᠢᠨ ᠬᠠᠰᠲᠣᠯᠭᠠᠭᠤᠷᠢ ᠠᠴᠠ᠄ ︽ᠬᠠᠯᠠᠭᠠᠢ ᠨᠢ ᠨᠠᠪᠴᠢ ᠪᠣᠶᠣ ᠡᠰᠢᠨ ᠳᠤ ᠪᠠᠨ ᠪᠦᠷ ᠵᠢᠵᠢᠭ ᠦᠷᠭᠡᠰᠦ ᠲᠠᠢ ᠪᠣᠯᠬᠤᠷ ᠬᠦᠮᠦᠨ ᠤ ᠭᠠᠷ ᠢ ᠬᠠᠳᠬᠤᠵᠦ ᠶᠠᠬ ᠯᠡ ᠭᠠᠯ ᠢᠶᠠᠷ ᠬᠠᠯᠠᠭᠠᠬᠰᠠᠨ ᠬᠡᠮᠡᠷ ᠡᠪᠡᠳᠭᠡᠳᠡᠭ᠃ ᠡᠨᠡ ᠬᠦ ᠬᠠᠳᠬᠤᠵᠦ ᠬᠠᠯᠠᠭᠠᠳᠠᠬ ᠣᠨᠴᠠᠯᠢᠬ ᠢᠶᠠᠷ ᠨᠢ ᠬᠠᠯᠠᠭᠠᠢ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠠᠶᠢᠳᠠᠬ᠃ ᠬᠠᠯᠠᠭᠠᠢ ᠨᠢ ᠬᠠᠪᠣᠷ ᠢᠷᠡᠵᠦ ᠬᠠᠨᠭ᠍ᠰᠢ ᠪᠣᠯᠬᠤ ᠶᠢᠨ ᠦᠶ᠎ᠡ ᠪᠠᠷ ᠮᠠᠩᠬᠠᠨ ᠡᠩᠭᠡᠷ ᠪᠣᠶᠣ ᠪᠣᠳᠠᠨ ᠤ ᠨᠦᠮᠦᠷᠢ ᠳᠤ ᠪᠣᠰᠣᠳ ᠣᠷᠭᠤᠮᠠᠯ ᠠᠴᠠ ᠡᠷᠳᠡ ᠨᠢᠳᠦᠯᠡᠴᠢᠬᠡᠳᠡᠭ ᠶᠣᠮ᠃ ᠨᠠᠰᠣᠳᠠᠢ ᠬᠠᠰᠢᠷ ᠬᠦᠮᠦᠰ ᠪᠣᠶᠣ ᠮᠠᠯ ᠳᠤ ᠶᠠᠪᠣᠬᠰᠠᠳ ᠬᠠᠯᠠᠭᠠᠢ ᠶᠢ ᠲᠡᠭᠦᠵᠦ ᠠᠪᠣᠭᠠᠳ ᠬᠦᠬᠡ ᠨᠣᠭᠤᠭᠠᠨ ᠤ ᠵᠠᠭᠤᠰᠢ ᠪᠣᠯᠭᠠᠵᠦ ᠢᠳᠡᠳᠡᠭ᠃ ᠬᠠᠯᠠᠭᠠᠢ ᠶᠢ ᠪᠠᠰᠠ ᠮᠣᠷᠢᠨ ᠬᠠᠯᠠᠭᠠᠢ᠂ ᠬᠤᠨᠢᠨ ᠬᠠᠯᠠᠭᠠᠢ᠂ ᠲᠡᠮᠡᠭᠡᠨ ᠬᠠᠯᠠᠭᠠᠢ ᠭᠡᠵᠦ ᠬᠤᠪᠢᠶᠠᠳᠠᠬ᠃ ᠬᠠᠯᠠᠭᠠᠢ ᠨᠢ ᠡᠯᠡᠰᠦ ᠮᠠᠩᠬᠠᠨ ᠭᠠᠵᠠᠷ ᠢᠶᠠᠷ ᠰᠠᠶᠢᠨ ᠣᠷᠭᠤᠳᠠᠬ ᠮᠦᠷᠳᠡᠭᠡᠨ ᠦᠷᠡᠵᠢᠯ ᠰᠠᠶᠢᠳᠠᠢ᠂ ᠬᠦᠮᠦᠨ ᠤ ᠬᠦᠴᠦ ᠪᠠᠷ ᠵᠠᠶᠢᠯᠠᠵᠦ ᠡᠳᠡᠭᠡᠷᠡᠭᠦᠯᠬᠦ ᠳᠤ ᠲᠦᠭᠦᠮ ᠶᠣᠮ᠃ ᠬᠠᠯᠠᠭᠠᠢ ᠬᠠᠮᠤᠬ ᠦᠨᠳᠦᠷ ᠲᠤ ᠪᠠᠨ ᠪᠣᠰᠤᠭ᠎ᠠ ᠬᠦᠮᠦᠨ ᠤ ᠬᠢᠷᠢ ᠪᠣᠳᠠᠯᠠᠨ ᠣᠷᠭᠤᠵᠦ ᠪᠢᠯᠢᠭ ᠤᠨ ᠣᠯᠠᠷᠢᠯ ᠤᠨ ᠲᠣᠯᠤᠭ᠎ᠠ ᠨᠠᠢᠮᠠᠨ ᠰᠠᠷ᠎ᠠ ᠶᠢᠨ ᠦᠶ᠎ᠡ ᠪᠠᠷ ᠦᠷᠡᠯᠡᠵᠦ ᠪᠣᠯᠪᠠᠰᠣᠷᠠᠳᠠᠬ︾ ᠭᠡᠵᠡᠢ᠃ ᠮᠣᠩᠭᠤᠯ ᠡᠮᠴᠢ ᠨᠠᠷ ᠤᠨ ᠬᠡᠯᠡᠬᠦ ᠪᠠᠷ ︽ᠬᠠᠯᠠᠭᠠᠢ ᠨᠢ ᠬᠡᠢ ᠶᠢ ᠲᠠᠷᠣᠵᠦ᠂ ᠴᠢᠰᠣᠨ ᠡᠷᠭᠢᠯᠳᠡ ᠶᠢ ᠰᠠᠶᠢᠵᠢᠷᠠᠭᠤᠯᠣᠨ᠂ ᠪᠠᠮ ᠡᠪᠡᠳᠴᠢᠨ ᠢ ᠵᠠᠰᠠᠨ᠎ᠠ︾ ᠭᠡᠳᠡᠭ᠃ ᠬᠠᠯᠠᠭᠠᠢ ᠶᠢ ᠭᠤᠣᠯᠳᠠᠭᠤ ᠬᠠᠪᠣᠷ ᠤᠨ ᠡᠬᠢᠨ ᠠᠴᠠ ᠵᠣᠨ ᠤ ᠲᠣᠮᠳᠠᠴᠢ ᠪᠣᠯᠳᠠᠯ᠎ᠠ ᠢᠳᠡᠵᠦ ᠪᠣᠯᠳᠠᠬ᠃ ᠬᠤᠷᠴᠢᠨ ᠨᠣᠳᠤᠬ ᠤᠨ ᠵᠠᠷᠢᠮ ᠬᠦᠮᠦᠰ ᠬᠠᠯᠠᠭᠠᠢ ᠶᠢ ᠬᠠᠰᠢᠶ᠎ᠠ ᠲᠦᠭᠦᠷᠡᠩ ᠵᠠᠶᠢᠯᠠᠵᠦ ᠣᠷᠭᠤᠭᠤᠯᠳᠠᠬ ᠴᠦ ᠪᠣᠢ᠃ ᠬᠠᠯᠠᠭᠠᠢ ᠶᠢ ᠬᠠᠶᠢᠴᠢᠯᠠᠵᠦ ᠠᠪᠣᠭᠠᠳ ᠪᠠᠭ᠎ᠠ ᠰᠠᠭ᠎ᠠ ᠮᠢᠬ᠎ᠠ ᠲᠣᠰᠣ ᠲᠠᠢ ᠬᠤᠯᠢᠵᠦ ᠱᠦᠯᠦ ᠭᠠᠷᠭᠠᠭᠠᠳ ᠰᠠᠭᠠᠬ ᠤᠨ ᠭᠤᠯᠢᠷ ᠢᠶᠠᠨ ᠰᠢᠩᠭᠡᠨ ᠵᠢᠭᠤᠷᠠᠵᠦ ᠱᠦᠯᠦ ᠳᠤ ᠪᠠᠨ ᠲᠠᠩ ᠪᠣᠯᠭᠠᠵᠦ ᠢᠳᠡᠪᠡᠯ ᠡᠳᠡᠭᠡᠳ ᠰᠠᠶᠢᠬᠠᠨ ᠠᠮᠳᠠ ᠲᠠᠢ ᠪᠠᠶᠢᠳᠠᠬ᠃      ᠵᠤᠭ᠎ᠠ᠃ ᠵᠤᠭ᠎ᠠ ᠭᠡᠳᠡᠭ ᠨᠢ ᠬᠠᠶᠢᠯᠠᠰᠣᠨ ᠮᠣᠳᠣᠨ ᠤ ᠦᠷ᠎ᠡ ᠶᠢ ᠬᠡᠯᠡᠵᠦ ᠪᠠᠶᠢᠨ᠎ᠠ᠃ ᠬᠠᠨᠭ᠍ᠰᠢ ᠦᠡᠭᠭᠡᠷᠡᠵᠦ ᠠᠷᠭ᠎ᠠ ᠶᠢᠨ ᠣᠯᠠᠷᠢᠯ ᠤᠨ ᠲᠠᠪᠣᠨ ᠰᠠᠷ᠎ᠠ ᠶᠢᠨ ᠡᠬᠢ ᠪᠣᠯᠬᠤ ᠬᠢᠷᠢᠨ᠎ᠡ ᠬᠠᠶᠢᠯᠠᠰᠣᠨ ᠮᠣᠳᠣ ᠦᠷᠡᠯᠡᠵᠦ ᠵᠣᠭᠠᠯᠠᠵᠦ ᠡᠬᠢᠯᠡᠨ᠎ᠡ᠃ ᠵᠤᠭ᠎ᠠ ᠨᠢ ᠬᠢᠮᠣᠰᠣᠨ ᠲᠣᠯᠢ ᠶᠢᠨ ᠬᠢᠷᠢ ᠪᠣᠯᠬᠤ ᠬᠢᠷᠢᠨ᠎ᠡ ᠰᠢᠪᠳᠣᠷᠴᠦ ᠠᠪᠣᠭᠠᠳ ᠲᠦᠭᠦᠬᠡᠢ ᠪᠠᠷ ᠢᠳᠡᠵᠦ ᠪᠣᠯᠬᠤ ᠮᠦᠷᠳᠡᠭᠡᠨ ᠪᠠᠭ᠎ᠠ ᠰᠠᠭ᠎ᠠ ᠮᠢᠬ᠎ᠠ ᠲᠣᠰᠣ ᠲᠠᠢ ᠬᠤᠯᠢᠵᠦ ᠱᠦᠯᠦ ᠭᠠᠷᠭᠠᠭᠠᠳ ᠭᠤᠯᠢᠷ ᠴᠢᠳᠬᠤᠨ ᠲᠠᠩ ᠪᠣᠯᠭᠠᠵᠦ ᠢᠳᠡᠵᠦ ᠪᠣᠯᠳᠠᠬ᠃ ᠬᠤᠷᠴᠢᠨ ᠨᠣᠳᠤᠬ ᠲᠤ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠ ᠶᠡᠷᠡᠭᠡᠳ ᠣᠨ ᠪᠣᠯᠳᠠᠯ᠎ᠠ ᠬᠠᠪᠣᠷ ᠬᠠᠶᠢᠯᠠᠰᠣᠨ ᠮᠣᠳᠣᠨ ᠳᠤ ᠠᠪᠠᠷᠢᠵᠦ ᠭᠠᠷᠣᠭᠠᠳ ᠵᠤᠭ᠎ᠠ ᠲᠡᠭᠦᠳᠡᠭ ᠬᠡᠦᠬᠡᠳ ᠵᠦᠡᠭᠳᠡᠭᠡᠨ ᠬᠠᠷᠠᠬᠳᠠᠵᠦ ᠪᠠᠶᠢᠬᠰᠠᠨ ᠶᠣᠮ᠃ ᠵᠤᠭ᠎ᠠ ᠲᠠᠢ ᠱᠦᠯᠦ ᠳᠤ ᠴᠢᠨᠠᠬᠰᠠᠨ ᠰᠠᠭᠠᠬ ᠤᠨ ᠭᠤᠯᠢᠷ ᠤᠨ ᠲᠠᠩ ᠨᠢ ᠠᠮᠳᠠᠯᠢᠬ ᠮᠦᠷᠳᠡᠭᠡᠨ ᠬᠡᠢ ᠬᠤᠢ ᠶᠢ ᠨᠡᠪᠳᠡᠷᠡᠭᠦᠯᠵᠦ ᠴᠢᠰᠣᠨ ᠡᠷᠭᠢᠯᠳᠡ ᠶᠢ ᠰᠠᠶᠢᠵᠢᠷᠠᠭᠤᠯᠬᠤ᠂ ᠠᠷᠢᠬᠢᠨ ᠰᠢᠷ᠎ᠠ ᠶᠢ ᠪᠠᠭᠠᠰᠬᠠᠬᠤ ᠵᠡᠷᠭᠡ ᠡᠮᠴᠢᠯᠡᠭᠡᠨ ᠤ ᠰᠠᠶᠢᠨ ᠲᠠᠯ᠎ᠠ ᠣᠯᠠᠨ ᠪᠠᠶᠢᠳᠠᠬ ᠠᠴᠠ ᠬᠤᠷᠴᠢᠨ ᠤ ᠣᠯᠠᠩᠬᠢ ᠲᠠᠷᠢᠶᠠᠴᠢᠳ ᠠᠴᠠ ᠬᠠᠪᠣᠷ ᠤᠨ ᠣᠯᠠᠷᠢᠯ ᠳᠤ ᠵᠤᠭ᠎ᠠ ᠲᠠᠢ ᠲᠠᠩ ᠢᠳᠡᠬᠦ ᠶᠢ ᠡᠷᠬᠢᠮ ᠪᠣᠯᠭᠠᠨ ᠦᠵᠡᠵᠦ᠂ ᠬᠡᠦᠬᠡᠳ ᠪᠠᠭᠠᠴᠣᠳ ᠢᠶᠠᠨ ᠬᠠᠶᠢᠯᠠᠰᠣᠨ ᠮᠣᠳᠣᠨ ᠳᠤ ᠠᠪᠠᠷᠢᠭᠤᠯᠵᠦ ᠵᠤᠭ᠎ᠠ ᠲᠡᠭᠦᠯᠭᠡᠳᠡᠭ ᠪᠠᠶᠢᠵᠠᠢ᠃ ᠭᠡᠪᠡᠴᠦ ᠵᠤᠭ᠎ᠠ ᠶᠢᠨ ᠦᠰᠦᠯᠳᠡ ᠬᠤᠷᠳᠣᠨ ᠪᠣᠯᠬᠤᠷ ᠦᠵᠡᠵᠦ ᠪᠠᠶᠢᠳᠠᠯ᠎ᠠ ᠦᠷᠡᠯᠡᠵᠦ ᠦᠳᠡᠯᠡᠭᠡᠳ ᠬᠠᠳᠠᠭᠤ ᠮᠦᠷᠳᠡᠭᠡᠨ ᠭᠠᠰᠢᠭᠤᠨ ᠪᠣᠯᠳᠠᠬ ᠠᠴᠠ ᠬᠠᠭᠠᠰ ᠰᠠᠷ᠎ᠠ ᠬᠤᠷᠢ ᠬᠤᠨᠤᠬ ᠯᠡ ᠢᠳᠡᠵᠦ ᠪᠣᠯᠳᠠᠬ ᠶᠣᠮ᠃     ᠭᠠᠰᠢᠭᠤᠨ ᠨᠣᠭᠤᠭ᠎ᠠ᠃ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠶᠢ ᠪᠠᠰᠠ ᠵᠠᠷᠢᠮ ᠭᠠᠵᠠᠷ ᠢᠳᠡᠷ᠎ᠡ ᠨᠣᠭᠤᠭ᠎ᠠ᠂ ᠴᠠᠮᠴᠠᠨ ᠨᠣᠭᠤᠭ᠎ᠠ ᠭᠡᠬᠦ ᠮᠡᠳᠦ ᠪᠠᠷ ᠶᠠᠷᠢᠳᠠᠬ᠃ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠨᠢ ᠭᠤᠣᠯᠳᠠᠭᠤ ᠣᠮᠳᠠᠯᠢᠬ ᠲᠣᠣᠷ᠎ᠠ ᠭᠠᠵᠠᠷ ᠡᠷᠳᠡ ᠣᠷᠭᠤᠳᠠᠬ ᠨᠣᠭᠤᠭ᠎ᠠ ᠶᠢᠨ ᠲᠦᠷᠦᠯ ᠪᠣᠯᠣᠨ᠎ᠠ᠃ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠠᠪᠣᠬᠰᠠᠨ ᠤ ᠲᠠᠷᠠᠭ᠎ᠠ ᠰᠢᠷᠣᠢ ᠲᠣᠭᠤᠰᠣ ᠶᠢ ᠨᠢ ᠭᠦᠪᠢᠵᠦ᠂ ᠣᠬᠢᠶᠠᠵᠦ ᠴᠡᠪᠡᠷᠯᠡᠭᠡᠳ ᠲᠠᠪᠣᠰᠣᠯᠠᠨ ᠢᠳᠡᠬᠦ ᠪᠣᠶᠣ ᠰᠢᠭᠤᠳ ᠵᠢᠶᠠᠩ ᠳᠤ ᠲᠦᠷᠦᠵᠦ ᠪᠣᠳᠠᠭ᠎ᠠ ᠲᠠᠢ ᠬᠤᠯᠢᠵᠦ ᠢᠳᠡᠵᠦ ᠪᠣᠯᠳᠠᠬ᠃ ᠪᠠᠰᠠ ᠲᠠᠷᠢᠶ᠎ᠠ ᠶᠢᠨ ᠶᠠᠭᠠᠷᠠᠦ ᠴᠠᠬ ᠢᠶᠠᠷ ᠲᠠᠷᠢᠶᠠᠴᠢᠳ ᠠᠴᠠ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠠᠪᠣᠭᠠᠳ ᠠᠷᠢᠬᠢᠨ ᠵᠠᠭᠤᠰᠢ ᠪᠣᠯᠭᠠᠨ ᠬᠡᠷᠡᠭᠯᠡᠳᠡᠭ ᠴᠦ ᠪᠣᠢ᠃ ᠭᠡᠪᠡᠴᠦ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠠᠪᠬᠤ ᠳᠤ ᠪᠠᠨ ᠵᠠᠪᠠᠯ ᠲᠣᠳᠣᠷᠬᠠᠢ ᠲᠠᠨᠢᠵᠦ ᠴᠢᠳᠠᠬᠰᠠᠨ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠬᠠᠪᠣᠷ ᠡᠪᠡᠰᠦ ᠨᠣᠭᠤᠭ᠎ᠠ ᠣᠷᠭᠤᠵᠦ ᠡᠬᠢᠯᠡᠬᠦ ᠦᠶᠡᠰ ᠡᠯᠵᠢᠭᠡᠨ ᠴᠢᠬᠢ ᠭᠡᠳᠡᠭ ᠣᠷᠭᠤᠮᠠᠯ ᠨᠢ ᠲᠣᠮᠣᠷᠠᠬᠤ ᠠᠴᠠ ᠪᠠᠨ ᠡᠮᠦᠨ᠎ᠡ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠲᠠᠢ ᠨᠡᠯᠢᠶᠡᠳ ᠠᠳᠠᠯᠢᠪᠳᠣᠷ ᠰᠢᠬ ᠪᠠᠶᠢᠳᠠᠬ ᠶᠣᠮ ᠭᠡᠨ᠎ᠡ᠃ ᠬᠡᠷᠪᠡ ᠬᠡᠦᠬᠡᠳ ᠪᠠᠭᠠᠴᠣᠳ ᠡᠯᠵᠢᠭᠡᠨ ᠴᠢᠬᠢ ᠶᠢ ᠠᠳᠡᠭᠦᠷᠡᠵᠦ ᠲᠡᠭᠦᠭᠡᠳ ᠢᠳᠡᠪᠡᠯ ᠬᠤᠣᠷ ᠪᠣᠯᠣᠨ᠎ᠠ ᠭᠡᠳᠡᠭ᠃ ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠨᠢ ᠬᠡᠳᠦᠢ ᠪᠠᠷ ᠢᠳᠡᠬᠦ ᠳᠤ ᠭᠠᠰᠢᠭᠤᠨ ᠰᠢᠬ ᠪᠣᠯᠪᠠᠴᠦ ᠴᠢᠰᠣᠨ ᠡᠷᠭᠢᠯᠳᠡ ᠶᠢ ᠰᠠᠶᠢᠵᠢᠷᠠᠭᠤᠯᠨ᠂ ᠴᠢᠰᠣᠨ ᠤ ᠬᠠᠯᠠᠭᠤᠨ ᠢ ᠠᠷᠢᠯᠭᠠᠳᠠᠬ ᠠᠴᠠ ᠵᠠᠯᠠᠭᠤ ᠪᠠᠭᠠᠴᠣᠳ ᠤᠨ ᠬᠠᠴᠠᠷ ᠲᠤ ᠰᠡᠪᠬᠡ ᠭᠠᠷᠬᠤ᠂ ᠬᠠᠴᠠᠷ ᠲᠤ ᠴᠣᠬᠤᠷ ᠢᠯᠡᠷᠡᠬᠦ ᠵᠡᠷᠭᠡ ᠶᠢᠨ ᠡᠪᠡᠳᠴᠢᠨ ᠢ ᠵᠠᠰᠠᠵᠦ ᠡᠳᠡᠭᠡᠷᠡᠭᠦᠯᠬᠦ ᠴᠢᠳᠠᠯᠳᠠᠢ᠃ ︽ᠭᠠᠰᠢᠭᠤᠨ ᠨᠣᠭᠤᠭ᠎ᠠ ᠶᠢ ᠲᠡᠭᠦᠵᠦ ᠠᠪᠣᠭᠠᠳ ᠣᠬᠢᠶᠠᠵᠦ ᠴᠡᠪᠡᠷᠯᠡᠭᠡᠳ ᠬᠠᠳᠠᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠴᠠᠢ ᠪᠣᠯᠭᠠᠵᠦ ᠣᠣᠭᠤᠪᠠᠯ ᠪᠦᠭᠡᠷ᠎ᠡ ᠶᠢᠨ ᠴᠢᠳᠠᠯ ᠢ ᠰᠠᠶᠢᠵᠢᠷᠠᠭᠤᠯᠵᠦ ᠴᠢᠰᠣᠨ ᠦᠭᠡᠬᠦ ᠶᠢ ᠪᠠᠭᠠᠰᠬᠠᠵᠦ ᠲᠡᠶᠢᠯᠦᠨ᠎ᠡ︾ ᠭᠡᠵᠦ ᠵᠠᠷᠢᠮ ᠡᠮᠴᠢ ᠨᠠᠷ ᠶᠠᠷᠢᠳᠠᠬ᠃      ᠮᠠᠨᠵᠢᠤᠬᠠᠢ᠃ ᠮᠠᠨᠵᠢᠤᠬᠠᠢ ᠪᠣᠯ ᠬᠤᠷᠴᠢᠨ ᠨᠣᠳᠤᠬ ᠤᠨ ᠬᠡᠦᠬᠡᠳ ᠪᠠᠭᠠᠴᠣᠳ ᠤᠨ ᠵᠦᠡᠭᠳᠡᠭᠡᠨ ᠲᠡᠭᠦᠵᠦ ᠢᠳᠡᠳᠡᠭ ᠣᠷᠭᠤᠮᠠᠯ ᠤᠨ ᠨᠢᠭᠡ ᠪᠠᠶᠢᠵᠠᠢ᠃ ᠭᠡᠬᠦ ᠳᠡᠭᠡᠨ ᠮᠠᠨᠵᠢᠤᠬᠠᠢ ᠶᠢ ᠵᠠᠪᠠᠯ ᠨᠠᠪᠴᠢᠯᠠᠬᠤ ᠠᠴᠠ ᠡᠮᠦᠨ᠎ᠡ ᠦᠨᠳᠦᠰᠦ ᠶᠢ ᠨᠢ ᠲᠡᠭᠦᠵᠦ ᠢᠳᠡᠬᠦ ᠶᠣᠰᠣᠳᠠᠢ᠃ ᠬᠤᠷᠴᠢᠨ ᠨᠣᠳᠤᠬ ᠤᠨ ᠬᠦᠮᠦᠰ ᠠᠴᠠ ︽ᠲᠡᠭᠷᠢ ᠲᠣᠣᠭᠠᠷᠣᠬᠰᠠᠨ ᠤ ᠲᠠᠷᠠᠭ᠎ᠠ ᠮᠠᠨᠵᠢᠤᠬᠠᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠬᠤᠣᠷ ᠪᠣᠯᠣᠨ᠎ᠠ︾ ᠭᠡᠵᠦ ᠬᠡᠦᠬᠡᠳ ᠪᠠᠭᠠᠴᠣᠳ ᠲᠤ ᠪᠠᠨ ᠰᠠᠨᠠᠭᠠᠣᠯᠳᠠᠬ᠃ ᠮᠠᠨᠵᠢᠤᠬᠠᠢ ᠨᠢ ᠲᠣᠪᠣᠷᠬᠠᠬ ᠪᠣᠷᠣ ᠭᠠᠵᠠᠷ ᠦᠨᠳᠦᠰᠦᠯᠡᠳᠡᠭ ᠠᠴᠠ ᠬᠠᠪᠣᠷ ᠪᠣᠯᠵᠦ ᠭᠠᠵᠠᠷ ᠬᠡᠰᠴᠦ ᠡᠬᠢᠯᠡᠬᠦ ᠬᠢᠷᠢᠨ᠎ᠡ ᠬᠤᠷᠴᠢᠨ ᠨᠣᠳᠤᠬ ᠤᠨ ᠬᠡᠦᠬᠡᠳ ᠮᠠᠨᠵᠢᠤᠬᠠᠢ ᠶᠢᠨ ᠦᠨᠳᠦᠰᠦ ᠮᠠᠯᠳᠠᠵᠦ ᠢᠳᠡᠳᠡᠭ᠃ ᠮᠠᠨᠵᠢᠤᠬᠠᠢ ᠶᠢᠨ ᠲᠣᠮᠣ ᠨᠢ ᠬᠤᠷᠣᠭᠤ ᠬᠢᠷᠢ ᠶᠢᠨ ᠪᠦᠳᠦᠭᠦᠨ ᠪᠠᠶᠢᠵᠦ ᠢᠳᠡᠬᠦ ᠠᠴᠠ ᠡᠮᠦᠨ᠎ᠡ ᠭᠠᠳᠠᠨᠠᠬᠢ ᠬᠠᠯᠢᠰᠣ ᠶᠢ ᠨᠢ ᠱᠠᠭᠠᠯᠠᠵᠦ ᠠᠪᠣᠪᠠᠯ ᠬᠠᠯᠢᠰᠣᠨ ᠲᠣᠳᠣᠷᠠᠬᠢ ᠨᠢ ᠣᠯᠠᠪᠳᠣᠷ ᠪᠣᠷᠣ ᠦᠡᠭᠭᠡᠳᠡᠢ ᠬᠠᠷᠠᠬᠳᠠᠳᠠᠬ᠃ ᠬᠡᠷᠪᠡ ᠴᠠᠭᠠᠨ ᠪᠣᠶᠣ ᠰᠢᠷ᠎ᠠ ᠦᠡᠭᠭᠡ ᠪᠠᠶᠢᠪᠠᠯ ᠮᠠᠨᠵᠢᠤᠬᠠᠢ ᠪᠢᠰᠢ ᠬᠠᠷᠢᠨ ᠪᠣᠰᠣᠳ ᠬᠤᠣᠷᠳᠦ ᠡᠪᠡᠰᠦᠨ ᠤ ᠦᠨᠳᠦᠰᠦ ᠪᠠᠶᠢᠵᠦ ᠮᠡᠳᠡᠨ᠎ᠡ᠃ ᠮᠠᠨᠵᠢᠤᠬᠠᠢ ᠶᠢᠨ ᠦᠨᠳᠦᠰᠦᠨ ᠤ ᠣᠷᠣᠢ ᠨᠢ ᠬᠢᠮᠦᠰᠦᠨ ᠲᠣᠯᠢ ᠠᠴᠠ ᠲᠤᠮᠤ ᠨᠡᠪᠴᠢᠯᠡᠮᠡᠬᠴᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠪᠣᠯᠳᠠᠬ᠃      ᠬᠠᠯᠠᠭᠠᠢ᠂ ᠵᠤᠭ᠎ᠠ᠂ ᠭᠠᠰᠢᠭᠤᠨ ᠨᠣᠭᠤᠭ᠎ᠠ᠂ ᠮᠠᠨᠵᠢᠤᠬᠠᠢ ᠵᠡᠷᠭᠡ ᠶᠢᠨ ᠣᠷᠭᠤᠮᠠᠯ ᠢ ᠬᠤᠷᠴᠢᠨᠴᠣᠳ ᠢᠳᠡᠰᠢᠨ ᠨᠣᠭᠤᠭ᠎ᠠ ᠪᠣᠯᠭᠠᠵᠦ ᠠᠰᠢᠬᠯᠠᠭᠠᠳ ᠬᠡᠴᠢᠨᠡᠬᠡᠨ ᠣᠨ ᠪᠣᠯᠵᠦ ᠪᠠᠶᠢᠭ᠎ᠠ ᠶᠢ ᠬᠡᠨ ᠴᠦ ᠡᠰᠡ ᠮᠡᠳᠡᠨ᠎ᠡ᠃ ᠭᠡᠪᠡᠴᠦ ᠡᠳᠡᠭᠡᠷ ᠬᠡᠭᠡᠷ᠎ᠡ ᠶᠢᠨ ᠨᠣᠭᠤᠭ᠎ᠠ ᠨᠢ ᠬᠠᠳᠠᠭᠤ ᠪᠡᠷᠬᠡ ᠴᠠᠬ ᠮᠦᠴᠡ ᠳᠤ ᠬᠤᠷᠴᠢᠨᠴᠣᠳ ᠤᠨ ᠦᠯ ᠢ ᠵᠠᠯᠭᠠᠵᠦ ᠠᠮᠢ ᠶᠢ ᠨᠢ ᠠᠪᠣᠷᠠᠵᠦ ᠪᠠᠶᠢᠬᠰᠠᠨ ᠦᠡᠭᠭᠡᠷᠡᠯᠳᠡ ᠲᠠᠢ ᠭᠡᠳᠡᠭ᠃ ᠨᠠᠰᠣᠳᠠᠶᠢᠴᠣᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ᠬᠤᠭᠤᠯᠠ ᠣᠮᠳᠠ ᠬᠦᠷᠦᠯᠴᠡᠭᠦ ᠦᠭᠡᠢ ᠪᠠᠶᠢᠬᠰᠠᠨ ᠬᠠᠭᠤᠴᠢᠨ ᠨᠡᠶᠢᠭᠡᠮ ᠳᠤ ᠶᠠᠳᠠᠭᠤ ᠵᠦᠳᠡᠭᠦᠦ ᠠᠷᠠᠳ ᠠᠴᠠ ᠭᠠᠰᠢᠭᠤᠨ ᠨᠣᠭᠤᠭ᠎ᠠ᠂ ᠬᠠᠯᠠᠭᠠᠢ ᠨᠣᠭᠤᠭ᠎ᠠ᠂ ᠵᠤᠭ᠎ᠠ ᠵᠡᠷᠭᠡ ᠶᠢ ᠪᠣᠳᠠᠭᠠᠨ ᠤ ᠰᠦᠮᠦᠰᠦᠨ ᠳᠤ ᠴᠢᠨᠠᠭᠠᠳ ᠬᠤᠭᠤᠯᠠ ᠪᠣᠯᠭᠠᠨ ᠬᠡᠷᠡᠭᠯᠡᠵᠦ ᠠᠮᠢ ᠭᠤᠣᠯ ᠲᠠᠢ ᠶᠠᠪᠣᠵᠦ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠪᠠᠰᠠ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠵᠢᠷᠠᠭᠠᠳ ᠣᠨ ᠤ ᠦᠶᠡᠰ ᠬᠤᠷᠴᠢᠨ ᠨᠣᠳᠤᠬ ᠲᠤ ᠶᠡᠭᠡ ᠭᠠᠨᠭ᠌ ᠬᠠᠭᠰᠠᠷᠠᠭᠠᠨ ᠪᠣᠯᠣᠭᠠᠳ ᠬᠦᠮᠦᠰ ᠢᠳᠡᠬᠦ ᠪᠣᠳᠠᠭ᠎ᠠ ᠦᠭᠡᠢ ᠪᠣᠯᠬᠤ ᠳᠤ ᠪᠠᠨ ᠡᠳᠡᠭᠡᠷ ᠨᠣᠭᠤᠭ᠎ᠠ ᠶᠢ ᠠᠭᠠᠬ ᠲᠠᠢ ᠬᠤᠯᠢᠵᠦ ᠪᠣᠣᠪᠤ ᠪᠣᠯᠭᠠᠨ ᠴᠢᠨᠠᠭᠠᠳ ᠬᠦᠨᠡᠰᠦ ᠪᠣᠯᠭᠠᠵᠦ ᠬᠡᠴᠡᠭᠦᠦ ᠣᠨ ᠵᠢᠯ ᠢ ᠦᠡᠭᠭᠡᠷᠡᠵᠦ ᠭᠠᠷᠣᠬᠰᠠᠨ ᠭᠡᠳᠡᠭ᠃ ᠡᠶᠢᠮᠦ ᠠᠴᠠ ᠡᠳᠡᠭᠡᠷ ᠬᠡᠭᠡᠷ᠎ᠡ ᠶᠢᠨ ᠨᠣᠭᠤᠭ᠎ᠠ ᠨᠢ ᠣᠳᠣ ᠶᠢᠨ ᠴᠢᠨᠡᠭᠡᠯᠢᠭ ᠨᠡᠶᠢᠭᠡᠮ ᠢ ᠠᠪᠴᠢᠷᠠᠬᠤ ᠳᠤ ᠴᠦ ᠭᠢᠯᠪᠠᠭ᠎ᠠ ᠰᠠᠴᠣᠷᠠᠮ᠎ᠠ ᠦᠢᠯᠡᠳᠦᠯ ᠬᠡᠷᠡᠭᠴᠡᠭᠡ ᠪᠠᠨ ᠪᠠᠳᠠᠷᠠᠭᠤᠯᠵᠦ ᠪᠠᠶᠢᠵᠠᠢ ᠭᠡᠳᠡᠭ ᠢ ᠪᠢᠳᠡ ᠴᠡᠭᠡᠵᠢᠯᠡᠬᠦ ᠶᠣᠰᠣᠳᠠᠢ᠃      ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠲᠠᠷᠢᠮᠠᠯ      ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠤᠨ ᠬᠤᠷᠴᠢᠨ ᠨᠣᠳᠤᠬ ᠲᠤ ᠶᠡᠭᠡ ᠪᠠᠷ ᠨᠡᠪᠴᠢᠨ ᠣᠷᠣᠵᠦ ᠢᠷᠡᠬᠦ ᠶᠢ ᠲᠠᠭᠠᠯᠳᠣᠨ ᠲᠠᠷᠢᠶᠠᠴᠢᠳ ᠤᠨ ᠡᠳᠦᠷ ᠲᠣᠳᠣᠮ ᠤᠨ ᠬᠡᠷᠡᠭᠯᠡᠭᠡᠨ ᠳᠤ ᠣᠷᠣᠳᠠᠬ ᠨᠣᠭᠤᠭ᠎ᠠ ᠴᠠᠭ᠎ᠠ ᠶᠢᠨ ᠲᠠᠷᠢᠮᠠᠯ ᠤᠨ ᠵᠦᠢᠯ ᠨᠢ ᠴᠦ ᠬᠤᠷᠴᠢᠨ ᠨᠣᠳᠤᠬ ᠲᠤ ᠲᠠᠷᠢᠬᠳᠠᠵᠦ ᠡᠬᠢᠯᠡᠵᠡᠢ᠃ ᠬᠤᠷᠴᠢᠨᠴᠣᠳ ᠤᠨ ᠲᠠᠷᠢᠳᠠᠬ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠲᠦᠷᠦᠯ ᠵᠦᠢᠯ ᠨᠢ ᠨᠡᠯᠢᠶᠡᠳ ᠣᠯᠠᠨ ᠪᠠᠶᠢᠳᠠᠬ᠃ ᠡᠭᠦᠨ ᠳᠤ ᠯᠣᠣᠪᠠᠨᠭ᠌᠂ ᠴᠠᠭᠠᠨ ᠨᠣᠭᠤᠭ᠎ᠠ᠂ ᠮᠠᠨᠵᠢᠨ᠂ ᠲᠦᠮᠦᠰᠦ᠂ ᠪᠣᠷᠴᠠᠬ ᠁ ᠵᠡᠷᠭᠡ ᠶᠢᠨ ᠨᠣᠭᠤᠭ᠎ᠠ ᠶᠢᠨ ᠲᠠᠷᠢᠮᠠᠯ ᠢ ᠭᠡᠷ ᠠᠴᠠ ᠪᠠᠨ ᠵᠠᠶᠢᠳᠠᠭᠤ ᠲᠠᠷᠢᠶᠠᠨ ᠭᠠᠵᠠᠷ ᠲᠤ ᠪᠣᠰᠣᠳ ᠲᠠᠷᠢᠮᠠᠯ ᠲᠠᠢ ᠬᠤᠯᠢᠵᠦ ᠲᠠᠷᠢᠳᠠᠬ ᠶᠣᠮ᠃      ᠯᠣᠣᠪᠠᠨᠭ᠌᠃ ᠯᠣᠣᠪᠠᠨᠭ᠌ ᠳᠤ ᠣᠯᠠᠭᠠᠨ ᠯᠣᠣᠪᠠᠨᠭ᠌᠂ ᠴᠠᠭᠠᠨ ᠯᠣᠣᠪᠠᠨᠭ᠌᠂ ᠬᠤᠯᠣᠣᠪᠠᠨᠭ᠌᠂ ᠣᠰᠣᠨ ᠯᠣᠣᠪᠠᠨᠭ᠌ ᠭᠡᠬᠦ ᠮᠡᠳᠦ ᠶᠢᠨ ᠬᠡᠳᠦᠨ ᠲᠦᠷᠦᠯ ᠪᠠᠶᠢᠳᠠᠬ᠃ ᠡᠭᠦᠨ ᠳᠤ ᠭᠡᠷ ᠠᠴᠠ ᠵᠠᠶᠢᠳᠠᠭᠤ ᠲᠠᠷᠢᠶᠠᠨ ᠭᠠᠵᠠᠷ ᠤᠳ ᠢᠶᠠᠷ ᠲᠠᠷᠢᠳᠠᠬ ᠨᠢ ᠣᠯᠠᠭᠠᠨ ᠯᠣᠣᠪᠠᠨᠭ᠌ ᠪᠣᠯᠣᠨ ᠴᠠᠭᠠᠨ ᠯᠣᠣᠪᠠᠨᠭ᠌ ᠪᠣᠯᠣᠨ᠎ᠠ᠃ ᠬᠤᠷᠴᠢᠨᠴᠣᠳ ᠯᠣᠣᠪᠠᠨᠭ᠌ ᠢ ᠵᠣᠨ ᠤ ᠰᠡᠭᠦᠯᠴᠢ ᠪᠠᠷ ᠲᠠᠷᠢᠳᠠᠬ᠃ ᠯᠣᠣᠪᠠᠨᠭ᠌ ᠨᠢ ᠦᠨᠳᠦᠰᠦ ᠨᠢ ᠭᠠᠵᠠᠷ ᠲᠣᠣᠷ᠎ᠠ ᠪᠦᠳᠦᠭᠦᠷᠡᠵᠦ ᠪᠣᠯᠪᠠᠰᠣᠷᠠᠳᠠᠬ ᠣᠷᠭᠤᠮᠠᠯ ᠪᠣᠯᠬᠤᠷ ᠵᠣ ᠰᠢᠬ ᠬᠦᠪᠰᠦᠭᠡᠷ ᠵᠦᠭᠡᠯᠠᠨ ᠭᠠᠵᠠᠷ ᠲᠠᠷᠢᠪᠠᠯ ᠲᠣᠬᠢᠷᠠᠮᠵᠢᠳᠠᠢ ᠃ ᠬᠤᠷᠴᠢᠨᠴᠣᠳ ᠯᠣᠣᠪᠠᠨᠭ᠌ ᠢ ᠭᠤᠰᠢᠭᠤᠨ ᠮᠦᠷᠳᠡᠭᠡᠨ ᠣᠰᠣᠯᠢᠬ ᠨᠢ ᠠᠮᠳᠠᠳᠠᠢ ᠭᠡᠵᠦ ᠦᠵᠡᠳᠡᠭ ᠠᠴᠠ ᠭᠤᠰᠢᠭᠤᠨ ᠯᠣᠣᠪᠠᠨᠭ᠌ ᠲᠠᠷᠢᠵᠦ ᠭᠠᠷᠭᠠᠬᠤ ᠪᠠᠨ ᠶᠡᠭᠡ ᠣᠯᠵᠣᠭᠤᠷᠬᠠᠨ ᠦᠵᠡᠳᠡᠭ᠃ ᠨᠠᠮᠣᠷ ᠪᠣᠯᠣᠭᠠᠳ ᠯᠣᠣᠪᠠᠨᠭ᠌ ᠬᠤᠷᠢᠶᠠᠬᠤ ᠦᠶᠡᠰ᠄ ︽ᠬᠡᠨ ᠬᠡᠨ ᠤ ᠲᠠᠷᠢᠬᠰᠠᠨ ᠯᠣᠣᠪᠠᠨᠭ᠌ ᠨᠢ ᠬᠢᠷᠢ ᠵᠡᠷᠭᠡ ᠶᠢᠨ ᠭᠤᠰᠢᠭᠤᠨ ᠪᠠᠶᠢᠨ᠎ᠠ᠃ ᠪᠠᠷᠤᠬ ᠱᠠᠯᠳᠠᠩ ᠢᠶᠠᠷ ᠲᠠᠷᠢᠬᠰᠠᠨ ᠪᠠᠶᠢᠬᠤ ᠡ︕︾ ᠭᠡᠵᠦ ᠵᠣᠭᠤᠬ ᠪᠣᠯᠭᠠᠨ ᠶᠠᠷᠢᠯᠴᠠᠳᠠᠬ ᠪᠠᠶᠢᠵᠠᠢ᠃ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠵᠠᠷᠢᠮ ᠭᠠᠵᠠᠷ ᠣᠷᠣᠨ ᠢᠶᠠᠷ ᠯᠣᠣᠪᠠᠨᠭ᠌ ᠢ ᠭᠤᠰᠢᠭᠤᠨ ᠪᠣᠯᠭᠠᠬᠤ ᠭᠡᠵᠦ ᠲᠠᠷᠢᠬᠤ ᠦᠶᠡᠰ ᠲᠤ ᠪᠠᠨ ᠠᠷᠪᠠ ᠬᠦᠷᠦᠭᠡᠳᠦᠢ ᠬᠡᠦᠬᠡᠳ ᠢ ᠱᠠᠯᠳᠠᠩ ᠢᠶᠠᠷ ᠯᠣᠣᠪᠠᠨᠭ᠌ ᠤᠨ ᠦᠷ᠎ᠡ ᠰᠠᠴᠣᠭᠤᠯᠳᠠᠬ ᠦᠵᠡᠭᠳᠡᠯ ᠴᠦ ᠪᠠᠶᠢᠳᠠᠬ ᠶᠣᠮ ᠭᠡᠨ᠎ᠡ᠃ ᠯᠣᠣᠪᠠᠨᠭ᠌ ᠨᠢ ᠬᠡᠢ ᠶᠢ ᠨᠡᠪᠳᠡᠷᠡᠭᠦᠯᠵᠦ᠂ ᠰᠢᠷ᠎ᠠ ᠶᠢ ᠲᠠᠷᠣᠬᠤ᠂ ᠬᠠᠭᠤᠴᠢᠷᠠᠬᠰᠠᠨ ᠬᠠᠯᠠᠭᠤᠨ ᠢ ᠠᠷᠢᠯᠭᠠᠬᠤ ᠮᠡᠳᠦ ᠶᠢᠨ ᠡᠮᠴᠢᠯᠡᠭᠡᠨ ᠤ ᠦᠢᠯᠡᠳᠦᠯ ᠪᠠᠶᠢᠳᠠᠬ ᠠᠴᠠ ᠬᠤᠷᠴᠢᠨ ᠨᠣᠳᠤᠬ ᠲᠤ᠄ ︽ᠯᠠᠷᠵᠢᠶ᠎ᠠ ᠲᠠᠢ ᠡᠮᠴᠢ ᠠᠴᠠ ᠡᠮ ᠣᠣᠭᠤᠬᠤ ᠪᠠᠷ ᠢᠶᠠᠨ ᠯᠣᠣᠪᠠᠨᠭ᠌ ᠤᠨ ᠱᠦᠯᠦ ᠶᠢ ᠬᠦᠯᠦᠷᠡᠳᠡᠯ᠎ᠡ ᠣᠣᠭᠤ︕︾ ᠭᠡᠳᠡᠭ ᠬᠠᠪᠣᠳᠦ ᠦᠭᠡ ᠴᠦ ᠪᠣᠢ ᠪᠣᠯᠣᠬᠰᠠᠨ ᠶᠣᠮ᠃ ᠯᠣᠣᠪᠠᠨᠭ᠌ ᠢ ᠬᠤᠷᠴᠢᠨᠴᠣᠳ ᠣᠯᠠᠨ ᠶᠠᠩᠵᠦ ᠪᠠᠷ ᠢᠳᠡᠳᠡᠭ᠃ ᠲᠦᠭᠦᠬᠡᠢ ᠪᠠᠷ ᠬᠡᠷᠴᠢᠭᠡᠳ ᠵᠢᠶᠠᠩ ᠳᠤ ᠲᠦᠷᠦᠵᠦ ᠢᠳᠡᠵᠦ ᠪᠣᠯᠣᠨ᠎ᠠ᠃ ᠪᠠᠰᠠ ᠲᠠᠪᠣᠰᠣᠯᠠᠬᠰᠠᠨ ᠨᠣᠭᠤᠭ᠎ᠠ ᠬᠢᠵᠦ ᠢᠳᠡᠳᠡᠭ᠃ ᠯᠣᠣᠪᠠᠨᠭ᠌  ᠪᠦᠳᠦᠭᠦᠷᠡᠬᠦ ᠠᠴᠠ ᠡᠮᠦᠨ᠎ᠡ ᠨᠠᠪᠴᠢ ᠶᠢ ᠨᠢ ᠮᠦᠯᠢᠵᠦ ᠠᠪᠣᠭᠠᠳ ᠢᠳᠡᠵᠦ ᠪᠣᠯᠣᠨ᠎ᠠ᠃ ᠪᠠᠰᠠ ᠯᠣᠣᠪᠠᠨᠭ᠌ ᠢ ᠦᠬᠡᠷ ᠤᠨ ᠮᠢᠬ᠎ᠠ ᠵᠡᠷᠭᠡ ᠶᠢᠨ ᠮᠢᠬ᠎ᠠ ᠲᠠᠢ ᠱᠦᠯᠦ ᠳᠤ ᠪᠣᠴᠠᠯᠭᠠᠵᠦ ᠱᠦᠯᠦ ᠭᠠᠷᠭᠠᠨ ᠣᠣᠭᠤᠪᠠᠯ ᠡᠪᠡᠳᠴᠢᠨ ᠵᠠᠰᠠᠨ᠎ᠠ ᠭᠡᠳᠡᠭ᠃ ᠯᠣᠣᠪᠠᠨᠭ᠌ ᠢᠶᠠᠷ ᠰᠢᠶᠠᠨᠰᠠ ᠬᠢᠵᠦ ᠪᠣᠣᠵᠠ᠂ ᠱᠠᠯᠪᠢᠡᠭ᠂ ᠪᠠᠩᠰᠢ ᠮᠡᠳᠦ ᠶᠢᠨ ᠬᠤᠭᠤᠯᠠ ᠪᠣᠯᠭᠠᠵᠦ ᠢᠳᠡᠳᠡᠭ᠃ ᠯᠣᠣᠪᠠᠨᠭ᠌ ᠢ ᠣᠳᠠᠭᠠᠨ ᠬᠠᠳᠠᠭᠠᠯᠠᠪᠠᠯ ᠣᠰᠣᠯᠢᠬ ᠪᠢᠰᠢ ᠪᠣᠯᠵᠦ ᠬᠦᠨᠳᠡᠶᠢᠷᠡᠬᠦ ᠠᠶᠣᠯᠳᠠᠢ ᠪᠣᠯᠬᠤᠷ ᠭᠠᠵᠠᠷ ᠬᠦᠯᠳᠡᠬᠦ ᠠᠴᠠ ᠡᠮᠦᠨ᠎ᠡ ᠨᠦᠬᠡ ᠮᠠᠯᠳᠠᠭᠠᠳ ᠵᠣᠭᠤᠷᠢᠯᠠᠵᠦ ᠬᠠᠳᠠᠭᠠᠯᠠᠳᠠᠬ ᠶᠣᠮ᠃ ᠵᠠᠷᠢᠮ ᠦᠶᠡᠰ ᠵᠣᠭᠤᠷᠢ ᠨᠢ ᠬᠡᠳᠦᠷᠬᠡᠢ ᠲᠣᠯᠠᠭᠠᠨ ᠪᠠᠶᠢᠪᠠᠯ ᠵᠣᠭᠤᠷᠢᠯᠠᠬᠰᠠᠨ ᠯᠣᠣᠪᠠᠨᠭ᠌ ᠨᠠᠪᠴᠢᠯᠠᠬᠤ ᠦᠵᠡᠭᠳᠡᠯ ᠴᠦ ᠭᠠᠷᠳᠠᠬ᠃ ᠡᠭᠦᠨ ᠢᠶᠠᠨ ᠬᠤᠷᠴᠢᠨᠴᠣᠳ ᠯᠣᠣᠪᠠᠨᠭ᠌ ᠤᠨ ᠰᠣᠶᠤᠭ᠎ᠠ ᠭᠡᠵᠦ ᠬᠡᠦᠬᠡᠳ ᠪᠠᠭᠠᠴᠣᠳ ᠢᠳᠡᠪᠡᠯ ᠰᠢᠳᠦ ᠨᠢ ᠲᠣᠷᠰᠣᠭᠠᠷ ᠪᠣᠯᠣᠨ᠎ᠠ ᠭᠡᠳ ᠬᠡᠷᠴᠢᠵᠦ ᠭᠡᠭᠡᠳᠡᠭ ᠶᠣᠮ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠯᠣᠣᠪᠠᠨᠭ᠌ ᠢ ᠬᠡᠷᠴᠢᠵᠦ ᠬᠠᠳᠠᠭᠠᠭᠠᠳ ᠬᠠᠪᠣᠷ ᠤᠨ ᠡᠷᠢᠨ ᠳᠤ ᠱᠦᠯᠦ ᠪᠣᠯᠭᠠᠵᠦ ᠢᠳᠡᠳᠡᠭ ᠴᠦ ᠪᠣᠢ᠃     ᠴᠠᠭᠠᠨ ᠨᠣᠭᠤᠭ᠎ᠠ᠃ ᠴᠠᠭᠠᠨ ᠨᠣᠭᠤᠭ᠎ᠠ ᠪᠣᠯ ᠬᠤᠷᠴᠢᠨ ᠳᠤ ᠲᠦᠭᠡᠮᠡᠯ ᠲᠠᠷᠢᠳᠠᠬ ᠨᠣᠭᠤᠭ᠎ᠠ ᠶᠢᠨ ᠨᠢᠭᠡ ᠲᠦᠷᠦᠯ ᠪᠣᠯᠣᠨ᠎ᠠ᠃ ᠴᠠᠭᠠᠨ ᠨᠣᠭᠤᠭ᠎ᠠ ᠶᠢ ᠶᠡᠷᠦ ᠨᠢ ᠬᠠᠪᠣᠷ ᠤᠨ ᠡᠬᠢᠨ ᠪᠣᠶᠣ ᠵᠣᠨ ᠤ ᠡᠬᠢᠨ ᠭᠡᠵᠦ ᠬᠤᠶᠠᠷ ᠣᠳᠠᠭ᠎ᠠ ᠲᠠᠷᠢᠳᠠᠬ᠃ ᠬᠠᠪᠣᠷ ᠤᠨ ᠡᠬᠢᠨ ᠳᠤ ᠲᠠᠷᠢᠬᠰᠠᠨ ᠴᠠᠭᠠᠨ ᠨᠣᠭᠤᠭ᠎ᠠ ᠪᠠᠨ ᠨᠢᠯᠬ᠎ᠠ ᠴᠠᠭᠠᠨ ᠨᠣᠭᠤᠭ᠎ᠠ ᠭᠡᠵᠦ ᠲᠦᠭᠡ ᠦᠨᠳᠦᠷ ᠪᠣᠯᠣᠮᠠᠬᠴᠠ ᠦᠭᠳᠡᠭᠡᠵᠦ ᠠᠪᠣᠭᠠᠳ ᠣᠬᠢᠶᠠᠵᠦ ᠴᠡᠪᠡᠷᠯᠡᠭᠡᠳ ᠵᠢᠶᠠᠩ ᠳᠤ ᠲᠦᠷᠦᠵᠦ ᠢᠳᠡᠳᠡᠭ᠃ ᠵᠣᠨ ᠤ ᠰᠡᠭᠦᠯᠴᠢ ᠪᠠᠷ ᠲᠠᠷᠢᠬᠰᠠᠨ ᠴᠠᠭᠠᠨ ᠨᠣᠭᠤᠭ᠎ᠠ ᠪᠠᠨ ᠰᠠᠶᠢᠳᠣᠷ ᠠᠷᠠᠴᠢᠯᠠᠵᠦ ᠲᠣᠮᠣ ᠪᠣᠯᠭᠠᠭᠠᠳ ᠡᠪᠦᠯ ᠤᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠪᠣᠯᠭᠠᠳᠠᠬ ᠶᠣᠮ᠃ ᠴᠠᠭᠠᠨ ᠨᠣᠭᠤᠭ᠎ᠠ ᠨᠢ ᠦᠡᠭ ᠰᠢᠮᠡᠯᠢᠭ ᠣᠮᠳᠠᠯᠢᠭ ᠭᠠᠵᠠᠷ ᠣᠷᠭᠤᠴᠠ ᠪᠠᠷ ᠰᠠᠶᠢᠨ ᠪᠠᠶᠢᠳᠠᠬ᠃ ᠬᠤᠷᠴᠢᠨ ᠳᠤ ᠰᠠᠶᠢᠨ ᠴᠠᠭᠠᠨ ᠨᠣᠭᠤᠭ᠎ᠠ ᠶᠢ ᠰᠢᠯᠭᠠᠬᠤ ᠳᠤ ᠪᠠᠨ ᠨᠠᠪᠴᠢ ᠨᠢ ᠯᠠᠬᠰᠠᠭᠠᠷ ᠴᠡᠯᠡᠭᠡᠷ᠂ ᠬᠤᠷᠣᠬᠠᠢ ᠢᠳᠡᠭᠰᠡᠨ ᠢᠶᠠᠷ ᠪᠠᠭ᠎ᠠ᠂ ᠭᠤᠣᠯ ᠲᠠᠢ ᠡᠰᠡᠬᠦ ᠪᠠᠷ ᠰᠢᠯᠭᠠᠳᠠᠬ᠃ ᠴᠠᠭᠠᠨ ᠨᠣᠭᠤᠭ᠎ᠠ ᠨᠢ ᠬᠠᠭᠤᠷᠴᠦ ᠢᠳᠡᠬᠦ᠂ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠬᠦ᠂ ᠲᠠᠪᠣᠰᠣᠯᠠᠵᠦ ᠢᠳᠡᠬᠦ᠂ ᠰᠢᠶᠠᠨᠰᠠ ᠬᠢᠵᠦ ᠢᠳᠡᠬᠦ ᠳᠤ ᠪᠦᠷ ᠲᠣᠬᠢᠷᠠᠳᠠᠬ ᠶᠣᠮ᠃ ᠬᠤᠷᠴᠢᠨᠴᠣᠳ ᠴᠠᠭᠠᠨ ᠨᠣᠭᠤᠭ᠎ᠠ ᠶᠢ ᠵᠣᠭᠤᠷᠢᠯᠠᠨ ᠬᠠᠳᠠᠭᠠᠯᠠᠬᠤ ᠠᠴᠠ ᠭᠠᠳᠠᠨ᠎ᠠ ᠭᠠᠨᠭ᠌ ᠳᠤ ᠲᠠᠷᠣᠵᠦ ᠢᠰᠭᠡᠭᠡᠳ ᠡᠪᠦᠯ ᠤᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠪᠣᠯᠭᠠᠳᠠᠬ᠃ ᠴᠠᠭᠠᠨ ᠨᠣᠭᠤᠭ᠎ᠠ ᠢᠰᠭᠡᠬᠦ ᠲᠣᠬᠠᠢ ᠲᠣᠯᠭᠠᠭᠤᠷᠢ ᠠᠴᠠ᠄ ︽ᠭᠤᠣᠯ ᠲᠠᠢ᠂ ᠨᠠᠪᠴᠢ ᠶᠢ ᠨᠢ ᠬᠤᠷᠣᠬᠠᠢ ᠢᠳᠡᠭᠰᠡᠨ ᠢᠶᠠᠷ ᠪᠠᠭ᠎ᠠ ᠴᠠᠭᠠᠨ ᠨᠣᠭᠤᠭ᠎ᠠ ᠶᠢ ᠢᠰᠭᠡᠭᠡᠬᠦ ᠳᠤ ᠬᠠᠮᠤᠬ ᠲᠣᠬᠢᠷᠠᠮᠵᠢᠳᠠᠢ ᠪᠠᠶᠢᠳᠠᠬ᠃ ᠢᠰᠭᠡᠬᠦ ᠠᠴᠠ ᠡᠮᠦᠨ᠎ᠡ ᠴᠠᠭᠠᠨ ᠨᠣᠭᠤᠭ᠎ᠠ ᠪᠠ ᠨᠣᠭᠤᠭ᠎ᠠ ᠢᠰᠭᠡᠬᠦ ᠭᠠᠨᠭ᠌ ᠢᠶᠠᠨ ᠰᠠᠶᠢᠳᠣᠷ ᠣᠬᠢᠶᠠᠨ ᠴᠡᠪᠡᠷᠯᠡᠭᠡᠳ ᠰᠢᠭᠤᠳ ᠭᠠᠨᠭ᠌ ᠲᠣᠳᠣᠷ᠎ᠠ ᠪᠠᠨ ᠵᠡᠷᠭᠡᠯᠡᠨ ᠲᠠᠪᠣᠰᠣ ᠦᠷᠦᠭᠡᠳ ᠴᠢᠯᠠᠭᠤ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠳᠠᠬ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠨᠣᠭᠤᠭ᠎ᠠ ᠪᠠᠨ ᠣᠬᠢᠶᠠᠨ ᠴᠡᠪᠡᠷᠯᠡᠭᠡᠳ ᠲᠠᠬᠢᠨ ᠬᠠᠯᠠᠭᠤᠨ ᠣᠰᠣᠨ ᠳᠤ ᠲᠦᠷᠦᠵᠦ ᠠᠪᠣᠭᠠᠳ ᠭᠠᠨᠭ᠌ ᠲᠣᠳᠣᠷ᠎ᠠ ᠵᠡᠷᠭᠡᠯᠡᠨ ᠲᠠᠪᠣᠰᠣ ᠦᠷᠦᠭᠡᠳ ᠴᠢᠯᠠᠭᠤ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠳᠠᠬ ᠴᠦ ᠪᠣᠢ᠃ ᠡᠶᠢᠮᠦᠷᠬᠦᠦ ᠠᠷᠭ᠎ᠠ ᠨᠢ ᠨᠣᠭᠤᠭ᠎ᠠ ᠢᠰᠴᠦ ᠠᠮᠳᠠ ᠣᠷᠣᠬᠤ ᠳᠤ ᠬᠤᠷᠳᠣᠨ ᠭᠡᠳᠡᠭ᠃ ᠭᠡᠪᠡᠴᠦ ᠬᠡᠳᠦᠷᠬᠡᠢ ᠬᠠᠯᠠᠭᠤᠨ ᠣᠰᠣᠨ ᠳᠤ ᠲᠦᠷᠦᠪᠡᠯ ᠨᠣᠭᠤᠭ᠎ᠠ ᠢᠰᠬᠦ ᠶᠠᠪᠣᠴᠠ ᠳᠤ ᠪᠠᠨ ᠵᠦᠭᠡᠯᠡᠷᠡᠵᠦ ᠨᠣᠯᠳᠠᠷᠠᠬᠤ ᠠᠶᠣᠯᠳᠠᠢ ᠪᠠᠶᠢᠳᠠᠬ︾ ᠭᠡᠵᠡᠢ᠃ ᠢᠰᠭᠡᠭᠰᠡᠨ ᠨᠣᠭᠤᠭ᠎ᠠ ᠶᠢ ᠭᠠᠭ᠋ᠠᠢ ᠶᠢᠨ ᠮᠢᠬ᠎ᠠ ᠲᠠᠢ ᠱᠦᠯᠦ ᠭᠠᠷᠭᠠᠬᠤ᠂ ᠭᠠᠭ᠋ᠠᠢ ᠶᠢᠨ ᠮᠢᠬ᠎ᠠ ᠲᠠᠢ ᠬᠠᠭᠤᠷᠴᠦ ᠢᠳᠡᠬᠦ ᠳᠤ ᠪᠦᠷ ᠣᠨᠴᠠ ᠠᠮᠳᠠᠳᠠᠢ ᠪᠠᠶᠢᠳᠠᠬ᠃ ᠪᠠᠰᠠ ᠰᠢᠶᠠᠨᠰᠠ ᠪᠣᠯᠭᠠᠵᠦ ᠪᠣᠣᠵᠠ᠂ ᠱᠠᠯᠪᠢᠡᠭ᠂ ᠪᠠᠩᠰᠢ ᠵᠡᠷᠭᠡ ᠶᠢᠨ ᠬᠤᠭᠤᠯᠠ ᠪᠣᠯᠭᠠᠳᠠᠬ ᠶᠣᠮ᠃      ᠮᠠᠨᠵᠢᠨ᠃ ᠬᠤᠷᠴᠢᠨ ᠳᠤ ᠮᠠᠨᠵᠢᠨ ᠢ ᠪᠣᠷᠣ ᠪᠣᠶᠣ ᠵᠣ ᠭᠠᠵᠠᠷ ᠲᠠᠷᠢᠳᠠᠬ᠃ ᠮᠠᠨᠵᠢᠨ ᠢ ᠣᠯᠠᠩᠬᠢ ᠳᠤ ᠪᠠᠨ ᠲᠠᠪᠣᠰᠣᠯᠠᠬᠰᠠᠨ ᠨᠣᠭᠤᠭ᠎ᠠ ᠪᠣᠯᠭᠠᠵᠦ ᠢᠳᠡᠳᠡᠭ᠃ ᠮᠠᠨᠵᠢᠨ ᠲᠠᠪᠣᠰᠣᠯᠠᠬᠤ ᠳᠤ ᠣᠷᠢᠳ ᠢᠶᠠᠷ ᠮᠠᠨᠵᠢᠨ ᠢᠶᠠᠨ ᠣᠬᠢᠶᠠᠵᠦ ᠴᠡᠪᠡᠷᠯᠡᠭᠡᠳ ᠭᠠᠨᠭ᠌ ᠲᠠᠢ ᠣᠰᠣᠨ ᠳᠤ ᠲᠠᠪᠣᠰᠣᠯᠠᠵᠦ ᠲᠠᠯᠪᠢᠳᠠᠬ᠃ ᠲᠠᠪᠣᠰᠣᠯᠠᠬᠰᠠᠨ ᠮᠠᠨᠵᠢᠨ ᠠᠮᠳᠠ ᠣᠷᠣᠬᠰᠠᠨ ᠤ ᠲᠠᠷᠠᠭ᠎ᠠ ᠡᠪᠦᠯ ᠳᠤ ᠪᠠᠨ ᠭᠠᠷᠭᠠᠵᠦ ᠠᠪᠣᠭᠠᠳ ᠵᠠᠭᠤᠰᠢ ᠪᠤᠯᠭᠠᠳᠠᠬ᠃ ᠪᠠᠰᠠ ᠬᠠᠪᠣᠷ ᠪᠣᠯᠪᠠᠯ ᠲᠠᠪᠣᠰᠣᠯᠠᠬᠰᠠᠨ ᠮᠠᠨᠵᠢᠨ ᠢᠶᠠᠨ ᠱᠦᠭᠦᠵᠦ ᠠᠪᠣᠭᠠᠳ ᠬᠠᠳᠠᠭᠠᠵᠦ ᠢᠳᠡᠳᠡᠭ ᠴᠦ ᠪᠣᠢ᠃ ᠲᠠᠪᠣᠰᠣᠯᠠᠬᠰᠠᠨ ᠮᠠᠨᠵᠢᠨ ᠢ ᠲᠡᠪᠳᠦᠭᠡᠭᠰᠡᠨ ᠰᠢᠷ᠎ᠠ ᠪᠣᠷᠴᠠᠬ ᠲᠠᠢ ᠬᠠᠭᠤᠷᠴᠤ ᠢᠳᠡᠪᠡᠯ ᠶᠡᠭᠡ ᠠᠮᠳᠠᠳᠠᠢ ᠪᠠᠶᠢᠳᠠᠬ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠮᠠᠨᠵᠢᠨ ᠢ ᠵᠣᠭᠤᠷᠢᠯᠠᠵᠦ ᠬᠠᠳᠠᠭᠠᠯᠠᠬᠤ ᠦᠵᠡᠭᠳᠡᠯ ᠴᠦ ᠪᠣᠢ᠃      ᠲᠦᠮᠦᠰᠦ᠃ ᠲᠦᠮᠦᠰᠦ ᠪᠣᠯ ᠬᠤᠷᠴᠢᠨᠴᠣᠳ ᠤᠨ ᠦᠷᠭᠡᠨ ᠬᠡᠪᠴᠢᠶ᠎ᠡ ᠪᠠᠷ ᠲᠠᠷᠢᠳᠠᠬ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠨᠢᠭᠡ ᠲᠦᠷᠦᠯ ᠪᠣᠯᠣᠨ᠎ᠠ᠃ ᠲᠦᠮᠦᠰᠦ ᠶᠢ ᠭᠤᠣᠯᠳᠠᠭᠤ ᠭᠡᠷ ᠲᠠᠢ ᠪᠠᠨ ᠣᠢᠢᠷᠠᠯᠴᠠᠭ᠎ᠠ ᠰᠢᠬ ᠬᠠᠰᠢᠶ᠎ᠠ ᠳᠤ ᠪᠠᠨ ᠡᠷᠳᠡ ᠶᠢᠨ ᠲᠠᠷᠢᠶ᠎ᠠ ᠲᠠᠢ ᠬᠠᠮᠳᠦ ᠲᠠᠷᠢᠳᠠᠬ᠃ ᠲᠦᠮᠦᠰᠦ ᠲᠠᠷᠢᠬᠤ ᠳᠤ ᠲᠠᠷᠢᠶᠠᠨ ᠭᠠᠵᠠᠷ ᠢᠶᠠᠨ ᠭᠦᠨ ᠰᠢᠭ ᠣᠷᠪᠠᠭᠤᠯᠣᠬᠰᠠᠨ ᠤ ᠲᠠᠷᠠᠭ᠎ᠠ ᠰᠣᠶᠣᠭᠠᠯᠠᠬᠰᠠᠨ ᠲᠦᠮᠦᠰᠦ ᠶᠢᠨ ᠰᠣᠶᠤᠭ᠎ᠠ ᠲᠠᠢ ᠬᠡᠰᠢᠭ ᠢ ᠣᠬᠳᠣᠯᠵᠦ ᠠᠪᠣᠭᠠᠳ ᠪᠣᠯᠠᠵᠦ ᠲᠠᠯᠪᠢᠳᠠᠬ᠃ ᠲᠠᠷᠢᠬᠰᠠᠨ ᠲᠦᠮᠦᠰᠦ ᠨᠢ ᠬᠡᠰᠡᠭ ᠬᠤᠭᠤᠴᠠᠭ᠎ᠠ ᠦᠡᠭᠭᠡᠷᠡᠭᠡᠳ ᠲᠣᠬᠤᠢ ᠰᠢᠬᠠᠮ ᠣᠷᠭᠤᠬᠤ ᠦᠶᠡᠰ ᠴᠢᠬᠢᠨ ᠳᠤ ᠨᠢ ᠰᠢᠷᠣᠢ ᠣᠪᠣᠭᠠᠯᠠᠵᠦ ᠦᠭᠳᠡᠭ᠃ ᠡᠨᠡ ᠨᠢ ᠲᠦᠮᠦᠰᠦᠨ ᠤ ᠠᠷᠪᠢᠨ ᠰᠠᠭᠤᠬᠤ ᠳᠤ ᠠᠰᠢᠬᠳᠠᠢ ᠭᠡᠳᠡᠭ᠃ ᠬᠤᠷᠴᠢᠨ ᠳᠤ ᠲᠦᠮᠦᠰᠦ ᠶᠢ ᠲᠠᠬᠢᠶᠠᠨ ᠮᠢᠬ᠎ᠠ ᠲᠠᠢ ᠬᠠᠮᠳᠦ ᠴᠢᠨᠡᠵᠦ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠬᠦ ᠪᠣᠶᠣ ᠭᠠᠭ᠋ᠠᠢ ᠶᠢᠨ ᠮᠢᠬ᠎ᠠ ᠪᠣᠷᠴᠠᠬ ᠵᠡᠷᠭᠡ ᠲᠠᠢ ᠬᠤᠯᠢᠵᠦ ᠱᠦᠯᠦ ᠪᠣᠯᠭᠠᠵᠦ ᠢᠳᠡᠳᠡᠭ᠃ ᠪᠠᠰᠠ ᠬᠡᠷᠴᠢᠭᠡᠳ ᠬᠠᠭᠤᠷᠴᠦ ᠢᠳᠡᠵᠦ ᠴᠦ ᠪᠣᠯᠳᠠᠬ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠲᠦᠮᠦᠰᠦ ᠶᠢ ᠵᠢᠩᠨᠡᠬᠦ ᠪᠣᠶᠣ ᠭᠠᠯ ᠳᠤ ᠪᠣᠯᠠᠵᠦ ᠢᠳᠡᠵᠦ ᠴᠦ ᠪᠣᠯᠳᠠᠬ᠃ ᠲᠦᠮᠦᠰᠦ ᠶᠢ ᠬᠠᠳᠠᠭᠠᠯᠠᠬᠤ ᠳᠤ ᠵᠣᠭᠤᠷᠢ ᠪᠣᠶᠣ ᠰᠡᠷᠢᠭᠦᠨ ᠭᠠᠵᠠᠷ ᠲᠤ ᠬᠠᠳᠠᠭᠠᠯᠠᠬᠤ ᠦᠭᠡᠢ ᠪᠣᠯ ᠠᠮᠠᠷᠬᠠᠨ ᠰᠣᠶᠣᠭᠠᠯᠠᠬᠤ ᠠᠶᠣᠯᠳᠠᠢ᠃ ᠰᠣᠶᠣᠭᠠᠯᠠᠬᠰᠠᠨ ᠲᠦᠮᠦᠰᠦ ᠨᠢ ᠬᠦᠮᠦᠨ ᠤ ᠪᠡᠶ᠎ᠡ ᠳᠤ ᠬᠤᠣᠷᠳᠠᠢ ᠭᠡᠳᠡᠭ᠃      ᠪᠣᠷᠴᠠᠬ᠃ ᠬᠤᠷᠴᠢᠨᠴᠣᠳ ᠤᠨ ᠲᠠᠷᠢᠳᠠᠬ ᠪᠣᠷᠴᠠᠬ ᠤᠨ ᠲᠦᠷᠦᠯ ᠳᠤ ᠨᠣᠭᠤᠭᠠᠨ ᠪᠣᠷᠴᠠᠬ᠂ ᠰᠢᠷ᠎ᠠ ᠪᠣᠷᠴᠠᠬ᠂ ᠬᠠᠷ᠎ᠠ ᠪᠣᠷᠴᠠᠬ᠂ ᠠᠯᠠᠬ ᠪᠣᠷᠴᠠᠬ ᠭᠡᠬᠦ ᠣᠯᠠᠨ ᠲᠦᠷᠦᠯ ᠤᠨ ᠪᠣᠷᠴᠠᠬ ᠪᠠᠶᠢᠳᠠᠬ᠃ ᠭᠡᠬᠦ ᠳᠤ ᠡᠳᠡᠭᠡᠷ ᠪᠣᠷᠴᠠᠬ ᠤᠳ ᠢᠶᠠᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠲᠦᠷᠦᠯ ᠳᠤ ᠠᠷᠪᠢᠨ ᠣᠷᠣᠭᠤᠯᠳᠠᠬ ᠪᠢᠰᠢ ᠬᠠᠷᠢᠨ ᠬᠤᠳᠠᠯᠳᠣᠬᠤ ᠪᠠᠷ ᠵᠣᠷᠢᠯᠭ᠎ᠠ ᠪᠣᠯᠭᠠᠵᠦ ᠲᠠᠷᠢᠳᠠᠬ ᠠᠴᠠ ᠬᠤᠷᠴᠢᠨᠴᠣᠳ ᠪᠣᠷᠴᠠᠬ ᠤᠨ ᠲᠠᠷᠢᠶ᠎ᠠ ᠪᠠᠨ ᠠᠵᠣ ᠠᠬᠤᠢ ᠶᠢᠨ ᠲᠠᠷᠢᠶ᠎ᠠ ᠭᠡᠵᠦ ᠶᠠᠷᠢᠳᠠᠬ ᠶᠣᠮ᠃      ᠠᠯᠠᠬ ᠪᠣᠷᠴᠠᠬ᠃ ᠠᠯᠠᠬ ᠪᠣᠷᠴᠠᠬ ᠨᠢ ᠭᠠᠨᠭ᠌ ᠬᠠᠭᠤᠷᠠᠢ ᠳᠤ ᠲᠡᠰᠪᠦᠷᠢ ᠲᠠᠢ ᠡᠯᠡᠰᠦᠷᠬᠡᠭ ᠵᠣ ᠭᠠᠵᠠᠷ ᠰᠠᠶᠢᠨ ᠣᠷᠭᠤᠳᠠᠬ ᠡᠷᠳᠡ ᠪᠣᠯᠪᠠᠰᠣᠷᠠᠳᠠᠬ ᠲᠠᠷᠢᠶ᠎ᠠ ᠶᠣᠮ᠃ ᠠᠯᠠᠬ ᠪᠣᠷᠴᠠᠬ ᠨᠢ ᠠᠷᠠᠴᠢᠯᠠᠵᠦ ᠬᠤᠷᠢᠶᠠᠬᠤ ᠳᠤ ᠲᠦᠭᠦᠮ ᠵᠡᠷᠭᠡ ᠶᠢᠨ ᠲᠠᠪᠠᠭᠤᠯᠢᠬ ᠲᠠᠯ᠎ᠠ ᠲᠠᠢ ᠪᠣᠯᠬᠤᠷ ᠣᠷᠴᠢᠮ ᠤᠨ ᠵᠢᠯ ᠤᠳ ᠠᠴᠠ ᠬᠤᠷᠴᠢᠨ ᠤ ᠡᠯᠡᠰᠦᠷᠬᠡᠭ ᠭᠠᠵᠠᠷ ᠲᠤ ᠵᠦᠡᠭᠳᠡᠭᠡᠨ ᠲᠠᠷᠢᠳᠠᠬ ᠪᠣᠷᠴᠠᠬ ᠤᠨ ᠲᠠᠷᠢᠮᠠᠯ ᠤᠨ ᠨᠢᠭᠡ ᠲᠦᠷᠦᠯ ᠪᠣᠯᠵᠠᠢ᠃ ᠬᠤᠷᠴᠢᠨ ᠳᠤ ᠠᠯᠠᠬ ᠪᠣᠷᠴᠠᠬ ᠢ ᠡᠷᠳᠡᠨᠢ ᠰᠢᠰᠢ ᠶᠢᠨ ᠪᠣᠳᠠᠭ᠎ᠠ ᠲᠠᠢ ᠬᠤᠯᠢᠵᠦ ᠠᠬᠰᠢᠭᠠᠵᠦ ᠢᠳᠡᠬᠦ ᠪᠣᠶᠣ ᠡᠷᠳᠡᠨᠢ ᠰᠢᠰᠢ ᠶᠢᠨ ᠪᠣᠣᠪᠤ᠂ ᠨᠠᠩᠬᠢ ᠪᠣᠣᠪᠤ ᠶᠢᠨ ᠲᠣᠮᠳᠠ ᠬᠠᠪᠴᠢᠭᠤᠯᠣᠭᠠᠳ ᠵᠢᠩᠨᠡᠵᠦ ᠢᠳᠡᠳᠡᠭ ᠶᠣᠮ᠃ ᠬᠤᠷᠴᠢᠨ ᠤ ᠬᠡᠦᠬᠡᠨ ᠤ ᠡᠷᠭᠢᠯᠳᠡ ᠶᠢᠨ ᠲᠠᠭᠤᠨ ᠳᠤ ᠭᠠᠷᠳᠠᠬ ᠪᠣᠷᠴᠠᠬ ᠲᠠᠢ ᠪᠣᠣᠪᠤ ᠭᠡᠳᠡᠭ ᠨᠢ ᠲᠠᠷᠣᠢ ᠡᠨᠡ ᠠᠯᠠᠬ ᠪᠣᠷᠴᠠᠬ ᠢ ᠬᠠᠪᠴᠢᠭᠤᠯᠣᠬᠰᠠᠨ ᠪᠣᠣᠪᠤ ᠶᠢ ᠵᠢᠭᠠᠵᠦ ᠪᠠᠶᠢᠨ᠎ᠠ᠃      ᠨᠣᠭᠤᠭᠠᠨ ᠪᠣᠷᠴᠠᠬ᠃ ᠨᠣᠭᠤᠭᠠᠨ ᠪᠣᠷᠴᠠᠬ ᠨᠢ ᠭᠤᠣᠯᠳᠠᠭᠤ ᠵᠣ ᠰᠢᠬ ᠭᠠᠵᠠᠷ ᠢᠳᠡᠷᠡᠭᠦᠨ ᠣᠷᠭᠤᠳᠠᠬ ᠪᠣᠷᠴᠠᠬ ᠤᠨ ᠲᠦᠷᠦᠯ ᠪᠣᠯᠣᠨ᠎ᠠ᠃ ᠡᠮᠨᠡᠯᠭᠡ ᠶᠢᠨ ᠣᠬᠠᠭᠠᠨ ᠳᠤ ᠨᠣᠭᠤᠭᠠᠨ ᠪᠣᠷᠴᠠᠬ ᠨᠢ ᠨᠢᠭᠤᠬᠳᠠᠮᠠᠯ ᠬᠠᠯᠠᠭᠤᠨ ᠢ ᠠᠷᠢᠯᠭᠠᠵᠦ᠂ ᠪᠡᠶ᠎ᠡ ᠶᠢᠨ ᠲᠠᠮᠢᠷ ᠢ ᠰᠠᠶᠢᠵᠢᠷᠠᠭᠤᠯᠬᠤ ᠴᠢᠳᠠᠯ ᠲᠠᠢ ᠭᠡᠵᠦ ᠶᠠᠷᠢᠳᠠᠬ᠃ ᠨᠣᠭᠤᠭᠠᠨ ᠪᠣᠷᠴᠠᠬ ᠢ ᠬᠤᠷᠴᠢᠨ ᠳᠤ ᠲᠣᠳᠣᠷᠭ᠎ᠠ ᠪᠣᠳᠠᠭ᠎ᠠ ᠲᠠᠢ ᠬᠤᠯᠢᠵᠦ ᠢᠳᠡᠬᠦ ᠪᠣᠶᠣ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠳᠡᠭ ᠶᠣᠮ᠃      ᠬᠠᠷ᠎ᠠ ᠪᠣᠷᠴᠠᠬ᠃ ᠬᠠᠷ᠎ᠠ ᠪᠣᠷᠴᠠᠬ ᠨᠢ ᠣᠮᠳᠠᠯᠢᠬ ᠲᠣᠣᠷ᠎ᠠ ᠭᠠᠵᠠᠷ ᠰᠠᠶᠢᠨ ᠣᠷᠭᠤᠳᠠᠬ ᠪᠣᠷᠴᠠᠬ ᠤᠨ ᠲᠦᠷᠦᠯ ᠵᠦᠢᠯ ᠪᠣᠯᠬᠤᠷ ᠣᠰᠣᠨ ᠳᠤ ᠲᠡᠰᠪᠦᠷᠢ ᠲᠠᠢ ᠭᠡᠳᠡᠭ᠃ ᠬᠠᠷ᠎ᠠ ᠪᠣᠷᠴᠠᠬ ᠤᠨ ᠮᠦᠬᠦᠯᠢᠭ ᠨᠢ ᠨᠣᠭᠤᠭᠠᠨ ᠪᠣᠷᠴᠠᠬ ᠠᠴᠠ ᠲᠣᠮᠣ᠂ ᠰᠢᠷ᠎ᠠ ᠪᠣᠷᠴᠠᠬ ᠠᠴᠠ ᠵᠢᠵᠢᠭᠬᠡᠨ᠂ ᠭᠦᠯᠢᠭᠡᠷ ᠬᠠᠷ᠎ᠠ ᠦᠡᠭᠭᠡᠳᠡᠢ ᠪᠠᠶᠢᠵᠦ ᠢᠳᠡᠰᠢᠨ ᠲᠣᠰᠣ ᠰᠢᠬᠠᠬᠤ ᠳᠤ ᠲᠣᠬᠢᠷᠠᠬᠤ ᠲᠠᠷᠢᠮᠠᠯ ᠪᠣᠯᠣᠨ᠎ᠠ᠃ ᠬᠠᠷ᠎ᠠ ᠪᠣᠷᠴᠠᠬ ᠢ ᠬᠤᠷᠴᠢᠨ ᠳᠤ ᠬᠤᠳᠠᠯᠳᠣᠬᠤ ᠪᠠᠷ ᠭᠤᠣᠯ ᠪᠣᠯᠭᠠᠵᠦ ᠲᠠᠷᠢᠬᠤ ᠠᠴᠠ ᠭᠠᠳᠠᠨ᠎ᠠ᠂ ᠬᠠᠭᠤᠷᠴᠦ ᠲᠡᠭᠡᠷᠮᠡᠳᠡᠭᠡᠳ ᠪᠦᠭᠡᠮᠨᠡᠯᠵᠦ ᠵᠢᠶᠠᠩ ᠪᠣᠯᠭᠠᠵᠦ ᠢᠳᠡᠳᠡᠭ᠃      ᠰᠢᠷ᠎ᠠ ᠪᠣᠷᠴᠠᠬ᠃ ᠰᠢᠷ᠎ᠠ ᠪᠣᠷᠴᠠᠬ ᠨᠢ ᠬᠠᠷ᠎ᠠ ᠪᠣᠷᠴᠠᠬ ᠲᠠᠢ ᠠᠳᠠᠯᠢ ᠪᠠᠷ ᠣᠮᠳᠠᠯᠢᠬ ᠲᠣᠣᠷ᠎ᠠ ᠭᠠᠵᠠᠷ ᠰᠠᠶᠢᠨ ᠣᠷᠭᠤᠳᠠᠬ ᠪᠣᠷᠴᠠᠬ ᠤᠨ ᠲᠦᠷᠦᠯ ᠵᠦᠢᠯ ᠪᠣᠯᠣᠨ᠎ᠠ᠃ ᠭᠡᠬᠦ ᠳᠤ ᠪᠠᠨ ᠪᠣᠰᠣᠳ ᠪᠣᠷᠴᠠᠬ ᠤᠨ ᠲᠠᠷᠢᠮᠠᠯ ᠲᠠᠢ ᠬᠠᠷᠢᠴᠠᠭᠤᠯᠪᠠᠯ ᠮᠦᠬᠦᠯᠢᠭ ᠨᠢ ᠲᠣᠮᠣ᠂ ᠬᠠᠯᠢᠰᠣ ᠨᠢ ᠴᠠᠶᠢᠪᠣᠷ ᠰᠢᠷ᠎ᠠ ᠦᠡᠭᠭᠡᠳᠡᠢ ᠪᠠᠶᠢᠵᠦ ᠢᠳᠡᠰᠢᠨ ᠲᠣᠰᠣ ᠰᠢᠬᠠᠬᠤ ᠳᠤ ᠲᠣᠬᠢᠷᠠᠳᠠᠬ᠃ ᠬᠤᠷᠴᠢᠨ ᠳᠤ ᠰᠢᠷ᠎ᠠ ᠪᠣᠷᠴᠠᠬ ᠢᠶᠠᠷ ᠵᠢᠶᠠᠩ ᠬᠢᠵᠦ ᠢᠳᠡᠬᠦ ᠪᠣᠶᠣ ᠭᠠᠭ᠋ᠠᠢ ᠶᠢᠨ ᠮᠢᠬ᠎ᠠ ᠲᠠᠢ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠳᠡᠭ᠃ ᠪᠠᠰᠠ ᠵᠠᠷᠢᠮ ᠭᠠᠵᠠᠷ ᠰᠢᠷ᠎ᠠ ᠪᠣᠷᠴᠠᠬ ᠢᠶᠠᠷ ᠳ᠋ᠸᠦᠹᠦ᠋ ᠬᠢᠵᠦ ᠢᠳᠡᠳᠡᠭ ᠶᠣᠮ᠃ ᠡᠮᠨᠡᠯᠭᠡ ᠶᠢᠨ ᠣᠬᠠᠭᠠᠨ ᠳᠤ ᠰᠢᠷ᠎ᠠ ᠪᠣᠷᠴᠠᠬ ᠨᠢ ᠬᠡᠢ ᠶᠢ ᠨᠡᠪᠳᠡᠷᠡᠭᠦᠯᠵᠦ ᠪᠡᠶ᠎ᠡ ᠲᠠᠮᠢᠷᠵᠢᠭᠤᠯᠬᠤ ᠴᠢᠳᠠᠯ ᠲᠠᠢ ᠭᠡᠳᠡᠭ᠃      ᠲᠡᠭᠡᠷᠡᠬᠢ ᠪᠣᠷᠴᠠᠬ ᠤᠨ ᠲᠠᠷᠢᠮᠠᠯ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠬᠤᠷᠴᠢᠨ ᠳᠤ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠪᠣᠷᠴᠠᠬ ᠭᠡᠵᠦ ᠪᠠᠶᠢᠳᠠᠬ᠃ ᠬᠤᠷᠴᠢᠨ ᠤ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠪᠣᠷᠴᠠᠬ ᠲᠤ ᠣᠯᠠᠭᠠᠨ ᠪᠣᠷᠴᠠᠬ ᠪᠠ ᠣᠷᠳᠦ ᠪᠣᠷᠴᠠᠬ ᠭᠡᠬᠦ ᠬᠤᠶᠠᠷ ᠲᠦᠷᠦᠯ ᠪᠠᠶᠢᠳᠠᠬ᠃ ᠪᠣᠷᠴᠠᠬ ᠢ ᠶᠡᠷᠦ ᠶᠢᠨ ᠪᠠᠶᠢᠳᠠᠯ ᠳᠤ ᠡᠷᠳᠡᠨᠢ ᠰᠢᠰᠢ᠂ ᠳ᠋ᠠᠮᠠᠽᠢ ᠵᠡᠷᠭᠡ ᠦᠨᠳᠦᠷ ᠣᠷᠭᠤᠳᠠᠬ ᠡᠷᠳᠡ ᠶᠢᠨ ᠲᠠᠷᠢᠶ᠎ᠠ ᠲᠠᠢ ᠬᠠᠮᠳᠦ ᠲᠠᠷᠢᠨ᠎ᠠ᠃ ᠡᠨᠡ ᠨᠢ ᠪᠣᠷᠴᠠᠬ ᠡᠷᠳᠡ ᠪᠠᠭᠤᠵᠦ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠬᠡᠷᠡᠭᠴᠡᠭᠡᠨ ᠳᠤ ᠡᠷᠳᠡ ᠣᠷᠣᠬᠤ ᠰᠠᠶᠢᠨ ᠲᠠᠯ᠎ᠠ ᠲᠠᠢ ᠪᠠᠶᠢᠳᠠᠬ᠃ ᠪᠣᠷᠴᠠᠬ ᠢ ᠨᠣᠭᠤᠭᠠᠨ ᠢᠶᠠᠷ ᠨᠢ ᠬᠠᠭᠤᠷᠴᠦ ᠢᠳᠡᠬᠦ ᠪᠣᠶᠣ ᠮᠢᠬ᠎ᠠ ᠲᠣᠰᠣ ᠲᠠᠢ ᠴᠢᠨᠠᠵᠦ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠳᠡᠭ᠃ ᠪᠠᠰᠠ ᠲᠣᠮᠳᠠᠭᠤᠷ ᠨᠢ ᠬᠠᠶᠢᠴᠢᠯᠠᠵᠦ ᠬᠠᠳᠠᠭᠠᠭᠠᠳ ᠡᠪᠦᠯ ᠪᠣᠶᠣ ᠲᠠᠷᠠᠭ᠎ᠠ ᠬᠠᠪᠣᠷ ᠲᠤ ᠪᠠᠨ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠳᠡᠭ᠃ ᠬᠠᠳᠠᠭᠠᠬᠰᠠᠨ ᠪᠣᠷᠴᠠᠬ ᠢ ᠭᠠᠭ᠋ᠠᠢ ᠶᠢᠨ ᠬᠠᠪᠢᠷᠭ᠎ᠠ ᠲᠠᠢ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠬᠦ ᠨᠢ ᠬᠤᠷᠴᠢᠨ ᠳᠤ ᠨᠡᠯᠢᠶᠡᠳ ᠰᠠᠶᠢᠨ ᠨᠣᠭᠤᠭ᠎ᠠ ᠳᠤ ᠪᠠᠨ ᠪᠠᠭᠳᠠᠬᠳᠠᠳᠠᠬ ᠶᠣᠮ᠃ ᠪᠠᠰᠠ ᠨᠠᠮᠣᠷ ᠤᠨ ᠰᠡᠭᠦᠯᠴᠢ ᠪᠠᠷ ᠪᠣᠷᠴᠠᠬ ᠢᠶᠠᠨ ᠲᠡᠭᠦᠵᠦ ᠠᠪᠴᠢᠷᠠᠭᠠᠳ ᠭᠠᠨᠭ᠌ ᠳᠤ ᠲᠠᠷᠣᠵᠦ ᠲᠠᠪᠣᠰᠣᠯᠠᠭᠠᠳ ᠠᠮᠳᠠ ᠣᠷᠣᠭᠤᠯᠵᠦ ᠢᠳᠡᠳᠡᠭ ᠴᠦ ᠪᠣᠢ᠃      ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ      ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠬᠤᠷᠴᠢᠨ ᠨᠣᠳᠤᠬ ᠲᠤ ᠶᠡᠭᠡ ᠪᠠᠷ ᠨᠡᠪᠴᠢᠨ ᠣᠷᠣᠵᠦ ᠢᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠤᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠲᠠᠷᠢᠬᠤ ᠠᠷᠭ᠎ᠠ ᠬᠡᠯᠪᠡᠷᠢ ᠴᠦ ᠬᠤᠷᠴᠢᠨ ᠳᠤ ᠲᠠᠭᠠᠯᠳᠣᠨ ᠣᠷᠣᠵᠦ ᠢᠷᠡᠪᠡ᠃ ᠢᠳᠡᠰᠢᠨ ᠨᠣᠭᠤᠭ᠎ᠠ ᠲᠠᠷᠢᠬᠤ ᠪᠠᠷ ᠪᠡᠯᠡᠳᠭᠡᠭᠰᠡᠨ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠪᠠᠨ ᠬᠤᠷᠴᠢᠨᠴᠣᠳ ᠪᠠᠰᠠ ︽ᠶᠦᠸᠠᠨᠽᠢ ᠶᠢᠨ ᠬᠠᠰᠢᠶ᠎ᠠ︾ ᠭᠡᠵᠦ ᠭᠡᠷ ᠬᠤᠷᠤᠭ᠎ᠠ ᠲᠠᠢ ᠪᠠᠨ ᠣᠢᠢᠷᠠᠯᠴᠠᠭ᠎ᠠ ᠭᠠᠵᠠᠷ ᠢᠶᠠᠷ ᠪᠠᠷᠢᠵᠦ ᠲᠠᠯᠪᠢᠳᠠᠬ᠃ ᠡᠨᠡ ᠨᠢ ᠮᠠᠯ ᠬᠤᠨᠢ ᠵᠡᠷᠭᠡ ᠶᠢᠨ ᠲᠡᠵᠢᠭᠡᠪᠦᠷᠢ ᠠᠮᠢᠳᠠᠳ ᠤᠨ ᠪᠠᠭᠠᠰᠣ ᠰᠢᠬᠡᠭ ᠵᠡᠷᠭᠡ ᠶᠢᠨ ᠣᠷᠭᠠᠨᠢᠬ ᠪᠣᠷᠳᠣᠭᠤᠷ ᠢ ᠲᠠᠷᠢᠶᠠᠨ ᠳᠤ ᠪᠠᠨ ᠣᠷᠣᠭᠤᠯᠬᠤ ᠳᠤ ᠣᠢᠢᠷ᠎ᠠ᠂ ᠠᠷᠠᠴᠢᠯᠠᠵᠦ ᠡᠳ᠋ᠯᠡᠬᠦ ᠳᠤ ᠲᠦᠭᠦᠮ ᠵᠡᠷᠭᠡ ᠶᠢᠨ ᠲᠠᠪᠠᠭᠤᠯᠢᠬ ᠲᠠᠯ᠎ᠠ ᠲᠠᠢ ᠪᠠᠶᠢᠳᠠᠬ᠃ ᠬᠤᠷᠴᠢᠨ ᠤ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠣᠨ ᠲᠣᠮᠳᠠᠳᠦ ᠬᠤᠰᠢᠭᠤ ᠵᠡᠷᠭᠡ ᠶᠢᠨ ᠭᠠᠵᠠᠷ ᠣᠷᠣᠨ ᠢᠶᠠᠷ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠪᠡᠯᠡᠳᠭᠡᠬᠦ ᠨᠢ ᠪᠣᠰᠣᠳ ᠭᠠᠵᠠᠷ ᠣᠷᠣᠨ ᠲᠠᠢ ᠪᠠᠨ ᠬᠠᠷᠢᠴᠠᠭᠤᠯᠪᠠᠯ ᠨᠡᠯᠢᠶᠡᠳ ᠡᠷᠳᠡ ᠰᠢᠬ ᠪᠣᠯᠪᠠᠴᠦ ᠬᠤᠶᠢᠳᠦ ᠬᠤᠰᠢᠭᠤ᠂ ᠬᠦᠷᠢᠶ᠎ᠡ ᠬᠤᠰᠢᠭᠤ ᠵᠡᠷᠭᠡ ᠶᠢᠨ ᠪᠤᠶᠢᠳᠠ ᠪᠦᠭᠯᠡᠭᠦᠦ ᠭᠠᠵᠠᠷ ᠣᠷᠣᠨ ᠢᠶᠠᠷ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠪᠣᠢ ᠪᠣᠯᠣᠭᠠᠳ ᠠᠷᠠᠢ ᠲᠠᠯᠠ ᠨᠠᠶᠠᠨ ᠵᠢᠯ ᠴᠦ ᠪᠣᠯᠤᠭ᠎ᠠ ᠦᠭᠡᠢ ᠪᠠᠶᠢᠬᠰᠠᠭᠠᠷ ᠭᠡᠳᠡᠭ᠃ ᠡᠭᠦᠨ ᠤ ᠲᠣᠬᠠᠢ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠮᠠᠩᠬᠠᠨ ᠰᠣᠮᠣᠨ ᠤ ᠲᠠᠷᠢᠶᠠᠴᠢᠨ ᠲᠣᠯᠭᠠᠭᠤᠷᠢ ᠠᠴᠠ᠄ ︽ᠮᠠᠨ ᠤ ᠨᠣᠳᠤᠬ ᠲᠤ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠪᠣᠢ ᠪᠣᠯᠣᠭᠠᠳ ᠪᠠᠷᠤᠬ ᠲᠠᠪᠢᠭᠠᠳ ᠵᠢᠯ ᠤᠨ ᠬᠤᠭᠤᠴᠠᠭ᠎ᠠ ᠪᠣᠯᠵᠦ ᠪᠠᠶᠢᠨ᠎ᠠ᠃ ᠶᠡᠭᠡ ᠨᠢᠭᠡᠳᠦᠯ ᠤᠨ ᠦᠶ᠎ᠡ ᠳᠤ ᠮᠠᠨ ᠤ ᠠᠶᠢᠯ ᠤᠨ ᠬᠦᠮᠦᠰ ᠠᠶᠢᠯ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠭᠠᠷᠭᠠᠬᠤ ᠭᠡᠵᠦ ᠬᠠᠮᠳᠦ ᠪᠠᠷ ᠬᠦᠳᠡᠯᠦᠯᠴᠡᠵᠦ ᠪᠠᠶᠢᠬᠰᠠᠨ ᠭᠡᠳᠡᠭ ᠃ ᠣᠳᠣ ᠴᠦ ᠭᠡᠰᠡᠨ ᠲᠡᠷᠡ ᠲᠠᠯ᠎ᠠ ᠶᠢ ᠮᠠᠨ ᠤ ᠲᠣᠰᠬᠤᠨ ᠤ ᠬᠢᠨ ︿ᠶᠦᠸᠠᠨᠽᠢ ᠶᠢᠨ ᠠᠯᠠᠭᠠᠬ﹀ ᠭᠡᠵᠦ ᠨᠡᠷᠡᠯᠡᠵᠦ ᠪᠠᠶᠢᠨ᠎ᠠ᠃ ᠲᠡᠭᠦᠨ ᠠᠴᠠ ᠡᠮᠦᠨ᠎ᠡ ᠮᠣᠩᠭᠤᠯᠵᠢᠨ ᠬᠠᠷᠠᠴᠢᠨ ᠠᠴᠠ ᠨᠡᠭᠦᠳᠡᠯᠯᠡᠵᠦ ᠢᠷᠡᠭᠰᠡᠨ ᠨᠢᠭᠡᠨ ᠪᠦᠯᠦᠭ ᠬᠦᠮᠦᠰ ᠠᠷᠴᠢᠭᠤᠷ ᠬᠦᠷᠵᠡ ᠪᠠᠷ ᠭᠡᠷ ᠠᠴᠠ ᠪᠠᠨ ᠣᠢᠢᠷᠠᠯᠴᠠᠭ᠎ᠠ ᠪᠠᠭ᠎ᠠ ᠰᠠᠭ᠎ᠠ ᠭᠠᠵᠠᠷ ᠭᠠᠷᠭᠠᠵᠦ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠪᠣᠯᠭᠠᠵᠦ ᠪᠠᠶᠢᠬᠰᠠᠨ ᠭᠡᠳᠡᠭ᠃ ᠭᠠᠵᠠᠷ ᠲᠠᠷᠢᠶ᠎ᠠ ᠶᠢ ᠡᠷᠦᠬᠡ ᠳᠤ ᠲᠠᠭᠠᠭᠠᠴᠢᠯᠠᠭᠤᠯᠣᠬᠰᠠᠨ ᠠᠴᠠ ᠨᠠᠭᠠᠰᠢ ᠪᠠᠷᠤᠬ ᠡᠷᠦᠬᠡ ᠪᠦᠷᠢ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠲᠠᠢ ᠪᠣᠯᠵᠠᠢ︾ ᠭᠡᠪᠡ᠃      ᠬᠤᠷᠴᠢᠨ ᠤ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠶᠢᠨ ᠲᠣᠬᠠᠢ ᠶᠠᠷᠢᠬᠤ ᠠᠴᠠ ᠡᠮᠦᠨ᠎ᠡ ᠶᠠᠭᠤᠨ ᠤ ᠣᠷᠢᠳ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠬᠤᠭᠤᠯᠠ ᠪᠣᠳᠠᠭᠠᠨ ᠳᠤ ᠵᠦᠡᠭᠳᠡᠭᠡᠨ ᠲᠣᠷᠠᠳᠣᠬᠳᠠᠳᠠᠬ ᠵᠢᠶᠠᠩ ᠰᠢᠶᠠᠨᠼᠢ ᠶᠢᠨ ᠲᠣᠬᠠᠢ ᠶᠠᠷᠢᠬᠤ ᠴᠢᠬᠤᠯᠠ ᠲᠠᠢ᠃ ᠡᠨᠡ ᠬᠤᠶᠠᠷ ᠵᠦᠢᠯ ᠤᠨ ᠢᠳᠡᠭᠡᠨ ᠢ ︽ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠠᠴᠠ ᠡᠬᠢ ᠰᠣᠷᠪᠣᠯᠵᠢ ᠲᠠᠢ ᠠᠮᠳᠠ ᠣᠷᠣᠭᠤᠯᠬᠤ ᠨᠣᠭᠤᠭ᠎ᠠ︾ ᠭᠡᠵᠦ ᠡᠷᠳᠡᠮᠳᠡᠳ ᠰᠠᠨᠠᠯ ᠨᠢᠭᠡᠳᠡᠢ ᠦᠵᠡᠵᠦ ᠪᠠᠶᠢᠨ᠎ᠠ᠃      ᠵᠢᠶᠠᠩ᠃ ᠵᠢᠶᠠᠩ ᠬᠢᠬᠦ ᠳᠤ ᠰᠢᠷ᠎ᠠ ᠪᠣᠷᠴᠠᠬ ᠪᠣᠶᠣ ᠬᠠᠷ᠎ᠠ ᠪᠣᠷᠴᠠᠬ ᠢᠶᠠᠷ ᠬᠢᠳᠡᠭ᠃ ᠬᠤᠷᠴᠢᠨ ᠳᠤ ᠪᠢᠯᠢᠭ ᠤᠨ ᠣᠯᠠᠷᠢᠯ ᠤᠨ ᠲᠦᠷᠪᠡᠨ ᠰᠠᠷ᠎ᠠ ᠶᠢᠨ ᠦᠶ᠎ᠡ ᠠᠴᠠ ᠡᠬᠢᠯᠡᠵᠦ ᠵᠢᠶᠠᠩ ᠬᠢᠳᠡᠭ᠃ ᠵᠢᠶᠠᠩ ᠬᠢᠬᠦ ᠳᠤ ᠪᠣᠷᠴᠠᠬ ᠢᠶᠠᠨ ᠬᠠᠭᠤᠷᠴᠦ᠂ ᠲᠠᠷᠠᠭ᠎ᠠ ᠳᠤ ᠨᠢ ᠴᠢᠨᠠᠵᠦ ᠪᠣᠯᠭᠤᠭᠠᠭᠠᠳ ᠪᠦᠭᠡᠮᠨᠡᠷᠡᠭᠦᠯᠵᠦ ᠸᠠᠯᠠᠭᠤᠯᠣᠭᠠᠳ ᠬᠠᠭᠠᠰ ᠰᠠᠷ᠎ᠠ ᠬᠤᠷᠢ ᠬᠤᠨᠤᠬ ᠦᠡᠭᠭᠡᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠸᠠᠯᠠᠭᠤᠯᠣᠬᠰᠠᠨ ᠪᠣᠷᠴᠠᠬ ᠢᠶᠠᠨ ᠲᠡᠭᠡᠷᠮᠡᠳᠡᠵᠦ ᠨᠢᠴᠠᠯᠣᠨ᠎ᠠ᠃ ᠲᠠᠷᠠᠭ᠎ᠠ ᠨᠢ ᠨᠢᠴᠠᠯᠣᠬᠰᠠᠨ ᠪᠦᠮᠪᠦᠭᠡᠯᠢᠭ ᠢᠶᠠᠨ ᠰᠠᠪᠠᠨ ᠳᠤ ᠬᠢᠵᠦ ᠲᠠᠪᠣᠰᠣ ᠣᠰᠣ ᠶᠢ ᠨᠢ ᠲᠠᠭᠠᠷᠠᠭᠤᠯᠣᠭᠠᠳ ᠠᠮᠳᠠ ᠣᠷᠭᠤᠯᠳᠠᠬ ᠶᠣᠮ᠃ ᠡᠭᠦᠨ ᠢᠶᠠᠨ ᠵᠢᠶᠠᠩ ᠲᠠᠷᠣᠬᠤ ᠭᠡᠵᠦ ᠬᠡᠯᠡᠳᠡᠭ᠃ ᠪᠠᠷᠤᠬ ᠭᠤᠷᠪᠠᠨ ᠭᠠᠷᠠᠬ ᠦᠡᠭᠭᠡᠷᠡᠭᠰᠡᠨ ᠤ ᠰᠡᠭᠦᠯᠡᠷ ᠵᠢᠵᠢᠭ ᠫᠢᠯᠠ ᠪᠣᠶᠣ ᠠᠶᠠᠭᠠᠨ ᠳᠤ ᠬᠤᠳᠬᠤᠨ ᠠᠪᠴᠦ ᠬᠤᠭᠤᠯᠠ ᠳᠤ ᠪᠠᠨ ᠵᠠᠭᠤᠵᠦ ᠢᠳᠡᠬᠦ ᠪᠣᠶᠣ ᠨᠣᠭᠤᠭ᠎ᠠ ᠴᠠᠭ᠎ᠠ ᠲᠦᠷᠦᠵᠦ ᠢᠳᠡᠬᠦ ᠳᠤ ᠡᠳᠡᠭᠡᠳ ᠠᠮᠳᠠᠳᠠᠢ ᠪᠠᠶᠢᠳᠠᠬ᠃ ᠬᠤᠷᠴᠢᠨ ᠳᠤ ᠵᠢᠶᠠᠩ ᠢ ᠵᠢᠯ ᠤᠨ ᠲᠦᠷᠪᠡᠨ ᠣᠯᠠᠷᠢᠯ ᠳᠤ ᠪᠦᠷ ᠢᠳᠡᠳᠡᠭ᠃      ᠲᠠᠪᠣᠰᠣᠯᠠᠬᠰᠠᠨ ᠨᠣᠭᠤᠭ᠎ᠠ᠃ ᠬᠤᠷᠴᠢᠨ ᠳᠤ ᠲᠠᠪᠣᠰᠣᠯᠠᠬᠰᠠᠨ ᠨᠣᠭᠤᠭ᠎ᠠ ᠶᠢ ᠬᠢᠳᠠᠳ ᠢᠶᠠᠷ ᠰᠢᠶᠠᠨᠼᠠᠢ ᠭᠡᠵᠦ ᠶᠠᠷᠢᠳᠠᠬ᠃ ᠰᠢᠶᠠᠨᠼᠠᠢ ᠬᠢᠬᠦ ᠳᠤ ᠮᠠᠨᠵᠢᠨ᠂ ᠯᠣᠣᠪᠠᠨᠭ᠌᠂ ᠪᠣᠷᠴᠠᠬ᠂ ᠬᠤᠯᠣᠣᠪᠠᠨᠭ᠌᠂ ᠦᠷᠭᠡᠰᠦᠳᠦ ᠬᠡᠮᠬᠡ ᠵᠡᠷᠭᠡ ᠶᠢᠨ ᠨᠣᠭᠤᠭ᠎ᠠ ᠶᠢ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠠᠴᠠ ᠭᠠᠳᠠᠨ᠎ᠠ ᠮᠠᠨᠵᠢᠨ ᠠᠴᠠ ᠪᠣᠰᠣᠳ ᠲᠠᠪᠣᠰᠣᠳᠠᠢ ᠨᠣᠭᠤᠭ᠎ᠠ ᠳᠤ ᠰᠣᠩᠭᠢᠨ᠎ᠠ᠂ ᠰᠠᠷᠢᠮᠰᠠᠬ᠂ ᠬᠦᠬᠡ ᠨᠣᠭᠤᠭ᠎ᠠ᠂ ᠦᠨᠦᠷᠳᠦ ᠨᠣᠭᠤᠭ᠎ᠠ ᠵᠡᠷᠭᠡ ᠶᠢ ᠬᠠᠴᠢᠷᠯᠠᠨ ᠬᠢᠵᠦ ᠠᠮᠳᠠ ᠣᠷᠣᠭᠤᠯᠣᠨ᠎ᠠ᠃ ᠨᠣᠭᠤᠭ᠎ᠠ ᠶᠢ ᠨᠠᠮᠣᠷ ᠤᠨ ᠰᠡᠷᠢᠭᠦᠦ ᠣᠷᠣᠬᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶ᠋ᠢ ᠲᠠᠪᠣᠰᠣᠯᠠᠳᠠᠬ ᠶᠣᠮ᠃ ᠬᠦᠨ ᠰᠢᠭ ᠭᠠᠨᠭ᠌ ᠪᠣᠶᠣ ᠰᠠᠪᠠ ᠳᠤ ᠨᠣᠭᠤᠭ᠎ᠠ ᠪᠠᠨ ᠣᠬᠢᠶᠠᠵᠦ ᠴᠡᠪᠡᠷᠯᠡᠭᠡᠳ ᠣᠰᠣ ᠲᠠᠪᠣᠰᠣ ᠲᠠᠢ ᠨᠢ ᠲᠡᠩᠨᠡᠭᠦᠯᠵᠦ ᠬᠢᠭᠰᠡᠨ ᠤ ᠲᠠᠷᠠᠭ᠎ᠠ ᠲᠡᠭᠡᠷ᠎ᠡ ᠠᠴᠠ ᠨᠢ ᠬᠦᠨᠳᠦᠴᠡ ᠲᠠᠢ ᠴᠢᠯᠠᠭᠤ ᠪᠠᠷ ᠲᠠᠷᠦᠵᠦ ᠲᠠᠯᠪᠢᠳᠠᠬ᠃ ᠦᠭᠡᠢ ᠪᠣᠯ ᠨᠣᠭᠤᠭ᠎ᠠ ᠣᠰᠣᠨ ᠳᠤ ᠪᠠᠨ ᠲᠡᠭᠳᠡᠵᠦ ᠠᠮᠠᠷᠬᠠᠨ ᠦᠦᠵᠦ ᠢᠯᠵᠠᠷᠠᠳᠠᠬ ᠶᠣᠮ᠃      ᠬᠤᠷᠴᠢᠨ ᠤ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠶᠢᠨ ᠲᠠᠷᠢᠮᠠᠯ      ᠬᠤᠷᠴᠢᠨ ᠤ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶ᠎ᠠ ᠳᠤ ᠦᠷᠭᠡᠰᠦᠳᠦ ᠬᠡᠮᠬᠡ᠂ ᠵᠢᠵᠢᠭ ᠴᠠᠭᠠᠨ ᠨᠣᠭᠤᠭ᠎ᠠ᠂ ᠲᠠᠷᠢᠮᠠᠯ ᠢᠳᠠᠷ᠎ᠠ᠂ ᠬᠠᠰᠢ᠂ ᠲᠦᠪᠡᠳ ᠬᠠᠰᠢ᠂ ᠣᠰᠣᠨ ᠯᠣᠣᠪᠠᠨᠭ᠌᠂ ᠯᠠᠩᠭᠤᠸᠠ᠂ ᠰᠢ ᠬᠤᠯᠣ᠂ ᠭᠤᠭᠤᠳ᠂ ᠰᠣᠩᠭᠢᠨ᠎ᠠ᠂ ᠰᠠᠷᠢᠮᠰᠠᠬ᠂ ᠬᠠᠯᠠᠭᠤᠨ ᠨᠣᠭᠤᠭ᠎ᠠ ᠁ ᠵᠡᠷᠭᠡ ᠶᠢᠨ ᠣᠯᠠᠨ ᠲᠦᠷᠦᠯ ᠤᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢ ᠲᠠᠷᠢᠳᠠᠬ᠃ ᠡᠭᠦᠨ ᠳᠤ ᠬᠠᠰᠢ᠂ ᠲᠦᠪᠡᠳ ᠬᠠᠰᠢ᠂ ᠬᠠᠯᠠᠭᠤᠨ ᠨᠣᠭᠤᠭ᠎ᠠ᠂ ᠦᠷᠭᠡᠦᠰᠳᠦ ᠬᠡᠮᠬᠡ ᠶᠢ ᠲᠠᠷᠢᠬᠤ ᠳᠤ ᠵᠠᠶᠢᠳᠠᠰᠣ ᠭᠠᠷᠭᠠᠬᠤ ᠭᠡᠳᠡᠭ ᠠᠯᠬᠤᠮ ᠪᠠᠶᠢᠳᠠᠬ ᠨᠢ ᠪᠣᠰᠣᠳ ᠵᠦᠢᠯ ᠤᠨ ᠨᠣᠭᠤᠭ᠎ᠠ ᠶᠢ ᠲᠠᠷᠢᠬᠤ ᠠᠴᠠ ᠦᠭᠡᠷ᠎ᠡ ᠰᠢᠭ ᠪᠠᠶᠢᠳᠠᠬ᠃      ᠨᠣᠭᠤᠭ᠎ᠠ ᠶᠢᠨ ᠵᠠᠶᠢᠳᠠᠰᠣ ᠭᠠᠷᠭᠠᠬᠤ᠃ ᠦᠡᠭ ᠰᠢᠮᠡᠯᠢᠭ ᠡᠭᠡᠪᠦᠷ ᠭᠠᠵᠠᠷ ᠪᠣᠶᠣ ᠬᠠᠰᠢᠶ᠎ᠠ ᠰᠠᠷᠠᠪᠴᠢ ᠶᠢᠨ ᠨᠦᠮᠦᠷᠢ ᠳᠤ ᠵᠣᠬᠢᠬᠤ ᠵᠢᠵᠢᠭᠬᠡᠨ ᠭᠠᠵᠠᠷ ᠰᠣᠩᠭᠤᠵᠦ ᠠᠪᠣᠭᠠᠳ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢᠨ ᠦᠷ᠎ᠡ ᠶᠢ ᠲᠠᠷᠢᠵᠦ ᠪᠤᠶᠢᠵᠢᠭᠤᠯᠣᠨ᠎ᠠ᠃ ᠣᠰᠣ ᠪᠣᠯᠣᠨ ᠪᠣᠷᠳᠣᠭᠤᠷ ᠢ ᠨᠢ ᠭᠦᠢᠴᠡᠳ ᠬᠠᠨᠭ᠍ᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠨᠣᠭᠤᠭ᠎ᠠ ᠢᠳᠡᠷᠡᠭᠦᠨ ᠣᠷᠭᠤᠵᠦ ᠲᠦᠷᠪᠡᠨ ᠬᠤᠷᠤᠭᠤ ᠰᠢᠬᠠᠮ ᠪᠣᠯᠬᠤ ᠦᠶ᠎ᠡ ᠪᠠᠷ ᠪᠣᠷᠣᠭᠠᠨ ᠲᠠᠢ ᠡᠳᠦᠷ ᠢ ᠰᠣᠩᠭᠤᠵᠦ ᠦᠨᠳᠦᠰᠦ ᠲᠠᠢ ᠨᠢ ᠮᠠᠯᠳᠠᠨ ᠠᠪᠴᠦ ᠬᠠᠰᠢᠶ᠎ᠠ ᠳᠤ ᠪᠠᠨ ᠰᠢᠷᠬᠡᠭ ᠰᠢᠷᠬᠡᠭ ᠢᠶᠠᠷ ᠰᠢᠯᠵᠢᠭᠦᠯᠦᠨ ᠵᠠᠶᠢᠯᠠᠬᠤ ᠶᠢ ᠵᠠᠶᠢᠳᠠᠰᠣ ᠭᠠᠷᠭᠠᠬᠤ ᠭᠡᠳᠡᠭ᠃ ᠨᠣᠭᠤᠭ᠎ᠠ ᠶᠢᠨ ᠵᠠᠶᠢᠳᠠᠰᠣ ᠶᠢ ᠵᠠᠶᠢᠯᠠᠬᠤ ᠠᠴᠠ ᠡᠮᠦᠨ᠎ᠡ ᠬᠦᠷᠵᠡ ᠪᠠᠷ ᠵᠠᠶᠢᠯᠠᠬᠤ ᠭᠡᠵᠦ ᠪᠠᠶᠢᠭ᠎ᠠ ᠭᠠᠵᠠᠷ ᠢᠶᠠᠨ ᠣᠷᠪᠠᠭᠤᠯᠣᠨ ᠵᠦᠭᠡᠯᠡᠷᠡᠭᠦᠯᠦᠭᠡᠳ ᠲᠠᠷᠠᠭ᠎ᠠ ᠨᠢ ᠰᠢᠪᠠᠭᠤᠬᠠᠢ ᠶᠢᠨ ᠡᠭᠦᠷ ᠰᠢᠭ ᠬᠤᠳᠣᠭᠤᠷ ᠭᠠᠷᠭᠠᠭᠠᠳ ᠵᠠᠶᠢᠳᠠᠰᠣ ᠪᠠᠨ ᠰᠠᠭᠤᠯᠭᠠᠵᠦ ᠲᠠᠯᠪᠢᠳᠠᠬ᠃      ᠦᠷᠭᠡᠰᠦᠳᠦ ᠬᠡᠮᠬᠡ᠃ ᠦᠷᠭᠡᠰᠦᠳᠦ ᠬᠡᠮᠭᠡ ᠶᠢ ᠵᠠᠶᠢᠳᠠᠰᠣ ᠰᠢᠯᠵᠢᠭᠦᠯᠦᠭᠰᠡᠨ ᠤ ᠲᠠᠷᠠᠭ᠎ᠠ ᠡᠳᠦᠷ ᠪᠦᠷᠢ ᠣᠰᠣ ᠶᠢ ᠨᠢ ᠭᠦᠢᠴᠡᠳ ᠬᠠᠨᠭ᠍ᠭᠠᠯᠳᠠ ᠲᠠᠢ ᠣᠷᠣᠭᠤᠯᠣᠨ᠎ᠠ᠃ ᠦᠷᠭᠡᠰᠦᠳᠦ ᠬᠡᠮᠬᠡ ᠲᠣᠬᠤᠢ ᠵᠠᠪᠳᠠᠭᠤ ᠪᠣᠯᠬᠤ ᠦᠶᠡᠰ ᠴᠡᠴᠡᠭᠯᠡᠵᠦ ᠵᠡᠯᠡᠯᠡᠵᠦ ᠡᠬᠢᠯᠡᠨ᠎ᠡ᠃ ᠡᠨᠡ ᠦᠶᠡᠰ ᠬᠡᠮᠬᠡ ᠶᠢᠨ ᠵᠡᠯ᠎ᠡ ᠶᠢ ᠲᠠᠭᠠᠵᠦ ᠪᠣᠷᠭᠠᠰᠣ ᠬᠠᠳᠬᠤᠨ ᠲᠡᠭᠳᠡᠷᠯᠡᠨ ᠦᠭᠴᠦ ᠵᠡᠯ᠎ᠡ ᠭᠦᠶᠦᠬᠦ ᠳᠤ ᠲᠦᠭᠦᠮ ᠪᠣᠯᠭᠠᠵᠦ ᠲᠠᠯᠪᠢᠨ᠎ᠠ᠃ ᠵᠡᠯ᠎ᠡ ᠬᠠᠳᠬᠤᠬᠰᠠᠨ ᠬᠡᠮᠬᠡ ᠨᠢ ᠣᠷᠭᠤᠬᠤ ᠨᠢ ᠬᠤᠷᠳᠣᠨ᠂ ᠰᠠᠭᠤᠬᠤ ᠨᠢ ᠲᠦᠷᠭᠡᠨ ᠪᠠᠶᠢᠳᠠᠬ᠃ ᠦᠷᠭᠡᠰᠦᠳᠦ ᠬᠡᠮᠬᠡ ᠶᠢ ᠬᠤᠷᠴᠢᠨ ᠳᠤ ᠵᠢᠶᠠᠩ ᠳᠤ ᠲᠦᠷᠦᠵᠦ ᠢᠳᠡᠬᠦ ᠪᠣᠶᠣ ᠲᠠᠪᠣᠰᠣᠯᠠᠵᠦ ᠢᠳᠡᠳᠡᠭ᠃ ᠦᠷᠭᠡᠰᠦᠳᠦ ᠬᠡᠮᠬᠡ ᠨᠢ ᠬᠤᠷᠴᠢᠨ ᠤ ᠵᠣᠨ ᠤ ᠣᠯᠠᠷᠢᠯ ᠤᠨ ᠴᠢᠬᠤᠯᠠ ᠨᠣᠭᠤᠭ᠎ᠠ ᠪᠣᠯᠣᠨ᠎ᠠ᠃      ᠬᠠᠰᠢ᠃ ᠡᠷᠳᠡ ᠰᠢᠭ ᠵᠠᠶᠢᠳᠠᠰᠣ ᠰᠢᠯᠵᠢᠭᠦᠯᠦᠭᠰᠡᠨ ᠬᠠᠰᠢ ᠨᠢ ᠡᠷᠳᠡ ᠰᠠᠭᠤᠵᠦ᠂ ᠡᠷᠳᠡ ᠢᠳᠡᠰᠢᠨ ᠨᠣᠭᠤᠭ᠎ᠠ ᠪᠣᠯᠳᠠᠬ᠃ ᠬᠠᠰᠢ ᠶᠢ ᠵᠠᠶᠢᠯᠠᠬᠤ ᠠᠷᠭ᠎ᠠ ᠨᠢ ᠦᠷᠭᠡᠰᠦᠳᠦ ᠬᠡᠮᠬᠡ ᠵᠠᠶᠢᠯᠠᠬᠤ ᠠᠷᠭ᠎ᠠ ᠲᠠᠢ ᠠᠳᠠᠯᠢ ᠪᠣᠯᠪᠠᠴᠦ ᠬᠠᠰᠢ ᠨᠢ ᠵᠡᠯ᠎ᠡ ᠭᠦᠶᠦᠳᠡᠭ ᠦᠭᠡᠢ ᠣᠷᠭᠤᠮᠠᠯ ᠪᠣᠯᠬᠤᠷ ᠪᠣᠷᠭᠠᠰᠣ ᠬᠠᠳᠬᠤᠬᠤ ᠴᠢᠬᠤᠯᠠ ᠦᠭᠡᠢ ᠶᠣᠮ᠃ ᠬᠠᠰᠢ ᠪᠦᠷᠢ ᠶᠢᠨ ᠬᠤᠭᠤᠷᠣᠨᠳᠣᠬᠢ ᠵᠠᠢ ᠶᠢ ᠨᠢ ᠲᠣᠬᠢᠷᠠᠭᠤᠯᠵᠦ ᠵᠠᠶᠢᠯᠠᠬᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶᠢᠳᠣᠷ ᠠᠷᠴᠢᠵᠦ ᠡᠳ᠋ᠯᠡᠭᠡᠳ ᠣᠰᠣ ᠶᠢ ᠨᠢ ᠭᠦᠢᠴᠡᠳ ᠬᠠᠨᠭ᠍ᠭᠠᠪᠠᠯ ᠪᠣᠯᠴᠢᠬᠠᠨ᠎ᠠ᠃ ᠬᠤᠷᠴᠢᠨᠴᠣᠳ ᠬᠠᠰᠢ ᠪᠠᠷ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠬᠦ ᠪᠣᠶᠣ ᠬᠠᠭᠤᠷᠴᠦ ᠢᠳᠡᠳᠡᠭ᠃ ᠪᠠᠰᠠ ᠵᠠᠷᠢᠮ ᠭᠠᠵᠠᠷ ᠬᠠᠰᠢ ᠶᠢ ᠰᠣᠩᠭᠢᠨ᠎ᠠ ᠰᠠᠷᠢᠮᠰᠠᠬ ᠲᠠᠢ ᠬᠤᠯᠢᠵᠦ ᠲᠠᠪᠣᠰᠣᠯᠠᠭᠠᠳ ᠨᠣᠯᠳᠠᠷᠠᠭᠤᠯᠵᠦ ᠢᠰᠭᠡᠵᠦ ᠢᠳᠡᠳᠡᠭ᠃      ᠬᠠᠯᠠᠭᠤᠨ ᠨᠣᠭᠤᠭ᠎ᠠ᠃ ᠬᠠᠯᠠᠭᠤᠨ ᠨᠣᠭᠤᠭ᠎ᠠ ᠵᠠᠶᠢᠯᠠᠬᠤ ᠠᠷᠭ᠎ᠠ ᠨᠢ ᠬᠠᠰᠢ ᠵᠠᠶᠢᠯᠠᠬᠤ ᠲᠠᠢ ᠦᠨᠳᠦᠰᠦᠨ ᠳᠤ ᠪᠠᠨ ᠠᠳᠠᠯᠢᠪᠳᠣᠷ ᠪᠠᠶᠢᠳᠠᠬ᠃ ᠬᠠᠯᠠᠭᠤᠨ ᠨᠣᠭᠤᠭ᠎ᠠ ᠶᠢ ᠬᠤᠷᠴᠢᠨ ᠳᠤ ᠵᠢᠶᠠᠩ ᠳᠤ ᠲᠦᠷᠦᠵᠦ ᠢᠳᠡᠬᠦ ᠪᠣᠶᠣ ᠬᠠᠭᠤᠷᠣᠯᠭ᠎ᠠ ᠬᠠᠭᠠᠷᠢᠯᠭ᠎ᠠ ᠳᠤ ᠠᠮᠳᠠ ᠣᠷᠣᠭᠤᠯᠬᠤ ᠳᠤ ᠬᠡᠷᠡᠭᠯᠡᠳᠡᠭ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠬᠠᠯᠠᠭᠤᠨ ᠨᠣᠭᠤᠭ᠎ᠠ ᠶᠢ ᠬᠡᠷᠴᠢᠵᠦ ᠲᠠᠪᠣᠰᠣᠯᠣᠭᠠᠳ ᠭᠠᠨᠭ᠌ ᠳᠤ ᠲᠠᠷᠣᠵᠦ ᠰᠣᠷᠢᠰᠣ ᠪᠣᠯᠭᠠᠵᠦ ᠢᠳᠡᠳᠡᠭ᠃      ᠲᠦᠪᠡᠳ ᠬᠠᠰᠢ᠃ ᠲᠦᠪᠡᠳ ᠬᠠᠰᠢ ᠶᠢ ᠲᠠᠷᠢᠵᠦ ᠣᠷᠭᠤᠭᠤᠯᠬᠤ ᠠᠷᠭ᠎ᠠ ᠨᠢ ᠲᠡᠭᠡᠷᠡᠬᠢ ᠨᠣᠭᠤᠭ᠎ᠠ ᠴᠠᠭ᠎ᠠ ᠲᠠᠢ ᠦᠨᠳᠦᠰᠦᠨ ᠳᠤ ᠪᠠᠨ ᠠᠳᠠᠯᠢ ᠪᠠᠶᠢᠳᠠᠬ᠃ ᠲᠦᠪᠡᠳ ᠬᠠᠰᠢ ᠨᠢ ᠵᠢᠮᠢᠰ ᠰᠠᠭᠤᠬᠰᠠᠨ ᠤ ᠲᠠᠷᠠᠭ᠎ᠠ ᠦᠡᠭᠭᠡ ᠨᠢ ᠣᠯᠠᠶᠢᠬᠤ ᠪᠣᠶᠣ ᠰᠢᠷᠠᠯᠠᠪᠠᠯ ᠰᠠᠶ᠋ᠢ ᠢᠳᠡᠵᠦ ᠪᠣᠯᠳᠠᠬ᠃ ᠲᠦᠪᠡᠳ ᠬᠠᠰᠢ ᠶᠢ ᠦᠨᠳᠡᠭᠡ ᠲᠠᠢ ᠬᠠᠭᠤᠷᠴᠦ ᠢᠳᠡᠬᠦ᠂ ᠦᠨᠳᠡᠭᠡ ᠲᠠᠢ ᠱᠦᠯᠦ ᠭᠠᠷᠭᠠᠵᠦ ᠢᠳᠡᠵᠦ ᠪᠣᠯᠬᠤ ᠪᠣᠶᠣ ᠵᠢᠮᠢᠰ ᠰᠢᠭ ᠰᠢᠭᠤᠳ ᠢᠳᠡᠵᠦ ᠪᠣᠯᠳᠠᠬ᠃ ᠣᠳᠣᠬᠠᠨ ᠳᠤ ᠲᠦᠪᠡᠳ ᠬᠠᠰᠢ ᠶᠢ ᠱᠦᠯᠦ ᠭᠠᠷᠭᠠᠬᠤ ᠪᠣᠶᠣ ᠬᠠᠭᠤᠷᠣᠯᠭ᠎ᠠ ᠬᠠᠭᠠᠷᠢᠯᠭ᠎ᠠ ᠳᠤ ᠠᠮᠳᠠ ᠣᠷᠣᠭᠤᠯᠬᠤ ᠢᠳᠡᠭᠡᠨ ᠪᠣᠯᠭᠠᠨ ᠬᠡᠷᠡᠭᠯᠡᠵᠦ ᠪᠣᠢ᠃     ᠯᠠᠩᠭᠤᠸᠠ᠃ ᠯᠠᠩᠭᠤᠸᠠ ᠶᠢ ᠬᠡᠭᠡᠷ᠎ᠡ ᠪᠣᠶᠣ ᠬᠠᠰᠢᠶᠠᠨ ᠳᠤ ᠪᠠᠨ ᠲᠠᠷᠢᠳᠠᠬ᠃ ᠯᠠᠩᠭᠤᠸᠠ ᠪᠠᠷ ᠵᠣᠨ ᠵᠠᠭᠤᠰᠢ ᠭᠠᠷᠭᠠᠵᠦ ᠢᠳᠡᠬᠦ ᠪᠣᠶᠣ ᠰᠢᠶᠠᠨᠰᠠ ᠬᠢᠵᠦ ᠢᠳᠡᠳᠡᠭ ᠶᠣᠮ᠃ ᠪᠠᠰᠠ ᠭᠦᠢᠴᠡᠳ ᠪᠣᠯᠪᠠᠰᠣᠷᠠᠬᠰᠠᠨ ᠦᠭᠡᠢ ᠪᠠᠷ ᠨᠢ ᠭᠠᠭ᠋ᠠᠢ ᠲᠠᠬᠢᠶ᠎ᠠ ᠲᠡᠵᠢᠭᠡᠵᠦ ᠪᠣᠯᠣᠨ᠎ᠠ᠃ ᠯᠠᠩᠭᠤᠸᠠ ᠶᠢ ᠵᠦᠰᠦᠵᠦ ᠬᠠᠳᠠᠭᠠᠭᠠᠳ ᠬᠠᠪᠣᠷ ᠲᠤ ᠪᠠᠨ ᠮᠢᠬ᠎ᠠ ᠲᠠᠢ ᠱᠦᠯᠦ ᠭᠠᠷᠭᠠᠨ ᠢᠳᠡᠵᠦ ᠪᠣᠯᠳᠠᠬ᠃      ᠰᠢ ᠬᠤᠯᠣ᠃ ᠬᠠᠯᠠᠭᠠᠢ ᠵᠢᠭᠠᠬᠠᠨ ᠦᠳᠡᠯᠵᠦ ᠢᠷᠡᠬᠦ ᠲᠠᠢ ᠵᠡᠷᠭᠡ ᠬᠤᠷᠴᠢᠨᠴᠣᠳ ᠰᠢ ᠬᠤᠯᠣ ᠪᠠᠷ ᠵᠠᠭᠤᠰᠢ ᠬᠢᠵᠦ ᠡᠬᠢᠯᠡᠳᠡᠭ᠃ ᠰᠢ ᠬᠤᠯᠣ ᠶᠢ ᠣᠯᠠᠩᠬᠢ ᠳᠤ ᠪᠠᠨ ᠬᠠᠰᠢᠶ᠎ᠡ ᠬᠦᠷᠢᠶ᠎ᠡ ᠶᠢᠨ ᠢᠶᠠᠨ ᠵᠠᠬ᠎ᠠ ᠬᠦᠪᠡᠭᠡ ᠪᠠᠷ ᠲᠠᠷᠢᠳᠠᠬ ᠮᠦᠷᠳᠡᠭᠡᠨ ᠰᠢ ᠬᠤᠯᠣ ᠨᠢ ᠶᠡᠭᠡ ᠳᠤ ᠪᠠᠨ ᠬᠡᠦᠬᠡᠳ ᠤᠨ ᠲᠡᠷ᠎ᠡ ᠠᠴᠠ ᠶᠡᠭᠡ ᠪᠣᠯᠳᠠᠬ᠃ ᠰᠢ ᠬᠤᠯᠣ ᠪᠠᠷ ᠰᠢᠶᠠᠨᠰᠠ ᠬᠢᠵᠦ ᠢᠳᠡᠵᠦ ᠪᠣᠯᠬᠤ ᠪᠦᠭᠡᠳ ᠵᠦᠭᠡᠬᠡᠢ ᠲᠠᠢ ᠬᠤᠯᠢᠵᠦ ᠨᠣᠭᠤᠭ᠎ᠠ ᠬᠠᠭᠤᠷᠴᠦ ᠢᠳᠡᠪᠡᠯ ᠶᠡᠭᠡ ᠠᠮᠳᠠᠯᠢᠬ ᠶᠣᠮ᠃      ᠡᠳᠡᠭᠡᠷ ᠠᠴᠠ ᠪᠣᠰᠣᠳ ᠣᠰᠣᠨ ᠯᠣᠣᠪᠠᠨᠭ᠌᠂ ᠨᠢᠯᠬ᠎ᠠ ᠴᠠᠭᠠᠨ ᠨᠣᠭᠤᠭ᠎ᠠ᠂ ᠲᠠᠷᠢᠮᠠᠯ ᠢᠳᠠᠷ᠎ᠠ᠂ ᠭᠤᠭᠤᠳ᠂ ᠰᠣᠩᠭᠢᠨ᠎ᠠ᠂ ᠰᠠᠷᠢᠮᠰᠠᠬ ᠵᠡᠷᠭᠡ ᠶᠢᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢ ᠲᠠᠷᠢᠬᠤ ᠳᠤ ᠪᠠᠨ ᠨᠣᠭᠤᠭ᠎ᠠ ᠶᠢᠨ ᠭᠠᠵᠠᠷ ᠢᠶᠠᠨ ᠰᠠᠶᠢᠳᠣᠷ ᠣᠷᠪᠠᠭᠤᠯᠵᠦ ᠵᠦᠭᠡᠯᠡᠷᠡᠭᠦᠯᠦᠭᠰᠡᠨ ᠤ ᠲᠠᠷᠠᠭ᠎ᠠ ᠠᠷᠴᠢᠭᠤᠷ ᠬᠦᠷᠵᠡ ᠪᠠᠷ ᠵᠢᠷᠤᠬ᠎ᠠ ᠲᠠᠳᠠᠵᠦ ᠦᠷ᠎ᠡ ᠶᠢ ᠨᠢ ᠰᠢᠭᠤᠳ ᠲᠠᠷᠢᠵᠦ ᠪᠣᠯᠳᠠᠬ᠃ ᠡᠭᠦᠨ ᠳᠤ ᠨᠢᠯᠬ᠎ᠠ ᠴᠠᠭᠠᠨ ᠨᠣᠭᠤᠭ᠎ᠠ᠂ ᠢᠳᠠᠷ᠎ᠠ᠂ ᠣᠰᠣᠨ ᠯᠣᠣᠪᠠᠨᠭ᠌ ᠢ ᠰᠢᠭᠤᠳ ᠵᠢᠶᠠᠩ ᠳᠤ ᠲᠦᠷᠦᠵᠦ ᠢᠳᠡᠵᠦ ᠪᠣᠯᠬᠤ ᠠᠴᠠ ᠭᠠᠳᠠᠨ᠎ᠠ ᠬᠤᠨᠢ ᠦᠬᠡᠷ ᠤᠨ ᠮᠢᠬ ᠎ᠠ ᠲᠠᠢ ᠬᠠᠯᠠᠭᠤᠨ ᠲᠣᠭᠤᠭ᠎ᠠ ᠭᠠᠷᠭᠠᠵᠦ ᠢᠳᠡᠵᠦ ᠪᠣᠯᠳᠠᠬ᠃ ᠰᠣᠩᠭᠢᠨ᠎ᠠ ᠰᠠᠷᠢᠮᠰᠠᠬ ᠢ ᠵᠢᠶᠠᠩ ᠳᠤ ᠲᠦᠷᠦᠵᠦ ᠢᠳᠡᠵᠦ ᠪᠣᠯᠬᠤ ᠠᠴᠠ ᠭᠠᠳᠠᠨ᠎ᠠ ᠬᠠᠭᠤᠷᠣᠯᠭ᠎ᠠ᠂ ᠬᠠᠭᠠᠷᠢᠯᠭ᠎ᠠ᠂ ᠱᠦᠯᠦ᠂ ᠲᠠᠪᠣᠰᠣᠯᠠᠬᠰᠠᠨ ᠨᠣᠭᠤᠭ᠎ᠠ ᠵᠡᠷᠭᠡ ᠳᠤ ᠠᠮᠳᠠ ᠣᠷᠣᠭᠤᠯᠬᠤ ᠵᠦᠢᠯ ᠪᠣᠯᠭᠠᠨ ᠬᠡᠷᠡᠭᠯᠡᠳᠡᠭ᠃ ᠭᠤᠭᠤᠳ ᠢ ᠰᠣᠷᠢᠰᠣ ᠲᠠᠷᠣᠬᠤ ᠪᠣᠶᠣ᠂ ᠰᠢᠶᠠᠨᠰᠠ ᠪᠣᠯᠭᠠᠵᠦ ᠢᠳᠡᠳᠡᠭ᠃      ᠲᠡᠭᠡᠷᠡᠬᠢ ᠨᠣᠭᠤᠭ᠎ᠠ ᠴᠠᠭ᠎ᠠ ᠠᠴᠠ ᠭᠠᠳᠠᠨ᠎ᠠ ᠬᠤᠷᠴᠢᠨ ᠨᠣᠳᠤᠬ ᠲᠤ ᠪᠠᠰᠠ ᠠᠮᠳᠠᠳᠦ ᠬᠡᠮᠬᠡ᠂ ᠰᠢᠬᠢᠷ ᠲᠦᠮᠦᠰᠦ᠂ ᠲᠠᠷᠪᠣᠰ ᠁ ᠭᠡᠬᠦ ᠮᠡᠳᠦ ᠶᠢᠨ ᠣᠯᠠᠨ ᠣᠯᠠᠨ ᠬᠠᠰᠢᠶ᠎ᠠ ᠬᠦᠷᠢᠶᠡᠨ ᠳᠤ ᠲᠠᠷᠢᠳᠠᠬ ᠭᠤᠸᠠ ᠨᠣᠭᠤᠭ᠎ᠠ ᠶᠢᠨ ᠲᠦᠷᠦᠯ ᠵᠦᠢᠯ ᠪᠠᠶᠢᠳᠠᠬ᠃ ᠭᠡᠪᠡᠴᠦ ᠵᠠᠷᠢᠮ ᠠᠶᠢᠯ ᠡᠷᠦᠬᠡ ᠨᠢ ᠦᠪᠡᠷᠳᠡᠭᠡᠨ ᠢᠳᠡᠰᠢᠨ ᠨᠣᠭᠤᠭ᠎ᠠ ᠲᠠᠷᠢᠳᠠᠬ ᠦᠭᠡᠢ᠂ ᠪᠣᠰᠣᠳ ᠠᠴᠠ ᠵᠣᠭᠤᠰ ᠢᠶᠠᠷ ᠬᠤᠳᠠᠯᠳᠣᠨ ᠠᠪᠴᠢᠷᠠᠬᠤ ᠪᠣᠶᠣ ᠪᠣᠳᠠᠰ ᠢᠶᠠᠷ ᠰᠣᠯᠢᠨ ᠠᠪᠴᠢᠷᠠᠳᠠᠬ᠃ ᠵᠠᠷᠢᠮ ᠠᠶᠢᠯ ᠡᠷᠦᠬᠡ ᠨᠢ᠄ ︽ᠢᠳᠡᠰᠢᠨ ᠨᠣᠭᠤᠭ᠎ᠠ ᠶᠢ ᠪᠠᠰᠠ ᠦᠨ᠎ᠡ ᠬᠠᠶᠠᠭᠠᠳ ᠶᠠᠭᠤᠨ ᠬᠡᠷᠡᠭ᠂ ᠬᠠᠮᠳᠦ ᠪᠠᠷ ᠢᠳᠡᠪᠡᠯ ᠲᠠᠭᠠᠷᠠᠴᠢᠬᠠᠨ᠎ᠠ︾ ᠭᠡᠳᠡ ᠠᠶᠢᠯ ᠠᠶᠢᠮᠠᠬ ᠤᠨ ᠪᠣᠰᠣᠳ ᠬᠦᠮᠦᠰ ᠢᠶᠠᠨ ᠴᠦ ᠬᠠᠨᠭ᠍ᠭᠠᠵᠦ ᠪᠠᠶᠢᠳᠠᠬ᠃      ᠬᠠᠭᠠᠰ ᠮᠠᠯᠵᠢᠬᠤ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠠᠷᠭ᠎ᠠ ᠬᠡᠯᠪᠡᠷᠢ ᠪᠠᠷ ᠠᠮᠢᠳᠣᠷᠠᠯ ᠤᠨ ᠶᠢᠨ ᠭᠤᠣᠯ ᠠᠷᠭ᠎ᠠ ᠮᠠᠶ᠋ᠢᠬ ᠢᠶᠠᠨ ᠪᠣᠯᠭᠠᠬᠰᠠᠨ ᠬᠤᠷᠴᠢᠨ ᠨᠣᠳᠤᠬ ᠤᠨ ᠬᠦᠮᠦᠰ ᠨᠢ ᠬᠦᠨᠳᠦ ᠬᠡᠴᠡᠭᠦᠦ ᠬᠦᠳᠡᠯᠮᠦᠷᠢ ᠠᠵᠢᠯ ᠳᠤ ᠲᠠᠪᠳᠠᠬᠳᠠᠨ᠂ ᠨᠠᠷᠠ ᠰᠠᠯᠬᠢᠨ ᠳᠤ ᠢᠯᠪᠢᠭᠦᠯᠵᠦ ᠡᠯᠳᠡᠭᠦᠯᠵᠦ ᠶᠠᠪᠣᠬᠤ ᠳᠤ ᠪᠠᠨ ︽ᠠᠶᠢᠯ ᠤᠨ ᠬᠦᠮᠦᠰ ᠤᠨ ᠠᠮᠢ ᠨᠢ ᠨᠢᠭᠡ︾ ᠭᠡᠳᠡᠭ ᠦᠭᠡ ᠶᠢ ᠦᠷᠦ ᠵᠢᠷᠦᠬᠡᠨ ᠤ ᠪᠠᠨ ᠴᠠᠭᠠᠨ᠎ᠠ ᠰᠡᠶᠢᠯᠵᠦ᠂ ᠠᠵᠢᠯᠯᠠᠵᠦ ᠬᠦᠳᠡᠯᠮᠦᠷᠢᠯᠡᠬᠦ ᠠᠴᠠ ᠣᠷᠣᠰᠢᠵᠦ ᠠᠮᠢᠳᠣᠷᠠᠬᠤ ᠬᠦᠷᠳᠡᠯ᠎ᠡ ᠬᠠᠷᠢᠯᠴᠠᠨ ᠲᠦᠰᠢᠯᠴᠡᠨ᠂ ᠬᠠᠷᠢᠯᠴᠠᠨ ᠬᠠᠮᠵᠢᠯᠴᠠᠵᠦ ᠠᠳᠠᠯ ᠠᠮᠢᠳᠣᠷᠠᠯ ᠢᠶᠠᠨ ᠦᠭᠡᠳᠡ ᠲᠠᠳᠠᠬᠰᠠᠭᠠᠷ ᠢᠷᠡᠭᠰᠡᠨ ᠶᠣᠮ᠃
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ