ᠤᠢᠢᠷᠠᠳ ᠬᠡᠮᠡᠬᠦ ᠮᠤᠩᠭᠤᠯ ᠤᠨ ᠪᠠᠷᠠᠭᠤᠨ ᠲᠦᠷᠪᠡᠨ ᠲᠦᠮᠡᠨ ᠤ ᠳᠤᠬᠠᠢ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/15
     ᠲᠦᠷᠪᠡᠨ ᠤᠢᠢᠷᠠᠳ ᠪᠤᠯᠪᠠᠰᠤ ᠡᠷᠳᠡ ᠠᠴᠠ ᠤᠷᠤᠰᠢᠵᠤ ᠪᠠᠶᠢᠭᠰᠠᠨ ᠨᠡᠭᠦᠳᠡᠯᠴᠢᠨ ᠤ ᠬᠤᠶᠢᠴᠢᠰ ᠪᠢᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠪᠠᠷᠠᠭᠤᠨ ᠬᠤᠷᠢ ᠲᠦᠮᠡᠳ ᠢ ᠤᠷᠤᠭᠤᠯᠵᠤ ᠠᠪᠬᠤ ᠳᠤ ᠤᠢᠢᠷᠠᠳ ᠤᠨ ᠲᠦᠷᠦᠭᠦᠦ ᠪᠠᠶᠢᠭᠰᠠᠨ ᠬᠤᠳᠤᠭ᠎ᠠ ᠪᠠᠬᠢ ᠠᠴᠠ ᠤᠢᠢᠷᠠᠳ ᠠᠶᠢᠮᠠᠭ ᠢᠶᠠᠨ ᠳᠠᠭᠠᠭᠤᠯᠤᠨ ᠤᠷᠤᠵᠤ ᠦᠭᠭᠦᠭᠡᠳ ᠳᠠᠶᠢᠱᠢ ᠡᠷᠭᠦᠮᠵᠢᠯᠡᠭᠳᠡᠨ᠂ ᠴᠢᠩᠭᠢᠰ ᠤᠨ ᠠᠯᠳᠠᠨ ᠤᠷᠤᠭ ᠲᠠᠢ ᠤᠷᠤᠭ ᠬᠤᠳᠠ ᠪᠤᠯᠤᠯᠴᠠᠭᠰᠠᠨ ᠠᠴᠠ ᠳᠡᠳᠡᠭᠡᠷ ᠭᠠᠵᠠᠷ ᠨᠤᠳᠤᠭ ᠲᠤ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠤ ᠪᠠᠶᠢᠭᠰᠠᠨ ᠤᠢ ᠶᠢᠨ ᠢᠷᠭᠡᠳ ᠠᠴᠠ ᠶᠡᠭᠡ ᠦᠡᠭᠭᠡ ᠬᠡᠷᠡᠯ ᠲᠠᠢ ᠶᠠᠪᠤᠳᠠᠯ ᠢᠶᠠᠷ ᠦᠵᠡᠵᠤ ᠦᠪᠡᠷ ᠢ ᠪᠠᠨ ᠤᠢᠢᠷᠠᠳ ᠬᠡᠮᠡᠨ ᠶᠡᠷᠦᠩᠭᠡᠶᠢᠯᠡᠨ ᠨᠡᠷᠡᠶᠢᠳᠴᠡᠢ᠃ ᠳᠡᠦᠭᠡ ᠶᠢᠨ ᠬᠤᠭᠤᠴᠠᠭᠠᠨ ᠳᠤ ᠲᠦᠷᠪᠡᠨ ᠤᠢᠢᠷᠠᠳ ᠨᠢ ᠬᠡᠳᠦᠢ ᠪᠦᠷᠢᠯᠳᠦᠬᠦᠨ ᠢᠶᠠᠨ ᠰᠤᠯᠢᠭᠰᠠᠨ ᠴᠦ ᠪᠦᠷ ᠯᠡ ᠲᠦᠷᠪᠡ ᠪᠠᠷ ᠰᠠᠭᠤᠷᠢᠯᠠᠵᠤ ᠪᠠᠶᠢᠭᠰᠠᠨ ᠢᠶᠠᠷ ᠲᠦᠷᠪᠡᠨ ᠤᠢᠢᠷᠠᠳ ᠬᠡᠮᠡᠭᠳᠡᠵᠡᠢ᠃ ᠠᠯᠢ ᠲᠦᠷᠪᠡᠨ ᠤᠢᠢᠷᠠᠳ ᠪᠤᠯᠤᠭᠰᠠᠨ ᠴᠦ ᠴᠤᠷᠤᠰ ᠤᠢᠢᠷᠠᠳ ᠨᠢ ᠲᠦᠷᠦᠭᠦᠯᠵᠤ᠂ ᠴᠤᠷᠤᠰ ᠤᠨ ᠲᠦᠷᠦᠭᠦᠴᠦᠳ ᠨᠢ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠨᠤᠶᠠᠯᠠᠬᠤ ᠡᠷᠭᠡ ᠶᠢ ᠪᠠᠷᠢᠵᠤ ᠪᠠᠶᠢᠵᠠᠢ᠃ ᠮᠤᠩᠭᠤᠯ ᠤᠨ ᠬᠠᠭᠠᠨ ᠪᠠᠶᠢᠭᠰᠠᠨ ᠮᠦᠡᠭᠭᠡ᠂ ᠠᠷᠢᠭᠪᠤᠬ᠎ᠠ ᠶᠢᠨ ᠬᠠᠳᠤᠨ ᠨᠢ ᠪᠦᠷ ᠤᠢᠢᠷᠠᠳ ᠬᠦᠮᠦᠨ ᠪᠢᠯᠡ᠃
      ᠶᠤᠧᠠᠨ ᠤᠯᠤᠰ ᠬᠢᠳᠠᠳ ᠤᠷᠤᠨ ᠠᠴᠠ ᠬᠦᠭᠡᠭᠳᠡᠨ ᠭᠠᠷᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠮᠤᠩᠭᠤᠯ ᠤᠨ ᠲᠦᠷᠦ ᠨᠢ ᠨᠢᠭᠡ ᠪᠦᠯᠦᠭ ᠬᠦᠮᠦᠰ ᠢᠶᠠᠨ ᠬᠢᠳᠠᠳ ᠤᠷᠤᠨ ᠳᠤ ᠠᠯᠳᠠᠵᠤ᠂ ᠤᠮᠠᠷᠠᠰᠢ ᠳᠤᠳᠠᠭᠠᠭᠰᠠᠨ ᠳᠤᠭᠤᠨᠳᠡᠮᠦᠷ ᠬᠠᠭᠠᠨ ᠨᠢ ᠤᠳᠤ ᠶᠢᠨ ᠬᠡᠰᠢᠭᠳᠡᠨ ᠤ ᠪᠠᠷᠰ ᠬᠤᠳᠠᠨ ᠳᠤ ᠬᠤᠷᠭᠤᠳᠠᠵᠤ᠂ ᠬᠠᠷᠠᠬᠤᠷᠢᠨ ᠳᠤ ᠤᠴᠢᠬᠤ ᠵᠤᠷᠢᠭ ᠦᠭᠡᠢ ᠪᠠᠶᠢᠭᠰᠠᠨ ᠨᠢ ᠨᠢᠭᠡ ᠳᠠᠯ᠎ᠠ ᠪᠠᠷ ᠤᠢᠢᠷᠠᠳ ᠬᠦᠮᠦᠰ ᠠᠴᠠ ᠡᠮᠢᠶᠡᠭᠰᠡᠨ ᠶᠠᠪᠤᠳᠠᠯ ᠪᠤᠶᠤ᠃ ᠳᠡᠭᠦᠨ ᠤ ᠳᠠᠷᠠᠭᠠᠬᠢ ᠳᠡᠭᠦᠰᠳᠡᠮᠦᠷ ᠬᠠᠭᠠᠨ ᠨᠢ ᠴᠦ ᠤᠢᠢᠷᠠᠳ ᠬᠦᠮᠦᠨ ᠳᠤ ᠬᠤᠷᠤᠭᠠᠭᠳᠠᠭᠰᠠᠨ᠃ ᠡᠯᠪᠡᠭ ᠨᠢᠭᠦᠯᠡᠰᠦᠩᠬᠦᠢ ᠬᠠᠭᠠᠨ ᠨᠢ ᠰᠤᠯᠤᠩᠭᠤᠰ ᠤᠳᠤᠮ ᠲᠠᠢ ᠬᠠᠳᠤᠨ ᠤ ᠠᠷᠭ᠎ᠠ ᠳᠤ ᠤᠷᠤᠵᠤ ᠤᠢᠢᠷᠠᠳ ᠤᠨ ᠳᠠᠶᠢᠱᠢ ᠪᠠᠨ ᠠᠯᠠᠭᠰᠠᠨ ᠠᠴᠠ ᠪᠤᠯᠵᠤ ᠮᠤᠩᠭᠤᠯ ᠤᠢᠢᠷᠠᠳ ᠡᠪᠳᠡᠷᠡᠯᠴᠡᠬᠦ ᠵᠠᠮ ᠡᠬᠢᠯᠡᠨ ᠳᠠᠯᠪᠢᠭᠳᠠᠪᠠᠢ᠂ ᠳᠤᠮᠳᠠᠳᠤ ᠠᠽᠢᠶ᠎ᠠ ᠳᠤ ᠳᠤᠭᠤᠯᠠᠩ ᠳᠡᠮᠦᠷ ᠭᠡᠰᠡᠨ ᠰᠠᠶᠢᠨ ᠡᠷ᠎ᠡ ᠭᠠᠷᠴᠤ ᠳᠤᠮᠳᠠᠳᠤ ᠠᠽᠢᠶ᠎ᠠ ᠶᠢ ᠬᠦᠨᠳᠡᠯᠡᠨ ᠭᠤᠯᠳᠤ ᠱᠦᠭᠦᠷᠳᠡᠵᠤ᠂ ᠨᠡᠷ᠎ᠡ ᠠᠯᠳᠠᠷ ᠢᠶᠠᠨ ᠳᠡᠯᠡᠭᠡᠢ ᠳ᠋ᠠᠬᠢᠨ ᠳᠤ ᠮᠠᠨᠳᠤᠭᠤᠯᠤᠭᠰᠠᠨ ᠴᠦ ᠳᠡᠭᠦᠨ ᠠᠴᠠ ᠰᠡᠭᠦᠯᠡᠷᠬᠢ ᠤᠢᠢᠷᠠᠳ ᠤᠨ ᠰᠠᠶᠢᠨ ᠡᠷ᠎ᠡ ᠡᠰᠡᠨ ᠬᠠᠭᠠᠨ ᠬᠡᠮᠡᠭᠴᠢ ᠳᠡᠭᠦᠨ ᠠᠴᠠ ᠠᠷᠪᠠᠨ ᠬᠤᠪᠢ ᠠᠷᠭ᠎ᠠ ᠪᠤᠳᠤᠯᠭ᠎ᠠ ᠲᠠᠢ᠂ ᠰᠠᠶᠢᠨ ᠡᠷ᠎ᠡ ᠪᠠᠶᠢᠭᠰᠠᠨ ᠠᠵᠤᠭᠤ᠃ ᠳᠤᠭᠤᠯᠠᠩ ᠳᠡᠮᠦᠷ ᠨᠢ ᠬᠢᠳᠠᠳ ᠤᠨ ᠮᠢᠩ ᠤᠯᠤᠰ ᠢ ᠳᠠᠶᠢᠴᠢᠯᠠᠨ ᠳᠠᠭᠠᠭᠤᠯᠬᠤ ᠭᠡᠵᠤ ᠴᠡᠷᠢᠭᠯᠡᠵᠤ ᠪᠠᠶᠢᠭᠰᠠᠨ ᠵᠠᠮ ᠳᠤ ᠪᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠳᠤ ᠳᠡᠭᠦᠨ ᠤ ᠶᠡᠭᠡ ᠦᠢᠯᠡᠰ ᠴᠦ ᠳᠤᠷᠭᠤᠨ ᠬᠠᠶᠠᠭᠳᠠᠵᠤ᠂ ᠳᠡᠭᠦᠨ ᠢ ᠳᠠᠭᠠᠭᠰᠠᠨ ᠤᠢᠢᠷᠠᠳ ᠤᠨ ᠨᠢᠭᠡ ᠬᠡᠰᠡᠭ ᠨᠢ ᠳᠤᠮᠳᠠᠳᠤ ᠠᠽᠢᠶ᠎ᠠ᠂ ᠡᠮᠦᠨᠡᠳᠦ ᠠᠽᠢᠶ᠎ᠠ ᠳᠤ ᠤᠷᠤᠵᠤ᠂ ᠡᠨᠡᠳᠬᠡᠭ ᠢ ᠡᠵᠡᠯᠡᠭᠡᠳ ᠠᠯᠳᠠᠷᠳᠠᠢ ᠮᠤᠭᠤᠯ ᠬᠠᠭᠠᠨᠳᠤ ᠤᠯᠤᠰ ᠢ ᠪᠠᠶᠢᠭᠤᠯᠵᠤ᠂ ᠬᠡᠳᠦᠨ ᠵᠠᠭᠤᠨ ᠤᠨ ᠤ ᠪᠠᠳᠠᠷᠠᠯ ᠢ ᠦᠡᠭᠭᠡᠷᠡᠭᠦᠯᠦᠭᠡᠳ ᠠᠩᠭ᠍ᠯᠢ ᠬᠦᠮᠦᠨ ᠳᠤ ᠮᠦᠬᠦᠭᠡᠭᠳᠡᠪᠡ᠃ ᠲᠦᠷᠦᠭᠦᠦ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠦᠭᠡᠯᠡᠳ ᠮᠡᠳᠦ ᠶᠢᠨ ᠤᠪᠤᠭ ᠠᠶᠢᠮᠠᠭ ᠨᠢ ᠠᠹᠠᠭᠠᠨᠢᠰᠲ᠋ᠠᠨ᠂ ᠫᠠᠺᠢᠰᠲ᠋ᠠᠨ ᠳᠤ ᠪᠠᠶᠢᠯ᠎ᠠ ᠭᠡᠨ᠎ᠡ᠃ ᠬᠡᠳᠦᠨ ᠵᠠᠭᠤᠨ ᠲᠦᠮᠡᠨ ᠬᠦᠮᠦᠨ ᠲᠠᠢ ᠬᠠᠵᠠᠷ ᠬᠦᠮᠦᠨ ᠨᠢ ᠮᠦᠨ ᠪᠤᠯᠪᠠ ᠤᠤ︖      ᠳᠤᠭᠤᠯᠠᠩ ᠳᠡᠮᠦᠷ ᠠᠴᠠ ᠰᠡᠭᠦᠯᠡᠷ ᠴᠤᠷᠤᠰ ᠤᠢᠢᠷᠠᠳ ᠤᠨ ᠳᠤᠭᠤᠨ ᠳᠠᠶᠢᠱᠢ᠂ ᠡᠰᠡᠨ ᠳᠠᠶᠢᠱᠢ ᠬᠦᠴᠦᠷᠭᠡᠭᠵᠢᠪᠡ᠃ ᠴᠤᠷᠤᠰ ᠭᠡᠳᠡᠭ ᠠᠶᠢᠮᠠᠭ ᠤᠨ ᠲᠦᠷᠦᠭᠦᠴᠦᠳ ᠨᠢ ︽ᠤᠤᠷ ᠮᠤᠳᠤᠨ ᠡᠬᠡ ᠲᠠᠢ᠂ ᠤᠭᠤᠯᠢ ᠰᠢᠪᠠᠭᠤᠨ ᠡᠴᠢᠭᠡ ᠲᠠᠢ︾ ᠳᠡᠭᠷᠢ ᠶᠢᠨ ᠬᠦᠪᠡᠭᠦᠨ ᠭᠡᠭᠳᠡᠵᠤ᠂ ᠡᠪᠦᠭᠡ ᠳᠡᠭᠡᠳᠦᠰ ᠨᠢ ᠮᠤᠳᠤᠨ ᠤ ᠬᠦᠨᠳᠡᠢ ᠳᠤ ᠴᠤᠷᠭᠤ ᠰᠢᠭ᠋ ᠶᠠᠭᠤᠮ᠎ᠠ ᠶᠢ ᠬᠦᠬᠦᠵᠤ ᠦᠰᠦᠭᠰᠡᠨ ᠠᠴᠠ ᠴᠤᠷᠤᠰ ᠭᠡᠮᠡᠨ ᠨᠡᠷᠡᠶᠢᠳᠦᠯ᠎ᠡ ᠭᠡᠳᠡᠭ᠃ ︽ᠮᠠᠷᠺᠦ ᠫᠤᠯᠤ ᠶᠢᠨ ᠵᠢᠭᠤᠴᠢᠯᠠᠯ ᠤᠨ ᠳᠡᠮᠳᠡᠭᠯᠡᠯ︾ ᠳᠤ ᠴᠦ ᠤᠢᠢᠭᠤᠷ ᠠᠶᠢᠮᠠᠭ ᠤᠨ ᠬᠢᠨ ᠢ ᠢᠡᠭᠭᠢᠵᠤ ᠳᠡᠮᠳᠡᠭᠯᠡᠵᠤ ᠪᠠᠶᠢᠨ᠎ᠠ᠃ ᠪᠤᠳᠤᠪᠠᠯ ᠡᠷᠳᠡᠨ ᠤ ᠤᠢᠢᠭᠤᠷ ᠠᠶᠢᠮᠠᠭ ᠲᠠᠢ ᠶᠠᠮᠠᠷ ᠨᠢᠭᠡᠨ ᠬᠠᠷᠢᠴᠠᠭ᠎ᠠ ᠲᠠᠢ ᠪᠢᠵᠡ᠃ ᠳᠤᠭᠤᠨ ᠳᠠᠶᠢᠱᠢ ᠠᠮᠢᠳᠤ ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠤ ᠪᠠᠨ ᠪᠦᠬᠦ ᠮᠤᠩᠭᠤᠯ ᠢ ᠨᠢᠭᠡᠳᠭᠡᠬᠦ ᠰᠢᠬᠠᠵᠤ᠂ ᠡᠵᠡᠯᠡᠵᠤ ᠪᠠᠶᠢᠭᠰᠠᠨ ᠨᠤᠳᠤᠭ ᠳᠡᠪᠢᠰᠭᠡᠷ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠤ ᠡᠵᠡᠯᠡᠵᠤ ᠪᠠᠶᠢᠭᠰᠠᠨ ᠨᠤᠳᠤᠭ ᠳᠡᠪᠢᠰᠭᠡᠷ ᠲᠠᠢ ᠤᠢᠢᠷᠠᠳᠴᠦ ᠤᠴᠢᠵᠠᠢ᠃ ᠡᠶᠢᠮᠦ ᠰᠢᠯᠳᠠᠭᠠᠨ ᠠᠴᠠ ᠪᠤᠯᠵᠤ ᠤᠢᠢᠷᠠᠳ ᠤᠨ ᠳᠤᠭᠤᠨ ᠳᠠᠶᠢᠱᠢ ᠠᠴᠠ ᠤᠷᠳᠤᠰ ᠲᠤ ᠴᠢᠩᠭᠢᠰ ᠬᠠᠭᠠᠨ ᠤ ᠨᠠᠢᠮᠠᠨ ᠴᠠᠭᠠᠨ ᠤᠷᠳᠤᠨ ᠢ ᠮᠤᠷᠢ ᠪᠠᠷ ᠳᠠᠭᠠᠷᠢᠭᠤᠯᠵᠤ᠂ ᠰᠡᠯᠡᠮ᠎ᠡ ᠪᠠᠷ ᠴᠠᠪᠴᠢᠯᠠᠨ᠄ ︽ᠴᠢ ᠰᠤᠳᠤ ᠪᠤᠭᠳᠠ ᠬᠡᠭᠦᠯᠡᠷ ᠪᠢ ᠰᠤᠳᠠᠢ ᠶᠢᠨ ᠦᠷᠡᠰ ᠪᠠᠶᠢᠨᠠᠮ︾ ᠬᠡᠮᠡᠨ ᠠᠭᠰᠤᠮᠨᠠᠵᠠᠢ᠃ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠰᠤᠭᠳᠤᠭᠤ ᠪᠠᠶᠢᠭᠰᠠᠨ ᠴᠦ ᠮᠠᠭᠠᠳ ᠡ᠃      ᠡᠭᠦᠨ ᠳᠤ ᠬᠤᠷᠤᠰᠤᠭᠰᠠᠨ ᠵᠡᠭᠦᠨ ᠮᠤᠩᠭᠤᠯ ᠤᠨ ᠴᠢᠩᠭᠢᠰ ᠬᠠᠭᠠᠨ ᠤ ᠤᠳᠤᠮ ᠤᠨ ᠬᠢᠨ ᠪᠠ ᠬᠠᠰᠠᠷ ᠤᠨ ᠤᠳᠤᠮ ᠤᠨ ᠬᠢᠨ ᠨᠢᠭᠡ ᠤᠳᠠᠭᠠᠨ ᠤ ᠬᠤᠤᠷᠯᠠᠬᠤ ᠬᠤᠤᠪᠢᠯᠳᠤᠯᠭ᠎ᠠ ᠶᠢ ᠵᠤᠬᠢᠶᠠᠨ ᠪᠠᠶᠢᠭᠤᠯᠵᠠᠢ᠃ ᠡᠨᠡ ᠨᠢᠭᠤᠴᠠ ᠪᠠᠷ ᠬᠤᠤᠷᠯᠠᠬᠤ ᠠᠵᠢᠯᠯᠠᠭ᠎ᠠ ᠨᠢ ᠠᠷᠤᠭᠳᠠᠢ ᠳᠠᠶᠢᠵᠢ ᠶᠢᠨ ᠳᠡᠭᠦᠦ ᠮᠦᠡᠭᠭᠡᠪᠠᠢ᠂ ᠬᠤᠷᠴᠢᠨ ᠤ ᠪᠠᠭᠠᠳᠤᠷ ᠰᠢᠭᠦᠰᠦᠳᠡᠢ ᠮᠠᠭᠠᠳ ᠭᠡᠵᠤ ᠪᠢ ᠦᠵᠡᠨ᠎ᠡ᠃ ᠤᠴᠢᠷ ᠨᠢ ᠳᠤᠭᠤᠨ ᠳᠠᠶᠢᠱᠢ ᠶᠢᠨ ᠤᠷᠳᠤᠨ ᠳᠤ ᠬᠠᠷᠠᠭᠤᠯ ᠮᠠᠨᠠᠭ᠎ᠠ ᠲᠠᠢ᠂ ᠪᠠᠷᠤᠭ ᠤᠨ ᠬᠦᠮᠦᠰ ᠤᠷᠤᠵᠤ ᠳᠡᠶᠢᠯᠬᠦ ᠦᠭᠡᠢ ᠶᠤᠮ᠃ ᠬᠤᠵᠢᠮ ᠨᠢ ᠡᠰᠡᠨ ᠳᠠᠶᠢᠵᠢ ᠬᠠᠭᠠᠨ ᠰᠠᠭᠤᠭᠠᠳ ᠡᠴᠢᠭᠡ ᠶᠢᠨ ᠬᠡᠷᠢᠶᠡᠰ ᠢᠶᠠᠷ ᠡᠨᠡ ᠬᠤᠶᠠᠷ ᠬᠦᠮᠦᠨ ᠢ ᠠᠯᠠᠵᠤ ᠠᠪᠤ ᠳᠤ ᠪᠠᠨ ᠦᠰ ᠠᠪᠴᠤ ᠦᠭᠭᠦᠭᠰᠡᠨ ᠶᠤᠮ᠃ ᠡᠭᠦᠨ ᠢᠶᠠᠷ ᠰᠤᠷᠭᠠᠮᠵᠢ ᠪᠤᠯᠭᠠᠨ ᠳᠤᠭᠤᠨ ᠳᠠᠶᠢᠱᠢ ᠠᠴᠠ ᠬᠦᠦ ᠡᠰᠡᠨ ᠳᠤ ᠪᠠᠨ ᠡᠶᠢᠮᠦ ᠶᠠᠪᠤᠳᠠᠯ ᠢ ᠭᠠᠷᠭᠠᠵᠤ ᠪᠤᠯᠬᠤ ᠦᠭᠡᠢ ᠬᠡᠮᠡᠨ ᠰᠤᠷᠭᠠᠮᠵᠢᠯᠠᠵᠠᠢ᠃      ᠤᠢᠢᠷᠠᠳ ᠤᠨ ᠳᠤᠭᠤᠨ ᠳᠠᠶᠢᠱᠢ ᠪᠠ ᠡᠰᠡᠨ ᠳᠠᠶᠢᠱᠢ ᠶᠢᠨ ᠦᠶ᠎ᠡ ᠪᠤᠯ ᠮᠤᠩᠭᠤᠯ ᠤᠨ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠰᠡᠭᠦᠯᠡᠷ ᠳᠠᠬᠢᠨ ᠮᠠᠨᠳᠤᠭᠰᠠᠨ ᠴᠠᠭ ᠦᠶ᠎ᠡ ᠶᠤᠮ᠃ ᠤᠢᠢᠷᠠᠳ ᠠᠴᠠ ᠡᠨᠡ ᠦᠶ᠎ᠡ ᠳᠤ ᠬᠤᠶᠠᠷ ᠬᠦᠮᠦᠨ ᠪᠦᠬᠦ ᠮᠤᠩᠭᠤᠯ ᠤᠨ ᠬᠠᠭᠠᠨ ᠰᠠᠭᠤᠵᠠᠢ᠃ ᠨᠢᠭᠡ ᠨᠢ ᠦᠭᠡᠴᠢ ᠬᠠᠰᠬ᠎ᠠ᠂ ᠪᠠᠰᠠ ᠨᠢᠭᠡ ᠨᠢ ᠡᠰᠡᠨ᠃ ᠮᠤᠩᠭᠤᠯ ᠤᠨ ᠶᠤᠧᠠᠨ ᠤᠯᠤᠰ ᠨᠢ ᠬᠢᠳᠠᠳ ᠤᠷᠤᠨ ᠠᠴᠠ ᠬᠤᠶᠢᠰᠢ ᠤᠬᠤᠷᠢᠵᠤ ᠢᠷᠡᠭᠰᠡᠨ ᠤ ᠰᠡᠭᠦᠯᠡᠷ ᠬᠤᠪᠢᠯᠠᠢ ᠬᠠᠭᠠᠨ ᠤ ᠦᠷᠡᠳᠦᠰ ᠨᠢ ᠤᠢᠢᠷᠠᠳ ᠬᠦᠮᠦᠰ ᠲᠤ ᠠᠯᠠᠭᠳᠠᠭᠠᠳ᠂ ᠡᠯᠪᠡᠭ ᠨᠢᠭᠦᠯᠡᠰᠦᠩᠭᠦᠢ ᠬᠠᠭᠠᠨ ᠠᠴᠠ ᠰᠡᠭᠦᠯᠡᠷ ᠬᠠᠭᠠᠨ ᠤᠭᠰᠠᠭ᠎ᠠ ᠨᠢ ᠦᠷ᠎ᠡ ᠳᠠᠰᠤᠷᠠᠪᠠ᠃ ᠬᠤᠵᠢᠮ ᠨᠢ ᠬᠤᠷᠴᠢᠨ ᠤ ᠬᠠᠰᠠᠷ ᠤᠨ ᠦᠷᠡᠳᠦᠰ ᠬᠠᠭᠠᠨ ᠰᠠᠭᠤᠬᠤ ᠳᠤ ᠤᠢᠢᠷᠠᠳ ᠤᠨ ᠳᠤᠭᠤᠨ ᠳᠠᠶᠢᠱᠢ ᠠᠴᠠ ᠳᠤᠮᠳᠠᠳᠤ ᠠᠽᠢᠶ᠎ᠠ ᠠᠴᠠ ᠴᠢᠩᠭᠢᠰ ᠬᠠᠭᠠᠨ ᠤ ᠬᠤᠶᠢᠴᠢᠰ ᠪᠤᠯᠬᠤ ᠴᠠᠭᠠᠳᠠᠢ ᠶᠢᠨ ᠦᠷᠡᠰ ᠢ ᠠᠪᠴᠢᠷᠠᠵᠤ ᠬᠠᠭᠠᠨ ᠳᠠᠯᠪᠢᠭᠠᠳ ᠬᠠᠰᠠᠷ ᠤᠨ ᠬᠤᠶᠢᠴᠢᠰ ᠲᠠᠢ ᠡᠰᠡᠷᠬᠦᠴᠡᠯᠳᠦᠭᠦᠯᠵᠡᠢ᠃ ᠤᠷᠤᠭᠳᠠᠢ ᠳᠠᠶᠢᠱᠢ ᠶᠢᠨ ᠳᠠᠯᠪᠢᠭᠰᠠᠨ ᠬᠠᠭᠠᠨ ᠨᠢ ᠬᠡᠳᠦᠨ ᠤᠳᠠᠭᠠᠨ ᠤ ᠳᠠᠶᠢᠨ ᠢᠶᠠᠷ ᠳᠠᠮᠵᠢᠵᠤ ᠳᠡᠶᠢᠯᠦᠭᠳᠡᠭᠡᠳ ᠠᠯᠠᠭᠳᠠᠪᠠ᠃ ᠳᠤᠮᠳᠠᠳᠤ ᠠᠽᠢᠶ᠎ᠠ ᠠᠴᠠ ᠠᠪᠴᠢᠷᠠᠭᠰᠠᠨ ᠬᠠᠭᠠᠨ ᠨᠢ ᠴᠦ ᠨᠢᠭᠡ ᠮᠠᠨᠤᠤᠯ ᠳᠡᠳᠦᠢ ᠪᠠᠶᠢᠵᠤ᠂ ᠪᠤᠳᠠᠳᠤ ᠡᠷᠭᠡ ᠨᠢ ᠪᠦᠷ ᠯᠡ ᠳᠤᠭᠤᠨ ᠳᠠᠶᠢᠱᠢ ᠡᠴᠢᠭᠡ ᠬᠦᠦ ᠬᠤᠶᠠᠷ ᠤᠨ ᠭᠠᠷ ᠲᠤ ᠡᠵᠡᠮᠰᠢᠭᠳᠡᠵᠤ ᠪᠠᠶᠢᠪᠠ᠃ ᠡᠬᠢᠨ ᠳᠤ ᠪᠠᠨ ᠨᠢᠭᠡ ᠮᠠᠨᠤᠤᠯ ᠳᠠᠯᠪᠢᠵᠤ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠬᠤᠵᠢᠮ ᠨᠢ ᠡᠰᠡᠨ ᠠᠴᠠ ᠦᠪᠡᠷ ᠢᠶᠠᠨ ᠬᠠᠭᠠᠨ ᠰᠠᠭᠤᠬᠤ ᠶᠢ ᠴᠦ ᠪᠤᠳᠤᠯᠬᠢᠯᠠᠵᠤ ᠦᠵᠡᠪᠡ᠃ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠤᠢᠢᠷᠠᠳ ᠤᠨ ᠰᠦᠷ ᠬᠦᠴᠦᠨ ᠤᠷᠬᠢᠯ ᠳᠤ ᠪᠠᠨ ᠬᠦᠷᠴᠦ᠂ ᠮᠤᠩᠭᠤᠯ ᠤᠨ ᠭᠠᠵᠠᠷ ᠬᠠᠨᠳᠤᠭᠰᠠᠨ ᠵᠦᠭ ᠲᠤ ᠳᠠᠶᠢᠰᠤᠨ ᠦᠭᠡᠢ ᠪᠤᠯᠵᠤ᠂ ᠬᠡᠨ ᠳᠡᠭᠦᠨ ᠲᠠᠢ ᠰᠠᠶᠢᠨ ᠪᠤᠯ ᠤᠷᠤᠭ ᠬᠤᠳᠠ ᠪᠤᠯᠤᠯᠴᠠᠨ᠂ ᠡᠰᠡᠷᠬᠦᠴᠡᠪᠡᠯ ᠳᠤᠯᠤᠭᠠᠢ ᠨᠢ ᠭᠠᠵᠠᠷ ᠤᠨᠠᠵᠤ ᠪᠠᠶᠢᠪᠠ᠃      ᠡᠰᠡᠨ ᠬᠠᠭᠠᠨ ᠨᠢᠭᠡ ᠨᠠᠰᠤᠨ ᠳᠤ ᠪᠠᠨ ᠳᠠᠶᠢᠨ ᠪᠠᠶᠢᠯᠳᠤᠭᠠᠨ ᠬᠢᠵᠤ ᠮᠤᠩᠭᠤᠯ ᠭᠠᠵᠠᠷ ᠲᠤ ᠬᠠᠨᠳᠤᠭᠰᠠᠨ ᠵᠦᠭ ᠲᠤ ᠳᠠᠶᠢᠰᠤᠨ ᠦᠭᠡᠢ ᠶᠠᠪᠤᠵᠤ᠂ ᠳᠡᠭᠦᠨ ᠤ ᠪᠦᠳᠦᠭᠡᠭᠰᠡᠨ ᠤᠯᠠᠨ ᠭᠠᠪᠢᠶ᠎ᠠ ᠵᠢᠳᠭᠦᠯ ᠳᠤ ᠬᠤᠶᠠᠷ ᠶᠠᠪᠤᠳᠠᠯ ᠨᠢ ᠮᠤᠩᠭᠤᠯ ᠤᠨ ᠳᠡᠦᠭᠡᠨ ᠳᠤ ᠪᠠᠯᠠᠷᠠᠰᠢ ᠦᠭᠡᠢ᠃ ᠨᠢᠭᠡ ᠨᠢ ᠡᠮᠦᠨᠡᠰᠢ ᠮᠢᠩ ᠤᠯᠤᠰ ᠢ ᠳᠠᠶᠢᠯᠠᠵᠤ᠂ ᠲᠦᠮᠦᠪᠦᠦ ᠳᠤ ᠮᠢᠩ ᠤᠯᠤᠰ ᠤᠨ ᠳᠠᠪᠢᠨ ᠲᠦᠮᠡᠨ ᠴᠡᠷᠢᠭ ᠢ ᠬᠢᠳᠤᠵᠤ᠂ ᠮᠤᠩᠭᠤᠯ ᠳᠤ ᠡᠮᠦᠨᠡᠳᠦ ᠶᠢᠨ ᠠᠶᠤᠯ ᠢ ᠠᠷᠢᠯᠭᠠᠵᠤ ᠦᠭᠭᠦᠭᠰᠡᠨ᠃ ᠨᠦᠬᠦᠭᠡ ᠨᠢ ᠵᠡᠭᠦᠨᠰᠢ ᠮᠠᠨᠵᠤ ᠶᠢᠨ ᠳᠡᠭᠡᠳᠦᠰ ᠪᠤᠯᠬᠤ ᠵᠦᠷᠴᠢᠨ ᠠᠶᠢᠮᠠᠭ ᠢ ᠳᠠᠷᠤᠩᠭᠤᠢᠢᠯᠠᠵᠤ᠂ ᠵᠠᠭᠤ ᠭᠠᠷᠤᠢ ᠵᠢᠯ ᠳᠤᠯᠤᠭᠠᠢ ᠦᠨᠳᠡᠶᠢᠯᠭᠡᠭᠰᠡᠨ ᠦᠭᠡᠢ ᠶᠠᠪᠤᠳᠠᠯ᠃ ᠡᠶᠢᠮᠦ ᠭᠠᠳᠠᠭᠠᠳᠤ ᠨᠦᠬᠦᠴᠡᠯ ᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠦᠭᠡᠢ ᠶᠤᠮ ᠪᠤᠯ ᠮᠠᠨ ᠤ ᠤᠡᠭᠭᠢᠷᠠᠳᠠᠭ ︽ᠳᠠᠶᠠᠨ ᠬᠠᠭᠠᠨ ᠤ ᠶᠡᠭᠡ ᠨᠢᠭᠡᠳᠦᠯ︾ ᠴᠦ ᠪᠠᠶᠢᠵᠤ ᠪᠤᠯᠤᠰᠢ ᠦᠭᠡᠢ᠂ ᠨᠢᠭᠡᠳᠦᠭᠰᠡᠨ ᠮᠤᠩᠭᠤᠯ ᠴᠦ ᠪᠠᠶᠢᠵᠤ ᠪᠤᠯᠤᠰᠢ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ᠡᠨᠡ ᠳᠠᠯ᠎ᠠ ᠳᠤ ᠡᠰᠡᠨ ᠬᠠᠭᠠᠨ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠳᠠᠷᠠᠭ᠎ᠠ ᠶᠢᠨ ᠰᠠᠭᠤᠳᠠᠯ ᠳᠤ ᠴᠦ ᠪᠠᠶᠢᠬᠤ ᠶᠤᠰᠤ ᠲᠠᠢ ᠰᠢᠭ᠋᠃      ᠡᠰᠡᠨ ᠬᠠᠭᠠᠨ ᠠᠴᠠ ᠬᠤᠶᠠᠷ ᠭᠤᠷᠪᠠᠨ ᠲᠦᠮᠡᠬᠡᠨ ᠴᠡᠷᠢᠭ ᠢᠶᠠᠷ ᠮᠢᠩ ᠤᠯᠤᠰ ᠤᠨ ᠳᠠᠪᠢᠨ ᠲᠦᠮᠡᠨ ᠴᠡᠷᠢᠭ ᠢ ᠬᠢᠳᠤᠵᠤ᠂ ᠬᠠᠭᠠᠨ ᠢ ᠨᠢ ᠬᠦᠷᠳᠡᠯ᠎ᠡ ᠤᠯᠵᠠᠯᠠᠵᠤ ᠬᠤᠨᠢ ᠬᠠᠷᠢᠭᠤᠯᠤᠭᠤᠯᠪᠠ᠃ ᠳᠠᠪᠢᠨ ᠲᠦᠮᠡᠨ ᠴᠡᠷᠢᠭ ᠡᠷᠡᠰ ᠢᠶᠠᠨ ᠬᠢᠳᠤᠭᠤᠯᠤᠭᠠᠳ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠪᠡᠭᠡᠵᠢᠩ ᠬᠤᠳᠠᠨ ᠳᠤ ᠤᠬᠢᠯᠠᠬᠤ ᠳᠠᠭᠤ ᠲᠦᠭᠦᠷᠴᠦ᠂ ᠠᠶᠢᠯ ᠪᠦᠷᠢ ᠴᠠᠭᠠᠨ ᠪᠦᠰ ᠠᠪᠴᠤ ᠭᠠᠰᠢᠭᠤᠳᠠᠯ ᠡᠷᠬᠢᠯᠡᠭᠰᠡᠨ ᠢᠶᠠᠷ ᠴᠠᠭᠠᠨ ᠪᠦᠰ ᠦᠨ᠎ᠡ ᠳᠤ ᠤᠷᠤᠵᠤ ᠤᠯᠳᠠᠬᠤ ᠦᠭᠡᠢ ᠪᠤᠯᠤᠭᠰᠠᠨ ᠭᠡᠳᠡᠭ᠃ ᠮᠢᠩ ᠤᠯᠤᠰ ᠤᠨ ᠬᠠᠭᠠᠨ ᠨᠢ ᠪᠠᠷᠢᠭᠳᠠᠵᠤ ᠲᠦᠰᠢᠮᠡᠳ ᠴᠡᠷᠢᠭ ᠨᠢ ᠪᠦᠷ ᠠᠯᠠᠭᠳᠠᠭᠰᠠᠨ ᠢᠶᠠᠨ ᠤᠯᠤᠰ ᠲᠤ ᠵᠠᠷᠤᠬᠤ ᠲᠦᠰᠢᠮᠡᠳ ᠬᠦᠷᠳᠡᠯ᠎ᠡ ᠤᠯᠳᠠᠬᠤ ᠦᠭᠡᠢ ᠪᠤᠯᠵᠤ ︽ᠮᠤᠩᠭᠤᠯ ᠤᠨ ᠢᠯᠳᠦᠨ ᠳᠤ ᠬᠦᠮᠦᠨ ᠪᠦᠬᠦᠨ ᠡᠷᠭᠡ ᠳᠡᠭᠰᠢ︾ ᠭᠡᠰᠡᠨ ᠦᠭᠡ ᠭᠠᠷᠤᠯ᠎ᠠ ᠭᠡᠳᠡᠭ᠃ ᠡᠨᠡ ︽ᠲᠦᠮᠦᠪᠤᠤ ᠶᠢᠨ ᠬᠡᠷᠡᠭ︾ ᠨᠢ ᠶᠠᠭ ᠰᠠᠶᠢᠬᠠᠨ ᠨᠠᠢᠮᠠᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠳᠠᠪᠤᠨ ᠳᠤ ᠡᠭᠦᠰᠦᠭᠰᠡᠨ ᠠᠴᠠ ᠬᠢᠳᠠᠳ ᠬᠦᠮᠦᠰ ᠵᠢᠯ ᠪᠦᠷᠢ ᠶᠢᠨ ᠨᠠᠢᠮᠠᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠳᠠᠪᠤᠨ ᠤ ᠤᠷᠤᠢ ᠭᠠᠷᠴᠤ ᠳᠠᠷᠪᠤᠰ ᠴᠠᠪᠴᠢᠨ ᠬᠤᠷᠤᠰᠤᠯ ᠢᠶᠠᠨ ᠳᠠᠶᠢᠯᠳᠠᠭ ᠪᠤᠯᠵᠠᠢ ᠭᠡᠳᠡᠭ᠃ ᠶᠠᠭᠠᠬᠢᠵᠤ ᠦᠰᠬᠡᠨ ᠲᠦᠰᠬᠡᠨ ᠲᠠᠢ ᠬᠡᠯᠡᠭᠰᠡᠨ ᠨᠢ ᠴᠦ ᠪᠠᠶᠢᠬᠤ ᠪᠤᠯᠪᠠᠴᠤ ᠡᠨᠡ ᠶᠠᠪᠤᠳᠠᠯ ᠠᠴᠠ ᠰᠡᠭᠦᠯᠡᠷ ᠮᠢᠩ ᠤᠯᠤᠰ ᠨᠢ ᠴᠠᠭᠠᠨ ᠬᠡᠷᠡᠮ ᠠᠴᠠ ᠬᠤᠶᠢᠰᠢ ᠴᠡᠷᠢᠭ ᠭᠠᠷᠭᠠᠵᠤ ᠳᠡᠶᠢᠯᠬᠦ ᠦᠭᠡᠢ ᠪᠤᠯᠵᠠᠢ᠃ ᠬᠤᠵᠢᠮ ᠨᠢ ᠳᠠᠶᠠᠨ ᠬᠠᠭᠠᠨ ᠪᠠ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠬᠤᠶᠠᠭᠤᠯᠠ ᠬᠡᠳᠦ ᠤᠳᠠᠭ᠎ᠠ ᠮᠢᠩ ᠤᠯᠤᠰ ᠤᠨ ᠬᠢᠯᠢ ᠳᠤ ᠴᠦᠮᠦᠷᠦᠨ ᠤᠷᠤᠵᠤ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠭᠰᠡᠨ ᠪᠤᠯᠪᠠᠴᠤ᠂ ᠮᠢᠩ ᠤᠯᠤᠰ ᠬᠠᠷᠢᠨ ᠬᠤᠯᠴᠠᠶᠢᠵᠤ ᠤᠮᠠᠷᠠᠳᠤ ᠬᠢᠯᠢ ᠳᠡᠭᠡᠷ᠎ᠡ ᠴᠡᠷᠢᠭ ᠴᠦ ᠭᠠᠷᠭᠠᠵᠤ ᠳᠡᠶᠢᠯᠦᠭᠰᠡᠨ ᠦᠭᠡᠢ ᠪᠢᠯᠡ᠃ ︵ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠳᠠᠷᠪᠤᠰ ᠭᠡᠰᠡᠨ ᠶᠠᠭᠤᠮ᠎ᠠ ᠪᠠᠷᠠᠭᠤᠨ ᠤᠷᠤᠨ ᠤ ᠶᠠᠭᠤᠮ᠎ᠠ ᠪᠠᠶᠢᠵᠤ᠂ ᠮᠤᠩᠭᠤᠯ ᠢ ᠲᠦᠯᠦᠭᠡᠯᠡᠵᠤ ᠪᠠᠶᠢᠵᠤᠬᠤᠢ᠃ ᠳᠠᠷᠪᠤᠰ ᠯᠢᠶᠤᠤ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠮᠤᠩᠭᠤᠯ ᠤᠷᠤᠨ ᠳᠤ ᠤᠷᠤᠵᠤ᠂ ᠮᠤᠩᠭᠤᠯ ᠠᠴᠠ ᠰᠡᠭᠦᠯᠡᠷ ᠰᠠᠶ᠋ᠢ ᠬᠢᠳᠠᠳ ᠬᠦᠮᠦᠰ ᠳᠠᠷᠪᠤᠰ ᠢ ᠮᠡᠳᠡᠵᠡᠢ᠃ ᠳᠠᠷᠪᠤᠰ ᠶᠠᠭ ᠯᠡ ᠬᠦᠮᠦᠨ ᠤ ᠳᠤᠯᠤᠭᠠᠢ ᠰᠢᠭ᠋ ᠪᠤᠯᠬᠤᠷ ᠬᠢᠳᠠᠳ ᠬᠦᠮᠦᠰ ︿ᠮᠤᠩᠭᠤᠯ ᠤᠨ ᠳᠤᠯᠤᠭᠠᠢ﹀ ᠭᠡᠳᠡᠭ ᠪᠠᠶᠢᠵᠤᠬᠤᠢ᠃︶      ᠵᠡᠭᠦᠨᠰᠢ ᠵᠦᠷᠴᠢᠨ ᠠᠶᠢᠮᠠᠭ ᠢ ᠳᠠᠷᠤᠩᠭᠤᠢᠢᠯᠠᠬᠤ ᠳᠤ ᠵᠦᠷᠴᠢᠨᠴᠤᠳ ᠤᠯᠠᠨ ᠤ ᠪᠠᠷᠳᠠᠭ᠎ᠠ ᠪᠠᠨ ᠲᠦᠰᠢᠵᠤ ᠪᠤᠷᠤᠩᠬᠤᠢᠢᠯᠠᠬᠤ ᠳᠤ ᠤᠢᠢᠷᠠᠳ ᠴᠡᠷᠢᠭ ᠤᠳ ᠬᠦᠮᠦᠨ ᠨᠢ ᠬᠦᠮᠦᠨ ᠢᠶᠠᠷ ᠳᠡᠷ᠎ᠡ ᠬᠢᠵᠤ ᠪᠠᠶᠢᠮᠠᠨ ᠵᠦᠷᠴᠢᠨ ᠠᠶᠢᠮᠠᠭ ᠢ ᠪᠠᠭᠤᠯᠭᠠᠵᠤ ᠠᠪᠤᠭᠰᠠᠨ ᠭᠡᠳᠡᠭ᠃ ᠪᠠᠶᠢᠯᠳᠤᠭᠠᠨ ᠨᠢ ᠶᠡᠭᠡ ᠪᠡᠷᠬᠡ ᠬᠠᠳᠠᠭᠤᠵᠢᠯᠳᠠᠢ ᠶᠠᠪᠤᠭᠳᠠᠵᠤ᠂ ᠭᠠᠭᠴᠠᠬᠠᠨ ᠵᠦᠷᠴᠢᠨ ᠤ ᠴᠡᠷᠢᠭ ᠡᠷᠡᠰ ᠨᠢ ᠬᠤᠶᠠᠷ ᠲᠦᠮᠡ ᠢᠯᠡᠭᠦᠦ ᠦᠭᠦᠭᠰᠡᠨ ᠭᠡᠳᠡᠭ᠃ ᠬᠡᠷᠪᠡ ᠤᠢᠢᠷᠠᠳ ᠰᠢᠭ᠋ ᠠᠭᠤᠯᠠᠨ ᠪᠠᠶᠢᠯᠳᠤᠭᠠᠨ ᠳᠤ ᠭᠠᠷᠮᠠᠭᠠᠢ ᠳᠠᠶᠢᠴᠢᠳ ᠦᠭᠡᠢ ᠪᠠᠶᠢᠭᠰᠠᠨ ᠪᠤᠯ ᠳᠡᠶᠢᠯᠬᠦ ᠳᠤ ᠬᠦᠴᠢᠷ ᠪᠠᠶᠢᠬ᠎ᠠ᠃ ᠬᠤᠵᠢᠮ ᠨᠢ ᠮᠤᠩᠭᠤᠯ ᠤᠨ ᠤᠯᠠᠨ ᠠᠶᠢᠮᠠᠭ ᠮᠠᠨᠵᠤ ᠶᠢ ᠳᠡᠶᠢᠯᠬᠦ ᠦᠭᠡᠢ ᠪᠠᠶᠢᠭᠰᠠᠨ ᠨᠢ ᠴᠦ ᠰᠢᠯᠳᠠᠭᠠᠨ ᠲᠠᠢ ᠪᠠᠶᠢᠭᠰᠠᠨ ᠪᠠᠶᠢᠬ᠎ᠠ᠃ ᠨᠢᠭᠡ ᠳᠤ ᠮᠤᠩᠭᠤᠯ ᠬᠦᠮᠦᠨ ᠬᠤᠨᠢ ᠬᠠᠷᠢᠭᠤᠯᠵᠤ ᠡᠷᠡᠯᠭᠡᠭ ᠳᠠᠶᠢᠴᠢᠨ ᠴᠢᠨᠠᠷ ᠨᠢ ᠪᠠᠭᠤᠷᠠᠭᠰᠠᠨ᠂ ᠤᠢᠢᠷᠠᠳ ᠰᠢᠭ᠋ ᠠᠭᠤᠯᠠᠨ ᠭᠠᠵᠠᠷ ᠤᠨ ᠳᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠪᠤᠯᠪᠠᠰᠤᠷᠠᠭᠰᠠᠨ ᠦᠭᠡᠢ᠂ ᠪᠠᠶᠢᠯᠳᠤᠭᠠᠨ ᠤ ᠠᠷᠭ᠎ᠠ ᠳᠡᠮ ᠢ ᠮᠡᠳᠡᠭᠰᠡᠨ ᠦᠭᠡᠢ ᠵᠡᠷᠭᠡ ᠨᠦᠬᠦᠴᠡᠯ ᠰᠢᠯᠳᠠᠭᠠᠨ ᠴᠦ ᠪᠠᠶᠢᠵᠤ ᠪᠤᠯᠤᠨ᠎ᠠ᠃      ᠤᠢᠢᠷᠠᠳ ᠳᠡᠦᠭᠡ ᠰᠤᠳᠤᠯᠤᠭᠠᠴᠢ ᠠᠯᠳ᠋ᠬᠠᠤᠷᠬᠢᠯ ᠳ᠋ᠤᠺᠲ᠋ᠤᠷ ᠤᠨ ︽ᠵᠢᠩᠭᠠᠷ ᠪᠠ ᠰᠢᠷ᠎ᠠ ᠶᠢᠨ ᠲᠦᠷᠪᠡᠨ ᠲᠦᠷᠦ︾ ᠳᠤ ᠪᠢᠴᠢᠭᠰᠡᠨ ᠢ ᠦᠨᠳᠦᠰᠦᠯᠡᠪᠡᠯ ᠤᠢᠢᠷᠠᠳ ᠤᠨ ᠳᠤᠭᠤᠨ ᠳᠠᠶᠢᠱᠢ ᠪᠠ ᠡᠰᠡᠨ ᠳᠠᠶᠢᠱᠢ ᠪᠤᠯ ᠳᠤᠤᠯᠢ ︽ᠵᠢᠩᠭᠠᠷ︾ ᠤᠨ ᠭᠤᠤᠯ ᠪᠠᠭᠠᠳᠤᠷ ᠵᠢᠩᠭᠠᠷ ᠤᠨ ᠤᠨᠠᠭᠠᠨ ᠲᠦᠷᠢ ᠨᠢ ᠪᠤᠯᠬᠤ ᠠᠵᠢ᠃ ᠳᠤᠭᠤᠨ ᠳᠠᠶᠢᠱᠢ ᠠᠴᠠ ᠠᠷᠤᠭᠳᠠᠢ ᠳᠠᠶᠢᠱᠢ ᠳᠤ ᠪᠠᠷᠢᠭᠳᠠᠵᠤ ᠤᠴᠢᠭᠠᠳ ᠮᠠᠯ ᠬᠠᠷᠢᠭᠤᠯᠵᠤ᠂ ᠭᠠᠯ ᠬᠢᠵᠤ ᠦᠭᠴᠦ ᠪᠠᠶᠢᠭᠰᠠᠨ ᠦᠨᠦᠴᠢᠨ ᠬᠦᠪᠡᠭᠦᠨ ᠪᠠᠶᠢᠭᠰᠠᠨ ᠨᠢ ︽ᠦᠶ᠎ᠡ ᠶᠢᠨ ᠦᠨᠦᠴᠢᠨ ᠵᠢᠩᠭᠠᠷ︾ ᠭᠡᠰᠡᠨ ᠲᠠᠢ ᠨᠢ ᠶᠠᠭ ᠵᠤᠬᠢᠴᠠᠬᠤ ᠠᠵᠢ᠃ ᠭᠤᠳᠤᠭᠠᠯ ᠳᠤᠷᠤᠮᠵᠢᠯᠠᠯ ᠢ ᠠᠮᠰᠠᠵᠤ ᠪᠠᠶᠢᠭᠰᠠᠨ ᠠᠴᠠ ᠡᠷᠡᠯᠭᠡᠭ ᠵᠤᠷᠢᠭ ᠲᠠᠢ ᠪᠤᠯᠵᠤ ᠪᠦᠬᠦ ᠮᠤᠩᠭᠤᠯ ᠢ ᠨᠢᠭᠡᠳᠭᠡᠭᠰᠡᠨ ᠨᠢ ᠶᠡᠭᠡ ᠭᠠᠪᠢᠶ᠎ᠠ ᠶᠢ ᠪᠦᠳᠦᠭᠡᠯᠭᠡᠵᠡᠢ᠃ ᠭᠡᠪᠡᠴᠦ ᠳᠡᠦᠭᠡ ᠨᠢ ᠶᠠᠭᠠᠬᠢᠪᠠᠴᠤ ᠳᠤᠤᠯᠢ ᠰᠢᠭ᠋ ᠳᠡᠶᠢᠮᠦ ᠳᠠᠭᠤᠯᠠᠴᠢᠬᠠᠮᠠᠷ ᠵᠦᠢᠯ ᠪᠢᠰᠢ ᠪᠤᠯᠬᠤ ᠨᠢ ᠮᠡᠳᠡᠭᠡᠵᠢ᠃ ᠳᠤᠭᠤᠨ ᠪᠠ ᠡᠰᠡᠨ ᠡᠴᠢᠭᠡ ᠬᠦᠦ ᠨᠢ ᠪᠦᠬᠦ ᠮᠤᠩᠭᠤᠯ ᠢ ᠨᠢᠭᠡᠳᠭᠡᠵᠤ ᠬᠠᠭᠠᠨ ᠰᠠᠭᠤᠬᠤ ᠪᠠᠷ ᠬᠠᠮᠤᠭ ᠤᠨ ᠡᠴᠦᠰ ᠤᠨ ᠵᠤᠷᠢᠯᠭ᠎ᠠ ᠪᠤᠯᠤᠭᠰᠠᠨ ᠨᠢ ᠮᠡᠳᠡᠭᠡᠵᠢ᠃ ᠭᠡᠪᠡᠴᠦ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠦᠵᠡᠯ ᠰᠤᠷᠳᠠᠯ ᠤᠨ ᠬᠦᠯᠢᠶᠡᠰᠦᠯᠡᠯ ᠬᠡᠵᠤ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠶᠠᠭᠤᠮ᠎ᠠ ᠪᠠᠶᠢᠵᠤᠬᠤᠢ᠃ ᠴᠢᠩᠭᠢᠰ ᠤᠨ ᠠᠯᠳᠠᠨ ᠤᠷᠤᠭ ᠯᠡ ᠬᠠᠭᠠᠨ ᠰᠠᠭᠤᠬᠤ ᠬᠡᠰᠡᠨ ᠦᠵᠡᠯ ᠰᠠᠨᠠᠭ᠎ᠠ ᠬᠦᠮᠦᠨ ᠪᠦᠷᠢ ᠶᠢᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠳᠤ ᠬᠠᠳᠠᠩᠰᠢᠭ᠍ᠰᠡᠨ ᠤᠴᠢᠷ ᠳᠤᠭᠤᠨ ᠠᠴᠠ ᠡᠪᠯᠡᠷᠡᠬᠦ ᠠᠷᠭ᠎ᠠ ᠶᠢ ᠰᠤᠩᠭᠤᠵᠤ ᠡᠯᠪᠡᠭ ᠬᠠᠭᠠᠨ ᠤ ᠬᠠᠳᠤᠨ ᠦᠯᠵᠡᠶᠢᠳᠦ ᠭᠤ ᠤᠠ᠋ ᠬᠠᠳᠤᠨ ᠤ ᠬᠡᠪᠡᠯᠢ ᠳᠤ ᠲᠠᠭᠠᠨ ᠢᠷᠡᠭᠰᠡᠨ ᠠᠵᠠᠢ ᠳᠠᠶᠢᠵᠢ ᠶᠢᠨ ᠬᠦᠦ ᠳᠤᠭᠳᠤᠪᠤᠬ᠎ᠠ ᠶᠢ ᠤᠯᠵᠠᠢ᠃ ᠳᠡᠭᠡᠭᠡᠳ ᠦᠪᠡᠷ ᠤᠨ ᠦᠬᠢᠨ ᠢᠶᠠᠨ ᠦᠭᠴᠦ ᠮᠠᠨᠤᠤᠯ ᠬᠠᠭᠠᠨ ᠪᠤᠯᠭᠠᠭᠠᠳ ᠦᠪᠡᠷ ᠢᠶᠠᠨ ᠮᠤᠩᠭᠤᠯ ᠤᠨ ᠪᠤᠳᠠᠳᠠᠢ ᠡᠷᠭᠡ ᠶᠢ ᠪᠠᠷᠢᠵᠠᠢ᠃ ᠡᠨᠡ ᠦᠶ᠎ᠡ ᠳᠤ ᠬᠠᠷᠠᠬᠤᠷᠤᠮ ᠮᠤᠩᠭᠤᠯ ᠤᠨ ᠤᠯᠤᠰ ᠲᠦᠷᠦ ᠶᠢᠨ ᠲᠦᠪ ᠨᠢ ᠪᠠᠶᠢᠵᠤ᠂ ᠦᠭᠡᠳᠡᠢ ᠬᠠᠭᠠᠨ ᠤ ᠦᠶ᠎ᠡ ᠶᠢᠨ ᠪᠠᠶᠢᠭᠤᠯᠤᠭᠰᠠᠨ ᠬᠤᠳᠠ ᠰᠠᠭᠤᠷᠢᠨ ᠨᠢ ᠪᠦᠷᠢᠨ ᠡᠪᠳᠡᠭᠳᠡᠭᠡᠳᠦᠢ ᠪᠠᠶᠢᠵᠠᠢ᠃      ᠳᠡᠭᠡᠪᠡᠴᠦ ᠰᠠᠶᠢᠨ ᠤᠴᠢᠷ ᠤᠳᠠᠭᠠᠨ ᠪᠠᠶᠢᠵᠤ ᠳᠡᠶᠢᠯᠦᠭᠰᠡᠨ ᠦᠭᠡᠢ᠃ ᠳᠤᠭᠤᠨ ᠳᠠᠶᠢᠱᠢ ᠶᠢᠨ ᠳᠠᠯᠪᠢᠭᠰᠠᠨ ᠮᠠᠨᠤᠤᠯ ᠬᠠᠭᠠᠨ ᠨᠢ ᠳᠡᠶᠢᠮᠦ ᠴᠦ ᠳᠤᠭᠤᠨ ᠳᠠᠶᠢᠱᠢ ᠶᠢᠨ ᠰᠠᠨᠠᠯ ᠢᠶᠠᠷ ᠪᠤᠯᠤᠭᠰᠠᠨ ᠦᠭᠡᠢ᠃ ᠳᠤᠭᠤᠨ ᠲᠠᠶᠢᠱᠢ ᠮᠤᠩᠭᠤᠯ ᠢ ᠨᠢᠭᠡᠳᠭᠡᠬᠦ ᠳᠤ ᠳᠠᠭᠤᠨ ᠦᠭᠡᠢ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠡᠰᠡᠨ ᠤ ᠦᠶ᠎ᠡ ᠳᠤ ᠬᠦᠷᠴᠦ ᠢᠷᠡᠭᠡᠳ ᠦᠭᠡ ᠰᠤᠨᠤᠰᠬᠤ ᠦᠭᠡᠢ ᠪᠤᠯᠪᠠ᠃ ᠨᠡᠩ ᠴᠦ ᠬᠠᠭᠠᠨ ᠤ ᠵᠠᠯᠭᠠᠮᠵᠢᠯᠠᠭᠴᠢ ᠶᠢ ᠪᠠᠶᠢᠭᠤᠯᠬᠤ ᠶᠠᠪᠤᠳᠠᠯ ᠳᠡᠭᠡᠷ᠎ᠡ ᠮᠤᠩᠭᠤᠯ ᠤᠢᠢᠷᠠᠳ ᠴᠦ ᠦᠪᠡᠷ ᠦᠪᠡᠷ ᠤᠨ ᠲᠦᠯᠦᠭᠡᠨ ᠤ ᠬᠦᠮᠦᠰ ᠢᠶᠠᠨ ᠭᠠᠷᠭᠠᠬᠤ ᠭᠡᠵᠤ ᠲᠡᠮᠡᠴᠡᠯᠳᠦᠵᠤ ᠢᠷᠡᠪᠡ᠃ ᠮᠤᠩᠭᠤᠯ ᠤᠨ ᠨᠢᠭᠡ ᠪᠦᠯᠦᠭ ᠨᠤᠶᠠᠳ ᠤᠳ ᠴᠢᠭᠤᠯᠭᠠᠨ ᠬᠤᠷᠠᠬᠤ ᠪᠠᠷ ᠳᠠᠮᠵᠢᠭᠤᠯᠵᠤ ᠤᠢᠢᠷᠠᠳ ᠤᠨ ᠨᠤᠶᠠᠳ ᠢᠵᠠᠭᠤᠷᠳᠠᠨ ᠢ ᠬᠢᠳᠤᠵᠤ᠂ ᠦᠪᠡᠷ ᠤᠨ ᠲᠦᠯᠦᠭᠡᠨ ᠤ ᠬᠦᠮᠦᠨ ᠢᠶᠠᠨ ᠭᠠᠷᠭᠠᠬᠤ ᠶᠢ ᠰᠡᠳᠦᠬᠦ ᠳᠤ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠤᠢᠢᠷᠠᠳ ᠤᠨ ᠳᠠᠯᠪᠢᠭᠰᠠᠨ ᠮᠠᠨᠤᠤᠯ ᠬᠠᠭᠠᠨ ᠴᠦ ᠵᠦᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ ᠳᠡᠭᠡᠵᠤ ᠴᠦ ᠪᠤᠯᠬᠤ ᠦᠭᠡᠢ ᠪᠠᠶᠢᠵᠠᠢ᠃ ᠳᠡᠭᠡᠪᠡᠴᠦ ᠮᠠᠨᠤᠤᠯ ᠬᠠᠭᠠᠨ ᠳᠤᠭᠳᠤᠪᠤᠬ᠎ᠠ ᠪᠠ ᠳᠡᠭᠦᠦ ᠠᠭᠪᠠᠷᠵᠢᠨ ᠵᠢᠨᠤᠩ ᠤᠨ ᠵᠦᠷᠢᠴᠡᠯ ᠭᠠᠷᠴᠦ ᠢᠷᠡᠪᠡ᠃ ᠡᠨᠡ ᠨᠢ ᠡᠰᠡᠨ ᠳᠠᠶᠢᠱᠢ ᠶᠢᠨ ᠭᠠᠷᠭᠠᠭᠰᠠᠨ ᠤᠬᠠᠭᠠᠨ ᠴᠦ ᠪᠤᠯᠪᠠ ᠤᠤ᠃      ᠳᠤᠭᠳᠤᠪᠤᠬ᠎ᠠ ᠬᠠᠭᠠᠨ ᠳᠤ ᠳᠤᠭᠤᠨ ᠳᠠᠶᠢᠱᠢ ᠦᠪᠡᠷ ᠤᠨ ᠦᠬᠢᠨ ᠢᠶᠠᠨ ᠦᠭᠭᠦᠭᠰᠡᠨ ᠴᠦ ᠪᠦᠷᠢᠨ ᠢᠳᠡᠭᠡᠭᠰᠡᠨ ᠪᠢᠰᠢ ᠪᠤᠯᠤᠯᠳᠠᠢ᠃ ᠡᠰᠡᠨ ᠳᠠᠶᠢᠱᠢ ᠶᠢᠨ ᠦᠶ᠎ᠡ ᠳᠤ ᠳᠡᠭᠦᠨ ᠤ ᠳᠡᠭᠦᠦ ᠶᠢ ᠳᠡᠮᠵᠢᠵᠤ ᠬᠠᠭᠠᠨ ᠪᠤᠯᠭᠠᠬᠤ ᠭᠡᠳ ᠳᠤᠭᠳᠤᠪᠤᠬ᠎ᠠ ᠬᠠᠭᠠᠨ ᠢ ᠭᠠᠳᠠᠭᠤᠷᠴᠢᠯᠠᠵᠤ ᠡᠬᠢᠯᠡᠵᠡᠢ᠃ ᠠᠭᠪᠠᠷᠵᠢᠨ ᠵᠢᠨᠤᠩ ᠭᠡᠭᠴᠢ ᠠᠬ᠎ᠠ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠳᠡᠶᠢᠮᠦ ᠴᠦ ᠳᠠᠷᠢᠬᠢ ᠳᠤᠯᠤᠭᠠᠢ ᠦᠭᠡᠢ᠂ ᠶᠠᠭ ᠯᠡ ᠮᠠᠨᠵᠤ ᠶᠢᠨ ᠰᠡᠭᠦᠯ ᠤᠨ ᠬᠠᠭᠠᠨ ᠹᠦ᠋ ᠢ ᠰᠢᠭ ᠪᠠᠶᠢᠵᠤ᠂ ᠬᠠᠭᠠᠨ ᠰᠠᠭᠤᠪᠠᠯ ᠬᠠᠮᠤᠭ ᠢᠶᠠᠨ ᠤᠭᠤᠷᠴᠢᠬᠠᠮᠠᠷ ᠪᠠᠶᠢᠵᠤ᠂ ᠤᠢᠢᠷᠠᠳ ᠬᠦᠮᠦᠰ ︽ᠮᠠᠨ ᠤ ᠵᠢᠨᠤᠩ ᠮᠠᠭᠠᠳ ᠵᠢᠨᠤᠩ ᠪᠢᠰᠢ᠂ ᠮᠠᠷᠠᠯ ᠡᠯᠵᠢᠭᠡᠨ ᠪᠠᠶᠢᠭᠰᠠᠨ ᠠᠵᠤᠭᠤ᠃︾ ᠬᠡᠮᠡᠨ ᠡᠯᠡᠭᠯᠡᠵᠤ ᠪᠠᠶᠢᠭᠰᠠᠨ ᠠᠵᠢ᠃ ᠡᠨᠡ ᠡᠯᠵᠢᠭᠡᠨ ᠵᠢᠨᠤᠩ ᠨᠢ ᠦᠨᠡᠭᠡᠷ ᠬᠠᠭᠠᠨ ᠪᠤᠯᠬᠤ ᠭᠡᠵᠤ ᠬᠠᠮᠤᠭ ᠮᠤᠩᠭᠤᠯ ᠬᠠᠳ ᠢᠵᠠᠭᠤᠷᠳᠠᠨ᠂ ᠨᠤᠶᠠᠳ ᠤᠳᠤᠭᠠᠳᠠᠳ ᠪᠦᠬᠦᠨ ᠢᠶᠠᠷ ᠢᠶᠠᠨ ᠠᠯᠠᠭᠳᠠᠵᠤ ᠬᠢᠳᠤᠭᠳᠠᠭᠠᠳ ᠮᠤᠩᠭᠤᠯ ᠢ ᠦᠨᠡᠭᠡᠷ ᠴᠡᠪᠡᠷ ᠠᠷᠢᠭᠤᠨ ᠪᠤᠯᠭᠠᠬᠤ ᠠᠶᠠᠳᠠᠵᠠᠢ᠃ ᠡᠰᠡᠨ ᠳᠠᠶᠢᠱᠢ ᠶᠢᠨ ᠡᠨᠡ ᠤᠳᠠᠭᠠᠨ ᠤ ᠬᠢᠳᠤᠯᠭ᠎ᠠ ᠨᠢ ᠦᠨᠡᠭᠡᠷ ᠠᠯᠤᠰ ᠬᠤᠯᠠ ᠶᠢᠨ ᠤᠴᠢᠷ ᠤᠳᠬ᠎ᠠ ᠲᠠᠢ ᠪᠤᠯᠵᠤ᠂ ᠮᠤᠩᠭᠤᠯ ᠤᠨ ᠬᠠᠳ ᠢᠵᠠᠭᠤᠷᠳᠠᠳ ᠪᠠᠷᠤᠭ ᠨᠢ ᠪᠦᠷ ᠬᠢᠳᠤᠭᠳᠠᠵᠤ ᠠᠯᠠᠭᠳᠠᠭᠠᠳ᠂ ᠨᠢᠭᠡ ᠦᠶ᠎ᠡ ᠳᠡᠦᠭᠡᠨ ᠳᠤ ᠦᠶ᠎ᠡ ᠢᠵᠠᠭᠤᠷ ᠢᠶᠠᠨ ᠴᠦ ᠡᠷᠢᠵᠤ ᠤᠯᠬᠤ ᠦᠭᠡᠢ ᠪᠤᠯᠵᠤ ᠪᠠᠶᠢᠵᠤᠬᠤᠢ᠃ ᠳᠡᠷᠡ ᠦᠶ᠎ᠡ ᠶᠢᠨ ᠶᠠᠪᠤᠳᠠᠯ ᠠᠴᠠ ᠪᠤᠯᠵᠤ ᠮᠤᠩᠭᠤᠯ ᠤᠨ ᠬᠠᠭᠠᠳ ᠢᠵᠠᠭᠤᠷᠳᠠᠳ ᠤᠨ ᠦᠶ᠎ᠡ ᠢᠵᠠᠭᠤᠷ ᠪᠠᠯᠠᠷᠬᠠᠢ ᠪᠤᠯᠵᠤ᠂ ᠬᠤᠵᠢᠮ ᠤᠨ ᠳᠡᠦᠭᠡ ᠤᠭᠰᠠᠭ᠎ᠠ ᠨᠢ ᠴᠦ ᠬᠡᠳᠦᠨ ᠦᠶ᠎ᠡ ᠳᠠᠰᠤᠷᠠᠭᠰᠠᠨ ᠪᠠᠶᠢᠨ᠎ᠠ᠃      ᠵᠡᠭᠦᠨ ᠮᠤᠩᠭᠤᠯ ᠤᠨ ᠬᠡᠳᠦᠨ ᠲᠦᠮᠡᠨ ᠨᠢ ᠬᠠᠳ ᠨᠤᠶᠠᠳ ᠢᠶᠠᠨ ᠠᠯᠠᠭᠳᠠᠭᠤᠯᠤᠭᠠᠳ᠂ ᠡᠰᠡᠨ ᠳᠠᠶᠢᠱᠢ ᠳᠤ ᠤᠯᠠᠩᠭᠢ ᠨᠢ ᠤᠢᠢᠷᠠᠳ ᠬᠦᠮᠦᠰ ᠤᠷᠤᠨ ᠪᠠᠶᠢᠷᠢ ᠶᠢ ᠨᠢ ᠠᠪᠴᠤ ᠪᠠᠶᠢᠵᠤᠬᠤᠢ᠃ ᠤᠳᠤ ᠶᠢᠨ ᠬᠠᠷᠠᠴᠢᠨ ᠠᠶᠢᠮᠠᠭ᠂ ᠤᠡᠭᠨᠢᠭᠤᠳ ᠵᠡᠷᠭᠡ ᠠᠶᠢᠮᠠᠭ ᠤᠨ ᠬᠤᠪᠢᠷᠠᠯ ᠨᠢ ᠳᠡᠷᠡ ᠦᠶ᠎ᠡ ᠶᠢᠨ ᠬᠢᠳᠤᠯᠭ᠎ᠠ ᠲᠠᠢ ᠬᠠᠮᠢᠶᠠᠷᠤᠯᠳᠠᠢ ᠪᠦᠯᠦᠭᠡ᠃ ᠮᠤᠩᠭᠤᠯ ᠤᠨ ᠳᠠᠶᠠᠨ ᠬᠠᠭᠠᠨ ᠤ ᠡᠴᠢᠭᠡ ᠨᠢ ᠴᠦ ᠬᠠᠭᠠᠰ ᠤᠢᠢᠷᠠᠳ ᠴᠢᠰᠤ ᠲᠠᠢ᠂ ᠳᠠᠶᠠᠨ ᠬᠠᠭᠠᠨ ᠨᠢ ᠲᠦᠷᠪᠡᠨ ᠤ ᠨᠢᠭᠡ ᠶᠢᠨ ᠤᠢᠢᠷᠠᠳ ᠴᠢᠰᠤ ᠲᠠᠢ ᠪᠠᠶᠢᠵᠤᠬᠤᠢ᠃      ᠡᠰᠡᠨ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠵᠡᠭᠦᠨ ᠮᠤᠩᠭᠤᠯ ᠪᠠ ᠤᠷᠢᠶᠠᠩᠬᠠᠢ ᠶᠢᠨ ᠭᠤᠷᠪᠠᠨ ᠬᠠᠷᠠᠭᠤᠯ᠂ ᠮᠤᠩᠭᠤᠯ ᠤᠨ ᠡᠯ᠎ᠡ ᠠᠶᠢᠮᠠᠭ ᠨᠢ ᠪᠦᠷ ᠯᠡ ᠡᠰᠡᠨ ᠬᠠᠭᠠᠨ ᠤ ᠳᠠᠭᠠᠭᠤᠯᠤᠭᠰᠠᠨ ᠤᠢᠢᠷᠠᠳ ᠬᠦᠮᠦᠰ ᠤᠨ ᠵᠢᠯᠤᠭᠤᠨ ᠳᠤ ᠬᠤᠷᠢᠶᠠᠭᠳᠠᠵᠤ᠂ ᠡᠰᠡᠷᠭᠦᠴᠡᠭᠰᠡᠨ ᠬᠦᠮᠦᠰ ᠨᠢ ᠪᠦᠷ ᠯᠡ ᠮᠦᠬᠦᠭᠡᠭᠳᠡᠵᠤ᠂ ᠮᠤᠩᠭᠤᠯ ᠤᠨ ᠬᠠᠭᠠᠨ ᠤᠭᠰᠠᠭ᠎ᠠ ᠳᠤ ᠶᠡᠭᠡ ᠳᠠᠷᠤᠯᠳᠠ ᠦᠵᠡᠭᠦᠯᠵᠤ ᠪᠠᠶᠢᠵᠠᠢ᠃ ᠬᠤᠵᠢᠮ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠮᠤᠩᠭᠤᠯ ᠤᠨ ᠡᠯ᠎ᠡ ᠠᠶᠢᠮᠠᠭ ᠤᠨ ᠬᠠᠳ ᠨᠤᠶᠠᠳ ᠤᠨ ᠳᠡᠭᠡᠭᠰᠢ ᠮᠡᠳᠡᠭᠦᠯᠦᠭᠰᠡᠨ ᠦᠶ᠎ᠡ ᠵᠠᠯᠭᠠᠮᠵᠢ ᠨᠢ ᠪᠦᠷ ᠯᠡ ᠳᠠᠰᠤᠷᠬᠠᠢ ᠪᠠᠯᠠᠷᠬᠠᠢ᠂ ᠡ᠊ᠨᠳᠡ ᠳᠡᠨᠳᠡ ᠪᠢᠴᠢᠭᠳᠡᠵᠤ ᠪᠠᠶᠢᠵᠠᠢ᠃ ᠮᠤᠩᠭᠤᠯ ᠤᠨ ᠬᠠᠳ ᠨᠢ ᠴᠦ ᠳᠤᠭᠤᠨ ᠡᠰᠡᠨ ᠠᠪᠤ ᠬᠦᠦ ᠬᠤᠶᠠᠷ ᠤᠨ ᠭᠠᠷ ᠲᠤ ᠨᠠᠭᠠᠳᠤᠮ ᠳᠡᠳᠦᠢ ᠶᠠᠭᠤᠮ᠎ᠠ ᠪᠤᠯᠵᠤ ᠪᠠᠶᠢᠵᠠᠢ᠃ ᠮᠤᠩᠭᠤᠯ ᠤᠨ ᠵᠡᠭᠦᠨ ᠠᠶᠢᠮᠠᠭ ᠳᠤᠳᠤᠷᠠᠬᠢ ᠴᠠᠭᠠᠨ ᠲᠦᠮᠡᠨ ᠪᠠ ᠬᠠᠷᠠᠴᠢᠨ ᠲᠦᠮᠡᠨ ᠤ ᠨᠤᠶᠠᠳ ᠨᠢ ᠡᠰᠡᠨ ᠳᠠᠶᠢᠱᠢ ᠶᠢᠨ ᠳᠠᠯᠪᠢᠭᠰᠠᠨ ᠤᠢᠢᠷᠠᠳ ᠬᠦᠮᠦᠰ ᠴᠦ ᠪᠤᠯᠤᠭᠰᠠᠨ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠡᠭᠦᠨ ᠢ ᠳᠡᠦᠭᠡᠴᠢᠳ ᠬᠤᠵᠢᠮ ᠰᠤᠳᠤᠯᠤᠨ ᠮᠡᠳᠡᠬᠦ ᠪᠢᠵᠡ ᠡ᠃ ᠮᠤᠩᠭᠤᠯ ᠤᠨ ᠬᠠᠭᠠᠳ ᠤᠨ ᠤᠳᠤᠮ ᠴᠦ ᠪᠦᠷ ᠯᠡ ᠤᠢᠢᠷᠠᠳ ᠤᠳᠤᠮ ᠲᠠᠢ ᠪᠤᠯᠴᠢᠬᠠᠭᠰᠠᠨ ᠴᠦ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠮᠠᠨᠵᠤ ᠶᠢᠨ ᠨᠤᠷᠬᠠᠴᠢ ᠶᠢᠨ ᠳᠡᠭᠡᠳᠦᠰ ᠨᠢ ᠴᠦ ᠤᠢᠢᠷᠠᠳ ᠬᠦᠮᠦᠰ ᠮᠠᠭᠠᠳ᠃      ᠡᠭᠦᠨ ᠳᠤ ᠡᠯᠪᠡᠭ ᠬᠠᠭᠠᠨ ᠤ ᠶᠡᠭᠡ ᠦᠬᠢᠨ ᠰᠠᠮᠤᠷ ᠬᠦᠡᠭᠵᠤ ᠪᠠᠰᠠ ᠪᠠᠭ᠎ᠠ ᠪᠤᠰᠤ ᠡᠭᠦᠷᠭᠡ ᠬᠦᠢᠴᠡᠳᠭᠡᠵᠡᠢ᠃ ᠨᠢᠭᠡ ᠦᠶ᠎ᠡ ᠮᠤᠩᠭᠤᠯ ᠳᠤ ᠤᠴᠢᠵᠤ ᠦᠪᠡᠷ ᠤᠨ ᠬᠦᠪᠡᠭᠦᠨ ᠳᠤᠭᠤᠨ ᠢᠶᠠᠨ ᠠᠪᠤᠷᠠᠵᠤ ᠪᠠᠶᠢᠭᠰᠠᠨ ᠴᠦ ᠰᠡᠭᠦᠯᠡᠷ ᠨᠢ ᠮᠤᠩᠭᠤᠯ ᠤᠨ ᠬᠠᠭᠠᠳ ᠤᠨ ᠦᠷᠡᠰ ᠢ ᠠᠪᠤᠷᠠᠨ ᠦᠯᠡᠳᠡᠭᠡᠬᠦ ᠳᠤ ᠶᠡᠭᠡ ᠦᠢᠯᠡᠳᠦᠯ ᠦᠵᠡᠭᠦᠯᠵᠡᠢ᠃ ᠶᠠᠭ ᠯᠡ ᠵᠠᠩᠭᠠᠷ ᠤᠨ ᠳᠤᠤᠯᠢ ᠳᠤᠳᠤᠷ᠎ᠠ ᠪᠠᠶᠢᠭᠰᠠᠨ᠂ ᠵᠠᠩᠭᠠᠷ ᠤᠨ ᠳᠡᠭᠡᠭᠦᠷ ᠡᠰᠡᠨ ᠬᠠᠭᠠᠨ ᠴᠦ ᠵᠡᠭᠦᠨ ᠮᠤᠩᠭᠤᠯ ᠤᠨ ᠬᠤᠷᠴᠢᠨ ᠠᠶᠢᠮᠠᠭ ᠢ ᠢᠯᠡᠭᠦᠦ ᠳᠤ ᠦᠵᠡᠵᠤ ᠨᠢᠭᠡ ᠪᠦᠯᠦᠭ ᠢ ᠨᠢ ᠰᠠᠯᠭᠠᠵᠤ ᠠᠪᠤᠭᠠᠳ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠪᠦᠷᠢᠯᠳᠦᠭᠦᠨ ᠳᠤ ᠤᠷᠤᠭᠤᠯᠵᠤ᠂ ᠬᠤᠱᠤᠳ ᠬᠡᠮᠡᠨ ᠨᠡᠷᠡᠯᠡᠭᠰᠡᠨ ᠰᠢᠭ ᠃ ᠳᠡᠷᠡ ᠦᠶ᠎ᠡ ᠳᠤ ᠠᠯᠢ ᠠᠶᠢᠮᠠᠭ ᠨᠢ ᠬᠤᠷᠴᠢᠨ ᠲᠠᠢ ᠬᠤᠯᠪᠤᠭᠠᠯᠠᠪᠠᠯ ᠳᠡᠷᠡ ᠠᠶᠢᠮᠠᠭ ᠨᠢ ᠢᠯᠠᠵᠤ ᠪᠠᠶᠢᠵᠠᠢ᠃ ᠵᠠᠩᠭᠠᠷ ᠤᠨ ᠳᠤᠳᠤᠷᠠᠬᠢ ᠬᠤᠨᠭ᠍ᠭᠤᠷ ᠪᠤᠯᠪᠠᠰᠤ ᠬᠤᠷᠴᠢᠨ ᠬᠦᠮᠦᠰ ᠤᠨ ᠲᠦᠯᠦᠭᠡᠯᠡᠬᠦ ᠲᠦᠷᠢ ᠭᠡᠳᠡᠭ᠃ ᠡᠰᠡᠨ ᠬᠠᠭᠠᠨ ᠤ ᠬᠡᠦᠭᠡᠨ ᠪᠤᠯᠬᠤ ᠴᠡᠴᠡᠭ ᠬᠠᠳᠤᠨ ᠤ ᠬᠡᠪᠡᠯᠢ ᠳᠤ ᠨᠢᠭᠤᠵᠤ ᠦᠯᠡᠳᠡᠭᠰᠡᠨ ᠮᠤᠩᠭᠤᠯ ᠤᠨ ᠬᠠᠭᠠᠨ ᠤ ᠦᠷᠡᠳᠦᠰ ᠠᠴᠠ ᠪᠤᠯᠵᠤ ᠳᠠᠶᠠᠨ ᠬᠠᠭᠠᠨ ᠤ ᠦᠷᠡᠳᠦᠰ ᠤᠯᠠᠷᠢᠵᠠᠢ᠃ ᠡᠨᠡ ᠪᠤᠯ ᠳᠡᠦᠭᠡ ᠶᠢᠨ ᠦᠨᠡᠨ ᠶᠠᠪᠤᠳᠠᠯ ᠶᠤᠮ᠃      ᠤᠢᠢᠷᠠᠳ ᠤᠨ ᠡᠰᠡᠨ ᠬᠠᠭᠠᠨ ᠪᠤᠯᠤᠭᠠᠳ ᠨᠢᠭᠡ ᠵᠢᠯ ᠬᠠᠭᠠᠨ ᠰᠠᠭᠤᠭᠠᠳ ᠳᠤᠳᠤᠷ᠎ᠠ ᠵᠠᠭᠤᠷ᠎ᠠ ᠶᠢᠨ ᠳᠡᠮᠡᠴᠡᠯ ᠠᠴᠠ ᠪᠤᠯᠵᠤ ᠠᠯᠠᠭᠳᠠᠵᠠᠢ᠃ ᠡᠨᠡ ᠨᠢ ᠤᠢᠢᠷᠠᠳ ᠬᠦᠮᠦᠰ ᠤᠨ ᠪᠠᠭᠤᠷᠠᠢ ᠳᠠᠯ᠎ᠠ ᠶᠤᠮ᠃ ᠠᠮᠵᠢᠯᠳᠠ ᠶᠢᠨ ᠳᠡᠭᠡᠳᠦ ᠳᠤ ᠬᠦᠷᠦᠭᠰᠡᠨ ᠦᠶ᠎ᠡ ᠳᠤ ᠳᠤᠳᠤᠭᠠᠳᠤ ᠶᠢᠨ ᠵᠢᠭᠤᠷᠠᠭᠠᠨ ᠨᠢ ᠤᠷᠬᠢᠯ ᠳᠤ ᠪᠠᠨ ᠬᠦᠷᠳᠡᠭ᠃ ᠡᠨᠡ ᠬᠦ ᠳᠡᠦᠭᠡᠨ ᠯᠤᠬᠢᠭ ᠨᠢ ᠤᠢᠢᠷᠠᠳ ᠬᠦᠮᠦᠰ ᠤᠨ ᠳᠡᠦᠭᠡᠨ ᠳᠤ ᠤᠯᠠᠨ ᠤᠳᠠᠭ᠎ᠠ ᠢᠯᠡᠷᠡᠵᠤ᠂ ᠶᠠᠭ ᠯᠡ ᠨᠢᠭᠡ ᠵᠢᠮ᠎ᠡ ᠶᠤᠰᠤ ᠪᠤᠯᠤᠭᠰᠠᠨ ᠶᠤᠮ ᠰᠢᠭ᠋᠃ ᠬᠤᠵᠢᠮ ᠤᠨ ᠭᠠᠯᠳᠠᠨ ᠪᠤᠱᠤᠭᠠᠳᠤ ᠶᠢᠨ ᠦᠬᠦᠯ᠂ ᠵᠡᠭᠦᠨᠭᠠᠷ ᠬᠠᠭᠠᠨᠳᠤ ᠤᠯᠤᠰ ᠤᠨ ᠮᠦᠭᠦᠯ ᠨᠢ ᠪᠦᠷ ᠯᠡ ᠪᠠᠭᠤᠷᠠᠯ ᠤᠨ ᠦᠶ᠎ᠡ ᠳᠤ ᠪᠠᠶᠢᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠪᠦᠷ ᠯᠡ ᠠᠮᠵᠢᠯᠳᠠ ᠶᠢᠨ ᠤᠷᠬᠢᠯ ᠠᠴᠠ ᠮᠦᠬᠦᠯ ᠳᠤ ᠬᠦᠷᠦᠭᠰᠡᠨ ᠶᠤᠮ᠃ ᠮᠤᠩᠭᠤᠯ ᠳᠠᠶᠢᠴᠢᠳ ᠤᠨ ᠨᠡᠷ᠎ᠡ ᠠᠯᠳᠠᠷ ᠤᠨ ᠤᠷᠬᠢᠯ ᠨᠢ ᠢᠷᠠᠭᠤ ᠠᠯᠳᠠᠷᠳᠠᠢ ᠪᠠᠷ ᠪᠡᠶ᠎ᠡ ᠪᠠᠷᠠᠬᠤ ᠳᠤ ᠯᠡ ᠪᠠᠶᠢᠳᠠᠭ ᠭᠡᠰᠡᠨ ᠴᠢᠩᠭᠢᠰ ᠤᠨ ᠰᠤᠷᠭᠠᠯ ᠤᠨ ᠪᠡᠶᠡᠯᠡᠯ ᠪᠠᠶᠢᠭᠰᠠᠨ ᠪᠤᠯᠪᠠ ᠤᠤ ᠳ᠋ᠠ᠃      ᠤᠢᠢᠷᠠᠳ ᠤᠨ ᠡᠰᠡᠨ ᠬᠠᠭᠠᠨ ᠳᠤᠳᠤᠭᠠᠳᠤ ᠵᠠᠭᠤᠷ᠎ᠠ ᠶᠢᠨ ᠳᠡᠮᠡᠴᠡᠭᠡᠨ ᠠᠴᠠ ᠪᠤᠯᠵᠤ ᠠᠯᠠᠭᠳᠠᠭᠰᠠᠨ ᠤ ᠰᠡᠭᠦᠯᠡᠷ ᠤᠢᠢᠷᠠᠳ ᠬᠤᠭᠤᠷᠤᠨᠳᠤ ᠪᠠᠨ ᠡᠷᠭᠡ ᠪᠠ ᠪᠠᠶᠢᠷᠢ ᠰᠠᠭᠤᠷᠢ ᠶᠢᠨ ᠳᠡᠮᠡᠴᠡᠯᠳᠦᠭᠡᠨ ᠪᠤᠯᠵᠤ ᠪᠠᠶᠢᠬᠤ ᠳᠤ ᠡᠰᠡᠨ ᠤ ᠡᠮᠡᠭᠡ ᠪᠤᠯᠬᠤ ᠰᠠᠮᠤᠷ ᠳᠠᠶᠢᠬᠡᠦ ᠠᠴᠠ ᠮᠤᠩᠭᠤᠯ ᠤᠨ ᠬᠠᠭᠠᠨ ᠤ ᠦᠷᠡᠳᠡᠰ ᠪᠤᠯᠬᠤ ᠵᠢᠨᠤᠩ ᠳᠠᠶᠠᠨ ᠬᠠᠭᠠᠨ ᠤ ᠡᠴᠢᠭᠡ ᠪᠠᠳᠤᠮᠦ᠋ᠡᠭᠭᠡ ᠶᠢ ᠳᠠᠯᠪᠢᠨ ᠶᠠᠪᠤᠭᠤᠯᠵᠠᠢ᠃ ᠪᠠᠳᠤᠮᠦ᠋ᠡᠭᠭᠡ ᠳᠠᠶᠠᠨ ᠬᠠᠭᠠᠨ ᠢ ᠳᠤᠯᠤᠭᠠᠨ ᠨᠠᠰᠤᠳᠠᠢ ᠪᠠᠶᠢᠬᠤ ᠦᠶ᠎ᠡ ᠳᠤ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠮᠤᠩᠭᠤᠯ ᠤᠨ ᠲᠦᠷᠦ ᠶᠢᠨ ᠡᠷᠭᠡ ᠶᠢ ᠭᠠᠷ ᠲᠤ ᠪᠠᠨ ᠪᠠᠷᠢᠵᠤ ᠪᠠᠶᠢᠭᠰᠠᠨ ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠳᠤᠨ ᠠᠴᠠ ᠡᠨᠡ ᠬᠦ ᠨᠢᠯᠬ᠎ᠠ ᠢᠵᠠᠭᠤᠷᠳᠠᠨ ᠤ ᠦᠨ᠎ᠡ ᠴᠡᠨ᠎ᠡ ᠶᠢ ᠤᠯᠤᠰ ᠲᠦᠷᠦᠴᠢᠨ ᠤ ᠨᠢᠳᠦ ᠪᠠᠷ ᠦᠵᠡᠵᠤ ᠭᠠᠷᠤᠭᠠᠳ ᠦᠪᠡᠷ ᠤᠨ ᠪᠡᠶ᠎ᠡ ᠲᠠᠢ ᠪᠠᠨ ᠵᠠᠯᠭᠠᠭᠤᠯᠵᠤ ᠳᠤᠯᠤᠭᠠᠨ ᠬᠦᠪᠡᠭᠦᠨ ᠲᠦᠷᠦᠵᠤ ᠦᠭᠭᠦᠭᠰᠡᠨ ᠪᠠᠶᠢᠨ᠎ᠠ᠃ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠳᠤᠨ ᠠᠴᠠ ᠬᠤᠷᠴᠢᠨ ᠠᠶᠢᠮᠠᠭ ᠤᠨ ᠬᠢᠨ ᠲᠠᠢ ᠬᠤᠯᠪᠤᠭᠠᠯᠠᠵᠤ ᠪᠠᠶᠢᠭᠠᠳ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠬᠢᠨ ᠢ ᠳᠠᠶᠢᠯᠵᠤ᠂ ᠭᠤᠷᠪᠠᠨ ᠶᠤᠰᠤ ᠳᠤᠭᠳᠠᠭᠠᠵᠤ ᠦᠭᠭᠦᠭᠡᠳ᠂ ᠮᠤᠩᠭᠤᠯ ᠤᠨ ᠬᠠᠭᠠᠨ ᠰᠠᠭᠤᠷᠢᠨ ᠢ ᠪᠤᠯᠢᠶᠠᠵᠤ ᠦᠭᠴᠡᠢ᠃      ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠳᠤᠨ ᠤ ᠳᠠᠩᠭᠠᠷᠢᠭ ᠤᠨ ᠦᠭᠡᠰ ᠲᠤ ᠮᠠᠳᠠᠭ ᠲᠠᠢ ᠵᠦᠢᠯᠡᠰ ᠤᠯᠠᠨ ᠪᠤᠢ᠃ ︽ᠢᠴᠢᠬᠦ ᠨᠢᠭᠤᠷ ᠢᠶᠠᠨ ᠬᠠᠯᠬᠠᠯᠠᠵᠤ ᠁︾ ᠭᠡᠳᠡᠭ ᠨᠢ ᠶᠠᠭᠤ ᠭᠡᠰᠡᠨ ᠦᠬᠡ ᠪᠤᠢ︖ ︽ᠨᠠᠳᠠ ᠶᠢ ᠤᠷᠭᠠᠯᠠᠵᠤ ᠠᠪ ᠁︾ ᠭᠡᠳᠡᠭ ᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠤᠢ︖ ᠶᠠᠭᠤᠨ ᠳᠤ ᠪᠦᠷᠳᠡᠭᠡᠯᠵᠢᠨ ᠰᠡᠴᠡᠨ ᠬᠠᠳᠤᠨ ᠤ ᠳᠠᠬᠢᠯᠭ᠎ᠠ ᠶᠢᠨ ᠤᠷᠳᠤᠨ ᠳᠤ ᠤᠴᠢᠵᠤ ᠳᠠᠩᠭᠠᠷᠢᠭ ᠬᠢᠳᠡᠭ ᠪᠤᠢ︖ ᠶᠠᠭᠤᠨ ᠳᠤ ᠬᠤᠷᠴᠢᠨ ᠤ ᠦᠨᠡᠨᠪᠤᠯᠤᠳ ᠢ ᠴᠤᠭ ᠲᠤ ᠪᠠᠨ ᠠᠪᠠᠴᠢᠵᠤ ᠳᠠᠩᠭᠠᠷᠢᠭ ᠬᠢᠭᠰᠡᠨ ᠪᠤᠢ︖ ᠶᠠᠭᠤᠨ ᠳᠤ ᠬᠦᠦ ᠳᠤ ᠪᠠᠨ ᠪᠦᠷ ︽᠁ ᠪᠤᠯᠤᠳ︾ ᠨᠡᠷ᠎ᠡ ᠦᠭᠳᠡᠭ ᠪᠤᠢ︖ ᠦᠨᠡᠨᠪᠤᠯᠤᠳ ᠸᠠᠩ ᠶᠠᠭᠠᠬᠢᠭᠠᠳ ︽ᠤᠬᠢᠯᠠᠨ ᠭᠠᠷᠴᠤ ᠶᠠᠪᠤᠭᠰᠠᠨ︾ ᠪᠤᠢ︖ ᠨᠢᠭᠡ ᠪᠦᠯᠦᠭ ᠳᠡᠦᠭᠡ ᠶᠢᠨ ᠮᠠᠳᠠᠭ ᠲᠠᠢ ᠶᠠᠪᠤᠳᠠᠯ ᠬᠤᠵᠢᠮ ᠢᠯᠭᠠᠷᠠᠬᠤ ᠯᠡ ᠪᠢᠵᠡ᠃      ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠳᠤᠨ ᠠᠴᠠ ᠬᠤᠷᠴᠢᠨ ᠠᠶᠢᠮᠠᠭ ᠤᠨ ᠬᠢᠨ ᠲᠠᠢ ᠬᠤᠯᠪᠤᠭᠠᠯᠠᠵᠤ ᠪᠠᠶᠢᠭᠠᠳ ᠤᠢᠢᠷᠠᠳ ᠢ ᠨᠢᠭᠡ ᠤᠳᠠᠭ᠎ᠠ ᠳᠡᠶᠢᠯᠦᠭᠰᠡᠨ ᠪᠤᠯᠪᠠᠴᠤ᠂ ᠳᠠᠷᠠᠭᠠᠴᠢ ᠪᠠᠷ ᠨᠢ ᠤᠢᠢᠷᠠᠳ ᠤᠳ ᠬᠦᠴᠦᠨ ᠢᠶᠠᠨ ᠵᠠᠰᠠᠵᠤ ᠪᠠᠶᠢᠭᠠᠳ ᠬᠡᠳᠡᠷᠬᠦᠦ ᠳᠠᠭᠠᠷᠢᠭᠰᠠᠨ ᠳᠤ ᠳᠡᠶᠢᠯᠦᠭᠳᠡᠵᠤ ᠳᠠᠶᠠᠨ ᠬᠠᠭᠠᠨ ᠤ ᠦᠷᠭᠦᠭᠡ ᠨᠢ ᠠᠷᠤ ᠬᠠᠨᠭ᠍ᠭᠠᠢ ᠠᠭᠤᠯᠠᠨ ᠳᠤ ᠳᠤᠭᠳᠠᠵᠤ ᠳᠡᠶᠢᠯᠬᠦ ᠦᠭᠡᠢ ᠪᠤᠯᠵᠤ ᠡᠮᠦᠨᠡᠰᠢᠯᠡᠨ ᠤᠳᠤ ᠶᠢᠨ ᠰᠢᠯᠢ ᠶᠢᠨ ᠭᠤᠤᠯ ᠤᠨ ᠡᠯᠡᠰᠦᠳᠡᠢ ᠬᠡᠰᠡᠨ ᠭᠠᠵᠠᠷ ᠨᠡᠭᠦᠵᠡᠢ᠃ ᠮᠤᠩᠭᠤᠯ ᠤᠨ ᠡᠮᠦᠨᠡᠰᠢᠯᠡᠭᠰᠡᠨ ᠠᠴᠠ ᠪᠤᠯᠵᠤ ᠬᠤᠵᠢᠮ ᠨᠢ ᠤᠢᠢᠷᠠᠳ ᠨᠢ ᠭᠠᠭᠴᠠᠬᠠᠨ ᠠᠷᠤ ᠳᠤᠯᠤᠭᠠᠨ ᠤᠳᠤᠭ ᠬᠠᠯᠬ᠎ᠠ ᠲᠠᠢ ᠯᠡ ᠨᠢᠭᠤᠷᠯᠠᠵᠤ ᠳᠠᠶᠢᠯᠠᠯᠳᠤᠬᠤ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ ᠃ ᠬᠤᠵᠢᠮ ᠨᠢ ᠪᠠᠷᠠᠭᠤᠨ ᠭᠤᠷᠪᠠᠨ ᠠᠶᠢᠮᠠᠭ ᠮᠠᠨᠳᠤᠵᠤ᠂ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠤ ᠬᠦᠴᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠤ ᠬᠤᠶᠢᠨ᠎ᠠ ᠮᠤᠩᠭᠤᠯ ᠤᠨ ᠬᠠᠭᠠᠳ ᠨᠢ ᠪᠠᠰᠠ ᠯᠡ ᠰᠢᠬᠠᠭᠳᠠᠵᠤ ᠪᠠᠰᠠ ᠨᠢᠭᠡ ᠤᠳᠠᠭᠠᠨ ᠤ ᠮᠤᠩᠭᠤᠯ ᠤᠨ ᠨᠡᠭᠦᠳᠡᠯ ᠢᠶᠠᠷ ᠬᠠᠭᠠᠳ ᠤᠨ ᠦᠷᠦᠬᠡ ᠨᠢ ᠤᠳᠤ ᠶᠢᠨ ᠯᠢᠶᠤᠤᠨᠢᠩ ᠮᠤᠵᠢ ᠶᠢᠨ ᠬᠢᠵᠠᠭᠠᠷ ᠲᠤ ᠬᠦᠷᠴᠦ᠂ ᠬᠤᠷᠴᠢᠨ ᠠᠶᠢᠮᠠᠭ ᠨᠢ ᠨᠤᠨ ᠮᠦᠷᠡᠨ ᠤ ᠰᠠᠪᠠ ᠬᠦᠨᠳᠡᠢ ᠳᠤ ᠨᠡᠭᠦᠵᠤ ᠶᠠᠪᠤᠭᠰᠠᠨ ᠪᠠᠶᠢᠨ᠎ᠠ᠃ ᠤᠢᠢᠷᠠᠳ ᠴᠦ ᠰᠢᠬᠠᠭᠳᠠᠵᠤ ᠠᠯᠳᠠᠢ ᠶᠢᠨ ᠰᠦᠪᠡ ᠶᠢ ᠳᠠᠪᠠᠵᠤ ᠴᠠᠭᠠᠳᠠᠢ ᠬᠠᠭᠠᠨᠳᠤ ᠤᠯᠤᠰ ᠤᠨ ᠨᠤᠳᠤᠭ ᠳᠡᠪᠢᠰᠭᠡᠷ ᠵᠦᠭ ᠨᠤᠳᠤᠭ ᠢᠶᠠᠨ ᠳᠡᠯᠡᠵᠤ᠂ ᠬᠦᠮᠦᠨ ᠠᠮᠠ ᠨᠢ ᠤᠯᠠᠰᠢᠷᠠᠨ ᠨᠤᠳᠤᠭ ᠳᠡᠪᠢᠰᠭᠡᠷ ᠨᠢ ᠳᠡᠯᠡᠵᠡᠢ᠃      ᠤᠢᠢᠷᠠᠳ ᠤᠨ ᠪᠠᠭᠤᠷᠠᠯ ᠤᠨ ᠦᠶ᠎ᠡ ᠳᠤ ᠨᠤᠳᠤᠭ ᠳᠡᠪᠢᠰᠭᠡᠷ ᠨᠢ ᠳᠡᠯᠡᠵᠤ ᠬᠦᠮᠦᠨ ᠠᠮᠠ ᠨᠢ ᠨᠡᠮᠡᠭᠳᠡᠳᠡᠭ᠃ ᠠᠯᠳᠠᠢ ᠶᠢ ᠳᠠᠪᠠᠵᠤ ᠪᠠᠷᠠᠭᠤᠨᠰᠢᠯᠠᠭᠰᠠᠨ ᠤ ᠰᠡᠭᠦᠯᠡᠷ ᠤᠢᠢᠷᠠᠳ ᠨᠢ ᠦᠷᠭᠡᠨ ᠠᠭᠤᠳᠠᠮ ᠰᠢᠨᠵᠢᠶᠠᠩ ᠪᠠ ᠬᠠᠰᠠᠭ ᠤᠨ ᠳᠠᠯ᠎ᠠ ᠳᠤ ᠨᠤᠳᠤᠭ ᠨᠢ ᠳᠡᠯᠡᠵᠤ᠂ ᠬᠦᠮᠦᠨ ᠠᠮᠠ ᠨᠢ ᠤᠯᠠᠰᠢᠷᠠᠭᠰᠠᠨ ᠠᠴᠠ ᠨᠢᠭᠡ ᠪᠦᠯᠦᠭ ᠨᠢ ᠢᠵᠢᠯ ᠵᠠᠢ ᠤᠷᠤᠭᠤ ᠨᠤᠳᠤᠭ ᠳᠡᠯᠡᠵᠤ᠂ ᠨᠢᠭᠡ ᠪᠦᠯᠦᠭ ᠨᠢ ᠬᠦᠬᠡᠨᠡᠭᠤᠷ ᠢ ᠡᠵᠡᠯᠡᠵᠤ᠂ ᠲᠦᠪᠡᠳ ᠢ ᠡᠷᠭᠡᠰᠢᠶᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠨᠡ ᠴᠠᠭ ᠦᠶ᠎ᠡ ᠨᠢ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠬᠦᠮᠦᠨ ᠠᠮᠠ ᠨᠡᠮᠡᠭᠳᠡᠵᠤ ᠨᠤᠳᠤᠭ ᠳᠡᠪᠢᠰᠭᠡᠷ ᠤᠷᠢᠳᠤ ᠭᠠᠷᠤᠭ᠎ᠠ ᠦᠭᠡᠢ ᠦᠷᠭᠡᠵᠢᠭᠰᠡᠨ ᠰᠢᠵᠢᠷ ᠠᠯᠳᠠᠨ ᠴᠠᠭ ᠦᠶ᠎ᠡ ᠮᠦᠨ᠃ ᠦᠪᠡᠷ ᠤᠨ ᠤᠭ ᠨᠤᠳᠤᠭ ᠠᠴᠠ ᠭᠠᠳᠠᠨ᠎ᠠ ᠳᠤᠷᠭᠤᠳ ᠨᠢ ᠪᠠᠷᠠᠭᠤᠨᠰᠢ ᠨᠡᠭᠦᠵᠤ ᠢᠵᠢᠯ ᠵᠠᠢ ᠳᠤ ᠳᠤᠷᠭᠤᠳ ᠬᠠᠭᠠᠨᠳᠤ ᠤᠯᠤᠰ ᠢ ᠪᠠᠶᠢᠭᠤᠯᠵᠤ᠂ ᠬᠤᠱᠤᠳ ᠨᠢ ᠵᠡᠭᠦᠨᠰᠢ ᠨᠡᠭᠦᠵᠤ ᠬᠦᠭᠡᠨᠠᠭᠤᠷ ᠲᠤ ᠬᠤᠱᠤᠳ ᠬᠠᠭᠠᠨᠳᠤ ᠤᠯᠤᠰ ᠢ ᠪᠠᠶᠢᠭᠤᠯᠵᠠᠢ᠃ ᠡᠨᠡ ᠬᠤᠶᠠᠷ ᠬᠠᠨᠯᠢᠭ ᠨᠢ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠳᠠᠭᠠᠯᠳᠤᠬᠤ ᠤᠯᠤᠰ ᠪᠠᠶᠢᠵᠠᠢ᠃ ᠵᠦᠡᠭᠭᠠᠷ ᠨᠦᠬᠦᠬᠦ ᠪᠤᠯᠳᠠᠯ᠎ᠠ ᠢᠵᠢᠯ ᠤᠨ ᠳᠤᠷᠭᠤᠳ ᠨᠢ ᠵᠦᠡᠭᠭᠠᠷ ᠲᠤ ᠠᠯᠪᠠ ᠪᠠᠷᠢᠵᠤ ᠲᠦᠮᠡᠨ ᠴᠡᠷᠢᠭ ᠢᠯᠡᠭᠡᠵᠤ ᠦᠢᠯᠡᠴᠢᠯᠡᠵᠤ ᠪᠠᠶᠢᠵᠠᠢ᠃      ᠡᠨᠡ ᠦᠶᠡᠰ ᠤᠨ ᠤᠢᠢᠷᠠᠳ ᠨᠢ ᠮᠤᠩᠭᠤᠯ ᠳᠤ ᠬᠠᠷᠢᠶᠠᠯᠠᠭᠳᠠᠬᠤ ᠦᠭᠡᠢ᠂ ᠮᠠᠨᠵᠤ ᠳᠤ ᠴᠦ ᠬᠠᠷᠢᠶᠠᠯᠠᠭᠳᠠᠬᠤ ᠦᠭᠡᠢ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠭᠰᠠᠨ ᠪᠠᠶᠢᠳᠠᠯ ᠲᠠᠢ ᠪᠠᠶᠢᠵᠤ᠂ ᠪᠦᠷᠢᠨ ᠪᠦᠳᠦᠨ ᠵᠠᠰᠠᠭ ᠤᠨ ᠪᠠᠶᠢᠭᠤᠯᠤᠮᠵᠢ ᠲᠠᠢ᠂ ᠴᠡᠷᠢᠭ ᠠᠩᠭᠢ ᠲᠠᠢ᠂ ᠦᠰᠦᠭ ᠪᠢᠴᠢᠭ ᠲᠠᠢ᠂ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠭᠰᠠᠨ ᠴᠢᠨᠠᠷ ᠪᠦᠬᠦᠢ ᠳᠤᠰᠠᠭᠠᠷ ᠤᠯᠤᠰ ᠪᠤᠯᠵᠤ ᠪᠠᠶᠢᠵᠤᠬᠤᠢ᠃      ᠤᠢᠢᠷᠠᠳ ᠤᠨ ᠳᠤᠳᠤᠭᠠᠳᠤ ᠶᠢᠨ ᠶᠡᠭᠡ ᠰᠠᠮᠠᠭᠤᠷᠠᠯ ᠤᠨ ᠦᠶ᠎ᠡ ᠳᠤ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠡᠮᠡᠬᠦ‍ ᠨᠢᠭᠡ ᠰᠠᠶᠢᠨ ᠡᠷ᠎ᠡ ᠭᠠᠷᠴᠤ ᠢᠷᠡᠪᠡ᠃ ᠬᠡᠳᠦ᠋ᠢᠪᠡᠷ ᠡᠰᠡᠨ ᠬᠠᠭᠠᠨ ᠰᠢᠭ᠋ ᠡᠷᠡᠯᠬᠡᠭ ᠵᠤᠷᠢᠭ᠂ ᠬᠤᠯᠠ ᠶᠢᠨ ᠪᠤᠳᠤᠯᠭ᠎ᠠ ᠲᠠᠢ ᠪᠢᠰᠢ ᠪᠤᠯᠪᠠᠴᠤ ᠪᠦᠬᠦ ᠮᠤᠩᠭᠤᠯ ᠤᠨ ᠪᠠᠭᠤᠷᠠᠯ ᠤᠨ ᠦᠶ᠎ᠡ ᠳᠤ ᠨᠢᠭᠡᠨ ᠴᠠᠭ ᠦᠶ᠎ᠡ ᠶᠢ ᠡᠵᠡᠯᠡᠭᠰᠡᠨ ᠰᠠᠶᠢᠨ ᠡᠷ᠎ᠡ ᠪᠤᠯᠬᠤ ᠪᠦᠯᠦᠭᠡ᠃ ᠳᠡᠭᠦᠨ ᠤ ᠡᠬᠢᠯᠡᠨ ᠰᠠᠭᠤᠷᠢ ᠳᠠᠯᠪᠢᠭᠰᠠᠨ ᠵᠡᠭᠦᠨᠭᠠᠷ ᠤᠯᠤᠰ ᠨᠢ ᠪᠦᠬᠦ᠋ᠢᠯᠡ ᠮᠤᠩᠭᠤᠯ᠂ ᠴᠢᠨᠠᠭᠰᠢᠯᠠᠨ ᠳᠤᠮᠳᠠᠳᠤ ᠠᠽᠢᠶ᠎ᠠ᠂ ᠤᠷᠤᠰ ᠬᠢᠳᠠᠳ ᠤᠨ ᠳᠡᠦᠭᠡᠨ ᠳᠤ ᠪᠦᠷ ᠨᠢᠭᠡᠨ ᠬᠠᠭᠤᠳᠠᠰᠤ ᠡᠵᠡᠯᠡᠬᠦ ᠶᠤᠰᠤᠳᠠᠢ᠃ ᠳᠡᠯᠡᠭᠡᠢ ᠶᠢᠨ ᠨᠡᠭᠦᠳᠡᠯᠴᠢᠨ ᠦᠨᠳᠦᠰᠦᠳᠡᠨ ᠤ ᠳᠡᠦᠭᠡᠨ ᠳᠤ ᠴᠦ ᠨᠢᠭᠡ ᠬᠠᠭᠤᠳᠠᠰᠤ ᠪᠤᠯᠤᠨ ᠪᠢᠴᠢᠭᠳᠡᠬᠦ ᠶᠤᠰᠤᠳᠠᠢ᠃ ᠭᠡᠪᠡᠴᠦ ᠪᠤᠳᠠᠳᠠᠢ ᠪᠠᠶᠢᠳᠠᠯ ᠨᠢ ᠬᠢᠳᠠᠳ᠂ ᠤᠷᠤᠰ ᠪᠠ ᠮᠠᠨᠵᠤ ᠨᠠᠷ ᠮᠠᠭᠤᠴᠢᠯᠠᠨ ᠪᠢᠴᠢᠵᠤ᠂ ᠮᠠᠨ ᠤ ᠮᠤᠩᠭᠤᠯ ᠨᠢ ᠴᠦ ᠳᠠᠭᠠᠯᠳᠤᠨ ᠮᠠᠭᠤᠴᠢᠯᠠᠬᠤ ᠨᠢ ᠴᠦ ᠤᠯᠠᠨ ᠪᠠᠶᠢᠳᠠᠭ᠃      ᠭᠠᠯᠳᠠᠨ ᠪᠤᠯ ᠡᠰᠡᠨ ᠬᠤᠳᠤᠭᠳᠤ ᠶᠢᠨ ᠬᠤᠶᠢᠳᠤ ᠲᠦᠷᠢ ᠭᠡᠳᠡᠭ᠃ ᠡᠨᠡ ᠬᠠᠭᠠᠨ ᠢ ᠲᠦᠷᠦᠬᠦ ᠳᠤ ᠶᠠᠮᠠᠷ ᠶᠠᠮᠠᠷ ᠰᠠᠶᠢᠨ ᠬᠠᠭᠠᠳ ᠬᠤᠳᠤᠭᠳᠤ ᠶᠢᠨ ᠰᠢᠨᠵᠢ ᠳᠡᠮᠳᠡᠭ ᠢᠯᠡᠷᠡᠭᠰᠡᠨ ᠭᠡᠨ᠎ᠡ᠃ ᠡᠰᠡᠨ ᠬᠤᠳᠤᠭᠳᠤ ᠤᠢᠢᠷᠠᠳ ᠲᠤ ᠤᠷᠢᠯᠠᠬᠤ ᠳᠤ ᠭᠠᠯᠳᠠᠨ ᠤ ᠡᠵᠢ ᠨᠢ ᠮᠤᠷᠢᠨ ᠤ ᠵᠢᠯᠤᠭᠤ ᠠᠴᠠ ᠪᠠᠷᠢᠵᠤ ᠦᠷ᠎ᠡ ᠶᠢᠨ ᠬᠤᠳᠤᠭ ᠤᠯᠭᠤᠮᠤ ᠬᠡᠮᠡᠨ ᠭᠤᠶᠤᠴᠢᠯᠠᠵᠠᠢ᠃ ᠡᠰᠡᠨ ᠬᠤᠳᠤᠭᠳᠤ ᠠᠴᠠ ᠪᠢ ᠨᠢᠭᠡᠨᠳᠡ ᠦᠳᠡᠯᠵᠡᠢ᠂ ᠦᠷ᠎ᠡ ᠶᠢᠨ ᠬᠤᠳᠤᠭ ᠦᠭᠴᠦ ᠳᠡᠶᠢᠯᠬᠦ ᠦᠭᠡᠢ ᠭᠡᠬᠦ ᠳᠤ ᠳᠠ ᠮᠢᠨᠤ ᠬᠦᠦ ᠪᠤᠯᠤᠨ ᠲᠦᠷᠦᠵᠤ ᠪᠤᠯᠤᠨ᠎ᠠ ᠤᠤ︖ ᠭᠡᠬᠦ ᠳᠤ ᠪᠤᠯᠤᠨ᠎ᠠ ᠬᠡᠮᠡᠨ ᠠᠮᠠ ᠠᠯᠳᠠᠵᠠᠢ᠃ ᠳᠤᠮᠤᠭ ᠴᠦ ᠳᠡᠷᠡ᠂ ᠦᠨᠡᠨ ᠴᠦ ᠳᠡᠷᠡ᠂ ᠶᠠᠭᠤ ᠴᠦ ᠪᠤᠯᠤᠭ᠂ ᠭᠠᠯᠳᠠᠨ ᠠᠴᠠ ᠭᠡᠭᠡᠨ ᠬᠤᠳᠤᠭᠳᠤ ᠪᠠᠷ ᠲᠦᠪᠡᠳ ᠲᠤ ᠵᠠᠯᠠᠭᠳᠠᠨ ᠤᠴᠢᠵᠤ᠂ ᠳ᠋ᠢᠪᠠ ᠰᠠᠩᠵᠠᠢ ᠲᠠᠢ ᠬᠤᠶᠠᠭᠤᠯᠠ ᠬᠠᠮᠳᠤ ᠰᠤᠷᠤᠭᠴᠢ ᠪᠤᠯᠤᠭᠰᠠᠨ ᠨᠢ ᠦᠨᠡᠨ ᠶᠠᠪᠤᠳᠠᠯ᠃ ᠪᠠᠰᠠ ᠤᠨᠳᠤᠤ ᠯᠠᠮ᠎ᠠ ᠬᠤᠳᠤᠭᠳᠤ ᠲᠠᠢ ᠳᠠᠭᠠᠷᠠᠬᠤ ᠦᠭᠡᠢ᠂ ᠭᠠᠯᠳᠠᠨ ᠵᠡᠪᠰᠡᠭ ᠪᠤᠯᠪᠠᠰᠤᠷᠠᠨ ᠲᠦᠷᠦ ᠶᠢᠨ ᠬᠡᠷᠡᠭ ᠲᠤ ᠳᠤᠷᠠᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠴᠦ ᠦᠨᠡᠨ ᠭᠡᠳᠡᠭ᠃ ᠳᠡᠭᠡᠭᠦ ᠪᠠᠷ ︽ᠤᠨᠳᠤᠤ ᠬᠤᠳᠤᠭᠳᠤ ᠨᠤᠮ ᠰᠤᠷᠤᠨ᠎ᠠ᠂ ᠮᠠᠨ ᠤ ᠬᠤᠳᠤᠭᠳᠤ ᠵᠡᠪᠰᠡᠭ ᠰᠤᠷᠤᠨ᠎ᠠ︾ ᠭᠡᠰᠡᠨ ᠦᠭᠡ ᠭᠠᠷᠤᠭᠰᠠᠨ ᠭᠡᠳᠡᠭ᠃      ᠭᠠᠯᠳᠠᠨ ᠤ ᠠᠬ᠎ᠠ ᠰᠡᠩᠭᠡ ᠬᠤᠨᠭ᠌ ᠳᠠᠶᠢᠵᠢ ᠬᠤᠤᠷᠯᠠᠭᠳᠠᠭᠰᠠᠨ ᠤ ᠰᠡᠭᠦᠯᠡᠷ᠂ ᠰᠡᠩᠭᠡ ᠬᠤᠨᠭ᠌ ᠳᠠᠶᠢᠵᠢ ᠶᠢᠨ ᠬᠦᠦ ᠨᠢ ᠪᠠᠭ᠎ᠠ ᠪᠠᠶᠢᠭᠰᠠᠨ ᠤᠴᠢᠷ᠂ ᠤᠢᠢᠷᠠᠳ ᠤᠨ ᠶᠡᠭᠡ ᠡᠷᠭᠡ ᠶᠢ ᠪᠠᠷᠢᠵᠤ ᠪᠠᠶᠢᠭᠰᠠᠨ ᠡᠬᠡ ᠨᠢ ᠭᠠᠯᠳᠠᠨ ᠢ ᠬᠠᠷ᠎ᠠ ᠪᠤᠯᠭᠠᠵᠤ᠂ ᠳᠠᠯᠠᠢ ᠯᠠᠮ᠎ᠠ ᠠᠴᠠ ︽ᠪᠤᠱᠤᠭᠳᠤ︾ ᠴᠤᠯᠠ ᠬᠦᠷᠳᠡᠭᠡᠨ ︽ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ︾ ᠬᠡᠮᠡᠨ ᠠᠯᠳᠠᠷᠰᠢᠵᠠᠢ᠃ ᠭᠠᠯᠳᠠᠨ ᠨᠢ ᠤᠢᠢᠷᠠᠳ ᠲᠤ ᠪᠠᠨ ᠢᠷᠡᠮᠡᠭᠴᠡ ᠲᠦᠪᠡᠳ ᠤᠨ ᠱᠠᠰᠢᠨ ᠲᠦᠷᠦ ᠬᠤᠤᠰᠯᠠᠭᠰᠠᠨ ᠲᠦᠪ ᠲᠤ ᠲᠦᠪᠯᠡᠷᠡᠨ ᠵᠠᠬᠢᠷᠬᠤ ᠠᠷᠭ᠎ᠠ ᠶᠢ ᠶᠡᠬᠡᠳᠡ ᠪᠢᠰᠢᠷᠡᠨ ᠰᠢᠳᠦᠵᠤ᠂ ᠵᠦᠡᠭᠭᠠᠷ ᠲᠤ ᠪᠠᠨ ᠲᠦᠪᠡᠳ ᠤᠨ ᠪᠠᠶᠢᠭᠤᠯᠤᠯ ᠢ ᠳᠠᠭᠤᠷᠢᠶᠠᠨ᠂ ᠳᠠᠶᠢᠨ ᠳᠠᠵᠢᠨ ᠳᠤ ᠭᠠᠷᠮᠠᠭᠠᠢᠢᠯᠠᠵᠤ᠂ ᠲᠦᠪᠡᠳ ᠤᠨ ᠳᠠᠯᠠᠢ ᠯᠠᠮ᠎ᠠ ᠶᠢᠨ ᠲᠦᠯᠦᠭᠡᠨ ᠤ ᠬᠦᠮᠦᠨ ᠪᠤᠯᠵᠠᠢ᠃ ᠤᠤᠯ ᠳᠠᠭᠠᠨ ᠲᠦᠷᠪᠡᠨ ᠤᠢᠢᠷᠠᠳ ᠤᠨ ᠨᠤᠶᠠᠷᠬᠠᠯ ᠨᠢ ᠠᠷᠠᠳᠴᠢᠯᠠᠯ ᠤᠨ ᠦᠡᠭᠭᠡ ᠪᠤᠳᠤᠭ ᠨᠢ ᠢᠯᠡᠭᠦᠦ ᠪᠠᠶᠢᠵᠤ᠂ ᠶᠠᠭᠠᠬᠢᠵᠤ ᠰᠠᠮᠠᠭᠤᠷᠠᠪᠠᠴᠤ ᠶᠡᠭᠡ ᠠᠶᠤᠯ ᠵᠤᠪᠠᠯᠠᠩ ᠳᠤ ᠦᠷᠳᠦᠳᠡᠭ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ᠶᠡᠭᠡ ᠳᠠᠷᠤᠩᠭᠤᠢᠢᠯᠠᠯ᠂ ᠶᠡᠭᠡ ᠡᠷᠭᠡ ᠲᠦᠪᠯᠡᠷᠡᠬᠦ ᠨᠢ ᠶᠡᠭᠡ ᠵᠤᠪᠠᠯᠠᠩ ᠳᠠᠭᠠᠯᠳᠤᠵᠤ ᠪᠠᠶᠢᠳᠠᠭ ᠶᠤᠮ᠃ ᠭᠠᠯᠳᠠᠨ ᠪᠤᠱᠤᠭᠳᠤ ᠬᠠᠭᠠᠨ ᠠᠴᠠ ᠴᠢᠰᠦ ᠤᠷᠤᠰᠬᠠᠭᠰᠠᠨ ᠳᠠᠶᠢᠨ ᠢᠶᠠᠷ ᠲᠦᠷᠪᠡᠨ ᠤᠢᠢᠷᠠᠳ ᠢᠶᠠᠨ ᠨᠢᠭᠡᠳᠭᠡᠵᠤ᠂ ᠴᠠᠭᠠᠰᠢ ᠨᠢ ᠳᠤᠮᠳᠠᠳᠤ ᠠᠽᠢᠶ᠎ᠠ ᠶᠢᠨ ᠤᠯᠠᠨ ᠤᠭᠰᠠᠭᠠᠳᠠᠨ ᠢ ᠴᠦ ᠦᠪᠡᠷ ᠤᠨ ᠭᠠᠷ ᠲᠠᠭᠠᠨ ᠤᠷᠤᠭᠤᠯᠵᠠᠢ᠃ ᠽᠠᠶ᠎ᠠ ᠪᠠᠨᠳᠢᠳᠠ ᠶᠢᠨ ᠳᠠᠭᠠᠷᠠᠴᠢ ᠶᠢᠨ ᠲᠦᠷᠢ ᠢᠯᠡᠷᠡᠬᠦ ᠶᠢ ᠬᠤᠷᠢᠭᠯᠠᠵᠤ᠂ ᠯᠠᠮ᠎ᠠ ᠨᠠᠷ ᠲᠤ ᠴᠦ ᠶᠡᠭᠡ ᠳᠠᠷᠤᠩᠭᠤᠢᠢᠯᠠᠯ ᠶᠠᠪᠤᠭᠤᠯᠵᠠᠢ᠃
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ