ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠤ ᠲᠠᠩᠰᠤᠭ ᠪᠠᠶᠠᠷ ᠤᠨ ᠲᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/6/22
     ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠬᠡᠵᠦ ᠶᠡᠷᠢᠬᠤ ᠲᠠᠢ ᠵᠡᠷᠭᠡ ᠤᠯᠠᠩᠬᠢ ᠬᠦᠮᠦᠰ ᠯᠤᠤᠳᠤ ᠤᠩᠭᠤᠴᠠᠨ ᠤ ᠤᠷᠤᠯᠳᠤᠭᠠᠨ ᠬᠢᠬᠦ᠂ ᠽᠦᠩᠽᠢ ᠢᠳᠡᠬᠦ᠂ ᠠᠭᠤᠯᠠ ᠠᠪᠠᠷᠢᠬᠤ ᠵᠡᠷᠭᠡ ᠶᠢ ᠪᠤᠳᠤᠨ ᠤᠯᠳᠠᠭ᠃ ᠬᠡᠳᠡᠯ᠎ᠡ ᠬᠤᠷᠴᠢᠨ ᠨᠤᠳᠤᠭ ᠲᠤ ᠪᠤᠯ ᠲᠡᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠢ ᠲᠤᠷᠠᠳᠬᠤ ᠲᠠᠢ ᠵᠡᠷᠭᠡ ᠦᠨᠳᠡᠭᠡ ᠦᠩᠭᠦᠷᠢᠬᠦᠯᠬᠦ ᠲᠤᠭᠯᠠᠭᠠᠮ᠂ ᠦᠷᠦᠮ᠎ᠡ ᠲᠠᠢ ᠬᠠᠭᠤᠷᠤᠭᠰᠠᠨ ᠪᠤᠳᠠᠭ᠎ᠠ᠂ ᠲᠤᠭᠤᠯ ᠲᠠᠩ᠂ ᠬᠤᠷᠤᠳ ᠠᠭᠠᠷᠤᠤᠯ ᠵᠡᠷᠭᠡ ᠵᠦᠢᠯ ᠪᠤᠳᠤᠭᠳᠠᠳᠠᠭ᠃      ᠮᠠᠨ ᠤ ᠨᠤᠳᠤᠭ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠪᠠᠶᠠᠨᠮᠤᠳᠤ ᠰᠤᠮᠤ ᠬᠡᠵᠦ ᠠᠭᠤᠯᠠ ᠴᠦᠬᠡᠨᠳᠠᠢ᠂ ᠭᠤᠤᠯ ᠮᠦᠷᠡᠨ ᠴᠤᠬᠠᠭ᠂ ᠲᠠᠯ᠎ᠠ ᠪᠠ ᠮᠠᠩᠬ᠎ᠠ ᠵᠤ ᠪᠠᠷ ᠭᠤᠤᠯᠯᠠᠭᠰᠠᠨ ᠭᠠᠵᠠᠷ ᠶᠤᠮ᠃ ᠶᠠᠭ ᠡᠨᠡ ᠬᠦ ᠨᠤᠳᠤᠭ ᠤᠷᠤᠨ ᠤ ᠪᠠᠨ ᠤᠨᠴᠠᠯᠢᠭ ᠲᠤ ᠲᠤᠬᠢᠷᠠᠯᠴᠠᠭᠤᠯᠤᠨ ᠨᠤᠳᠤᠭ ᠤᠨ ᠮᠢᠨᠢ ᠬᠦᠮᠦᠰ ᠦᠨᠳᠦᠷ ᠮᠠᠩᠬᠠᠨ ᠳᠤ ᠭᠠᠷᠴᠤ ᠦᠬᠡᠳᠡᠯᠡᠬᠦ ᠨᠠᠷᠠᠨ ᠢ ᠤᠭᠳᠤᠵᠤ᠂ ᠠᠯᠤᠰ ᠤᠨ ᠪᠠᠷ᠎ᠠ ᠶᠢ ᠪᠠᠷᠠᠯᠠᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠤ ᠤᠯᠠᠮᠵᠢᠯᠠᠯᠳᠤ ᠪᠠᠶᠠᠷ ᠢᠶᠠᠨ ᠤᠭᠳᠤᠳᠠᠭ᠃ ᠵᠢᠯ ᠪᠦᠷᠢ ᠶᠢᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠤ ᠦᠷᠯᠦᠬᠡ ᠪᠦᠬᠦ ᠬᠡᠷ ᠢᠶᠠᠷ ᠢᠶᠠᠨ ᠨᠠᠷᠠᠨ ᠠᠴᠠ ᠡᠷᠳᠡ ᠪᠤᠰᠴᠤ ᠬᠤᠪᠢ ᠬᠤᠪᠢᠨ ᠤ ᠠᠵᠢᠯ ᠳᠠᠭᠠᠨ ᠶᠠᠭᠠᠷᠠᠯᠳᠤᠳᠠᠭ᠃ ᠡᠷᠡᠭᠳᠡᠶᠢᠴᠦᠳ ᠬᠤᠯᠠ ᠶᠠᠪᠤᠵᠤ ᠠᠬᠢ ᠰᠦᠢᠬᠡ ᠲᠡᠬᠦᠨ ᠢᠷᠡᠵᠦ᠂ ᠬᠡᠷ ᠤᠨ ᠢᠶᠠᠨ ᠡᠬᠦᠳᠡ ᠬᠠᠭᠠᠯᠭ᠎ᠠ ᠠᠴᠠ ᠮᠠᠯ ᠦᠬᠡᠷ ᠤᠨ ᠢᠶᠠᠨ ᠬᠠᠰᠢᠶᠠᠨ ᠤ ᠡᠬᠦᠳᠡᠨ ᠳᠤ ᠬᠦᠷᠳᠡᠯ᠎ᠡ ᠡᠯᠬᠦᠵᠤ ᠲᠠᠯᠪᠢᠳᠠᠭ᠃ ᠡᠨᠡ ᠨᠢ ᠵᠢᠯ ᠲᠤᠷᠰᠢ ᠳᠠᠭᠠᠨ ᠬᠦᠮᠦᠨ ᠮᠠᠯ ᠦᠬᠡᠳᠡ ᠡᠰᠡᠷᠡᠭ ᠪᠠᠶᠢᠬᠤ ᠶᠢ ᠪᠡᠯᠭᠡᠳᠡᠵᠦ ᠪᠠᠶᠢᠬᠤ ᠤᠳᠬ᠎ᠠ ᠲᠠᠢ᠃ ᠬᠡᠥᠬᠡᠳ ᠪᠠᠭᠠᠴᠤᠳ ᠬᠤᠳᠳᠤᠭ ᠲᠠᠷᠤᠨ ᠤᠰᠤ ᠭᠠᠷᠭᠠᠵᠤ᠂ ᠬᠦᠮᠦᠨ ᠪᠦᠬᠦᠨ ᠬᠦᠯ ᠦᠬᠡᠢ ᠲᠡᠬᠦᠵᠢᠩ ᠤᠰᠤ ᠶᠢ ᠵᠡᠪᠡᠯ ᠬᠡᠳᠦᠨ ᠠᠮᠠ ᠵᠠᠯᠬᠢᠬᠤ ᠶᠤᠰᠤᠳᠠᠢ ᠮᠦᠷᠳᠡᠭᠡᠨ ᠡᠨᠡ ᠤᠰᠤᠨ ᠳᠠᠭᠠᠨ ᠰᠦᠢᠬᠡ ᠡᠪᠡᠰᠦᠨ ᠨᠠᠪᠴᠢ ᠶᠢ ᠬᠢᠵᠦ᠂ ᠨᠢᠭᠤᠷ ᠭᠠᠷ ᠢᠶᠠᠨ ᠤᠬᠢᠶᠠᠨ ᠴᠡᠪᠡᠷᠯᠡᠳᠡᠭ᠃ ᠡᠨᠡ ᠨᠢ ᠡᠪᠡᠳᠴᠢᠨ ᠲᠠᠬᠤᠯ ᠲᠤᠰᠬᠤ ᠦᠬᠡᠢ᠂ ᠡᠷᠡᠬᠦᠯ ᠰᠠᠶᠢᠬᠠᠨ ᠪᠠᠶᠢᠬᠤ ᠶᠢ ᠵᠦᠩᠨᠡᠵᠦ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠮᠦᠨ᠃ ᠬᠠᠷᠢᠨ ᠡᠮᠡᠭᠳᠡᠶᠢᠴᠦᠳ ᠪᠤᠯ ᠦᠨᠢᠶ᠎ᠡ ᠰᠠᠭᠠᠨ᠂ ᠦᠷᠦᠮ᠎ᠡ ᠬᠠᠷᠮᠠᠨ᠂ ᠬᠤᠷᠤᠳ ᠬᠢᠵᠦ᠂ ᠦᠨᠳᠡᠭᠡ ᠴᠢᠨᠠᠨ ᠶᠠᠭᠠᠷᠠᠵᠤ ᠭᠠᠷᠳᠠᠭ᠃      ᠦᠤᠷ ᠢᠶᠠᠷ ᠪᠤᠰᠴᠤ ᠬᠤᠪᠢ ᠬᠤᠪᠢᠨ ᠤ ᠠᠵᠢᠯ ᠢᠶᠠᠨ ᠲᠠᠭᠤᠰᠬᠠᠭᠰᠠᠨ ᠬᠦᠮᠦᠰ ᠬᠡᠥᠬᠡᠳ ᠠᠴᠢ ᠨᠠᠷ ᠢᠶᠠᠨ ᠲᠠᠭᠠᠭᠤᠯᠵᠤ ᠦᠨᠳᠦᠷ ᠮᠠᠩᠬᠠᠨ ᠤ ᠤᠷᠤᠢ ᠳᠤ ᠮᠠᠴᠤᠨ ᠭᠠᠷᠴᠤ᠂ ᠨᠠᠷᠠ ᠮᠠᠨᠳᠤᠬᠤ ᠶᠢ ᠪᠠᠷᠠᠯᠠᠨ᠂ ᠠᠯᠤᠰ ᠢ ᠰᠢᠷᠳᠡᠨ ᠨᠢᠳᠤᠨ ᠴᠢᠯᠡᠭᠡ ᠪᠠᠨ ᠭᠠᠷᠭᠠᠵᠤ᠂ ᠰᠡᠳᠬᠢᠯ ᠰᠠᠨᠠᠭ᠎ᠠ ᠪᠠᠨ ᠰᠡᠷᠬᠦᠬᠡᠳᠡᠭ᠃ ᠬᠠᠮᠤᠭ ᠠᠴᠠ ᠬᠦᠷ ᠬᠦᠭᠵᠢᠶᠡᠨᠲᠠᠢ ᠨᠢ ᠬᠠᠰᠢ ᠯᠡ ᠬᠡᠥᠬᠡᠳ ᠤᠨ ᠦᠨᠳᠡᠭᠡ ᠦᠩᠬᠦᠷᠢᠬᠦᠯᠬᠦ ᠤᠷᠤᠯᠳᠤᠭᠠᠨ ᠪᠤᠯᠤᠨ᠎ᠠ᠃ ᠬᠡᠥᠬᠡᠳ ᠪᠠᠭᠠᠴᠤᠳ ᠬᠡᠳᠦᠨ ᠡᠳᠦᠷ ᠤᠨ ᠡᠮᠦᠨ᠎ᠡ ᠠᠴᠠ ᠰᠢᠯᠢᠵᠦ ᠰᠤᠩᠭᠤᠭᠰᠠᠨ ᠦᠩᠬᠦᠷᠢᠬᠦ ᠳᠤ ᠰᠠᠶᠢᠨ ᠦᠨᠳᠡᠭᠡ ᠶᠢᠨ ᠢᠶᠠᠨ ᠲᠡᠭᠡᠷ᠎ᠡ ᠨᠢ ᠨᠠᠷ᠎ᠠ ᠪᠠᠨ ᠪᠢᠴᠢᠬᠦ ᠪᠤᠶᠤ ᠦᠪᠡᠷ ᠤᠨ ᠤᠨᠴᠠᠯᠢᠭ ᠲᠠᠢ ᠵᠢᠷᠤᠭ ᠲᠡᠮᠳᠡᠭ ᠬᠢᠵᠦ᠂ ᠮᠠᠩᠬᠠᠨ ᠤᠷᠦᠢ ᠠᠴᠠ ᠲᠤᠷᠤᠭᠰᠢ ᠦᠩᠬᠦᠷᠢᠬᠦᠯᠤᠨ᠂ ᠦᠪᠡᠷᠰᠡᠳ ᠢᠶᠠᠨ ᠤᠷᠢᠳ ᠢᠶᠠᠷ ᠬᠦᠶᠤᠨ ᠪᠠᠭᠤᠵᠤ᠂ ᠮᠠᠩᠬᠠᠨ ᠡᠩᠭᠡᠷ ᠠᠴᠠ ᠦᠨᠳᠡᠭᠡ ᠪᠠᠨ ᠲᠤᠰᠳᠠᠭ᠃ ᠲᠠᠬᠢᠨ ᠮᠠᠩᠬᠠᠨ ᠡᠩᠭᠡᠷ ᠠᠴᠠ ᠲᠡᠭᠡᠭᠰᠢ ᠭᠠᠷᠬᠤ ᠳᠠᠭᠠᠨ ᠮᠠᠩᠬᠠᠨ ᠳᠤ ᠮᠠᠴᠤᠨ ᠤᠷᠤᠯᠳᠤᠳᠠᠭ᠃ ᠢᠩᠬᠢᠵᠦ ᠪᠠᠶᠠᠷᠯᠠᠨ ᠬᠦᠬᠡᠷᠦᠵᠦ ᠬᠡᠳᠦᠨ ᠴᠠᠭ ᠲᠤᠭᠯᠠᠭᠠᠳ ᠪᠡᠯᠡᠳᠭᠡᠵᠦ ᠠᠪᠴᠢᠷᠠᠭᠰᠠᠨ ᠬᠤᠷᠤᠳ᠂ ᠠᠭᠠᠷᠤᠤᠯ᠂ ᠦᠨᠳᠡᠭᠡ᠂ ᠠᠶᠢᠷᠠᠭ ᠲᠠᠷᠠᠭ ᠢᠶᠠᠨ ᠬᠤᠪᠢᠶᠠᠯᠴᠠᠨ ᠢᠳᠡᠵᠦ᠂ ᠰᠢᠯᠦᠭ ᠲᠠᠭᠤᠤ ᠠᠶᠠᠯᠭᠤᠯᠠᠭᠰᠠᠭᠠᠷ ᠬᠠᠮᠳᠤ ᠳᠠᠭᠠᠨ ᠠᠶᠢᠯ ᠤᠷᠤᠭᠤ ᠪᠠᠨ ᠪᠤᠴᠠᠳᠠᠭ᠃      ᠬᠡᠷ ᠲᠡᠭᠡᠨ ᠬᠦᠷᠬᠦ ᠳᠤ ᠠᠵᠢᠯᠰᠠᠭ ᠵᠠᠩ ᠲᠠᠢ ᠡᠵᠢ ᠨᠠᠷ ᠠᠩᠬᠢᠯᠤᠮ᠎ᠠ ᠰᠠᠶᠢᠬᠠᠨ ᠦᠨᠦᠷ ᠲᠠᠢ ᠲᠤᠭᠤᠯ ᠲᠠᠩ ᠢᠶᠠᠨ ᠪᠤᠴᠠᠯᠭᠠᠵᠤ᠂ ᠦᠷᠦᠮ᠎ᠡ ᠰᠦ᠂ ᠬᠠᠭᠤᠷᠤᠭᠰᠠᠨ ᠪᠤᠳᠠᠭ᠎ᠠ᠂ ᠴᠠᠭᠠᠨ ᠰᠢᠬᠢᠷ ᠵᠡᠷᠭᠡ ᠶᠢᠨ ᠠᠮᠳᠠᠳᠤ ᠢᠳᠡᠬᠡᠨ ᠢᠶᠠᠨ ᠰᠢᠷᠡᠭᠡ ᠲᠦᠬᠦᠷᠡᠩ ᠪᠡᠯᠡᠳᠬᠡᠬᠡᠳ ᠬᠦᠯᠢᠶᠡᠵᠦ ᠪᠠᠶᠢᠳᠠᠭ᠃ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠨᠢ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠲᠤ ᠠᠪᠴᠤ ᠬᠡᠯᠡᠪᠡᠯ ᠪᠡᠯᠴᠢᠬᠡᠷ ᠡᠪᠡᠰᠦ ᠢᠬᠴᠦ ᠰᠠᠬᠤᠯᠢᠭ ᠤᠷᠭᠤᠵᠤ᠂ ᠦᠬᠡᠷ ᠬᠤᠨᠢ ᠨᠤᠭᠤᠭᠠᠨ ᠳᠤ ᠴᠠᠳᠴᠤ ᠲᠠᠷᠭᠤ ᠬᠦᠴᠦ ᠠᠪᠤᠨ ᠰᠦ ᠴᠠᠭ᠎ᠠ ᠪᠠᠭᠤᠵᠤ ᠡᠬᠢᠯᠡᠭᠰᠡᠨ ᠤ ᠪᠡᠯᠭᠡ ᠲᠡᠮᠳᠡᠭ ᠪᠤᠯᠳᠠᠭ᠃ ᠬᠤᠷᠴᠢᠨ ᠨᠤᠳᠤᠭ ᠤᠨ ᠬᠢᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠲᠠᠪᠤᠨ ᠳᠤ ᠲᠤᠭᠤᠯ ᠲᠠᠩ ᠬᠢᠵᠦ᠂ ᠲᠡᠭᠡᠵᠢ ᠶᠢ ᠨᠢ ᠨᠤᠳᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠲᠠᠭᠠᠨ ᠡᠷᠬᠦᠵᠦ᠂ ᠪᠦᠬᠦ ᠭᠡᠷ ᠢᠶᠠᠷ ᠢᠶᠠᠨ ᠪᠠᠶᠠᠷ ᠬᠦᠷ ᠲᠠᠢ ᠴᠠᠭᠠᠨ ᠢᠳᠡᠭᠡ ᠠᠮᠰᠠᠬᠤ ᠶᠢ ᠲᠦᠢᠯ ᠤᠨ ᠡᠷᠬᠢᠮ ᠢᠶᠠᠷ ᠦᠵᠡᠳᠡᠭ᠃ ᠦᠳᠡᠰᠢ ᠨᠢ ᠠᠬᠢ ᠰᠦᠢᠬᠡ ᠪᠠᠷ ᠰᠠᠩ ᠲᠠᠯᠪᠢᠨ᠂ ᠦᠬᠡᠷ ᠬᠤᠨᠢᠨ ᠤ ᠬᠠᠰᠢᠶ᠎ᠠ ᠬᠤᠷᠤᠭ᠎ᠠ ᠪᠠᠨ ᠠᠷᠢᠭᠤᠳᠬᠠᠵᠤ᠂ ᠡᠪᠡᠳᠴᠢᠨ ᠬᠢᠵᠢᠭ ᠲᠤᠰᠤᠬᠤ ᠦᠬᠡᠢ᠂ ᠦᠬᠡᠳᠡᠯᠡᠨ ᠦᠷᠡᠵᠢᠬᠦ ᠶᠢ ᠪᠡᠯᠭᠡᠳᠡᠳᠡᠭ᠃      ᠤᠳᠤᠬᠢᠴᠢᠯᠠᠭᠰᠠᠨ ᠮᠠᠯ ᠠᠵᠤ ᠠᠬᠤᠢ ᠨᠡᠶᠢᠬᠡᠮ ᠲᠠᠶᠠᠭᠠᠷ ᠲᠦᠬᠡᠮᠡᠯᠵᠢᠭᠰᠡᠨ ᠦᠨᠦᠳᠦᠷ᠂ ᠬᠤᠷᠴᠢᠨ ᠨᠤᠳᠤᠭ ᠤᠨ ᠬᠢᠨ ᠮᠦᠨ ᠴᠤ ᠡᠨᠡ ᠬᠦ ᠤᠯᠠᠮᠵᠢᠯᠠᠯᠳᠤ ᠪᠠᠶᠠᠷ ᠲᠤᠷᠠᠰᠬᠠᠯ ᠤᠨ ᠡᠳᠦᠷ ᠤᠨ ᠵᠠᠩ ᠵᠠᠩᠰᠢᠯ ᠢᠶᠠᠨ ᠪᠠᠷᠢᠮᠳᠠᠯᠠᠭᠰᠠᠭᠠᠷ ᠶᠤᠮ᠃  
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ