ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠨᠠᠪᠳᠠᠬ ᠰᠠᠪᠳᠠᠬ ᠤᠨ ᠰᠢᠳᠦᠯᠭᠡ ︵ᠲᠤᠤᠷᠠᠳᠤ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/7/15
     ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠨᠣᠳᠤᠬ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ      ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠠᠴᠠ ᠠᠮᠢᠳᠣᠷᠠᠯ ᠠᠬᠤᠢ ᠶᠢᠨ ᠲᠡᠭᠡᠭᠰᠢᠯᠡᠵᠦ ᠣᠷᠣᠭᠤᠳᠠᠬᠤ ᠨᠢ ᠨᠣᠳᠤᠬ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠰᠢᠭᠤᠳ ᠬᠤᠯᠪᠣᠭ᠎ᠠ ᠲᠠᠢ ᠭᠡᠵᠦ ᠦᠵᠡᠳᠡᠭ ᠠᠴᠠ ᠨᠣᠳᠤᠬ ᠰᠢᠯᠵᠢᠬᠦ ᠪᠣᠶᠣ ᠰᠢᠨ᠎ᠡ ᠭᠡᠷ ᠪᠠᠷᠢᠬᠤ ᠳᠠᠭᠠᠨ ᠯᠠᠮᠠ ᠪᠣᠶᠣ ᠪᠦᠬᠡ᠂ ᠲᠦᠯᠭᠡᠴᠢ ᠵᠠᠯᠠᠵᠦ ᠨᠣᠳᠤᠬ ᠣᠰᠣᠨ ᠤ ᠪᠠᠨ ᠨᠠᠪᠳᠠᠬ ᠰᠠᠪᠳᠠᠬ ᠢᠶᠠᠨ ᠰᠢᠨᠵᠢᠭᠦᠯᠵᠦ ᠠᠶᠢᠯᠠᠳᠣᠭᠤᠯᠳᠠᠬ᠃ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠳᠤ᠂ ᠨᠣᠳᠤᠬ ᠣᠰᠣ ᠪᠠᠭᠤᠬᠤ᠂ ᠣᠡᠭᠭᠤᠨ ᠬᠡᠭᠦᠷ ᠲᠠᠯᠪᠢᠬᠤ᠂ ᠭᠡᠷ ᠣᠷᠣᠨ ᠪᠠᠶᠢᠭᠤᠯᠬᠤ ᠶᠢ ᠰᠢᠨᠵᠢᠬᠦ ᠳᠤ ᠶᠡᠷᠦ ᠠᠴᠠ ᠮᠣᠳᠣ᠂ ᠭᠠᠯ᠂ ᠰᠢᠷᠣᠢ᠂ ᠲᠡᠮᠦᠷ᠂ ᠣᠰᠣ ᠲᠠᠪᠣᠨ ᠮᠠᠬᠠᠪᠣᠳ ᠠᠷᠭ᠎ᠠ ᠪᠢᠯᠢᠭ ᠬᠢᠭᠡᠳ ᠣᠬᠳᠠᠷᠭᠤᠢ᠂ ᠣᠰᠣ᠂ ᠠᠭᠤᠯᠠ ᠂ ᠮᠣᠳᠣ᠂ ᠬᠡᠢ᠂ ᠭᠠᠯ᠂ ᠰᠢᠷᠣᠢ᠂ ᠲᠡᠮᠦᠷ ᠵᠡᠷᠭᠡ ᠨᠠᠢᠮᠠᠨ ᠣᠷᠣᠨ ᠲᠠᠢ ᠣᠶᠠᠯᠳᠣᠭᠤᠯᠣᠨ ᠰᠢᠨᠵᠢᠳᠡᠭ ᠶᠣᠮ᠃ ᠶᠡᠷᠦ ᠳᠡᠭᠡᠨ ᠨᠣᠳᠤᠬ ᠣᠰᠣ ᠪᠠᠭᠤᠬᠤ ᠳᠤ ᠠᠷᠣ ᠲᠦᠰᠢᠯᠭᠡ ᠶᠢᠨ ᠠᠭᠤᠯᠠ ᠪᠣᠶᠣ ᠮᠠᠩᠬ᠎ᠠ ᠨᠢ ᠦᠨᠳᠦᠷ ᠰᠦᠷᠯᠢᠭ᠂ ᠣᠢ ᠰᠢᠭᠤᠢ ᠨᠢ ᠰᠣᠷᠭᠤᠬ ᠰᠠᠬᠤᠯᠢᠬ᠂ ᠵᠡᠭᠦᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠠᠭᠤᠯᠠ ᠨᠢ ᠶᠡᠭᠡ ᠴᠢᠯᠠᠭᠤ ᠲᠠᠢ ᠪᠦᠭᠡᠳ ᠵᠦᠯᠭᠡ ᠲᠠᠢ ᠠᠷᠣ ᠲᠦᠰᠢᠯᠭᠡ ᠠᠴᠠ ᠪᠠᠨ ᠪᠣᠭᠤᠨᠢ ᠰᠢᠬ ᠪᠣᠯ ᠰᠠᠶᠢᠨ ᠭᠡᠳᠡᠭ᠃ ᠡᠮᠦᠨ᠎ᠡ ᠵᠦᠭ ᠲᠤ ᠬᠦᠰᠢᠭᠡ ᠲᠠᠳᠠᠬᠰᠠᠨ ᠰᠢᠬ ᠦᠨᠳᠦᠷ ᠠᠭᠤᠯᠠ ᠪᠣᠶᠣ ᠡᠷᠳᠡᠨᠢ ᠴᠣᠬᠴᠠᠯᠠᠬᠰᠠᠨ ᠠᠳᠠᠯᠢ ᠲᠣᠪᠤ ᠣᠪᠣᠭ᠎ᠠ ᠲᠠᠢ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠳᠠᠭᠠᠨ ᠠᠷᠰᠯᠠᠨ ᠬᠡᠪᠳᠡᠭᠰᠡᠨ ᠰᠢᠭ ᠣᠯᠠᠭᠠᠨ ᠦᠡᠭᠭᠡᠳᠡᠢ ᠭᠤᠷᠪᠠᠯᠵᠢᠨ ᠡᠰᠡᠬᠦᠯ᠎ᠡ ᠨᠠᠭᠤᠷ ᠪᠦᠷᠢᠳᠦ ᠭᠤᠣᠯ ᠭᠤᠷᠤᠬ᠎ᠠ ᠪᠠᠶᠢᠪᠠᠯ ᠮᠠᠰᠢ ᠰᠠᠶᠢᠨ ᠭᠡᠳᠡᠭ᠃ ᠡᠶᠢᠮᠦ ᠭᠠᠵᠠᠷ ᠰᠠᠭᠤᠪᠠᠯ ᠪᠠᠭᠠᠳᠣᠷ ᠴᠢᠳᠠᠯᠳᠠᠨ ᠭᠠᠷᠴᠦ᠂ ᠬᠦᠪᠡᠭᠦᠳ᠂ ᠬᠡᠦᠬᠡᠨᠴᠦᠳ ᠭᠤᠶᠣ ᠭᠡᠭᠡᠨᠴᠢᠷ ᠲᠦᠷᠦᠵᠦ ᠣᠷᠳᠣ ᠨᠠᠰᠣᠯᠠᠨ ᠣᠳᠠᠭᠠᠨ ᠵᠢᠷᠭᠠᠵᠦ᠂ ᠡᠳ᠋ ᠮᠠᠯ ᠠᠷᠪᠢᠳᠣᠨ ᠦᠷ᠎ᠡ ᠠᠴᠢ ᠲᠡᠯᠭᠡᠷᠡᠨ᠎ᠡ ᠭᠡᠳᠡᠭ᠃ ᠨᠠᠰᠣᠳᠠᠶᠢᠴᠣᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ᠂ ᠣᠣᠯ ᠤᠨ ᠴᠣᠬᠤᠷ ᠬᠠᠯᠬ᠎ᠠ ᠶᠢᠨ ᠬᠤᠰᠢᠭᠤᠨ ᠤ ᠵᠠᠰᠠᠬ ᠰᠠᠭᠤᠬᠰᠠᠨ ᠭᠠᠵᠠᠷ ᠨᠣᠶᠠᠨ ᠬᠤᠷᠢᠶ᠎ᠠ ᠶᠢ ᠪᠠᠶᠢᠭᠤᠯᠬᠤ ᠳᠤ ᠬᠠᠯᠬ᠎ᠠ ᠸᠠᠩ ᠠᠴᠠ ᠣᠯᠠᠨ ᠰᠢᠨᠵᠢᠭᠡᠴᠢ ᠶᠢ ᠵᠠᠯᠠᠵᠦ ᠨᠣᠳᠤᠬ ᠣᠰᠣᠨ ᠤ ᠪᠠᠨ ᠨᠠᠪᠳᠠᠬ ᠰᠠᠪᠳᠠᠬ ᠢ ᠦᠵᠡᠭᠦᠯᠦᠭᠰᠡᠨ ᠭᠡᠨ᠎ᠡ᠃ ᠲᠦᠷᠦᠭᠦᠦ ᠣᠳᠠᠭ᠎ᠠ ᠨᠢ ᠬᠡᠳᠦᠨ ᠬᠤᠰᠢᠭᠤ ᠳᠤ ᠠᠯᠳᠠᠷ ᠮᠠᠨᠳᠣᠬᠰᠠᠨ ᠨᠢᠭᠡᠨ ᠨᠡᠷᠡᠳᠦ ᠭᠡᠭᠡᠨ ᠢ ᠵᠠᠯᠠᠵᠦ ᠨᠣᠳᠤᠬ ᠰᠢᠨᠵᠢᠭᠦᠯᠦᠭᠰᠡᠨ ᠳᠤ ᠭᠡᠭᠡᠨ ᠠᠴᠠ ᠬᠤᠷᠳᠣᠨ ᠮᠣᠷᠢ ᠣᠨᠣᠵᠦ ᠬᠠᠯᠬ᠎ᠠ ᠶᠢᠨ ᠬᠤᠰᠢᠭᠤᠨ ᠤ ᠨᠣᠳᠤᠬ ᠢᠶᠠᠷ ᠬᠡᠳᠦᠨ ᠡᠳᠦᠷ ᠲᠣᠭᠤᠷᠢᠵᠦ ᠰᠢᠨᠵᠢᠭᠡᠳ ᠨᠢᠭᠡᠨ ᠨᠠᠪᠳᠠᠬ ᠰᠠᠪᠳᠠᠬ ᠰᠠᠶᠢᠨ ᠭᠠᠵᠠᠷ ᠢ ᠦᠵᠡᠵᠦ ᠲᠣᠭᠤᠭᠠᠳ ᠭᠠᠣᠯᠢᠨ ᠵᠣᠭᠤᠰ ᠣᠷᠬᠢᠭᠠᠳ ᠪᠣᠴᠠᠵᠦ ᠢᠷᠡᠭᠰᠡᠨ ᠢᠶᠠᠨ ᠸᠠᠩ ᠨᠣᠶᠠᠨ ᠳᠤ ᠮᠡᠳᠡᠭᠦᠯᠦᠭᠰᠡᠨ ᠭᠡᠨ᠎ᠡ᠃ ᠬᠤᠶᠠᠳᠣᠭᠠᠷ ᠣᠳᠠᠭ᠎ᠠ ᠨᠢ ᠬᠠᠯᠬ᠎ᠠ ᠸᠠᠩ ᠠᠴᠠ ᠨᠢᠭᠡᠨ ᠠᠯᠳᠠᠷᠳᠦ ᠪᠦᠭᠡ ᠶᠢ ᠵᠠᠯᠠᠵᠦ ᠸᠠᠩ ᠤᠨ ᠣᠷᠳᠣᠨ ᠪᠠᠶᠢᠭᠤᠯᠬᠤ ᠨᠠᠪᠳᠠᠬ ᠰᠠᠪᠳᠠᠬ ᠢᠶᠠᠨ ᠰᠢᠨᠵᠢᠭᠦᠯᠪᠡ᠃ ᠪᠦᠭᠡ ᠮᠦᠨ ᠯᠡ ᠬᠤᠷᠳᠣᠨ ᠮᠣᠷᠢ ᠣᠨᠣᠵᠦ ᠴᠣᠬᠤᠷ ᠬᠠᠯᠬ᠎ᠠ ᠶᠢᠨ ᠬᠤᠰᠢᠭᠤᠨ ᠤ ᠨᠣᠳᠤᠬ ᠢᠶᠠᠷ ᠬᠡᠳᠦᠨ ᠡᠳᠦᠷ ᠲᠣᠭᠤᠷᠢᠵᠦ ᠰᠢᠨᠵᠢᠭᠡᠳ ᠨᠢᠭᠡᠨ ᠰᠠᠶᠢᠨ ᠭᠠᠵᠠᠷ ᠢ ᠦᠵᠡᠵᠦ ᠲᠣᠭᠤᠭᠠᠳ ᠵᠡᠭᠦᠦ ᠬᠠᠳᠬᠤᠭᠠᠳ ᠪᠣᠴᠠᠵᠦ ᠢᠷᠡᠭᠰᠡᠨ ᠭᠡᠨ᠎ᠡ᠃ ᠬᠡᠳᠦᠨ ᠡᠳᠦᠷ ᠤᠨ ᠬᠢᠨᠢ ᠲᠠᠷᠠᠭ᠎ᠠ ᠸᠠᠩ ᠨᠣᠶᠠᠨ ᠠᠴᠠ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠬᠦᠳᠡᠯᠵᠦ ᠠᠯᠪᠠᠳᠦ ᠰᠠᠶᠢᠳ ᠢᠶᠠᠨ ᠲᠠᠭᠠᠭᠤᠯᠵᠦ ᠯᠠᠮᠠ ᠪᠣᠯᠣᠨ ᠪᠦᠭᠡ ᠶᠢᠨ ᠲᠡᠮᠳᠡᠭ ᠲᠠᠯᠪᠢᠬᠰᠠᠨ ᠭᠠᠵᠠᠷ ᠢ ᠨᠢ ᠬᠠᠶᠢᠵᠦ ᠣᠴᠢᠭᠠᠳ ᠦᠵᠡᠬᠦ ᠳᠤ ᠭᠠᠦᠯᠢᠨ ᠵᠣᠭᠤᠰ ᠤᠨ ᠲᠦᠷᠪᠡᠯᠵᠢᠨ ᠨᠦᠬᠡᠨ ᠳᠤ ᠨᠢᠭᠡᠨ ᠵᠡᠭᠦᠦ ᠶᠢ ᠬᠠᠳᠬᠤᠭᠠᠳ ᠪᠠᠶᠢᠬᠰᠠᠨ ᠢ ᠨᠢ ᠣᠯᠵᠦ ᠦᠵᠡᠭᠰᠡᠨ ᠭᠡᠨ᠎ᠡ᠃ ᠬᠠᠯᠬ᠎ᠠ ᠸᠠᠩ ᠠᠴᠠ ᠯᠠᠮᠠ ᠪᠣᠯᠣᠨ ᠪᠦᠭᠡ ᠶᠢᠨ ᠡᠷᠳᠡᠮ ᠴᠢᠳᠠᠪᠣᠷᠢ ᠶᠢ ᠶᠡᠬᠡᠳᠡ ᠪᠢᠰᠢᠷᠡᠵᠦ ᠰᠦᠵᠢᠭ ᠲᠦᠷᠦᠵᠦ ᠲᠡᠳᠡ ᠬᠤᠶᠠᠭᠤᠯᠠ ᠶᠢᠨ ᠦᠵᠡᠵᠦ ᠲᠣᠭᠤᠬᠰᠠᠨ ᠭᠠᠵᠠᠷ ᠴᠣᠬᠤᠷ ᠬᠠᠯᠬ᠎ᠠ ᠶᠢᠨ ᠬᠤᠰᠢᠭᠤᠨ ᠤ ᠲᠦᠪ ᠪᠣᠯᠬᠤ ᠨᠣᠶᠠᠨ ᠬᠤᠷᠢᠶ᠎ᠠ ᠶᠢ ᠪᠠᠶᠢᠭᠤᠯᠣᠬᠰᠠᠨ ᠭᠡᠳᠡᠭ᠃      ᠬᠤᠷᠴᠢᠨ ᠤ ᠵᠠᠷᠢᠮ ᠭᠠᠵᠠᠷ ᠢᠶᠠᠷ ᠪᠠᠰᠠ ᠲᠠᠦᠯᠠᠢ ᠭᠤᠷᠭᠤᠣᠯ ᠬᠤᠶᠠᠭᠤᠯᠠ ᠣᠷᠣ ᠪᠣᠯᠢᠶᠠᠯᠳᠣᠵᠦ ᠬᠡᠷᠡᠯᠳᠦᠵᠦ ᠲᠡᠮᠡᠴᠡᠯᠳᠦᠵᠦ ᠪᠠᠶᠢᠬᠤ ᠭᠠᠵᠠᠷ ᠤᠨ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠰᠠᠶᠢᠨ ᠭᠡᠵᠦ ᠶᠠᠷᠢᠯᠴᠠᠳᠠᠬ᠃ ᠣᠣᠯ ᠤᠨ ᠪᠢᠡᠭᠳᠦ ᠶᠢᠨ ᠬᠤᠰᠢᠭᠤᠨ ᠤ ᠨᠢᠭᠡᠨ ᠮᠠᠯᠴᠢᠨ ᠠᠴᠠ ᠲᠠᠦᠯᠠᠢ ᠭᠤᠷᠭᠤᠣᠯ ᠬᠤᠶᠠᠭᠤᠯᠠ ᠡᠭᠦᠷ ᠪᠠᠷᠢᠬᠤ ᠭᠠᠵᠠᠷ ᠪᠣᠯᠢᠶᠠᠯᠳᠣᠵᠦ ᠬᠡᠷᠡᠯᠳᠣᠵᠦ ᠪᠠᠶᠢᠬᠰᠠᠨ ᠭᠠᠵᠠᠷ ᠢ ᠣᠯᠵᠦ ᠬᠠᠷᠠᠭᠠᠳ ᠶᠡᠬᠡᠳᠡ ᠭᠠᠶᠢᠬᠠᠵᠦ ᠨᠣᠳᠤᠬ ᠰᠢᠯᠵᠢᠵᠦ ᠰᠠᠭᠤᠬᠰᠠᠨ ᠠᠴᠠ ᠭᠡᠷ ᠪᠠᠷᠢᠬᠤ ᠲᠡᠷᠡ ᠡᠳᠦᠷ ᠲᠡᠭᠡᠨ ᠭᠠᠨᠭ᠌ ᠲᠠᠢ ᠮᠦᠡᠭᠬᠦ ᠣᠯᠵᠦ ᠶᠡᠬᠡᠳᠡ ᠪᠠᠶᠠᠵᠢᠬᠰᠠᠨ ᠭᠡᠳᠡᠭ᠃ ᠭᠡᠪᠡᠴᠦ ᠡᠶᠢᠮᠦᠷᠬᠦᠦ ᠦᠵᠡᠭᠳᠡᠯ ᠨᠢ ᠬᠦᠮᠦᠨ ᠪᠦᠬᠦᠨ ᠳᠤ ᠬᠠᠷᠭᠤᠬᠤ ᠪᠢᠰᠢ ᠵᠠᠪᠠᠯ ᠡᠨᠡ ᠨᠣᠳᠤᠬ ᠲᠤ ᠰᠠᠭᠤᠬᠤ ᠬᠤᠪᠢ ᠪᠣᠶᠠᠨᠳᠠᠢ ᠬᠦᠮᠦᠨ ᠳᠤ ᠰᠠᠶ᠋ᠢ ᠬᠠᠷᠭᠤᠨ᠎ᠠ ᠭᠡᠳᠡᠭ᠃ ᠪᠠᠰᠠ ᠯᠣᠣᠰ ᠡᠵᠡᠯᠡᠭᠰᠡᠨ ᠭᠠᠵᠠᠷ ᠤᠨ ᠲᠣᠯᠣᠭᠠᠢ ᠶᠢᠨ ᠭᠤᠣᠯ ᠳᠤᠨᠢ ᠰᠢᠨ᠎ᠡ ᠭᠡᠷ ᠪᠠᠷᠢᠵᠦ ᠰᠠᠭᠤᠪᠠᠯ ᠲᠦᠷᠦᠭᠦᠦ ᠪᠠᠶᠠᠨ ᠪᠣᠯᠵᠦ ᠬᠤᠶᠠᠷ ᠯᠣᠣᠰ ᠬᠠᠷᠭᠤᠬᠰᠠᠨ ᠭᠠᠵᠠᠷ ᠰᠠᠭᠤᠪᠠᠯ ᠠᠮᠢᠳᠣᠷᠠᠯ ᠨᠢ ᠦᠭᠡᠳᠡ ᠰᠢᠭ ᠪᠣᠯᠪᠠᠴᠦ ᠬᠡᠯᠡ ᠠᠮᠠ ᠶᠢᠨ ᠵᠢᠭᠤᠷᠠᠭᠠᠨ ᠲᠠᠰᠣᠷᠠᠬᠤ ᠦᠭᠡᠢ ᠭᠡᠳᠡᠭ᠃ ᠶᠡᠭᠡ ᠵᠠᠮ ᠭᠡᠷ ᠡᠰᠡᠷᠬᠦ ᠰᠣᠮᠣᠳᠠᠵᠦ ᠢᠷᠡᠬᠦ᠂ ᠣᠯᠠᠨ ᠵᠠᠮ ᠤᠨ ᠪᠠᠯᠴᠢᠷ ᠲᠡᠭᠡᠷ᠎ᠡ᠂ ᠰᠦᠮ᠎ᠡ ᠰᠣᠪᠣᠷᠭ᠎ᠠ ᠪᠠᠷᠢᠬᠰᠠᠨ ᠭᠠᠵᠠᠷ᠂ ᠣᠯᠠᠨ ᠬᠦᠮᠦᠨ ᠤ ᠴᠢᠭᠤᠯᠭᠠᠨ ᠪᠣᠯᠣᠬᠰᠠᠨ ᠭᠠᠵᠠᠷ᠂ ᠡᠪᠡᠰᠦ ᠮᠣᠳᠣ ᠣᠷᠭᠤᠳᠠᠬ ᠦᠭᠡᠢ ᠭᠠᠵᠠᠷ᠂ ᠲᠠᠶᠢᠨ ᠤ ᠲᠠᠯᠠᠪᠠᠢ ᠪᠠᠶᠢᠬᠰᠠᠨ ᠭᠠᠵᠠᠷ᠂ ᠴᠡᠷᠢᠭ ᠪᠠᠭᠤᠬᠰᠠᠨ ᠭᠠᠵᠠᠷ᠂ ᠣᠰᠣ ᠦᠶᠡᠷᠯᠡᠭᠰᠡᠨ ᠭᠠᠵᠠᠷ᠂ ᠠᠭᠤᠯᠠ ᠨᠢᠷᠣᠭᠤ ᠬᠠᠨᠳᠣᠬᠰᠠᠨ ᠭᠠᠵᠠᠷ᠂ ᠬᠤᠳᠠᠨ ᠡᠭᠦᠳᠡᠨ ᠠᠮᠠᠰᠠᠷ᠂ ᠬᠠᠳᠠ ᠪᠠᠶᠢᠬᠰᠠᠨ ᠭᠠᠵᠠᠷ᠂ ᠪᠣᠷᠣᠭᠤ ᠲᠡᠶᠢᠰᠢ ᠬᠠᠨᠳᠣᠬᠰᠠᠨ ᠣᠰᠣᠨ ᠵᠠᠮ ᠤᠨ ᠬᠤᠶᠢᠬ ᠵᠡᠷᠭᠡ ᠭᠠᠵᠠᠷ ᠨᠣᠳᠤᠬ ᠪᠠᠭᠤᠴᠠ ᠪᠠᠭᠤᠬᠤ ᠨᠢ ᠶᠡᠭᠡ ᠮᠠᠭᠤ ᠭᠡᠳᠡᠭ᠃ ᠶᠠᠮᠠᠷᠪᠠ ᠭᠠᠵᠠᠷ ᠨᠣᠳᠤᠬ ᠰᠢᠯᠵᠢᠵᠦ ᠰᠠᠭᠤᠬᠰᠠᠨ ᠴᠦ ᠨᠣᠳᠤᠬ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠢ ᠵᠠᠪᠠᠯ ᠪᠠᠶᠠᠰᠬᠠᠬᠤ ᠶᠣᠰᠣᠳᠠᠢ ᠭᠡᠵᠦ ᠬᠤᠷᠴᠢᠨᠴᠣᠳ ᠦᠵᠡᠳᠡᠭ᠃ ᠬᠤᠷᠴᠢᠨᠴᠣᠳ ᠤᠨ ᠰᠢᠨ᠎ᠡ ᠭᠡᠷ ᠪᠠᠷᠢᠬᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠨᠣᠳᠤᠬ ᠰᠠᠭᠤᠬᠤ ᠭᠠᠵᠠᠷ ᠤᠨ ᠨᠠᠪᠳᠠᠬ ᠢ ᠲᠣᠯᠬᠢᠨ ᠪᠠ ᠵᠦᠭᠡᠯᠡᠨ ᠭᠡᠵᠦ ᠬᠤᠪᠢᠶᠠᠳᠠᠬ ᠶᠣᠮ᠃ ᠬᠡᠷᠪᠡ ᠲᠣᠯᠬᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠭᠠᠵᠠᠷ ᠰᠠᠭᠤᠬᠤ ᠴᠢᠬᠤᠯᠠᠲᠠᠢ ᠪᠣᠯ ᠭᠡᠷ ᠪᠠᠷᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠭᠠᠵᠠᠷ ᠲᠡᠭᠡᠷ᠎ᠡ ᠪᠠᠨ ᠵᠣᠬᠰᠣᠵᠦ ᠲᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠪᠠ ᠲᠡᠭᠡᠭᠰᠢ ᠲᠣᠷᠣᠬᠰᠢ ᠴᠦᠮ ᠰᠠᠷᠬᠤᠳ ᠠᠷᠢᠬᠢ ᠰᠦᠷᠴᠢᠵᠦ ᠨᠠᠪᠳᠠᠬ ᠰᠠᠪᠳᠠᠬ ᠲᠤ ᠭᠡᠷ ᠪᠠᠷᠢᠵᠦ ᠰᠠᠭᠤᠬᠤ ᠭᠡᠵᠦ ᠪᠠᠶᠢᠭ᠎ᠠ ᠪᠠᠨ ᠰᠢᠪᠰᠢᠨ ᠲᠠᠭᠠᠳᠬᠠᠵᠦ ᠨᠣᠳᠤᠬ ᠰᠠᠭᠤᠬᠤ ᠭᠠᠵᠠᠷ ᠢ ᠵᠠᠶᠢᠴᠢᠯᠠᠨ ᠦᠭᠬᠦ ᠶᠢ ᠬᠦᠰᠡᠨ ᠭᠤᠶᠣᠬᠰᠠᠨ ᠤ ᠲᠠᠷᠠᠭ᠎ᠠ ᠬᠠᠷ᠎ᠠ ᠮᠣᠷᠢ ᠪᠣᠶᠣ ᠬᠠᠷ᠎ᠠ ᠦᠬᠡᠷ ᠬᠦᠯᠦᠭᠰᠡᠨ ᠠᠨᠵᠢᠰᠣ ᠪᠠᠷ ᠭᠡᠷ ᠤᠨ ᠡᠵᠡᠨ ᠤ ᠬᠢᠨᠢ ᠲᠣᠰ ᠵᠢᠯ ᠳᠤ ᠰᠠᠭᠤᠬᠰᠠᠨ ᠨᠠᠢᠮᠠᠨ ᠣᠷᠣᠨ ᠤ ᠬᠢᠨᠢ ᠬᠡᠶᠢᠮᠣᠷᠢ ᠶᠢᠨ ᠵᠦᠭ ᠲᠤ ᠡᠬᠢᠯᠡᠨ ᠠᠨᠵᠢᠰᠣ ᠬᠦᠳᠡᠯᠭᠡᠨ ᠭᠡᠷ ᠪᠠᠷᠢᠬᠤ ᠬᠡᠪᠴᠢᠶ᠎ᠡ ᠪᠠᠷ ᠰᠣᠯᠪᠢᠴᠠᠭᠤᠯᠣᠨ ᠬᠠᠭᠠᠯᠪᠣᠷᠢᠯᠠᠵᠦ ᠲᠣᠮ ᠲᠠᠷᠣᠯᠭ᠎ᠠ ᠬᠢᠬᠦ ᠶᠢᠨ ᠬᠠᠮᠳᠦ ᠰᠣᠯᠪᠢᠴᠠᠭᠤᠯᠣᠨ ᠬᠠᠭᠠᠯᠪᠣᠷᠢᠯᠠᠬᠰᠠᠨ ᠭᠠᠵᠠᠷ ᠤᠨ ᠢᠶᠠᠨ ᠲᠣᠨᠣᠯᠵᠢᠨ ᠠᠭᠤᠯᠵᠠᠷ ᠲᠤ ᠨᠢᠭᠡ ᠲᠣᠬᠤᠢ ᠬᠠᠭᠠᠰ ᠨᠦᠬᠡ ᠮᠠᠯᠳᠠᠵᠦ ᠲᠣᠳᠣᠷ᠎ᠠ ᠨᠢ ᠠᠷᠢᠬᠢ᠂ ᠴᠠᠭᠠᠨ ᠢᠳᠡᠭᠡᠨ ᠲᠡᠷᠢᠭᠦᠳᠡᠨ ᠢ ᠪᠣᠯᠠᠵᠦ ᠭᠠᠵᠠᠷ ᠡᠳᠦᠭᠡᠨ ᠰᠠᠬᠢᠭᠤᠰᠣ ᠪᠠᠨ ᠪᠠᠶᠠᠰᠬᠠᠳᠠᠬ᠃ ᠢᠡᠭᠭᠢᠵᠦ ᠬᠢᠵᠦ ᠲᠠᠭᠤᠰᠬᠠᠭᠠᠳ ᠰᠠᠶ᠋ᠢ ᠭᠡᠷ ᠤᠨ ᠰᠠᠭᠤᠷᠢ ᠵᠠᠰᠠᠬᠤ ᠠᠵᠢᠯ ᠢᠶᠠᠨ ᠡᠬᠢᠯᠡᠭᠦᠯᠳᠡᠭ︾ ᠭᠡᠵᠡᠢ᠃      ᠰᠢᠨ᠎ᠡ ᠭᠡᠷ ᠪᠣᠰᠬᠠᠬᠤ ᠶᠢᠨ ᠪᠠᠰᠠ ᠨᠢᠭᠡ ᠴᠢᠬᠤᠯᠠ ᠡᠳᠦᠷ ᠪᠣᠯ ᠭᠡᠷ ᠪᠣᠰᠬᠠᠬᠤ ᠡᠳᠦᠷ ᠪᠣᠯᠣᠨ᠎ᠠ᠃ ᠲᠡᠷᠡ ᠨᠢ ᠭᠡᠷ ᠤᠨ ᠲᠠᠮ ᠨᠢᠷᠣᠭᠤ ᠪᠠ ᠭᠡᠷ ᠤᠨ ᠨᠢᠷᠣᠭᠤ ᠭᠠᠷᠭᠠᠬᠤ ᠡᠳᠦᠷ ᠢ ᠬᠡᠯᠡᠵᠦ ᠪᠠᠶᠢᠨ᠎ᠠ᠃ ᠲᠣᠰ ᠡᠳᠦᠷ ᠨᠢ ᠭᠡᠷ ᠤᠨ ᠮᠣᠳᠣ ᠵᠠᠰᠠᠬᠰᠠᠨ ᠮᠣᠳᠣᠴᠢᠨ ᠪᠠ ᠬᠠᠪᠰᠣᠷᠬᠤ ᠪᠠᠷ ᠢᠷᠡᠭᠰᠡᠨ ᠬᠦᠮᠦᠰ ᠭᠡᠷ ᠤᠨ ᠮᠣᠳᠣ ᠪᠠᠨ ᠲᠡᠭᠡᠭᠰᠢ ᠭᠠᠷᠭᠠᠵᠦ᠂ ᠬᠠᠮᠤᠬ ᠰᠡᠭᠦᠯ ᠳᠤ ᠪᠦᠬᠦ ᠭᠡᠷ ᠤᠨ ᠢᠶᠠᠨ ᠬᠠᠮᠤᠬ ᠤᠨ ᠲᠣᠮᠳᠠᠬᠢ ᠭᠤᠣᠯ ᠨᠢᠷᠣᠭᠤ ᠶᠢ ᠭᠠᠷᠭᠠᠬᠤ ᠶᠠᠪᠣᠳᠠᠯ ᠪᠣᠯᠣᠨ᠎ᠠ᠃ ᠭᠤᠣᠯ ᠨᠢᠷᠣᠭᠤ ᠶᠢᠨ ᠭᠤᠣᠯ ᠲᠣᠮᠳᠠ ᠬᠡᠰᠡᠭ ᠤᠨ ᠡᠯᠢᠭᠡᠨ ᠳᠤ ᠣᠯᠠᠭᠠᠨ ᠪᠦᠰ ᠤᠨ ᠲᠡᠭᠡᠷ᠎ᠡ ᠨᠠᠢᠮᠠᠨ ᠣᠷᠣᠨ ᠢ ᠵᠢᠷᠣᠵᠦ᠂ ᠲᠦᠪᠡᠳ ᠮᠣᠩᠭᠤᠯ ᠢᠶᠠᠷ ᠨᠡᠷ᠎ᠡ ᠶᠢ ᠨᠢ ᠪᠢᠴᠢᠭᠰᠡᠨ ᠵᠢᠷᠤᠬ ᠲᠠᠢ ᠪᠦᠰ ᠢ ᠭᠠᠦᠯᠢᠨ ᠵᠣᠭᠤᠰ ᠢᠶᠠᠷ ᠬᠠᠳᠠᠵᠦ᠂ ᠲᠡᠭᠦᠨ ᠠᠴᠠ ᠲᠣᠷᠣᠬᠰᠢ ᠵᠢᠵᠢᠭ ᠣᠯᠠᠭᠠᠨ ᠪᠦᠰ ᠣᠭᠤᠳᠠᠨ ᠳᠤ ᠲᠠᠪᠣᠨ ᠲᠠᠷᠢᠶᠠᠨ ᠤ ᠦᠷ᠎ᠡ ᠬᠢᠵᠦ ᠠᠮᠠᠰᠠᠷ ᠢ ᠨᠢ ᠣᠯᠠᠭᠠᠨ ᠦᠡᠭᠭᠡ ᠲᠠᠢ ᠬᠤᠶᠠᠷ ᠰᠠᠪᠬ᠎ᠠ ᠪᠠᠷ ᠲᠣᠨᠣᠯᠵᠢᠯᠠᠭᠤᠯᠣᠨ ᠬᠠᠳᠬᠤᠨ ᠲᠣᠷᠭᠤᠵᠦ᠂ ᠡᠨᠡ ᠬᠦ ᠨᠠᠢᠮᠠᠨ ᠣᠷᠣᠨ ᠤ ᠵᠢᠷᠤᠬ ᠤᠨ ᠭᠤᠣᠯ ᠲᠣᠮᠳᠠ ᠠᠴᠠ ᠨᠢ ᠲᠣᠷᠣᠬᠰᠢ ᠦᠡᠭᠭᠡ ᠪᠦᠷᠢ ᠶᠢᠨ ᠰᠠᠴᠤᠬ ᠣᠶᠠᠵᠦ ᠲᠡᠭᠦᠵᠢᠯᠡᠨ ᠲᠠᠯᠪᠢᠳᠠᠬ᠃ ᠡᠨᠡ ᠨᠢ ᠨᠠᠢᠮᠠᠨ ᠵᠦᠭ ᠤᠨ ᠡᠵᠡᠳ ᠰᠠᠬᠢᠭᠤᠰᠣ᠂ ᠨᠠᠪᠳᠠᠬ ᠰᠠᠪᠳᠠᠬ ᠢ ᠪᠠᠶᠠᠰᠬᠠᠵᠦ ᠲᠣᠰ ᠭᠡᠷ ᠲᠤ ᠦᠢᠯᠡᠴᠢᠯᠡᠭᠦᠯᠵᠦ᠂ ᠲᠠᠪᠣᠨ ᠲᠠᠷᠢᠶ᠎ᠠ ᠶᠢᠨ ᠦᠷ᠎ᠡ ᠮᠡᠳᠦ ᠡᠨᠡ ᠭᠡᠷ ᠤᠨ ᠦᠷ᠎ᠡ ᠦᠨᠳᠦᠰᠦ ᠲᠠᠰᠣᠷᠠᠰᠢ ᠦᠭᠡᠢ ᠬᠦᠭᠵᠢᠨ ᠪᠠᠳᠠᠷᠠᠵᠦ ᠦᠶ᠎ᠡ ᠣᠯᠠᠮᠵᠢᠯᠠᠬᠤ ᠶᠢ ᠵᠦᠡᠭᠨᠡᠨ ᠪᠡᠯᠭᠡᠳᠡᠭᠰᠡᠨ ᠠᠭᠤᠯᠭ᠎ᠠ ᠲᠠᠢ ᠶᠣᠮ᠃ ᠡᠭᠦᠨ ᠢ ᠬᠤᠷᠴᠢᠨᠴᠣᠳ ᠣᠯᠠᠩᠬᠢ ᠳᠠᠭᠠᠨ ᠨᠠᠷᠠᠨ ᠠᠴᠠ ᠡᠮᠦᠨ᠎ᠡ ᠪᠡᠯᠡᠳᠭᠡᠵᠦ ᠲᠠᠯᠪᠢᠳᠠᠬ᠃ ᠬᠡᠷᠪᠡ ᠨᠠᠷᠠᠨ ᠤ ᠭᠡᠷᠡᠯ ᠡᠨᠡ ᠵᠣᠬᠢᠶᠠᠬᠰᠠᠨ ᠵᠦᠢᠯ ᠳᠤ ᠲᠣᠰᠪᠠᠯ ᠲᠡᠭᠦᠨ ᠤ ᠷᠢᠳᠢ ᠰᠢᠳᠢ ᠶᠢ ᠨᠢ ᠦᠭᠡᠶᠢᠰᠭᠡᠳᠡᠭ ᠭᠡᠵᠦ ᠦᠵᠡᠳᠡᠭ ᠠᠴᠠ ᠭᠡᠷ ᠤᠨ ᠠᠳᠠᠷ ᠢ ᠭᠠᠷᠭᠠᠵᠦ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶ᠋ᠢ ᠪᠢᠳᠡᠭᠦᠮᠵᠢᠯᠡᠯ ᠢ ᠨᠢ ᠠᠪᠳᠠᠬ᠃ ᠭᠤᠣᠯ ᠨᠢᠷᠣᠭᠤ ᠪᠠᠨ ᠬᠠᠮᠤᠬ ᠰᠡᠭᠦᠯ ᠳᠤ ᠭᠡᠷ ᠤᠨ ᠣᠷᠣᠢ ᠳᠤ ᠭᠠᠷᠭᠠᠵᠦ ᠣᠷᠣᠨ ᠳᠤᠨᠢ ᠰᠠᠭᠤᠯᠭᠠᠬᠰᠠᠨ ᠤ ᠲᠠᠷᠠᠭ᠎ᠠ ᠡᠨᠡ ᠡᠳᠦᠷ ᠤᠨ ᠬᠠᠮᠢᠶᠠᠷᠣᠬᠴᠢ ᠠᠴᠠ ᠭᠡᠷ ᠤᠨ ᠣᠷᠣᠢ ᠲᠡᠭᠡᠷ᠎ᠡ ᠠᠴᠠ ᠯᠣᠩᠬᠤ ᠲᠠᠢ ᠠᠷᠢᠬᠢ ᠪᠠᠨ ᠵᠦᠭ ᠪᠦᠬᠦᠨ ᠳᠤ ᠰᠦᠷᠴᠢᠬᠦ ᠶᠢᠨ ᠬᠠᠮᠳᠦ᠄ ︽ᠵᠠ︕ ᠲᠡᠭᠡᠭᠰᠢ ᠪᠠᠨ ᠶᠡᠷᠡ ᠶᠢᠰᠦᠨ ᠲᠡᠭᠷᠢ ᠮᠢᠨᠢ ᠠᠮᠰᠠᠨ ᠵᠣᠭᠤᠬᠯᠠ ᠣᠮ ᠮᠠ ᠬᠤᠨᠭ᠌︕ ᠲᠣᠷᠣᠬᠰᠢ ᠪᠠᠨ ᠲᠠᠯᠠᠨ ᠲᠣᠯᠣᠭᠠᠨ ᠭᠠᠵᠠᠷ ᠡᠳᠦᠭᠡᠨ ᠮᠢᠨᠢ ᠠᠮᠰᠠᠨ ᠵᠣᠭᠤᠬᠯᠠ ᠣᠮ ᠮᠠ ᠬᠤᠨᠭ᠌︕ ᠲᠡᠷᠭᠡᠳᠡ ᠪᠠᠶᠢᠭ᠎ᠠ ᠨᠣᠳᠤᠬ ᠣᠰᠣᠨ ᠤ ᠡᠵᠡᠳ ᠰᠠᠬᠢᠭᠤᠰᠣ ᠨᠠᠪᠳᠠᠬ ᠰᠠᠪᠳᠠᠬ ᠮᠢᠨᠢ ᠠᠮᠰᠠᠨ ᠵᠣᠭᠤᠬᠯᠠ ᠣᠮ ᠮᠠ ᠬᠤᠨᠭ᠌︕︾ ᠭᠡᠵᠦ ᠢᠳᠡᠮᠯᠡᠨ ᠰᠦᠷᠴᠢᠭᠡᠳ ︽ᠡᠳᠦᠷ ᠤᠨ ᠰᠠᠶᠢᠨ ᠢ ᠦᠵᠡᠵᠦ᠂ ᠰᠠᠷ᠎ᠠ ᠶᠢᠨ ᠰᠠᠶᠢᠨ ᠢ ᠰᠣᠩᠭᠤᠵᠦ᠂ ᠴᠠᠬ ᠤᠨ ᠰᠠᠶᠢᠨ ᠢ ᠰᠢᠯᠢᠭᠰᠡᠭᠡᠷ ᠶᠠᠬ ᠰᠠᠶ᠋ᠢᠬᠠᠨ ᠡᠨᠡ ᠰᠠᠷ᠎ᠠ ᠶᠢᠨ ᠡᠨᠡ ᠡᠳᠦᠷ ᠤᠨ ᠡᠨᠡ ᠴᠠᠬ ᠲᠤ ᠶᠢᠰᠦᠨ ᠴᠠᠭᠠᠨ ᠬᠦᠰᠡᠯ ᠪᠡᠶᠡᠯᠡᠭᠳᠡᠵᠦ ᠠᠷᠪᠠᠨ ᠴᠠᠭᠠᠨ ᠪᠣᠶᠠᠨ ᠲᠡᠯᠭᠡᠷᠡᠬᠦ ᠦᠯᠵᠡᠶᠢᠳᠡᠢ ᠰᠠᠶᠢᠬᠠᠨ ᠡᠳᠦᠷ ᠲᠣᠬᠢᠶᠠᠯᠳᠣᠬᠰᠠᠨ ᠲᠣᠯᠠ ᠬᠡᠨ ᠭᠤᠸᠠᠢ ᠠᠴᠠ ᠭᠡᠷ ᠢᠶᠠᠨ ᠪᠣᠰᠬᠠᠵᠦ ᠭᠤᠣᠯ ᠨᠢᠷᠣᠭᠤ ᠪᠠᠨ ᠭᠠᠷᠭᠠᠵᠦ ᠣᠷᠣᠨ ᠳᠤᠨᠢ ᠰᠠᠭᠤᠯᠭᠠᠪᠠ᠃ ᠦᠯᠵᠡᠶᠢᠳᠡᠢ ᠡᠳᠦᠷ ᠤᠨ ᠪᠡᠯᠭᠡ ᠲᠠᠢ ᠴᠠᠬ ᠲᠤ ᠰᠢᠨ᠎ᠡ ᠭᠡᠷ ᠢᠶᠠᠨ ᠪᠣᠰᠬᠠᠬᠰᠠᠨ ᠠᠴᠠ ᠠᠷᠪᠠᠨ ᠵᠦᠭ ᠤᠨ ᠡᠵᠡᠳ ᠰᠠᠬᠢᠭᠤᠰᠣ ᠦᠷᠦᠰᠢᠶᠡᠨ ᠰᠣᠶᠣᠷᠬᠠᠵᠦ᠂ ᠨᠣᠳᠤᠬ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠡᠮᠵᠢᠨ ᠲᠡᠳᠭᠦᠵᠦ᠂ ᠲᠡᠯ ᠢ ᠨᠢ ᠵᠠᠰᠠᠬᠤ ᠠᠴᠠ ᠠᠳᠣᠭᠤᠨ ᠰᠦᠷᠦᠭ ᠣᠯᠠᠰᠢᠷᠠᠵᠦ᠂ ᠲᠡᠯᠡᠩ ᠢ ᠨᠢ ᠰᠢᠪᠳᠣᠷᠬᠤ ᠠᠴᠠ ᠦᠬᠡᠷ ᠤᠨ ᠰᠦᠷᠦᠭ ᠨᠢ ᠵᠣᠵᠠᠭᠠᠷᠠᠵᠦ᠂ ᠬᠤᠳᠠᠨ ᠲᠣᠳᠣᠷ᠎ᠠ ᠨᠢ ᠬᠤᠨᠢ ᠢᠮᠠᠭ᠎ᠠ ᠲᠦᠭᠦᠷᠴᠦ᠂ ᠬᠤᠷᠭᠤ ᠲᠣᠳᠣᠷ᠎ᠠ ᠨᠢ ᠮᠦᠡᠭᠬᠦ ᠵᠣᠭᠤᠰ ᠨᠢ ᠪᠢᠯᠬᠠᠷᠠᠵᠦ᠂ ᠬᠡᠷᠡᠭ ᠵᠠᠷᠭᠤ ᠳᠤ ᠣᠷᠢᠶᠠᠴᠠᠯᠳᠣᠬᠤ ᠦᠭᠡᠢ᠂ ᠬᠢᠵᠢᠭ ᠲᠠᠬᠤᠯ ᠳᠤ ᠣᠨᠣᠬᠳᠠᠬᠤ ᠦᠭᠡᠢ᠂ ᠬᠦᠨᠵᠢᠯᠡ ᠲᠦᠭᠦᠷᠡᠩ ᠬᠡᠦᠬᠡᠳ ᠵᠠᠶᠠᠭᠠᠵᠦ᠂ ᠬᠦᠰᠡᠭᠰᠡᠨ ᠪᠦᠬᠦᠨ ᠨᠢ ᠰᠡᠳᠭᠢᠯᠴᠢᠯᠡᠨ ᠪᠦᠳᠦᠬᠦ ᠪᠣᠯᠳᠣᠭᠠᠢ ᠁︾ ᠭᠡᠵᠦ ᠢᠷᠦᠭᠡᠯ ᠵᠦᠡᠭᠨᠡᠯ ᠲᠠᠯᠪᠢᠵᠦ ᠰᠢᠨ᠎ᠡ ᠨᠣᠳᠤᠬ ᠤᠨ ᠢᠶᠠᠨ ᠨᠠᠪᠳᠠᠬ ᠰᠠᠪᠳᠠᠬ ᠢ ᠪᠠᠶᠠᠰᠬᠠᠬᠤ ᠪᠠᠷ ᠭᠡᠷ ᠤᠨ ᠣᠷᠣᠢ ᠲᠡᠭᠡᠷ᠎ᠡ ᠠᠴᠠ ᠪᠣᠣᠪᠤ ᠪᠣᠭᠤᠷᠰᠤᠬ᠂ ᠰᠢᠬᠢᠷ᠂ ᠵᠢᠮᠢᠰ᠂ ᠲᠠᠮᠠᠬᠢ ᠵᠡᠷᠭᠡ ᠶᠢ ᠵᠦᠭ ᠪᠦᠬᠦᠨ ᠳᠤ ᠰᠠᠴᠣᠳᠠᠬ᠃ ᠡᠭᠦᠨ ᠳᠤ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠬᠡᠦᠬᠡᠳ ᠪᠠᠭᠠᠴᠣᠳ ᠪᠠ ᠠᠶᠢᠯ ᠤᠨ ᠬᠦᠮᠦᠰ ᠪᠦᠭᠦᠳᠡᠭᠡᠷ ᠪᠠᠶᠠᠷᠯᠠᠨ ᠬᠦᠭᠡᠷᠦᠯᠳᠦᠵᠦ ︽ᠰᠢᠨ᠎ᠡ ᠨᠣᠳᠤᠬ ᠤᠨ ᠡᠵᠡᠳ ᠰᠠᠬᠢᠭᠤᠰᠣ ᠨᠠᠪᠳᠠᠬ ᠰᠠᠪᠳᠠᠬ ᠤᠨ ᠬᠡᠰᠢᠭ ᠠᠴᠠ ᠬᠦᠷᠳᠡᠶ᠎ᠡ︾ ᠭᠡᠵᠦ ᠲᠡᠳᠡᠭᠡᠷ ᠰᠠᠴᠣᠬᠰᠠᠨ ᠪᠣᠣᠪᠤ ᠪᠣᠭᠤᠷᠰᠤᠬ ᠤᠨ ᠵᠦᠢᠯ ᠤᠳ ᠢ ᠣᠷᠣᠯᠳᠣᠨ ᠲᠡᠭᠦᠵᠦ ᠠᠪᠳᠠᠬ᠃ ᠬᠤᠷᠴᠢᠨ ᠨᠣᠳᠤᠬ ᠲᠤ ︽ᠦᠨᠳᠦᠷ ᠭᠠᠵᠠᠷ ᠲᠤ ᠶᠡᠭᠡ ᠭᠡᠷ ᠢ ᠪᠣᠭᠤᠨᠢ ᠪᠠᠷᠢᠵᠦ᠂ ᠪᠣᠭᠤᠨᠢ ᠭᠠᠵᠠᠷ ᠭᠤᠣᠯ ᠭᠡᠷ ᠢ ᠦᠨᠳᠦᠷ ᠪᠠᠷᠢ᠂ ᠪᠠᠷᠠᠭᠤᠨ ᠴᠢᠬᠢᠨ ᠭᠡᠷ ᠦᠨᠳᠦᠷ ᠪᠣᠯ ᠦᠬᠢᠨ ᠳᠤ ᠰᠠᠶᠢᠨ᠂ ᠬᠦᠪᠡᠭᠦᠨ ᠳᠤ ᠮᠠᠭᠤ᠃ ᠵᠡᠭᠦᠨ ᠴᠢᠬᠢᠨ ᠭᠡᠷ ᠦᠨᠳᠦᠷ ᠪᠣᠯ ᠬᠦᠦ ᠳᠤ ᠰᠠᠶᠢᠨ᠂ ᠦᠬᠢᠨ ᠳᠤ ᠮᠠᠭᠤ᠂ ᠬᠦᠷᠢᠶᠡᠨ ᠲᠣᠳᠣᠷ᠎ᠠ ᠵᠡᠭᠦᠨ ᠡᠮᠦᠨ᠎ᠡ ᠬᠤᠳᠳᠤᠬ ᠪᠠᠶᠢᠪᠠᠯ ᠠᠵᠣ ᠲᠦᠷᠦᠬᠦᠢ ᠳᠤ ᠰᠠᠶᠢᠨ᠂ ᠨᠢᠳᠣᠨ ᠳᠤ ᠮᠠᠭᠤ᠃ ᠬᠤᠳᠳᠤᠬ ᠢ ᠬᠦᠷᠢᠶᠡᠨ ᠭᠠᠳᠠᠨ᠎ᠠ ᠵᠡᠭᠦᠨ ᠡᠮᠦᠨ᠎ᠡ ᠮᠠᠯᠳᠠᠪᠠᠯ ᠯᠣᠣ ᠶᠢᠨ ᠨᠢᠳᠦ ᠮᠡᠳᠦ ᠮᠠᠰᠢ ᠰᠠᠶᠢᠨ ᠁ ᠭᠡᠬᠦ ᠮᠡᠳᠦ ᠶᠢᠨ ᠶᠣᠰᠣ ᠣᠴᠢᠷ ᠤᠳ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ ᠬᠠᠭᠠᠯᠭᠠᠨ ᠭᠡᠷ ᠬᠡᠷᠡᠮ ᠠᠴᠠ ᠦᠨᠳᠦᠷ ᠪᠣᠯ ᠭᠡᠷ ᠤᠨ ᠡᠵᠡᠨ ᠰᠡᠳᠭᠢᠯ ᠠᠮᠣᠷ ᠦᠭᠡᠢ᠂ ᠬᠠᠭᠠᠯᠭᠠᠨ ᠲᠡᠭᠡᠷ᠎ᠡ ᠣᠰᠣ ᠲᠣᠬᠳᠠᠪᠠᠯ ᠬᠦᠷᠦᠩᠭᠡ ᠦᠯᠦ ᠲᠣᠬᠳᠠᠬᠤ᠃ ᠮᠣᠳᠣ ᠪᠠᠶᠢᠪᠠᠯ ᠬᠢᠵᠢᠭ ᠡᠪᠡᠳᠴᠢᠨ ᠳᠤ ᠨᠡᠷᠪᠡᠭᠳᠡᠨ᠎ᠡ᠃ ᠬᠤᠶᠠᠷ ᠵᠠᠮ ᠤᠨ ᠠᠭᠤᠯᠵᠠᠷ ᠬᠠᠭᠠᠯᠭᠠᠨ ᠲᠡᠷᠭᠡᠳᠡ ᠨᠠᠶᠢᠯᠡᠪᠡᠯ ᠬᠡᠰᠢᠭ ᠬᠤᠳᠤᠬ ᠵᠠᠶᠢᠯᠠᠬᠤ᠃ ᠭᠡᠷ ᠤᠨ ᠲᠦᠷᠪᠡᠨ ᠵᠦᠭ ᠤᠨ ᠠᠯᠢ ᠵᠦᠭ ᠠᠴᠠ ᠭᠡᠰᠡᠨ ᠰᠣᠮᠣ ᠬᠠᠷᠪᠣᠬᠰᠠᠨ ᠮᠡᠳᠦ ᠣᠰᠣ ᠣᠷᠤᠰᠴᠤ ᠢᠷᠡᠪᠡᠯ ᠬᠡᠦᠬᠡᠳ ᠬᠡᠯᠡᠭᠡᠢ ᠲᠦᠷᠦᠬᠦ᠂ ᠭᠡᠷ ᠤᠨ ᠠᠰ ᠡᠮᠦᠨ᠎ᠡ ᠠᠯᠢᠰᠣ ᠡᠪᠡᠰᠦ ᠬᠤᠷᠢᠶᠠᠪᠠᠯ ᠬᠢᠵᠢᠭ ᠡᠪᠡᠳᠴᠢᠨ ᠪᠣᠯᠣᠨ᠎ᠠ︾ ᠭᠡᠬᠦ ᠮᠡᠳᠦ ᠶᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠤᠨ ᠲᠣᠯᠬᠢᠨ ᠲᠦᠯᠭᠡᠨ ᠢ ᠰᠢᠨᠵᠢᠬᠦ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠨᠤᠭᠤᠳ ᠪᠠᠶᠢᠳᠠᠬ᠃      ᠬᠤᠷᠴᠢᠨ ᠤ ᠪᠦᠬᠡ ᠨᠠᠷ ᠠᠴᠠ ᠪᠠᠰᠠ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠲᠣᠬᠰᠢᠨ ᠪᠣᠶᠣ ᠡᠷᠢᠶᠠᠨ ᠲᠠᠢ ᠭᠠᠵᠠᠷ ᠲᠠᠷᠣᠯᠭ᠎ᠠ ᠬᠢᠬᠦ ᠦᠢᠯᠡ ᠪᠣᠢ᠃ ᠵᠢᠱᠢᠶᠡᠯᠡᠪᠡᠯ᠂ ᠬᠦᠮᠦᠨ ᠢ ᠰᠦᠨᠢ ᠲᠦᠯᠢ ᠪᠠᠷ ᠠᠮᠠᠷᠬᠠᠨ ᠲᠦᠭᠡᠷᠢᠭᠦᠯᠳᠡᠭ ᠭᠠᠵᠠᠷ ᠢ ᠡᠷᠢᠶᠡᠨ ᠲᠠᠢ ᠭᠠᠵᠠᠷ ᠭᠡᠵᠦ ᠡᠨᠡ ᠭᠠᠵᠠᠷ ᠰᠢᠷᠣᠢ ᠣᠪᠣᠭᠠᠯᠠᠭᠠᠳ ᠦᠨᠳᠦᠷ ᠮᠣᠳᠣᠨ ᠤ ᠭᠤᠣᠯ ᠰᠠᠯᠠᠭᠠᠨ ᠲᠣᠮᠳᠠ ᠠᠴᠠ ᠲᠡᠭᠷᠢ ᠶᠢᠨ ᠰᠣᠮᠣ ᠡᠯᠬᠦᠵᠦ ᠲᠠᠯᠪᠢᠭᠠᠳ ᠲᠠᠷᠣᠯᠭ᠎ᠠ ᠪᠣᠯᠭᠠᠳᠠᠬ᠃ ᠪᠠᠰᠠ ᠬᠦᠮᠦᠨ ᠢ ᠬᠢᠯᠪᠠᠷᠬᠠᠨ ᠲᠦᠭᠡᠷᠢᠭᠦᠯᠳᠡᠭ᠂ ᠠᠯᠪᠢᠨ ᠭᠠᠯ ᠰᠣᠯᠪᠢᠴᠠᠳᠠᠬ ᠭᠠᠵᠠᠷ ᠢ ᠪᠣᠮ ᠪᠣᠰᠣᠯ᠎ᠠ ᠭᠡᠵᠦ ᠪᠣᠮ ᠪᠣᠰᠣᠬᠰᠠᠨ ᠭᠠᠵᠠᠷ ᠲᠤ ᠢᠮᠠᠭ᠎ᠠ ᠪᠣᠶᠣ ᠬᠤᠨᠢ ᠠᠯᠠᠵᠦ ᠴᠢᠰᠣ ᠶᠢ ᠨᠢ ᠰᠦᠷᠴᠢᠭᠡᠳ ᠮᠢᠬ᠎ᠠ ᠶᠢ ᠨᠢ ᠴᠢᠨᠡᠵᠦ ᠢᠳᠡᠭᠡᠳ ᠠᠷᠠᠰᠣᠨ ᠳᠤᠨᠢ ᠭᠡᠳᠡᠰᠦ ᠬᠦᠵᠡᠭᠡ ᠰᠢᠬᠢᠷ᠎ᠡ ᠲᠣᠯᠣᠭᠠᠢ ᠶᠠᠰᠣ ᠵᠡᠷᠭᠡ ᠶᠢ ᠨᠢ ᠪᠠᠭᠯᠠᠵᠦ ᠨᠦᠬᠡᠯᠡᠭᠡᠳ ᠲᠡᠭᠦᠨ ᠤ ᠪᠠᠨ ᠲᠡᠭᠡᠷ᠎ᠡ ᠲᠠᠪᠣᠨ ᠲᠠᠷᠢᠶᠠᠨ ᠦᠷ᠎ᠡ ᠶᠢ ᠭᠠᠨᠭ᠌ ᠪᠣᠶᠣ ᠪᠣᠳᠣᠩ ᠳᠤ ᠰᠠᠪᠠᠯᠠᠭᠠᠳ ᠴᠢᠯᠠᠭᠤ ᠪᠠᠷ ᠲᠠᠷᠣᠵᠦ ᠲᠠᠯᠪᠢᠨ᠎ᠠ᠃ ᠲᠠᠷᠠᠭ᠎ᠠ ᠨᠢ ᠪᠦᠬᠡ ᠨᠠᠷ ᠠᠴᠠ ᠰᠠᠯᠠᠭ᠎ᠠ ᠵᠠᠮ ᠪᠦᠷᠢ ᠳᠤ ᠰᠠᠭᠠᠬ ᠪᠣᠶᠣ ᠬᠠᠷ᠎ᠠ ᠪᠣᠷᠴᠠᠬ ᠰᠠᠴᠣᠵᠦ ᠲᠠᠷᠣᠯᠭ᠎ᠠ ᠬᠢᠳᠡᠭ᠃     ᠣᠡᠭᠭᠤᠨ ᠬᠡᠭᠦᠷ ᠤᠨ ᠨᠠᠪᠳᠠᠬ ᠰᠠᠪᠳᠠᠬ      ᠬᠤᠷᠴᠢᠨ ᠳᠤ ᠨᠣᠳᠤᠬ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠢ ᠡᠷᠬᠢᠮᠯᠡᠳᠡᠭ ᠠᠴᠠ ᠭᠠᠳᠠᠨ᠎ᠠ ᠬᠡᠭᠦᠷ ᠣᠡᠭᠭᠤᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠢ ᠴᠦ ᠴᠢᠬᠤᠯᠠᠴᠢᠯᠠᠳᠠᠬ ᠪᠣᠯᠬᠤᠷ ︽ᠨᠣᠳᠤᠬ ᠤᠨ ᠨᠠᠪᠳᠠᠬ ᠨᠢᠭᠡ ᠦᠶ᠎ᠡ ᠲᠠᠭᠠᠵᠦ᠂ ᠣᠡᠭᠭᠤᠨ ᠤ ᠰᠠᠪᠳᠠᠬ ᠦᠶ᠎ᠡ ᠦᠶ᠎ᠡ ᠲᠠᠭᠠᠨ᠎ᠠ︾ ᠭᠡᠳᠡᠭ ᠬᠡᠯᠡᠯᠭᠡ ᠪᠣᠢ ᠪᠣᠯᠵᠠᠢ᠃ ᠠᠷᠠᠳ ᠤᠨ ᠲᠣᠮᠳᠠᠬᠢ ᠨᠠᠪᠳᠠᠬ ᠰᠠᠪᠳᠠᠬ ᠰᠢᠨᠵᠢᠳᠡᠭ ᠬᠦᠮᠦᠰ ᠴᠦ ᠦᠪᠡᠷ ᠦᠪᠡᠷ ᠤᠨ ᠢᠶᠠᠨ ᠨᠣᠳᠤᠬ ᠣᠰᠣ ᠰᠢᠨᠵᠢᠬᠦ ᠠᠷᠭ᠎ᠠ ᠬᠡᠯᠪᠡᠷᠢ ᠪᠠᠶᠢᠳᠠᠬ ᠪᠣᠯᠪᠠᠴᠦ ᠶᠡᠷᠦᠩᠬᠡᠢ ᠳᠡᠭᠡᠨ ᠠᠳᠠᠯᠢᠪᠳᠣᠷ ᠰᠢᠬ ᠪᠠᠶᠢᠳᠠᠬ᠃ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠳᠤ ︽ᠬᠡᠭᠦᠷ ᠣᠡᠭᠭᠤᠨ ᠤ ᠭᠠᠵᠠᠷ ᠢ ᠰᠢᠨᠵᠢᠬᠦ ᠳᠤ ᠵᠡᠭᠦᠨ᠂ ᠪᠠᠷᠠᠭᠤᠨ᠂ ᠡᠮᠦᠨ᠎ᠡ᠂ ᠣᠮᠠᠷ᠎ᠠ ᠲᠦᠷᠪᠡᠨ ᠵᠦᠭ ᠢ ᠠᠩᠬᠠᠷᠳᠠᠬ ᠶᠣᠮ ᠭᠡᠨ᠎ᠡ᠃ ᠬᠡᠷᠪᠡ ᠣᠡᠭᠭᠤᠨ ᠲᠠᠯᠪᠢᠬᠰᠠᠨ ᠭᠠᠵᠠᠷ ᠨᠢ ᠲᠡᠭᠰᠢ ᠲᠦᠭᠦᠷᠡᠩ᠂ ᠡᠮᠦᠨ᠎ᠡ ᠵᠦᠭ ᠠᠴᠠ ᠨᠢ ᠡᠭᠦᠳᠡ ᠬᠠᠭᠠᠯᠭᠠᠨ ᠤ ᠬᠡᠯᠪᠡᠷᠢᠳᠡᠢ ᠣᠷᠣᠵᠦ ᠢᠷᠡᠬᠦ ᠬᠤᠪᠬᠢᠯ ᠲᠠᠢ ᠪᠦᠭᠡᠳ ᠪᠠᠷᠠᠭᠤᠨ ᠵᠡᠭᠦᠨ ᠬᠤᠶᠠᠷ ᠠᠭᠤᠯᠠ ᠪᠣᠶᠣ ᠮᠠᠩᠬᠠᠨ ᠬᠤᠨᠭ᠍ᠰᠢᠶᠠᠷ ᠲᠣᠳᠣᠬᠰᠢ ᠦᠡᠭᠭᠡᠶᠢᠭᠰᠡᠨ ᠣᠷᠣᠨ ᠪᠠᠶᠢᠪᠠᠯ ᠲᠡᠭᠦᠨ ᠢ ᠬᠦᠬᠡ ᠯᠣᠣ ᠴᠠᠭᠠᠨ ᠪᠠᠷᠰ ᠭᠡᠵᠦ ᠡᠶᠢᠮᠦ ᠭᠠᠵᠠᠷ ᠬᠤᠸᠠᠷᠠᠬ ᠪᠣᠯ ᠰᠢᠷᠡᠭᠡᠨ ᠯᠠᠮᠠ ᠰᠠᠭᠤᠵᠦ᠂ ᠢᠵᠠᠭᠤᠷᠳᠠᠨ ᠪᠣᠯ ᠨᠣᠶᠠᠨ ᠲᠠᠪᠰᠢᠵᠦ᠂ ᠡᠭᠡᠯ ᠠᠷᠠᠳ ᠪᠣᠯ ᠲᠦᠰᠢᠮᠡᠯ ᠰᠠᠭᠤᠵᠦ᠂ ᠬᠡᠦᠬᠡᠨ ᠨᠢ ᠪᠠᠶᠠᠨ ᠨᠣᠶᠠᠨ ᠳᠤ ᠣᠴᠢᠵᠦ᠂ ᠡᠳ᠋ ᠠᠰᠢᠬ ᠡᠯᠪᠡᠭᠵᠢᠵᠦ ᠴᠢᠨᠡᠭᠡᠯᠢᠭᠵᠢᠨ ᠬᠤᠳᠠᠯᠠ ᠲᠡᠭᠦᠰ ᠪᠣᠯᠵᠦ ᠲᠡᠭᠵᠢᠷᠡᠨ᠎ᠡ᠃ ᠬᠡᠭᠦᠷ ᠢᠶᠠᠨ ᠲᠣᠯᠣᠭᠠᠨ ᠲᠣᠬᠤᠢ ᠲᠣᠷᠣᠬᠰᠢ ᠶᠠᠬ ᠭᠠᠵᠠᠷ ᠤᠨ ᠢᠳᠡ ᠲᠡᠭᠡᠷ᠎ᠡ ᠲᠠᠯᠪᠢᠪᠠᠯ ᠰᠠᠶᠢᠨ᠃ ᠭᠠᠳᠠᠭᠤᠷ ᠨᠢ ᠭᠠᠷᠬᠠᠯᠠᠬᠰᠠᠨ ᠭᠦᠳᠦᠭᠦᠷ ᠵᠣᠣ ᠮᠠᠩᠬ᠎ᠠ ᠪᠣᠶᠣ ᠨᠠᠮᠬᠠᠨ ᠠᠭᠤᠯᠠ ᠶᠢ ᠲᠣᠯᠣᠭᠠᠢ ᠰᠡᠭᠦᠯ ᠨᠡᠶᠢᠯᠡᠭᠰᠡᠨ ᠯᠣᠣ ᠭᠡᠵᠦ᠂ ᠰᠣᠪᠠᠬ ᠣᠯᠠᠨ ᠲᠠᠢ ᠨᠢᠭᠡᠨ ᠲᠣᠪᠣᠴᠠᠬ ᠪᠠᠶᠢᠪᠠᠯ ᠠᠯᠳᠠᠨ ᠮᠡᠯᠡᠬᠡᠢ ᠭᠡᠵᠦ᠂ ᠡᠪᠡᠰᠦ ᠣᠷᠭᠤᠳᠠᠬ ᠦᠭᠡᠢ ᠰᠢᠷ᠎ᠠ ᠲᠣᠪᠣᠴᠠᠬ ᠢ ᠠᠯᠳᠠᠨ ᠠᠭᠠᠯᠵᠢ ᠭᠡᠵᠦ ᠪᠠᠷᠠᠭᠤᠨ ᠬᠤᠶᠢᠨ᠎ᠠ᠂ ᠵᠡᠭᠦᠨ ᠬᠤᠶᠢᠳᠦ ᠠᠴᠠ ᠰᠣᠨᠣᠯᠵᠠᠨ ᠢᠷᠡᠭᠰᠡᠨ ᠬᠦᠳᠦᠯ ᠤᠨ ᠬᠤᠰᠢᠭᠤᠨ ᠳᠤ ᠡᠶᠢᠮᠦ ᠰᠢᠷ᠎ᠠ ᠲᠣᠪᠣᠴᠠᠬ ᠪᠠᠶᠢᠪᠠᠯ ᠬᠤᠣᠰ ᠯᠣᠣ ᠰᠣᠪᠣᠳ ᠢᠶᠠᠷ ᠲᠣᠬᠯᠠᠬᠤ ᠭᠡᠳᠡᠭ᠃ ᠬᠡᠷᠪᠡ ᠠᠷᠣ ᠠᠴᠠ ᠠᠭᠤᠯᠠ ᠬᠤᠰᠢᠭᠤ ᠪᠠᠶᠢᠪᠠᠯ ᠭᠠᠭ᠋ᠠᠢ ᠶᠢᠨ ᠬᠤᠨᠭ᠍ᠰᠢᠶᠠᠷ ᠭᠡᠳᠡᠭ ᠲᠣᠯᠠ ᠡᠶᠢᠮᠦ ᠭᠠᠵᠠᠷ ᠬᠡᠭᠦᠷ ᠲᠠᠯᠪᠢᠬᠤ ᠶᠢ ᠴᠡᠭᠡᠷᠯᠡᠬᠦ ᠬᠡᠷᠡᠭᠳᠡᠢ︾ ᠭᠡᠵᠦ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠵᠦ ᠪᠠᠶᠢᠳᠠᠬ᠃ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠳᠤ ᠲᠡᠮᠳᠡᠭᠯᠡᠭᠰᠡᠨ ᠡᠨᠡ ᠬᠦ ᠠᠷᠭ᠎ᠠ ᠨᠢ ᠭᠠᠵᠠᠷ ᠤᠨ ᠪᠠᠶᠢᠴᠠ᠂ ᠬᠡᠯᠪᠡᠷᠢ ᠲᠦᠷᠰᠦ᠂ ᠰᠢᠷᠣᠢ ᠶᠢᠨ ᠰᠢᠨᠵᠢ ᠪᠠᠶᠢᠳᠠᠯ ᠵᠡᠷᠭᠡ ᠪᠠᠷ ᠨᠢ ᠨᠠᠪᠳᠠᠬ ᠰᠠᠪᠳᠠᠬ ᠢ ᠨᠢ ᠰᠢᠨᠵᠢᠨ ᠲᠣᠳᠣᠯᠠᠵᠦ ᠪᠠᠶᠢᠭ᠎ᠠ ᠠᠷᠭ᠎ᠠ ᠪᠣᠯᠣᠨ᠎ᠠ᠃ ᠵᠢᠷᠣᠬᠠᠢ ᠶᠢᠨ ᠣᠬᠠᠭᠠᠨ ᠠᠴᠠ ᠭᠠᠳᠠᠨ᠎ᠠ ᠬᠤᠷᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠲᠣᠮᠳᠠ ᠪᠠᠰᠠ ᠣᠡᠭᠭᠤᠨ ᠬᠡᠭᠦᠷ ᠲᠠᠯᠪᠢᠬᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠭᠠᠵᠠᠷ ᠢ ᠰᠣᠩᠭᠤᠬᠤ ᠲᠣᠬᠠᠢ ᠣᠯᠠᠨ ᠵᠦᠢᠯ ᠤᠨ ᠠᠷᠭ᠎ᠠ ᠬᠡᠯᠪᠡᠷᠢ ᠪᠠᠶᠢᠳᠠᠬ᠃ ᠠᠷᠠᠳ ᠤᠨ ᠲᠣᠮᠳᠠᠬᠢ ᠣᠯᠠᠮᠵᠢᠯᠠᠯ ᠶᠠᠷᠢᠶ᠎ᠠ ᠶᠢ ᠦᠨᠳᠦᠰᠦᠯᠡᠪᠡᠯ᠂ ᠣᠣᠯ ᠤᠨ ᠴᠣᠬᠤᠷ ᠬᠠᠯᠬ᠎ᠠ ᠶᠢᠨ ᠬᠤᠰᠢᠭᠤᠨ ᠳᠤ 19 ᠳ᠋ᠦ᠋ᠬᠡᠷ ᠵᠠᠭᠤᠨ ᠤ ᠰᠡᠭᠦᠯᠴᠢ ᠶᠢᠨ ᠦᠶ᠎ᠡ ᠪᠠᠷ ᠨᠢᠭᠡᠨ ᠪᠦᠯᠦᠭ ᠮᠣᠩᠭᠤᠯᠵᠢᠨ ᠬᠤᠰᠢᠭᠤ ᠠᠴᠠ ᠨᠡᠭᠦᠵᠦ ᠢᠷᠡᠭᠰᠡᠨ ᠣᠷᠢᠶᠠᠩᠬᠠᠢ ᠣᠪᠣᠬᠳᠦ ᠲᠠᠪᠣᠨᠠᠩ ᠤᠳ ᠰᠠᠭᠤᠷᠢᠰᠢᠨ ᠠᠮᠢᠳᠣᠷᠠᠬᠰᠠᠨ ᠭᠡᠳᠡᠭ᠃ ᠨᠢᠭᠡᠨ ᠡᠳᠦᠷ ᠣᠷᠢᠶᠠᠩᠬᠠᠢ ᠣᠪᠣᠬᠳᠦ ᠲᠠᠪᠣᠨᠠᠩ ᠨᠢ ᠲᠡᠭᠡᠳᠦ ᠶᠢᠨ ᠬᠡᠭᠦᠷ ᠢᠶᠠᠨ ᠣᠡᠭᠭᠤᠯᠠᠬᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠭᠠᠵᠠᠷ ᠰᠣᠩᠭᠤᠬᠤ ᠪᠠᠷ ᠪᠣᠯᠵᠠᠢ᠃ ᠲᠡᠷᠡ ᠬᠤᠷᠳᠣᠨ ᠮᠣᠷᠢ ᠣᠨᠣᠵᠦ ᠬᠤᠶᠠᠷ ᠭᠤᠷᠪᠠᠨ ᠡᠳᠦᠷ ᠡᠷᠢᠭᠰᠡᠭᠡᠷ ᠪᠠᠶᠢᠵᠦ ᠭᠤᠷᠪᠠᠳᠣᠭᠠᠷ ᠡᠳᠦᠷ ᠤᠨ ᠬᠢᠨᠢ ᠨᠠᠷᠠᠨ ᠮᠠᠨᠳᠣᠬᠤ ᠦᠶ᠎ᠡ ︵ᠲᠠᠦᠯᠠᠢ ᠴᠠᠬ︶ ᠪᠠᠷ ᠮᠠᠩᠬᠠᠨ ᠤ ᠡᠩᠭᠡᠷ ᠤᠨ ᠨᠠᠷᠠᠨ ᠤ ᠡᠭᠡᠪᠦᠷ ᠭᠠᠵᠠᠷ ᠠᠴᠠ ᠨᠢᠭᠡᠨ ᠲᠠᠦᠯᠠᠢ ᠪᠣᠰᠣᠨ ᠭᠠᠷᠣᠬᠰᠠᠨ ᠢ ᠣᠯᠵᠦ ᠦᠵᠡᠭᠡᠳ ᠨᠠᠪᠳᠠᠬ ᠰᠠᠪᠳᠠᠬ ᠰᠠᠶᠢᠳᠠᠢ ᠭᠠᠵᠠᠷ ᠭᠡᠵᠦ ᠮᠡᠳᠡᠭᠡᠳ ᠲᠡᠭᠡᠳᠦ ᠶᠢᠨ ᠣᠡᠭᠭᠤᠨ ᠢᠶᠠᠨ ᠲᠣᠬᠳᠠᠭᠠᠬᠰᠠᠨ ᠭᠡᠳᠡᠭ᠃ ᠨᠣᠳᠤᠬ ᠤᠨ ᠪᠣᠭᠤᠷᠣᠯᠴᠣᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ︽ᠣᠷᠢᠶᠠᠩᠬᠠᠢ ᠣᠪᠣᠬᠳᠦ ᠨᠢ ᠡᠶᠢᠮᠦᠷᠬᠦᠦ ᠪᠡᠯᠭᠡᠳᠦ ᠭᠠᠵᠠᠷ ᠲᠡᠭᠡᠳᠦ ᠶᠢᠨ ᠣᠡᠭᠭᠤᠨ ᠢᠶᠠᠨ ᠲᠠᠯᠪᠢᠬᠰᠠᠨ ᠠᠴᠠ ᠬᠤᠶᠢᠴᠢ ᠦᠶ᠎ᠡ ᠨᠢ ᠨᠠᠷᠠᠨ ᠮᠠᠨᠳᠣᠬᠤ ᠰᠢᠬ ᠦᠭᠡᠳᠡᠯᠡᠵᠦ᠂ ᠦᠶ᠎ᠡ ᠰᠣᠩᠬᠤ ᠲᠣᠰᠣᠮ ᠢᠶᠠᠨ ᠠᠮᠢᠳᠣᠷᠠᠯ ᠠᠬᠤᠢ ᠨᠢ ᠲᠡᠭᠡᠭᠰᠢᠯᠡᠵᠦ᠂ ᠬᠡᠷᠬᠡᠮ ᠵᠡᠷᠭᠡ ᠨᠢ ᠨᠡᠮᠡᠭᠳᠡᠬᠦ ᠪᠣᠯᠵᠠᠢ︾ ᠭᠡᠳᠡᠭ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠭᠠᠵᠠᠷ ᠤᠨ ᠬᠡᠢ ᠪᠣᠰᠴᠦ ᠣᠰᠣᠨ ᠴᠦᠪᠦᠷᠢᠭᠦᠦ ᠲᠡᠭᠳᠡᠵᠦ ᠪᠠᠶᠢᠭ᠎ᠠ ᠠᠭᠤᠯᠠᠨ ᠡᠩᠭᠡᠷ ᠨᠢ ᠣᠡᠭᠭᠤᠨ ᠲᠠᠯᠪᠢᠬᠤ ᠳᠤ ᠲᠣᠬᠢᠷᠠᠬᠤ ᠨᠠᠪᠳᠠᠬ ᠰᠠᠪᠳᠠᠬ ᠰᠠᠶᠢᠨ ᠭᠠᠵᠠᠷ ᠭᠡᠳᠡᠭ᠃ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠲᠣᠮᠳᠠ᠄ ︽ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠣᠣᠯ ᠤᠨ ᠰᠢᠶᠠᠨᠵᠢᠨ ᠰᠣᠮᠣ ᠳᠤ ᠨᠢᠭᠡᠨ ᠯᠢᠦ ᠣᠪᠣᠬᠳᠦ ᠲᠠᠷᠢᠶᠠᠴᠢᠨ ᠠᠬ᠎ᠠ ᠲᠡᠭᠦᠦ ᠬᠤᠶᠠᠭᠤᠯᠠ ᠠᠵᠣ ᠲᠦᠷᠦᠨ ᠠᠮᠢᠳᠣᠷᠠᠵᠦ ᠪᠠᠶᠢᠵᠠᠢ᠃ ᠨᠢᠭᠡ ᠡᠳᠦᠷ ᠯᠢᠦ ᠣᠪᠣᠬᠳᠦ ᠶᠢᠨ ᠡᠭᠦᠳᠡᠨ ᠭᠠᠳᠠᠨ᠎ᠠ ᠨᠢᠭᠡᠨ ᠣᠷᠠᠩᠬᠠᠢ ᠨᠠᠪᠳᠠᠷᠬᠠᠢ ᠶᠢ ᠡᠮᠦᠰᠦᠭᠰᠡᠨ ᠲᠡᠨᠦᠬᠦᠯ ᠭᠤᠶᠢᠷᠠᠨᠴᠢ ᠢᠷᠡᠭᠡᠳ ᠬᠤᠭᠤᠯᠠ ᠪᠣᠳᠠᠭ᠎ᠠ ᠭᠤᠶᠣᠵᠠᠢ᠃ ᠭᠡᠷ ᠤᠨ ᠡᠵᠡᠨ ᠨᠢ ᠲᠠᠷᠢᠶᠠᠨ ᠠᠵᠢᠯ ᠳᠠᠭᠠᠨ ᠶᠠᠭᠠᠷᠠᠬᠤ ᠭᠡᠵᠦ ᠬᠡᠭᠡᠷ᠎ᠡ ᠭᠠᠷᠣᠬᠰᠠᠨ ᠪᠣᠯᠬᠤᠷ ᠯᠢᠦ ᠣᠪᠣᠬᠳᠦ ᠶᠢᠨ ᠡᠬᠡᠨᠡᠷ ᠤᠳ ᠨᠢ ᠭᠤᠶᠢᠷᠠᠨᠴᠢ ᠶᠢ ᠭᠡᠷ ᠲᠡᠭᠡᠨ ᠵᠠᠯᠠᠵᠦ ᠣᠷᠣᠭᠤᠯᠬᠤ ᠠᠴᠠ ᠲᠠᠳᠠᠭᠠᠯᠵᠠᠵᠦ ᠬᠠᠭᠠᠯᠭᠠᠨ ᠭᠠᠳᠠᠨ᠎ᠠ ᠪᠠᠨ ᠬᠤᠭᠤᠯᠠ ᠪᠣᠳᠠᠭ᠎ᠠ ᠬᠦᠷᠭᠡᠭᠡᠳ ᠢᠳᠡᠭᠦᠯᠵᠦ ᠣᠣᠭᠤᠯᠭᠠᠵᠦ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠶᠠᠬ ᠡᠨᠡ ᠦᠶᠡᠰ ᠯᠢᠦ ᠣᠪᠣᠬᠳᠦ ᠠᠬ᠎ᠠ ᠲᠡᠭᠦᠦ ᠬᠤᠶᠠᠭᠤᠯᠠ ᠲᠠᠷᠢᠶᠠᠨ ᠠᠵᠢᠯ ᠠᠴᠠ ᠪᠠᠨ ᠪᠣᠴᠠᠵᠦ ᠢᠷᠡᠭᠰᠡᠨ ᠲᠠᠢ ᠲᠠᠭᠠᠷᠠᠯᠳᠣᠪᠠ᠃ ᠠᠬ᠎ᠠ ᠲᠡᠭᠦᠦ ᠬᠤᠶᠠᠭᠤᠯᠠ ᠪᠠᠨ ᠬᠠᠭᠠᠯᠭᠠᠨ ᠭᠠᠳᠠᠨ᠎ᠠ ᠨᠢ ᠬᠤᠭᠤᠯᠠ ᠢᠳᠡᠵᠦ ᠪᠠᠶᠢᠬᠰᠠᠨ ᠭᠤᠶᠢᠷᠠᠨᠴᠢ ᠶᠢ ᠦᠵᠡᠭᠡᠳ ᠶᠡᠬᠡᠳᠡ ᠦᠷᠦ ᠡᠪᠡᠳᠴᠦ ︿ᠠᠮᠢᠳᠣᠷᠠᠵᠦ ᠪᠠᠶᠢᠭ᠎ᠠ ᠬᠦᠮᠦᠨ ᠵᠣᠪᠠᠵᠦ ᠭᠠᠴᠢᠬᠳᠠᠬᠤ ᠦᠭᠡᠢ ᠭᠡᠰᠡᠨ ᠣᠴᠢᠷ ᠪᠠᠶᠢᠨ᠎ᠠ ᠦᠦ︖ ᠡᠭᠦᠳᠡᠨ ᠭᠠᠳᠠᠨ᠎ᠠ ᠪᠠᠨ ᠬᠦᠮᠦᠨ ᠳᠤ ᠬᠤᠭᠤᠯᠠ ᠬᠦᠷᠭᠡᠬᠦ ᠴᠢᠨᠢ ᠬᠡᠳᠦᠢ ᠡᠪ ᠦᠭᠡᠢ ᠣᠴᠢᠷ ᠪᠣᠢ﹀ ᠭᠡᠵᠦ ᠡᠬᠡᠨᠡᠷ ᠲᠡᠭᠡᠨ ᠬᠡᠯᠡᠭᠡᠳ ᠭᠤᠶᠢᠷᠠᠨᠴᠢ ᠶᠢ ᠭᠡᠷ ᠲᠡᠭᠡᠨ ᠵᠠᠯᠠᠵᠦ ᠣᠷᠣᠭᠤᠯᠣᠭᠠᠳ ᠬᠦᠨᠳᠦᠳᠭᠡᠨ ᠵᠣᠴᠢᠯᠠᠵᠦ ᠪᠣᠴᠠᠬᠤ ᠦᠶᠡᠰ ᠲᠤᠨᠢ ᠪᠠᠰᠠ ᠬᠡᠦᠳᠡᠢ ᠳᠤ ᠴᠠᠭᠠᠨ ᠪᠣᠳᠠᠭ᠎ᠠ ᠪᠠᠨ ᠲᠦᠭᠦᠷᠳᠡᠯ᠎ᠡ ᠰᠠᠪᠠᠯᠠᠭᠠᠳ ᠡᠯᠵᠢᠭᠡᠨ ᠲᠡᠭᠡᠷ᠎ᠡ ᠪᠠᠨ ᠠᠴᠢᠵᠦ ᠦᠭᠭᠦᠭᠡᠳ ᠬᠦᠷᠭᠡᠭᠰᠡᠨ ᠭᠡᠨ᠎ᠡ᠃ ᠬᠡᠦᠳᠡᠢ ᠲᠠᠢ ᠪᠣᠳᠠᠭ᠎ᠠ᠂ ᠡᠯᠵᠢᠭᠡ ᠣᠯᠣᠬᠰᠠᠨ ᠭᠤᠶᠢᠷᠠᠨᠴᠢ ᠭᠤᠸᠠᠢ ᠶᠡᠬᠡᠳᠡ ᠪᠠᠶᠠᠷᠯᠠᠵᠦ᠄ ︿ᠭᠤᠷᠪᠠᠨ ᠵᠢᠯ ᠤᠨ ᠲᠠᠷᠠᠭ᠎ᠠ ᠡᠯᠵᠢᠭᠡ ᠪᠣᠳᠠᠭ᠎ᠠ ᠬᠦᠷᠭᠡᠭᠰᠡᠨ ᠠᠴᠢ ᠶᠢ ᠴᠢᠨᠢ ᠵᠠᠭᠤᠨ ᠲᠠᠬᠢᠨ ᠢᠶᠠᠷ ᠬᠠᠷᠢᠭᠤᠯᠠᠨ᠎ᠠ﹀ ᠭᠡᠵᠦ ᠬᠡᠯᠡᠭᠡᠳ ᠶᠠᠪᠣᠬᠰᠠᠨ ᠭᠡᠨ᠎ᠡ᠃ ᠡᠨᠡ ᠭᠤᠶᠢᠷᠠᠨᠴᠢ ᠬᠡᠳᠦᠨ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠶᠢᠷᠳᠢᠨᠴᠦ ᠶᠢ ᠲᠣᠭᠤᠷᠢᠵᠦ᠂ ᠡᠷᠳᠡᠮᠳᠡᠨ ᠬᠤᠪᠢᠯᠭᠠᠳ ᠢ ᠰᠣᠷᠪᠣᠯᠵᠢᠯᠠᠵᠦ ᠡᠷᠳᠡᠮ ᠮᠡᠳᠡᠯᠭᠡ ᠨᠢ ᠨᠡᠮᠡᠭᠳᠡᠭᠡᠳ ᠬᠤᠵᠢᠮ ᠨᠢ ᠬᠡᠳᠦᠨ ᠬᠤᠰᠢᠭᠤᠨ ᠳᠤ ᠠᠯᠳᠠᠷᠳᠠᠢ ᠨᠣᠳᠤᠬ ᠰᠢᠨᠵᠢᠭᠡᠴᠢ ᠪᠣᠯᠣᠬᠰᠠᠨ ᠭᠡᠨ᠎ᠡ᠃ ᠨᠢᠭᠡᠨ ᠡᠳᠦᠷ ᠨᠣᠳᠤᠬ ᠰᠢᠨᠵᠢᠭᠡᠴᠢ ᠭᠤᠸᠠᠢ ᠯᠢᠦ ᠣᠪᠣᠬᠳᠦ ᠶᠢᠨ ᠬᠢᠨ ᠳᠤ ᠢᠷᠡᠭᠡᠳ ᠠᠬ᠎ᠠ ᠲᠡᠭᠦᠦ ᠬᠤᠶᠠᠭᠤᠯᠠ ᠶᠢ ᠲᠠᠭᠠᠭᠤᠯᠵᠦ ᠭᠡᠷ ᠠᠴᠠ ᠨᠢ ᠵᠠᠶᠢᠳᠠᠭᠤᠬᠠᠨ ᠪᠠᠶᠢᠭ᠎ᠠ ᠠᠭᠤᠯᠠᠨ ᠡᠩᠭᠡᠷ ᠲᠤ ᠬᠦᠷᠦᠭᠡᠳ᠄ ︿ᠡᠨᠡ ᠭᠠᠵᠠᠷ ᠤᠨ ᠭᠠᠵᠠᠷ ᠤᠨ ᠬᠡᠢ ᠨᠢ ᠲᠡᠭᠳᠡᠭᠡᠳ ᠣᠯᠠᠨ ᠣᠰᠣᠨ ᠴᠦᠪᠦᠷᠢᠭᠦᠦ ᠭᠠᠷᠴᠦ ᠪᠦᠮᠪᠦᠭᠡᠯᠡᠵᠦ ᠪᠠᠶᠢᠨ᠎ᠠ᠃ ᠲᠠ ᠨᠠᠷ ᠡ᠊ᠨᠳᠡ ᠲᠡᠭᠡᠳᠦ ᠶᠢᠨ ᠣᠡᠭᠭᠤᠨ ᠢᠶᠠᠨ ᠲᠣᠬᠳᠠᠭᠠᠪᠠᠯ ᠬᠡᠶᠢᠮᠣᠷᠢ ᠴᠢᠨᠢ ᠲᠡᠭᠳᠡᠵᠦ᠂ ᠦᠶ᠎ᠡ ᠶᠢᠨ ᠦᠶ᠎ᠡ ᠳᠡᠭᠡᠨ ᠦᠭᠡᠳᠡᠯᠡᠨ᠎ᠡ﹀ ᠭᠡᠵᠦ ᠰᠠᠨᠠᠭᠤᠯᠣᠬᠰᠠᠨ ᠭᠡᠨ᠎ᠡ᠃ ᠭᠠᠵᠠᠷ ᠤᠨ ᠲᠦᠪᠰᠢᠨ ᠠᠴᠠ ᠬᠡᠴᠢᠨᠡᠬᠡᠨ ᠡᠷᠭᠦᠭᠳᠡᠭᠰᠡᠨ ᠠᠭᠤᠯᠠᠨ ᠤ ᠡᠩᠭᠡᠷ ᠲᠤ ᠣᠰᠣᠨ ᠴᠦᠪᠦᠷᠢᠬᠦᠦ ᠪᠦᠮᠪᠦᠭᠡᠯᠡᠵᠦ ᠪᠠᠶᠢᠬᠤ ᠶᠢ ᠬᠠᠷᠠᠬᠰᠠᠨ ᠠᠬ᠎ᠠ ᠲᠡᠭᠦᠦ ᠬᠤᠶᠠᠭᠤᠯᠠ ᠪᠠᠨ ᠶᠡᠬᠡᠳᠡ ᠰᠦᠵᠢᠭ ᠲᠦᠷᠦᠵᠦ ᠨᠣᠳᠤᠬ ᠰᠢᠨᠵᠢᠭᠡᠴᠢ ᠶᠢᠨ ᠵᠢᠭᠠᠵᠦ ᠦᠭᠬᠦᠭᠰᠡᠨ ᠡᠨᠡ ᠬᠦ ᠭᠠᠵᠠᠷ ᠲᠡᠭᠡᠳᠦ ᠶᠢᠨ ᠣᠡᠭᠭᠤᠨ ᠢᠶᠠᠨ ᠲᠣᠬᠳᠠᠭᠠᠬᠰᠠᠨ ᠠᠴᠠ ᠨᠡᠬᠡᠷᠡᠨ ᠦᠭᠡᠳᠡᠯᠡᠨ ᠪᠠᠶᠠᠵᠢᠵᠦ ᠬᠤᠶᠢᠴᠢ ᠦᠶ᠎ᠡ ᠳᠤᠨᠢ ᠬᠡᠷᠬᠡᠮ ᠵᠡᠷᠭᠡ ᠦᠨᠳᠦᠷ ᠬᠦᠮᠦᠰ ᠲᠠᠰᠣᠷᠠᠯ ᠦᠭᠡᠢ ᠭᠠᠷᠬᠤ ᠪᠣᠯᠣᠬᠰᠠᠨ ᠭᠡᠳᠡᠭ︾ ᠭᠡᠰᠡᠨ ᠣᠯᠠᠮᠵᠢᠯᠠᠯ ᠶᠠᠷᠢᠶ᠎ᠠ ᠶᠠᠷᠢᠬᠳᠠᠵᠦ ᠪᠠᠶᠢᠳᠠᠬ᠃      ᠬᠤᠷᠴᠢᠨᠴᠣᠳ ᠤᠨ ᠲᠣᠮᠳᠠ ᠪᠠᠰᠠ ᠶᠠᠮᠠᠷᠪᠠ ᠰᠠᠶᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠴᠦ ᠪᠣᠰᠣᠳ ᠲᠤ ᠰᠢᠯᠵᠢᠵᠦ ᠦᠭᠬᠦ ᠲᠣᠷ᠎ᠠ ᠦᠭᠡᠢ ᠪᠣᠯᠬᠤᠷ ᠣᠡᠭᠭᠤᠨ ᠬᠡᠭᠦᠷ ᠲᠠᠯᠪᠢᠬᠤ ᠳᠤ ᠨᠠᠪᠳᠠᠬ ᠰᠠᠪᠳᠠᠬ ᠠᠴᠠ ᠭᠠᠵᠠᠷ ᠭᠤᠶᠣᠬᠤ ᠬᠡᠷᠡᠭᠳᠡᠢ ᠭᠡᠳᠡᠭ᠃ ᠬᠡᠭᠦᠷ ᠣᠡᠭᠭᠤᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠬᠡᠳᠦᠷᠬᠡᠢ ᠲᠣᠬᠰᠢᠨ ᠪᠣᠯ ᠦᠬᠦᠭᠰᠡᠨ ᠬᠦᠮᠦᠨ ᠲᠠᠢ ᠭᠠᠵᠠᠷ ᠪᠣᠯᠢᠶᠠᠯᠳᠣᠵᠦ ᠰᠦᠨᠢ ᠣᠷᠣᠢ ᠠᠶᠠᠨ ᠤ ᠬᠦᠮᠦᠰ ᠢ ᠲᠦᠭᠡᠷᠢᠭᠦᠯᠳᠡᠭ ᠦᠵᠡᠭᠳᠡᠯ ᠴᠦ ᠭᠠᠷᠳᠠᠬ ᠶᠣᠮ ᠭᠡᠨ᠎ᠡ᠃ ᠠᠷᠠᠳ ᠤᠨ ᠲᠣᠮᠳᠠ ᠰᠦᠨᠢ ᠣᠷᠣᠢ ᠲᠦᠭᠡᠷᠢᠵᠦ ᠲᠡᠨᠦᠭᠰᠡᠨ ᠬᠦᠮᠦᠨ ᠬᠡᠭᠡᠷ᠎ᠡ ᠭᠠᠳᠠᠭ᠎ᠠ ᠣᠨᠳᠠᠭᠠᠳ ᠦᠷᠯᠦᠭᠡ ᠪᠣᠰᠬᠤ ᠦᠶᠡᠰ ᠣᠡᠭᠭᠤᠨ ᠲᠡᠷᠡᠯᠡᠭᠡᠳ ᠣᠨᠳᠠᠵᠦ ᠪᠠᠶᠢᠬᠰᠠᠨ ᠲᠣᠬᠠᠢ ᠦᠯᠢᠭᠡᠷ ᠣᠴᠠᠷᠠᠯ ᠤᠳ ᠣᠯᠠᠨ ᠣᠯᠠᠨ ᠲᠣᠬᠢᠶᠠᠯᠳᠣᠳᠠᠬ ᠨᠢ ᠡᠭᠦᠨ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ ᠭᠡᠳᠡᠭ᠃ ᠵᠠᠷᠢᠮ ᠪᠦᠭᠡ ᠨᠠᠷ ᠤᠨ ᠶᠠᠷᠢᠬᠤ ᠪᠠᠷ ᠡᠨᠡ ᠨᠢ ᠡᠷᠢᠶᠠᠨ ᠲᠠᠢ ᠭᠠᠵᠠᠷ ᠲᠠᠢ ᠢᠯᠭᠠᠭ᠎ᠠ ᠲᠠᠢ ᠭᠡᠨ᠎ᠡ᠃ ᠡᠷᠢᠶᠡᠨ ᠲᠠᠢ ᠭᠠᠵᠠᠷ ᠨᠢ ᠣᠡᠭᠭᠤᠨ ᠬᠡᠭᠦᠷ ᠪᠠᠶᠢᠬᠤ ᠦᠭᠡᠢ ᠭᠠᠵᠠᠷ ᠴᠦ ᠬᠦᠮᠦᠨ ᠢ ᠲᠦᠭᠡᠷᠢᠭᠦᠯᠳᠡᠭ ᠪᠣᠯ ᠣᠡᠭᠭᠤᠨ ᠲᠠᠢ ᠭᠠᠵᠠᠷ ᠬᠦᠮᠦᠨ ᠢ ᠲᠦᠭᠡᠷᠢᠭᠦᠯᠳᠡᠭ ᠨᠢ ᠦᠬᠦᠭᠰᠡᠳ ᠤᠨ ᠰᠦᠨᠡᠰᠦ ᠬᠦᠮᠦᠨ ᠢ ᠪᠣᠷᠣᠭᠤ ᠵᠠᠮ ᠢᠶᠠᠷ ᠬᠦᠳᠦᠯᠦᠭᠰᠡᠨ ᠠᠴᠠ ᠪᠣᠯᠣᠬᠰᠠᠨ ᠭᠡᠳᠡᠭ᠃ ᠨᠠᠪᠳᠠᠬ ᠰᠠᠪᠳᠠᠬ ᠠᠴᠠ ᠭᠠᠵᠠᠷ ᠭᠤᠶᠣᠬᠤ ᠲᠣᠬᠠᠢ ᠭᠠᠳᠠᠰᠣ ᠠᠴᠠ᠄ ︽ᠣᠣᠯ ᠤᠨ ᠬᠠᠯᠬ᠎ᠠ ᠵᠡᠭᠦᠨ ᠭᠠᠷ ᠬᠤᠰᠢᠭᠤ᠂ ᠣᠳᠣ ᠶᠢᠨ ᠬᠦᠷᠢᠶ᠎ᠡ ᠬᠤᠰᠢᠭᠤ ᠶᠢᠨ ᠮᠠᠩᠬᠠᠨ ᠰᠣᠮᠣᠨ ᠤ ᠪᠠᠷᠠᠭᠤᠨ ᠡᠮᠦᠨᠡᠭᠦᠷ ᠪᠠᠶᠢᠭ᠎ᠠ ᠭᠠᠴᠠᠭ᠎ᠠ ᠨᠤᠭᠤᠳ ᠤᠨ ᠬᠢᠨ ᠣᠳᠣ ᠴᠦ ᠬᠦᠮᠦᠨ ᠦᠬᠦᠪᠡᠯ ᠬᠡᠭᠦᠷ ᠢ ᠨᠢ ᠣᠷᠣᠰᠢᠭᠤᠯᠬᠤ ᠳᠠᠭᠠᠨ ᠬᠡᠭᠦᠷ ᠲᠠᠯᠪᠢᠬᠤ ᠭᠠᠵᠠᠷ ᠢᠶᠠᠨ ᠰᠣᠩᠭᠤᠨ ᠲᠣᠬᠢᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠪᠣᠭᠤ ᠶᠢᠨ ᠡᠪᠡᠷ ᠢᠶᠠᠷ ᠬᠡᠭᠦᠷ ᠣᠷᠣᠰᠢᠭᠤᠯᠬᠤ ᠭᠠᠵᠠᠷ ᠲᠠᠭᠠᠨ ᠲᠦᠷᠪᠡᠯᠵᠢᠨ ᠲᠣᠳᠣᠷ᠎ᠠ ᠰᠣᠯᠪᠢᠬᠤ ᠲᠡᠮᠳᠡᠭ ᠵᠢᠷᠣᠵᠦ ︿ᠡᠨᠡ ᠭᠠᠵᠠᠷ ᠢ ᠡᠵᠡᠯᠡᠨ ᠰᠠᠭᠤᠵᠦ ᠪᠠᠶᠢᠭ᠎ᠠ ᠭᠠᠵᠠᠷ ᠤᠨ ᠡᠵᠡᠳ ᠨᠠᠪᠳᠠᠬ ᠰᠠᠪᠳᠠᠬ ᠮᠢᠨᠢ ᠰᠣᠨᠣᠰᠣᠭᠠᠷᠠᠢ︕ ᠡᠨᠡ ᠣᠷᠣ ᠶᠢ ᠪᠣᠰᠣ ᠬᠦᠮᠦᠨ ᠡᠵᠡᠯᠡᠨ ᠰᠠᠭᠤᠬᠤ ᠴᠢᠬᠤᠯᠠᠲᠠᠢ ᠪᠣᠯᠣᠬᠰᠠᠨ ᠪᠣᠯᠬᠤᠷ ᠦᠷᠦᠰᠢᠶᠡᠯ ᠦᠵᠡᠭᠦᠯᠵᠦ ᠰᠢᠯᠵᠢᠨ ᠦᠭᠬᠦ ᠪᠣᠯᠪᠠ ᠤᠤ︖﹀ ᠭᠡᠵᠦ ᠨᠠᠪᠳᠠᠬ ᠰᠠᠪᠳᠠᠬ ᠠᠴᠠ ᠣᠡᠭᠭᠤᠨ ᠲᠠᠯᠪᠢᠬᠤ ᠭᠠᠵᠠᠷ ᠢᠶᠠᠨ ᠭᠤᠶᠣᠵᠦ ᠰᠠᠷᠬᠤᠳ ᠠᠷᠢᠬᠢ ᠪᠠᠨ ᠵᠦᠭ ᠵᠦᠭ ᠲᠤ ᠰᠦᠷᠴᠢᠵᠦ᠂ ᠣᠡᠭᠭᠤᠨ ᠲᠠᠯᠪᠢᠬᠤ ᠨᠦᠬᠡ ᠶᠢ ᠮᠠᠯᠳᠠᠭᠠᠳ ᠨᠦᠭᠴᠢᠭᠰᠡᠳ ᠢᠶᠠᠨ ᠣᠷᠣᠰᠢᠭᠤᠯᠳᠠᠬ᠃ ᠬᠡᠷᠪᠡ ᠪᠣᠭᠤ ᠶᠢᠨ ᠡᠪᠡᠷ ᠣᠯᠳᠠᠬᠤ ᠦᠭᠡᠢ ᠶᠣᠮ ᠪᠣᠯ ᠲᠦᠭᠦᠬᠡᠢ ᠰᠢᠷᠡᠮᠦ ᠪᠠᠷ ᠴᠢᠳᠬᠤᠬᠰᠠᠨ ᠠᠨᠵᠢᠰᠣᠨ ᠬᠤᠰᠢᠭᠤᠨ ᠤ ᠬᠠᠭᠠᠷᠬᠠᠢ ᠪᠠᠷ ᠣᠷᠣᠯᠠᠭᠤᠯᠵᠦ ᠡᠨᠡ ᠬᠦ ᠦᠢᠯᠡ ᠶᠢ ᠭᠦᠢᠴᠡᠳᠭᠡᠳᠡᠭ︾ ᠭᠡᠵᠡᠢ᠃     ᠠᠭᠤᠯᠠ ᠬᠠᠶᠢᠷᠬᠠᠨ ᠤ ᠨᠠᠪᠳᠠᠬ ᠰᠠᠪᠳᠠᠬ      ᠠᠭᠤᠯᠠᠨ ᠤ ᠶᠠᠮᠠᠷ ᠨᠢᠭᠡ ᠣᠨᠴᠠᠭᠠᠢ ᠭᠠᠵᠠᠷ ᠨᠢ ᠬᠡᠷᠭᠢᠨ ᠣᠯᠠᠨ ᠪᠦᠬᠦᠨ ᠳᠤ ᠰᠢᠳᠦᠭᠳᠡᠬᠦ ᠪᠣᠯᠣᠬᠰᠠᠨ ᠭᠡᠳᠡᠭ ᠢ ᠮᠣᠩᠭᠤᠯᠴᠣᠳ ᠤᠨ ᠦᠪᠡᠷ ᠤᠨ ᠬᠢᠨᠢ ᠪᠢᠴᠢᠭᠰᠡᠨ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︾ ᠤ ᠲᠡᠦᠬᠡᠨ ᠮᠠᠲ᠋ᠧᠷᠢᠶᠠᠯ ᠦᠵᠡᠭᠦᠯᠵᠦ ᠪᠠᠶᠢᠨ᠎ᠠ᠃ ᠦᠨᠳᠦᠷ ᠠᠭᠤᠯᠠᠨ ᠳᠤ ᠠᠮᠢᠵᠢᠷᠠᠯ ᠤᠨ ᠬᠦᠴᠦᠨ ᠲᠠᠢ ᠭᠡᠵᠦ ᠦᠵᠡᠬᠦ᠂ ᠡᠭᠦᠨ ᠤ ᠣᠯᠠᠮ ᠠᠴᠠ ᠪᠣᠢ ᠪᠣᠯᠣᠬᠰᠠᠨ ᠲᠡᠭᠡᠳᠦᠰ ᠢᠶᠠᠨ ᠪᠠ ᠠᠯᠳᠠᠷᠳᠦ ᠬᠦᠮᠦᠰ ᠢ ᠦᠨᠳᠦᠷ ᠭᠠᠵᠠᠷ ᠲᠤ ᠣᠡᠭᠭᠤᠯᠠᠬᠤ ᠲᠠᠳᠬᠠᠯ ᠨᠢ ᠡᠨᠡ ᠬᠦ ᠦᠵᠡᠯ ᠰᠠᠨᠠᠭ᠎ᠠ ᠶᠢ ᠣᠯᠠᠮ ᠯᠠᠪᠰᠢᠷᠠᠭᠤᠯᠵᠠᠢ᠃ ᠴᠠᠬᠠᠷ ᠪᠦᠬᠡ ᠶᠢᠨ ᠨᠢᠭᠡ ᠲᠡᠦᠬᠡᠨ ᠵᠣᠬᠢᠶᠠᠯ ᠳᠤ ᠨᠦᠭᠴᠢᠭᠰᠡᠳ ᠲᠡᠭᠡᠳᠦᠰ ᠢᠶᠠᠨ ᠶᠠᠭᠠᠬᠢᠵᠦ ᠦᠨᠳᠦᠷ ᠭᠠᠵᠠᠷ ᠣᠡᠭᠭᠤᠯᠠᠭᠠᠳ ᠡᠭᠦᠨ ᠤ ᠣᠯᠠᠮ ᠠᠴᠠ ᠰᠦᠭ ᠰᠦᠨᠡᠰᠦ ᠨᠢ ᠬᠡᠷᠬᠢᠨ ᠪᠠᠶᠢᠭᠠᠯᠢ ᠶᠢᠨ ᠬᠦᠴᠦᠨ ᠲᠠᠢ ᠨᠦᠬᠦᠴᠡᠭᠰᠡᠨ ᠢ ᠲᠡᠮᠳᠡᠭᠯᠡᠬᠦ ᠳᠡᠭᠡᠨ ︽ᠬᠡᠭᠦᠷ ᠢ ᠨᠢ ᠦᠨᠦᠴᠢᠨ ᠬᠠᠳᠠᠨ ᠤ ᠡᠮᠦᠨᠡᠬᠢ ᠲᠠᠯ᠎ᠠ ᠭᠠᠵᠠᠷ ᠣᠷᠣᠰᠢᠭᠤᠯᠣᠭᠠᠳ ᠁ ᠭᠤᠷᠪᠠᠨ ᠵᠢᠯ ᠰᠢᠬᠠᠮ ᠤᠨ ᠬᠤᠭᠤᠴᠠᠭᠠᠨ ᠳᠤ ᠢᠮᠠᠬᠳᠠ ᠲᠠᠶᠢᠯᠭ᠎ᠠ ᠲᠠᠬᠢᠯᠭ᠎ᠠ ᠦᠢᠯᠡᠳᠦᠭᠰᠡᠭᠡᠷ ᠪᠠᠶᠢᠪᠠ᠃ ᠣᠯᠠᠭᠠᠨ ᠬᠠᠳᠠᠨ ᠤ ᠣᠷᠣᠢ ᠪᠠᠷ ᠡᠭᠦᠯᠡ ᠮᠠᠨᠠᠨ ᠲᠠᠳᠠᠵᠦ᠂ ᠰᠣᠪᠣᠷᠭᠠᠯᠠᠨ ᠲᠡᠭᠳᠡᠵᠦ ᠵᠠᠮᠬᠠᠷᠠᠳᠠᠬ ᠁ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠨᠦᠭᠴᠢᠭᠰᠡᠨ ᠡᠴᠢᠭᠡ ᠶᠢᠨ ᠬᠢᠨᠢ ᠰᠦᠭ ᠰᠦᠨᠡᠰᠦ ᠨᠢ ᠠᠭᠤᠯᠠ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠨᠡᠶᠢᠯᠡᠵᠡᠢ︾ ᠭᠡᠵᠦ ︽ᠠᠷᠠᠳ ᠤᠨ ᠱᠠᠰᠢᠨ︾ ᠪᠠ ︽ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠰᠣᠳᠣᠯᠣᠯ ᠰᠡᠳᠭᠦᠯ︾ ᠳᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠳᠠᠬ᠃ ᠮᠣᠩᠭᠤᠯᠴᠣᠳ ᠴᠢᠯᠠᠭᠤᠨ ᠵᠡᠪᠰᠡᠭ ᠤᠨ ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠨᠦᠭᠴᠢᠭᠰᠡᠳ ᠢ ᠦᠨᠳᠦᠷ ᠭᠠᠵᠠᠷ ᠣᠷᠣᠰᠢᠭᠤᠯᠬᠤ ᠵᠠᠩᠰᠢᠯ ᠲᠠᠢ ᠪᠠᠶᠢᠬᠰᠠᠨ ᠢ ᠣᠯᠠᠭᠠᠨᠬᠠᠳᠠ ᠣᠷᠴᠢᠮ ᠤᠨ ᠬᠠᠭᠤᠴᠢᠨ ᠤ ᠢᠯᠡᠷᠡᠭᠦᠯᠦᠯᠳᠡ ᠭᠡᠷᠡᠴᠢᠯᠡᠵᠦ ᠪᠠᠶᠢᠨ᠎ᠠ᠃ ︽ᠵᠡᠭᠦᠨ ᠮᠣᠩᠭᠤᠯ ᠤᠨ ᠯᠢᠨᠰᠢ ᠣᠷᠴᠢᠮ ᠤᠨ ᠣᠯᠠᠭᠠᠨᠬᠠᠳᠠ ᠬᠠᠪᠢ ᠪᠠᠷ ᠴᠢᠯᠠᠭᠤᠨ ᠵᠡᠪᠰᠡᠭ ᠤᠨ ᠦᠶ᠎ᠡ ᠶᠢᠨ ᠬᠠᠭᠤᠴᠢᠨ ᠪᠣᠯᠠᠰᠢ ᠣᠯᠳᠠᠬᠰᠠᠨ ᠶᠣᠮ︾ ᠭᠡᠵᠦ ᠶᠠᠫᠣᠨ ᠤ ᠲᠣᠣᠺᠢᠣ᠋ ᠶᠢᠨ ᠬᠡᠪᠯᠡᠯ ᠤᠨ ︽ᠣᠯᠠᠭᠠᠨᠬᠠᠳᠠ ᠳᠤ ᠮᠠᠯᠳᠠᠯᠭ᠎ᠠ ᠬᠢᠭᠰᠡᠨ ᠨᠢ︾᠂ ︽ᠲᠣᠷᠣᠨᠠᠳᠠᠬᠢᠨ ᠤ ᠬᠠᠭᠤᠴᠢ ᠰᠣᠳᠣᠯᠣᠯ ᠰᠡᠳᠭᠦᠯ︾ ᠤᠨ A ᠲᠦᠷᠦᠯ ᠳᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠨ᠎ᠠ ᠃       P · S ᠫᠠᠯᠯᠠᠰ ᠤᠨ ︽ᠮᠣᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ ᠤᠨ ᠲᠡᠭᠦᠪᠦᠷᠢ︾ ᠳᠤ᠄ ︽ᠮᠣᠩᠭᠤᠯᠴᠣᠳ ᠦᠨᠳᠦᠷ ᠭᠠᠵᠠᠷ᠂ ᠠᠭᠤᠯᠠ ᠶᠢᠨ ᠬᠦᠳᠦᠯ᠂ ᠵᠠᠮ ᠤᠨ ᠠᠭᠤᠯᠵᠠᠷ ᠲᠡᠭᠡᠷ᠎ᠡ ᠣᠪᠣᠭ᠎ᠠ ᠪᠣᠰᠬᠠᠭᠠᠳ ᠲᠣᠬᠠᠢ ᠶᠢᠨ ᠭᠠᠵᠠᠷ ᠤᠨ ᠡᠵᠡᠳ ᠰᠠᠬᠢᠭᠤᠰᠣ ᠪᠣᠯᠭᠠᠨ ᠣᠨᠴᠠᠭᠠᠢ ᠪᠢᠰᠢᠷᠡᠨ ᠲᠠᠬᠢᠳᠠᠬ ᠃ ᠦᠨᠳᠦᠷ ᠭᠠᠵᠠᠷ ᠴᠢᠯᠠᠭᠤᠨ ᠣᠪᠣᠭ᠎ᠠ ᠪᠣᠰᠬᠠᠵᠦ ᠲᠡᠮᠳᠡᠭ ᠪᠣᠯᠭᠠᠬᠤ ᠵᠣᠷᠰᠢᠯ ᠲᠣᠮᠳᠠᠳᠦ ᠠᠽᠢᠶ᠎ᠠ ᠪᠠ ᠠᠯᠳᠠᠢ ᠶᠢᠨ ᠦᠨᠳᠦᠰᠦᠳᠡᠨ ᠨᠦᠭᠦᠳ ᠤᠨ ᠲᠣᠳᠣᠷ᠎ᠠ ᠪᠠᠰᠠ ᠪᠠᠶᠢᠵᠠᠢ︾ ᠭᠡᠵᠦ ᠦᠬᠦᠯᠡᠭᠰᠡᠨ ᠶᠣᠮ᠃ ᠪᠦᠬᠡ ᠶᠢᠨ ᠱᠠᠰᠢᠨ ᠤ ᠦᠵᠡᠯ ᠰᠠᠨᠠᠭᠠᠨ ᠤ ᠬᠡᠪᠴᠢᠶᠡᠨ ᠳᠤ ᠠᠪᠴᠦ ᠬᠡᠯᠡᠪᠡᠯ ᠣᠪᠣᠭ᠎ᠠ ᠨᠢ ᠲᠣᠬᠠᠢ ᠶᠢᠨ ᠭᠠᠵᠠᠷ ᠤᠨ ᠰᠢᠳᠦᠭᠡᠨ᠂ ᠡᠵᠡᠳ ᠰᠠᠬᠢᠭᠤᠯᠰᠣᠨ ᠨᠠᠷ ᠤᠨ ᠴᠣᠬᠯᠠᠷᠠᠳᠠᠬ ᠭᠠᠵᠠᠷ ᠮᠦᠨ ᠭᠡᠵᠦ ᠦᠵᠡᠳᠡᠭ ᠪᠠᠶᠢᠵᠠᠢ᠃ ᠦᠨᠡᠨ ᠳᠡᠭᠡᠨ ᠠᠭᠤᠯᠠ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠤᠨ ᠬᠠᠮᠠᠭᠠᠯᠠᠬᠴᠢ ᠶᠢᠨ ᠦᠢᠯᠡᠳᠦᠯ ᠪᠠ ᠣᠪᠣᠭ᠎ᠠ ᠶᠢᠨ ᠰᠢᠳᠦᠯᠭᠡ ᠶᠢᠨ ᠲᠣᠬᠠᠢ ᠮᠣᠩᠭᠤᠯᠴᠣᠳ ᠤᠨ ᠣᠢᠢᠯᠠᠭᠠᠯᠳᠠ ᠨᠢ ᠠᠳᠠᠯᠢᠪᠳᠣᠷ ᠪᠠᠶᠢᠳᠠᠬ᠃      ᠮᠣᠩᠭᠤᠯᠴᠣᠳ ᠬᠤᠶᠢᠳᠦ ᠮᠣᠩᠭᠤᠯ ᠤᠨ ᠵᠡᠭᠦᠨᠭᠠᠷ ᠠᠭᠤᠯᠠ᠂ ᠪᠠᠶᠠᠨᠵᠢᠷᠦᠬᠡ ᠠᠭᠤᠯᠠ᠂ ᠪᠣᠬᠳᠠ ᠠᠭᠤᠯᠠ᠂ ᠰᠣᠩᠬᠢᠨ᠎ᠠ ᠠᠭᠤᠯᠠ ᠶᠢ ︽ᠠᠭᠤᠯᠠ ᠶᠢᠨ ᠲᠦᠷᠪᠡᠨ ᠡᠵᠡᠳ︾ ᠭᠡᠵᠦ ᠶᠡᠭᠡ ᠯᠡ ᠰᠢᠳᠦᠳᠡᠭ ᠪᠠᠶᠢᠬᠰᠠᠨ ᠭᠡᠨ᠎ᠡ᠃ ᠯᠠᠮᠠ ᠶᠢᠨ ᠱᠠᠰᠢᠨ ᠤ ᠬᠢᠨ ︽ᠲᠦᠷᠪᠡᠨ ᠠᠭᠤᠯᠠ ᠶᠢᠨ ᠡᠵᠡᠳ︾ ᠤᠨ ᠪᠦᠷᠢᠯᠸ᠎ᠠ ᠶᠢ ᠴᠠᠮ ᠳᠤ ᠣᠷᠣᠭᠤᠯᠳᠠᠬ᠃ ᠲᠡᠳᠡᠭᠡᠷ ᠤᠨ ᠲᠦᠷᠢ ᠪᠠᠶᠢᠳᠠᠯ ᠨᠢ᠄ ᠪᠠᠶᠠᠨᠵᠢᠷᠦᠬᠡ ᠠᠭᠤᠯᠠ ᠶᠢᠨ ᠡᠵᠡᠳ ᠪᠣᠯ ᠦᠰᠦ ᠪᠠᠨ ᠲᠡᠷᠢᠭᠦᠨ ᠳᠡᠭᠡᠨ ᠪᠣᠮᠪᠠᠶᠢᠯᠭᠠᠬᠰᠠᠨ ᠰᠢᠷ᠎ᠠ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠬᠦᠮᠦᠨ᠂ ᠪᠣᠬᠳᠠ ᠠᠭᠤᠯᠠ ᠶᠢᠨ ᠡᠵᠡᠳ ᠨᠢ ᠠᠮᠠᠨ ᠳᠠᠭᠠᠨ ᠮᠣᠭᠠᠢ ᠵᠠᠭᠤᠬᠰᠠᠨ ᠭᠠᠷᠣᠳᠢ ᠰᠢᠪᠠᠭᠤᠨ ᠤ ᠲᠦᠷᠢ ᠲᠠᠢ᠂ ᠵᠡᠭᠦᠨᠭᠠᠷ ᠠᠭᠤᠯᠠ ᠶᠢᠨ ᠡᠵᠡᠳ ᠨᠢ ᠣᠷᠳᠣ ᠰᠠᠬᠠᠯ ᠲᠠᠢ ᠰᠢᠷ᠎ᠠ ᠴᠢᠷᠠᠶᠢᠳᠦ ᠡᠪᠦᠭᠡᠨ᠂ ᠰᠣᠩᠬᠢᠨ᠎ᠠ ᠠᠭᠤᠯᠠ ᠶᠢᠨ ᠡᠵᠡᠳ ᠨᠢ ᠭᠦᠨ ᠪᠣᠷᠣᠪᠳᠣᠷ ᠴᠢᠷᠠᠢ ᠲᠠᠢ᠂ ᠬᠠᠷ᠎ᠠ ᠬᠦᠮᠦᠰᠭᠡ ᠲᠠᠢ᠂ ᠪᠢᠳᠡᠭᠦᠦ ᠰᠠᠬᠠᠯ ᠲᠠᠢ ᠵᠣᠪᠠᠭᠤᠷᠢᠯᠠᠬᠰᠠᠨ ᠲᠦᠷᠢ ᠲᠠᠢ ᠡᠪᠦᠭᠡᠨ ᠭᠡᠳᠡᠭ᠃ ᠡᠨᠡ ᠬᠦ ᠰᠢᠷ᠎ᠠ ᠴᠢᠷᠠᠢ ᠲᠠᠢ ᠡᠪᠦᠭᠡᠨ ᠨᠢ ᠣᠷᠢᠳᠦ ᠳᠠᠭᠠᠨ ᠶᠡᠭᠡ ᠪᠦᠬᠡ ᠪᠠᠶᠢᠬᠰᠠᠨ ᠢᠶᠠᠨ ᠯᠠᠮᠠ ᠶᠢᠨ ᠱᠠᠰᠢᠨ ᠲᠠᠢ ᠦᠵᠡᠯᠴᠡᠭᠰᠡᠭᠡᠷ ᠪᠠᠶᠢᠵᠦ ᠰᠡᠬᠦᠯᠡᠷ ᠨᠢ ᠪᠣᠷᠬᠠᠨ ᠤ ᠱᠠᠰᠢᠨ ᠢ ᠲᠠᠭᠠᠬᠰᠠᠨ ᠭᠡᠵᠦ ᠮᠣᠩᠭᠤᠯ ᠤᠨ ᠲᠣᠮᠤᠬ ᠲᠤ ᠶᠠᠷᠢᠳᠠᠬ᠃      ᠬᠤᠷᠴᠢᠨ ᠳᠤ ᠠᠭᠤᠯᠠᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠵᠢᠭᠦᠷᠳᠡᠨ᠂ ᠠᠷᠢᠶᠠᠳᠠᠨ ᠁ ᠡᠰᠡᠬᠦᠯ᠎ᠡ ᠬᠦᠮᠦᠨ ᠤ ᠲᠦᠷᠢ ᠪᠠᠷ ᠢᠯᠡᠷᠡᠳᠡᠭ ᠴᠦ ᠪᠣᠢ᠃ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠣᠯᠠᠮᠵᠢᠯᠠᠯ ᠶᠠᠷᠢᠶᠠᠨ ᠳᠤ᠄ ︽ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠭᠠᠭ᠋ᠠᠢ ᠶᠢᠨ ᠠᠭᠤᠯᠠ ᠶᠢᠨ ᠡᠵᠡᠳ ᠨᠢ ᠠᠷᠪᠠᠨ ᠭᠤᠷᠪᠠᠨ ᠲᠣᠷᠣᠢ ᠲᠠᠭᠠᠭᠤᠯᠣᠬᠰᠠᠨ ᠠᠯᠳᠠᠨ ᠮᠡᠭᠡᠵᠢ᠂ ᠲᠠᠯᠣ ᠶᠢᠨ ᠠᠭᠤᠯᠠ ᠶᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠠᠯᠳᠠᠨ ᠵᠢᠭᠦᠷ ᠲᠠᠢ ᠪᠢᠯᠵᠣᠣᠬᠠᠢ᠂ ᠬᠠᠳᠠᠳᠦ ᠶᠢᠨ ᠠᠭᠤᠯᠠ ᠶᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠵᠢᠭᠦᠷᠳᠦ ᠠᠯᠳᠠᠨ ᠣᠨᠠᠭ᠎ᠠ︾ ᠭᠡᠳᠡᠭ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠣᠨ ᠬᠤᠶᠢᠳᠦ ᠬᠤᠰᠢᠭᠤᠨ ᠤ ᠱᠣᠩᠬᠤᠷ ᠠᠭᠤᠯᠠ ᠶᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠠᠯᠳᠠᠨ ᠭᠤᠷᠭᠤᠣᠯᠳᠠᠢ ᠭᠡᠬᠦ ᠶᠠᠷᠢᠶ᠎ᠠ ᠪᠣᠢ᠃ ᠬᠤᠷᠴᠢᠨ ᠳᠤ ᠪᠠᠰᠠ ᠠᠩᠴᠢᠳ ᠠᠡᠭ ᠠᠪᠠ ᠶᠢᠨ ᠣᠯᠵᠠ ᠮᠠᠭᠤᠳᠠᠢ ᠨᠢ ᠠᠪᠠᠯᠠᠬᠰᠠᠨ ᠭᠠᠵᠠᠷ ᠤᠨ ᠠᠭᠤᠯᠠ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠨᠢ ᠬᠤᠯᠪᠣᠭ᠎ᠠ ᠲᠠᠢ ᠭᠡᠬᠦ ᠦᠵᠡᠯᠳᠡ ᠴᠦ ᠪᠠᠶᠢᠳᠠᠬ᠃ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠭᠡᠷᠡᠯ ᠰᠣᠮᠣ ᠶᠢᠨ ᠠᠯᠢᠮᠠᠳᠦ ᠶᠢᠨ ᠠᠭᠤᠯᠠᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠨᠢ ᠦᠨᠡᠬᠡᠨ ᠰᠠᠬᠢᠭᠤᠰᠣ ᠭᠡᠵᠦ ᠮᠠᠩᠬᠠᠨ ᠠᠷᠣ ᠶᠢᠨ ᠮᠣᠩᠭᠤᠯᠴᠣᠳ ᠶᠠᠷᠢᠳᠠᠬ ᠶᠣᠮ ᠭᠡᠨ᠎ᠡ᠃ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠡ ᠪᠠᠷ ᠮᠠᠩᠬᠠᠨ ᠠᠷᠣ ᠶᠢᠨ ᠬᠡᠳᠦᠨ ᠠᠩᠴᠢᠨ ᠨᠢᠭᠡᠨ ᠪᠣᠭᠤᠷᠣᠯ ᠦᠨᠡᠭᠡ ᠶᠢ ᠬᠤᠷᠳᠣᠨ ᠮᠣᠷᠢ ᠪᠠᠷ ᠨᠡᠬᠡᠭᠰᠡᠭᠡᠷ ᠪᠠᠶᠢᠵᠦ ᠠᠯᠢᠮᠠᠳᠦ ᠶᠢᠨ ᠠᠭᠤᠯᠠᠨ ᠳᠤ ᠬᠦᠷᠦᠭᠡᠳ ᠭᠦᠢᠴᠡᠮᠡᠷ ᠪᠣᠯᠳᠠᠯ᠎ᠠ ᠪᠣᠭᠤᠷᠣᠯ ᠦᠨᠡᠭᠡ ᠭᠡᠨᠡᠳᠳᠡ ᠵᠢᠷᠪᠢᠰᠭᠢᠭᠰᠡᠨ ᠢᠶᠠᠨ ᠠᠯᠠᠭ᠎ᠠ ᠪᠣᠯᠣᠬᠰᠠᠨ ᠭᠡᠨ᠎ᠡ᠃ ᠡᠨᠡ ᠬᠡᠳᠦᠨ ᠠᠩᠴᠢᠨ ᠠᠯᠢᠮᠠᠳᠦ ᠶᠢᠨ ᠠᠭᠤᠯᠠ ᠪᠠᠷ ᠪᠦᠳᠦᠨ ᠡᠳᠦᠷ ᠡᠷᠢᠭᠰᠡᠨ ᠪᠣᠯᠪᠠᠴᠦ ᠦᠨᠡᠭᠡ ᠶᠢᠨ ᠮᠦᠷ ᠰᠡᠭᠦᠳᠡᠷ ᠢ ᠨᠢ ᠴᠦ ᠣᠯᠵᠦ ᠬᠠᠷᠠᠬᠰᠠᠨ ᠦᠭᠡᠢ ᠭᠡᠳᠡᠭ᠃ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠣ ᠶᠢ ᠨᠡᠬᠡᠭᠰᠡᠨ ᠠᠴᠠ ᠪᠣᠯᠵᠦ ᠡᠨᠡ ᠬᠡᠳᠦᠨ ᠠᠩᠴᠢᠨ ᠨᠢ ᠲᠠᠬᠢᠵᠦ ᠬᠠᠮᠢᠭ᠎ᠠ ᠠᠪᠠᠯᠠᠬᠰᠠᠨ ᠴᠦ ᠠᠡᠭ ᠠᠮᠢᠳᠠᠨ ᠣᠯᠬᠤ ᠦᠭᠡᠢ ᠪᠣᠯᠣᠬᠰᠠᠨ ᠭᠡᠳᠡᠭ᠃ ᠬᠤᠷᠴᠢᠨ ᠳᠤ ᠪᠠᠰᠠ ᠦᠨᠡᠭᠡ ᠴᠢᠨ᠋᠊ ᠦᠠ᠋ ᠵᠡᠷᠭᠡ ᠶᠢᠨ ᠨᠠᠷᠢᠨ ᠦᠰᠦᠳᠡᠢ ᠠᠡᠭ ᠨᠢ ᠠᠭᠤᠯᠠ ᠣᠰᠣᠨ ᠤ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ ᠭᠡᠳᠡᠭ ᠪᠣᠯᠬᠤᠷ ᠬᠡᠳᠦᠷᠡᠳᠡᠯ᠎ᠡ ᠠᠯᠠᠵᠦ ᠪᠣᠯᠬᠤ ᠦᠭᠡᠢ ᠭᠡᠬᠦ ᠶᠠᠷᠢᠶ᠎ᠠ ᠪᠠᠶᠢᠳᠠᠬ᠃ ᠲᠡᠭᠡᠷ᠎ᠡ ᠵᠠᠭᠤᠨ ᠤ ᠲᠠᠯᠠᠭᠠᠳ ᠣᠨ ᠤ ᠰᠡᠭᠦᠯᠴᠢ ᠪᠠᠷ ᠮᠠᠩᠬᠠᠨ ᠠᠷᠣ ᠶᠢᠨ ᠨᠢᠭᠡᠨ ᠠᠩᠴᠢᠨ ᠨᠢᠭᠡ ᠯᠡ ᠵᠢᠯ ᠳᠤ ᠵᠢᠷᠠᠭᠠᠳ ᠦᠨᠡᠭᠡ ᠠᠯᠠᠬᠰᠠᠨ ᠶᠣᠮ ᠭᠡᠨ᠎ᠡ᠃ ᠵᠢᠷᠠᠳᠣᠭᠠᠷ ᠦᠨᠡᠭᠡ ᠪᠠᠨ ᠠᠯᠠᠬᠰᠠᠨ ᠤ ᠮᠠᠷᠭᠠᠰᠢ ᠠᠴᠠ ᠨᠢ ᠡᠨᠡ ᠠᠩᠴᠢᠨ ᠤ ᠪᠡᠶ᠎ᠡ ᠨᠢ ᠮᠠᠭᠤᠵᠢᠷᠠᠭᠠᠳ ᠰᠣᠯᠢᠶ᠎ᠠ ᠡᠯᠢᠶ᠎ᠡ ᠦᠭᠡ ᠶᠠᠷᠢᠬᠤ ᠪᠣᠯᠣᠬᠰᠠᠨ ᠭᠡᠨ᠎ᠡ᠃ ᠠᠩᠴᠢᠨ ᠢ ᠡᠪᠡᠳᠴᠢᠯᠡᠭᠰᠡᠨ ᠤ ᠬᠡᠳᠦᠨ ᠡᠳᠦᠷ ᠤᠨ ᠬᠢᠨᠢ ᠲᠠᠷᠠᠭ᠎ᠠ ︽ᠮᠠᠩᠬᠠᠨ ᠡᠮᠦᠨᠡᠬᠢ ᠨᠢᠭᠡᠨ ᠬᠢᠳᠠᠳ ᠲᠣᠰᠬᠤᠨ ᠳᠤ ᠡᠯᠳᠡᠪ ᠡᠪᠡᠳᠴᠢᠨ ᠢ ᠡᠳᠡᠭᠡᠵᠦ ᠴᠢᠳᠠᠬᠤ ᠡᠮᠡᠭᠳᠡᠢ ᠬᠤᠪᠢᠯᠭᠠᠨ ᠢᠯᠡᠷᠡᠯ᠎ᠡ︾ ᠭᠡᠬᠦ ᠴᠢᠮᠡᠭᠡ ᠶᠢ ᠭᠡᠷ ᠤᠨ ᠬᠦᠮᠦᠰ ᠨᠢ ᠣᠯᠵᠦ ᠰᠣᠨᠣᠰᠣᠭᠠᠳ ᠡᠨᠡ ᠠᠩᠴᠢᠨ ᠤ ᠡᠪᠡᠳᠴᠢᠨ ᠢ ᠨᠢ ᠵᠠᠰᠠᠭᠤᠯᠬᠤ ᠪᠠᠷ ᠬᠦᠷᠦᠭᠰᠡᠨ ᠭᠡᠨ᠎ᠡ᠃ ᠡᠮᠡᠭᠳᠡᠢ ᠬᠤᠪᠢᠯᠭᠠᠨ ᠨᠢ ᠠᠩᠴᠢᠨ ᠢ ᠦᠵᠡᠬᠦ ᠪᠠᠷ ᠪᠣᠯᠣᠭᠠᠳ ᠰᠢᠳᠦᠭᠡᠨ ᠢᠶᠠᠨ ᠬᠡᠴᠢᠨᠡᠬᠡᠨ ᠲᠠᠭᠤᠳᠠᠬᠰᠠᠨ ᠪᠣᠯᠪᠠᠴᠦ ᠰᠢᠳᠦᠭᠡᠨ ᠨᠢ ᠪᠠᠭᠤᠵᠦ ᠢᠷᠡᠬᠦ ᠦᠭᠡᠢ ᠶᠡᠭᠡ ᠵᠣᠪᠠᠭᠠᠬᠰᠠᠨ ᠭᠡᠨ᠎ᠡ᠃ ᠬᠡᠳᠦ ᠣᠳᠠᠭ᠎ᠠ ᠲᠠᠭᠤᠳᠠᠬᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶ᠋ᠢ ᠰᠢᠳᠦᠭᠡᠨ ᠨᠢ ᠵᠠᠯᠠᠷᠠᠵᠦ ᠢᠷᠡᠭᠡᠳ ᠴᠡᠴᠡᠷᠬᠢᠯᠡᠭᠰᠡᠨ ᠦᠨᠳᠦᠷ ᠲᠠᠭᠤᠨ ᠢᠶᠠᠷ ︽ᠪᠢ ᠪᠣᠯ ᠠᠯᠢᠮᠠᠳᠦ ᠶᠢᠨ ᠠᠭᠤᠯᠠ ᠶᠢᠨ ᠰᠠᠬᠢᠭᠤᠰᠣ ᠪᠣᠯᠬᠤ ᠦᠨᠡᠬᠡᠨ ᠲᠠᠭᠢᠨᠢ ᠮᠦᠨ᠃ ᠦᠷ᠎ᠡ ᠬᠡᠦᠬᠡᠳ ᠢᠶᠠᠨ ᠡᠷᠢᠭᠰᠡᠭᠡᠷ ᠬᠡᠴᠢᠨᠡᠬᠡᠨ ᠭᠠᠵᠠᠷ ᠵᠠᠪᠣᠯ᠎ᠠ᠃ ᠴᠢ ᠮᠠᠭᠤ ᠠᠩᠴᠢᠨ ᠮᠢᠨᠦ ᠦᠷ᠎ᠡ ᠬᠤᠶᠢᠴᠢᠰ ᠢ ᠬᠡᠴᠢᠨᠡᠬᠡᠨ ᠠᠯᠠᠬᠰᠠᠨ ᠢᠶᠠᠨ ᠴᠡᠭᠡᠵᠢᠯᠡᠵᠦ ᠪᠠᠶᠢᠨ᠎ᠠ ᠦᠦ︖ ᠦᠨᠦᠳᠦᠷ ᠴᠢᠨᠦ ᠬᠤᠪᠢ ᠢᠷᠦᠭᠡᠯ ᠴᠢᠨᠢ ᠲᠠᠭᠠᠷᠠᠭᠠᠳ ᠨᠠᠮᠠᠢᠢ ᠡᠷᠢᠭᠡᠳ ᠢᠷᠡᠭᠰᠡᠨ ᠪᠣᠯᠬᠤᠷ ᠪᠢ ᠴᠢᠨᠦ ᠡᠪᠡᠳᠴᠢᠨ ᠢ ᠵᠠᠰᠠᠭᠠᠳ ᠡᠳᠡᠭᠡᠷᠡᠭᠦᠯᠵᠦ ᠪᠣᠯᠣᠨ᠎ᠠ᠃ ᠭᠡᠪᠡᠴᠦ ᠦᠷ᠎ᠡ ᠬᠡᠦᠬᠡᠳ ᠤᠨ ᠮᠢᠨᠢ ᠠᠷᠠᠰᠣ ᠶᠢ ᠡ᠊ᠨᠳᠡ ᠬᠦᠷᠭᠡᠵᠦ ᠢᠷ᠎ᠡ︕ ᠡᠭᠦᠨ ᠠᠴᠠ ᠬᠤᠶᠢᠰᠢ ᠲᠠᠬᠢᠵᠦ ᠠᠪᠠ ᠬᠢᠬᠦ ᠦᠭᠡᠢ ᠭᠡᠳᠡᠭ ᠠᠮᠠᠨ ᠲᠠᠩᠭᠠᠷᠢᠬ ᠢᠶᠠᠨ ᠦᠭ︕︾ ᠭᠡᠵᠦ ᠠᠶᠢᠯᠠᠳᠣᠬᠰᠠᠨ ᠶᠣᠮ ᠭᠡᠨ᠎ᠡ᠃ ᠠᠩᠴᠢᠨ ᠭᠤᠸᠠᠢ ᠡᠮᠡᠭᠳᠡᠢ ᠬᠤᠪᠢᠯᠭᠠᠨ ᠤ ᠱᠠᠭᠠᠷᠳᠠᠯᠭ᠎ᠠ ᠶᠢ ᠵᠦᠪᠰᠢᠶᠡᠷᠡᠭᠡᠳ ᠡᠷᠡᠭᠦᠯᠵᠢᠭᠰᠡᠨ ᠭᠡᠳᠡᠭ ᠶᠠᠷᠢᠶ᠎ᠠ ᠴᠦ ᠪᠣᠢ᠃      ᠮᠣᠩᠭᠤᠯᠴᠣᠳ ᠤᠨ ᠪᠣᠰᠣᠳ ᠭᠠᠵᠠᠷ ᠣᠷᠣᠨ ᠢᠶᠠᠷ ᠴᠦ ᠠᠡᠭ ᠤᠨ ᠬᠡᠰᠢᠭ ᠨᠢ ᠨᠠᠪᠳᠠᠬ ᠰᠠᠪᠳᠠᠬ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ ᠭᠡᠬᠦ ᠦᠵᠡᠯᠳᠡ ᠪᠣᠢ᠃ ᠪᠠᠭᠠᠷᠢᠨ ᠤ ᠠᠩᠴᠢᠳ ᠣᠷᠣᠭᠤ ᠠᠷᠣ ᠭᠡᠳᠡᠭ ᠭᠠᠵᠠᠷ ᠠᠪᠠ ᠬᠢᠭᠡᠳ ᠶᠡᠷᠦ ᠨᠢ ᠣᠯᠵᠠ ᠮᠠᠭᠤᠳᠠᠢ ᠪᠣᠯᠬᠤᠷ ᠣᠷᠣᠭᠤ ᠠᠷᠣ ᠶᠢᠨ ᠨᠠᠪᠳᠠᠬ ᠬᠠᠷᠠᠮᠴᠢ ᠭᠡᠵᠦ ᠭᠤᠮᠣᠳᠠᠳᠠᠬ᠃ ᠲᠡᠳᠡ ᠴᠠᠢ ᠶᠢᠨ ᠲᠡᠭᠡᠵᠢ ᠪᠠᠨ ᠡᠷᠭᠦᠬᠦ ᠳᠡᠭᠡᠨ ︽ᠠᠭᠤᠯᠠ ᠠᠭᠤᠯᠠ ᠶᠢᠨ ᠡᠵᠡᠳ ᠣᠮ ᠡ ᠬᠤᠨᠭ᠌︕ ᠣᠷᠣᠭᠤ ᠠᠷᠣ ᠶᠢᠨ ᠨᠠᠪᠳᠠᠬ ᠰᠠᠪᠳᠠᠬ ᠲᠤ ᠱᠣᠷᠣ ᠪᠣᠣ ᠲᠣᠯᠢᠶᠠᠯᠭᠠᠶ᠎ᠠ︾ ᠭᠡᠵᠦ ᠰᠢᠪᠰᠢᠳᠡᠭ ᠶᠣᠮ ᠭᠡᠨ᠎ᠡ᠃      ︽ᠰᠢᠳᠦᠯᠭᠡ ᠪᠢᠰᠢᠷᠡᠯ ᠨᠢ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠦᠪᠡᠷ ᠤᠨ ᠠᠮᠢ ᠨᠠᠰᠣᠨ ᠳᠤ ᠰᠠᠨᠠᠭ᠎ᠠ ᠲᠠᠯᠪᠢᠬᠤ ᠶᠠᠪᠣᠳᠠᠯ ᠠᠴᠠ ᠡᠭᠦᠰᠦᠭᠰᠡᠨ︾ ᠭᠡᠵᠦ ᠡᠷᠳᠡᠮᠳᠡᠳ ᠶᠠᠷᠢᠵᠦ ᠦᠡᠭᠭᠡᠷᠡᠪᠡ᠃ ᠦᠨᠡᠨ ᠳᠡᠭᠡᠨ ᠰᠢᠳᠦᠯᠭᠡ ᠪᠢᠰᠢᠷᠡᠯ ᠪᠣᠯ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠡᠬᠡ ᠪᠠᠶᠢᠭᠠᠯᠢ ᠪᠠᠨ ᠲᠦᠰᠢᠵᠦ ᠠᠮᠢᠳᠣᠷᠠᠵᠦ ᠣᠷᠣᠰᠢᠬᠤ ᠲᠣᠮᠳᠠ ᠠᠮᠢ ᠨᠠᠰᠣ ᠶᠢ ᠣᠢᠢᠯᠠᠭᠠᠵᠦ ᠲᠠᠨᠢᠬᠤ ᠶᠠᠪᠣᠴᠠ ᠳᠤ ᠪᠣᠢ ᠪᠣᠯᠣᠬᠰᠠᠨ ᠵᠦᠢᠯ ᠪᠠᠶᠢᠵᠦ ᠲᠠᠭᠠᠷᠠᠨ᠎ᠠ᠃ ᠣᠰᠣᠨ ᠤ ᠲᠣᠩᠭᠠᠯᠠᠬ ᠢ ᠲᠠᠭᠠᠵᠦ ᠡᠪᠡᠰᠦᠨ ᠤ ᠰᠣᠷᠭᠤᠬ ᠢ ᠰᠣᠩᠭᠤᠵᠦ ᠨᠨᠭᠦᠳᠡᠯᠯᠡᠨ ᠮᠠᠯᠵᠢᠵᠦ ᠪᠠᠶᠢᠬᠰᠠᠨ ᠬᠤᠷᠴᠢᠨ ᠨᠣᠳᠤᠬ ᠨᠢ ᠴᠠᠬ ᠦᠶ᠎ᠡ ᠶᠢᠨ ᠬᠦᠭᠵᠢᠯᠳᠡ ᠶᠢ ᠲᠠᠭᠠᠯᠳᠣᠨ ᠲᠠᠷᠢᠶ᠎ᠠ ᠲᠦᠮᠦᠰᠦ ᠲᠠᠷᠢᠬᠰᠠᠨ ᠰᠠᠭᠤᠷᠢᠰᠢᠯ ᠠᠮᠢᠳᠣᠷᠠᠯ ᠲᠠᠢ᠂ ᠮᠣᠩᠭᠤᠯ᠂ ᠬᠢᠳᠠᠳ᠂ ᠪᠣᠰᠣᠳ ᠴᠦᠬᠡᠨ ᠲᠣᠭᠠᠳᠦ ᠦᠨᠳᠦᠰᠦᠳᠡᠨ ᠵᠡᠷᠭᠡ ᠶᠢᠨ ᠬᠤᠯᠢᠯᠳᠣᠨ ᠰᠠᠭᠤᠬᠰᠠᠨ ᠭᠠᠵᠠᠷ ᠣᠷᠣᠨ ᠪᠣᠯᠵᠠᠢ᠃ ᠡᠭᠦᠨ ᠳᠤ ᠬᠢᠳᠠᠳ ᠦᠨᠳᠦᠰᠦᠳᠡᠨ ᠤ ᠰᠣᠶᠣᠯ᠂ ᠵᠠᠩ ᠦᠢᠯᠡ᠂ ᠪᠡᠯᠭᠡᠳᠡᠯ ᠵᠡᠷᠭᠡ ᠨᠢ ᠬᠤᠷᠴᠢᠨ ᠨᠣᠳᠤᠬ ᠤᠨ ᠦᠨᠴᠦᠭ ᠪᠣᠯᠣᠩ ᠬᠦᠷᠳᠡᠯ᠎ᠡ ᠨᠦᠯᠦᠭᠡᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠪᠣᠯᠪᠠᠴᠦ ᠬᠤᠷᠴᠢᠨ ᠮᠣᠩᠭᠤᠯᠴᠣᠳ ᠦᠪᠡᠷ ᠤᠨ ᠢᠶᠠᠨ ᠣᠯᠠᠮᠵᠢᠯᠠᠯᠳᠦ ᠵᠠᠩ ᠦᠢᠯᠡ᠂ ᠰᠢᠳᠦᠯᠭᠡ ᠪᠢᠰᠢᠷᠡᠯ᠂ ᠪᠡᠯᠭᠡᠳᠡᠯ ᠢᠶᠠᠨ ᠣᠳᠣ ᠳᠤ ᠲᠣᠯᠳᠠᠯ᠎ᠠ ᠵᠣᠬᠢᠬᠤ ᠬᠡᠮᠵᠢᠶ᠎ᠡ ᠪᠠᠷ ᠬᠠᠳᠠᠭᠠᠯᠠᠬᠰᠠᠭᠠᠷ ᠢᠷᠡᠵᠡᠢ᠃ ᠬᠤᠷᠴᠢᠨᠴᠣᠳ ᠤᠨ ᠵᠠᠩ ᠴᠢᠨᠠᠷ ᠤᠨ ᠦᠨᠳᠦᠰᠦᠨ ᠣᠨᠴᠠᠯᠢᠬ ᠨᠢ ᠨᠡᠶᠢᠳᠡ ᠮᠣᠩᠭᠤᠯᠴᠣᠳ ᠤᠨ ᠨᠡᠶᠢᠳᠡᠯᠢᠭ ᠰᠢᠨᠵᠢ ᠶᠢ ᠬᠠᠳᠠᠭᠠᠯᠠᠵᠦ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ ᠣᠷᠣᠨ ᠨᠣᠳᠤᠬ ᠤᠨ ᠰᠢᠨᠵᠢ ᠪᠠᠷ ᠮᠠᠰᠢ ᠴᠢᠩᠭ᠎ᠠ᠂ ᠠᠭᠤᠯᠭ᠎ᠠ ᠬᠡᠯᠪᠡᠷᠢ ᠶᠢᠨ ᠬᠤᠪᠢᠷᠠᠯᠳᠠ ᠬᠦᠭᠵᠢᠯᠳᠡ ᠪᠠᠷ ᠶᠡᠭᠡ ᠵᠡᠷᠭᠡ ᠶᠢᠨ ᠣᠨᠴᠠᠯᠢᠬ ᠲᠠᠢ ᠪᠠᠶᠢᠳᠠᠬ᠃ ᠰᠢᠳᠦᠯᠭᠡ ᠪᠢᠰᠢᠷᠡᠯ ᠤᠨ ᠵᠠᠩ ᠦᠢᠯᠡ ᠶᠢᠨ ᠲᠠᠯ᠎ᠠ ᠪᠠᠷ ᠴᠦ ᠭᠡᠰᠡᠨ ᠦᠪᠡᠷᠮᠢᠴᠡ ᠣᠨᠴᠠᠯᠢᠬ ᠲᠠᠢ᠂ ᠨᠡᠶᠢᠯᠡᠮᠡᠯ ᠰᠢᠨᠵᠢ ᠲᠠᠢ ᠪᠠᠶᠢᠳᠠᠬ ᠨᠢ ᠬᠤᠷᠴᠢᠨᠴᠣᠳ ᠤᠨ ᠨᠡᠶᠢᠳᠡᠯᠢᠭ ᠣᠨᠴᠠᠯᠢᠬ ᠪᠣᠯᠣᠨ᠎ᠠ᠃ ᠬᠤᠷᠴᠢᠨᠴᠣᠳ ᠤᠨ ᠨᠠᠪᠳᠠᠬ ᠰᠠᠪᠳᠠᠬ ᠤᠨ ᠰᠢᠳᠦᠯᠭᠡ ᠪᠠᠷ ᠠᠪᠴᠦ ᠦᠵᠡᠭᠰᠡᠨ ᠴᠦ ᠨᠡᠶᠢᠳᠡ ᠮᠣᠩᠭᠤᠯᠴᠣᠳ ᠤᠨ ᠨᠡᠶᠢᠳᠡᠯᠢᠭ ᠰᠢᠨᠵᠢ ᠶᠢ ᠬᠠᠳᠠᠭᠠᠯᠠᠵᠦ ᠪᠠᠶᠢᠬᠤ ᠪᠠᠷ ᠦᠯᠦ ᠪᠠᠷᠠᠮ ᠮᠠᠰᠢ ᠣᠯᠠᠨ ᠰᠢᠨ᠎ᠡ ᠬᠡᠯᠪᠡᠷᠢ ᠶᠢᠨ ᠵᠠᠩ ᠦᠢᠯᠡ ᠶᠢ ᠨᠡᠮᠡᠭᠳᠡᠭᠦᠯᠵᠦ ᠦᠪᠡᠷ ᠤᠨ ᠢᠶᠠᠨ ᠣᠨᠴᠠᠯᠢᠬ ᠲᠠᠢ ᠰᠢᠳᠦᠯᠭᠡ ᠪᠢᠰᠢᠷᠡᠯ ᠤᠨ ᠬᠡᠯᠪᠡᠷᠢ ᠶᠢ ᠪᠣᠢ ᠪᠣᠯᠭᠠᠬᠰᠠᠨ ᠪᠠᠶᠢᠳᠠᠬ᠃ ᠶᠡᠷᠦᠩᠬᠡᠶᠢᠯᠡᠭᠡᠳ ᠬᠡᠯᠡᠪᠡᠯ᠂ ᠬᠤᠷᠴᠢᠨᠴᠣᠳ ᠤᠨ ᠰᠢᠳᠦᠯᠭᠡ ᠪᠢᠰᠢᠷᠡᠯ ᠤᠨ ᠵᠠᠩ ᠦᠢᠯᠡ ᠨᠢ ᠮᠣᠩᠭᠤᠯᠴᠣᠳ ᠤᠨ ᠣᠯᠠᠮᠵᠢᠯᠠᠯᠳᠦ ᠵᠠᠩ ᠦᠢᠯᠡ ᠶᠢᠨ ᠨᠡᠶᠢᠳᠡᠯᠢᠭ ᠰᠢᠨᠵᠢ ᠶᠢ ᠬᠠᠳᠠᠭᠠᠯᠠᠵᠦ ᠬᠠᠷᠠᠭᠤᠯᠣᠬᠰᠠᠨ ᠮᠦᠷᠳᠡᠭᠡᠨ ᠬᠤᠷᠴᠢᠨ ᠮᠣᠩᠭᠤᠯᠴᠣᠳ ᠤᠨ ᠡᠬᠡ ᠪᠠᠶᠢᠭᠠᠯᠢ ᠪᠠᠨ ᠣᠢᠢᠯᠠᠭᠠᠵᠦ᠂ ᠲᠠᠨᠢᠵᠦ᠂ ᠬᠠᠶᠢᠷᠠᠯᠠᠵᠦ᠂ ᠬᠠᠮᠠᠭᠠᠯᠠᠵᠦ᠂ ᠡᠬᠡ ᠪᠠᠶᠢᠭᠠᠯᠢ ᠲᠠᠢ ᠪᠠᠨ ᠵᠣᠬᠢᠴᠠᠯᠳᠣᠨ ᠣᠷᠣᠰᠢᠬᠤ ᠰᠡᠳᠭᠢᠬᠦᠢ ᠲᠣᠮᠳᠠ ᠰᠢᠷᠬᠡᠭ ᠡᠪᠡᠰᠦ ᠮᠦᠬᠦᠯᠢᠭ ᠰᠢᠷᠣᠢ ᠳᠠᠭᠠᠨ ᠬᠦᠷᠳᠡᠯ᠎ᠡ ᠰᠢᠳᠢᠴᠢᠯᠡᠨ ᠦᠵᠡᠵᠦ ᠠᠮᠢᠴᠢᠯᠠᠨ ᠰᠢᠳᠦᠵᠦ ᠢᠷᠡᠭᠰᠡᠨ ᠤ ᠣᠯᠠ ᠮᠦᠷ ᠪᠠᠶᠢᠵᠦ ᠲᠠᠭᠠᠷᠠᠨ᠎ᠠ᠃
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ