ᠬᠦᠬᠡ ᠤᠰᠤ ᠨᠠᠭᠤᠷ ᠤᠨ ᠲᠤᠮᠤᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/8/4
     ᠲᠠᠪᠬᠤᠷᠪᠠᠶᠠᠷ ᠨᠠᠰᠣᠳᠠᠨ ᠤ ᠡᠯᠦᠨᠴᠡ ᠶᠢᠨ ᠦᠶ᠎ᠡ ᠳᠤᠨᠢ ᠣᠳᠣ ᠶᠢᠨ ᠬᠤᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠲᠤᠮᠳᠠᠳᠤ ᠬᠤᠰᠢᠭᠤ ᠶᠢᠨ ᠰᠢᠳᠠᠢ ᠰᠣᠮᠣ ᠶᠢᠨ ᠲᠡᠮᠡᠭᠡᠴᠢᠨ ᠭᠠᠴᠠᠭ᠎ᠠ ᠶᠢᠨ ᠵᠡᠭᠦᠨ ᠡᠮᠦᠨ᠎ᠡ᠂ ᠪᠠᠭ᠎ᠠ ᠪᠠᠶᠠᠨᠳᠠᠯ᠎ᠠ ᠭᠠᠴᠠᠭ᠎ᠠ ᠶᠢᠨ ᠪᠠᠷᠠᠭᠤᠨ ᠡᠮᠦᠨ᠎ᠡ ᠪᠠᠶᠢᠭᠰᠠᠨ ᠪᠠᠭ᠎ᠠ ᠦᠨᠳᠦᠷᠪᠡᠢ ᠶᠢᠨ ᠠᠷᠣ ᠶᠢᠨ ᠠᠷᠠᠯᠵᠢ ᠳᠤ ᠰᠠᠭᠤᠵᠣ ᠪᠠᠶᠢᠭᠰᠠᠨ ᠭᠡᠨ᠎ᠡ᠃ ᠠᠷᠠᠯᠵᠢ ᠭᠠᠴᠠᠭ᠎ᠠ ᠪᠠᠶᠢᠬᠤ ᠦᠭᠡᠢ ᠪᠣᠯᠣᠭᠠᠳ ᠪᠠᠰᠠ ᠵᠠᠭᠤᠨ ᠵᠢᠯ ᠪᠣᠯᠵᠣ ᠪᠠᠶᠢᠨ᠎ᠠ᠃ ᠲᠡᠳᠡ ᠪᠣᠯ ᠬᠠᠪᠣᠳᠣ ᠬᠠᠰᠠᠷ ᠤᠨ ᠬᠤᠶᠢᠴᠢᠰ᠂ ᠲᠠᠶᠢᠵᠢ ᠵᠡᠷᠭᠡ ᠲᠠᠢ᠂ ᠪᠣᠷᠵᠢᠬᠢᠨ ᠣᠪᠣᠭᠳᠠᠢ᠃      ᠡᠯᠣᠨᠴᠡ ᠨᠢ ᠠᠷᠠᠯᠵᠢ ᠶᠢᠨ ᠠᠶᠢᠯ ᠠᠴᠠ ᠮᠣᠷᠢ ᠣᠨ᠋ᠳ ᠭᠠᠷᠴᠦ ᠣᠳᠣ ᠶᠢᠨ ᠬᠦᠬᠡᠨ᠋ᠣᠰᠣ ᠭᠠᠴᠠᠭ᠎ᠠ ᠶᠢᠨ ᠪᠠᠷᠠᠭᠤᠨ ᠡᠮᠦᠨ᠎ᠡ ᠪᠠᠶᠢᠬᠤ ᠲᠡᠯᠣᠳᠣ ᠶᠢᠨ ᠣᠷᠣᠢ ᠬᠦᠷᠬᠦ ᠳᠤ ᠲᠡᠪᠡᠷᠢ ᠪᠦᠳᠦᠭᠦᠨ᠂ ᠬᠤᠶᠠᠷ ᠲᠡᠪᠡᠷᠢ ᠪᠦᠳᠦᠭᠦᠨ ᠲᠡᠯᠣᠳᠣ ᠶᠢᠨ ᠮᠣᠳᠣ ᠢᠭᠴᠣᠷᠠᠨ ᠣᠷᠭᠤᠭᠰᠠᠨ ᠬᠠᠷᠠᠭᠳᠠᠯ᠎ᠠ᠃ ᠲᠡᠯᠣᠳᠣ ᠶᠢᠨ ᠮᠣᠳᠣ ᠪᠣᠯ ᠬᠠᠮᠤᠭ ᠠᠴᠠ ᠣᠳᠠᠭᠠᠨ ᠪᠦᠳᠦᠭᠦᠷᠡᠬᠦ ᠮᠣᠳᠣᠨ ᠤ ᠲᠦᠷᠦᠯ ᠪᠣᠯᠣᠨ᠎ᠠ᠃ ᠪᠠᠰᠠ ᠵᠠᠯᠭᠠᠨ ᠵᠡᠭᠦᠨ ᠬᠤᠶᠢᠰᠢ ᠶᠠᠪᠣᠭᠰᠠᠭᠠᠷ ᠪᠠᠶᠢᠭᠠᠳ ᠬᠤᠳᠣᠭᠤᠷ ᠭᠠᠵᠠᠷ ᠣᠷᠣᠵᠣ ᠢᠷᠡᠬᠦ ᠳᠤ ᠮᠣᠳᠣ ᠪᠠᠶᠢᠬᠤ ᠦᠭᠡᠢ ᠪᠣᠯᠵᠣ᠂ ᠦᠬᠡᠷ ᠰᠡᠭᠦᠯᠳᠦ᠂ ᠰᠢᠷ᠎ᠠ ᠪᠣᠷᠭᠠᠰᠣ᠂ ᠰᠢᠷᠠᠯᠵᠢ ᠵᠡᠷᠭᠡ ᠭᠡᠷ ᠴᠢᠨᠡᠭᠡ ᠣᠷᠭᠤᠵᠣ ᠪᠠᠶᠢᠪᠠ᠃ ᠶᠠᠪᠣᠭᠰᠠᠭᠠᠷ ᠬᠦᠬᠡᠨ᠋ᠣᠰᠣ ᠭᠠᠴᠠᠭ᠎ᠠ ᠶᠢᠨ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠮᠠᠩᠬᠠᠨ ᠡᠩᠭᠡᠷ ᠢᠷᠡᠬᠦ ᠳᠤ ᠨᠠᠷᠠ ᠣᠨᠠᠭᠠᠳ ᠪᠦᠷᠦᠢ ᠲᠠᠰᠣᠷᠠᠵᠣ᠂ ᠶᠠᠪᠣᠬᠤ ᠵᠦᠭ ᠢᠶᠠᠨ ᠣᠯᠬᠤ ᠦᠭᠡᠢ ᠲᠦᠭᠡᠷᠢᠵᠡᠢ᠃ ᠲᠡᠭᠡᠭᠡᠳ ᠲᠡᠨᠳᠡ ᠪᠠᠨ ᠬᠤᠨᠤᠭ ᠠᠪᠴᠦ ᠮᠠᠷᠭᠠᠰᠢ ᠶᠢᠨ ᠨᠠᠷᠠ ᠭᠠᠷᠬᠤ ᠪᠠᠷ ᠨᠢ ᠠᠶᠢᠯ ᠡᠷᠢᠬᠦ ᠪᠠᠷ ᠪᠣᠯᠵᠠᠢ᠃ ᠣᠨᠳᠠᠭᠠᠳ ᠰᠦᠨᠢ ᠲᠦᠯᠢ ᠶᠢᠨ ᠦᠶ᠎ᠡ ᠪᠠᠷ ᠰᠡᠷᠡᠬᠦ ᠳᠤ᠂ ᠡᠮᠦᠨ᠎ᠡ ᠵᠦᠭ ᠲᠤ ᠦᠬᠡᠷ ᠮᠦᠭᠡᠷᠡᠨ᠂ ᠠᠳᠣᠭᠤ ᠢᠨᠴᠠᠭᠠᠭᠠᠳ᠂ ᠲᠡᠮᠡᠭᠡ ᠪᠤᠶᠢᠯᠠᠵᠣ᠂ ᠬᠤᠨᠢ ᠢᠮᠠᠭ᠎ᠠ ᠮᠠᠶᠢᠯᠠᠬᠤ ᠲᠠᠭᠤ ᠭᠠᠷᠴᠦ ᠪᠠᠶᠢᠪᠠ᠃ ᠡᠯᠣᠨᠴᠡ ᠨᠢ ᠬᠡᠪᠳᠡᠭᠰᠡᠨ ᠣᠷᠣᠨ ᠠᠴᠠ ᠪᠠᠨ ᠪᠣᠰᠴᠣ᠂ ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠤᠨ ᠲᠠᠭᠤ ᠭᠠᠷᠬᠤ ᠵᠦᠭ ᠲᠤᠨᠢ ᠣᠴᠢᠵᠦ ᠠᠶᠢᠯ ᠪᠠᠶᠢᠬᠤ ᠡᠰᠡᠬᠦ ᠶᠢ ᠡᠷᠢᠭᠰᠡᠭᠡᠷ ᠣᠷᠢᠳᠣ ᠵᠣ ᠲᠡᠭᠡᠷ᠎ᠡ ᠭᠠᠷᠬᠤ ᠳᠤ ᠮᠣᠳᠣ ᠪᠠᠶᠢᠬᠤ ᠠᠴᠠ ᠪᠢᠰᠢ ᠬᠦᠮᠦᠨ ᠮᠠᠯ ᠤᠨ ᠪᠠᠷ᠎ᠠ ᠬᠠᠷᠠᠭᠳᠠᠬᠤ ᠦᠭᠡᠢ᠃ ᠡᠷᠭᠢᠭᠡᠳ ᠬᠡᠪᠳᠡᠭᠰᠡᠨ ᠣᠷᠣᠨ ᠳᠠᠭᠠᠨ ᠢᠷᠡᠬᠦ ᠳᠤ ᠬᠤᠶᠢᠳᠣ ᠵᠦᠭ ᠲᠤᠨᠢ ᠮᠦᠨ ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠤᠨ ᠲᠠᠭᠤ ᠭᠠᠷᠬᠤ ᠰᠣᠨᠣᠰᠳᠠᠬᠤ ᠪᠣᠯᠬᠤᠷ ᠬᠤᠶᠢᠳᠣ ᠵᠦᠭ ᠨᠡᠯᠢᠶᠡᠳ ᠶᠠᠪᠣᠭᠠᠳ ᠶᠠᠭᠤ ᠴᠦ ᠣᠯᠣᠭᠰᠠᠨ ᠦᠭᠡᠢ ᠪᠣᠴᠠᠨ ᠢᠷᠡᠪᠡ᠃ ᠡᠨᠡ ᠦᠶ᠎ᠡ ᠳᠤ ᠵᠡᠭᠦᠨ ᠲᠠᠯ᠎ᠠ ᠳᠤᠨᠢ ᠮᠦᠨ ᠴᠦ ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠤᠨ ᠲᠠᠭᠤ ᠭᠠᠷᠬᠤ ᠳᠤ ᠬᠡᠳᠦᠢ ᠡᠷᠢᠭᠡᠳ ᠴᠦ ᠣᠯᠣᠭᠰᠠᠨ ᠦᠭᠡᠢ᠂ ᠪᠣᠴᠠᠭᠠᠳ ᠢᠷᠡᠪᠡᠯ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤᠨᠢ ᠪᠠᠰᠠ ᠲᠠᠭᠤ ᠭᠠᠷᠬᠤ ᠪᠠᠷ ᠨᠢ ᠪᠠᠷᠠᠭᠤᠨᠰᠢ ᠡᠷᠢᠭᠡᠳ ᠴᠦ ᠣᠯᠳᠠᠭᠰᠠᠨ ᠦᠭᠡᠢ ᠬᠡᠪᠳᠡᠭᠰᠡᠨ ᠣᠷᠣᠨ ᠳᠠᠭᠠᠨ ᠬᠠᠷᠢᠵᠤ ᠢᠷᠡᠭᠡᠳ ᠭᠠᠶᠢᠬᠠᠯ ᠲᠦᠷᠦᠭᠳᠡᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠭᠡᠨᠡᠳᠳᠡ ᠲᠣᠰ ᠣᠷᠣᠨ ᠴᠢᠨᠢ ᠨᠠᠪᠳᠠᠭ ᠰᠠᠪᠳᠠᠭ ᠰᠠᠶᠢᠨ ᠭᠠᠵᠠᠷ ᠪᠣᠯᠬᠤ ᠶᠢ ᠰᠡᠷᠡᠵᠦ ᠮᠡᠳᠡᠪᠡ᠃ ᠢᠩᠭᠢᠭᠡᠳ ᠬᠡᠪᠳᠡᠭᠰᠡᠨ ᠣᠷᠣᠨ ᠳᠠᠭᠠᠨ ᠠᠳᠬᠤᠵᠣ ᠪᠠᠶᠢᠭᠰᠠᠨ ᠲᠡᠩᠰᠡᠨ ᠲᠠᠰᠢᠭᠤᠷ ᠢᠶᠠᠨ ᠬᠠᠳᠬᠤᠵᠣ ᠲᠠᠯᠪᠢᠪᠠ᠃      ᠮᠠᠷᠭᠠᠰᠢ ᠦᠷᠯᠦᠭᠡ ᠨᠢ ᠰᠠᠯᠬᠢ ᠪᠠᠶᠢᠬᠤ ᠦᠭᠡᠢ᠂ ᠭᠡᠭᠡ ᠣᠷᠣᠭᠰᠠᠨ ᠤ ᠲᠠᠷᠠᠭ᠎ᠠ ᠵᠡᠬᠦᠨ ᠬᠤᠶᠢᠳᠣ ᠵᠦᠭ ᠲᠤᠨᠢ ᠲᠡᠭᠡᠭᠰᠢ ᠪᠠᠨ ᠠᠪ ᠠᠰᠬᠠᠨ ᠣᠳᠤᠭ᠎ᠠ ᠰᠣᠭᠤᠨᠠᠭᠯᠠᠵᠣ ᠪᠠᠶᠢᠬᠤ ᠶᠢ ᠣᠯᠵᠣ ᠬᠠᠷᠠᠯ᠎ᠠ᠃ ᠲᠡᠭᠡᠭᠡᠳ ᠲᠡᠨᠳᠡ ᠠᠶᠢᠯ ᠪᠠᠶᠢᠬᠤ ᠶᠢ ᠪᠠᠷᠣᠭᠯᠠᠭᠠᠳ ᠲᠡᠷᠡ ᠵᠦᠭ ᠠᠯᠬᠤᠭᠰᠠᠭᠠᠷ ᠣᠴᠢᠬᠤ ᠳᠤ ᠨᠢᠭᠡ ᠡᠪᠡᠰᠦᠨ ᠭᠡᠷ ᠪᠠᠶᠢᠭᠰᠠᠨ ᠪᠦᠭᠡᠳ ᠭᠡᠷ ᠲᠤᠨᠢ ᠵᠢᠷᠠ ᠭᠠᠷᠣᠭᠠᠳ ᠲᠠᠯᠠ ᠰᠢᠬᠠᠵᠣ ᠪᠠᠶᠢᠬᠤ ᠭᠦᠭᠰᠢᠨ ᠡᠷ᠎ᠡ ᠡᠮ᠎ᠡ ᠬᠤᠶᠠᠭᠤᠯᠠ ᠠᠮᠢᠳᠣᠷᠠᠵᠣ ᠪᠠᠶᠢᠭᠰᠠᠨ ᠭᠡᠨ᠎ᠡ᠃ ᠡᠳᠡᠨ ᠶᠢᠨ ᠣᠪᠣᠭᠳᠠᠢ ᠰᠣᠯᠣᠩᠭᠤᠰ ᠦᠨᠳᠦᠰᠦᠳᠡᠨ ᠤ ᠬᠦᠮᠦᠰ ᠭᠡᠨ᠎ᠡ᠃ ᠴᠢᠩᠭᠢᠰ ᠬᠠᠭᠠᠨ ᠤ ᠴᠡᠷᠢᠭ ᠲᠣᠰ ᠭᠠᠵᠠᠷ ᠲᠤ ᠲᠣᠪᠳᠣᠯᠣᠨ ᠣᠷᠣᠵᠣ ᠢᠷᠡᠭᠡᠳ ᠰᠣᠯᠣᠩᠭᠤᠰ ︵ᠭᠠᠣᠯᠢ︶ ᠦᠨᠳᠦᠰᠦᠳᠡᠨ ᠤ ᠬᠦᠮᠦᠰ ᠢ ᠬᠦᠬᠡᠭᠡᠨ ᠶᠠᠪᠣᠭᠤᠯᠬᠤ ᠳᠤ ᠲᠡᠳᠡ ᠦᠬᠦᠪᠡᠴᠦ ᠶᠠᠪᠣᠬᠤ ᠦᠭᠡᠢ ᠭᠡᠳ ᠦᠯᠡᠳᠡᠭᠰᠡᠨ ᠨᠢᠭᠡ ᠠᠶᠢᠯ ᠡᠷᠦᠭᠡ ᠶᠢᠨ ᠬᠤᠶᠢᠴᠢᠰ ᠭᠡᠨ᠎ᠡ᠃ ᠡᠨᠡ ᠡᠪᠦᠭᠡᠨ ᠦᠪᠡᠳᠡᠢ ᠭᠡᠰᠡᠨ ᠨᠡᠷ᠎ᠡ ᠲᠠᠢ ᠪᠣᠯᠬᠤᠷ ᠡᠨᠡ ᠭᠠᠵᠠᠷ ᠨᠢ ᠦᠪᠡᠳᠡᠢ ᠶᠢᠨ ᠪᠠᠶᠠᠨᠮᠠᠩᠬ᠎ᠠ ᠭᠡᠰᠡᠨ ᠨᠡᠷ᠎ᠡ ᠲᠠᠢ ᠪᠠᠶᠢᠵᠠᠢ᠃ ᠴᠠᠢ ᠬᠤᠭᠤᠯᠠᠨ ᠤ ᠲᠠᠷᠠᠭ᠎ᠠ ᠦᠪᠡᠳᠡᠢ ᠡᠪᠦᠭᠡᠨ ᠲᠡᠭᠦᠨ ᠢ ᠣᠳᠠᠰᠣ ᠲᠠᠳᠠᠭᠰᠠᠨ ᠮᠡᠳᠦ ᠠᠪ ᠠᠰᠬᠠᠨ ᠴᠣᠪᠣᠭ᠎ᠠ ᠵᠠᠮ ᠢᠶᠠᠷ ᠣᠷᠣᠭᠤᠯᠣᠨ ᠵᠠᠮ ᠲᠠᠭᠠᠭᠤᠯᠣᠭᠠᠳ ᠣᠨᠣᠭᠰᠠᠨ ᠮᠣᠷᠢ ᠲᠠᠢ ᠨᠢ ᠠᠭᠤᠯᠵᠠᠭᠤᠯᠵᠤ ᠦᠭᠴᠡᠢ᠃ ᠡᠯᠣᠨᠴᠡ ᠨᠢ ᠭᠡᠷ ᠲᠡᠭᠡᠨ ᠬᠠᠷᠢᠵᠦ ᠢᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠬᠦᠷᠢᠶ᠎ᠡ ᠲᠦᠭᠦᠷᠡᠩ ᠠᠯᠪᠠᠳᠣ ᠵᠠᠷᠣᠴᠠ ᠪᠠᠨ ᠲᠠᠭᠤᠳᠠᠨ ᠲᠡᠷᠬᠡ ᠣᠨᠤᠭ᠎ᠠ ᠬᠦᠯᠦᠨ᠂ ᠬᠢᠷᠦᠭᠡ ᠰᠦᠬᠡ ᠪᠡᠯᠡᠳᠭᠡᠵᠦ᠂ ᠢᠷᠡᠭᠰᠡᠨ ᠮᠦᠷ ᠢᠶᠠᠷ ᠢᠶᠠᠨ ᠮᠣᠳᠣ ᠣᠭᠳᠣᠯᠣᠨ ᠵᠠᠮ ᠭᠠᠷᠭᠠᠵᠠᠢ᠃ ᠡᠾᠦ᠋ᠸᠧ ᠣᠪᠣᠭᠳᠠᠢ ᠠᠯᠪᠠᠳᠣ ᠪᠠᠨ ᠣᠷᠢᠳ ᠢᠶᠠᠷ ᠶᠠᠪᠣᠭᠤᠯᠵᠣ ᠮᠠᠵᠢᠶᠠᠽᠢ ᠭᠡᠷ ︵ᠦᠨᠳᠦᠷ ᠬᠠᠨ᠎ᠠ ᠲᠡᠭᠡᠷ᠎ᠡ ᠪᠠᠨ ᠡᠭᠦᠳᠡ ᠴᠣᠩᠬᠤ ᠲᠠᠢ ᠭᠡᠷ᠂ ᠲᠡᠣᠬᠡᠨ ᠲᠡᠭᠡᠷ᠎ᠡ ᠵᠢᠩᠭᠢᠨᠢ ᠭᠡᠷ ᠪᠣᠯ ᠮᠠᠵᠢᠶᠠᠽᠢ ᠭᠡᠷ ᠪᠣᠯᠣᠨ᠎ᠠ᠂ ᠣᠳᠣ ᠶᠢᠨ ᠭᠡᠷ ᠢ ᠣᠷᠳᠣ ᠭᠡᠵᠦ ᠬᠡᠯᠡᠪᠡᠯ ᠵᠣᠬᠢᠨ᠎ᠠ ᠭᠡᠨ᠎ᠡ︶ ᠪᠠᠷᠢᠭᠤᠯᠣᠨ ᠰᠠᠭᠤᠯᠭᠠᠭᠠᠳ᠂ ᠲᠠᠷᠠᠭ᠎ᠠ ᠨᠢ ᠦᠪᠡᠰᠦᠪᠡᠨ ᠢᠷᠡᠵᠦ ᠲᠡᠩᠰᠡᠨ ᠲᠠᠰᠢᠭᠤᠷ ᠬᠠᠳᠬᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠴᠠᠩ ᠪᠠᠢ ᠱᠠᠨ ᠠᠭᠤᠯᠠᠨ ᠠᠴᠠ ᠮᠣᠳᠣ ᠴᠢᠯᠠᠭᠤ ᠲᠡᠭᠡᠭᠡᠵᠦ ᠠᠪᠴᠢᠷᠠᠭᠠᠳ᠂ ᠰᠦᠮ᠎ᠡ ᠰᠢᠭ ᠰᠠᠶᠢᠬᠠᠨ ᠸᠠᠭᠠᠷ ᠤᠨ ᠭᠡᠷ ᠣᠷᠳᠣ ᠪᠠᠷᠢᠭᠰᠠᠨ ᠶᠤᠮ ᠭᠡᠨ᠎ᠡ᠃ ᠪᠠᠷᠤᠭ 1860 ‍ᠭᠠᠳ ᠣᠨ ᠤ ᠦᠶ᠎ᠡ ᠳᠤ ᠡᠾᠦ᠋ᠸᠧ ᠣᠪᠣᠭᠳᠠᠨ ᠡ᠊ᠨᠳᠡ ᠭᠡᠷ ᠪᠠᠷᠢᠵᠦ ᠰᠠᠭᠤᠯ᠎ᠠ ᠭᠡᠵᠦ ᠬᠡᠯᠡᠬᠦ ᠣᠴᠢᠷ ᠡᠨᠡ ᠪᠣᠯᠠᠢ᠃ ᠲᠡᠷᠡ ᠲᠡᠩᠰᠡᠨ ᠲᠠᠰᠢᠭᠤᠷ ᠬᠠᠳᠬᠤᠵᠣ ᠣᠷᠣᠭᠤᠯᠣᠭᠰᠠᠨ ᠭᠠᠵᠠᠷ ᠲᠤᠨᠢ᠂ ᠬᠦᠬᠡ ᠪᠣᠬ᠎ᠠ ᠬᠦᠬᠡ ᠦᠨᠢᠶ᠎ᠡ ᠨᠣᠳᠣᠭᠯᠠᠭᠰᠠᠨ ᠹᠧᠩᠱᠦ᠋ᠢ ᠲᠦᠢᠯ ᠤᠨ ᠰᠠᠶᠢᠨ ᠭᠠᠵᠠᠷ ᠭᠡᠨ᠎ᠡ᠃ ᠠᠷᠠᠯᠵᠢ ᠠᠶᠢᠯ ᠠᠴᠠ ᠨᠡᠭᠦᠵᠦ ᠢᠷᠡᠬᠦ ᠦᠶ᠎ᠡ ᠳᠡᠭᠡᠨ ᠨᠢᠬᠡ ᠬᠦᠬᠡ ᠪᠣᠬ᠎ᠠ ᠬᠦᠬᠡ ᠦᠨᠢᠶ᠎ᠡ ᠲᠠᠢ ᠪᠠᠶᠢᠭᠰᠠᠨ᠃ ᠡ᠊ᠨᠳᠡ ᠨᠡᠭᠦᠵᠦ ᠢᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠮᠠᠯ ᠠᠳᠣᠭᠤ ᠨᠢ ᠦᠨᠢᠷ ᠦᠷᠡᠵᠢᠭᠡᠳ ᠲᠣᠭᠠᠯᠠᠵᠣ ᠪᠠᠷᠠᠰᠢ ᠦᠭᠡᠢ ᠣᠯᠠᠨ ᠪᠣᠯᠵᠠᠢ᠃ ᠨᠢᠭᠡ ᠯᠡ ᠵᠢᠯ ᠳᠤ ᠦᠷᠡᠵᠢᠭᠰᠡᠨ ᠲᠣᠭᠤᠯ ᠤᠨ ᠲᠣᠳᠣᠷ᠎ᠠ ᠠᠴᠠ ᠮᠢᠩᠭᠠᠨ ᠣᠯᠠᠭᠠᠨ ᠦᠬᠡᠷ ᠦᠰᠦᠭᠰᠡᠨ ᠭᠡᠨ᠎ᠡ᠃ 1890 ᠣᠨ ᠪᠣᠯᠬᠤ ᠦᠶ᠎ᠡ ᠳᠤ᠂ ᠨᠠᠰᠣ ᠠᠬᠢᠵᠦ ᠬᠤᠯᠠ ᠶᠠᠪᠣᠬᠤ ᠳᠤ ᠬᠦᠴᠢᠷᠳᠡᠬᠦ ᠮᠠᠯ ᠢ ᠬᠤᠳᠣᠭᠤᠷ ᠭᠠᠵᠠᠷ ᠲᠤ ᠬᠤᠳᠳᠤᠭ ᠣᠬᠤᠵᠣ ᠣᠰᠣᠯᠠᠬᠤ ᠪᠣᠯᠪᠠ᠃ ᠬᠦᠷᠦᠨᠨ᠋ᠦ᠋ᠨᠳᠣᠷ᠂ ᠰᠢᠳᠠᠢ ᠶᠢᠨ ᠠᠷᠣ ᠶᠢᠨ ᠨᠠᠭᠤᠷ ᠤᠳ᠂ ᠬᠦᠬᠡ ᠣᠰᠣ ᠨᠠᠭᠤᠷ ᠵᠡᠷᠭᠡ ᠪᠤᠯ ᠪᠦᠷ ᠲᠡᠷᠡ ᠦᠶ᠎ᠡ ᠳᠤ ᠮᠠᠯ ᠣᠰᠣᠯᠠᠬᠤ ᠳᠤ ᠣᠬᠤᠭᠰᠠᠨ ᠬᠤᠳᠳᠤᠭ ᠠᠴᠠ ᠴᠣᠭᠤᠷᠠᠭᠰᠠᠨ ᠪᠣᠯᠠᠭ ᠢᠶᠠᠷ ᠪᠦᠳᠦᠭᠰᠡᠨ ᠨᠠᠭᠤᠷ ᠪᠣᠯᠣᠨ᠎ᠠ᠃ ᠵᠠᠯᠠᠭᠤ ᠢᠳᠡᠷ ᠮᠠᠯ ᠤᠳ ᠢ ᠰᠢᠷᠠᠮᠦ᠋ᠷᠡᠨ᠂ ᠨᠠᠷᠢᠳ ᠤᠨ ᠭᠤᠣᠯ ᠳᠤ ᠣᠰᠣᠯᠠᠨ᠎ᠠ᠃ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠪᠠᠨ ᠭᠠᠷᠣᠭᠰᠠᠨ ᠮᠠᠯ ᠤᠨ ᠰᠦᠷᠦᠭ ᠤᠨ ᠲᠣᠯᠣᠭᠠᠢ ᠨᠢ ᠮᠣᠷᠤᠢ ᠶᠢᠨ ᠰᠦᠮ᠎ᠡ ᠬᠦᠷᠴᠦ᠂ ᠵᠡᠭᠦᠨᠰᠢ ᠭᠠᠷᠣᠭᠰᠠᠨ ᠮᠠᠯ ᠤᠨ ᠰᠦᠷᠦᠭ ᠤᠨ ᠲᠣᠯᠣᠭᠠᠢ ᠨᠢ ᠲᠠᠷᠬᠠᠨ ᠭᠤᠣᠯ ︵ᠣᠳᠣ ᠶᠢᠨ ᠴᠠᠩ ᠯᠢᠩ ᠰᠢᠶᠠᠨ ᠤ ᠨᠠᠭᠠᠳᠠᠢ︶ ᠬᠦᠷᠦᠨ᠎ᠡ᠃ ᠮᠠᠯ ᠨᠢ ᠲᠤᠭ᠎ᠠ ᠪᠠᠶᠢᠬᠤ ᠦᠭᠡᠢ᠂ ᠬᠤᠳᠣᠭᠤᠷ ᠢᠶᠠᠷ ᠬᠡᠮᠵᠢᠭᠡᠳ ᠬᠤᠳᠣᠭᠤᠷ ᠨᠢ ᠴᠦ ᠲᠤᠭ᠎ᠠ ᠪᠠᠶᠢᠬᠤ ᠦᠭᠡᠢ ᠪᠣᠯᠳᠠᠯ᠎ᠠ ᠪᠠᠶᠠᠵᠢᠵᠠᠢ᠃      ᠬᠦᠬᠡ ᠣᠰᠣ ᠨᠠᠭᠤᠷ ᠲᠣᠳᠣᠷ᠎ᠠ ᠪᠠᠨ ᠵᠡᠭᠦᠨ ᠣᠷᠢᠳᠠᠢ ᠪᠣᠯᠠᠭ ᠪᠣᠯᠣᠨ ᠪᠠᠷᠠᠭᠤᠨ ᠬᠤᠶᠢᠳᠠᠢ ᠪᠣᠯᠠᠭ ᠭᠡᠵᠦ ᠬᠤᠶᠠᠷ ᠪᠠᠶᠢᠵᠠᠢ᠃ ᠬᠦᠬᠡ ᠣᠰᠣ ᠨᠠᠭᠤᠷ ᠤᠨ ᠡᠵᠡᠯᠡᠭᠴᠢ ᠨᠢ ᠯᠣᠣᠰ ᠤᠨ ᠭᠤᠷᠪᠠᠳᠣᠭᠠᠷ ᠦᠬᠢᠨ᠂ ᠲᠡᠷᠡ ᠨᠢ ᠰᠢᠷᠠᠮᠦ᠋ᠷᠠᠨ ᠭᠤᠣᠯ ᠠᠴᠠ ᠲᠠᠭᠠᠵᠣ ᠢᠷᠡᠭᠰᠡᠨ ᠭᠡᠨ᠎ᠡ᠃ ᠭᠤᠷᠪᠠᠨ ᠬᠤᠪᠢᠯᠣᠯ ᠲᠠᠢ᠂ ᠬᠦᠮᠦᠨ ᠵᠢᠭᠠᠰᠣ ᠪᠣᠯᠵᠣ ᠬᠤᠪᠢᠯᠣᠨ᠎ᠠ᠃ ᠨᠠᠭᠤᠷ ᠤᠨ ᠵᠢᠭᠠᠰᠣ ᠨᠢ ᠬᠤᠶᠠᠷ ᠭᠤᠷᠪᠠᠨ ᠠᠯᠳᠠ ᠣᠷᠳᠣ ᠪᠠᠶᠢᠳᠠᠭ᠃      ᠨᠢᠭᠡᠨ ᠡᠳᠦᠷ᠂ ᠬᠦᠬᠡᠨ᠋ᠣᠰᠣ ᠠᠶᠢᠯ ᠤᠨ ᠬᠠᠨ ᠰᠠᠶᠢᠨᠪᠠᠶᠠᠷ ᠭᠡᠳᠡᠭ ᠬᠦᠮᠦᠨ ᠡᠨᠡ ᠨᠠᠭᠤᠷ ᠤᠨ ᠬᠦᠪᠡᠭᠡᠨ ᠲᠡᠭᠡᠷ᠎ᠡ ᠲᠣᠪᠤ ᠪᠠᠷᠢᠭᠠᠳ ᠵᠢᠭᠠᠰᠣ ᠠᠯᠠᠵᠣ ᠪᠠᠶᠢᠵᠠᠢ ᠃ ᠣᠷᠣᠢ ᠨᠢ ᠲᠣᠪᠤ ᠶᠢᠨ ᠡᠭᠦᠳᠡᠨ ᠳᠤ ᠪᠣᠳᠠᠭ᠎ᠠ ᠨᠣᠭᠤᠭ᠎ᠠ ᠪᠡᠯᠡᠳᠭᠡᠵᠦ᠂ ᠬᠤᠶᠠᠷ ᠭᠤᠷᠪᠠᠨ ᠯᠠᠩ ᠤᠨ ᠵᠢᠭᠠᠰᠣ ᠴᠢᠨᠠᠭᠠᠳ ᠠᠷᠢᠬᠢ ᠣᠣᠭᠤᠬᠤ ᠭᠡᠵᠦ ᠪᠠᠶᠢᠳᠠᠯ᠎ᠠ ᠪᠠᠷᠠᠭᠤᠨ ᠡᠮᠦᠨ᠎ᠡ ᠵᠦᠭ ᠠᠴᠠ ᠨᠠᠭᠤᠷ ᠤᠨ ᠬᠦᠪᠡᠭᠡ ᠶᠢ ᠪᠠᠷᠢᠵᠦ ᠭᠤᠷᠪᠠᠨ ᠬᠦᠮᠦᠨ ᠢᠷᠡᠪᠡ᠃ ᠠᠷᠢᠬᠢ ᠣᠣᠭᠤᠯᠭᠠᠬᠤ ᠪᠠᠷ ᠱᠠᠯᠠᠬᠤ ᠳᠤ ᠬᠤᠶᠠᠷ ᠨᠢ ᠠᠷᠢᠬᠢ ᠣᠣᠭᠤᠬᠤ ᠪᠠᠷ ᠰᠠᠭᠤᠵᠣ᠂ ᠨᠦᠬᠦᠭᠡ ᠨᠢᠭᠡ ᠨᠢ ᠰᠠᠶᠢᠨᠪᠠᠶᠠᠷ ᠤᠨ ᠠᠷᠣ ᠪᠠᠷ ᠣᠷᠣᠵᠣ ᠴᠠᠭᠠᠷᠢᠭᠯᠠᠨ ᠬᠡᠪᠳᠡᠪᠡ᠃ ᠨᠢᠭᠡ ᠵᠢᠩ ᠠᠷᠢᠬᠢ ᠶᠢ ᠭᠤᠷᠪᠠᠭᠤᠯᠠ ᠬᠤᠪᠢᠶᠠᠯᠴᠠᠨ ᠣᠣᠭᠤᠭᠠᠳ ᠣᠳᠠᠯ ᠦᠭᠡᠢ ᠪᠠᠷᠠᠭᠰᠠᠨ ᠪᠣᠯᠪᠠᠴᠣ ᠰᠠᠶᠢᠨᠪᠠᠶᠠᠷ ᠲᠤ ᠣᠷᠢᠳᠦ ᠶᠢᠨ ᠠᠷᠢᠬᠢ ᠣᠣᠭᠤᠳᠠᠭ ᠰᠢᠭ᠋ ᠲᠣᠳᠣᠷ᠎ᠠ ᠨᠢ ᠬᠠᠯᠠᠭᠤ ᠣᠷᠭᠢᠬᠤ ᠪᠠᠶᠢᠳᠠᠯ ᠢᠯᠡᠷᠡᠬᠦ ᠦᠭᠡᠢ᠂ ᠬᠠᠷᠢᠨ ᠲᠠᠭᠠᠷᠠᠳᠠᠰᠣ ᠬᠦᠷᠴᠦ ᠴᠡᠴᠡᠷᠡᠭᠡᠳ ᠪᠣᠯᠬᠤ ᠪᠠᠨ ᠪᠠᠶᠢᠯ᠎ᠠ ᠭᠡᠨ᠎ᠡ᠃ ᠲᠡᠷᠡ ᠭᠤᠷᠪᠠᠨ ᠬᠦᠮᠦᠨ ᠪᠣᠰᠣᠭᠠᠳ ᠬᠠᠷᠢᠬᠤ ᠪᠣᠯᠬᠤ ᠳᠠᠭᠠᠨ ᠢᠷᠡᠭᠰᠡᠨ ᠮᠦᠷ ᠢᠶᠠᠷ ᠢᠶᠠᠨ ᠪᠣᠴᠠᠭᠰᠠᠨ ᠪᠢᠰᠢ ᠬᠠᠷᠢᠨ ᠲᠣᠪᠤ ᠶᠢᠨ ᠠᠷᠣ ᠪᠠᠶᠢᠭ᠎ᠠ ᠯᠣᠣᠰ ᠤᠨ ᠰᠦᠮ᠎ᠡ ᠵᠦᠭ ᠶᠠᠪᠣᠭᠰᠠᠠ ᠮᠦᠷᠳᠡᠭᠡᠨ ᠦᠳᠳᠡᠷ ᠬᠠᠷᠠᠭᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠭᠡᠨ᠎ᠡ᠃
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ