ᠮᠤᠩᠭᠤᠯᠴᠤᠳ ᠤᠨ ᠪᠤᠷᠤ ᠢᠳᠡᠬᠡᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/8/5
     ᠮᠤᠩᠭᠤᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠪᠤᠷᠤ ᠢᠳᠡᠬᠡᠨ ᠳᠤ ᠪᠤᠳᠠᠭ᠎ᠠ ᠪᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠪᠠ ᠭᠤᠯᠢᠷ ᠢᠶᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠭᠤᠤᠯᠯᠠᠳᠠᠭ᠃
     ᠪᠤᠳᠠᠭ᠎ᠠ ᠪᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠳᠤ ᠮᠤᠩᠭᠤᠯ ᠠᠮᠤ᠂ ᠨᠠᠷᠢᠮᠤ᠂ ᠳᠤᠳᠤᠷᠭ᠎ᠠ ᠪᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠭᠤᠤᠯ ᠪᠤᠯᠳᠠᠭ᠃ ᠮᠤᠩᠭᠤᠯ ᠠᠮᠤ ᠶᠢ ᠱᠦᠯᠤᠨ ᠳᠤ ᠴᠢᠨᠠᠬᠤ᠂ ᠰᠦ ᠲᠠᠢ ᠴᠠᠢ ᠳᠤ ᠰᠠᠮᠤᠷᠬᠤ᠂ ᠵᠦᠬᠡᠬᠡᠢ᠂ ᠦᠷᠤᠮ᠎ᠠ ᠪᠠᠷ ᠬᠤᠳᠬᠤᠵᠤ ᠢᠳᠡᠬᠦ ᠳᠤ ᠬᠡᠷᠡᠭᠯᠡᠳᠡᠭ᠃ ᠨᠠᠷᠢᠮᠤ ᠶᠢ ᠵᠢᠩᠨᠡᠬᠦ᠂ ᠠᠭᠰᠢᠭᠠᠬᠤ᠂ ᠠᠮᠤᠰᠤ ᠬᠢᠬᠦ᠂ ᠱᠦᠯᠤᠨ ᠳᠤ ᠴᠢᠨᠠᠬᠤ ᠂ ᠰᠦ ᠲᠠᠢ ᠴᠠᠢ ᠳᠤ ᠤᠷᠬᠢᠬᠤ ᠳᠤ ᠬᠡᠷᠡᠭᠯᠡᠵᠤ᠂ ᠳᠤᠳᠤᠷᠭ᠎ᠠ ᠶᠢ ᠵᠢᠩᠨᠡᠬᠦ᠂ ᠠᠬᠰᠢᠭᠠᠬᠤ᠂ ᠠᠮᠤᠰᠤ ᠬᠢᠬᠦ᠂ ᠱᠦᠯᠤᠨ ᠳᠤ ᠴᠢᠨᠠᠬᠤ ᠵᠡᠷᠬᠡ ᠪᠠᠷ ᠢᠳᠡᠳᠡᠭ᠃ ᠪᠤᠳᠠᠭ᠎ᠠ ᠪᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠳᠤ ᠰᠢᠰᠢ᠂ ᠡᠷᠳᠡᠨᠢ ᠰᠢᠰᠢ ᠶᠢ ᠴᠤ ᠬᠡᠷᠡᠭᠯᠡᠳᠡᠭ᠃ ᠭᠤᠯᠢᠷ ᠢᠶᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠳᠤ ᠭᠤᠤᠯᠳᠠᠭᠤ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ︵ᠴᠠᠭᠠᠨ ᠭᠤᠯᠢᠷ︶᠂ ᠠᠷᠪᠠᠢ ᠶᠢᠨ ᠭᠤᠯᠢᠷ᠂ ᠰᠢᠯᠤᠬᠡᠢ ᠶᠢᠨ ᠭᠤᠯᠢᠷ᠂ ᠰᠠᠭᠠᠭ ᠤᠨ ᠭᠤᠯᠢᠷ᠂ ᠶᠤᠤᠮᠠᠢ ᠶᠢᠨ ᠭᠤᠯᠢᠷ ︵ᠪᠤᠯᠭᠤᠭᠰᠠᠨ ᠭᠤᠯᠢᠷ︶ ᠤᠨ ᠬᠤᠭᠤᠯᠠ ᠪᠠᠶᠢᠳᠠᠭ᠃ ᠪᠤᠭᠤᠳᠠᠢ ᠶᠢᠨ ᠭᠤᠯᠢᠷ ᠢ ᠬᠠᠮᠤᠭ ᠠᠴᠠ ᠦᠷᠬᠡᠨ ᠬᠡᠷᠡᠭᠯᠡᠵᠤ᠂ ᠱᠦᠯᠤ ᠲᠠᠢ ᠬᠤᠭᠤᠯᠠ ᠬᠢᠬᠦ᠂ ᠪᠠᠩᠰᠢ᠂ ᠪᠤᠤᠰᠠ ᠵᠢᠩᠨᠡᠬᠦ᠂ ᠬᠤᠤᠱᠤᠤᠷ᠂ ᠪᠤᠭᠤᠷᠰᠤᠭ ᠬᠠᠭᠠᠷᠢᠬᠤ ᠵᠡᠷᠬᠡ ᠤᠯᠠᠨ ᠵᠦᠢᠯ ᠤᠨ ᠢᠳᠡᠬᠡᠨ ᠬᠢᠳᠡᠭ᠃ ᠠᠷᠪᠠᠢ ᠶᠢᠨ ᠭᠤᠯᠢᠷ᠂ ᠰᠢᠯᠤᠬᠡᠢ ᠶᠢᠨ ᠭᠤᠯᠢᠷ᠂ ᠰᠠᠭᠠᠭ ᠤᠨ ᠭᠤᠯᠢᠷ᠂ ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠢᠶᠠᠷ ᠤᠯᠠᠨ ᠵᠦᠢᠯ ᠤᠨ ᠬᠤᠭᠤᠯᠠ ᠬᠢᠳᠡᠭ ᠪᠠᠶᠢᠨ᠎ᠠ᠃
    ᠪᠤᠳᠠᠭ᠎ᠠ ᠶᠢᠨ ᠢᠳᠡᠬᠡᠨ      ᠪᠤᠳᠠᠭ᠎ᠠ ᠪᠠᠷ ᠬᠢᠭᠰᠡᠨ ᠢᠳᠡᠬᠡᠨ ᠳᠤ ᠱᠦᠯᠤ ᠲᠠᠢ ᠪᠤᠳᠠᠭ᠎ᠠ᠂ ᠰᠢᠩᠬᠡᠨ ᠪᠤᠳᠠᠭ᠎ᠠ᠂ ᠠᠮᠤᠰᠤ᠂ ᠳ᠋ᠦᠾᠪᠠ᠂ ᠵᠢᠩᠨᠡᠭᠰᠡᠨ ᠪᠤᠳᠠᠭ᠎ᠠ ᠵᠡᠷᠬᠡ ᠠᠳᠠᠯᠢ ᠪᠤᠰᠤ ᠳᠦᠷᠤᠯ ᠪᠠᠶᠢᠳᠠᠭ᠃     ᠱᠦᠯᠤ ᠲᠠᠢ ᠪᠤᠳᠠᠭ᠎ᠠ      ᠮᠢᠬ᠎ᠠ ᠴᠢᠨᠠᠭᠰᠠᠨ ᠱᠦᠯᠤᠨ ᠳᠡᠭᠡᠨ ᠨᠠᠷᠢᠮᠤ ᠪᠤᠳᠠᠭ᠎ᠠ ︵ᠬᠤᠨᠤᠭ ᠪᠤᠳᠠᠭ᠎ᠠ︶᠂ ᠳᠤᠳᠤᠷᠭ᠎ᠠ ︵ᠴᠠᠭᠠᠨ ᠪᠤᠳᠠᠭ᠎ᠠ︶ ᠬᠢᠵᠤ᠂ ᠱᠦᠯᠤ᠂ ᠪᠤᠳᠠᠭ᠎ᠠ ᠨᠢ ᠢᠯᠭᠠᠷᠠᠭᠰᠠᠨ ᠬᠤᠭᠤᠯᠠ ᠶᠢ ᠱᠦᠯᠤ ᠲᠠᠢ ᠪᠤᠳᠠᠭ᠎ᠠ ᠬᠡᠳᠡᠭ᠃ ᠡ᠊ᠡᠭ ᠤᠨ ᠦᠶ᠎ᠠ ᠳᠤ ᠬᠤᠨᠢ᠂ ᠦᠬᠡᠷ ᠤᠨ ᠮᠢᠬ᠎ᠠ ᠬᠡᠷᠴᠢᠵᠤ ᠱᠦᠯᠤᠰᠢᠬᠦᠯᠦᠭᠰᠡᠨ ᠱᠦᠯᠤᠨ ᠳᠤ ᠴᠢᠨᠠᠵᠤ ᠢᠳᠡᠬᠦ ᠴᠤ ᠪᠤᠢ᠃ ᠪᠠᠭᠠᠷᠢᠨ᠂ ᠤᠡᠭᠨᠢᠭᠤᠳ᠂ ᠵᠠᠷᠤᠳ ᠵᠡᠷᠬᠡ ᠨᠤᠳᠤᠭ ᠲᠤ᠂ ᠮᠢᠬ᠎ᠠ ᠲᠠᠢ ᠱᠦᠯᠤᠨ ᠳᠤ ᠮᠤᠩᠭᠤᠯ ᠠᠮᠤ ᠶᠢ ᠰᠢᠩᠬᠡᠨ ᠴᠢᠨᠠᠵᠤ᠂ ᠠᠶᠢᠷᠠᠭ ᠬᠢᠵᠤ ᠢᠳᠡᠳᠡᠭ᠃     ᠰᠢᠩᠬᠡᠨ ᠪᠤᠳᠠᠭ᠎ᠠ      ᠨᠠᠷᠢᠮᠤ᠂ ᠳᠤᠳᠤᠷᠭ᠎ᠠ ᠵᠡᠷᠬᠡ ᠶᠢ ᠤᠰᠤᠨ ᠳᠤ ᠰᠢᠩᠬᠡᠪᠳᠤᠷ ᠴᠢᠨᠠᠭᠰᠠᠨ ᠢ ᠰᠢᠩᠬᠡᠨ ᠪᠤᠳᠠᠭ᠎ᠠ ᠬᠡᠳᠡᠭ᠂ ᠡᠬᠦᠨ ᠢ ᠵᠡᠬᠦᠨ ᠤᠷᠤᠨ ᠤ ᠮᠤᠩᠭᠤᠯᠴᠤᠳ ᠨᠤᠭᠤᠭ᠎ᠠ ᠵᠠᠭᠤᠰᠢ ᠲᠠᠢ ᠢᠳᠡᠬᠦ ᠳᠤᠷᠠᠳᠠᠢ᠃ ᠨᠠᠷᠢᠮᠤ ᠪᠤᠳᠠᠭ᠎ᠠ ᠰᠢᠮ᠎ᠠ ᠳᠡᠵᠢᠬᠡᠯ ᠳᠡᠬᠦᠯᠳᠡᠷ ᠪᠤᠯᠬᠤᠷ ᠰᠠᠷ᠎ᠠ ᠳᠤ ᠰᠠᠭᠤᠭᠰᠠᠨ ᠪᠦᠰᠡᠬᠦ᠋ᠢᠴᠤᠳ ᠲᠤ ᠳᠠᠪᠤᠰᠤ ᠦᠬᠡᠢ ᠨᠠᠷᠢᠮᠤ ᠶᠢᠨ ᠰᠢᠩᠬᠡᠨ ᠪᠤᠳᠠᠭ᠎ᠠ ᠶᠢ ᠰᠠᠷ᠎ᠠ ᠳᠦᠬᠦᠷᠳᠡᠯ᠎ᠠ ᠨᠢ ᠢᠳᠡᠬᠦᠯᠪᠠᠯ ᠪᠡᠶ᠎ᠠ ᠡᠷᠡᠬᠦᠯᠵᠢᠬᠦ ᠨᠢ ᠳᠦᠷᠬᠡᠨ ᠪᠠᠶᠢᠳᠠᠭ᠃     ᠠᠮᠤᠰᠤ      ᠯᠠ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠭᠤᠷᠪᠠᠨ ᠪᠤᠶᠤ ᠬᠤᠷᠢᠨ ᠳᠦᠷᠪᠡᠠ ᠳᠤ ᠭᠠᠯ ᠳᠠᠬᠢᠯᠭ᠎ᠠ ᠶᠢᠨ ᠰᠢᠬᠦᠰᠤ ᠴᠢᠨᠠᠭᠰᠠᠨ ᠱᠦᠯᠤᠨ ᠳᠤ ᠨᠠᠷᠢᠮᠤ ︵ᠬᠤᠨᠤᠭ ᠪᠤᠳᠠᠭ᠎ᠠ︶᠂ ᠳᠤᠳᠤᠷᠭ᠎ᠠ ︵ᠴᠠᠭᠠᠨ ᠪᠤᠳᠠᠭ᠎ᠠ︶ ᠴᠢᠨᠠᠵᠤ᠂ ᠴᠢᠪᠠᠭ᠎ᠠ᠂ ᠦᠵᠤᠮ ᠬᠤᠯᠢᠵᠤ ᠠᠭᠰᠢᠭᠠᠵᠤ ᠪᠤᠯᠭᠤᠭᠰᠠᠨ ᠢᠳᠡᠬᠡᠨ ᠢ ᠠᠮᠤᠰᠤ ᠬᠡᠳᠡᠭ᠃ ᠠᠮᠤᠰᠤ ᠪᠠᠨ ᠪᠤᠯᠭᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠰᠢᠷ᠎ᠠ ᠳᠤᠰᠤ᠂ ᠪᠤᠷᠠᠮ᠂ ᠡᠯᠡᠰᠤᠨ ᠰᠢᠬᠢᠷ ᠲᠠᠢ ᠬᠤᠳᠬᠤᠵᠤ ᠢᠳᠡᠳᠡᠭ᠃     ᠳ᠋ᠦᠾᠪᠠ      ᠳᠤᠳᠤᠷᠭ᠎ᠠ ︵ᠴᠠᠭᠠᠨ ᠪᠤᠳᠠᠭ᠎ᠠ︶ ᠪᠠᠨ ᠤᠰᠤᠨ ᠳᠤ ᠴᠢᠨᠠᠵᠤ᠂ ᠴᠢᠪᠠᠭ᠎ᠠ᠂ ᠦᠵᠤᠮ᠂ ᠰᠢᠬᠢᠷ᠂ ᠪᠤᠷᠠᠮ ᠵᠡᠷᠬᠡ ᠠᠮᠳᠠᠳᠠᠨ ᠢ ᠬᠤᠯᠢᠵᠤ ᠠᠭᠰᠢᠭᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠶᠡᠭᠡ ᠬᠡᠮᠵᠢᠶᠡᠨ ᠤ ᠰᠢᠷ᠎ᠠ ᠳᠤᠰᠤ ᠬᠤᠯᠢᠵᠤ ᠬᠤᠳᠬᠤᠭᠰᠠᠨ ᠢᠳᠡᠬᠡᠨ ᠢ ᠳ᠋ᠦᠾᠪᠠ ᠬᠡᠳᠡᠭ᠃ ᠳ᠋ᠦᠾᠪᠠ ᠶᠢ ᠭᠤᠤᠯᠳᠠᠭᠤ ᠰᠦᠮ᠎ᠠ ᠬᠡᠶᠢᠳ ᠤᠨ ᠬᠤᠷᠠᠯ ᠴᠤᠭᠯᠠᠭᠠᠨ ᠪᠤᠶᠤ ᠨᠦᠭᠴᠢᠭᠰᠡᠳ ᠤᠨ ︽ᠪᠤᠶᠠᠨ ᠤ ᠬᠤᠭᠤᠯᠠ︾ ᠬᠡᠵᠤ ᠢᠳᠡᠬᠦᠯᠳᠡᠭ ᠶᠤᠰᠤ ᠲᠠᠢ᠃      ᠭᠤᠯᠢᠷ ᠤᠨ ᠢᠳᠡᠬᠡᠨ      ᠭᠤᠯᠢᠷ ᠤᠨ ᠢᠳᠡᠬᠡᠨ ᠳᠤ ᠱᠦᠯᠤ ᠲᠠᠢ ᠭᠤᠯᠢᠷ᠂ ᠳᠤᠭᠤᠯ ᠳᠠᠩ᠂ ᠤᠷᠢᠶᠠᠮᠠᠭ᠂ ᠪᠠᠩᠰᠢ᠂ ᠪᠤᠤᠰᠠ᠂ ᠬᠤᠤᠱᠤᠤᠷ᠂ ᠪᠤᠭᠤᠷᠰᠤᠭ᠂ ᠰᠢᠯᠤᠬᠡᠢ ᠶᠢᠨ ᠪᠤᠤᠪᠤ ᠵᠡᠷᠬᠡ ᠤᠯᠠᠨ ᠵᠦᠢᠯ ᠪᠠᠶᠢᠳᠠᠭ᠃      ᠱᠦᠯᠤ ᠲᠠᠢ ᠭᠤᠯᠢᠷ      ᠬᠤᠨᠢ᠂ ᠦᠬᠡᠷ ᠤᠨ ᠮᠢᠬ᠎ᠠ ᠪᠠᠨ ᠳᠠᠷᠭᠤᠨ᠂ ᠡᠴᠡᠩᠬᠡᠢ ᠶᠢ ᠨᠢ ᠳᠡᠩᠴᠡᠬᠦᠯᠤᠨ ᠬᠡᠷᠴᠢᠵᠤ ᠪᠤᠴᠠᠯᠭᠠᠭᠠᠳ ᠱᠦᠯᠤᠰᠢᠬᠦᠯᠦᠭᠰᠡᠨ ᠱᠦᠯᠤᠨ ᠳᠤ᠂ ᠴᠠᠭᠠᠨ ᠭᠤᠯᠢᠷ ᠤᠨ ᠬᠡᠷᠴᠢᠮᠠᠯ ᠢ ᠬᠢᠵᠤ ᠴᠢᠨᠠᠭᠰᠠᠨ ᠬᠤᠭᠤᠯᠠ ᠶᠢ ᠱᠦᠯᠤ ᠲᠠᠢ ᠭᠤᠯᠢᠷ ᠤᠨ ᠬᠤᠭᠤᠯᠠ ᠬᠡᠳᠡᠭ᠃ ᠡᠶᠢᠮᠤᠷᠬᠦᠤ ᠬᠤᠭᠤᠯᠠ ᠨᠢ ᠱᠦᠯᠤ᠂ ᠭᠤᠯᠢᠷ ᠠᠴᠠ ᠭᠠᠳᠠᠨ᠎ᠠ᠂ ᠳᠠᠪᠤᠰᠤ᠂ ᠰᠤᠩᠬᠢᠨ᠎ᠠ ᠪᠠᠷ ᠠᠮᠳᠠ ᠦᠨᠤᠷ ᠤᠷᠤᠭᠤᠯᠳᠠᠭ ᠪᠤᠯᠬᠤᠷ᠂ ᠨᠡᠬᠦᠳᠡᠯ ᠪᠠᠭᠤᠳᠠᠯ ᠤᠨ ᠠᠮᠢᠳᠤᠷᠠᠯ ᠪᠠ ᠪᠠᠶᠢᠭᠠᠯᠢ ᠤᠷᠴᠢᠨ ᠳᠤ ᠵᠤᠬᠢᠴᠠᠵᠤ᠂ ᠮᠤᠩᠭᠤᠯᠴᠤᠳ ᠤᠨ ᠦᠷᠬᠦᠯᠵᠢ ᠶᠢᠨ ᠴᠢᠨᠠᠷᠳᠠᠢ ᠪᠦᠬᠡᠳ ᠨᠠᠶᠢᠳᠡᠮ ᠢᠳᠡᠳᠡᠭ ᠬᠤᠭᠤᠯᠠᠨ ᠤ ᠨᠢᠬᠡ ᠳᠦᠷᠤᠯ ᠪᠤᠯᠪᠠ᠃ ᠪᠤᠴᠠᠯᠭᠠᠵᠤ ᠱᠦᠯᠤᠰᠢᠬᠦᠯᠦᠭᠰᠡᠨ ᠱᠦᠯᠤᠨ ᠳᠡᠭᠡᠨ ᠦᠷᠬᠡᠨ ᠰᠢᠭ ᠬᠡᠷᠴᠢᠭᠰᠡᠨ ᠭᠤᠯᠢᠷ ᠢᠶᠠᠨ ᠳᠠᠰᠤᠳᠠᠵᠤ ᠴᠢᠨᠠᠭᠰᠠᠨ ᠢ ᠪᠠᠰᠠ ᠯᠠᠪᠰᠢᠶ᠎ᠠ ᠬᠡᠳᠡᠭ᠃     ᠳᠤᠭᠤᠯ ᠳᠠᠩ      ᠳᠤᠭᠤᠯ ᠳᠠᠩ ᠢ ᠭᠤᠤᠯᠳᠠᠭᠤ ᠰᠠᠭᠠᠭ ᠤᠨ ᠭᠤᠯᠢᠷ ᠢᠶᠠᠷ ᠬᠢᠳᠡᠭ᠃ ᠤᠡᠭᠨᠢᠭᠤᠳ ᠵᠡᠷᠬᠡ ᠭᠠᠵᠠᠷ ᠲᠤ ᠴᠠᠭᠠᠨ ᠭᠤᠯᠢᠷ ᠢᠶᠠᠷ ᠬᠢᠬᠦ ᠴᠤ ᠪᠤᠢ᠃ ᠳᠤᠭᠤᠯ ᠳᠠᠩ ᠬᠢᠬᠦ ᠳᠤ ᠤᠷᠢᠳ ᠢᠶᠠᠷ ᠭᠤᠯᠢᠷ ᠢᠶᠠᠨ ᠨᠤᠬᠤᠵᠤ᠂ ᠳᠦᠷᠪᠡᠯᠵᠢᠨ ᠬᠡᠷᠴᠢᠬᠦ ᠪᠤᠶᠤ ᠭᠠᠷ ᠢᠶᠠᠷ ᠢᠶᠠᠨ ᠪᠦᠮᠪᠤᠷᠢᠬᠡᠨ ᠬᠡᠯᠪᠡᠷᠢᠳᠠᠢ ᠪᠤᠯᠭᠠᠵᠤ᠂ ᠳᠠᠪᠤᠰᠤ ᠲᠠᠢ ᠤᠰᠤᠨ ᠳᠤ ᠴᠢᠨᠠᠵᠤ ᠱᠦᠬᠦᠵᠤ ᠠᠪᠤᠭᠠᠳ᠂ ᠵᠦᠬᠡᠬᠡᠢ ᠪᠠᠨ ᠳᠤᠭᠤᠭᠠᠨ ᠳᠤ ᠬᠢᠵᠤ᠂ ᠵᠦᠬᠡᠯᠠᠨ ᠭᠠᠯ ᠢᠶᠠᠷ ᠪᠤᠴᠠᠯᠭᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠱᠦᠬᠦᠵᠤ ᠠᠪᠤᠭᠰᠠᠨ ᠳᠤᠭᠤᠯ ᠳᠠᠩ ᠢᠶᠠᠨ ᠪᠤᠴᠠᠯᠭᠠᠭᠰᠠᠨ ᠦᠷᠤᠮ᠎ᠠ ᠳᠡᠭᠡᠨ ᠬᠢᠵᠤ᠂ ᠬᠤᠳᠬᠤᠵᠤ ᠨᠠᠶᠢᠴᠡᠬᠦᠯᠳᠡᠭ᠃ ᠳᠤᠭᠤᠯ ᠳᠠᠩ ᠢ ᠤᠯᠠᠩᠬᠢ ᠳᠠᠭᠠᠨ ᠰᠦ ᠰᠠᠭᠠᠯᠢ ᠡᠯᠪᠡᠭ ᠵᠤᠨ᠂ ᠨᠠᠮᠤᠷ ᠤᠨ ᠤᠯᠠᠷᠢᠯ ᠪᠤᠶᠤ ᠪᠠᠶᠠᠷ ᠳᠤᠷᠠᠰᠬᠠᠯ ᠤᠨ ᠡᠳᠤᠷ ᠵᠢᠴᠢ ᠵᠤᠴᠢᠨ ᠳᠠᠶᠢᠯᠠᠬᠤ ᠦᠶ᠎ᠠ ᠳᠤ ᠢᠳᠡᠳᠡᠭ᠃ ᠡᠪᠤᠯ᠂ ᠬᠠᠪᠤᠷ ᠤᠨ ᠰᠠᠭᠠᠯᠢ ᠰᠦ ᠬᠤᠮᠰᠠ ᠦᠶ᠎ᠠ ᠳᠤ ᠤᠯᠤᠰᠤᠨ ᠦᠷ᠎ᠠ᠂ ᠮᠠᠭᠠᠵᠢ ᠶᠢ ᠳᠡᠬᠡᠷᠮᠡᠳᠡᠵᠤ᠂ ᠴᠢᠨᠠᠵᠤ ᠪᠤᠯᠭᠤᠭᠠᠳ᠂ ᠪᠤᠯᠭᠤᠭᠰᠠᠨ ᠭᠤᠯᠢᠷ ᠲᠠᠭᠠᠨ ᠨᠠᠶᠢᠯᠡᠬᠦᠯᠬᠦ ᠶᠢ ᠴᠤ ᠳᠤᠭᠤᠯ ᠳᠠᠩ ᠬᠡᠵᠤ᠂ ᠪᠠᠰᠠ ᠳᠤᠬᠤᠯᠠᠢ ᠬᠡᠳᠡᠭ᠃ ᠵᠠᠷᠢᠮ ᠳᠠᠭᠠᠨ ᠪᠠᠰᠠ ᠮᠠᠭᠠᠵᠢ ᠶᠢᠨ ᠳᠠᠩ ᠬᠡᠨ᠎ᠠ᠃      ᠬᠤᠷᠴᠢᠨ ᠳᠤ ᠤᠤᠯ ᠨᠢ ᠳᠠᠤᠯᠠᠢ ᠶᠢᠨ ᠮᠢᠬᠠᠨ ᠤ ᠪᠤᠷᠤ ᠱᠦᠯᠤᠨ ᠳᠤ ᠬᠤᠷᠤᠭᠤᠪᠴᠢ ᠶᠢᠨ ᠳᠠᠩ ᠴᠢᠨᠠᠵᠤ ᠢᠳᠡᠳᠡᠭ ᠪᠠᠶᠢᠪᠠ᠃ ᠬᠤᠷᠤᠭᠤᠪᠴᠢ ᠶᠢᠨ ᠳᠠᠩ ᠢ ᠢᠳᠡᠬᠦ ᠳᠡᠭᠡᠨ ᠰᠤᠷᠢᠰᠤ᠂ ᠰᠠᠷᠢᠮᠰᠠᠭ ᠬᠢᠵᠤ᠂ ᠬᠠᠯᠠᠭᠤᠨ ᠢᠶᠠᠷ ᠨᠢ ᠬᠦᠯᠤᠰᠤ ᠭᠠᠷᠳᠠᠯ᠎ᠠ ᠢᠳᠡᠪᠡᠯ᠂ ᠠᠷᠢᠬᠢᠨ ᠤ ᠰᠢᠷ᠎ᠠ ᠳᠠᠶᠢᠯᠤᠭᠳᠠᠬᠤ ᠪᠤᠶᠤ ᠬᠢᠮᠤᠷᠠᠭ᠎ᠠ ᠳᠠᠭᠰᠢᠭᠤᠷ ᠲᠤ ᠳᠤᠰᠠᠳᠠᠢ ᠪᠠᠶᠢᠳᠠᠭ᠃     ᠤᠷᠢᠶᠠᠮᠠᠭ      ᠭᠤᠯᠢᠷ ᠢᠶᠠᠨ ᠵᠦᠬᠡᠯᠡᠬᠡᠨ ᠵᠢᠭᠤᠷᠠᠵᠤ᠂ ᠨᠤᠬᠤᠵᠤ ᠨᠠᠶᠢᠴᠡᠬᠦᠯᠦᠭᠰᠡᠨ ᠤ ᠳᠠᠷᠠᠭ᠎ᠠ᠂ ᠪᠦᠮᠪᠤᠷᠢᠬᠦᠯ ᠮᠤᠳᠤ ᠪᠠᠷ ᠵᠢᠭᠳᠡᠯᠢᠭ ᠨᠢᠮᠬᠡᠯᠡᠵᠤ᠂ ᠳᠡᠬᠡᠷ᠎ᠠ ᠨᠢ ᠳᠤᠰᠤ᠂ ᠦᠬᠡᠬᠦ ᠪᠤᠶᠤ ᠪᠤᠷᠠᠮ᠂ ᠰᠢᠬᠢᠷ ᠢᠶᠠᠨ ᠦᠷᠤᠵᠤ᠂ ᠤᠷᠳᠤᠯᠵᠢᠯᠠᠭᠤᠯᠤᠨ ᠤᠷᠢᠶᠠᠵᠤ ᠵᠢᠩᠨᠡᠵᠤ ᠪᠤᠯᠭᠤᠭᠰᠠᠨ ᠢᠳᠡᠬᠡᠨ ᠢ ᠤᠷᠢᠶᠠᠮᠠᠭ ᠬᠡᠳᠡᠭ᠃ ᠤᠷᠢᠶᠠᠮᠠᠭ ᠤᠨ ᠳᠤᠳᠤᠷ᠎ᠠ ᠬᠠᠪᠴᠢᠭᠤᠯᠤᠭᠰᠠᠨ ᠵᠦᠢᠯ ᠢᠶᠠᠷ ᠨᠢ ᠳᠤᠰᠤᠨ ᠤᠷᠢᠶᠠᠮᠠᠭ᠂ ᠦᠬᠡᠬᠦᠨ ᠤᠷᠢᠶᠠᠮᠠᠭ᠂ ᠠᠮᠳᠠᠯᠢᠬ ᠤᠷᠢᠶᠠᠮᠠᠭ ᠬᠡᠵᠤ ᠬᠤᠪᠢᠶᠠᠳᠠᠭ᠃ ᠨᠢᠮᠬᠡᠯᠡᠭᠰᠡᠨ ᠭᠤᠯᠢᠷ ᠲᠠᠭᠠᠨ ᠰᠢᠷ᠎ᠠ ᠳᠤᠰᠤ ᠪᠤᠶᠤ ᠱᠦᠯᠤᠨ ᠳᠤᠰᠤ ᠶᠢ ᠬᠠᠶᠢᠯᠤᠭᠤᠯᠤᠨ ᠨᠠᠶᠢᠳᠡᠮ ᠳᠦᠷᠬᠢᠵᠤ ᠤᠷᠢᠶᠠᠭᠰᠠᠨ ᠢ ᠳᠤᠰᠤᠨ ᠤᠷᠢᠶᠠᠮᠠᠭ ᠬᠡᠳᠡᠭ᠃ ᠳᠤᠰᠤᠨ ᠤᠷᠢᠶᠠᠮᠠᠭ ᠢ ᠬᠤᠨᠢᠨ ᠮᠢᠬᠠᠨ ᠱᠦᠯᠤ ᠲᠠᠢ ᠬᠤᠯᠢᠵᠤ ᠢᠳᠡᠬᠦ ᠳᠤ ᠳᠤᠬᠢᠷᠠᠮᠵᠢᠳᠠᠢ ᠪᠠᠶᠢᠵᠤ᠂ ᠬᠡᠢ ᠰᠡᠷᠢᠬᠦᠨ ᠢ ᠳᠠᠷᠤᠬᠤ ᠤᠢᠢᠯᠡᠳᠤᠯ ᠲᠠᠢ ᠪᠤᠯᠬᠤᠷ᠂ ᠨᠠᠰᠤᠳᠠᠶᠢᠴᠤᠳ ᠲᠤ ᠨᠠᠩ ᠢᠯᠡᠬᠦᠤ ᠳᠠᠭᠠᠯᠠᠭᠳᠠᠳᠠᠭ᠃ ᠦᠬᠡᠬᠦ ᠪᠤᠶᠤ ᠬᠠᠯᠢᠮ ᠢᠶᠠᠷ ᠵᠢᠵᠢᠭᠯᠠᠨ ᠬᠡᠷᠴᠢᠵᠤ᠂ ᠪᠠᠭ᠎ᠠ ᠰᠠᠭ᠎ᠠ ᠳᠠᠪᠤᠰᠤ᠂ ᠰᠤᠩᠬᠢᠨ᠎ᠠ ᠬᠠᠪᠴᠢᠭᠤᠯᠵᠤ ᠤᠷᠢᠶᠠᠭᠰᠠᠨ ᠢ ᠦᠬᠡᠬᠦᠨ ᠤᠷᠢᠶᠠᠮᠠᠭ ᠬᠡᠵᠤ᠂ ᠪᠤᠷᠠᠮ᠂ ᠰᠢᠬᠢᠷ ᠢᠶᠠᠨ ᠰᠢᠷ᠎ᠠ ᠳᠤᠰᠤ ᠲᠠᠢ ᠵᠢᠭᠤᠷᠠᠵᠤ ᠨᠠᠶᠢᠴᠡᠬᠦᠯᠤᠬᠡᠳ ᠬᠠᠪᠴᠢᠭᠤᠯᠵᠤ ᠤᠷᠢᠶᠠᠭᠰᠠᠨ ᠢ ᠠᠮᠳᠠᠯᠢᠬ ᠤᠷᠢᠶᠠᠮᠠᠭ ᠬᠡᠳᠡᠭ᠃ ᠤᠷᠢᠶᠠᠮᠠᠭ ᠨᠢ ᠬᠢᠬᠦ ᠳᠤ ᠠᠮᠠᠷ᠂ ᠤᠳᠤᠷ ᠨᠡᠬᠦᠳᠡᠯ ᠤᠨ ᠠᠮᠢᠳᠤᠷᠠᠯ ᠳᠤ ᠵᠤᠬᠢᠴᠠᠭᠰᠠᠨ ᠦᠪᠡᠷᠮᠢᠴᠠ ᠤᠨᠴᠠᠯᠢᠬ ᠲᠠᠢ ᠢᠳᠡᠬᠡᠨ ᠪᠤᠯᠬᠤ ᠶᠤᠮ᠃
      ᠪᠠᠩᠰᠢ      ᠮᠢᠬ᠎ᠠ ᠪᠠᠨ ᠪᠡᠯᠡᠳᠬᠡᠵᠤ ᠪᠠᠵᠠᠭᠠᠬᠤ ᠨᠢ ᠪᠤᠤᠰᠠ ᠶᠢᠨ ᠮᠢᠬ᠎ᠠ ᠪᠡᠯᠡᠳᠬᠡᠬᠦ ᠲᠠᠢ ᠠᠳᠠᠯᠢ᠂ ᠭᠤᠯᠢᠷ ᠢᠶᠠᠨ ᠨᠤᠬᠤᠵᠤ ᠨᠠᠶᠢᠴᠡᠬᠦᠯᠦᠭᠰᠡᠨ ᠤ ᠳᠠᠷᠠᠭ᠎ᠠ᠂ ᠵᠢᠵᠢᠭ ᠳᠠᠰᠤᠳᠠᠵᠤ ᠨᠢᠮᠬᠡᠯᠡᠬᠡᠳ᠂ ᠪᠠᠵᠠᠭᠠᠭᠰᠠᠨ ᠮᠢᠬ᠎ᠠ ᠪᠠᠨ ᠪᠤᠭᠤᠵᠤ᠂ ᠠᠮᠠᠰᠠᠷ ᠢ ᠨᠢ ᠴᠢᠮᠬᠢᠬᠡᠳ᠂ ᠴᠢᠨᠠᠵᠤ ᠪᠤᠯᠭᠤᠭᠰᠠᠨ ᠢ ᠪᠠᠩᠰᠢ ᠬᠡᠳᠡᠭ᠃ ᠪᠠᠩᠰᠢ ᠨᠢ ᠢᠳᠡᠬᠦ ᠳᠤ ᠵᠦᠬᠡᠯᠠᠨ᠂ ᠦᠨᠤᠷ ᠠᠮᠳᠠ ᠪᠠᠷ ᠰᠠᠶᠢᠬᠠᠨ ᠪᠠᠶᠢᠳᠠᠭ᠃      ᠪᠤᠤᠰᠠ      ᠮᠢᠬ᠎ᠠ ᠪᠠᠨ ᠵᠢᠵᠢᠭᠯᠠᠨ ᠬᠡᠷᠴᠢᠵᠤ᠂ ᠪᠠᠭ᠎ᠠ ᠰᠠᠭ᠎ᠠ ᠰᠤᠩᠬᠢᠨ᠎ᠠ ᠪᠤᠶᠤ ᠬᠦᠮᠡᠯᠢ ᠶᠢ ᠠᠮᠳᠠ ᠤᠷᠤᠭᠤᠯᠤᠨ ᠬᠤᠯᠢᠵᠤ᠂ ᠳᠠᠪᠤᠰᠤ ᠶᠢ ᠨᠢ ᠳᠡᠩᠴᠡᠬᠦᠯᠤᠨ ᠪᠠᠵᠠᠭᠠᠵᠤ᠂ ᠭᠤᠯᠢᠷ ᠢᠶᠠᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠤᠰᠤ ᠪᠠᠷ ᠵᠢᠭᠤᠷᠠᠵᠤ ᠨᠠᠶᠢᠴᠡᠬᠦᠯᠤᠬᠡᠳ ᠵᠢᠵᠢᠭᠯᠠᠨ ᠳᠠᠰᠤᠳᠠᠵᠤ᠂ ᠪᠦᠮᠪᠤᠷᠢᠬᠦᠯ ᠮᠤᠳᠤ ᠪᠠᠷ ᠳᠤᠭᠤᠷᠢᠭᠯᠠᠭᠤᠯᠤᠨ ᠨᠢᠮᠬᠡᠯᠡᠭᠰᠡᠨ ᠤ ᠳᠠᠷᠠᠭ᠎ᠠ᠂ ᠪᠠᠵᠠᠭᠠᠭᠰᠠᠨ ᠮᠢᠬ᠎ᠠ ᠪᠠᠨ ᠳᠤᠳᠤᠷ᠎ᠠ ᠨᠢ ᠪᠤᠭᠤᠵᠤ᠂ ᠵᠢᠩᠨᠡᠵᠤ ᠪᠤᠯᠭᠤᠭᠰᠠᠨ ᠢᠳᠡᠬᠡᠨ ᠢ ᠪᠤᠤᠰᠠ ᠬᠡᠳᠡᠭ᠃ ᠪᠤᠤᠰᠠ ᠶᠢ ᠪᠤᠭᠤᠭᠰᠠᠨ ᠬᠡᠯᠪᠡᠷᠢ ᠪᠠᠷ ᠨᠢ ᠠᠳᠠᠯᠢ ᠪᠤᠰᠤ ᠨᠡᠷᠡᠯᠡᠳᠡᠭ᠃ ᠰᠠᠷᠠᠨ ᠬᠡᠯᠪᠡᠷᠢᠳᠠᠢ ᠪᠠᠶᠢᠭᠰᠠᠨ ᠢ ᠰᠠᠷᠠᠨ ᠪᠤᠤᠰᠠ ᠬᠡᠵᠤ᠂ ᠳᠤᠭᠤᠷᠢᠭ ᠬᠡᠯᠪᠡᠷᠢᠳᠠᠢ ᠪᠠᠶᠢᠭᠰᠠᠨ ᠢ ᠨᠠᠷᠠᠨ ᠪᠤᠤᠰᠠ ᠬᠡᠵᠤ᠂ ᠬᠠᠶᠠ ᠵᠠᠷᠢᠮ ᠳᠠᠭᠠᠨ ᠬᠤᠯᠤᠭᠠᠨ᠎ᠠ ᠶᠢᠨ ᠬᠡᠯᠪᠡᠷᠢᠳᠠᠢ ᠪᠠᠷᠢᠵᠤ ᠬᠤᠯᠤᠭᠠᠨ᠎ᠠ ᠪᠤᠤᠰᠠ ᠬᠡᠵᠤ ᠨᠡᠷᠡᠯᠡᠳᠡᠭ᠃ ᠪᠤᠤᠰᠠ ᠨᠢ ᠦᠨᠤᠷ ᠠᠮᠳᠠ ᠪᠠᠷ ᠰᠠᠶᠢᠬᠠᠨ᠂ ᠬᠡᠢ ᠰᠡᠷᠢᠬᠦᠨ ᠢ ᠳᠠᠷᠤᠬᠤ ᠤᠢᠢᠯᠡᠳᠤᠯ ᠲᠠᠢ ᠪᠠᠶᠢᠳᠠᠭ᠃
    ᠬᠤᠤᠱᠤᠤᠷ      ᠮᠢᠬ᠎ᠠ ᠪᠠᠨ ᠵᠢᠵᠢᠭᠯᠠᠨ ᠬᠡᠷᠴᠢᠵᠤ᠂ ᠪᠠᠭ᠎ᠠ ᠰᠠᠭ᠎ᠠ ᠰᠤᠩᠬᠢᠨ᠎ᠠ ᠪᠤᠶᠤ ᠬᠦᠮᠡᠯᠢ ᠶᠢ ᠠᠮᠳᠠ ᠤᠷᠤᠭᠤᠯᠤᠨ ᠬᠤᠯᠢᠵᠤ᠂ ᠳᠠᠪᠤᠰᠤ ᠶᠢ ᠨᠢ ᠳᠡᠩᠴᠡᠬᠦᠯᠤᠨ ᠪᠠᠵᠠᠭᠠᠵᠤ᠂ ᠭᠤᠯᠢᠷ ᠢᠶᠠᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠤᠰᠤ ᠪᠠᠷ ᠵᠦᠬᠡᠯᠡᠬᠡᠨ ᠵᠢᠭᠤᠷᠠᠵᠤ᠂ ᠵᠤᠬᠢᠬᠤ ᠬᠡᠮᠵᠢᠶ᠎ᠠ ᠪᠠᠷ ᠳᠠᠰᠤᠳᠠᠨ ᠠᠪᠴᠤ ᠪᠦᠮᠪᠤᠷᠢᠬᠦᠯ ᠮᠤᠳᠤ ᠪᠠᠷ ᠨᠢᠮᠬᠡᠯᠡᠭᠰᠡᠨ ᠤ ᠳᠠᠷᠠᠭ᠎ᠠ᠂ ᠪᠠᠵᠠᠭᠠᠭᠰᠠᠨ ᠮᠢᠬ᠎ᠠ ᠪᠠᠨ ᠪᠤᠭᠤᠵᠤ᠂ ᠬᠦᠪᠡᠭᠡ ᠶᠢ ᠨᠢ ᠬᠤᠮᠢᠵᠤ ᠨᠠᠶᠢᠯᠡᠬᠦᠯᠤᠬᠡᠳ᠂ ᠬᠠᠭᠠᠷᠢᠬᠤ ᠪᠤᠶᠤ ᠳᠤᠰᠤᠨ ᠳᠤ ᠪᠤᠴᠠᠯᠭᠠᠬᠤ ᠠᠷᠭ᠎ᠠ ᠪᠠᠷ ᠪᠤᠯᠭᠤᠭᠰᠠᠨ ᠢᠳᠡᠬᠡᠨ ᠢ ᠬᠤᠤᠱᠤᠤᠷ ᠬᠡᠨ᠎ᠠ᠃ ᠬᠤᠤᠱᠤᠤᠷ ᠤᠨ ᠭᠤᠯᠢᠷ ᠨᠢ ᠰᠢᠷᠭᠠᠯᠰᠢᠨ ᠳᠤᠰᠤᠷᠬᠠᠵᠤ᠂ ᠦᠨᠤᠷ ᠠᠮᠳᠠ ᠨᠢ ᠳᠤᠩ ᠰᠠᠶᠢᠬᠠᠨ ᠪᠠᠶᠢᠳᠠᠭ᠃
      ᠪᠤᠭᠤᠷᠰᠤᠭ      ᠴᠠᠭᠠᠨ ᠭᠤᠯᠢᠷ ᠢ ᠰᠢᠷ᠎ᠠ ᠳᠤᠰᠤ᠂ ᠱᠦᠯᠤᠨ ᠳᠤᠰᠤ ᠲᠠᠢ ᠬᠤᠯᠢᠵᠤ ᠵᠢᠭᠤᠷᠠᠭᠠᠳ᠂ ᠶᠠᠩᠵᠤ ᠪᠦᠷᠢ ᠶᠢᠨ ᠬᠡᠯᠪᠡᠷᠢ ᠳᠦᠷᠰᠤ ᠲᠠᠢ ᠨᠢᠮᠬᠡᠯᠠᠨ ᠬᠡᠷᠴᠢᠵᠤ᠂ ᠰᠢᠷ᠎ᠠ ᠳᠤᠰᠤ᠂ ᠱᠦᠯᠤᠨ ᠳᠤᠰᠤ᠂ ᠤᠷᠭᠤᠮᠠᠯ ᠤᠨ ᠳᠤᠰᠤᠨ ᠳᠤ ᠪᠤᠴᠠᠯᠭᠠᠵᠤ ᠪᠤᠯᠭᠤᠭᠰᠠᠨ ᠢᠳᠡᠬᠡᠨ ᠢ ᠪᠤᠭᠤᠷᠰᠤᠭ ᠬᠡᠳᠡᠭ᠃ ᠪᠤᠭᠤᠷᠰᠤᠭ ᠢ ᠪᠤᠯᠭᠤᠬᠤ ᠠᠷᠭ᠎ᠠ ᠨᠢ ᠨᠠᠶᠢᠳᠡᠮ ᠳᠡᠭᠡᠨ ᠠᠳᠠᠯᠢ ᠪᠤᠯᠪᠠᠴᠤ ᠬᠡᠯᠪᠡᠷᠢ ᠳᠦᠷᠰᠤ ᠨᠢ ᠶᠠᠩᠵᠤ ᠪᠦᠷᠢ ᠶᠢᠨ ᠪᠠᠶᠢᠳᠠᠭ ᠪᠦᠬᠡᠳ ᠨᠠᠷᠡᠶᠢᠳᠤᠯ ᠨᠢ ᠴᠤ ᠠᠳᠠᠯᠢ ᠪᠤᠰᠤ ᠭᠠᠵᠠᠷ ᠤᠷᠤᠨ ᠳᠤ ᠠᠰ ᠠᠰᠳᠠᠭᠠᠨ ᠪᠠᠶᠢᠳᠠᠭ᠃ ᠤᠷᠳᠤᠰ ᠲᠤ᠂ ᠭᠤᠯᠢᠷ ᠢᠶᠠᠨ ᠨᠠᠷᠢᠬᠠᠨ ᠤᠷᠳᠤ ᠬᠡᠷᠴᠢᠵᠤ ᠳᠤᠰᠤᠨ ᠳᠤ ᠪᠤᠴᠠᠯᠭᠠᠭᠰᠠᠨ ᠢ ᠨᠢ ᠵᠠᠩᠰᠠ ᠬᠡᠵᠤ᠂ ᠪᠤᠭᠤᠨᠢᠬᠠᠨ ᠬᠡᠷᠴᠢᠵᠤ ᠵᠢᠷᠤᠭᠠᠰᠤᠯᠠᠬᠤ ᠪᠤᠶᠤ ᠮᠤᠰᠬᠢᠵᠤ ᠬᠢᠭᠰᠡᠨ ᠢ ᠨᠢ ᠵᠢᠷᠢᠮ ᠬᠡᠳᠡᠭ᠃      ᠰᠢᠯᠤᠬᠡᠢ ᠶᠢᠨ ᠪᠤᠤᠪᠤ      ᠰᠢᠯᠤᠬᠡᠢ ᠶᠢᠨ ᠭᠤᠯᠢᠷ ᠢᠶᠠᠨ ᠵᠢᠭᠤᠷᠠᠵᠤ ᠢᠰᠬᠡᠬᠡᠳ ᠵᠢᠩᠨᠡᠬᠦ ᠪᠤᠶᠤ ᠱᠦᠯᠤᠨ ᠳᠤᠰᠤ᠂ ᠤᠷᠭᠤᠮᠠᠯ ᠤᠨ ᠳᠤᠰᠤᠨ ᠳᠤ ᠪᠤᠴᠠᠯᠭᠠᠵᠤ ᠪᠤᠯᠪᠠᠰᠤᠷᠠᠭᠤᠯᠬᠤ ᠶᠢ ᠰᠢᠯᠤᠬᠡᠢ ᠶᠢᠨ ᠪᠤᠤᠪᠤ ᠬᠡᠳᠡᠭ᠃ ᠪᠠᠰᠠ ᠴᠢᠨᠠᠵᠤ ᠪᠤᠯᠭᠤᠭᠰᠠᠨ ᠪᠤᠷᠴᠠᠭ ᠢᠶᠠᠨ ᠨᠢᠯᠳᠠᠯᠵᠤ ᠪᠤᠤᠰᠠ ᠰᠢᠬ ᠪᠠᠷᠢᠭᠠᠳ ᠵᠢᠩᠨᠡᠬᠦ ᠪᠤᠶᠤ ᠳᠤᠰᠤᠨ ᠳᠤ ᠪᠤᠴᠠᠯᠭᠠᠵᠤ ᠬᠢᠬᠦ ᠴᠤ ᠪᠤᠢ᠃ ᠵᠡᠬᠦᠨ ᠤᠷᠤᠨ ᠤ ᠮᠤᠩᠭᠤᠯᠴᠤᠳ ᠰᠢᠯᠤᠬᠡᠢ ᠶᠢᠨ ᠪᠤᠤᠪᠤ ᠶᠢ ᠡᠳᠤᠷ ᠳᠤᠳᠤᠮ ᠢᠳᠡᠬᠦ ᠠᠴᠠ ᠭᠠᠳᠠᠨ᠎ᠠ᠂ ᠵᠢᠯ ᠴᠠᠭᠠᠨ ᠰᠠᠷ᠎ᠠ ︽ᠰᠢᠨ᠎ᠠ ᠶᠢᠨ ᠪᠤᠳᠠᠭ᠎ᠠ︾ ᠬᠡᠵᠤ ᠬᠡᠶᠢᠴᠢᠨ ᠵᠤᠴᠢᠨ ᠳᠠᠶᠢᠯᠠᠬᠤ ᠪᠤᠶᠤ ᠳᠦᠷᠤᠯ ᠰᠠᠳᠤᠨ ᠢᠶᠠᠨ ᠡᠷᠬᠢᠬᠦ ᠳᠤ ᠪᠡᠯᠡᠭ ᠪᠤᠯᠭᠠᠨ ᠬᠦᠷᠬᠡᠳᠡᠭ᠃      ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠤᠨ ᠬᠤᠭᠤᠯᠠ      ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠢᠶᠠᠷ ᠤᠯᠠᠨ ᠵᠦᠢᠯ ᠤᠨ ᠬᠤᠭᠤᠯᠠ ᠬᠢᠵᠤ ᠢᠳᠡᠳᠡᠭ᠃ ᠡᠬᠦᠨ ᠳᠤ᠂ ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠢ ᠴᠢᠨᠠᠭᠰᠠᠨ ᠬᠤᠭᠤᠯᠠ ᠪᠠ ᠵᠢᠩᠨᠡᠭᠰᠡᠨ ᠬᠤᠭᠤᠯᠠ ᠬᠡᠵᠤ ᠬᠤᠶᠠᠷ ᠳᠦᠷᠤᠯ ᠳᠤ ᠬᠤᠪᠢᠶᠠᠵᠤ ᠪᠤᠯᠤᠨ᠎ᠠ᠃      ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠤᠨ ᠴᠢᠨᠠᠭᠰᠠᠨ ᠬᠤᠭᠤᠯᠠᠨ ᠳᠤ ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠤᠨ ᠡᠷᠡᠬᠡᠢ ᠳᠠᠩ᠂ ᠵᠢᠭᠠᠰᠤᠨ ᠳᠠᠩ ᠬᠡᠵᠤ ᠪᠠᠶᠢᠳᠠᠭ᠃ ᠡᠷᠡᠬᠡᠢ ᠳᠠᠩ ᠪᠤᠯᠤᠨ ᠵᠢᠭᠠᠰᠤᠨ ᠳᠠᠩ ᠢ ᠬᠢᠬᠦ ᠳᠤ ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠢᠶᠠᠨ ᠬᠠᠯᠠᠭᠤᠨ ᠤᠰᠤᠨ ᠳᠤ ᠵᠢᠭᠤᠷᠠᠵᠤ ᠡᠷᠡᠬᠡᠶᠢᠳᠠᠨ ᠵᠢᠵᠢᠭ ᠵᠢᠵᠢᠭ ᠳᠠᠰᠤᠳᠠᠬᠤ ᠪᠠ ᠵᠢᠭᠠᠰᠤᠨ ᠬᠡᠯᠪᠡᠷᠢᠳᠠᠢ ᠵᠢᠵᠢᠭ ᠠᠯᠠᠭᠠᠳᠠᠵᠤ ᠮᠢᠬ᠎ᠠ ᠲᠠᠢ ᠱᠦᠯᠤᠨ ᠳᠤ ᠴᠢᠨᠠᠵᠤ ᠢᠳᠡᠳᠡᠭ᠃      ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠤᠨ ᠵᠢᠩᠨᠡᠭᠰᠡᠨ ᠬᠤᠭᠤᠯᠠ ᠳᠤ ᠠᠯᠠᠭᠠᠳᠠᠭᠤᠷ᠂ ᠸᠧ ᠸᠧ᠂ ᠪᠤᠤᠰᠠ ᠵᠡᠷᠬᠡ ᠪᠠᠶᠢᠳᠠᠭ᠃ ᠶᠤᠤᠮᠠᠢ ᠶᠢᠨ ᠭᠤᠯᠢᠷ ᠢᠶᠠᠨ ᠬᠠᠯᠠᠭᠤᠨ ᠤᠰᠤᠨ ᠳᠤ ᠵᠢᠭᠤᠷᠠᠵᠤ᠂ ᠨᠠᠷᠢᠨ ᠨᠠᠷᠢᠨ ᠠᠯᠠᠭᠠᠳᠠᠨ ᠨᠠᠷᠢᠨ ᠤᠷᠳᠤ ᠬᠡᠯᠪᠡᠷᠢᠳᠡᠢ ᠪᠤᠯᠭᠠᠵᠤ ᠵᠢᠩᠨᠡᠬᠦ ᠪᠤᠶᠤ ᠠᠮᠪᠠᠨ᠂ ᠪᠤᠤᠳᠤᠤ ᠳᠡᠬᠡᠷ᠎ᠠ ᠪᠠᠨ ᠰᠢᠷ᠎ᠠ ᠳᠤᠰᠤ ᠳᠦᠷᠬᠢᠵᠤ᠂ ᠳᠡᠬᠦᠨ ᠳᠡᠬᠡᠷ᠎ᠠ ᠭᠤᠯᠢᠷ ᠢᠶᠠᠨ ᠨᠢᠮᠬᠡᠯᠡᠨ ᠳᠠᠷᠤᠵᠤ ᠬᠤᠶᠢᠯᠡᠵᠤ ᠠᠪᠤᠭᠠᠳ ᠵᠢᠩᠨᠡᠵᠤ ᠪᠤᠯᠭᠤᠭᠠᠳ᠂ ᠱᠦᠯᠤ ᠪᠤᠶᠤ ᠵᠠᠭᠤᠰᠢ ᠲᠠᠢ ᠢᠳᠡᠳᠡᠭ᠃ ᠮᠦᠨ ᠡᠯ᠎ᠠ ᠵᠦᠢᠯ ᠤᠨ ᠮᠢᠬ᠎ᠠ᠂ ᠨᠤᠭᠤᠭ᠎ᠠ ᠶᠢ ᠪᠤᠭᠤᠵᠤ᠂ ᠦᠨᠤᠷ ᠠᠮᠳᠠ ᠬᠤᠤᠰᠯᠠᠭᠰᠠᠨ ᠪᠤᠤᠰᠠ ᠬᠢᠵᠤ ᠢᠳᠡᠳᠡᠭ᠃
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ