ᠮᠤᠷᠤᠢ ᠶᠢᠨ ᠰᠦᠮ᠎ᠡ ᠶᠢᠨ ᠮᠠᠨᠳᠤᠯ ᠪᠠᠭᠤᠷᠠᠯ ︵ᠲᠡᠭᠡᠳᠦ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/9/14
     ᠮᠤᠷᠤᠢ ᠶᠢᠨ ᠰᠦᠮ᠎ᠠ ᠶᠢᠨ ᠮᠠᠨᠲᠤᠯ
     ᠲᠠᠷᠬᠠᠨ ᠬᠤᠰᠢᠭᠤᠨ ︵ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠲᠤᠮᠳᠠᠳᠤ ᠬᠤᠰᠢᠭᠤ︶ ᠤ ᠵᠣᠷᠢᠭᠳᠣ ᠸᠠᠩ ᠤᠨ ᠭᠡᠷ ᠤᠨ ᠬᠡᠶᠢᠳ ᠪᠤᠯᠬᠤ ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠨᠢ ᠠᠩᠬ᠎ᠠ ᠡᠬᠢᠨ ᠳᠤ ᠪᠠᠨ ᠦᠩ ᠰᠢᠮᠡᠯᠢᠭ ᠬᠦᠷᠦᠰᠦ ᠰᠢᠷᠣᠢ ᠲᠠᠢ ᠦᠨᠢᠷ ᠪᠠᠶᠠᠯᠢᠭ ᠨᠣᠳᠤᠭ ᠣᠰᠣ ᠲᠠᠢ ᠲᠠᠷᠬᠠᠨ ᠬᠤᠰᠢᠭᠤ ᠶᠢᠨ ᠨᠦᠬᠡᠳᠣ ᠶᠢᠨ ᠠᠷᠣ ︵ᠣᠳᠣ ᠶᠢᠨ ᠲᠦᠩᠯᠢᠶᠤᠤ ᠬᠤᠳᠠ ᠶᠢᠨ ᠬᠤᠷᠴᠢᠨ ᠲᠤᠭᠤᠷᠢᠭ ᠤᠨ ᠢᠤᠢ ᠯᠢᠶᠠᠩ ᠫᠥ᠋ ᠪᠠᠯᠭᠠᠰᠤ᠂ ᠢᠤᠢ ᠯᠢᠶᠠᠩ ᠫᠥ᠋ ᠪᠤᠯ ᠡᠷᠢᠶᠡᠨ ᠪᠤᠳᠠ ᠬᠡᠳᠡᠭ ᠮᠤᠩᠭᠤᠯ ᠨᠡᠷ᠎ᠡ ᠶᠢᠨ ᠠᠪᠢᠶ᠎ᠠ ᠤᠨᠳᠤᠤᠰᠢᠭᠤᠯᠤᠭᠰᠠᠨ ᠬᠢᠳᠠᠳ ᠲᠠᠭᠤᠳᠠᠯᠭ᠎ᠠ ᠪᠤᠯᠤᠨ᠎ᠠ︶᠂ ᠰᠢᠷᠠᠮᠦ᠋ᠷᠡᠨ ᠤ ᠣᠮᠠᠷ᠎ᠠ ᠲᠡᠨᠵᠢᠨ ᠳᠤ ᠪᠠᠶᠢᠭᠤᠯᠣᠭᠳᠠᠵᠤ᠂ ᠬᠠᠮᠪᠤ ᠰᠦᠮ᠎ᠠ ᠬᠡᠵᠤ ᠨᠡᠷᠡᠶᠢᠳᠪᠡ᠃ ᠲᠤᠰ ᠰᠦᠮ᠎ᠡ ᠶᠢᠨ ᠠᠩᠬ᠎ᠠ ᠲᠦᠷᠢ ᠶᠢᠨ ᠭᠡᠭᠡᠨ ᠸᠴᠢᠷᠠᠯᠮᠠᠰ ᠢ ᠲᠦᠪᠡᠳ ᠲᠤ ᠰᠣᠷᠣᠯᠴᠠᠵᠣ ᠪᠠᠶᠢᠭ᠎ᠠ ᠬᠤᠭᠤᠴᠠᠭᠠᠨ ᠳᠤ᠂ ᠰᠦᠮ᠎ᠡ ᠨᠢ ᠦᠶᠡᠷ ᠤᠨ ᠣᠰᠣᠨ ᠳᠤ ᠦᠯᠦᠪ ᠠᠪᠳᠠᠵᠣ ᠣᠷᠣ ᠦᠭᠡᠢ ᠪᠣᠯᠪᠠ᠃ ᠡ᠊ᠨᠳᠡ ᠪᠠᠨ ᠦᠯᠡᠳᠡᠵᠣ ᠰᠦᠮ᠎ᠡ ᠪᠠᠨ ᠡᠷᠬᠢᠯᠡᠵᠣ ᠪᠠᠶᠢᠭᠰᠠᠨ ᠰᠢᠨᠡᠯᠠᠮ᠎ᠠ ᠣᠯᠠᠨ ᠮᠡᠷᠭᠡᠳ ᠢᠶᠠᠨ ᠲᠠᠭᠠᠭᠤᠯᠣᠨ᠂ ᠭᠠᠵᠠᠷ ᠤᠨ ᠰᠠᠶᠢᠨ ᠢ ᠰᠢᠨᠵᠢᠨ ᠰᠣᠩᠭᠤᠭᠰᠠᠭᠠᠷ ᠡᠷᠢᠶᠡᠨ ᠦᠨᠳᠣᠷ ᠤᠨ ᠡᠩᠭᠡᠷ ︵ᠤᠳᠤ ᠶᠢᠨ ᠲᠦᠩᠯᠢᠶᠤᠤ ᠬᠤᠲᠡ ᠶᠢᠨ ᠬᠤᠷᠴᠢᠨ ᠲᠤᠭᠤᠷᠢᠬ ᠤᠨ ᠮᠤᠷᠤᠢ ᠲᠤᠰᠬᠤᠨ ᠳᠤ ᠪᠤᠢ︶ ᠲᠤ ᠰᠦᠮ᠎ᠡ ᠶᠢ ᠲᠠᠬᠢᠨ ᠰᠢᠨᠡᠳᠭᠡᠨ ᠪᠠᠶᠢᠭᠤᠯᠬᠤ ᠪᠠᠷ ᠲᠣᠭᠳᠠᠪᠠ᠃ ᠵᠣᠷᠢᠭᠳᠣ ᠸᠠᠩ᠂ ᠲᠠᠷᠬᠠᠨ ᠸᠠᠩ ᠵᠢᠴᠢ ᠠᠶᠢᠮᠠᠭ ᠤᠨ ᠲᠠᠷᠤᠭ᠎ᠠ ᠪᠣᠳᠣᠷᠣᠣᠯ ᠪᠢᠴᠢᠭ ᠪᠢᠴᠢᠵᠣ᠂ ᠡᠵᠡᠨ ᠬᠠᠭᠠᠨ ᠳᠤ ᠠᠶᠢᠯᠠᠳᠬᠠᠪᠠ᠃ ᠶᠠᠭ ᠡᠨᠡ ᠦᠶ᠎ᠡ ᠳᠤ ᠸᠴᠢᠷᠠᠯᠮᠠᠰ ᠭᠡᠭᠡᠨ ᠭᠤᠴᠢᠨ ᠭᠤᠷᠪᠠᠲᠠᠢ ᠳᠤ ᠪᠠᠨ ᠵᠢᠷᠭᠤᠳᠣᠭᠠᠷ ᠲᠦᠷᠢ ᠶᠢᠨ ᠪᠠᠨᠴᠢᠨ ᠠᠴᠠ ᠨᠣᠮ ᠰᠣᠷᠴᠣ᠂ ᠶᠢᠰᠣᠳᠣᠭᠡᠷ ᠲᠦᠷᠢ ᠶᠢᠨ ᠲᠠᠯᠠᠢ ᠯᠠᠮᠠ ᠠᠴᠠ ︽ᠪᠠᠨᠳᠢᠳᠠ︾ ᠴᠣᠯᠠ ᠯᠾᠠᠷᠡᠮᠪᠠ ᠵᠡᠷᠭᠡ ᠶᠢ ᠬᠦᠷᠳᠡᠭᠡᠳ᠂ ᠨᠣᠮ ᠤᠨ ᠨᠡᠷ᠎ᠡ ᠶᠢ ᠨᠢ ᠯᠣᠪᠰᠠᠩᠳᠠᠮᠪᠠᠷᠠᠪᠵᠠᠢ ᠬᠡᠮᠡᠪᠡ᠃ ᠡᠨᠡ ᠵᠢᠯ ᠳᠤ ᠲᠡᠷᠡ ᠪᠠᠷ ᠪᠡᠭᠡᠵᠢᠩ ᠳᠤ ᠬᠦᠷᠴᠣ᠂ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠲᠦᠷᠪᠡᠨ ᠶᠡᠬᠡᠰ ︵ᠲᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨ ᠡᠷᠳᠡᠨᠢ᠂ ᠠᠷᠣ ᠪᠣᠭᠳᠠ᠂ ᠵᠠᠩᠭᠢᠶ᠎ᠠ ᠬᠤᠳᠣᠭᠳᠣ︶ ᠤᠨ ᠨᠢᠭᠡ ᠨᠢ ᠪᠣᠯᠬᠤ ᠵᠠᠩᠭᠢᠶ᠎ᠠ ᠬᠤᠳᠣᠭᠳᠣ ᠳᠤ ᠪᠠᠷᠠᠳᠠᠨ᠂ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢᠨ ᠦᠶᠡᠷ ᠲᠤ ᠠᠪᠳᠠᠭᠳᠠᠭᠰᠠᠨ ᠪᠠᠶᠢᠳᠠᠯ ᠢ ᠠᠶᠢᠯᠠᠳᠬᠠᠨ ᠮᠡᠳᠡᠭᠦᠯᠦᠭᠰᠡᠨ ᠳᠤ᠂ ᠵᠠᠩᠭᠢᠶ᠎ᠠ ᠬᠤᠳᠣᠭᠳᠣ ᠦᠪᠦᠷ ᠮᠣᠩᠭᠤᠯ ᠤᠨ ᠵᠡᠭᠦᠨ ᠣᠷᠣᠨ ᠳᠤ ᠲᠦᠷᠪᠡᠨ ᠣᠷᠳᠣ᠂ ᠲᠠᠪᠣᠨ ᠷᠠᠰᠠᠩ ᠲᠠᠢ ᠶᠡᠭᠡ ᠬᠡᠶᠢᠳ ᠰᠦᠮ᠎ᠡ ᠪᠠᠶᠢᠭᠤᠯᠬᠤ ᠴᠢᠬᠤᠯᠠ ᠲᠠᠢ ᠬᠡᠮᠡᠨ ᠸᠴᠢᠷᠠᠯᠮᠠᠰ ᠭᠡᠭᠡᠨ ᠢ ᠪᠡᠶ᠎ᠡ ᠪᠠᠷ ᠢᠶᠠᠨ ᠲᠠᠭᠠᠭᠤᠯᠣᠨ᠂ ᠲᠠᠷᠠᠭ᠎ᠠ ᠡᠳᠣᠷ ᠤᠨ ᠡᠷᠳᠡ ᠶᠢᠨ ᠴᠣᠣ ᠲᠡᠭᠡᠷ᠎ᠡ ᠲᠡᠭᠷᠢ ᠲᠡᠳᠭᠦᠭᠴᠢ ᠬᠠᠭᠠᠨ ᠳᠤ ᠪᠠᠷᠠᠳᠠᠨ ᠰᠦᠮ᠎ᠡ ᠪᠠᠶᠢᠭᠤᠯᠬᠤ ᠣᠴᠢᠷ ᠢᠶᠠᠨ ᠠᠶᠢᠯᠠᠳᠬᠠᠭᠰᠠᠨ ᠳᠤ᠂ ᠬᠠᠭᠠᠨ ᠣᠣᠯ ᠨᠢ ᠰᠦᠮ᠎ᠡ ᠪᠠᠶᠢᠭᠤᠯᠬᠤ ᠪᠣᠳᠣᠷᠣᠣᠯ ᠢ ᠦᠵᠡᠭᠰᠡᠨ ᠲᠣᠯᠠ ᠲᠠᠷᠣᠢ ᠳᠤ ᠨᠢ ᠵᠦᠪᠰᠢᠶᠡᠷᠡᠭᠡᠳ᠂ ᠰᠦᠮ᠎ᠡ ᠷᠠᠰᠠᠩ ᠪᠠᠶᠢᠭᠤᠯᠬᠤ ᠪᠠ ᠪᠣᠷᠬᠠᠨ᠂ ᠨᠣᠮ ᠰᠣᠳᠣᠷ᠂ ᠡᠯ᠎ᠡ ᠵᠦᠢᠯ ᠤᠨ ᠡᠳ᠋ ᠬᠡᠷᠡᠭᠰᠡᠯ ᠢ ᠬᠠᠭᠠᠨ ᠰᠠᠩ ᠠᠴᠠ ᠰᠤᠶᠤᠷᠬᠠᠨ᠂ ᠰᠢᠷ᠎ᠠ ᠠᠯᠳᠠ᠂ ᠴᠠᠭᠠᠨ ᠮᠦᠩᠭᠦ᠂ ᠲᠣᠷᠭ᠎ᠠ ᠳᠣᠷᠳᠣᠩ᠂ ᠰᠣᠪᠣᠳ ᠡᠷᠳᠡᠨᠢ ᠵᠡᠷᠭᠡ ᠬᠤᠪᠣᠷ ᠴᠣᠬᠠᠭ ᠡᠳ᠋ ᠪᠣᠳᠠᠰ ᠢ ᠣᠯᠠᠨ ᠠᠷᠪᠢᠨ ᠦᠭᠴᠡᠢ᠃ ᠮᠦᠨ ᠪᠡᠭᠡᠵᠢᠩ ᠠᠴᠠ ᠨᠡᠷ᠎ᠡ ᠠᠯᠳᠠᠷᠳᠠᠢ ᠣᠷᠠᠴᠣᠳ ᠲᠠᠷᠬᠠᠳ ᠢ ᠲᠣᠮᠢᠯᠠᠨ᠂ ᠰᠦᠮ᠎ᠡ ᠶᠢ ᠲᠠᠬᠢᠨ ᠪᠠᠶᠢᠭᠤᠯᠬᠤ ᠶᠢ ᠬᠦᠴᠣᠳᠠᠢ ᠲᠡᠮᠵᠢᠨ ᠲᠣᠰᠠᠯᠠᠪᠠ᠃ ᠸᠴᠢᠷᠠᠯᠮᠠᠰ ᠭᠡᠭᠡᠨ ᠵᠠᠩᠭᠢᠶ᠎ᠠ ᠬᠤᠳᠣᠭᠳᠣ ᠶᠢᠨ ᠬᠦᠵᠢ ᠶᠢᠨ ᠰᠦᠮ᠎ᠡ ᠳᠤ ᠣᠳᠠᠭᠠᠨ ᠡᠳᠣᠷ ᠰᠠᠭᠤᠵᠣ ᠴᠦᠢᠷᠸ᠎ᠠ ᠪᠤᠯᠢᠶᠠᠯᠳᠤᠨ ᠨᠤᠮ ᠬᠠᠶᠠᠯᠴᠠᠪᠠ᠃ ᠵᠣᠷᠢᠭᠳᠣ ᠸᠠᠩ᠂ ᠸᠴᠢᠷᠠᠯᠮᠠᠰ ᠭᠡᠭᠡᠨ ᠤ ᠪᠡᠭᠡᠵᠢᠩ ᠳᠤ ᠢᠷᠡᠭᠰᠡᠨ ᠮᠡᠳᠡᠭᠡ ᠶᠢ ᠣᠯᠣᠮᠠᠭᠴᠠ᠂ ᠷᠠᠰᠠᠩ ᠯᠠᠮᠠ ᠭᠡᠰᠡᠷᠵᠠᠪ᠂ ᠬᠤᠰᠢᠭᠤᠨ ᠮᠡᠶᠢᠷᠡᠨ ᠲᠣᠭᠤᠭ᠎ᠠ ᠲᠦᠷᠦᠭᠦᠦ ᠲᠠᠢ ᠨᠢᠭᠡ ᠪᠦᠯᠦᠭ ᠬᠦᠮᠦᠰ ᠢᠶᠠᠷ ᠰᠡᠥᠬᠡ᠂ ᠮᠣᠷᠢ᠂ ᠲᠡᠮᠡᠭᠡ᠂ ᠮᠠᠶᠢᠬᠠᠨ ᠵᠡᠷᠭᠡ ᠶᠢ ᠪᠡᠯᠡᠳᠭᠡᠯᠭᠡᠨ᠂ ᠭᠡᠭᠡᠨ ᠢᠶᠠᠨ ᠣᠭᠳᠣᠨ ᠠᠪᠴᠢᠷᠠᠬᠤ ᠪᠠᠷ ᠪᠡᠭᠡᠵᠢᠩ ᠳᠤ ᠶᠠᠭᠠᠷᠠᠨ ᠬᠦᠷᠪᠡ᠃ ᠸᠴᠢᠷᠠᠯᠮᠠᠰ ᠯᠾᠠᠷᠡᠮᠪᠡ ᠭᠡᠭᠡᠨ ᠱᠠᠰᠢᠨ ᠤ ᠶᠣᠰᠣ ᠪᠠᠷ ᠬᠠᠳᠠᠭ ᠲᠠᠳᠠᠨ ᠵᠠᠩᠭᠢᠶ᠎ᠠ ᠬᠤᠳᠣᠭᠳᠣ ᠲᠠᠢ ᠠᠶᠠᠷᠯᠠᠨ ᠰᠠᠯᠵᠣ᠂ ᠦᠨᠳᠡᠯᠡᠨ ᠳᠣᠯᠠᠭᠠᠨ ᠤ ᠡᠩᠭᠡᠷ ᠲᠠᠬᠢ ᠵᠣᠷᠢᠭᠳᠣ ᠸᠠᠩ ᠤᠨ ᠣᠷᠳᠣᠨ ᠳᠤ ᠵᠠᠯᠠᠷᠠᠨ ᠪᠠᠭᠤᠬᠤ ᠳᠤ᠂ ᠲᠠᠷᠬᠠᠨ ᠬᠤᠰᠢᠭᠤᠨ ᠤ ᠡᠷᠬᠢᠮᠳᠡᠳ ᠲᠠᠶᠢᠵᠢ ᠵᠢᠴᠢ ᠯᠠᠮᠠ ᠬᠤᠸᠠᠷᠠᠭ ᠨᠠᠷ ᠬᠦᠨᠳᠣ ᠶᠣᠰᠣᠨ ᠢᠶᠠᠷ ᠮᠦᠷᠭᠦᠨ ᠵᠣᠯᠭᠠᠪᠠ᠃ ᠸᠠᠩ ᠤᠨ ᠣᠷᠳᠣᠨ ᠳᠤ ᠬᠡᠳᠣᠨ ᠡᠳᠣᠷ ᠪᠠᠶᠢᠬᠤ ᠲᠠᠰᠢᠷᠠᠮ ᠳᠤ᠂ ᠮᠦᠷᠭᠦᠯᠴᠢᠳ ᠤᠨ ᠡᠷᠭᠦᠴᠡ ᠪᠣᠯᠣᠨ ᠠᠶᠢᠮᠠᠭ ᠬᠤᠰᠢᠭᠤ ᠨᠣᠳᠤᠭ ᠤᠨ ᠡᠳ᠋ ᠪᠣᠳᠠᠰ ᠪᠠ ᠬᠦᠮᠦᠨ ᠤ ᠬᠦᠴᠣᠨ ᠤ ᠲᠡᠮᠵᠢᠯᠭᠡ ᠶᠢ ᠬᠤᠷᠠᠮᠳᠤᠭᠤᠯᠤᠨ ᠰᠦᠮ᠎ᠡ ᠶᠢᠨ ᠡᠳ᠋ ᠮᠦᠩᠭᠦ ᠬᠢᠭᠡᠳ ᠬᠠᠭᠠᠨ ᠰᠠᠩ ᠠᠴᠠ ᠦᠭᠭᠦᠭᠰᠡᠨ ᠡᠳ᠋ ᠮᠦᠩᠭᠦ ᠪᠠᠷ ᠰᠦᠮ᠎ᠡ ᠪᠠᠷᠢᠬᠤ ᠪᠡᠯᠡᠳᠭᠡᠯ ᠠᠵᠢᠯ ᠢᠶᠠᠨ ᠱᠠᠯᠠᠪᠳᠠᠨ ᠭᠦᠢᠴᠡᠳᠭᠡᠵᠣ᠂ ᠡᠳᠣᠷ ᠤᠨ ᠰᠠᠶᠢᠨ ᠢ ᠰᠤᠩᠭᠤᠨ᠂ ᠰᠢᠨᠡᠯᠠᠮ᠎ᠠ ᠶᠢᠨ ᠲᠣᠭᠳᠠᠭᠠᠭᠰᠠᠨ ᠡᠷᠢᠶᠡᠨ ᠦᠨᠳᠦᠷ ᠤᠨ ᠡᠩᠭᠡᠷ ᠲᠤ ᠰᠦᠮ᠎ᠡ ᠪᠠᠷᠢᠵᠣ ᠡᠬᠢᠯᠡᠪᠡ᠃ ᠭᠠᠵᠠᠷ ᠣᠰᠣᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠪᠠ ᠡᠵᠡᠳ ᠰᠠᠬᠢᠭᠤᠯᠰᠣᠨ ᠢᠶᠠᠨ ᠲᠠᠭᠠᠳᠬᠠᠨ ᠲᠠᠬᠢᠵᠣ᠂ ᠪᠠᠷᠢᠯᠭ᠎ᠠ ᠶᠢᠨ ᠠᠵᠢᠯ ᠳᠤ ᠣᠷᠣᠯᠴᠠᠬᠤ ᠪᠦᠬᠦ ᠬᠦᠮᠦᠰ ᠢ ᠲᠠᠶᠢᠯᠠᠨ ᠪᠠᠶᠠᠰᠬᠠᠪᠠ᠃ ᠪᠠᠷᠢᠯᠭ᠎ᠠ ᠡᠬᠢᠯᠡᠬᠦ ᠶᠣᠰᠣᠯᠠᠯ ᠳᠤ᠂ ᡀᠠᠷᠠᠮ ᠭᠡᠭᠡᠨ ᠪᠡᠶ᠎ᠡ ᠪᠠᠷ ᠬᠦᠷᠦᠰᠦ ᠬᠦᠨᠳᠡᠭᠰᠡᠨ ᠪᠦᠭᠡᠳ ᠲᠡᠷᠡ ᠡᠳᠣᠷ ᠠᠴᠠ ᠡᠬᠢᠯᠡᠨ ᡀᠠᠷᠠᠮ ᠭᠡᠭᠡᠨ ᠪᠠᠷᠢᠯᠭ᠎ᠠ ᠶᠢᠨ ᠭᠠᠵᠠᠷ ᠰᠠᠭᠤᠭᠠᠳ ᠪᠡᠶᠡᠴᠢᠯᠡᠨ ᠵᠢᠯᠣᠭᠤᠳᠴᠣ᠂ ᠠᠵᠢᠯ ᠤᠨ ᠠᠬᠢᠴᠠ ᠪᠠ ᠴᠢᠨᠠᠷ ᠢ ᠪᠠᠳᠣᠯᠠᠪᠠ᠃      ᠲᠤᠰ ᠰᠦᠮ᠎ᠡ ᠶᠢ ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠭᠡᠵᠣ ᠬᠠᠯᠠᠨ ᠨᠡᠷᠡᠶᠢᠳᠪᠡ᠃ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢᠨ ᠪᠠᠶᠢᠳᠠᠯ ᠭᠡᠪᠡᠯ᠂ ᠬᠠᠮᠤᠭ ᠲᠦᠷᠦᠭᠦᠨ ᠳᠤ ᠡᠮ ᠤᠨ ᠵᠦᠢᠯ ᠤᠨ ᠦᠨᠳᠦᠰᠦᠨ ᠲᠦᠷᠪᠡᠨ ᠵᠠᠭᠤ ᠪᠦᠭᠡᠳ ᠲᠦᠷᠪᠡᠨ ᠵᠦᠢᠯ ᠢ ᠭᠤᠣᠯᠳᠠᠭᠤ ᠬᠦᠮᠣᠨ ᠠᠮᠢᠳᠠᠨ ᠤ ᠴᠠᠭ ᠪᠣᠰᠣ ᠡᠪᠡᠳᠴᠢᠨ ᠲᠠᠬᠤᠯ ᠪᠣᠯᠬᠤ ᠳᠤ ᠵᠣᠷᠢᠭᠤᠯᠣᠨ᠂ ᠡᠮ ᠤᠨ ᠡᠬᠢᠳ ᠵᠦᠢᠳ ᠢ ᠲᠠᠶᠢᠯᠪᠣᠷᠢᠯᠠᠨ ᠨᠠᠷᠢᠪᠴᠢᠯᠠᠬᠤ ᠳᠤ ᠪᠠᠨ ᠷᠢᠯᠣ ᠡᠮ ᠨᠠᠶᠢᠷᠠᠭᠤᠯᠬᠤ ᠶᠣᠰᠣᠨ᠂ ᠬᠦᠮᠦᠨ ᠤ ᠪᠡᠶ᠎ᠡ ᠶᠢᠨ ᠲᠠᠪᠣᠨ ᠮᠠᠬᠠᠪᠣᠳ ᠤᠨ ᠪᠦᠳᠣᠵᠣ ᠲᠦᠷᠦᠬᠦ ᠶᠢᠨ ᠡᠬᠡ ᠦᠨᠳᠣᠰᠣᠨ ᠢ ᠡᠷᠬᠢᠯᠡᠨ᠂ ᠬᠦᠮᠦᠨ ᠵᠣᠨ ᠢ ᠢᠮᠠᠭᠳᠠ ᠠᠮᠣᠷ ᠮᠡᠨᠳᠦᠭᠡᠨ ᠶᠠᠪᠣᠭᠤᠯᠬᠤ ᠶᠢᠨ ᠲᠣᠰᠠᠳᠠ᠂ ᠡᠮ ᠡᠮᠨᠡᠯᠭᠡ ᠶᠢᠨ ᠰᠣᠷᠭᠠᠯ ᠢ ᠬᠢᠬᠦ ︽ᠮᠠᠷᠠᠮᠪᠠ ᠷᠠᠰᠠᠩ︾ ᠢ ᠴᠤᠭᠴᠠᠯᠠᠨ ᠪᠠᠶᠢᠭᠤᠯᠵᠣ᠂ ᠣᠷᠳᠣᠨ ᠳᠤ ᠨᠢ ᠣᠳᠠᠴᠢ ᠵᠡᠷᠭᠡ ᠨᠠᠢᠮᠠᠨ ᠶᠡᠭᠡ ᠪᠣᠷᠬᠠᠨ᠂ ᠯᠾᠠᠮᠣ᠂ ᠨᠠᠰᠣᠨ ᠠᠶᠣᠰᠢ ᠵᠢᠴᠢ ᠡᠯ᠎ᠡ ᠵᠦᠢᠯ ᠤᠨ ᠨᠣᠮ ᠰᠣᠳᠣᠷ ᠢ ᠲᠠᠬᠢᠪᠠ᠃ ᠲᠡᠳ᠋ ᠲᠤ ᠨᠢ᠂ ᠲᠠᠪᠣᠨ ᠪᠣᠳᠢ ᠨᠣᠮ ᠤᠨ ᠲᠠᠷᠨᠢ ᠦᠰᠦᠭ ᠢ ᠲᠣᠭᠠᠯᠠᠵᠣ ᠤᠩᠰᠢᠬᠤ᠂ ᠨᠣᠮ ᠤᠨ ᠰᠢᠯᠦᠭ ᠣᠳᠬ᠎ᠠ ᠶᠢ ᠴᠡᠭᠡᠵᠢᠯᠡᠵᠣ ᠣᠩᠰᠢᠬᠤ ᠶᠢ ᠪᠣᠯᠪᠠᠰᠣᠷᠠᠬᠤ ᠲᠤᠭ᠎ᠠ ᠭᠦᠢᠴᠡᠳᠭᠡᠬᠦ ᠪᠠ ᠬᠠᠷ᠎ᠠ ᠴᠠᠭᠠᠨ ᠤ ᠬᠤᠶᠠᠷ ᠡᠷᠬᠡ ᠶᠢ ᠲᠡᠪᠴᠢᠬᠦ᠂ ᠬᠤᠵᠢᠮ ᠤᠨ ᠬᠦᠮᠦᠰ ᠤᠨ ᠲᠦᠷᠦᠯ ᠨᠢ ᠪᠣᠷᠬᠠᠨ ᠤ ᠶᠠᠮᠠᠨᠳᠠᠺᠠ ᠬᠤᠳᠠ ᠳᠤ ᠣᠴᠢᠵᠣ ᠲᠦᠷᠦᠬᠦ ᠰᠣᠷᠭᠠᠯ ᠬᠢᠬᠦ ︽ᠵᠣᠳᠪᠠ ᠷᠠᠰᠠᠩ︾ ᠢ ᠪᠠᠷᠢᠵᠣ᠂ ᠮᠦᠢᠯ ᠪᠣᠷᠬᠠᠨ᠂ ᠡᠳ᠋ ᠤᠨ ᠡᠵᠡᠨ ᠢ ᠲᠠᠬᠢᠵᠣ᠂ ᠵᠣᠳᠪᠠ ᠷᠠᠰᠠᠩ ᠤᠨ ᠪᠠᠷᠠᠭᠤᠨ ᠳᠤ ᠣᠪᠠᠳᠢᠰ ᠤᠨ ᠪᠣᠷᠬᠠᠨ ᠤ ᠣᠷᠳᠣ ᠪᠠᠶᠢᠵᠣ᠂ ᠲᠣᠳᠣᠷ᠎ᠠ ᠨᠢ ᠲᠣᠯᠣᠭᠠᠨ ᠵᠠᠯᠪᠠᠴᠢᠨ᠂ ᠲᠠᠮᠳᠢᠨ ᠵᠢᠴᠢ ᠨᠣᠮᠣ ᠰᠣᠮᠣ᠂ ᠵᠢᠳᠠ ᠰᠡᠯᠡᠮ᠎ᠡ ᠵᠡᠷᠭᠡ ᠶᠢ ᠲᠠᠬᠢᠪᠠ᠃ ᠭᠤᠳᠠᠭᠠᠷ ᠲᠤ᠂ ᠠᠷᠭ᠎ᠠ ᠪᠢᠯᠢᠭ ᠬᠤᠣᠰᠯᠠᠯᠳᠣᠬᠤ ᠨᠠᠷᠠᠨ ᠰᠠᠷᠠᠨ ᠤ ᠡᠭᠡᠯᠵᠢᠯᠡᠬᠦ ᠲᠦᠷᠢᠮ᠂ ᠴᠠᠭ᠂ ᠡᠳᠣᠷ᠂ ᠰᠠᠷ᠎ᠠ ᠶᠢᠨ ᠲᠤᠭ᠎ᠠ ᠬᠡᠮᠵᠢᠶ᠎ᠡ᠂ ᠬᠠᠯᠠᠭᠤᠨ ᠬᠦᠢᠳᠡᠨ ᠬᠠᠷᠢᠯᠴᠠᠬᠤ ᠶᠣᠰᠣᠨ᠂ ᠲᠡᠭᠷᠢ ᠶᠢᠨ ᠦᠩᠭᠡ᠂ ᠭᠠᠵᠠᠷ ᠤᠨ ᠵᠦᠢ᠂ ᠴᠢᠭᠢᠭ ᠰᠠᠯᠬᠢ ᠪᠣᠷᠣᠭᠠᠨ ᠬᠠᠭᠰᠠᠷᠠᠭᠠᠨ ᠪᠣᠯᠬᠤ ᠭᠠᠯᠪᠠ ᠶᠢᠨ ᠲᠤᠭ᠎ᠠ ᠬᠡᠮᠵᠢᠶᠡᠨ ᠤ ᠰᠣᠷᠭᠠᠯ ᠬᠢᠬᠦ ︽ᠵᠢᠷᠣᠬᠠᠢ ᠳ᠋ᠦᠢᠩᠺᠦᠷ ᠷᠠᠰᠠᠩ︾ ᠢ ᠪᠠᠷᠢᠵᠣ᠂ ᠲᠣᠳᠣᠷ᠎ᠠ ᠨᠢ ᠽᠣᠩᠺᠠᠪᠠ ᠪᠣᠷᠬᠠᠨ᠂ ᠳ᠋ᠦᠢᠩᠺᠦᠷ ᠪᠣᠷᠬᠠᠨ ᠢ ᠲᠠᠬᠢᠵᠣ ᠪᠠᠰᠠ ᠡᠯ᠎ᠡ ᠲᠦᠷᠦᠯ ᠤᠨ ᠵᠢᠷᠤᠭ ᠪᠠ ᠨᠣᠮ ᠰᠣᠳᠣᠷ ᠢ ᠲᠠᠬᠢᠪᠠ᠃ ᠲᠦᠳᠦᠭᠡᠷ ᠲᠤ᠂ ᠮᠦᠩᠬᠡ ᠪᠣᠰᠣ ᠶᠢ ᠭᠤᠣᠯ ᠪᠣᠯᠭᠠᠵᠣ ᠬᠤᠭᠤᠰᠣᠨ ᠠᠴᠠ ᠪᠦᠳᠦᠵᠣ ᠭᠠᠷᠬᠤ ᠮᠦᠨ ᠪᠣᠰᠣ ᠶᠢᠨ ᠰᠢᠯᠳᠠᠭᠠᠨ ᠢ ᠡᠭᠦᠰᠬᠦ ᠲᠡᠭᠦᠰᠭᠡᠯ ᠤᠨ ᠴᠢᠨᠠᠷ ᠶᠣᠰᠣᠨ ᠤ ᠣᠴᠢᠷ ᠢ ᠨᠠᠷᠢᠪᠴᠢᠯᠠᠨ ᠲᠠᠶᠢᠯᠪᠣᠷᠢᠯᠠᠬᠤ᠂ ᠡᠬᠢ ᠦᠨᠳᠦᠰᠣᠨ ᠠᠴᠠ ᠵᠦᠢᠯ ᠵᠦᠢᠯ ᠢ ᠬᠢᠨᠠᠵᠣ ᠢᠯᠭᠠᠨ ᠲᠠᠶᠢᠯᠪᠣᠷᠢᠯᠠᠵᠣ ᠪᠣᠯᠢᠶᠠᠯᠳᠣᠨ᠂ ᠦᠨᠡᠨ ᠢ ᠢᠯᠡᠷᠬᠡᠶᠢᠯᠡᠨ ᠬᠡᠯᠡᠬᠦ ᠶᠣᠰᠣᠨ ᠢ ᠰᠣᠷᠣᠯᠴᠠᠬᠤ ︽ᠴᠦᠢᠷᠸ᠎ᠠ ᠷᠠᠰᠠᠩ︾ ᠲᠠᠢ ᠵᠡᠷᠭᠡᠴᠡᠭᠦᠯᠣᠨ ᠪᠠᠷᠢᠪᠠ᠃ ᠲᠠᠪᠣᠳᠣᠭᠠᠷ ᠲᠤ ᠨᠢ᠂ ᠴᠣᠭᠴᠢᠨ ᠲᠣᠭᠠᠩ ᠢ ᠴᠦᠢᠷᠸ᠎ᠠ ᠷᠠᠰᠠᠩ ᠤᠨ ᠵᠡᠭᠦᠨ ᠲᠠᠯ᠎ᠠ ᠳᠤ ᠪᠠᠶᠢᠷᠢᠰᠢᠭᠤᠯᠪᠠ᠃ ᠲᠡᠭᠦᠨ ᠤ ᠡᠵᠡᠯᠡᠭᠰᠡᠨ ᠲᠠᠯᠠᠪᠠᠢ ᠨᠢ ᠬᠠᠮᠤᠭ ᠠᠴᠠ ᠶᠡᠭᠡ ᠪᠣᠯᠣᠨ᠎ᠠ᠃ ᠴᠣᠭᠴᠢᠨ ᠲᠣᠭᠠᠩ ᠨᠢ ᠨᠠᠶᠠᠨ ᠨᠢᠭᠡᠨ ᠵᠠᠩ ᠲᠠᠰᠣᠯᠭ᠎ᠠ ᠭᠤᠷᠪᠠᠨ ᠲᠠᠪᠬᠤᠷ ᠠᠰᠠᠷ᠂ ᠣᠷᠣᠢ ᠶᠢᠨ ᠭᠠᠨᠵᠢᠷ᠎ᠡ ᠶᠢ ᠰᠢᠷ᠎ᠠ ᠠᠯᠳᠠ ᠪᠠᠷ ᠴᠣᠭᠴᠠᠯᠠᠭᠰᠠᠨ ᠲᠣᠯᠠ ᠬᠤᠯᠠ ᠶᠢᠨ ᠬᠤᠯᠠ ᠠᠴᠠ ᠭᠡᠷᠡᠯ ᠰᠠᠴᠣᠷᠠᠨ ᠰᠦᠷᠯᠢᠭ ᠰᠠᠶᠢᠬᠠᠨ ᠬᠠᠷᠠᠭᠳᠠᠳᠠᠭ᠃ ᠶᠡᠨᠳᠡᠷ ᠤᠨ ᠡᠭᠦᠳᠡᠨ ᠤ ᠪᠠᠷᠠᠭᠤᠨ ᠬᠠᠨ᠎ᠠ ᠳᠤ ᠨᠢ ᠡᠷᠯᠢᠭ ᠤᠨ ᠲᠠᠮᠣ ᠶᠢᠨ ᠬᠦᠷᠦᠭ ᠵᠢᠷᠤᠭ ᠲᠠᠢ᠃ ᠣᠷᠳᠣᠨ ᠳᠤ ᠨᠢ ᠭᠤᠷᠪᠠᠨ ᠴᠠᠭ ᠤᠨ ᠪᠣᠷᠬᠠᠨ ᠠᠮᠣᠷ ᠪᠣᠷᠬᠠᠨ᠂ ᠱᠠᠭᠵᠠᠮᠤᠨᠢ ᠪᠣᠷᠬᠠᠨ᠂ ᠮᠠᠶᠢᠳᠠᠷᠢ ᠪᠣᠷᠬᠠᠨ ᠤ ᠡᠮᠣᠨ᠎ᠡ ᠨᠢ ᠨᠠᠢᠮᠠᠨ ᠲᠣᠮᠣ ᠨᠣᠭᠤᠭᠠᠨ ᠳ᠋ᠠᠷ᠎ᠠ᠂ ᠠᠷᠣ ᠳᠤ ᠨᠢ ᠠᠷᠪᠠᠨ ᠨᠠᠢᠮᠠᠨ ᠠᠭᠤᠶᠢᠳᠣ ᠰᠢᠳᠣᠭᠡᠨ ᠢ ᠲᠠᠬᠢᠪᠠ᠃ ᠶᠡᠭᠡ ᠣᠷᠳᠣᠨ ᠤ ᠬᠠᠨ᠎ᠠ ᠶᠢ ᠲᠠᠭᠠᠭᠠᠳ ᠬᠦᠩᠭᠠᠷᠠᠪᠠ ᠳᠤ ᠮᠢᠩᠭᠠᠨ ᠮᠤᠳᠤᠷᠳᠤ ᠨᠣᠭᠤᠭᠠᠨ ᠳ᠋ᠠᠷ᠎ᠠ ᠶᠢ ᠲᠠᠬᠢᠪᠠ᠃ ᠬᠤᠶᠠᠳᠣᠭᠠᠷ ᠠᠰᠠᠷ ᠢ ᠵᠠᠮᠪᠠᠯ᠂ ᠰᠦᠯᠳᠡ ᠵᠢᠴᠢ ᠨᠣᠮ ᠰᠣᠳᠣᠷ ᠢᠶᠠᠷ ᠲᠦᠭᠦᠷᠭᠡᠵᠣ ᠪᠠᠶᠢᠪᠠ᠃ ᠭᠤᠷᠪᠠᠳᠣᠭᠠᠷ ᠠᠰᠠᠷ ᠲᠤ ᠮᠢᠩᠭᠠᠨ ᠮᠣᠳᠣᠷᠳᠣ ᠮᠢᠩᠭᠠᠨ ᠨᠢᠳᠣᠳᠣ ᠳ᠋ᠠᠷ᠎ᠠ᠂ ᠴᠠᠭᠠᠨ ᠠᠯᠳᠠᠨ ᠳ᠋ᠠᠷ᠎ᠠ᠂ ᠸᠧᠨ ᠱᠥ ᠵᠢᠴᠢ ᠠᠯᠳᠠᠨ ᠭᠠᠨᠵᠤᠤᠷ ᠵᠡᠷᠭᠡ ᠬᠤᠪᠣᠷ ᠴᠣᠬᠠᠭ ᠨᠣᠮ ᠰᠣᠳᠣᠷ᠂ ᠠᠯᠳᠠᠨ ᠴᠦᠬᠦᠴᠡ᠂ ᠮᠦᠩᠭᠦᠨ ᠬᠦᠵᠢ ᠶᠢᠨ ᠲᠠᠯᠪᠢᠭᠤᠷ᠂ ᠲᠠᠬᠢᠯ ᠤᠨ ᠰᠠᠪᠠ ᠬᠡᠷᠡᠭᠰᠡᠯ ᠪᠦᠷᠢᠨ ᠲᠠᠭᠦᠰ ᠪᠠᠶᠢᠪᠠ᠃ ᠲᠦᠷᠪᠡᠨ ᠲᠠᠯ᠎ᠠ ᠶᠢᠨ ᠬᠠᠨ᠎ᠠ ᠨᠢ ᠳᠣᠩ ᠴᠠᠭᠠᠨ ᠮᠦᠷᠳᠡᠭᠡᠨ ᠣᠯᠠᠭᠠᠨ ᠦᠩᠭᠡ ᠪᠠᠷ ᠡᠮᠵᠢᠶᠡᠷᠢᠯᠡᠨ ᠬᠦᠪᠡᠭᠡᠯᠡᠭᠰᠡᠨ ᠪᠠᠶᠢᠪᠠ᠃ ᠲᠣᠯᠭᠠᠭᠤᠷᠢ ᠨᠢ ᠪᠦᠷ ᠴᠢᠯᠠᠭᠤ ᠪᠠᠷ ᠣᠷᠠᠯᠠᠨ ᠰᠡᠶᠢᠯᠦᠭᠰᠡᠨ ᠪᠠᠶᠢᠵᠣ᠂ ᠶᠡᠨᠳᠡᠷ ᠢ ᠨᠢ ᠴᠦᠮ ᠲᠣᠮᠣ ᠬᠡᠰᠡᠭᠳᠣ ᠴᠢᠯᠠᠭᠤ ᠪᠠᠷ ᠵᠡᠷᠭᠡᠯᠡᠨ ᠲᠡᠪᠢᠰᠴᠣ᠂ ᠴᠣᠭᠴᠢᠨ ᠲᠤᠭᠠᠩ ᠤᠨ ᠲᠣᠮᠣ ᠬᠦᠷᠢᠶ᠎ᠡ ᠶᠢᠨ ᠲᠠᠯᠠᠪᠠᠢ ᠶᠢ ᠬᠦᠬᠡ ᠲᠣᠭᠤᠰᠬ᠎ᠠ ᠪᠠᠷ ᠲᠡᠪᠢᠰᠦᠭᠰᠡᠨ ᠪᠠᠶᠢᠪᠠ᠃ ᠬᠦᠷᠢᠶᠡᠨ ᠡᠭᠦᠳᠡᠨ ᠤ ᠠᠰᠠᠷ ᠲᠤ ᠲᠦᠷᠪᠡᠨ ᠶᠡᠭᠡ ᠮᠠᠬᠠᠷᠠᠨᠽᠠ ︵ᠬᠦ᠋ ᠭᠦᠸᠧ᠂ ᠵᠧᠩ ᠵᠢᠩ᠂ ᠭᠤᠸᠠᠩ ᠮᠥ᠂ ᠳ᠋ᠦᠸᠧ ᠸᠧᠨ︶ ᠶᠢᠨ ᠱᠣᠭᠤᠮᠠᠯ ᠢ ᠵᠢᠭᠳᠡᠢ ᠠᠮᠢᠳᠠᠨ ᠤᠨᠤᠵᠤ᠂ ᠭᠠᠷ ᠲᠠᠭᠠᠨ ᠰᠢᠬᠦᠷ᠂ ᠬᠦᠭᠵᠢᠮ᠂ ᠰᠡᠯᠡᠮ᠎ᠡ ᠠᠳᠬᠤᠵᠣ ᠪᠠᠶᠢᠬᠤ ᠪᠠᠷ ᠪᠣᠰᠬᠠᠪᠠ᠃ ᠡᠭᠦᠳᠡᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤ ᠨᠢ ᠬᠡᠩᠭᠡᠷᠭᠡᠨ ᠤ ᠠᠰᠠᠷ ︵ᠣᠷᠣᠢ ᠣᠨᠳᠠᠬᠤ ᠳᠤ ᠵᠦᠩ ᠴᠣᠬᠢᠵᠣ᠂ ᠡᠷᠳᠡ ᠪᠣᠰᠬᠤ ᠳᠤ ᠭᠦᠯᠣ ᠲᠡᠯᠡᠳᠬᠦ︶ ᠪᠠᠶᠢᠵᠤ᠂ ᠡᠭᠦᠳᠡᠨ ᠤ ᠭᠠᠳᠠᠨ᠎ᠠ ᠨᠢ ᠬᠤᠶᠠᠷ ᠲᠣᠮᠣ ᠴᠢᠯᠠᠭᠤᠨ ᠠᠷᠰᠯᠠᠨ ᠢ ᠬᠤᠶᠠᠷ ᠭᠠᠷᠯᠠᠨ ᠵᠣᠭᠰᠣᠭᠠᠪᠠ᠃ ᠡᠭᠦᠳᠡᠨ ᠠᠴᠠ ᠪᠠᠭ᠋ᠠᠨ ᠵᠠᠶᠢᠳᠠᠢ ᠰᠢᠬ ᠬᠤᠶᠠᠷ ᠴᠢᠯᠠᠭᠤ ᠪᠤᠰᠬᠠᠬᠰᠠᠨ ᠪᠠᠶᠢᠪᠠ᠃ ᠰᠦᠮ᠎ᠡ ᠶᠢᠨ ᠣᠷᠳᠣ ᠬᠠᠷᠰᠢ ᠪᠦᠬᠦᠨ ᠳᠤ ᠤᠳᠠᠢ᠂ ᠪᠡᠭᠡᠵᠢᠩ᠂ ᠲᠦᠪᠡᠳ᠂ ᠬᠦᠬᠡᠨᠠᠭᠤᠷ ᠠᠴᠠ ᠲᠡᠮᠡᠭᠡᠨ ᠠᠴᠢᠶ᠎ᠠ ᠪᠠᠷ ᠠᠪᠴᠣ ᠢᠷᠡᠭᠰᠡᠨ ᠲᠣᠮᠣ ᠪᠣᠷᠬᠠᠨ ᠤ ᠬᠦᠷᠦᠭ ᠪᠠ ᠣᠪᠣᠭ᠎ᠠ ᠤᠯᠠᠨ ᠨᠣᠮ ᠰᠣᠳᠣᠷ ᠢ ᠡᠯ᠎ᠡ ᠵᠦᠢᠯ ᠤᠨ ᠬᠠᠳᠬᠤᠮᠠᠯ ᠰᠡᠶᠢᠯᠣᠮᠠᠯ ᠵᠡᠷᠭᠡ ᠬᠤᠪᠣᠷ ᠴᠣᠬᠠᠭ ᠡᠳ᠋ ᠪᠣᠶᠣ ᠲᠣᠷᠭ᠎ᠠ ᠲᠣᠷᠳᠣᠩ ᠢᠶᠠᠷ ᠪᠠᠭᠯᠠᠨ ᠲᠠᠬᠢᠪᠠ᠃ ᠲᠡᠳᠡᠭᠡᠷ ᠨᠢ ᠴᠦᠮ ᠲᠡᠷᠡ ᠬᠢᠷᠢ ᠪᠠᠷ ᠢᠶᠠᠨ ᠭᠠᠶᠢᠬᠠᠮᠰᠢᠭᠳᠣ ᠣᠷᠠᠯᠢᠭ ᠤᠨ ᠡᠳ᠋ ᠪᠣᠯᠠᠢ᠃ ᠪᠣᠷᠬᠠᠨ ᠤ ᠬᠡᠳᠣᠨ ᠲᠠᠯ᠎ᠠ ᠪᠠᠷ ᠡᠯᠭᠦᠭᠰᠡᠨ ᠪᠣᠷᠬᠠᠨ ᠤ ᠬᠦᠷᠦᠭ ᠤᠨ ᠡᠯᠭᠦᠮᠡᠯ ᠨᠦᠭᠦᠳ ᠨᠢ ᠪᠦᠷ ᠠᠯᠳᠠ ᠪᠠᠷ ᠬᠦᠪᠡᠭᠡᠯᠡᠭᠰᠡᠨ ᠲᠣᠷᠭ᠎ᠠ ᠲᠣᠷᠳᠣᠩ ᠤᠨ ᠵᠦᠢᠯᠡᠰ ᠪᠣᠯᠬᠤᠷ ᠨᠢᠳᠣ ᠭᠢᠯᠠᠰᠣᠮ᠎ᠠ ᠭᠤᠶᠣ ᠪᠠᠶᠢᠳᠠᠭ᠃      ᠴᠣᠭᠴᠢᠨ ᠲᠣᠭᠠᠩ ᠤᠨ ᠵᠡᠭᠦᠨ ᠬᠤᠶᠢᠳᠣ ᠲᠠᠯ᠎ᠠ ᠳᠤ ᠨᠢ ᠡᠯ᠎ᠡ ᠷᠠᠰᠠᠩ ᠤᠨ ᠰᠠᠩ᠂ ᠭᠡᠭᠡᠨ ᠤ ᠣᠷᠳᠣ᠂ ᠴᠦᠢᠵᠢᠩ ᠤᠨ ᠬᠤᠶᠠᠷ ᠰᠦᠮ᠎ᠡ᠂ ᠯᠣᠣᠰ ᠤᠨ ᠰᠦᠮ᠎ᠡ ᠨᠦᠭᠦᠳ ᠵᠢᠭᠳᠡᠷᠡᠨ ᠪᠠᠶᠢᠷᠢᠰᠢᠵᠣ ᠪᠠᠶᠢᠪᠠ᠃ ᠡᠮᠣᠨ᠎ᠡ ᠲᠠᠯ᠎ᠠ ᠳᠤ ᠨᠢ ᠴᠢᠯᠠᠭᠤᠨ ᠰᠣᠪᠣᠷᠭ᠎ᠠ ᠲᠠᠢ᠂ ᠡᠷᠢᠶᠡᠨ ᠦᠨᠳᠦᠷ ᠤᠨ ᠬᠤᠷᠮᠣᠢ ᠳᠤ ᠯᠠᠮᠠ ᠬᠤᠸᠠᠷᠠᠭ ᠤᠳ ᠤᠨ ᠱᠠᠷᠢᠯ ᠤᠨ ᠬᠦᠷᠢᠶᠡᠯᠡᠩ ᠪᠠᠶᠢᠪᠠ᠃ ᠰᠢᠨᠡᠯᠠᠮ᠎ᠠ ᠶᠢ ᠣᠷᠣᠰᠢᠭᠤᠯᠣᠭᠰᠠᠨ ᠲᠣᠮᠣ ᠴᠢᠯᠠᠭᠤᠨ ᠰᠣᠪᠣᠷᠭ᠎ᠠ ᠴᠥ ᠲᠡᠨᠳᠡ ᠪᠠᠶᠢᠭᠰᠠᠨ ᠪᠢᠯᠡ᠃ ᠪᠣᠰᠣᠳ ᠤᠨ ᠬᠢᠨᠢ ᠴᠢᠨᠳᠠᠷ ᠢ ᠵᠡᠷᠭᠡ ᠲᠡᠰ ᠤᠨ ᠶᠡᠭᠡ ᠪᠠᠭ᠎ᠠ ᠶᠢ ᠦᠨᠳᠣᠰᠣᠯᠡᠨ ᠶᠡᠭᠡ ᠪᠠᠭ᠎ᠠ ᠨᠢ ᠠᠳᠠᠯᠢ ᠦᠭᠡᠢ ᠴᠠᠭᠠᠨ ᠰᠣᠪᠣᠷᠭᠠᠨ ᠳᠤ ᠲᠠᠯᠪᠢᠳᠠᠭ᠃ ᠡ᠊ᠨᠳᠡ ᠮᠦᠨ ᠰᠦᠮ᠎ᠡ ᠶᠢᠨ ᠨᠢᠰᠴᠢᠨ ᠨᠠᠷ ᠡᠷᠳᠡ ᠣᠷᠣᠢ ᠶᠢᠨ ᠴᠢᠯᠦᠭᠡ ᠪᠠᠷ ᠪᠦᠷᠢᠶ᠎ᠡ ᠪᠢᠰᠭᠢᠭᠦᠷ ᠪᠣᠯᠪᠠᠰᠣᠷᠠᠳᠠᠭ ᠭᠠᠵᠠᠷ ᠪᠠᠶᠢᠵᠠᠢ᠃      ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢ ᠲᠡᠭᠷᠢ ᠲᠡᠳᠭᠦᠭᠴᠢ ᠶᠢᠨ ᠲᠠᠪᠢᠨ ᠣᠨ ︵1785︶ ᠠᠴᠠ ᠰᠠᠶᠢᠰᠢᠶᠠᠯ ᠢᠷᠦᠭᠡᠯᠳᠣ ᠶᠢᠨ ᠠᠷᠪᠠᠨ ᠨᠢᠭᠡᠨ ᠣᠨ ︵1806 ︶ ᠤ ᠬᠤᠭᠤᠷᠣᠨᠳᠣ ᠪᠠᠶᠢᠭᠤᠯᠵᠤ ᠲᠠᠭᠤᠰᠬᠠᠪᠠ᠃ ᠶᠠᠭ ᠦᠨᠡᠨ ᠳᠤ ᠪᠠᠨ ᠭᠤᠣᠯ ᠪᠠᠷᠢᠯᠭ᠎ᠠ ᠨᠢ ᠲᠠᠭᠤᠰᠣᠭᠰᠠᠨ ᠪᠣᠯᠪᠠᠴᠣ ᠲᠠᠭᠠᠯᠳᠣᠭᠰᠠᠨ ᠪᠠᠷᠢᠯᠭ᠎ᠠ ᠨᠢ ᠪᠠᠰᠠ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶᠢᠪᠠ᠃ ᠰᠠᠶᠢᠰᠢᠶᠠᠯ ᠢᠷᠦᠭᠡᠯᠳᠣ ᠶᠢᠨ ᠬᠤᠷᠢᠨ ᠲᠠᠪᠣᠨ ᠣᠨ ︵1820︶ ᠳᠤ ᠴᠢᠩ ᠤᠨ ᠦᠨᠳᠦᠰᠦᠳᠡᠨ ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠶᠠᠮᠣᠨ ᠠᠴᠠ ᠲᠦᠷᠪᠡᠨ ᠬᠡᠯᠡ ᠶᠢᠨ ᠪᠢᠴᠢᠭᠡᠰᠦᠳᠡᠢ ︽ᠡᠩᠭᠡᠵᠢᠬᠦᠯᠦᠨ ᠬᠤᠷᠢᠶᠠᠭᠴᠢ ᠬᠡᠶᠢᠳ︾ ᠬᠡᠮᠡᠬᠦ ᠠᠯᠳᠠᠨ ᠦᠰᠦᠭᠳᠣ ᠫᠠᠶᠢᠰᠠ ᠦᠭᠭᠦᠭᠰᠡᠨ ᠢ ᠴᠣᠭᠴᠢᠨ ᠲᠣᠭᠠᠩ ᠤᠨ ᠡᠭᠦᠳᠡᠨ ᠤ ᠲᠡᠬᠡᠷ᠎ᠠ ᠡᠯᠭᠦᠪᠡ᠃ ᠲᠡᠷᠡ ᠡᠳᠣᠷ ᠲᠤ ᠨᠢ ᠮᠠᠰᠢ ᠶᠡᠭᠡ ᠪᠠᠶᠠᠷ ᠪᠣᠯᠵᠣ ᠬᠤᠰᠢᠭᠤᠨ ᠤ ᠸᠠᠩ ᠭᠦᠩ ᠵᠢᠴᠢ ᠯᠠᠮᠠ ᠬᠤᠸᠠᠷᠠᠭ ᠨᠠᠷ ᠪᠦᠷ ᠡ᠊ᠨᠳᠡ ᠬᠤᠷᠠᠨ ᠴᠣᠭᠯᠠᠷᠠᠵᠠᠭᠠᠭᠠᠳ ᠦᠯᠵᠡᠢ ᠬᠤᠳᠣᠭᠳᠣ ᠨᠣᠮ ᠢ ᠣᠩᠰᠢᠭᠤᠯᠵᠣ ᠪᠢᠯᠡ᠃ ᠡᠭᠦᠨ ᠳᠤ ᠵᠣᠷᠢᠭᠳᠣ ᠸᠠᠩ ᠠᠴᠠ ᠦᠪᠡᠷ ᠤᠨ ᠵᠠᠭᠤᠨ ᠡᠷᠦᠬᠡ ᠬᠠᠷᠢᠶᠠᠳᠣ ᠠᠷᠠᠳ ᠢᠶᠠᠨ ᠰᠦᠮ᠎ᠡ ᠶᠢᠨ ᠠᠯᠪᠠᠳᠣ ᠪᠣᠯᠭᠠᠨ ᠦᠭᠪᠠ᠃ ᠮᠦᠨ ᠵᠢᠯ ᠤᠨ ᠨᠠᠢᠮᠠᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠲᠠᠪᠣᠨ᠎ᠠ ᠪᠣᠷᠬᠠᠨ ᠤ ᠭᠡᠷᠡᠯ ᠭᠡᠷᠡᠯᠳᠦᠭᠦᠯᠬᠦ ᠪᠠ ᠡᠷᠢᠶᠡᠨ ᠦᠨᠳᠦᠷ ᠲᠤ ᠬᠠᠷ᠎ᠠ ᠴᠠᠭᠠᠨ ᠣᠪᠣᠭ᠎ᠠ ᠪᠣᠰᠬᠠᠭᠰᠠᠨ ᠳᠤ᠂ ᠯᠾᠠᠷᠡᠮᠪᠡ ᠭᠡᠭᠡᠨ ᠨᠣᠮ ᠲᠠᠯᠪᠢᠨ ᠦᠪᠡᠳᠡᠭᠰᠢ ᠶᠡᠭᠡ ᠨᠣᠮ ᠤᠨ ᠬᠤᠷᠠᠯ ᠪᠠ ᠨᠠᠶᠢᠷ ᠨᠠᠭᠠᠳᠣᠮ ᠪᠣᠯᠵᠣ ᠪᠢᠯᠡ᠃ ᠪᠠᠶᠠᠨ ᠮᠤᠷᠤᠢ ᠶᠢᠨ ᠰᠦᠮ᠎ᠠ ᠶᠢᠨ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠪᠠᠶᠢᠳᠠᠯ ᠢ ᠲᠤᠰ ᠰᠦᠮ᠎ᠠ ᠳᠤ ᠯᠠᠮᠠ ᠪᠠᠶᠢᠬᠰᠡᠨ ᠭᠸᠧᠠᠨᠵᠠᠮᠰᠦ ᠪᠠᠳᠮ᠎ᠠ ᠬᠤᠶᠠᠷ ᠨᠠᠰᠤᠲᠡᠨ ᠠᠴᠠ ︽ᠬᠤᠯᠠ ᠣᠶᠢᠷ᠎ᠠ ᠶᠢᠨ ᠮᠦᠷᠭᠦᠯᠴᠢᠳ ᠬᠤᠷᠠᠨ ᠴᠣᠭᠯᠠᠷᠠᠭᠠᠳ ᠰᠦᠮ᠎ᠡ ᠶᠢᠨ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠮᠣᠩᠭᠤᠯ ᠭᠡᠷ ᠮᠠᠶᠢᠬᠠᠨ ᠢᠶᠠᠷ ᠲᠦᠭᠦᠷᠴᠣ᠂ ᠲᠠᠪᠣᠨ ᠭᠠᠵᠠᠷ ᠣᠷᠳᠣ ᠵᠡᠭᠡᠯᠢ ᠪᠣᠯᠣᠨ ᠰᠣᠨᠣᠯᠵᠠᠨ ᠦᠷᠭᠦᠯᠵᠢᠯᠡᠭᠡᠳ᠂ ᠡᠷᠭᠦᠯᠴᠢᠨ ᠮᠦᠷᠭᠦᠯᠴᠢᠳ ᠵᠡᠭᠡᠯᠢ ᠭᠤᠳᠣᠮᠵᠢ ᠪᠠᠷ ᠢᠪᠡᠷᠡᠯᠳᠣᠨ ᠰᠢᠬᠠᠯᠳᠣᠵᠣ ᠣᠷᠳᠣ ᠡᠩᠨᠡᠭᠡ ᠪᠣᠯᠵᠣ ᠪᠠᠶᠢᠯ᠎ᠠ᠃ ᠡᠭᠦᠨ ᠠᠴᠠ ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢᠨ ᠬᠦᠵᠢ ᠵᠣᠯᠠ ᠬᠦᠭᠵᠢᠨ᠂ ᠯᠠᠮᠠ ᠬᠤᠸᠠᠷᠠᠭ ᠨᠢ ᠣᠯᠠᠰᠢᠷᠠᠭᠠᠳ ᠬᠤᠶᠠᠷ ᠮᠢᠩᠭᠠᠨ ᠲᠤᠭ᠎ᠠ ᠳᠤ ᠬᠦᠷᠪᠡ ᠭᠡᠨ᠎ᠡ︾ ᠭᠡᠵᠣ ᠣᠣᠯ ᠤᠨ ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢᠨ ᠭᠡᠭᠡᠨ ᠤ ᠲᠡᠮᠡᠭᠡᠴᠢᠨ ᠤ ᠣᠮᠪᠣᠯᠣ ᠬᠦᠪᠡᠭᠦᠨ ᠬᠠᠷᠠᠨᠣᠳ ᠮᠤᠤᠨᠤᠬᠠᠢ ᠶᠠᠷᠢᠵᠤ ᠪᠢᠯᠡ᠃ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠨᠢ ᠦᠪᠦᠷ ᠮᠣᠩᠭᠤᠯ ᠤᠨ ᠵᠡᠭᠦᠨ ᠣᠷᠣᠨ ᠳᠤ ᠯᠾᠠᠰᠠ᠂ ᠯᠠᠪᠷᠤᠩ᠂ ᠤᠳᠠᠢ ᠯᠤᠭ᠎ᠠ ᠮᠦᠷ ᠵᠡᠷᠭᠡᠴᠡᠭᠰᠡᠨ ᠪᠣᠷᠬᠠᠨ ᠱᠠᠰᠢᠨ ᠤ ᠬᠤᠪᠢᠯᠭᠠᠨ ᠣᠷᠣᠨ ᠪᠣᠯᠵᠣ ᠠᠯᠳᠠᠷᠰᠢᠪᠠ᠃ ᠬᠤᠷᠴᠢᠨ ᠠᠶᠢᠮᠠᠭ ᠨᠢ ᠦᠪᠦᠷ ᠬᠤᠷᠢᠨ ᠲᠦᠷᠪᠡᠨ ᠠᠶᠢᠮᠠᠭ ᠤᠨ ᠲᠤᠲᠦᠷ᠎ᠠ ᠬᠠᠮᠤᠭ ᠲᠦᠷᠦᠭᠦᠨ᠎ᠡ ᠴᠢᠩ ᠢ ᠲᠦᠰᠢᠭᠰᠡᠨ ᠲᠣᠯᠠ ᠨᠣᠳᠤᠭ ᠲᠡᠪᠢᠰᠬᠡᠷ ᠨᠢ ᠴᠠᠩ ᠪᠠᠢ ᠱᠠᠨ ᠠᠭᠤᠯᠠ᠂ ᠬᠠᠷᠠᠮᠦ᠋ᠷᠡᠨ ᠠᠴᠠ ᠣᠷᠳᠣ ᠴᠠᠭᠠᠨ ᠬᠡᠷᠡᠮ ᠬᠦᠷᠴᠣ᠂ ᠦᠩᠭᠡ ᠦᠵᠡᠮᠵᠢᠳᠣ ᠠᠭᠤᠯᠠ ᠣᠰᠣ ᠦᠷᠭᠡᠨ ᠠᠭᠤᠳᠠᠮ ᠲᠠᠯ᠎ᠠ ᠴᠠᠶᠢᠳᠠᠮ ᠲᠠᠢ ᠦᠨᠢᠷ ᠪᠠᠶᠠᠯᠢᠭ ᠨᠣᠳᠤᠭ ᠣᠷᠣᠨ ᠪᠠᠶᠢᠭᠰᠠᠨ᠃ ᠡᠨᠡ ᠬᠦ ᠰᠠᠶᠢᠬᠠᠨ ᠨᠣᠳᠤᠭ ᠲᠡᠪᠢᠰᠭᠡᠷ ᠲᠡᠭᠡᠷ᠎ᠡ ᠪᠠᠶᠢᠭᠤᠯᠣᠭᠳᠠᠭᠰᠠᠨ ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠨᠢ ᠦᠨᠡᠨ ᠬᠦ ᠨᠡᠷ᠎ᠡ ᠨᠢᠳᠡᠷ ᠲᠤ ᠪᠠᠨ ᠲᠡᠩᠴᠡᠭᠰᠡᠨ ᠪᠦᠬᠦ ᠲᠠᠯ᠎ᠠ ᠪᠠᠷ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠰᠦᠮ᠎ᠡ ᠪᠣᠯᠵᠣ᠂ ᠵᠦᠪᠬᠡᠨ ᠯᠠᠮᠠ ᠬᠤᠸᠠᠷᠠᠭ ᠭᠡᠭᠡᠨ ᠬᠤᠪᠢᠯᠭᠠᠳ ᠢᠶᠠᠷ ᠢᠶᠠᠨ ᠠᠯᠳᠠᠷᠰᠢᠭᠰᠠᠨ ᠲᠡᠳᠣᠢ ᠪᠢᠰᠢ᠂ ᠬᠠᠷᠢᠨ ᠭᠡᠷ ᠪᠠᠷᠢᠯᠭ᠎ᠠ ᠶᠢᠨ ᠶᠡᠬᠡᠮᠰᠥᠭ ᠰᠦᠷᠯᠢᠭ᠂ ᠣᠷᠠᠯᠢᠭ ᠤᠨ ᠨᠠᠷᠢᠯᠢᠭ ᠬᠡᠬᠡᠮᠰᠥᠭ ᠢᠶᠠᠷ ᠢᠶᠠᠨ ᠴᠤ ᠠᠯᠳᠠᠷᠰᠢᠨ᠂ ᠲᠠᠶᠠᠩ ᠤᠨ ᠬᠦᠮᠦᠰ ᠢ ᠱᠠᠭᠰᠢᠭᠤᠯᠵᠣ ᠪᠠᠶᠢᠪᠠ᠃ ᠰᠦᠮ᠎ᠡ ᠶᠢᠨ ᠡᠯ᠎ᠡ ᠰᠠᠩ ᠨᠢ ᠴᠦᠮ ᠬᠡᠳᠦᠨ ᠠᠷᠪᠠᠨ ᠬᠦᠮᠦᠨ ᠵᠠᠷᠣᠵᠣ᠂ ᠲᠠᠷᠢᠶᠠᠯᠠᠩ ᠮᠠᠯᠵᠢᠯ ᠢ ᠣᠶᠠᠯᠳᠣᠭᠤᠯᠣᠨ᠂ ᠦᠬᠡᠷ ᠠᠳᠣᠭᠤᠨ ᠳᠤ ᠪᠠᠨ ᠴᠠᠭᠠᠵᠠᠨ ᠲᠠᠮᠠᠭ᠎ᠠ ᠲᠠᠢ ᠪᠠᠶᠢᠭᠰᠠᠨ ᠶᠣᠮ᠃ ᠠᠯᠳᠠ ᠮᠦᠩᠭᠦᠨ ᠶᠣᠸᠠᠮᠪᠣᠣ᠂ ᠵᠣᠭᠤᠰ ᠵᠤᠭ᠎ᠠ᠂ ᠬᠠᠰ ᠲᠠᠨ᠎ᠠ ᠮᠡᠳᠣ ᠶᠢᠨ ᠬᠤᠪᠣᠷ ᠴᠣᠬᠠᠭ ᠡᠳ᠋ ᠡᠷᠳᠡᠨᠢᠰ ᠬᠢᠭᠡᠳ ᠬᠡᠪᠢᠰ ᠲᠣᠷᠭ᠎ᠠ᠂ ᠬᠡᠰᠡᠭ ᠲᠠᠢ ᠪᠦᠰ ᠰᠠᠩ ᠬᠦᠮᠦᠷᠭᠡ ᠲᠦᠭᠦᠷᠴᠣ᠂ ᠰᠦᠮ᠎ᠡ ᠶᠢᠨ ᠬᠦᠷᠢᠶ᠎ᠡ ᠭᠤᠷᠢᠶ᠎ᠠ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠡᠮᠣᠨᠡᠰᠢ ᠣᠮᠠᠷᠠᠰᠢ ᠨᠠᠢᠮᠠᠨ ᠭᠠᠵᠠᠷ ᠢ ᠬᠡᠳᠣᠷᠡᠵᠦ᠂ ᠨᠠᠢᠮᠠᠨ ᠶᠡᠭᠡ ᠵᠡᠭᠡᠯᠢ ᠵᠢᠷᠭᠤᠭᠠᠨ ᠵᠣᠷᠪᠣᠰ ᠭᠤᠳᠣᠮᠵᠢ ᠲᠠᠢ ᠪᠣᠯᠣᠨ ᠬᠦᠭᠵᠢᠵᠣ᠂ ᠠᠷᠣ ᠲᠦᠷᠪᠡᠨ ᠵᠡᠭᠡᠯᠢ ᠳᠤ ᠨᠢ ᠯᠠᠮᠠ ᠬᠤᠸᠠᠷᠠᠭ ᠤᠨ ᠪᠠᠶᠢᠷᠢ ᠰᠠᠭᠤᠴᠠ ᠲᠠᠢ᠂ ᠡᠮᠦᠨ᠎ᠡ ᠲᠦᠷᠪᠡᠨ ᠵᠡᠭᠡᠯᠢ ᠳᠤ ᠨᠢ ᠲᠠᠪᠣᠨ ᠷᠠᠰᠠᠩ ᠤᠨ ᠶᠡᠭᠡ ᠣᠷᠳᠣᠨ ᠪᠠ ᠡᠯ᠎ᠡ ᠷᠠᠰᠠᠩ ᠤᠨ ᠰᠠᠩ ᠤᠨ ᠭᠡᠷ ᠪᠠᠷᠢᠯᠭ᠎ᠠ ᠤᠳ ᠡᠮᠬᠢ ᠵᠠᠮᠪᠠᠷᠠᠭ᠎ᠠ ᠲᠠᠢ ᠵᠢᠭᠳᠡᠷᠡᠨ ᠰᠠᠭᠤᠷᠢᠰᠢᠭᠰᠠᠨ ᠪᠠᠶᠢᠵᠠᠢ᠃      ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠨᠣᠮ ᠤᠨ ᠬᠤᠷᠠᠯ ᠪᠠ ᠰᠠᠬᠢᠯ ᠰᠨᠨᠸᠠᠷ ᠵᠡᠷᠭᠡ ᠲᠠᠯ᠎ᠠ ᠪᠠᠷ ᠮᠠᠰᠢ ᠴᠢᠩᠭ᠎ᠠ ᠶᠣᠮ ᠰᠠᠨ᠃ ᠬᠠᠮᠢᠶᠠᠷᠣᠯᠳᠠ ᠶᠢᠨ ᠲᠠᠯ᠎ᠠ ᠪᠠᠷ ᠯᠾᠠᠰᠠ ᠶᠢᠨ ᠭᠤᠷᠪᠠᠨ ᠶᠡᠭᠡ ᠬᠡᠶᠢᠳ ᠢᠶᠠᠷ ᠲᠠᠭᠤᠷᠢᠶᠠᠯ ᠪᠣᠯᠭᠠᠵᠣ ᠪᠠᠶᠢᠬᠰᠠᠨ ᠠᠴᠠ ᠬᠡᠳᠣᠨ ᠠᠷᠪᠠ ᠪᠣᠶᠣ ᠬᠡᠳᠣᠨ ᠵᠠᠭᠤᠨ ᠯᠠᠮᠠ ᠬᠤᠸᠠᠷᠠᠭ ᠲᠠᠢ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠡ ᠪᠠᠭᠠᠬᠠᠨ ᠬᠡᠶᠢᠳ ᠰᠦᠮ᠎ᠡ ᠲᠡᠭᠦᠨ ᠲᠠᠢ ᠠᠳᠠᠯᠢᠳᠬᠠᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ᠃ ᠬᠡᠨ ᠬᠦᠮᠦᠨ ᠭᠡᠰᠡᠨ ᠦᠭᠡᠢ ᠰᠦᠮ᠎ᠡ ᠶᠢᠨ ᠲᠦᠷᠢᠮ ᠰᠠᠬᠢᠯᠭ᠎ᠠ ᠶᠢ ᠦᠴᠦᠬᠡᠨ ᠲᠡᠳᠣᠢ ᠵᠦᠷᠢᠴᠡᠵᠣ ᠪᠣᠯᠬᠤ ᠦᠭᠡᠢ᠃ ᠯᠠᠮᠠ ᠬᠤᠸᠠᠷᠠᠭ ᠲᠠᠭᠠᠨ ᠬᠠᠶᠢᠷᠠᠲᠠᠢ᠂ ᠡᠳᠣᠷ ᠲᠣᠳᠣᠮ ᠤᠨ ᠠᠮᠢᠳᠣᠷᠠᠯ ᠢ ᠨᠢ ᠴᠠᠭ ᠢᠮᠠᠭᠳᠠ ᠬᠠᠯᠠᠮᠵᠢᠯᠠᠨ ᠬᠠᠷᠠᠭᠠᠯᠵᠠᠵᠣ ᠪᠠᠶᠢᠭᠰᠠᠨ ᠨᠢ᠂ ᠰᠦᠮ᠎ᠡ ᠶᠢᠨ ᠬᠦᠭᠵᠢᠨ ᠮᠠᠨᠳᠣᠬᠤ ᠶᠢᠨ ᠵᠠᠶᠢᠯᠠᠰᠢ ᠦᠭᠡᠢ ᠦᠨᠳᠣᠰᠣ ᠰᠣᠷᠪᠣᠯᠵᠢ ᠣᠷᠢᠳᠠᠯ ᠨᠦᠬᠦᠴᠡᠯ ᠪᠣᠯᠵᠣ ᠪᠠᠶᠢᠭᠰᠠᠨ ᠶᠣᠮ᠃ ᠡᠨᠡ ᠨᠢ ᠮᠦᠨ ᠴᠥ ᠯᠾᠠᠷᠡᠮᠪᠠ ᠭᠡᠭᠡᠨ ᠤ ᠪᠣᠷᠬᠠᠨ ᠤ ᠣᠷᠣᠨ ᠲᠦᠪᠡᠳ ᠲᠤ ᠪᠠᠶᠢᠬᠤ ᠳᠤ ᠪᠠᠨ ᠰᠠᠶᠢᠨ ᠰᠣᠷᠴᠣ᠂ ᠨᠣᠮ ᠰᠣᠳᠣᠷ ᠲᠤ ᠪᠠᠨ ᠴᠠᠭᠠᠷᠠᠵᠣ ᠨᠡᠪᠳᠡᠷᠡᠭᠰᠠᠨ ᠲᠡᠭᠡᠳᠣ ᠰᠣᠷᠠᠨᠠᠢ ᠶᠢᠨ ᠯᠠᠮᠠ ᠬᠤᠸᠠᠷᠠᠭ ᠪᠣᠯᠣᠭᠰᠠᠨ ᠪᠠ ᠲᠡᠭᠦᠨ ᠤ ᠣᠶᠣᠨ ᠲᠠᠷᠢᠬᠢ ᠪᠠᠨ ᠰᠢᠪᠬᠠᠵᠣ ᠦᠪᠡᠷ ᠪᠡᠶ᠎ᠡ ᠪᠠᠨ ᠵᠦᠳᠡᠭᠡᠨ ᠴᠢᠷᠮᠠᠶᠢᠨ ᠬᠠᠮᠢᠶᠠᠷᠤᠭᠰᠠᠨ ᠲᠠᠢ ᠰᠢᠭᠤᠳ ᠬᠤᠯᠪᠣᠭᠳᠠᠯ ᠲᠠᠢ ᠶᠣᠮ᠃ ᠰᠦᠮ᠎ᠡ ᠶᠢᠨ ᠲᠦᠷᠢᠮ ᠲᠣᠭᠳᠠᠭᠠᠯ ᠢᠶᠠᠨ ᠨᠠᠷᠢᠨ ᠲᠣᠳᠣᠷᠬᠠᠢ ᠲᠣᠭᠳᠠᠭᠠᠵᠣ᠂ ᠡᠳᠣᠷ ᠲᠣᠳᠣᠮ ᠤᠨ ᠠᠮᠢᠳᠣᠷᠠᠯ ᠲᠣᠮᠳᠠ ᠪᠠᠨ ᠴᠢᠩᠭ᠎ᠠ ᠨᠢᠮᠪᠠᠢ ᠬᠡᠷᠡᠭᠵᠢᠭᠦᠯᠳᠡᠭ᠃ ᠨᠢᠭᠡ᠂ ᠠᠮᠢ ᠬᠤᠷᠣᠭᠠᠬᠤ ᠦᠭᠡᠢ︔ ᠬᠤᠶᠠᠷ᠂ ᠬᠤᠯᠠᠭᠠᠶᠢᠯᠠᠨ ᠲᠡᠭᠡᠷᠡᠮᠳᠡᠬᠦ ᠦᠭᠡᠢ︔ ᠭᠤᠷᠪᠠ᠂ ᠬᠤᠳᠠᠯ ᠬᠠᠭᠤᠮᠠᠭᠠᠢ ᠶᠠᠪᠣᠬᠤ ᠦᠭᠡᠢ︔ ᠲᠦᠷᠪᠡ᠂ ᠠᠷᠢᠬᠢ ᠲᠠᠷᠠᠰᠣ ᠡᠳ᠋ᠯᠡᠬᠦ ᠦᠭᠡᠢ︔ ᠲᠠᠪᠤ᠂ ᠲᠠᠮᠠᠬᠢ ᠲᠠᠳᠠᠬᠤ ᠦᠭᠡᠢ︔ ᠵᠢᠷᠭᠤᠭ᠎ᠠ᠂ ᠭᠡᠷᠭᠡᠢ ᠡᠬᠡᠨᠡᠷ ᠠᠪᠬᠤ ᠦᠭᠡᠢ︔ ᠲᠣᠯᠤᠭ᠎ᠠ᠂ ᠮᠠᠭᠤ ᠣᠴᠢᠷ ᠶᠠᠪᠣᠳᠠᠯ ᠦᠢᠯᠡᠳᠬᠦ ᠦᠭᠡᠢ︔ ᠨᠠᠢᠮᠠ᠂ ᠲᠣᠣᠷᠠᠳᠣ ᠲᠡᠰ ᠤᠨ ᠨᠠᠵᠠᠭᠠᠢ ᠲᠣᠷ᠎ᠠ ᠰᠣᠨᠢᠷᠬᠠᠯ ᠪᠠᠶᠢᠵᠣ ᠪᠣᠯᠬᠤ ᠦᠭᠡᠢ︔ ᠶᠢᠰᠣ᠂ ᠨᠠᠵᠠᠭᠠᠢ ᠵᠠᠮ ᠢᠶᠠᠷ ᠶᠠᠪᠣᠵᠣ ᠪᠣᠯᠬᠤ ᠦᠭᠡᠢ︔ ᠠᠷᠪᠠ᠂ ᠪᠣᠰᠣᠳ ᠲᠤ ᠬᠤᠣᠷ ᠦᠢᠯᠡᠳᠬᠦ ᠦᠭᠡᠢ᠃ ᠬᠡᠨ ᠬᠦᠮᠦᠨ ᠰᠠᠬᠢᠯᠭ᠎ᠠ ᠲᠦᠷᠢᠮ ᠢ ᠵᠦᠷᠢᠴᠡᠪᠡᠯ ᠬᠦᠨᠳᠦ ᠬᠦᠩᠬᠡᠨ ᠢ ᠨᠢ ᠦᠵᠡᠵᠣ ᠪᠠᠶᠢᠭᠠᠳ ᠶᠠᠯᠠᠳᠠᠨ ᠰᠢᠢᠳᠭᠡᠨ᠎ᠡ᠃ ᠬᠦᠩᠬᠡᠨ ᠢ ᠨᠢ ᠵᠠᠨᠴᠢᠬᠤ᠂ ᠬᠠᠷ᠎ᠠ ᠠᠵᠢᠯ ᠬᠢᠯᠭᠡᠨ᠎ᠡ᠃ ᠬᠦᠨᠳᠦ ᠶᠢ ᠨᠢ ᠰᠦᠮ᠎ᠡ ᠠᠴᠠ ᠬᠦᠭᠡᠭᠡᠬᠦ᠂ ᠬᠦᠮᠦᠨ ᠠᠯᠠᠭᠰᠠᠨ ᠶᠠᠯᠠᠳᠠᠨ ᠢ ᠲᠡᠭᠡᠳᠣ ᠵᠠᠰᠠᠭ ᠲᠤ ᠮᠡᠳᠡᠭᠦᠯᠦᠨ ᠲᠣᠰᠢᠶᠠᠨ᠎ᠠ᠃      ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠨᠢ ᠨᠡᠯᠢᠶᠡᠳ ᠲᠡᠭᠦᠯᠳᠡᠷ ᠵᠠᠰᠠᠭ ᠵᠠᠬᠢᠷᠭ᠎ᠠ ᠲᠠᠢ ᠪᠠᠶᠢᠭᠰᠠᠨ ᠶᠣᠮ᠃ ᠴᠦᠢᠷᠸ᠎ᠠ ᠷᠠᠰᠠᠩ ᠤᠨ ᠰᠢᠷᠡᠭᠡ ᠯᠠᠮᠠ ᠶᠢ ᠷᠠᠰᠠᠩ ᠯᠠᠮᠠ ︵ᠰᠦᠮ᠎ᠡ ᠪᠠᠷᠠᠭᠳᠠᠬᠤ ᠶᠢᠨ ᠦᠶ᠎ᠡ ᠳᠤ ᠭᠦᠣᠰᠢ ᠯᠠᠮᠠ ᠡᠨᠡ ᠲᠣᠰᠢᠶᠠᠯ ᠳᠤ ᠪᠠᠶᠢᠪᠠ︶ ᠭᠡᠬᠦ᠃ ᠮᠠᠷᠠᠮᠪᠠ ᠷᠠᠰᠠᠩ ᠤᠨ ᠰᠢᠷᠡᠭᠡ ᠯᠠᠮᠠ ᠶᠢ ᠮᠠᠷᠠᠮᠪᠠ ᠯᠠᠮᠠ ︵ᠰᠦᠮ᠎ᠡ ᠪᠠᠷᠠᠭᠳᠠᠬᠤ ᠶᠢᠨ ᠦᠶ᠎ᠡ ᠷᠠᠰᠢᠰᠧᠷᠡᠩ ᠡᠨᠡ ᠲᠣᠰᠢᠶᠠᠯ ᠳᠤ ᠪᠠᠶᠢᠭᠰᠠᠨ︶ ᠭᠡᠬᠦ᠃ ᠵᠣᠳᠪᠠ ᠷᠠᠰᠠᠩ ᠤᠨ ᠰᠢᠷᠡᠭᠡ ᠯᠠᠮᠠ ᠶᠢ ᠰᠤᠷᠠᠮᠪᠠ ᠯᠠᠮᠠ ︵ᠰᠦᠮ᠎ᠡ ᠲᠠᠭᠤᠰᠬᠤ ᠦᠶ᠎ᠡ ᠲᠠᠮᠷᠢᠨᠵᠠᠪ ᠡᠨᠡ ᠲᠣᠰᠢᠶᠠᠯ ᠳᠤ ᠪᠠᠶᠢᠭᠰᠠᠨ︶ ᠭᠡᠬᠦ᠃ ᠵᠢᠷᠣᠬᠠᠢ ᠰᠠᠩ ᠤᠨ ᠰᠢᠷᠡᠭᠡ ᠯᠠᠮᠠ ᠶᠢ ᠲᠣᠷᠳᠣᠨᠱᠣᠩᠪᠠ ᠯᠠᠮᠠ ︵ᠨᠠᠷᠠᠭ ᠤᠨ ᠭᠡᠭᠡᠨ ᠲᠣᠰ ᠲᠣᠰᠢᠶᠠᠯ ᠳᠤ ᠪᠠᠶᠢᠭᠰᠠᠨ︶ ᠭᠡᠬᠦ ᠮᠡᠳᠣ ᠶᠢᠨ ᠣᠯᠠᠨ ᠯᠠᠮᠠ ᠪᠠᠶᠢᠭᠰᠠᠨ ᠪᠢᠯᠡ᠃ ᠪᠦᠬᠦ ᠰᠦᠮ᠎ᠡ ᠳᠤ ᠪᠠᠨ ᠵᠠᠰᠠᠭ ᠳ᠋ᠡ ᠯᠠᠮᠠ᠂ ᠳ᠋ᠠ ᠯᠠᠮᠠ᠂ ᠭᠡᠪᠭᠦᠢ᠂ ᠲᠡᠮᠴᠢ ᠲᠠᠢ᠃ ᠡᠳᠡᠭᠡᠷ ᠯᠠᠮᠠ ᠨᠢ ᠭᠡᠭᠡᠨ ᠢᠶᠠᠨ ᠬᠠᠪᠰᠣᠷᠴᠣ ᠰᠦᠮ᠎ᠡ ᠶᠢᠨ ᠢᠶᠠᠨ ᠡᠳᠣᠷ ᠲᠣᠳᠣᠮ ᠤᠨ ᠠᠮᠢᠳᠣᠷᠠᠯ ᠤᠨ ᠲᠣᠮᠳᠠᠬᠢ ᠬᠡᠷᠡᠭ ᠶᠠᠪᠣᠳᠠᠯ ᠢ ᠬᠠᠷᠢᠭᠤᠴᠠᠨ᠎ᠠ᠃ ᠯᠠᠮᠠ ᠬᠤᠸᠠᠷᠠᠭ ᠨᠡᠭᠦᠵᠦ ᠭᠠᠷᠬᠤ ᠪᠤᠶᠦ ᠤᠷᠤᠵᠤ ᠢᠷᠡᠭᠦ ᠲᠤᠭ᠎ᠠ ᠨᠣᠷᠮ᠎ᠠ ᠶᠢᠨ ᠨᠡᠮᠡᠭᠳᠡᠵᠤ ᠬᠠᠰᠣᠭᠳᠠᠬᠤ ᠪᠣᠶᠣ ᠭᠠᠢ ᠭᠠᠮᠰᠢᠭ ᠭᠠᠷᠬᠤ ᠶᠢ ᠰᠡᠷᠭᠡᠶᠢᠯᠡᠬᠦ᠂ ᠰᠠᠬᠢᠯ ᠲᠦᠷᠢᠮ ᠢ ᠡᠪᠳᠡᠭᠰᠡᠳ ᠢ ᠰᠢᠢᠳᠭᠡᠬᠦ ᠪᠠ ᠲᠡᠭᠡᠳᠣ ᠱᠠᠳᠣᠨ ᠳᠤ ᠲᠣᠰᠢᠶᠠᠬᠤ ᠵᠡᠷᠭᠡ ᠦᠢᠯᠡ ᠶᠢ ᠭᠦᠢᠴᠡᠳᠭᠡᠨ᠎ᠡ᠃ ᠭᠡᠪᠭᠦᠢ ᠯᠠᠮᠠ ᠳᠤ ᠴᠤᠭᠴᠢᠨ ᠭᠡᠪᠭᠦᠢ ᠪᠠ ᠷᠠᠰᠠᠩ ᠭᠡᠪᠭᠦᠢ ᠭᠡᠵᠦ ᠪᠠᠶᠢᠳᠠᠭ ᠪᠦᠭᠡᠳ ᠡᠯ᠎ᠡ ᠷᠠᠰᠠᠩ ᠤᠨ ᠲᠣᠰᠢᠶᠠᠯ ᠳᠤ ᠨᠢᠭᠡ ᠵᠢᠯ ᠪᠠᠶᠢᠵᠣ᠂ ᠴᠣᠭᠴᠢᠨ ᠭᠡᠪᠭᠦᠢ ᠭᠤᠷᠪᠠᠨ ᠵᠢᠯ ᠬᠠᠷᠢᠭᠤᠴᠠᠨ᠎ᠠ᠃ ᠵᠢᠯ ᠪᠦᠷᠢ ᠶᠢᠨ ᠠᠷᠪᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠠᠪᠣᠨ ᠪᠣᠯ ᠬᠠᠣᠯᠢ ᠪᠠᠷ ᠡᠭᠡᠯᠵᠢ ᠰᠣᠯᠢᠬᠤ ᠡᠳᠣᠷ ᠪᠣᠯᠣᠨ᠎ᠠ᠃ ᠭᠡᠪᠭᠦᠢ ᠯᠠᠮᠠ ᠨᠢ ᠰᠦᠮ᠎ᠡ ᠶᠢᠨ ᠰᠠᠬᠢᠯᠭ᠎ᠠ ᠲᠦᠷᠢᠮ ᠢ ᠪᠠᠶᠢᠴᠠᠭᠠᠨ ᠬᠡᠷᠡᠭᠵᠢᠭᠦᠯᠬᠦ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭ᠎ᠠ ᠲᠠᠢ᠃ ᠡᠳᠣᠷ ᠪᠦᠷᠢ ᠶᠢᠨ ᠬᠤᠷᠠᠯ ᠤᠨ ᠬᠦᠮᠦᠰ ᠢ ᠪᠦᠷᠢᠳᠭᠡᠬᠦ᠂ ᠣᠴᠢᠷ ᠶᠠᠪᠣᠳᠠᠯ ᠲᠠᠢ ᠳᠤ ᠨᠢ ᠴᠢᠯᠦᠭᠡ ᠵᠦᠪᠰᠢᠶᠡᠷᠡᠬᠦ᠂ ᠦᠳᠡᠰᠢ ᠣᠷᠣᠢ ᠭᠡᠷ ᠭᠡᠷ ᠢᠶᠠᠷ ᠪᠠᠶᠢᠴᠠᠭᠠᠵᠣ ᠨᠡᠷᠡᠰ ᠤᠨ ᠪᠦᠷᠢᠳᠭᠡᠯ ᠬᠢᠬᠦ ᠵᠡᠷᠭᠡ ᠪᠣᠯᠣᠨ᠎ᠠ᠃ ᠭᠡᠪᠭᠦᠢ ᠶᠢᠨ ᠬᠠᠪᠰᠣᠷᠣᠭᠴᠢ ᠶᠢ ᠬᠡᠶᠤᠭ ᠭᠡᠳᠡᠭ ᠪᠢᠯᠡ᠃ ᠤᠮᠵᠠᠳ ᠯᠠᠮᠠ ᠨᠢ ᠨᠣᠮ ᠣᠳᠣᠷᠢᠳᠣᠨ ᠣᠩᠰᠢᠬᠤ ᠲᠣᠯᠠ ᠨᠣᠮ ᠳᠤ ᠪᠠᠨ ᠨᠡᠪᠳᠡᠷᠡᠭᠰᠡᠨ ᠰᠠᠶᠢᠨ ᠬᠤᠭᠤᠯᠠᠢ ᠲᠠᠢ ᠯᠠᠮᠠ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠭᠤᠨᠢᠷ ᠯᠠᠮᠠ ᠨᠢ ᠨᠣᠮ ᠰᠣᠳᠣᠷ ᠢᠶᠠᠨ ᠲᠢᠭᠯᠡᠨ ᠡᠮᠬᠢᠳᠭᠡᠵᠣ᠂ ᠪᠣᠷᠬᠠᠨ ᠳᠤ ᠬᠦᠵᠢ ᠵᠣᠯᠠ ᠡᠷᠭᠦᠬᠦ ᠪᠠ ᠪᠣᠷᠬᠠᠨ ᠤ ᠭᠡᠷ ᠤᠨ ᠠᠷᠢᠭᠤᠨ ᠴᠡᠪᠡᠷ ᠢ ᠭᠦᠢᠴᠡᠳᠭᠡᠳᠡᠭ᠃ ᠲᠡᠭᠦᠨ ᠤ ᠲᠣᠣᠷ᠎ᠠ ᠭᠡᠯᠡᠪ ᠯᠠᠮᠠ ᠭᠡᠵᠣ ᠪᠠᠶᠢᠳᠠᠭ ᠪᠦᠭᠡᠳ ᠲᠡᠷᠡ ᠨᠢ ᠵᠣᠯᠠ ᠶᠢᠨ ᠲᠣᠰᠣ ᠶᠢ ᠬᠠᠮᠢᠶᠠᠷᠳᠠᠭ᠃ ᠱᠠᠩᠽᠠᠳ ︵ᠱᠠᠩᠰᠠᠳ︶ ᠯᠠᠮᠠ ᠰᠦᠮ᠎ᠡ ᠶᠢᠨ ᠡᠳ᠋ ᠪᠠᠷᠠᠭ᠎ᠠ᠂ ᠠᠵᠣ ᠠᠮᠢᠳᠣᠷᠠᠯ᠂ ᠭᠠᠳᠠᠭᠠᠳᠣ ᠲᠠᠢ ᠬᠠᠷᠢᠯᠴᠠᠬᠤ ᠵᠡᠷᠭᠡ ᠶᠢ ᠬᠠᠷᠢᠭᠤᠴᠠᠳᠠᠭ᠃ ᠲᠡᠮᠴᠢ ᠨᠢ ᠭᠤᠣᠯᠳᠠᠭᠤ ᠰᠦᠮ᠎ᠡ ᠶᠢᠨ ᠡᠳᠣᠷ ᠲᠣᠳᠣᠮ ᠤᠨ ᠬᠡᠷᠡᠭ ᠶᠠᠪᠣᠳᠠᠯ ᠪᠣᠯᠣᠨ ᠪᠢᠴᠢᠭᠡᠴᠢ ᠶᠢᠨ ᠠᠵᠢᠯ ᠢ ᠬᠠᠷᠢᠭᠤᠴᠠᠳᠠᠭ᠃ ᠳ᠋ᠤᠨᠢᠷ ᠨᠢ ᠰᠦᠮ᠎ᠡ ᠶᠢᠨ ᠡᠳ᠋ ᠪᠠᠷᠠᠭ᠎ᠠ ᠲᠠᠩᠰᠠ ᠶᠢ ᠬᠠᠮᠢᠶᠠᠷᠳᠠᠭ᠃ ᠵᠠᠮ᠎ᠠ ᠯᠠᠮᠠ ᠨᠢ ᠰᠦᠮ᠎ᠡ ᠶᠢᠨ ᠬᠤᠭᠤᠯᠠ ᠴᠠᠢ ᠶᠢ ᠭᠦᠢᠴᠡᠳᠭᠡᠳᠡᠭ ᠪᠦᠭᠡᠳ ᠰᠦᠮ᠎ᠡ ᠶᠢᠨ ᠶᠠᠪᠣᠳᠠᠯ ᠤᠨ ᠲᠣᠳᠠᠭᠳᠠᠵᠣ ᠪᠣᠯᠣᠰᠢ ᠦᠭᠡᠢ ᠭᠡᠰᠢᠭᠦᠨ ᠪᠣᠯᠣᠨ᠎ᠠ᠃      ᠴᠣᠭᠴᠢᠨ ᠲᠤᠭᠠᠩ ᠤᠨ ᠪᠠᠷᠠᠭᠤᠨ ᠲᠣᠣᠷ᠎ᠠ ᠴᠢᠬᠢᠨ ᠭᠡᠷ ᠲᠤ ᠬᠡᠳᠣᠨ ᠮᠠᠩᠵᠠᠨ ᠲᠣᠭᠤᠭ᠎ᠠ ᠲᠣᠯᠵᠣ᠂ ᠨᠢᠭᠡ ᠮᠠᠩᠵᠠᠨ ᠲᠣᠭᠤᠭ᠎ᠠ ᠳᠤ ᠨᠢᠭᠡ ᠪᠦᠳᠦᠭᠦᠨ ᠦᠬᠡᠷ ᠢ ᠬᠡᠳᠦᠬᠡᠨ ᠬᠡᠰᠡᠭᠯᠡᠭᠡᠳ ᠬᠢᠪᠡᠯ ᠨᠢᠭᠡ ᠯᠡ ᠪᠣᠴᠠᠯᠣᠭᠰᠠᠭᠠᠷ ᠮᠢᠬ᠎ᠠ ᠨᠢ ᠪᠦᠷ ᠰᠢᠷᠬᠡᠭ ᠪᠣᠯᠴᠢᠬᠠᠳᠠᠭ ᠶᠣᠮ᠃ ᠶᠠᠰᠣ ᠶᠢ ᠨᠢ ᠱᠦᠭᠦᠵᠣ ᠠᠪᠣᠭᠠᠳ ᠱᠦᠯᠦᠨ ᠳᠤ ᠨᠢ ᠲᠣᠬᠠᠪᠠ ᠴᠢᠨᠠᠳᠠᠭ ᠪᠢᠯᠡ᠃ ᠰᠦᠮ᠎ᠡ ᠶᠢᠨ ᠵᠡᠭᠦᠨ ᠬᠤᠶᠠᠷ ᠭᠠᠵᠠᠷ ᠢᠯᠡᠭᠦᠦ ᠵᠠᠶᠢᠳᠠᠢ ᠨᠢᠭᠡ ︽ᠶᠠᠰᠣᠨ ᠣᠷᠣᠢ︾ ᠭᠡᠵᠣ ᠪᠠᠶᠢᠳᠠᠭ ᠨᠢ ᠲᠡᠭᠡᠵᠣ ᠪᠦᠷᠢᠯᠳᠣᠨ ᠢᠩᠭᠢᠵᠣ ᠨᠡᠷᠡᠯᠡᠭᠰᠡᠨ ᠪᠣᠯᠣᠯᠳᠠᠢ᠃      ᠭᠡᠭᠡᠨ ᠬᠤᠳᠣᠭᠳᠣ ᠶᠢᠨ ᠣᠷᠳᠣᠨ ᠳᠤ᠂ ᠳ᠋ᠤᠨᠢᠷ ᠨᠢᠭᠡ ᠬᠦᠮᠦᠨ᠂ ᠰᠦᠢᠪᠥᠨ ︵ᠪᠠᠰᠠ ᠰᠤᠯᠪᠤᠨ ᠬᠡᠳᠡᠭ︶ ᠬᠤᠶᠠᠷ ᠬᠦᠮᠦᠨ᠂ ᠲᠠᠭᠠᠭᠰᠠᠳ ᠲᠦᠷᠪᠡᠨ ᠬᠦᠮᠦᠨ᠂ ᠪᠢᠴᠢᠭᠡᠴᠢ ᠨᠢᠭᠡ ᠬᠦᠮᠦᠨ ᠪᠠᠶᠢᠳᠠᠭ᠃ ᠳ᠋ᠤᠨᠢᠷ ᠨᠢ ᠭᠡᠭᠡᠨ ᠤ ᠡᠳᠣᠷ ᠲᠣᠳᠣᠮ ᠤᠨ ᠬᠡᠷᠡᠭᠯᠡᠬᠦ ᠨᠣᠮ ᠰᠣᠳᠣᠷ᠂ ᠡᠮ ᠲᠣᠮ ᠢ ᠬᠠᠮᠢᠶᠠᠷᠴᠣ᠂ ᠰᠦᠢᠪᠥᠨ ᠨᠢ ᠲᠦᠷᠪᠡᠨ ᠣᠯᠠᠷᠢᠯ ᠤᠨ ᠬᠤᠪᠴᠠᠰᠣ ᠬᠤᠨᠠᠷ᠂ ᠵᠠᠷᠣᠳᠠᠯ ᠪᠠᠷᠢᠳᠠᠯ ᠢ ᠪᠡᠯᠡᠳᠭᠡᠨ ᠬᠠᠮᠢᠶᠠᠷᠴᠣ᠂ ᠲᠠᠭᠠᠭᠰᠠᠳ ᠨᠢ ᠭᠡᠭᠡᠨ ᠤ ᠶᠠᠪᠣᠵᠣ ᠰᠠᠭᠤᠬᠤ ᠲᠡᠷᠭᠡ ᠬᠦᠰᠭᠡ ᠶᠢ ᠪᠡᠯᠡᠳᠭᠡᠨ ᠬᠠᠮᠢᠶᠠᠷᠳᠠᠭ ᠪᠦᠭᠡᠳ ᠴᠠᠭ ᠮᠦᠴᠡ ᠰᠠᠯᠣᠯ ᠦᠭᠡᠢ ᠲᠠᠭᠠᠳᠠᠭ᠃ ᠭᠡᠭᠡᠨ ᠤ ᠭᠠᠳᠠᠷ ᠰᠠᠩ ᠳᠤ ᠪᠣᠰᠣᠳ ᠰᠠᠩ ᠤᠳ ᠲᠠᠢ ᠠᠳᠠᠯᠢ ︵ᠡᠯ᠎ᠡ ᠷᠠᠰᠠᠩ᠂ ᠴᠦᠢᠵᠢᠩ ᠤᠨ ᠰᠦᠮ᠎ᠡ ᠨᠢ ᠪᠦᠷ ᠲᠣᠳᠣᠷ ᠭᠠᠳᠠᠷ ᠬᠡᠳᠣᠨ ᠰᠠᠩ ᠲᠠᠢ︶ ᠬᠤᠪᠢ ᠬᠦᠮᠦᠨ ᠤ ᠠᠵᠣ ᠠᠬᠤᠢ ᠠᠮᠢᠳᠣᠷᠠᠯ ᠤᠨ ᠣᠴᠢᠷ ᠶᠠᠪᠣᠳᠠᠯ ᠢᠶᠠᠨ ᠬᠠᠮᠢᠶᠠᠷᠳᠠᠭ᠃ ᠭᠤᠣᠯ ᠬᠠᠷᠢᠭᠤᠴᠠᠯᠭᠠᠳᠠᠳ ᠨᠢ ᠱᠠᠩᠽᠠᠳ᠂ ᠲᠡᠮᠴᠢ᠂ ᠲᠢᠪ᠂ ᠪᠢᠴᠢᠭᠡᠴᠢ᠂ ᠨᠢᠷᠪᠠ ︵ᠲᠠᠮᠠᠭᠠᠨ ᠨᠢᠷᠪᠠ᠂ ᠭᠠᠳᠠᠭᠰᠢ ᠭᠦᠶᠦᠬᠦ ᠨᠢᠷᠪᠠ ᠭᠡᠵᠣ ᠬᠤᠪᠢᠶᠠᠨ᠎ᠠ︶ ᠭᠡᠵᠣ ᠪᠠᠶᠢᠳᠠᠭ᠃      ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢᠨ ᠯᠠᠮᠠ ᠬᠤᠸᠠᠷᠠᠭ ᠤᠨ ᠴᠣᠯᠠ ᠮᠢᠨᠳᠠᠭ ᠲᠤ᠂ ᠭᠡᠭᠡᠨ ᠢᠶᠠᠨ ᠲᠡᠳ᠋ᠯᠡᠪᠡᠯ ᠭᠠᠪᠵᠣ ᠯᠠᠮᠠ ︵ᠪᠠᠭ᠎ᠠ ᠰᠦᠮ᠎ᠡ ᠶᠢ ᠪᠣᠯ ᠭᠠᠪᠵᠣ ᠯᠠᠮᠠ ᠬᠠᠷᠢᠭᠤᠴᠠᠳᠠᠭ︶᠂ ᠴᠣᠷᠵᠢ ᠯᠠᠮᠠ ︵ᠡᠷᠳᠡᠮ ᠨᠤᠮ ᠳᠤ ᠨᠡᠪᠲᠡᠷᠡᠭᠰᠡᠨ ᠯᠠᠮᠠ︶᠂ ᠭᠡᠯᠣᠩ ᠯᠠᠮᠠ ︵ᠬᠤᠷᠢᠨ ᠨᠠᠰᠤᠨ ᠠᠴᠠ ᠲᠡᠬᠡᠭᠰᠢᠬᠢ ᠬᠤᠸᠠᠷᠠᠬ︶᠂ ᠯᠣᠣᠰᠪᠠ ᠯᠠᠮᠠ ︵ᠣᠷᠴᠢᠭᠤᠯᠣᠭᠴᠢ ᠯᠠᠮᠠ︶᠂ ᠲᠦᠢᠨ ᠯᠠᠮᠠ ︵ᠨᠣᠶᠠᠳ ᠲᠠᠶᠢᠵᠢ ᠶᠢᠨ ᠬᠡᠥᠬᠡᠳ ᠯᠠᠮᠠ ᠬᠤᠸᠠᠷᠠᠭ ᠪᠣᠯᠪᠠᠯ ᠢᠩᠭᠢᠵᠣ ᠲᠠᠭᠤᠳᠠᠳᠠᠭ︶ ᠭᠡᠬᠦ ᠮᠡᠳᠣ ᠪᠠᠶᠢᠪᠠ᠃ ᠪᠦᠷᠢᠶ᠎ᠡ ᠪᠢᠰᠭᠢᠭᠦᠷ ᠦᠯᠢᠶᠡᠭᠴᠢᠳ ᠢ ᠨᠢᠰᠴᠢᠨ ︵ᠬᠦᠭᠵᠢᠮᠴᠢᠨ︶ ᠯᠠᠮᠠ ᠭᠡᠳᠡᠭ᠃ ᠰᠣᠭᠨᠠᠮ ᠪᠣᠰᠬᠤ ᠴᠦᠢᠷᠸ᠎ᠠ ᠷᠠᠰᠠᠩ ᠢ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠠᠪᠣᠨ ᠳᠤ᠂ ᠴᠣᠭᠴᠢᠨ ᠢ ᠲᠣᠯᠣᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠬᠢᠳᠡᠭ᠃ ᠰᠢᠷᠡᠭᠡ ᠯᠠᠮᠠ ᠪᠣᠶᠣ ᠭᠠᠪᠵᠤ ᠴᠣᠷᠵᠢ ᠶᠢᠨ ᠠᠰᠠᠭᠤᠯᠳᠠ ᠶᠢ ᠠᠮᠠ ᠪᠠᠷ ᠬᠠᠷᠢᠭᠤᠯᠣᠨ ᠶᠠᠷᠢᠯᠴᠠᠨ ᠰᠢᠯᠭᠠᠷᠠᠭᠤᠯᠳᠠᠭ᠃ ᠡᠩ ᠤᠨ ᠪᠠᠶᠢᠳᠠᠯ ᠳᠤ ᠠᠷᠪᠠᠨ ᠲᠠᠪᠤ ᠠᠴᠠ ᠬᠤᠷᠢᠨ ᠵᠢᠯ ᠰᠣᠷᠣᠯᠴᠠᠪᠠᠯ ᠰᠠᠶ᠋ᠢ ᠰᠣᠭᠨᠠᠮ ᠪᠣᠰᠣᠨ ᠵᠡᠷᠭᠡ ᠬᠡᠷᠬᠡᠮ ᠲᠡᠪᠰᠢᠳᠡᠭ ᠪᠠᠶᠢᠨ᠎ᠠ᠃ ᠪᠠᠰᠠ ᠰᠣᠭᠨᠠᠮ ᠪᠣᠰᠣᠨ ᠵᠡᠷᠭᠡ ᠲᠡᠪᠰᠢᠭᠰᠡᠨ ᠬᠦᠮᠦᠨ ᠨᠢ ᠦᠪᠡᠷ ᠤᠨ ᠰᠦᠢᠳᠭᠡᠯ ᠢᠶᠠᠷ ᠢᠶᠠᠨ ᠨᠠᠶᠢᠷ ᠬᠢᠵᠣ ᠣᠯᠠᠨ ᠢ ᠪᠠᠶᠠᠰᠬᠠᠳᠠᠭ᠃      ᠪᠠᠶᠠᠨ ᠮᠣᠷᠣᠢ ᠶᠢᠨ ᠰᠦᠮ᠎ᠡ ᠶᠢᠨ ᠨᠣᠮ ᠤᠨ ᠬᠤᠷᠠᠯ ᠨᠢ ᠲᠦᠪᠡᠳ ᠤᠨ ᠰᠠᠯᠠ ᠬᠡᠶᠢᠳ ᠢ ᠲᠠᠭᠤᠷᠢᠶᠠᠨ᠂ ᠵᠢᠯ ᠳᠤ ᠲᠦᠷᠪᠡᠨ ᠶᠡᠭᠡ ᠬᠤᠷᠠᠯ ᠲᠠᠢ᠃ ᠬᠠᠪᠣᠷ ᠤᠨ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠠᠢᠮᠠᠨ ᠠᠴᠠ ᠠᠷᠪᠠᠨ ᠲᠦᠷᠪᠡᠨ ᠪᠣᠯᠳᠠᠯ᠎ᠠ᠂ ᠭᠤᠣᠯᠳᠠᠭᠤ ᠪᠣᠷᠬᠠᠨ ᠤ ᠵᠠᠩᠴᠢ ᠵᠣᠯᠠ ᠶᠢᠨ ᠨᠣᠮ ᠤᠨ ᠬᠤᠷᠠᠯ ᠪᠣᠯᠳᠠᠭ᠃ ᠲᠣᠰ ᠬᠤᠷᠠᠯ ᠳᠤ ᠭᠡᠭᠡᠨ ᠤ ᠨᠡᠷ᠎ᠡ ᠴᠣᠯᠠ ᠲᠠᠢ ᠯᠠᠮᠠ ᠨᠠᠷ ᠤᠨ ᠬᠡᠷᠡᠭᠯᠡᠵᠣ ᠦᠩᠭᠡᠷᠡᠭᠰᠡᠨ ᠨᠣᠮ ᠰᠣᠳᠣᠷ᠂ ᠬᠤᠩᠬ᠎ᠠ ᠲᠠᠮᠠᠷᠣ᠂ ᠸᠴᠢᠷ ᠵᠡᠷᠭᠡ ᠪᠠ ᠽᠣᠩᠺᠠᠪᠠ᠂ ᠲᠠᠯᠠᠢ ᠯᠠᠮᠠ᠂ ᠪᠠᠨᠴᠢᠨ ᠡᠷᠳᠡᠨᠢ ᠨᠠᠷ ᠤᠨ ᠬᠡᠷᠡᠭᠯᠡᠵᠣ ᠦᠩᠭᠡᠷᠡᠭᠰᠡᠨ ᠨᠣᠮ ᠰᠣᠳᠣᠷ᠂ ᠮᠠᠯᠠᠭᠠᠢ᠂ ᠭᠤᠳᠣᠯ᠂ ᠬᠠᠮᠠᠷ ᠲᠠᠮᠠᠬᠢᠨ ᠬᠦᠬᠦᠷ᠂ ᠮᠠᠨᠢ ᠪᠣᠷᠬᠠᠨ ᠤ ᠬᠦᠷᠦᠭ᠂ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠡᠷᠭᠡ ᠶᠢ ᠲᠡᠯᠭᠡᠨ ᠲᠠᠯᠪᠢᠵᠣ ᠮᠦᠷᠭᠦᠯ ᠬᠢᠯᠭᠡᠳᠡᠭ᠃ ᠲᠣᠰ ᠬᠤᠷᠠᠯ ᠳᠤ ᠵᠠᠭᠤ᠂ ᠮᠢᠩᠭ᠎ᠠ᠂ ᠲᠦᠮᠡ ᠪᠠᠷ ᠵᠣᠯᠠ ᠡᠷᠭᠦᠳᠡᠭ ᠪᠢᠯᠡ᠃ ᠵᠣᠨ ᠤ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠨᠠᠢᠮᠠᠨ ᠠᠴᠠ ᠠᠷᠪᠠᠨ ᠲᠠᠪᠣᠨ ᠪᠣᠯᠲᠠᠯ᠎ᠠ ᠮᠠᠨᠢ ᠶᠢᠨ ᠬᠤᠷᠠᠯ ᠪᠣᠯᠳᠠᠭ᠃ ᠡᠭᠦᠨ ᠢ ᠪᠠᠰᠠ ︽ᠵᠣᠨ ᠤ ᠰᠠᠬᠢᠯᠭ᠎ᠠ ᠶᠢᠨ ᠪᠠᠶᠠᠷ︾ ᠭᠡᠳᠡᠭ᠃ ᠪᠣᠳᠢᠰᠠᠳ᠋ᠸ᠎ᠠ ᠶᠢ ᠠᠮᠢᠳᠣ ᠪᠠᠶᠢᠬᠤ ᠳᠤ ᠱᠠᠪᠢ ᠨᠠᠷ ᠨᠢ ᠭᠠᠵᠠᠷ ᠪᠣᠯᠭᠠᠨ ᠳᠤ ᠨᠣᠮ ᠲᠠᠯᠪᠢᠵᠣ ᠶᠠᠪᠣᠬᠤ ᠳᠤ ᠪᠠᠨ ᠠᠷᠠᠳ ᠤᠨ ᠲᠠᠷᠢᠶ᠎ᠠ ᠲᠦᠮᠦᠰᠦ ᠶᠢ ᠭᠢᠰᠭᠢᠯᠡᠨ ᠰᠦᠢᠳᠭᠡᠭᠰᠡᠨ ᠶᠠᠪᠣᠳᠠᠯ ᠭᠠᠷᠣᠭᠰᠠᠨ ᠢ ᠱᠠᠭᠵᠠᠮᠤᠨᠢ ᠮᠡᠳᠡᠭᠡᠳ᠂ ᠪᠣᠷᠣᠭᠠᠨ ᠤ ᠣᠯᠠᠷᠢᠯ ᠤᠨ ᠭᠤᠷᠪᠠᠨ ᠰᠠᠷ᠎ᠠ ᠳᠤ ᠰᠦᠮ᠎ᠡ ᠠᠴᠠ ᠭᠠᠷᠴᠣ ᠪᠣᠯᠬᠤ ᠦᠭᠡᠢ ᠭᠡᠬᠦ ᠰᠠᠬᠢᠯ ᠲᠣᠭᠳᠠᠭᠠᠵᠠᠢ᠃ ᠡᠭᠦᠨ ᠳᠤ ᠡᠭᠡᠯ ᠠᠷᠠᠳ ᠪᠠᠶᠠᠷᠯᠠᠬᠤ ᠳᠤ ᠪᠠᠨ ︽ᠵᠣᠨ ᠤ ᠰᠠᠬᠢᠯᠭ᠎ᠠ ᠶᠢᠨ ᠪᠠᠶᠠᠷ︾ ᠪᠣᠯᠭᠠᠨ ᠲᠣᠷᠠᠰᠬᠠᠨ ᠲᠡᠮᠳᠡᠭᠯᠡᠵᠣ ᠪᠠᠶᠢᠭᠰᠠᠨ ᠣᠴᠢᠷᠲᠠᠢ ᠪᠢᠯᠡ᠃ ᠬᠤᠷᠠᠯ ᠳᠤ ᠰᠠᠭᠤᠭᠰᠠᠳ ᠡᠬᠢᠨ ᠠᠴᠠ ᠲᠡᠭᠦᠰᠳᠡᠯ᠎ᠡ ᠦᠭᠡ ᠲᠣᠣᠭᠠᠷᠬᠤ ᠦᠭᠡᠢ ᠪᠦᠭᠡᠳ ᠣᠴᠢᠷ ᠶᠠᠪᠣᠳᠠᠯ ᠲᠠᠢ ᠪᠣᠯ ᠭᠠᠷ ᠤᠨ ᠲᠣᠬᠢᠶ᠎ᠠ ᠪᠠᠷ ᠬᠤᠯᠪᠣᠭ᠎ᠠ ᠪᠠᠷᠢᠵᠣ ᠰᠠᠨᠠᠭ᠎ᠠ ᠪᠠᠨ ᠰᠣᠯᠢᠯᠴᠠᠳᠠᠭ᠃ ᠨᠠᠮᠣᠷ ᠤᠨ ᠨᠠᠢᠮᠠᠨ ᠰᠠᠷ᠎ᠠ ᠶᠢᠨ ᠬᠤᠷᠠᠯ ᠳᠤ᠂ ᠲᠡᠭᠡᠳᠣ ᠰᠤᠷᠠᠨᠠᠢ ᠶᠢᠨ ᠯᠠᠮᠠ ᠨᠠᠷ ᠣᠷᠣᠯᠴᠠᠨ᠂ ᠨᠠᠶᠠᠨ ᠡᠳᠣᠷ ᠤᠨ ᠨᠣᠮ ᠪᠢᠰᠢᠯᠭᠠᠳᠠᠭ ᠪᠦᠭᠡᠳ ᠣᠨᠴᠠ ᠨᠢᠭᠤᠴᠠ ᠨᠢᠮᠪᠠᠢ ᠪᠠᠶᠢᠵᠣ᠂ ᠭᠠᠳᠠᠨᠠᠬᠢ ᠬᠦᠮᠦᠨ ᠠᠮᠢᠳᠠᠨ ᠳᠤ ᠰᠣᠨᠣᠰᠬᠠᠬᠤ ᠦᠭᠡᠢ ᠪᠠᠶᠢᠬᠤ ᠶᠢ ᠬᠢᠴᠢᠶᠡᠳᠡᠭ ᠰᠠᠨ᠃ ᠬᠤᠷᠠᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠭᠠᠳᠠᠨ᠎ᠠ ᠪᠠᠨ ᠲᠣᠰᠬᠠᠢ ᠬᠦᠮᠦᠨ ᠲᠣᠬᠢᠷᠠᠭᠤᠯᠵᠣ ᠱᠠᠭᠠᠵᠠᠭᠠᠢ ᠰᠢᠪᠠᠭᠤ᠂ ᠬᠠᠷᠢᠶᠠᠴᠠᠢ ᠪᠣᠯᠵᠣᠮᠣᠷ ᠢ ᠨᠠᠳᠬᠤᠭᠠᠨ ᠬᠦᠭᠡᠭᠡᠯᠭᠡᠳᠡᠭ᠃ ᠨᠣᠮ ᠳᠤ ᠰᠠᠭᠤᠭᠰᠠᠳ ᠬᠤᠷᠠᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠠᠯᠬᠤᠵᠣ ᠭᠢᠰᠬᠢᠬᠦ ᠳᠤ ᠭᠠᠷ ᠢᠶᠠᠨ ᠰᠠᠵᠢᠯᠠᠬᠤ ᠦᠭᠡᠢ᠂ ᠬᠦᠯ ᠢᠶᠠᠨ ᠬᠦᠩᠭᠡᠨ ᠱᠦᠩᠭᠡᠨ ᠲᠠᠯᠪᠢᠵᠣ ᠨᠠᠮ ᠭᠦᠮ ᠪᠠᠶᠢᠬᠤ ᠶᠢ ᠬᠢᠴᠢᠶᠡᠳᠡᠭ᠃ ᠬᠤᠷᠠᠯ ᠤᠨ ᠲᠠᠷᠠᠭ᠎ᠠ ᠨᠢᠭᠡ ᠡᠳᠣᠷ ᠠᠮᠠᠷᠠᠳᠠᠭ᠃ ᠡᠨᠡ ᠡᠳᠣᠷ ᠲᠤ ᠨᠢ᠂ ᠰᠦᠮ᠎ᠡ ᠶᠢᠨ ᠣᠶᠢᠷ᠎ᠠ ᠣᠷᠴᠢᠮ ᠤᠨ ᠠᠶᠢᠯ ᠲᠣᠰᠬᠤᠨ ᠤ ᠬᠢᠨᠢ ᠡᠳᠡᠭᠡᠷ ᠯᠠᠮᠠ ᠨᠠᠷ ᠢ ᠨᠣᠮ ᠰᠣᠳᠣᠷ ᠲᠠᠢ ᠨᠢ ᠵᠠᠯᠠᠵᠣ ᠠᠪᠠᠴᠢᠨ ᠭᠠᠨᠵᠤᠤᠷ ᠣᠩᠰᠢᠭᠤᠯᠳᠠᠭ ᠪᠠᠶᠢᠯ᠎ᠠ᠃ ᠨᠣᠮ ᠢᠶᠠᠨ ᠣᠩᠰᠢᠵᠣ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠠᠶᠢᠯ ᠤᠨ ᠬᠦᠮᠦᠰ ᠬᠠᠪᠢᠰᠣᠳᠠᠢ ᠲᠣᠮᠣ ᠵᠣᠵᠠᠭᠠᠨ ᠰᠤᠳᠤᠷ ᠢ ᠡᠭᠦᠷᠴᠣ ᠠᠶᠢᠯ ᠢᠶᠠᠨ ᠵᠦᠪ ᠢᠶᠠᠷ ᠨᠢᠭᠡ ᠡᠷᠭᠢᠳᠡᠭ᠃ ᠡᠭᠦᠨ ᠢᠶᠠᠨ ᠭᠠᠢ ᠪᠠᠷᠴᠢᠳ ᠢ ᠠᠷᠢᠯᠭᠠᠨ ᠴᠢᠳᠭᠦᠷ ᠱᠣᠯᠣᠮ ᠢ ᠦᠯᠳᠡᠨ ᠬᠦᠭᠡᠭᠡᠵᠣ ᠡᠩᠬᠡ ᠠᠮᠣᠭᠤᠯᠠᠩ ᠢ ᠣᠷᠢᠵᠣ ᠪᠠᠶᠢᠨ᠎ᠠ ᠭᠡᠳᠡᠭ᠃ ᠡᠪᠦᠯ ᠤᠨ ᠮᠦᠢᠯ ᠣᠬᠢᠶᠠᠯ ᠤᠨ ᠬᠤᠷᠠᠯ ᠨᠢ᠂ ᠲᠦᠴᠢᠨ ᠡᠳᠦᠷ ᠢᠶᠠᠷ ᠵᠣᠯᠠ ᠶᠢᠨ ᠭᠡᠷᠡᠯ ᠨᠣᠮ ᠤᠨ ᠲᠠᠭᠤᠨ ᠲᠠᠰᠣᠷᠠᠬᠤ ᠦᠭᠡᠢ ᠶᠠᠪᠣᠭᠳᠠᠳᠠᠭ᠃ ᠨᠣᠮ ᠤᠨ ᠬᠤᠷᠠᠯ ᠲᠡᠭᠦᠰᠬᠦ ᠡᠳᠣᠷ ᠨᠢ ᠯᠠᠮᠠ ᠬᠤᠸᠠᠷᠠᠭ ᠨᠠᠷ ᠮᠦᠢᠯ ᠪᠣᠷᠬᠠᠨ ᠢ ᠲᠣᠮᠳᠠ ᠪᠠᠨ ᠲᠠᠮᠨᠠᠨ ᠴᠠᠭ ᠤᠨ ᠵᠡᠭᠦᠦ ᠶᠢᠨ ᠡᠷᠭᠢᠯᠳᠡ ᠪᠠᠷ ᠴᠣᠭᠴᠢᠨ ᠤ ᠣᠷᠳᠣ ᠶᠢ ᠭᠤᠷᠪᠠᠨᠳᠠ ᠡᠷᠭᠢᠬᠦ ᠪᠦᠭᠡᠳ ᠮᠦᠷᠭᠦᠯᠴᠢᠳ ᠮᠦᠢᠯ ᠪᠣᠷᠬᠠᠨ ᠤ ᠲᠣᠣᠭᠤᠷ ᠰᠢᠷᠭᠤᠳᠠᠭ᠃ ᠡᠨᠡ ᠡᠳᠣᠷ ᠨᠢ ᠬᠡᠵᠢᠶᠡᠳᠡ ᠯᠠ ᠰᠠᠷ᠎ᠠ ᠶᠢᠨ ᠬᠤᠷᠢ ᠶᠢᠰᠣᠨ ᠳᠤ ᠲᠣᠬᠢᠶᠠᠯᠳᠣᠳᠠᠭ ᠲᠣᠯᠠ᠂ ᠲᠠᠷᠠᠭ᠎ᠠ ᠡᠳᠣᠷ ᠠᠴᠠ ᠨᠢ ᠨᠢᠭᠡ ᠰᠠᠷ᠎ᠠ ᠶᠢᠨ ᠴᠢᠯᠦᠭᠡ ᠲᠠᠯᠪᠢᠳᠠᠭ᠂ ᠡᠭᠦᠨ ᠢ ︽ᠯᠣᠣᠰᠣᠷᠳᠠᠬᠤ︾ ᠭᠡᠳᠡᠭ ᠶᠣᠮ᠃ ᠡᠨᠡ ᠬᠦ ᠠᠮᠠᠷᠠᠯᠳᠠ ᠶᠢᠨ ᠬᠤᠭᠤᠴᠠᠭᠠᠨ ᠳᠤ ᠪᠠᠨ ᠯᠠᠮᠠ ᠬᠤᠸᠠᠷᠠᠭᠴᠣᠳ ᠨᠠᠭᠠᠳᠣᠮ ᠨᠠᠭᠠᠳᠬᠤ᠂ ᠦᠯᠢᠭᠡᠷ ᠰᠣᠨᠣᠰᠬᠤ᠂ ᠭᠡᠷ ᠨᠣᠳᠤᠭ ᠢᠶᠠᠨ ᠡᠷᠭᠢᠵᠣ ᠡᠴᠢᠭᠡ ᠡᠬᠡ ᠡᠯᠢᠭᠡᠨ ᠰᠠᠳᠣᠨ ᠲᠠᠢ ᠪᠠᠨ ᠣᠴᠠᠷᠠᠨ ᠵᠣᠯᠭᠠᠵᠣ᠂ ᠪᠠᠶᠠᠷ ᠬᠦᠷ ᠲᠠᠢ ᠪᠠᠷ ᠰᠢᠨᠡᠯᠡᠨ ᠴᠠᠭᠠᠯᠠᠵᠣ ᠰᠠᠷ᠎ᠠ ᠶᠢᠨ ᠴᠢᠯᠦᠭᠡ ᠪᠠᠨ ᠦᠩᠭᠡᠷᠡᠭᠡᠳᠡᠭ ᠪᠢᠯᠡ᠃
                  ︵ᠬᠡᠷᠡᠯ ᠵᠢᠷᠤᠬ ᠢ ᠾᠧ ᠬᠧᠨ ᠴᠢᠤᠧᠠᠨ ᠬᠠᠩᠭᠠᠪᠠ︶
ᠢᠷᠡᠯᠲᠡ᠄ ᠲᠦᠩᠯᠢᠶᠤᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ