ᠰᠢᠯ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/23
ᠰᠢᠯ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ.jpg
      ᠡᠵᠢ ᠶᠢᠨ ᠬᠤᠷᠢᠶᠠᠯᠭ᠎ᠠ ᠶᠢᠨ ᠭᠡᠷ ᠢ ᠴᠡᠪᠡᠷᠯᠡᠵᠦ ᠪᠠᠶᠢᠲᠠᠯ᠎ᠠ ᠬᠤᠯᠤᠭᠠᠨ᠎ᠠ ᠭᠠᠷᠤᠭᠠᠳ ᠢᠷᠡᠯ᠎ᠡ᠃ ᠲᠡᠭᠦᠨ ᠢ ᠨᠢ ᠬᠤᠶᠠᠷ ᠠᠴᠢ ᠬᠦᠦ᠂ ᠰᠢᠷ᠎ᠠ ᠠᠯᠠᠭ ᠮᠤᠤᠷ ᠲᠠᠢ ᠭᠤᠷᠪᠠᠭᠤᠯᠠ ᠲᠠᠭᠤᠭᠠᠳ ᠯᠡ ᠭᠠᠷᠤᠭᠠᠳ ᠬᠥᠳᠡᠯᠴᠢᠬᠡᠯ᠎ᠡ᠃ ᠪᠠᠰᠠ ᠨᠢᠭᠡ ᠲᠣᠭᠤᠰᠣ ᠲᠣᠷᠳᠤᠭ ᠲᠤ ᠳᠠᠷᠤᠭᠳᠠᠭᠰᠠᠨ ᠲᠤᠰᠤᠨ ᠳ᠋ᠧᠩ ᠣᠯᠣᠭᠠᠳ ᠪᠢ ᠡᠷᠳᠡᠨᠢ ᠣᠯᠣᠭᠰᠠᠨ ᠮᠡᠲᠦ ᠤᠤᠬᠠᠶᠢᠯᠠᠪᠠ᠃ ᠲᠡᠷᠡ ᠪᠣᠯ ᠪᠦᠭᠭᠦᠭᠦᠷ ᠰᠠᠭᠤᠷᠢ ᠲᠠᠢ ᠰᠢᠯ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ ᠪᠠᠶᠢᠬᠤ ᠳᠠᠭᠠᠨ ᠲᠠᠭᠠᠷᠠᠨ᠎ᠠ᠃ ᠭᠡᠪᠡᠴᠦ ᠰᠢᠯ  ᠨᠢ ᠪᠠᠶᠢᠬᠤ ᠦᠭᠡᠢ᠃ ᠵᠥᠪᠭᠡᠨ ᠪᠦᠭᠭᠦᠭᠦᠷ ᠰᠠᠭᠤᠷᠢ ᠲᠠᠢ ᠯᠣᠩᠬᠤ ᠨᠢ ᠯᠡ ᠪᠠᠶᠢᠯ᠎ᠠ᠃ ᠲᠣᠭᠤᠰᠣ ᠶᠢ ᠨᠢ ᠬᠥᠩᠭᠡᠬᠡᠨ ᠦᠯᠢᠶᠡᠬᠦ ᠶᠢᠨ ᠬᠤᠭᠤᠷᠣᠨᠳᠤ ᠭᠡᠳᠤ ᠭᠡᠳᠤ ᠨᠠᠶᠢᠲᠠᠭᠠᠵᠤ ᠠᠮᠵᠢᠪᠠ᠃ ᠴᠠᠭᠠᠨ᠎ᠠ ᠠᠴᠠ ᠬᠤᠶᠠᠷ ᠬᠡᠦᠬᠡᠳ ᠱᠤᠤᠭᠢᠯᠳᠤᠨ ᠢᠷᠡᠯ᠎ᠡ᠃ ᠲᠡᠳᠡ ᠮᠤᠤᠷ ᠬᠤᠯᠤᠭᠠᠨ᠎ᠠ ᠪᠠᠷ ᠶᠠᠭᠠᠬᠢᠨ ᠠᠯᠠᠭᠠᠳᠠᠵᠤ ᠲᠣᠭᠯᠠᠭᠰᠠᠨ᠂ ᠬᠤᠯᠤᠭᠠᠨ᠎ᠠ ᠶᠢᠨ ᠰᠢᠳᠤ ᠨᠢ ᠶᠠᠭᠠᠬᠢᠵᠤ ᠢᠷᠵᠠᠶᠢᠭᠰᠠᠨ ᠲᠤᠬᠠᠢ ᠬᠥᠭᠲᠡᠢ ᠶᠠᠷᠢᠯᠳᠤᠨ᠎ᠠ᠃      ᠳ᠋ᠧᠩ ᠤᠨ ᠯᠣᠩᠬᠤ ᠶᠢ ᠪᠢ ᠳᠡᠭᠡᠭᠰᠢ ᠡᠷᠭᠦᠵᠦ ︽ᠡᠨᠡ ᠶᠠᠭᠤ ᠪᠤᠢ︖︾ ᠭᠡᠪᠡᠯ᠄      ︽ᠡᠪᠦᠭᠡ ᠶᠢᠨ ᠠᠷᠢᠬᠢᠨ ᠯᠣᠩᠬᠤ︾ ᠭᠡᠵᠦ ᠨᠢᠭᠡ ᠨᠢ ᠬᠡᠯᠡᠬᠦ ᠳᠤ ︽ᠠᠪᠤ ᠶᠢᠨ ᠬᠤᠨᠢ ᠡᠮᠨᠡᠳᠡᠭ ᠡᠮ ᠤᠨ ᠯᠣᠩᠬᠤ︾ ᠭᠡᠵᠦ ᠨᠥᠭᠦᠭᠡ ᠨᠢ ᠬᠡᠯᠡᠪᠡ᠃      ︽ᠳ᠋ᠧᠩ ᠪᠠᠶᠢᠭ᠎ᠠ ᠰᠢᠤ︾ ᠭᠡᠬᠦ ᠳᠤ ᠬᠤᠶᠠᠭᠤᠯᠠ ᠢᠲᠡᠭᠡᠬᠦ ᠦᠭᠡᠢ᠂ ᠡᠶᠢᠮᠦ ᠳ᠋ᠧᠩ ᠢ ᠦᠵᠡᠭᠡ ᠦᠭᠡᠢ᠂ ᠬᠠᠮᠢᠭ᠎ᠠ ᠨᠢ ᠴᠠᠭᠢᠯᠭᠠᠨ ᠵᠠᠯᠭᠠᠳᠠᠭ ᠶᠤᠮ︖ ᠠᠰᠠᠭᠠᠵᠤ ᠦᠵᠡᠶ᠎ᠡ ᠭᠡᠨ᠎ᠡ᠃      ︽ᠴᠠᠭᠢᠯᠭᠠᠨ ᠢᠶᠠᠷ ᠠᠰᠠᠳᠠᠭ ᠪᠢᠰᠢ᠂ ᠬᠠᠷᠢᠨ ᠲᠣᠰᠣ ᠪᠠᠷ ᠠᠰᠠᠳᠠᠭ︾ ᠭᠡᠪᠡᠯ ᠬᠡᠦᠬᠡᠳ ᠤᠯᠠᠮ ᠬᠥᠭᠡᠷᠦᠯᠳᠦᠵᠦ᠄      — ᠶᠠᠭᠠᠬᠢᠭᠠᠳ ᠴᠠᠭᠢᠯᠭᠠᠨ ᠵᠠᠯᠭᠠᠳᠠᠭ ᠦᠭᠡᠢ ᠶᠤᠮ︖ ᠳ᠋ᠧᠩ ᠪᠠᠰᠠ ᠲᠣᠰᠣ ᠪᠠᠷ ᠠᠰᠠᠳᠠᠭ ᠶᠤᠮ ᠤᠤ ᠭᠡᠵᠦ ᠤᠯᠠᠨ ᠠᠰᠠᠭᠤᠯᠳᠠ ᠴᠥᠷᠬᠡᠯᠡᠭᠦᠯᠵᠦ ᠳ᠋ᠧᠩ ᠢ᠂ ᠨᠠᠮ᠎ᠠ ᠶᠢ ᠲᠣᠭᠤᠷᠢᠨ ᠡᠷᠭᠢᠯᠳᠦᠨ᠎ᠡ᠃      — ᠬᠤᠨᠢᠨ ᠲᠣᠰᠣ᠂ ᠬᠤᠨᠢᠨ ᠥᠭᠡᠬᠦ ᠪᠠᠷ ᠪᠦᠷ ᠠᠰᠠᠭᠠᠵᠤ ᠪᠠᠶᠢᠭᠰᠠᠨ ᠁      ᠬᠤᠶᠠᠷ ᠬᠡᠦᠬᠡᠳ ᠶᠠᠭᠠᠬᠢᠭᠰᠠᠨ ᠴᠦ ᠢᠲᠡᠭᠡᠬᠦ ᠦᠭᠡᠢ᠃ ᠠᠪᠠᠭ᠎ᠠ ᠡᠭᠡᠴᠢ ᠪᠠᠰᠠ ᠯᠡ ᠮᠠᠨ ᠢ ᠱᠤᠤᠭᠢᠭᠤᠯᠵᠤ ᠪᠠᠶᠢᠨ᠎ᠠ᠂ ᠲᠡᠶᠢᠮᠤ ᠪᠣᠯ ᠤᠳᠤ ᠠᠰᠠᠭᠠᠭᠠᠳ ᠦᠵᠡᠭᠦᠯ ᠭᠡᠨ᠎ᠡ᠃      ᠪᠢ ᠦᠨᠡᠬᠡᠷ ᠲᠡᠳᠡᠨᠤᠰ ᠲᠤ ᠳᠤᠰᠤᠨ ᠳ᠋ᠧᠩ ᠠᠰᠠᠭᠠᠵᠤ ᠥᠵᠡᠭᠦᠯᠭᠦ ᠶᠢ ᠪᠤᠳᠤᠪᠠ᠃      ᠡᠨᠡ ᠳ᠋ᠧᠩ ᠪᠦᠷᠬᠦᠭᠦᠯ ᠰᠢᠯ ᠨᠢ ᠪᠠᠶᠢᠬᠤ ᠦᠭᠡᠢ᠃ ᠤᠤᠯ ᠠᠴᠠ ᠪᠠᠨ᠂ ᠡᠶᠢᠮᠦ ᠯᠡ ᠪᠦᠭᠭᠦᠭᠦᠷ ᠰᠠᠭᠤᠷᠢ ᠶᠢ ᠣᠯᠵᠤ ᠡᠵᠢ ᠬᠠᠳᠠᠭᠠᠯᠠᠭᠰᠠᠨ ᠶᠤᠮ᠃ ᠪᠦᠷᠬᠦᠭᠦᠯ ᠰᠢᠯ ᠢ ᠨᠢ ᠣᠯᠣᠭᠠᠰᠠᠢ᠂ ᠲᠡᠭᠡᠭᠰᠡᠭᠡᠷ ᠪᠢᠳᠡ ᠪᠠᠰᠠ ᠰᠢᠯ ᠪᠦᠷᠬᠦᠭᠦᠯᠲᠦ ᠳ᠋ᠧᠩ ᠲᠠᠢ ᠪᠣᠯᠴᠢᠬᠠᠨ᠎ᠠ ᠭᠡᠵᠦ ᠲᠡᠷᠡ ᠦᠶ᠎ᠡ ᠳᠤ ᠡᠵᠢ ᠶᠢᠨ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠢ ᠪᠢ ᠤᠳᠤ ᠪᠤᠯᠳᠠᠯ᠎ᠠ ᠲᠣᠳᠣ ᠴᠡᠭᠡᠵᠢᠯᠡᠭᠰᠡᠭᠡᠷ᠃      ᠮᠥᠨ ᠡᠶᠢᠮᠦ ᠨᠢᠭᠡ ᠬᠠᠷ᠎ᠠ ᠭᠦ᠋ ᠰᠠᠭᠤᠭᠰᠠᠨ ᠪᠠᠭ ᠬᠠᠷ᠎ᠠ ᠶᠠᠭᠤᠮ᠎ᠠ᠂ ᠲᠡᠳᠡᠨᠤᠰ ᠤᠨ ᠬᠠᠮᠠᠷ ᠠᠮᠠ ᠪᠠᠨ ᠪᠠᠷᠢᠭᠠᠳ ᠣᠶᠢᠷᠠᠲᠤᠨ ᠶᠠᠳᠠᠨ ᠠᠯᠳᠠᠭᠰᠠᠨ ᠡᠨᠡ ᠲᠤᠰᠤᠨ ᠳ᠋ᠧᠩ ᠲᠡᠷᠡ ᠦᠶ᠎ᠡ ᠳᠤ᠂ ᠤᠳᠤ ᠲᠧᠯᠸᠢᠰ᠂ ᠭᠠᠷ ᠮᠠᠰᠢᠨ ᠢ ᠴᠦ ᠳᠡᠮᠡᠢ ᠴᠦ ᠳᠤᠷᠠᠰᠢᠶᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠡᠮᠡᠭᠡ ᠳᠤᠨᠢ᠂ ᠤᠷᠳᠤ ᠲᠦᠷᠡᠢ᠂ ᠥᠨᠳᠥᠷ ᠪᠣᠷᠪᠢ ᠲᠠᠢ ᠭᠠᠰ ᠤᠯᠠᠭᠠᠨ ᠠᠷᠠᠰᠤᠨ ᠭᠤᠳᠤᠯ ᠳᠤᠭᠲᠤᠷᠴᠢᠬᠠᠭᠰᠠᠨ ᠡᠨᠡ ᠠᠪᠠᠭ᠎ᠠ ᠡᠭᠡᠴᠢ ᠳᠤᠨᠢ ᠬᠡᠴᠢᠨᠡᠭᠡᠨ ᠤᠯᠠᠨ ᠬᠦᠰᠡᠯ ᠮᠥᠷᠥᠭᠡᠳᠦᠯ᠂ ᠬᠦᠷᠴᠦ ᠴᠢᠳᠠᠰᠢ ᠦᠭᠡᠢ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠤᠷᠭᠤᠭᠤᠯᠵᠤ ᠪᠠᠶᠢᠭᠰᠠᠨ ᠢ ᠲᠡᠳᠡ ᠮᠡᠳᠡᠬᠦ ᠦᠭᠡᠢ ᠠ᠋᠃      ᠮᠠᠨ ᠤ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠳᠤ ᠪᠦᠷ ᠲᠤᠰᠤᠨ ᠳ᠋ᠧᠩ ᠬᠡᠷᠡᠭᠯᠡᠳᠡᠭ ᠪᠠᠶᠢᠭᠰᠠᠨ᠃ ᠶᠠᠩᠶ᠋ᠸᠤ ᠭᠡᠰᠡᠨ ᠳ᠋ᠧᠩ ᠤᠨ ᠲᠣᠰᠣ ᠶᠢ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠦᠶ᠎ᠡ ᠳᠤ ᠬᠠᠩᠭᠠᠯᠭ᠎ᠠ ᠶᠢᠨ ᠬᠤᠷᠰᠢᠶᠠᠨ ᠠᠴᠠ ᠬᠤᠳᠠᠯᠳᠤᠨ᠎ᠠ᠃ ᠡᠷᠥᠭᠡ ᠪᠦᠷᠢ ᠳᠤ ᠬᠤᠶᠠᠷ ᠵᠢᠩ ᠴᠦ ᠪᠢᠯᠢᠦ᠂ ᠭᠤᠷᠪᠠᠨ ᠵᠢᠩ ᠴᠦ ᠪᠢᠯᠢᠦ᠂ ᠶᠠᠭᠤ ᠴᠦ ᠭᠡᠰᠡᠨ ᠬᠡᠮᠵᠢᠶ᠎ᠡ ᠲᠠᠢ ᠯᠡ ᠬᠤᠳᠠᠯᠳᠤᠵᠤ ᠥᠭᠭᠦᠨ᠎ᠡ᠃ ᠵᠣᠭᠤᠰ ᠲᠠᠢ ᠴᠦ᠂ ᠵᠣᠭᠤᠰ ᠦᠭᠡᠢ ᠴᠦ᠂ ᠰᠢᠨᠡᠯᠡᠬᠦ ᠭᠡᠵᠦ ᠪᠠᠶᠢᠬᠤ ᠶᠤᠮ ᠴᠢᠨᠢ ᠳ᠋ᠠ᠃ ᠬᠤᠷᠰᠢᠶᠠᠨ ᠳᠤ ᠡᠨᠡ ᠦᠶ᠎ᠡ ᠳᠤ ᠬᠥᠮᠥᠨ ᠤᠯᠠᠨ᠃ ᠬᠤᠷᠰᠢᠶᠠᠨ ᠤ ᠬᠥᠮᠥᠨ ᠲᠠᠯ᠎ᠠ ᠲᠠᠢ ᠨᠢᠭᠡᠨ ᠳᠡᠭᠡᠨ ᠤᠷᠢᠳ ᠢᠶᠠᠷ ᠮᠠᠶᠢᠮᠠᠢ ᠶᠢ ᠨᠢ ᠬᠢᠵᠦ ᠥᠭᠴᠦ ᠲᠠᠯ᠎ᠠ ᠦᠭᠡᠢ ᠳᠡᠭᠡᠨ ᠬᠠᠮᠤᠭ ᠰᠡᠭᠦᠯ ᠳᠤᠨᠢ ᠰᠢᠳᠡᠯᠡᠵᠤ ᠥᠭᠳᠡᠭ ᠭᠡᠵᠦ ᠡᠵᠢ ᠬᠡᠯᠡᠳᠡᠭ᠃ ᠪᠤᠳᠤᠪᠠᠴᠤ ᠶᠠᠳᠠᠭᠤ ᠠᠶᠢᠯ ᠤᠨ ᠡᠵᠡᠭᠲᠡᠢ ᠪᠦᠰᠡᠭᠦᠢ ᠪᠣᠯᠤᠭᠰᠠᠨ ᠡᠵᠢ ᠳᠤ ᠶᠠᠮᠠᠷ ᠲᠠᠯ᠎ᠠ ᠨᠢ ᠪᠠᠶᠢᠳᠠᠭ ᠶᠤᠮ᠃ ᠮᠥᠨ ᠲᠡᠷᠡ ᠬᠤᠶᠠᠷ ᠭᠤᠷᠪᠠᠨ ᠵᠢᠩ ᠶᠠᠩᠶ᠋ᠸᠤ ᠶᠢᠨ ᠲᠥᠯᠥᠭᠡ ᠡᠵᠢ ᠭᠤᠷᠪᠠ ᠳᠥᠷᠪᠡᠨ ᠡᠳᠦᠷ ᠬᠤᠷᠰᠢᠶ᠎ᠠ‌ᠤᠷᠤᠭᠤ ᠵᠠᠮᠨᠠᠵᠤ ᠪᠠᠶᠢᠵᠤ ᠣᠯᠳᠠᠭ ᠶᠤᠮ ᠭᠡᠨ᠎ᠡ᠃      ᠲᠡᠭᠡᠪᠡᠴᠤ ᠰᠥᠨᠢ ᠪᠣᠯᠭᠠᠨ ᠶᠠᠩᠶ᠋ᠸᠤ ᠳ᠋ᠧᠩ ᠨᠣᠴᠣᠭᠠᠳᠠᠭ ᠪᠢᠰᠢ᠃ ᠵᠣᠴᠢᠨ ᠢᠷᠡᠬᠦ ᠶᠤᠮ ᠤᠤ᠂ ᠰᠢᠨᠡᠯᠡᠵᠤ ᠪᠠᠶᠢᠭ᠎ᠠ ᠦᠶ᠎ᠡ ᠳᠤ ᠯᠡ ᠶᠠᠩᠶ᠋ᠸᠤ ᠵᠠᠷᠤᠵᠤ ᠡᠩ ᠤᠨ ᠴᠠᠭ ᠲᠤ ᠪᠠᠷᠤᠭ ᠪᠦᠷ ᠱᠥᠯᠥᠨ ᠲᠤᠰᠤᠨ ᠳ᠋ᠧᠩ ᠠᠰᠠᠭᠠᠨ᠎ᠠ᠃ ᠱᠥᠯᠥᠨ ᠲᠣᠰᠣ ᠶᠢ ᠨᠢ ᠴᠦ ᠡᠵᠢ ᠬᠠᠮᠢᠭ᠎ᠠ ᠠᠴᠠ ᠣᠯᠳᠠᠭ ᠢ ᠬᠡᠨ ᠮᠡᠳᠡᠯ᠎ᠡ᠃ ᠶᠠᠭᠤ ᠴᠦ ᠭᠡᠰᠡᠨ ᠬᠠᠶᠠ ᠳᠠᠭᠠᠨ ︽ᠥᠨᠥ ᠣᠷᠣᠢ ᠳ᠋ᠧᠩ ᠤᠨ ᠲᠣᠰᠣ ᠦᠭᠡᠢ ᠰᠢᠤ᠂ ᠲᠠᠨᠤᠰ ᠳᠠᠰᠬᠠᠯ ᠲᠠᠢ ᠪᠣᠯ ᠨᠠᠷᠠ ᠲᠠᠢ ᠪᠠᠶᠢᠬᠤ ᠳᠤ ᠬᠢ︾ ᠭᠡᠵᠦ ᠪᠠᠰᠠ ᠬᠠᠶᠠ ᠳᠠᠭᠠᠨ ︽ᠡᠵᠢ ᠨᠢ ᠰᠠᠷ᠎ᠠ ᠠᠰᠠᠭᠠᠵᠤ ᠬᠦᠷᠦᠯᠴᠡᠬᠦᠶᠢᠴᠡ ᠱᠥᠯᠥᠨ ᠲᠣᠰᠣ ᠣᠯᠣᠭᠰᠠᠨ᠂ ᠮᠢᠨᠤ ᠬᠡᠦᠬᠡᠳ ᠳᠠᠪᠲᠠᠬᠤ ᠪᠠᠨ ᠮᠡᠳᠡ︾ ᠭᠡᠵᠦ ᠰᠤᠷᠭᠠᠭᠤᠯᠢ ᠲᠠᠷᠬᠠᠭᠠᠳ ᠢᠷᠡᠬᠦ ᠳᠤ ᠬᠡᠯᠡᠳᠡᠭ ᠡᠵᠢ ᠶᠢᠨ ᠦᠭᠡ᠃ ᠤᠳᠤ ᠪᠤᠳᠤᠬᠤ ᠳᠤ ᠥᠴᠥᠭᠡᠳᠦᠷᠬᠡᠨ ᠤ ᠶᠤᠮ ᠰᠢᠭ ᠲᠣᠳᠣᠬᠠᠨ ᠠᠳᠠᠯ᠎ᠠ ᠡᠨᠡ ᠦᠭᠡ ᠮᠥᠨ ᠬᠤᠷᠢᠭᠠᠳ ᠵᠢᠯ ᠤᠨ ᠡᠮᠦᠨᠡᠬᠢ ︽ᠪᠠᠯᠠᠷ ᠡᠷᠲᠡᠨ︾ ᠤ ᠪᠣᠯᠤᠭᠰᠠᠨ ᠠᠵᠤᠭᠤ᠃ ᠨᠢᠭᠡ ᠪᠤᠳᠤᠬᠤ ᠳᠤ ᠣᠨ ᠴᠠᠭ ᠭᠡᠳᠡᠭ ᠶᠠᠭᠤᠮ᠎ᠠ ᠬᠡᠳᠦᠢ ᠴᠦ ᠠᠮᠠᠷᠬᠠᠨ ᠥᠩᠭᠡᠷᠡᠴᠢᠬᠡᠳᠡᠭ ᠪᠢᠯᠡ ᠳ᠋ᠠ᠃      ᠳᠡᠭᠦᠦ ᠪᠢᠳᠡ ᠬᠠᠨᠵᠤᠨ ᠳᠡᠭᠡᠷ᠎ᠡ ᠰᠢᠷᠡᠭᠡ ᠡᠯᠢᠭᠡᠳᠡᠨ ᠲᠤᠰᠤᠨ ᠳ᠋ᠧᠩ ᠤᠨ ᠳᠣᠣᠷ᠎ᠠ ᠬᠢᠴᠢᠶᠡᠯ ᠢᠶᠠᠨ ᠳᠠᠪᠲᠠᠨ᠎ᠠ᠃ ᠳᠠᠰᠬᠠᠯ ᠢᠶᠠᠨ ᠬᠢᠨ᠎ᠡ᠃      ᠪᠦᠳᠡᠭᠢᠬᠡᠨ ᠰᠦᠮᠡᠭᠡᠷ ᠲᠤᠰᠤᠨ ᠳ᠋ᠧᠩ ᠤᠨ ᠭᠡᠷᠡᠯ ᠠ᠋᠂ ᠰᠢᠷᠡᠭᠡ ᠡᠯᠢᠭᠡᠳᠡᠨ ᠰᠥᠨᠢ ᠶᠢᠨ ᠭᠦᠨ ᠪᠤᠯᠳᠠᠯ᠎ᠠ ᠬᠢᠴᠢᠶᠡᠯ ᠳᠠᠪᠲᠠᠵᠤ ᠰᠠᠭᠤᠳᠠᠭ ᠬᠥᠳᠡᠭᠡ ᠶᠢᠨ ᠬᠡᠦᠬᠡᠳ ᠤᠨ ᠬᠤᠯᠠ ᠶᠢᠨ ᠬᠤᠯᠠ ᠶᠢᠨ ᠬᠢᠨᠢ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠨᠢ ᠰᠢᠭ ᠰᠦᠮᠡᠯᠵᠡᠵᠦ ᠪᠠᠶᠢᠭᠰᠠᠨ ᠪᠢᠵᠡ ᠳ᠋ᠠ᠃ ᠪᠠᠰᠠ ᠴᠠᠭᠠᠨ᠎ᠠ ᠨᠢ ᠬᠠᠷᠠᠩᠭᠤᠢ ᠪᠤᠯᠤᠩ ᠳᠤ ᠤᠲᠠᠰᠤ ᠲᠠᠮᠤᠵᠤ ︽ᠤᠲᠠᠰᠤ ᠲᠠᠮᠤᠬᠤ ᠬᠥᠮᠥᠨ ᠳᠤ ᠭᠡᠷᠡᠯ ᠬᠡᠷᠡᠭ ᠦᠭᠡᠢ︾ ᠭᠡᠵᠦ ᠭᠡᠷᠡᠯ ᠭᠡᠭᠡ ᠶᠢ ᠬᠡᠦᠬᠡᠳ ᠲᠡᠭᠡᠨ ᠵᠠᠶᠢᠴᠢᠯᠠᠨ ᠥᠭᠴᠦ ᠪᠠᠶᠢᠭᠰᠠᠨ ᠡᠬᠡ ᠬᠥᠮᠥᠨ ᠤ ᠬᠡᠦᠬᠡᠳ ᠲᠡᠭᠡᠨ ᠲᠠᠯᠪᠢᠭᠰᠠᠨ ᠬᠦᠰᠡᠯ᠂ ᠢᠲᠡᠭᠡᠯ᠂ ᠬᠠᠶᠢᠷ᠎ᠠ ᠶᠢᠨ ᠨᠡᠶᠢᠳᠬᠡᠯ ᠢᠶᠠᠷ ᠰᠦᠮᠡᠯᠵᠡᠨ ᠠᠰᠠᠵᠤ ᠪᠠᠶᠢᠭᠰᠠᠨ ᠪᠢᠵᠡ ᠳ᠋ᠠ᠃      ᠮᠸᠶᠢᠶ᠋ᠸᠤ ᠲᠣᠰᠣ᠂ ᠴᠠᠶᠢᠶ᠋ᠢᠦ ᠲᠣᠰᠣ ᠭᠡᠳ ᠴᠦ ᠰᠡᠭᠦᠯ ᠤᠨ ᠦᠶ᠎ᠡ ᠳᠤ ᠬᠡᠷᠡᠭᠯᠡᠳᠡᠭ ᠪᠠᠶᠢᠭᠰᠠᠨ᠃ ᠶᠠᠮᠠᠷ ᠲᠣᠰᠣ ᠶᠢ ᠨᠢ ᠮᠡᠳᠡᠬᠦ ᠦᠭᠡᠢ᠃ ᠠᠷᠭ᠎ᠠ ᠦᠭᠡᠢ ᠮᠠᠭᠤᠬᠠᠢ ᠦᠨᠦᠷ ᠭᠠᠷᠳᠠᠭ ᠮᠥᠷᠲᠡᠭᠡᠨ ᠤᠳᠤᠭ᠎ᠠ ᠨᠢ ᠬᠠᠮᠠᠷ ᠠᠮᠠ ᠶᠢ ᠪᠢᠲᠡᠭᠦᠷᠡᠭᠦᠯᠳᠡᠭ ᠪᠠᠶᠢᠯ᠎ᠠ᠃ ᠥᠷᠯᠥᠭᠡ ᠨᠢ ᠡᠬᠡ ᠬᠥᠮᠥᠨ ᠴᠠᠢ ᠪᠤᠳᠠᠭ᠎ᠠ ᠪᠠᠨ ᠳᠥᠭᠦᠭᠡᠷᠭᠡᠴᠢᠭᠡᠭᠡᠳ ᠠᠮᠲᠠᠲᠤ ᠨᠣᠶᠢᠷ ᠲᠠᠭᠠᠨ ᠪᠠᠶᠢᠳᠠᠭ ᠬᠡᠦᠬᠡᠳ ᠢᠶᠠᠨ ᠳᠠᠭᠤᠳᠠᠨ ᠰᠡᠷᠡᠭᠡᠬᠦ ᠦᠶ᠎ᠡ ᠳᠤ ᠬᠡᠦᠬᠡᠳ ᠤᠨ ᠬᠢᠨᠢ ᠬᠠᠮᠠᠷ ᠤᠨ ᠨᠦᠬᠡ ᠴᠥᠮ ᠳ᠋ᠧᠩ ᠤᠨ ᠲᠤᠰᠤᠨ ᠤᠳᠤᠭᠠᠨ ᠳᠤ ᠬᠠᠷᠠᠯᠠᠴᠢᠬᠠᠭᠰᠠᠨ᠂ ᠢᠨᠢᠶᠡᠳᠦ ᠬᠦᠷᠦᠮ᠎ᠡ ᠬᠥᠭᠡᠷᠦᠬᠦᠨ ᠬᠠᠷᠠᠭᠳᠠᠳᠠᠭ ᠪᠠᠶᠢᠭᠰᠠᠨ ᠭᠡᠨ᠎ᠡ᠃      ᠨᠢᠭᠡ ᠤᠳᠠᠭ᠎ᠠ ᠨᠠᠭᠠᠴᠤ ᠶᠢᠨ ᠳᠤ ᠣᠴᠢᠵᠤ ᠭᠡᠳᠤ ᠬᠤᠨᠣᠭᠠᠳ ᠪᠤᠴᠠᠵᠤ ᠢᠷᠡᠭᠰᠡᠨ ᠡᠵᠢ᠄ ︽ᠤᠳᠤ ᠨᠢᠭᠡ ᠬᠠᠴᠢᠨ ᠰᠠᠶᠢᠬᠠᠨ ᠳ᠋ᠧᠩ ᠭᠠᠷᠤᠭᠠᠳ ᠢᠷᠡᠴᠢᠬᠡᠵᠡᠢ᠂ ᠨᠠᠭᠠᠴᠤ ᠶᠢᠨ ᠴᠢᠨᠢ ᠠᠰᠠᠭᠠᠵᠤ ᠪᠠᠶᠢᠨ᠎ᠠ᠂ ᠰᠢᠯ ᠪᠦᠷᠬᠦᠭᠦᠯ ᠲᠠᠢ︾ ᠭᠡᠵᠦ ᠬᠡᠯᠡᠯ᠎ᠡ᠃      ᠠ︕ ᠰᠢᠯ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ᠃ ᠶᠠᠮᠠᠷ ᠭᠠᠶᠢᠬᠠᠮᠰᠢᠭᠲᠠᠢ ᠡᠳ᠋ ᠶᠤᠮ ᠪᠣᠯ ᠠ᠋︖      — ᠰᠢᠯ ᠨᠢ ᠶᠠᠮᠠᠷ ᠭᠡᠯᠪᠡᠷᠢ ᠶᠢᠨ ᠶᠤᠮ︖      — ᠣᠯᠣᠭᠠᠢ ᠰᠢᠭ᠋ ᠠ᠋᠃ ᠰᠢᠯ ᠣᠯᠣᠭᠠᠢ ᠶᠢ ᠬᠥᠮᠥᠷᠢᠭᠡᠳ ᠲᠠᠯᠪᠢᠴᠢᠬᠠᠭᠰᠠᠨ ᠰᠢᠭ᠋᠃ ᠲᠡᠳᠡ ᠲᠡᠭᠦᠨ ᠢᠶᠠᠨ ᠰᠢᠯ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ ᠭᠡᠬᠦ ᠶᠤᠮ᠃ ᠠᠯᠳᠠ ᠤᠷᠳᠤ ᠨᠡᠷ᠎ᠡ ᠠ᠋᠂ ᠪᠢ ᠬᠡᠯᠡᠪᠡᠯ ᠣᠯᠣᠭᠠᠢ ᠶᠢᠨ ᠳ᠋ᠧᠩ᠃ ᠳ᠋ᠧᠩ ᠤᠨ ᠭᠤᠣᠯ ᠳᠤᠨᠢ ᠭᠠᠯ ᠵᠣᠯᠭᠠᠭᠤᠯᠤᠮᠠᠭᠴᠠ ᠰᠢᠯ ᠨᠢ ᠨᠡᠪᠲᠡ ᠭᠡᠷᠡᠯᠳᠤᠵᠤ ᠪᠦᠬᠦᠢ ᠯᠡ ᠥᠷᠥᠭᠡ ᠶᠢ ᠴᠦ ᠨᠡᠪᠲᠡ ᠭᠡᠷᠡᠯᠳᠤᠭᠦᠯᠵᠤ ᠁      — ᠶᠡᠭᠡ ᠭᠡᠷᠡᠯ ᠲᠠᠢ ᠤᠤ︖      — ᠴᠠᠪ ᠴᠠᠭᠠᠨ ᠭᠡᠷᠡᠯ ᠲᠠᠢ᠂ ᠨᠠᠭᠠᠴᠤ ᠡᠮᠡᠭᠡ ᠴᠢᠨᠢ ᠭᠡᠷ ᠤᠨ ᠪᠤᠯᠤᠩ ᠳᠤ᠂ ᠳ᠋ᠧᠩ ᠠᠴᠠ ᠲᠡᠶᠢᠮᠤ ᠵᠠᠢ ᠲᠠᠢ ᠰᠠᠭᠤᠭᠠᠳ ᠵᠡᠭᠦᠦ ᠪᠠᠨ ᠨᠢᠭᠡ ᠯᠡ ᠳᠡᠭᠡᠷ᠎ᠡ ᠰᠦᠪᠡᠯᠡᠵᠦ ᠪᠠᠶᠢᠬᠤ ᠳᠤ ᠤᠤ︖      — ᠲᠡᠷᠡ ᠳ᠋ᠧᠩ ᠨᠢ ᠪᠠᠰᠠ ᠤᠳᠤᠭ᠎ᠠ ᠲᠠᠢ ᠤᠤ︖      — ᠰᠢᠯ ᠪᠦᠷᠬᠦᠭᠦᠯ ᠤᠨ ᠬᠢᠨᠢ ᠣᠷᠣᠢ ᠳᠡᠭᠡᠷ᠎ᠡ ᠪᠠᠨ ᠤᠡᠭᠭᠤᠷᠬᠠᠢ ᠲᠠᠢ᠂ ᠤᠳᠤᠭ᠎ᠠ ᠨᠢ ᠲᠡᠭᠦᠪᠡᠷ ᠨᠢ ᠭᠠᠷᠤᠨ᠎ᠠ᠃      — ᠳ᠋ᠧᠩ ᠤᠨ ᠭᠤᠣᠯ ᠨᠢ ᠬᠠᠮᠢᠭ᠎ᠠ ᠨᠢ ᠪᠠᠶᠢᠳᠠᠭ ᠶᠤᠮ︖ ᠳ᠋ᠧᠩ ᠤᠨ ᠭᠤᠣᠯ ᠨᠢ ᠮᠥᠨ ᠬᠥᠪᠥᠩ ᠢᠶᠠᠷ ᠬᠢᠭᠰᠡᠨ ᠤᠤ︖      — ᠪᠦᠭᠭᠦᠭᠦᠷ ᠰᠠᠭᠤᠷᠢ ᠲᠠᠢ᠂ ᠲᠡᠭᠦᠨ ᠤ ᠬᠢᠨᠢ ᠬᠠᠵᠠᠭᠤ ᠳᠤ ᠵᠢᠭᠠᠬᠠᠨ ᠡᠷᠭᠢᠭᠦᠯᠳᠡᠭ ᠭᠤᠬ᠎ᠠ ᠲᠠᠢ᠂ ᠲᠡᠷᠡ ᠭᠤᠬ᠎ᠠ ᠶᠢ ᠨᠢ ᠡᠷᠭᠢᠭᠦᠯᠦᠮᠡᠭᠴᠡ ᠳ᠋ᠧᠩ ᠤᠨ ᠭᠤᠣᠯ ᠨᠢ ᠭᠠᠷᠴᠤ ᠢᠷᠡᠨ᠎ᠡ᠃ ᠪᠦᠷᠬᠦᠭᠦᠯ ᠰᠢᠯ ᠢᠶᠠᠨ ᠵᠢᠭᠠᠬᠠᠨ ᠡᠷᠭᠦᠰᠬᠢᠵᠦ᠂ ᠳ᠋ᠧᠩ ᠢ ᠠᠰᠠᠭᠠᠮᠠᠭᠴᠠ ᠰᠢᠯ ᠪᠦᠷᠬᠦᠭᠦᠯ ᠢᠶᠠᠨ ᠳᠣᠷᠣᠭᠰᠢ ᠲᠠᠯᠪᠢᠨ᠎ᠠ᠂ ᠰᠢᠯ ᠪᠦᠷᠬᠦᠭᠦᠯ ᠤᠨ ᠢᠶᠠᠨ ᠳᠡᠭᠡᠷ᠎ᠡ ᠨᠢ ᠪᠠᠰᠠ ᠳᠡᠯᠪᠡᠭᠡᠷ ᠮᠠᠯᠠᠭᠠᠢ ᠰᠢᠭ᠋ ᠰᠠᠷᠠᠪᠴᠢ ᠲᠠᠢ᠂ ᠲᠡᠷᠡ ᠨᠢ ᠴᠦ ᠴᠠᠪ ᠴᠠᠭᠠᠨ᠂ ᠳ᠋ᠧᠩ ᠤᠨ ᠭᠤᠣᠯ ᠨᠢ ᠶᠠᠮᠠᠷ ᠪᠠᠶᠢᠯ᠎ᠠ︖ ᠡᠭᠦᠨ ᠢ  ᠨᠢ ᠬᠠᠷᠢᠨ ᠤᠪᠠᠶᠢᠯᠠᠭᠰᠠᠨ ᠦᠭᠡᠢ᠃ ᠶᠠᠭᠤ ᠴᠦ ᠭᠡᠰᠡᠨ ᠴᠢ ᠳᠠᠷᠠᠭᠠᠴᠢ ᠪᠠᠷ ᠨᠠᠭᠠᠴᠤ ᠶᠢᠨ ᠳᠠᠭᠠᠨ ᠣᠴᠢᠪᠠᠯ ᠣᠯᠣᠭᠠᠳ ᠦᠵᠡᠴᠢᠬᠡᠨ᠎ᠡ ᠭᠡᠵᠦ ᠡᠵᠢ ᠬᠡᠯᠡᠨ᠎ᠡ᠃ ᠡᠵᠢ ᠠᠮᠠ ᠬᠠᠮᠬᠢᠯ ᠦᠭᠡᠢ ᠲᠡᠷᠡ ᠳ᠋ᠧᠩ ᠤᠨ ᠭᠠᠶᠢᠬᠠᠮᠰᠢᠭ ᠢ ᠱᠠᠭᠰᠢᠷᠠᠨ ᠪᠣᠷᠪᠢᠳᠠᠨ ᠳᠠᠭᠠᠵᠤ ᠤᠯᠠᠨ ᠳᠠᠭᠢᠨ ᠤᠬᠤᠴᠢᠯᠠᠵᠤ ᠠᠰᠠᠭᠤᠭᠰᠠᠨ ᠨᠠᠳᠠ ᠳᠤ ᠤᠬᠳᠤ ᠡᠭᠳᠡᠭᠦᠦ ᠬᠥᠳᠡᠯᠦᠭᠡ ᠦᠭᠡᠢ ᠪᠠᠶᠢᠵᠤ ᠪᠢᠯᠡ᠃      ᠡᠵᠢ ᠰᠡᠳᠬᠢᠯ ᠶᠡᠭᠡ ᠬᠥᠭᠰᠡᠵᠦ᠂ ᠬᠤᠵᠢᠮ ᠪᠢᠳᠡ ᠴᠦ ᠲᠡᠶᠢᠮᠤ ᠳ᠋ᠧᠩ ᠯᠠᠪ ᠠᠪᠤᠨ᠎ᠠ ᠭᠡᠵᠦ ᠬᠡᠯᠡᠪᠡ᠃      ᠲᠡᠭᠡᠭᠦᠯᠡᠷ ᠨᠢ ᠪᠢ ᠬᠡᠳᠦᠨ ᠰᠥᠨᠢ ᠳᠠᠷᠠᠭᠠᠯᠠᠨ ᠨᠣᠶᠢᠷ ᠬᠤᠯᠵᠢᠴᠢᠬᠠᠵᠤ ᠴᠣᠩᠬᠤ ᠪᠠᠷ ᠬᠤᠯᠠ ᠶᠢᠨ ᠰᠠᠷᠠ ᠶᠢ ᠰᠢᠷᠳᠡᠨ ᠬᠡᠪᠲᠡᠨ᠎ᠡ᠃ ᠲᠡᠷᠡ ᠳ᠋ᠧᠩ ᠤᠨ ᠭᠡᠷᠡᠯ ᠶᠠᠮᠠᠷᠬᠠᠨ ᠪᠠᠶᠢᠳᠠᠭ ᠪᠣᠯ︖ ᠣᠭᠲᠠᠷᠭᠤᠢ ᠶᠢᠨ ᠰᠠᠷᠠᠨ ᠤ ᠬᠢ ᠰᠢᠭ᠋ ᠠᠰᠬᠠᠷᠠᠭᠰᠠᠨ ᠴᠠᠭᠠᠨ ᠭᠡᠷᠡᠯ ᠲᠠᠢ ᠭᠡᠵᠢ ᠤᠤ︖ ᠪᠤᠳᠤᠬᠰᠠᠭᠠᠷ ᠪᠤᠳᠤᠬᠰᠠᠭᠠᠷ ᠰᠠᠷᠠᠨ ᠤ ᠬᠠᠰ ᠲᠠᠤᠯᠠᠢ ᠨᠢᠳᠦᠨ ᠳᠤ ᠬᠠᠷᠠᠭᠳᠠᠵᠤ ᠰᠡᠲᠡᠷᠬᠡᠢ ᠤᠷᠤᠭᠤᠯ ᠢᠶᠠᠷ ᠢᠶᠠᠨ ᠡᠪᠰᠢᠶᠡᠬᠦ ᠨᠢ ᠴᠦ ᠬᠠᠷᠠᠭᠳᠠᠨ᠎ᠠ᠃      ᠲᠡᠭᠦᠨ ᠠᠴᠠ ᠪᠠᠷᠤᠭ ᠰᠠᠷ᠎ᠠ ᠶᠢᠨ ᠳᠠᠷᠠᠭ᠎ᠠ ᠪᠢ ᠮᠠᠨ ᠤ ᠳᠤ ᠢᠷᠡᠭᠰᠡᠨ ᠨᠠᠭᠠᠴᠤ ᠠᠪᠤ ᠶᠢ ᠳᠠᠭᠠᠵᠤ ᠶᠠᠪᠤᠬᠤ ᠪᠠᠷ ᠳᠠᠭᠤ ᠲᠤᠬᠤ ᠪᠠᠨ ᠲᠠᠯᠪᠢᠯ᠎ᠠ᠂ ᠦᠬᠡᠷ ᠲᠡᠷᠭᠡᠨ ᠤ ᠬᠢᠨᠢ ᠡᠮᠦᠨ᠎ᠡ ᠲᠦᠷᠦᠭᠦᠯᠡᠭᠡᠳ ᠭᠦᠶᠦᠴᠢᠬᠡᠯ᠎ᠡ᠃      ᠨᠠᠭᠠᠴᠤ ᠠᠪᠤ ᠳᠠᠭᠠᠭᠤᠯᠵᠤ ᠠᠪᠠᠴᠢᠬᠤ ᠦᠭᠡᠢ ᠶᠤᠮ ᠭᠡᠨ᠎ᠡ᠃ ᠴᠢᠨᠦ ᠰᠤᠷᠭᠠᠭᠤᠯᠢ ᠴᠢᠨᠢ ᠬᠡᠳᠦᠨ ᠬᠤᠨᠤᠭ ᠠᠴᠠ ᠡᠬᠢᠯᠡᠴᠢᠬᠡᠨ᠎ᠡ᠂ ᠠᠵᠢᠯ ᠶᠠᠭᠠᠷᠠᠤ᠂ ᠪᠤᠴᠠᠭᠠᠭᠠᠳ ᠬᠦᠷᠭᠡᠵᠦ ᠢᠷᠡᠵᠤ ᠳᠡᠶᠢᠯᠭᠦ ᠦᠭᠡᠢ ᠭᠡᠨ᠎ᠡ᠃      ᠳᠡᠭᠦᠦ ᠨᠠᠷ ᠴᠦ ᠴᠥᠮ ᠨᠠᠭᠠᠴᠤ ᠶᠢᠨ ᠳᠤ ᠣᠴᠢᠬᠤ ᠪᠣᠯᠵᠤ ᠬᠤᠶᠢᠨ᠎ᠠ ᠠᠴᠠ ᠨᠢᠭᠡ ᠤᠯᠠᠨ ᠠᠩᠭᠠᠯᠵᠠᠭᠰᠠᠨ ᠠᠮᠠ ᠨᠤᠭᠤᠳ ᠤᠬᠢᠯᠠᠵᠠᠭᠠᠵᠤ ᠪᠠᠶᠢᠭᠰᠠᠨ᠃ ᠠᠪᠤ ᠴᠦ ᠠᠭᠰᠤᠮᠨᠠᠨ ᠵᠠᠩᠨᠠᠵᠤ ᠪᠠᠷᠤᠭ ᠯᠡ ᠨᠠᠮ᠎ᠠ ᠶᠢ ᠮᠣᠷᠢ ᠪᠠᠷ ᠲᠠᠭᠤᠵᠤ ᠡᠷᠭᠢᠭᠦᠯᠦᠮᠡᠷ ᠪᠠᠶᠢᠭᠰᠠᠨ᠃ ᠭᠡᠪᠡᠴᠦ ᠲᠡᠭᠡ ᠦᠭᠡᠢ᠃      ᠢᠩᠭᠢᠵᠦ ︽ᠲᠤᠯᠤᠭᠠᠨ ᠳᠠᠪᠠᠭ᠎ᠠ︾ ᠶᠢ ᠳᠠᠪᠠᠵᠤ ᠦᠬᠦᠨ ᠠᠯᠳᠠᠵᠤ ᠶᠠᠭᠤᠨ ᠤ ᠲᠥᠯᠥᠭᠡ ᠠᠵᠢ︖ ᠮᠥᠨ ᠲᠡᠷᠡ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ ᠢ ᠨᠢᠭᠡ ᠣᠯᠣᠭᠠᠳ ᠬᠠᠷᠠᠬᠤ ᠶᠢᠨ ᠲᠥᠯᠥᠭᠡ ᠶᠤᠮ ᠰᠢᠤ᠃ ᠠᠶ᠎ᠠ᠂ ᠰᠢᠯ ᠪᠦᠷᠬᠦᠭᠦᠯᠲᠦ ᠲᠤᠰᠤᠨ ᠳ᠋ᠧᠩ ᠶᠠᠭᠤᠲᠠᠢ ᠴᠦ ᠬᠦᠷᠦᠰᠢ ᠦᠭᠡᠢ ᠬᠤᠯᠠ ᠶᠢᠨ ᠵᠡᠭᠦᠳᠦ ᠮᠥᠷᠥᠭᠡᠳᠦᠯ ᠪᠣᠯᠵᠤ ᠪᠠᠶᠢᠭᠰᠠᠨ ᠠᠵᠢ᠃      ᠤᠤᠯ ᠨᠢ ᠪᠢ ᠡᠵᠢ ᠶᠢᠨ ᠶᠠᠷᠢᠭᠰᠠᠨ ᠢᠶᠠᠷ ᠳᠠᠮᠵᠢᠭᠤᠯᠵᠤ ᠬᠡᠴᠢᠨᠡᠭᠡᠨ ᠤᠯᠠᠨ ᠳᠠᠭᠢᠨ ᠲᠥᠰᠥᠪᠯᠡᠨ ᠪᠤᠳᠤᠬᠰᠠᠨ ᠴᠦ ︽ᠠᠮᠢᠳᠤ︾ ᠰᠢᠯ ᠪᠦᠷᠬᠦᠭᠦᠯ ᠢ ᠨᠢ ᠣᠶᠢᠷᠠᠲᠤᠭᠤᠯᠵᠤ ᠴᠦ ᠴᠢᠳᠠᠭ᠎ᠠ ᠦᠭᠡᠢ ᠪᠠᠶᠢᠭᠰᠠᠨ ᠪᠠᠶᠢᠵᠠᠢ᠃ ᠪᠦᠭᠭᠦᠭᠦᠷ ᠢ ᠨᠢ ᠵᠢᠭᠠᠬᠠᠨ ᠬᠤᠮᠢᠮᠠᠭᠴᠠ ᠳ᠋ᠧᠩ ᠤᠨ ᠭᠤᠣᠯ ᠢ ᠡᠮᠬᠦᠵᠦ ᠠᠪᠤᠭᠠᠳ ᠳ᠋ᠧᠩ ᠤᠨᠲᠠᠷᠠᠳᠠᠭ ᠠᠵᠢ᠃ ᠪᠠᠰᠠ ᠲᠡᠷᠡ ᠳᠡᠯᠪᠡᠭᠡᠷ ᠴᠠᠭᠠᠨ ᠮᠠᠯᠠᠭᠠᠢ ᠨᠢ᠂ ᠴᠠᠭᠳᠠᠭ᠎ᠠ ᠬᠥᠮᠥᠨ ᠢ ᠰᠠᠨᠠᠭᠳᠠᠭᠤᠯᠤᠨ᠎ᠠ᠃      ᠠᠮᠠ ᠨᠢ ᠠᠩᠭᠠᠶᠢᠭᠠᠳ ᠤᠳᠠᠲᠠᠯ᠎ᠠ ᠦᠭᠡ ᠳᠤᠤᠭᠠᠷᠴᠤ ᠴᠢᠳᠠᠭ᠎ᠠ ᠦᠭᠡᠢ ᠭᠡᠵᠦ ᠨᠠᠭᠠᠴᠤ ᠡᠮᠡᠭᠡ ᠬᠤᠵᠢᠮ ᠨᠢ ᠮᠢᠨᠤ ᠪᠦᠷᠬᠦᠭᠦᠯᠲᠦ ᠳ᠋ᠧᠩ ᠠᠩᠬ᠎ᠠ ᠬᠠᠷᠠᠭᠰᠠᠨ ᠪᠠᠶᠢᠳᠠᠯ ᠢ ᠡᠵᠢ ᠳᠤ ᠬᠡᠯᠡᠵᠦ ᠥᠭᠴᠦ ᠪᠠᠶᠢᠭᠰᠠᠨ ᠶᠤᠮ᠃      ᠨᠠᠭᠠᠴᠤ ᠶᠢᠨ ᠬᠢᠨ ᠲᠡᠷᠡ ᠳ᠋ᠧᠩ ᠢᠶᠠᠨ ᠭᠡᠷ ᠤᠨ ᠢᠶᠠᠨ ᠣᠷᠣᠢ ᠠᠴᠠ ᠳᠡᠭᠦᠵᠢᠯᠡᠵᠡᠢ᠃ ᠠᠢ᠂ ᠡᠨᠡ ᠰᠢᠯ ᠪᠦᠷᠬᠦᠭᠦᠯᠲᠦ ᠳ᠋ᠧᠩ ᠦᠨᠡᠬᠡᠷ ᠴᠦ ︽ᠲᠡᠭᠷᠢ ᠶᠢᠨ ᠶᠠᠭᠤᠮ᠎ᠠ︾ ᠠᠵᠢ᠃ ᠨᠠᠭᠠᠴᠤ ᠡᠵᠢ ᠬᠠᠨᠵᠤᠨ ᠳᠡᠭᠡᠷ᠎ᠡ ᠪᠠᠨ ᠭᠠᠷᠴᠤ ᠳ᠋ᠧᠩ ᠢ ᠠᠰᠠᠭᠠᠵᠤ ᠤᠨᠲᠠᠷᠠᠭᠠᠳᠠᠭ ᠢ ᠭᠠᠷᠭᠠᠪᠠᠯ ᠥᠭᠡᠷ᠎ᠡ ᠬᠥᠮᠥᠨ ᠤ ᠭᠠᠷ ᠬᠦᠷᠴᠦ ᠳᠡᠶᠢᠯᠭᠦ ᠦᠭᠡᠢ᠃ ᠰᠢᠯ ᠢ ᠨᠢ᠂ ᠲᠡᠷᠡ ᠪᠦᠷᠬᠦᠭᠦᠯ ᠰᠢᠯ ᠢ ᠨᠢ ᠨᠢᠭᠡ ᠲᠡᠮᠲᠡᠷᠢᠭᠡᠳ ᠦᠵᠡᠬᠦ ᠰᠠᠨ ᠭᠡᠵᠦ ᠬᠡᠴᠢᠨᠡᠭᠡᠨ ᠪᠤᠳᠤᠵᠤ᠂ ᠭᠡᠳᠤ ᠤᠳᠠᠭ᠎ᠠ ᠨᠠᠭᠠᠴᠤ ᠡᠮᠡᠭᠡ ᠳᠤ ᠬᠡᠯᠡᠬᠦ ᠠᠯᠳᠠᠵᠤ ᠭᠡᠯᠡ ᠲᠠᠩᠨᠠᠢ ᠬᠤᠶᠠᠷ ᠨᠡᠶᠢᠯᠡᠭᠡᠳ ᠪᠦᠷ ᠴᠢᠳᠠᠭ᠎ᠠ ᠦᠭᠡᠢ᠃ ᠠᠶᠢᠯ ᠳᠤ ᠣᠴᠢᠪᠠᠯ ᠬᠥᠮᠥᠨ ᠤ ᠶᠠᠭᠤᠮᠠᠨ ᠳᠤ ᠳᠤᠷ᠎ᠠ ᠪᠠᠷ ᠭᠠᠷ ᠬᠦᠷᠬᠦ ᠶᠢ ᠡᠵᠢ ᠳᠠᠰᠤ ᠴᠡᠭᠡᠷᠯᠡᠭᠦᠯᠳᠡᠭ ᠠᠴᠠ ᠪᠣᠯᠤᠭᠰᠠᠨ ᠶᠤᠮ᠃      ᠲᠡᠭᠦᠨ ᠠᠴᠠ ᠰᠡᠭᠦᠯᠡᠷ ᠮᠠᠨ ᠤ ᠤᠰᠤᠨ ᠤ ᠬᠢᠨ ᠳᠤ ᠴᠦ ᠲᠡᠶᠢᠮᠤ ᠳ᠋ᠧᠩ ᠨᠢᠭᠡ ᠬᠤᠶᠠᠷ ᠬᠠᠷᠠᠭᠳᠠᠬᠤ ᠪᠣᠯᠣᠯ᠎ᠠ᠃ ᠮᠢᠨᠤ ᠲᠡᠷᠡ ᠪᠠᠭ᠋ᠠᠷᠬᠠᠵᠤ ᠲᠡᠷᠡ ᠠᠲᠠᠭᠠᠷᠬᠠᠨ᠎ᠠ ᠭᠡᠭᠴᠢ ᠠ᠋᠃      ᠬᠤᠵᠢᠮ ᠲᠡᠶᠢᠮᠤ ᠳ᠋ᠧᠩ ᠲᠠᠢ ᠪᠣᠯᠣᠨ᠎ᠠ ᠭᠡᠵᠦ ᠡᠵᠢ ᠶᠢᠨ ᠬᠡᠯᠡᠭᠰᠡᠨ ᠦᠭᠡ ᠯᠡ ᠥᠪᠡᠷ ᠢ ᠮᠢᠨᠢ ᠲᠠᠶᠢᠳᠬᠤᠷᠠᠭᠤᠯᠵᠤ ᠲᠡᠷᠡ ︽ᠬᠤᠵᠢᠮ︾ ᠢ ᠪᠢ ᠦᠨᠡᠬᠡᠷ ᠴᠦ ᠬᠦᠰᠡᠯ᠎ᠡ᠃      ᠪᠦᠷᠬᠦᠭᠦᠯ ᠳ᠋ᠧᠩ ᠢ ᠮᠠᠨ ᠤ ᠬᠢ ᠠᠪᠴᠤ ᠴᠢᠳᠠᠭ᠎ᠠ ᠦᠭᠡᠢ᠃ ᠶᠠᠭ ᠵᠣᠭᠤᠰ ᠣᠯᠣᠭᠠᠳ ᠠᠪᠤᠶ᠎ᠠ ᠭᠡᠲᠡᠯ᠎ᠡ ᠥᠭᠡᠷ᠎ᠡ ᠵᠠᠷᠤᠳᠠᠯ ᠪᠠᠷᠢᠳᠠᠯ ᠭᠠᠷᠤᠭᠠᠳ ᠯᠡ ᠪᠠᠶᠢᠨ᠎ᠠ ᠭᠡᠵᠦ ᠡᠵᠢ ᠬᠡᠯᠡᠨ᠎ᠡ᠃ ᠦᠨᠡᠨ ᠳᠡᠭᠡᠨ ᠡᠵᠢ ᠰᠠᠷ᠎ᠠ ᠳᠠᠭᠠᠨ ᠵᠢᠯ ᠳᠡᠭᠡᠨ ᠨᠢᠭᠡ ᠬᠤᠶᠠᠷ ᠤᠳᠠᠭ᠎ᠠ ᠲᠥᠷᠬᠦᠮ ᠳᠡᠭᠡᠨ ᠣᠴᠢᠳᠠᠭ ᠢ ᠭᠠᠷᠭᠠᠪᠠᠯ ᠰᠤᠮᠤᠨ ᠤ ᠬᠤᠷᠰᠢᠶᠠᠨ ᠳᠤ ᠣᠴᠢᠬᠤ ᠶᠢ ᠪᠤᠤ ᠭᠡᠯᠡ᠃ ᠬᠤᠳᠳᠤᠭ᠂ ᠦᠨᠢᠶᠡᠨ ᠵᠡᠯ᠎ᠡ ᠠᠴᠠ ᠪᠠᠨ ᠴᠠᠭᠠᠰᠢ ᠬᠤᠯᠠᠳᠠᠵᠤ ᠦᠵᠡᠭᠡ ᠦᠭᠡᠢ ᠬᠥᠮᠥᠨ᠃ ᠲᠡᠶᠢᠮᠤ ᠳ᠋ᠧᠩ ᠢ ᠣᠯᠣᠭᠠᠳ ᠠᠪᠴᠢᠬᠠᠨ᠎ᠠ ᠭᠡᠳᠡᠭ ᠴᠦ ᠵᠡᠭᠦᠳᠦ ᠯᠡ ᠪᠢᠵᠡ ᠳ᠋ᠠ᠃      ᠬᠤᠵᠢᠮ ᠨᠢ ᠡᠵᠢ ᠬᠠᠮᠢᠭ᠎ᠠ ᠠᠴᠠ ᠴᠦ ᠶᠤᠮ᠂ ᠪᠤᠳᠤᠪᠠᠯ ᠬᠥᠮᠥᠨ ᠤ ᠬᠡᠷᠡᠭᠯᠡᠬᠦ ᠪᠠᠨ ᠪᠣᠯᠢᠭᠠᠳ ᠭᠤᠯᠣᠭᠠᠳ ᠬᠠᠶᠠᠭᠰᠠᠨ ᠨᠢ ᠪᠠᠶᠢᠯᠭᠦᠢ᠂ ᠨᠢᠭᠡ ᠰᠢᠯ ᠪᠦᠷᠬᠦᠭᠦᠯ ᠦᠭᠡᠢ᠂ ᠲᠣᠰᠣ ᠭᠦ᠋ ᠲᠠᠢ᠂ ᠳ᠋ᠧᠩ ᠤᠨ ᠪᠦᠭᠭᠦᠭᠦᠷ ᠰᠠᠭᠤᠷᠢ ᠲᠠᠢ ᠯᠣᠩᠬᠤ ᠶᠢ ᠨᠢ ᠣᠯᠵᠠᠢ᠃ ᠡᠷᠳᠡᠨᠢ ᠣᠯᠣᠭᠰᠠᠨ ᠮᠡᠲᠦ ᠲᠡᠭᠦᠨ ᠢ ᠭᠠᠳᠠᠨ᠎ᠠ ᠲᠠᠰᠤᠯᠭᠠᠨ ᠤ ᠬᠤᠶᠢᠲᠤ ᠬᠠᠶᠠᠭᠠᠨ ᠳᠡᠭᠡᠷ᠎ᠡ ᠡᠯᠭᠦᠵᠦ ᠲᠠᠯᠪᠢᠯ᠎ᠠ᠃      — ᠤᠳᠤ ᠰᠢᠯ ᠪᠦᠷᠬᠦᠭᠦᠯ ᠢ ᠨᠢ ᠣᠯᠣᠮᠠᠭᠴᠠ ᠮᠠᠨᠤᠰ ᠳ᠋ᠧᠩ ᠲᠠᠢ ᠪᠣᠯᠴᠢᠬᠠᠨ᠎ᠠ ᠭᠡᠵᠦ ᠡᠵᠢ ᠡᠶᠢᠮᠦ ᠨᠢᠭᠡ ᠳ᠋ᠧᠩ ᠤᠨ ᠬᠠᠭᠠᠰ ᠢ ᠣᠯᠣᠭᠠᠳ ᠮᠠᠰᠢ ᠤᠷᠮ᠎ᠠ ᠲᠠᠢ ᠶᠠᠷᠢᠵᠤ ᠪᠢᠯᠡ᠃      ᠳ᠋ᠧᠩ ᠤᠨ ᠪᠦᠭᠭᠦᠭᠦᠷ ᠰᠠᠭᠤᠷᠢ ᠬᠠᠶᠠᠭᠠᠨ ᠳᠤ ᠡᠯᠭᠦᠭᠳᠡᠭᠰᠡᠭᠡᠷ᠃ ᠨᠢᠭᠡ ᠮᠡᠳᠡᠬᠦ ᠳᠤ ᠯᠡ ᠲᠣᠭᠤᠰᠣᠨ ᠳᠤ ᠳᠠᠷᠤᠭᠳᠠᠴᠢᠬᠠᠭᠰᠠᠨ ᠪᠤᠯᠪᠠᠴᠤ ᠮᠥᠨ ᠡᠯᠭᠦᠭᠳᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃      ᠬᠤᠵᠢᠮ ᠨᠢ ᠲᠤᠰᠤᠨ ᠳ᠋ᠧᠩ ᠠᠴᠠ ︽ᠯᠠ︾ ᠬᠡᠷᠡᠭᠯᠡᠬᠦ ᠪᠣᠯᠵᠤ ᠲᠡᠭᠦᠨ ᠤ ᠭᠡᠷᠡᠯ ᠭᠡᠭᠡ ᠶᠢ ᠬᠡᠯᠡᠬᠦ ᠤᠤ᠂ ᠥᠷᠥᠭᠡ ᠭᠡᠷ ᠢ ᠡᠳᠦᠷ ᠮᠡᠲᠦ ᠳᠤᠸᠠᠯᠠᠭᠤᠯᠵᠤ ᠥᠭᠭᠦᠯ᠎ᠡ᠂ ᠪᠠᠰᠠ ᠶᠡᠭᠡ ᠯᠡ ᠡᠷᠬᠡ ᠳᠠᠩᠭᠢ᠂ ᠤᠷᠤᠰᠤᠩᠭᠢ᠂ ᠤᠬᠢᠯᠠᠩᠬᠠᠢ ᠶᠠᠭᠤᠮ᠎ᠠ ᠰᠢᠤ᠃ ᠳᠠᠭᠢᠭᠠᠳ ᠶᠢᠷᠲᠢᠨᠴᠦ ᠪᠠᠷ ᠢᠶᠠᠨ ᠴᠠᠭᠢᠯᠭᠠᠨ ᠳ᠋ᠧᠩ ᠪᠣᠯᠴᠢᠬᠠᠯ᠎ᠠ᠃ ᠠᠰ ᠬᠠᠷᠠᠬᠤ ᠠᠴᠠ ᠨᠢᠳᠦ ᠳᠠᠯᠳᠢᠷᠠᠭᠤᠯᠳᠠᠭ ᠬᠤᠷᠴᠠ ᠲᠤᠬᠰᠢᠨ ᠭᠡᠷᠡᠯ ᠤᠨ ᠳᠤᠮᠳᠠ ᠶᠢᠷᠲᠢᠨᠴᠦ ᠪᠠᠷ ᠢᠶᠠᠨ ᠱᠤᠮᠪᠠᠯ᠎ᠠ᠃      ᠬᠠᠷᠢᠨ ᠬᠡᠳᠦᠢ ᠳᠤᠨᠢ ᠬᠠᠶᠠᠭᠠᠨ ᠳᠡᠭᠡᠷ᠎ᠡ ᠡᠯᠭᠦᠵᠦ ᠪᠠᠶᠢᠭᠰᠠᠨ ᠲᠤᠰᠤᠨ ᠳ᠋ᠧᠩ ᠬᠠᠷᠠᠭᠳᠠᠬᠤ ᠪᠠᠨ ᠪᠠᠶᠢᠭᠰᠠᠨ ᠢ ᠪᠤᠤ ᠮᠡᠳᠡ᠃ ᠰᠢᠯ ᠪᠦᠷᠬᠦᠭᠦᠯ ᠣᠯᠳᠠᠬᠤ ᠶᠢ ᠬᠦᠯᠢᠶᠡᠭᠰᠡᠭᠡᠷ ᠯᠡ ᠪᠠᠶᠢᠵᠤ ᠬᠠᠷᠢᠨ ᠤᠳᠤ ᠲᠤᠰᠤᠨ ᠳ᠋ᠧᠩ ᠢ ᠬᠡᠷᠡᠭᠯᠡᠬᠦ ᠦᠭᠡᠢ᠂ ᠲᠤᠰᠤᠨ ᠳ᠋ᠧᠩ ᠢ ᠲᠠᠨᠢᠬᠤ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠡᠷᠢᠨ ᠴᠠᠭ ᠢ ᠬᠦᠯᠢᠶᠡᠵᠦ ᠠᠪᠴᠢᠷᠠᠵᠠᠢ ᠠ᠋᠂ᠮᠢᠨᠤ ᠡᠵᠢ᠃      ᠪᠢ ᠲᠡᠷᠡ ᠳ᠋ᠧᠩ ᠳᠤ ᠳᠠᠭᠲᠤᠷᠰᠢᠲᠠᠯ᠎ᠠ ᠰᠠᠭᠤᠭᠰᠠᠨ ᠣᠨ ᠵᠢᠯ ᠤᠨ ᠲᠣᠭᠤᠰᠣ ᠲᠣᠷᠳᠤᠭ ᠢ ᠨᠢ ᠵᠦᠯᠭᠦᠵᠦ ᠠᠷᠴᠢᠪᠠ᠃ ᠬᠠᠳᠠᠭᠠᠯᠠᠵᠤ ᠪᠠᠶᠢᠶ᠎ᠠ᠃ ᠳᠠᠭᠢᠭᠠᠳ ᠬᠤᠷᠢᠨ ᠵᠢᠯ ᠤᠨ ᠳᠠᠷᠠᠭᠠᠬᠢ ᠬᠡᠦᠬᠡᠳ ᠬᠠᠷᠠᠭᠠᠳ ᠶᠠᠭᠤ ᠭᠡᠵᠦ ᠬᠡᠯᠡᠳᠡᠭ ᠪᠣᠯ︖ ᠭᠡᠵᠦ ᠬᠤᠶᠠᠷ ᠠᠴᠢ ᠬᠡᠦᠬᠡᠳ ᠢᠶᠠᠨ ᠬᠠᠷᠠᠵᠤ ᠰᠡᠮᠡᠭᠡᠷ ᠢᠨᠢᠶᠡᠪᠡ᠃
ᠢᠷᠡᠯᠲᠡ᠄ ᠲᠥᠩᠯᠢᠶᠣᠣ ᠮᠣᠩᠭᠤᠯ ᠰᠦᠯᠵᠢᠶ᠎ᠡ