ᠬᠤᠷᠴᠢᠨ ᠳᠡᠪᠡᠯ ᠲᠡᠷᠯᠢᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/3/12
      ᠬᠤᠷᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠳᠡᠪᠡᠯ ᠵᠠᠰᠠᠯ ᠨᠢ ᠮᠠᠯᠠᠭᠠᠢ᠂ ᠪᠦᠰᠡ᠂ ᠬᠤᠪᠴᠠᠰᠤ ᠬᠡᠷᠡᠭᠯᠡᠯ ᠳᠡᠭᠡᠨ ᠶᠡᠬᠡᠳᠡ ᠬᠦᠨᠳᠦᠳᠬᠡᠯ ᠲᠠᠢ ᠬᠠᠨᠳᠤᠳᠠᠭ᠃ ᠡᠳᠡᠭᠡᠷ ᠵᠠᠩ ᠦᠢᠯᠡ ᠶᠢ ᠪᠦᠭᠡ ᠮᠥᠷᠭᠦᠯ ᠤᠨ ᠶᠣᠰᠣ ᠮᠠᠶ᠋ᠢᠭ ᠲᠠᠢ ᠬᠤᠯᠪᠣᠨ ᠲᠠᠶᠢᠯᠪᠤᠷᠢᠯᠠᠬᠤ ᠨᠢ ᠪᠤᠢ᠃      ᠬᠤᠷᠴᠢᠨ ᠲᠡᠷᠯᠢᠭ ᠳᠡᠪᠡᠯ ᠤᠨ ᠪᠦᠲᠦᠴᠡ ᠪᠦᠷᠢᠯᠳᠦᠭᠦᠨ      ᠪᠦᠰᠡ      ᠮᠣᠩᠭᠤᠯ ᠬᠥᠮᠥᠨ ᠪᠦᠰᠡ ᠶᠢ ᠵᠠᠳᠠᠭᠠᠢ ᠲᠠᠰᠤᠷᠬᠠᠢ ᠶᠢ ᠪᠠᠬᠢᠯᠡᠨ ᠪᠠᠲᠤᠵᠢᠭᠤᠯᠬᠤ᠂ ᠰᠠᠷᠨᠢᠭᠰᠠᠨ ᠢ ᠡᠪᠯᠡᠭᠦᠯᠬᠦ ᠶᠢᠨ ᠪᠡᠯᠭᠡᠳᠡᠯ ᠬᠡᠮᠡᠨ ᠡᠷᠭᠢᠮᠯᠡᠳᠡᠭ ᠠᠵᠢ᠃ ᠲᠡᠪᠠᠯ ᠤᠨ ᠪᠦᠰᠡ ᠪᠣᠯ ᠡᠷ᠎ᠡ ᠬᠥᠮᠥᠨ ᠤ ᠬᠡᠶᠢᠮᠣᠷᠢ ᠯᠤᠩᠳᠠᠭ᠎ᠠ ᠶᠢ ᠢᠯᠡᠳᠬᠡᠬᠦ ᠠᠴᠠ ᠭᠠᠳᠠᠨ᠎ᠠ ᠪᠤᠶᠠᠨ ᠬᠤᠷᠢᠶᠠᠬᠤ ᠶᠢᠨ ᠪᠡᠯᠭᠡᠳᠡᠯ ᠲᠠᠢ᠂ ᠮᠥᠨ ᠤᠯᠤᠰ ᠭᠦᠷᠦᠨ ᠢ ᠪᠤᠳᠠᠷᠠᠭᠠᠬᠤ ᠦᠭᠡᠢ ᠰᠠᠷᠨᠢᠭᠤᠯᠬᠤ ᠦᠭᠡᠢ ᠪᠠᠷᠢᠵᠤ ᠪᠠᠶᠢᠨ᠎ᠠ ᠭᠡᠰᠡᠨ ᠰᠠᠨᠠᠭ᠎ᠠ ᠶᠢ ᠢᠯᠡᠷᠬᠡᠶᠢᠯᠡᠳᠡᠭ᠃      ᠪᠦᠰᠡ ᠨᠢ ᠤᠭ ᠰᠤᠷᠪᠤᠯᠵᠢ ᠪᠠᠷ ᠢᠶᠠᠨ ᠪᠥᠰ ᠮᠥᠨ ᠭᠡᠯᠴᠡᠳᠡᠭ ᠨᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠦᠨᠡᠨ ᠶᠤᠮ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ᠂ ᠬᠤᠵᠢᠭᠤ ᠦᠶ᠎ᠡ ᠪᠥᠰ ᠳᠠᠪᠤᠤ ᠶᠢ ᠪᠦᠰᠡᠯᠡᠬᠦ ᠪᠣᠯᠤᠭᠰᠠᠨ ᠠᠴᠠ ᠲᠡᠭᠦᠨ ᠢ ᠵᠢᠭᠠᠵᠤ ᠬᠡᠯᠡᠭᠰᠡᠨ ᠬᠡᠷᠡᠭ᠃ ᠮᠣᠩᠭᠤᠯᠴᠤᠳ ᠡᠷᠲᠡᠨ ᠠᠴᠠ ᠰᠤᠷ᠂ ᠰᠢᠷᠢ ᠵᠡᠷᠭᠡ ᠶᠢ ᠰᠠᠶᠢᠲᠤᠷ ᠪᠣᠯᠪᠠᠰᠤᠷᠠᠭᠤᠯᠤᠭᠠᠳ ᠠᠭᠰᠠᠷᠭ᠎ᠠ ︵ᠪᠦᠰᠡ︶ ᠭᠡᠵᠦ ᠨᠡᠷᠡᠯᠡᠳᠡᠭ ᠪᠠᠶᠢᠵᠠᠢ᠃ ᠠᠭᠰᠠᠷᠭ᠎ᠠ ᠨᠢ ᠳᠣᠷᠣᠭᠰᠢ ᠤᠨᠵᠢᠭᠰᠠᠨ ᠰᠠᠴᠤᠭ ᠭᠠᠷᠠᠬᠳᠤ ᠰᠤᠷ ᠵᠡᠷᠭᠡ ᠴᠢᠮᠡᠭ ᠲᠠᠢ ᠂ ᠲᠡᠭᠦᠪᠡᠷ ᠢᠶᠠᠨ ᠠᠭᠰᠠᠭᠰᠠᠨ ᠰᠡᠯᠡᠮ᠎ᠡ᠂ ᠰᠠᠭᠠᠳᠠᠭ ᠵᠡᠷᠭᠡ ᠶᠢ ᠲᠣᠭᠲᠠᠭᠠᠳᠠᠭ ᠪᠠᠶᠢᠭᠰᠠᠨ ᠠᠴᠠ ᠡᠷ᠎ᠡ ᠬᠥᠮᠥᠨ ᠤ ᠠᠮᠢ ᠨᠠᠰᠤ ᠶᠢ ᠬᠠᠮᠠᠭᠠᠯᠠᠬᠤ ᠡᠷᠬᠢᠮ ᠡᠳ᠋ᠯᠡᠯ ᠭᠡᠵᠦ ᠦᠵᠡᠳᠡᠭ ᠴᠢᠬᠤᠯᠠ ᠬᠡᠷᠡᠭᠰᠡᠯ ᠶᠤᠮ᠃ ᠬᠤᠵᠢᠮ ᠳᠠᠪᠤᠤ ᠶᠢᠨ ᠪᠥᠰ ᠢ ᠠᠪᠴᠤ ᠬᠡᠷᠡᠭᠯᠡᠬᠦ ᠳᠡᠭᠡᠨ ᠪᠡᠶ᠎ᠡ ᠪᠠᠨ ᠭᠤᠷᠪᠠ ᠣᠷᠢᠶᠠᠵᠤ ᠬᠦᠷᠬᠦ ᠪᠥᠰ ᠢᠶᠠᠷ ᠪᠡᠶ᠎ᠡ ᠪᠠᠨ ᠨᠠᠷᠠ ᠵᠥᠪ ᠣᠷᠢᠶᠠᠵᠤ ᠪᠦᠰᠡᠯᠡᠳᠡᠭ ᠨᠢ ᠭᠤᠷᠪᠠ ᠶᠢᠨ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠲᠠᠢ ᠪᠦᠭᠡ ᠶᠢᠨ ᠶᠣᠰᠣ ᠲᠠᠢ ᠮᠠᠰᠢ ᠬᠤᠯᠪᠤᠭ᠎ᠠ ᠲᠠᠢ ᠠᠵᠢ᠃ ᠪᠦᠰᠡ ᠶᠢ ᠪᠦᠰᠡᠯᠡᠬᠦ ᠳᠡᠭᠡᠨ ᠢᠮᠠᠭᠲᠠ ᠨᠠᠷᠠ ᠵᠥᠪ ᠨᠢᠭᠡ ᠡᠷᠭᠢᠭᠦᠯᠦᠨ ᠦᠵᠦᠭᠦᠷ ᠢ ᠨᠢ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳᠠᠭᠠᠨ ᠬᠠᠪᠴᠢᠭᠤᠯᠤᠨ᠎ᠠ᠃ ᠮᠣᠩᠭᠤᠯ ᠬᠥᠮᠥᠨ ᠪᠦᠰᠡᠨ ᠳᠡᠭᠡᠷ᠎ᠡ ᠪᠠᠨ ᠭᠢᠰᠬᠢᠬᠦ ᠦᠭᠡᠢ᠂ ᠳᠡᠭᠡᠭᠦᠷ ᠨᠢ ᠠᠯᠬᠤᠬᠤ ᠴᠤ ᠶᠣᠰᠣ ᠦᠭᠡᠢ᠃ ᠰᠥᠨᠢ ᠤᠨᠲᠠᠬᠤ ᠳᠠᠭᠠᠨ ᠪᠦᠰᠡ ᠪᠠᠨ ᠲᠠᠶᠢᠯᠵᠤ᠂ ᠠᠮᠠᠨ ᠬᠦᠵᠦᠭᠦᠦ ᠵᠠᠩᠭᠢᠯᠠᠭ᠎ᠠ ᠪᠠᠷ ᠵᠠᠩᠭᠢᠳᠴᠤ᠂ ᠳᠡᠷ᠎ᠡ ᠶᠢᠨ ᠳᠡᠭᠡᠳᠦ ᠬᠠᠪᠢ ᠳᠤ ᠲᠠᠯᠪᠢᠳᠠᠭ ᠵᠠᠩᠰᠢᠯ ᠲᠠᠢ᠃ ᠮᠥᠨ ᠪᠦᠰᠡ ᠪᠠᠨ ᠥᠭᠡᠷ᠎ᠡ ᠬᠥᠮᠥᠨ ᠲᠠᠢ ᠰᠣᠯᠢᠬᠤ ᠦᠭᠡᠢ᠂ ᠬᠠᠷᠢᠨ ᠬᠠᠷ᠎ᠠ ᠡᠯᠢᠭᠡ ᠶᠢᠨ ᠬᠥᠮᠥᠨ ᠲᠠᠢ ᠠᠨᠳᠠ ᠪᠣᠯᠣᠯᠴᠠᠬᠤ᠂ ᠬᠦᠵᠢ ᠪᠠᠷᠢᠯᠳᠤᠬᠤ ᠶᠣᠰᠣ ᠭᠦᠢᠴᠡᠳᠬᠡᠬᠦ ᠦᠶ᠎ᠡ ᠳᠤ ᠪᠡᠶ᠎ᠡ ᠪᠡᠶ᠎ᠡ ᠪᠠᠨ ᠢᠲᠡᠭᠡᠵᠦ ᠪᠤᠢ ᠶᠢᠨ ᠲᠡᠮᠳᠡᠭ ᠪᠣᠯᠭᠠᠨ ᠰᠣᠯᠢᠵᠤ ᠪᠦᠰᠡᠯᠡᠳᠡᠭ ᠵᠠᠩᠰᠢᠯ ᠪᠤᠢ᠃      ᠲᠡᠪᠠᠯ      ᠡᠶᠢᠨ ᠬᠦ ᠨᠡᠷᠡᠯᠡᠳᠡᠭ ᠨᠢ ᠬᠥᠮᠥᠨ ᠤ ᠪᠡᠶ᠎ᠡ ᠶᠢ ᠲᠥᠪ ᠰᠢᠯᠤᠭᠤᠨ᠂ ᠲᠡᠭᠰᠢ ᠨᠠᠮᠪᠠᠭ᠎ᠠ ᠲᠠᠢ ᠪᠠᠶᠢᠬᠤ ᠶᠢ ᠢᠷᠦᠭᠡᠵᠦ ᠪᠤᠢ ᠤᠳᠬ᠎ᠠ ᠶᠤᠮ᠃ ᠮᠣᠩᠭᠤᠯ ᠲᠡᠪᠠᠯ ᠨᠢ ᠠᠯᠢ ᠨᠢᠭᠡ ᠲᠡᠶᠢᠰᠢ ᠳᠠᠷᠤᠵᠤ ᠪᠦᠰᠡᠯᠡᠳᠡᠭ ᠲᠠᠰᠢᠭᠤ ᠪᠣᠯᠣᠨ ᠳᠥᠷᠪᠡᠯᠵᠢᠨ ᠡᠩᠭᠡᠷ᠂ ᠬᠤᠶᠠᠷ ᠲᠠᠰᠢᠶ᠎ᠠ ᠪᠦᠬᠦᠢ ᠡᠬᠢ ᠪᠡᠶ᠎ᠡ ᠲᠠᠢ ᠳᠣᠲᠣᠭᠤᠷ ᠭᠠᠳᠠᠭᠤᠷ ᠡᠩᠭᠡᠷ ᠲᠠᠢ ᠶᠢ ᠦᠵᠡᠪᠡᠯ ᠮᠣᠩᠭᠤᠯ ᠬᠤᠪᠴᠠᠰᠤ ᠪᠠᠯᠠᠷ ᠡᠷᠲᠡᠨ ᠠᠴᠠ ᠡᠭᠦᠰᠴᠡᠢ᠃ ᠲᠡᠪᠠᠯ ᠢ ᠠᠩᠬᠠᠯᠠᠨ ᠵᠣᠬᠢᠶᠠᠬᠤ ᠳᠠᠭᠠᠨ ᠨᠡᠭᠦᠳᠡᠯᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠪᠡᠶ᠎ᠡ ᠂ ᠡᠷᠡᠭᠦᠯ ᠮᠠᠨᠳᠤ ᠶᠢᠨ ᠣᠨᠴᠠᠯᠢᠭ ᠬᠢᠭᠡᠳ ᠪᠠᠶᠢᠭᠠᠯᠢ ᠴᠠᠭ ᠠᠭᠤᠷ ᠤᠨ ᠪᠠᠶᠢᠳᠠᠯ ᠳᠤ ᠲᠠᠰᠤᠨ ᠵᠣᠬᠢᠴᠠᠵᠤ ᠢᠷᠡᠭᠰᠡᠨ ᠲᠠᠳᠠᠨ ᠤ ᠡᠳᠦᠷ ᠲᠤᠳᠤᠮ ᠤᠨ ᠠᠮᠢᠳᠤᠷᠠᠯ ᠤᠨ ᠬᠡᠪ ᠮᠠᠶ᠋ᠢᠭ ᠲᠤ ᠨᠡᠶᠢᠴᠡᠭᠦᠯᠦᠨ ᠪᠤᠳᠤᠵᠤ ᠬᠢᠵᠡᠢ᠃ ᠮᠣᠩᠭᠤᠯ ᠲᠡᠪᠠᠯ ᠨᠢ ᠡᠮᠦᠰᠬᠡᠯ ᠬᠤᠪᠴᠠᠰᠤ ᠪᠤᠯᠬᠤ ᠠᠴᠠ ᠭᠠᠳᠠᠨ᠎ᠠ ᠪᠤᠰᠤᠳ ᠤᠯᠠᠨ ᠶᠠᠩᠵᠤ ᠶᠢᠨ ᠵᠣᠷᠢᠯᠲᠠ ᠪᠠᠷ ᠠᠰᠢᠭᠯᠠᠭᠳᠠᠳᠠᠭ ᠢᠶᠠᠷ ᠢᠶᠠᠨ ᠣᠨᠴᠠᠯᠢᠭ ᠲᠠᠢ᠃ ᠲᠤᠬᠠᠶᠢᠯᠠᠪᠠᠯ᠂ ᠨᠢᠳᠤᠷᠭ᠎ᠠ ᠨᠢ ᠵᠢᠷᠭᠡᠪᠴᠢ᠂ ᠪᠡᠭᠡᠯᠡᠢ ᠶᠢᠨ ᠡᠭᠦᠷᠭᠡ ᠭᠦᠢᠴᠡᠳᠬᠡᠳᠡᠭ ᠪᠣᠯ ᠥᠷᠭᠡᠨ ᠪᠦᠰᠡ ᠶᠢ ᠤᠭᠤᠴᠠ ᠨᠢᠷᠤᠭᠤ᠂ ᠪᠥᠭᠡᠷ᠎ᠡ ᠶᠢ ᠬᠠᠮᠠᠭᠠᠯᠠᠬᠤ ᠵᠣᠷᠢᠯᠭ᠎ᠠ ᠪᠠᠷ ᠪᠦᠰᠡᠯᠡᠳᠡᠭ ᠪᠠᠶᠢᠨ᠎ᠠ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠲᠠᠪᠠᠯ ᠲᠠᠢ ᠬᠤᠯᠪᠣᠭᠠᠲᠠᠢ ᠴᠡᠭᠡᠷᠯᠡᠬᠦ ᠵᠦᠢᠯ ᠪᠤᠢ᠃      ᠮᠠᠨᠳᠤᠬᠤ ᠲᠦᠷᠦ ᠶᠢᠨ ᠮᠠᠯᠠᠭᠠᠢ      ᠮᠠᠯᠠᠭᠠᠢ ᠨᠢ ᠬᠤᠷᠴᠠ ᠰᠢᠯᠤᠭᠤᠨ᠂ ᠬᠠᠷᠢᠯᠲᠠ ᠦᠭᠡᠢ ᠶᠢᠨ ᠤᠳᠬ᠎ᠠ ᠪᠡᠯᠭᠡᠳᠡᠭᠰᠡᠨ ᠱᠣᠪᠣᠭᠤᠷ ᠣᠷᠣᠢ ᠲᠠᠢ ᠮᠠᠯᠠᠭᠠᠢ ᠪᠠᠷ ᠬᠥᠮᠥᠨ ᠤ ᠪᠡᠶ᠎ᠡ ᠶᠢ ᠶᠣᠰᠣ ᠲᠦᠷᠦ ᠲᠠᠢ᠂ ᠮᠠᠨᠳᠤᠨ ᠪᠠᠳᠠᠷᠠᠵᠤ ᠶᠠᠪᠤᠬᠤ ᠶᠢ ᠪᠡᠯᠭᠡᠳᠡᠭᠰᠡᠨ ᠪᠠᠶᠢᠨ᠎ᠠ᠃      ᠮᠣᠩᠭᠤᠯ ᠬᠥᠮᠥᠨ ᠮᠠᠯᠠᠭᠠᠢ᠂ ᠪᠦᠰᠡ ᠪᠠᠨ ᠵᠠᠪᠠᠯ ᠲᠡᠭᠰᠢ᠂ ᠵᠥᠪ ᠡᠮᠦᠰᠴᠦ᠂ ᠲᠡᠭᠦᠨ ᠢ ᠪᠠᠨ ᠠᠶᠢᠯ ᠳᠤ ᠵᠣᠴᠢᠯᠠᠬᠤ᠂ ᠠᠯᠢᠪᠠ ᠠᠬ᠎ᠠ ᠵᠠᠬ᠎ᠠ ᠬᠥᠮᠥᠨ ᠲᠠᠢ ᠠᠭᠤᠯᠵᠠᠬᠤ ᠶᠢᠨ ᠡᠮᠦᠨ᠎ᠡ ᠲᠠᠭᠢᠨ ᠨᠢᠭᠲᠠᠯᠠᠳᠠᠭ ᠨᠢ ᠵᠣᠴᠢᠨ ᠢᠶᠠᠨ ᠬᠦᠨᠳᠦᠯᠡᠭᠰᠡᠨ ᠢᠶᠠᠨ ᠢᠯᠡᠷᠬᠡᠶᠢᠯᠡᠵᠦ ᠪᠤᠢ ᠶᠢᠨ ᠰᠢᠨᠵᠢ᠃ ᠮᠠᠯᠠᠭᠠᠢ ᠨᠢ ᠲᠤᠬᠠᠢ ᠶᠢᠨ ᠬᠥᠮᠥᠨ ᠤ ᠨᠡᠶᠢᠭᠡᠮ ᠳᠤ ᠡᠵᠡᠯᠡᠬᠦ ᠪᠠᠶᠢᠷᠢ ᠰᠠᠭᠤᠷᠢ ᠶᠢ ᠢᠯᠡᠷᠬᠡᠶᠢᠯᠡᠳᠡᠭ ᠲᠤᠯᠠ ᠬᠠᠮᠤᠭ ᠤᠨ ᠬᠦᠨᠳᠦᠲᠡᠢ ᠳᠤ ᠲᠣᠭᠠᠴᠠᠭᠳᠠᠳᠠᠭ᠃ ᠮᠣᠩᠭᠤᠯᠴᠤᠳ ᠲᠣᠭᠤᠷᠴᠤᠭ᠂ ᠯᠣᠪᠤᠤᠵᠠ᠂ ᠲᠦᠷᠪᠠᠨ ᠴᠢᠬᠢᠲᠡᠢ ᠱᠣᠪᠣᠭᠤᠷ ᠮᠠᠯᠠᠭᠠᠢ ᠵᠡᠷᠭᠡ ᠥᠪᠡᠷ ᠥᠪᠡᠷ ᠤᠨ ᠵᠣᠷᠢᠭᠤᠯᠤᠯᠲᠠ ᠪᠦᠬᠦᠢ 200 ᠭᠠᠷᠤᠢ ᠨᠡᠷ᠎ᠡ ᠲᠦᠷᠦᠯ ᠤᠨ ᠭᠡᠯᠪᠠᠷᠢ ᠬᠢᠴᠡ ᠲᠠᠢ ᠮᠠᠯᠠᠭᠠᠢ ᠬᠢᠵᠦ᠂ ᠡᠮᠦᠰᠴᠦ ᠡᠳ᠋ᠯᠡᠵᠦ ᠢᠷᠡᠵᠠᠢ᠃ ᠮᠠᠯᠠᠭᠠᠢ ᠶᠢ ᠡᠪᠦᠯ᠂ ᠵᠤᠨ᠂ ᠬᠠᠪᠤᠷ᠂ ᠨᠠᠮᠤᠷ ᠤᠨ ᠬᠡᠮᠡᠨ ᠠᠩᠭᠢᠯᠠᠬᠤ ᠠᠴᠠ ᠭᠠᠳᠠᠨ᠎ᠠ ᠡᠷᠡᠭᠲᠡᠢ᠂ ᠡᠮᠡᠭᠲᠡᠢ᠂ ᠬᠡᠦᠬᠡᠳ ᠤᠨ ᠭᠡᠵᠦ ᠵᠦᠢᠯᠴᠢᠯᠠᠨ᠎ᠠ᠃ ᠮᠠᠯᠠᠭᠠᠢ ᠶᠢ ᠲᠣᠭᠤᠷᠴᠤᠭ ᠣᠷᠣᠢ ᠲᠠᠢ᠂ ᠲᠤᠭᠤᠯᠭ᠎ᠠ ᠣᠷᠣᠢ ᠲᠠᠢ᠂ ᠲᠤᠭ ᠣᠷᠣᠢ ᠲᠠᠢ ᠭᠡᠵᠦ ᠶᠠᠩᠵᠤ ᠪᠦᠷᠢ ᠪᠠᠷ ᠨᠡᠷᠡᠯᠡᠨ᠎ᠠ᠃ ᠮᠠᠯᠠᠭᠠᠢ ᠶᠢᠨ ᠣᠷᠣᠢ ᠶᠢ ᠥᠨᠳᠥᠷ ᠪᠥᠮᠪᠥᠭᠡᠷ ᠬᠢᠵᠦ᠂ ᠨᠠᠷᠠᠨ ᠰᠠᠴᠤᠷᠠᠭ ᠮᠡᠲᠦ ᠰᠢᠷᠢᠭᠡᠰᠤᠨ ᠤ ᠲᠤᠭ᠎ᠠ ᠪᠠᠷ ᠶᠠᠮᠠᠷ ᠶᠠᠰᠤᠳᠠᠨ ᠪᠤᠯᠬᠤ ᠶᠢ ᠲᠣᠳᠣᠷᠠᠭᠤᠯᠵᠤ᠂ ᠣᠷᠣᠢ ᠳᠤ ᠤᠯᠠᠭᠠᠨ ᠵᠠᠯᠠᠭ᠎ᠠ ᠬᠠᠳᠠᠵᠤ᠂ ᠬᠤᠶᠢᠰᠢ ᠬᠤᠶᠠᠷ ᠤᠯᠠᠭᠠᠨ ᠪᠦᠴᠡ ᠭᠠᠷᠭᠠᠨ ᠤᠷᠠᠯᠠᠳᠠᠭ ᠠᠴᠠ ᠮᠣᠩᠭᠤᠯ ᠣᠷᠣᠨ ᠶᠢᠷᠲᠢᠨᠴᠦ ᠳᠤ ᠮᠠᠨᠳᠤᠨ ᠪᠠᠳᠠᠷᠠᠬᠤ ᠪᠣᠯᠲᠤᠭᠠᠢ ᠭᠡᠰᠡᠨ ᠪᠡᠯᠭᠡᠳᠡᠯ ᠲᠠᠢ ᠪᠣᠯᠣᠨ᠎ᠠ᠃ ᠮᠠᠯᠠᠭᠠᠢ ᠳᠤ ᠮᠥᠨ ᠬᠤᠷᠠᠭ᠎ᠠ᠂ ᠦᠨᠡᠭᠡ᠂ ᠪᠤᠯᠠᠭ᠎ᠠ᠂ ᠰᠤᠤᠰᠠᠷ᠂ ᠰᠢᠯᠦᠭᠦᠰᠦᠨ ᠤ ᠦᠰᠦ ᠬᠠᠳᠠᠳᠠᠭ᠃      ᠭᠤᠳᠤᠯ      ᠭᠤᠳᠤᠯ ᠬᠥᠮᠥᠨ ᠤ ᠪᠡᠶ᠎ᠡ ᠶᠢᠨ ᠲᠤᠯᠭᠠᠭᠤᠷᠢ ᠬᠥᠯ ᠤᠨ ᠡᠮᠦᠰᠬᠡᠯ ᠲᠤᠯᠠ ᠲᠤᠯᠵᠤ ᠲᠦᠰᠢᠬᠦ᠂ ᠪᠠᠲᠤ ᠰᠠᠭᠤᠷᠢ ᠲᠠᠢ ᠶᠠᠪᠤᠬᠤ ᠶᠢ ᠪᠡᠯᠭᠡᠳᠡᠳᠡᠭ᠃      ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠡᠷᠲᠡ ᠴᠠᠭ ᠠᠴᠠ ᠠᠷᠠᠰᠤᠨ ᠲᠦᠷᠡᠢ ᠲᠠᠢ᠂ ᠰᠢᠷᠢᠮᠡᠯ ᠤᠯᠠ ᠲᠠᠢ᠂ ᠰᠠᠭᠠᠷᠢ ᠰᠠᠷᠢᠰᠤ ᠬᠠᠪᠴᠢᠭᠤᠯᠤᠭᠰᠠᠨ ᠡᠭᠡᠳᠡᠩ ᠬᠤᠩᠰᠢᠶᠠᠷ ᠲᠠᠢ ᠭᠤᠳᠤᠯ ᠬᠢᠵᠦ ᠡᠮᠦᠰᠴᠡᠢ᠃ ᠭᠤᠳᠤᠯ ᠤᠨ ᠭᠡᠯᠪᠠᠷᠢ ᠬᠢᠴᠡ᠂ ᠵᠠᠭᠪᠤᠷ ᠲᠦᠷᠦᠯ ᠤᠨ ᠬᠤᠪᠢ ᠳᠤ ᠮᠠᠰᠢ ᠤᠯᠠᠨ ᠶᠠᠩᠵᠤ ᠪᠠᠶᠢᠳᠠᠭ᠃ ᠲᠤᠬᠠᠶᠢᠯᠠᠪᠠᠯ᠂ ᠮᠣᠩᠭᠤᠯ ᠭᠤᠳᠤᠯ᠂ ᠪᠦᠷᠢᠶᠠᠳ ᠭᠤᠳᠤᠯ᠂ ᠣᠶᠢᠷᠠᠳ᠂ ᠴᠠᠷᠠᠭ᠂ ᠭᠤᠰᠤᠩ᠂ ᠪᠦᠭᠡ ᠶᠢᠨ ᠭᠤᠳᠤᠯ ᠵᠡᠷᠭᠡ ᠤᠯᠠᠨ ᠶᠠᠩᠵᠤ ᠶᠢᠨ ᠭᠡᠯᠪᠠᠷᠢ᠂ ᠬᠡᠮᠵᠢᠶ᠎ᠡ᠂ ᠥᠩᠭᠡ ᠵᠢᠰᠦ ᠲᠠᠢ ᠭᠤᠳᠤᠯ ᠪᠠᠶᠢᠳᠠᠭ᠃ ᠬᠤᠷᠴᠢᠨ ᠭᠤᠳᠤᠯ ᠢ ᠤᠭᠠᠯᠵᠠ ᠶᠢᠨ ᠬᠢᠨᠢ ᠲᠤᠭ᠎ᠠ ᠪᠠᠷ ᠨᠡᠷᠡᠯᠡᠳᠡᠭ ᠪᠠ ᠭᠤᠣᠯᠳᠠᠭᠤ ᠨᠠᠢᠮᠠ ᠠᠴᠠ ᠭᠤᠴᠢᠨ ᠬᠤᠶᠠᠷ ᠤᠭᠠᠯᠵᠠ ᠲᠠᠢ ᠪᠠᠶᠢᠳᠠᠭ᠃ ᠭᠤᠳᠤᠯ ᠨᠢ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠪᠠᠨ ᠡᠷᠭᠢᠮᠯᠡᠭᠦ᠂ ᠬᠥᠷᠥᠰᠥ ᠰᠢᠷᠣᠢ ᠪᠠᠨ ᠰᠡᠨᠳᠡᠶᠢᠯᠡᠬᠦ ᠦᠭᠡᠢ ᠪᠠᠶᠢᠬᠤ ᠨᠠᠷᠢᠨ ᠪᠡᠯᠭᠡᠳᠡᠯ ᠢ ᠠᠬᠤᠭᠤᠯᠤᠭᠰᠠᠨ ᠡᠭᠡᠳᠡᠩ ᠬᠤᠩᠰᠢᠶᠠᠷ ᠲᠠᠢ ᠪᠠᠶᠢᠳᠠᠭ᠃ ᠬᠠᠭᠠᠳ ᠨᠣᠶᠠᠳ᠂ ᠮᠢᠳᠠᠬᠳᠠᠨ ᠯᠠᠮᠠ ᠨᠠᠷ ᠤᠨ ᠭᠤᠳᠤᠯ ᠢ ᠪᠢᠲᠡᠭᠦᠦ ᠵᠡᠭᠦᠦ ᠣᠷᠢᠶᠠᠬᠤ ᠪᠤᠶᠤ ᠰᠢᠷᠢᠨ ᠬᠥᠭᠡᠮᠡᠶᠢᠯᠡᠬᠦ ᠠᠷᠭ᠎ᠠ ᠪᠠᠷ ᠪᠢᠲᠡᠭᠦᠦ ᠤᠭᠠᠯᠵᠠᠯᠠᠨ ᠤᠷᠠᠯᠠᠳᠠᠭ ᠪᠠᠶᠢᠪᠠ᠃      ᠡᠮᠬᠢᠯᠡᠭᠴᠢ᠄ ᠦᠨᠡᠨᠵᠢᠷᠭᠠᠯ
ᠢᠷᠡᠯᠲᠡ᠄ ᠥᠪᠥᠷ ᠮᠣᠩᠭᠤᠯ ᠤᠨ ᠡᠳᠦᠷ ᠤᠨ ᠰᠣᠨᠢᠨ